“Pebrero 24–Marso 2: “Ang Bili sa mga Kalag Mahinungdanon”

Doktrina ug mga Pakigsaad 18

Adunay daghan kaayong nagkalailaing paagi sa pagsulay sa pagsukod sa bili sa usa ka tawo. Talento, edukasyon, bahandi, ug pisikal nga hitsura makaapekto ang tanan unsaon nato sa pagtimbang-timbang sa usag usa—ug sa atong kaugalingon. Apan sa mga mata sa Dios, ang atong bili mas yano nga butang, ug kini klaro nga gipahayag sa Doktrina ug mga Pakigsaad 18: “Hinumdomi ang bili sa mga kalag mahinungdanon sa panan-aw sa Dios” (bersikulo 10). Ang yanong kamatuoran nagpasabot pag-ayo sa unsay gibuhat sa Dios ug ngano nga gibuhat Niya kini. Nganong gisugo Niya sila si Joseph Smith ug Oliver Cowdery sa pagtukod sa Simbahan ni Jesukristo sa atong panahon? (tan-awa sa mga bersikulo 1–5). Tungod kay ang bili sa mga kalag mahinungdanon. Ngano nga Siya “nagsugo sa tanan nga mga tawo sa tanan nga dapit sa paghinulsol” ug nagpadala og Apostoles sa pagsangyaw og paghinulsol? (bersikulo 9). Tungod kay ang bili sa mga kalag mahinungdanon. Ug ngano nga si Jesukristo nag-antos sa “kamatayon diha sa unod” ug “sa kasakit sa tanan nga mga tawo”? (bersikulo 11). Tungod kay ang bili sa mga kalag mahinungdanon. Kon bisan usa niini nga mga kalag mopili sa pagdawat sa gasa sa Manluluwas, Siya magmaya, kay “dako ang iyang hingpit nga kalipay diha sa kalag nga maghinulsol” (bersikulo 13).

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 18:1–5

“Motukod sa akong simbahan.”

Sa seksiyon 18, ang Ginoo mihatag ni Oliver Cowdery og mga instruksiyon sa pagtabang og pahimutang sa pundasyon sa Simbahan ni Jesukristo. Unsay imong namatikdan mahitungod sa tambag nga Iyang gihatag—ilabi na sa mga bersikulo 1–5? Mahimo nimo nga ikonsiderar sa unsang paagi kining sama nga tambag imong magamit samtang “mopalig-on” sa imong hugot nga pagtuo diha ni Kristo. Pananglitan:

• Unsa ang imong “gitinguha nga mahibalo(an) mahitungod sa Ginoo? (bersikulo 1).

• Unsa ang gipasabot niini nganha kanimo “mosalig niana nga mga butang nga nahisulat”? (bersikulo 3). Sa unsa nga paagi nga ang Espiritu “mipadayag nganha kanimo” nga kining mga butang tinuod? (bersikulo 2; tan-awa usab sa Doktrina ug mga Pakigsaad 6:22–24).

• Sa unsa nga paagi nimo gitukod ang imong kinabuhi “sa tukoranan sa ebanghelyo [sa Manluluwas] ug sa [Iyang] lig-on nga sukaranan”? (bersikulo 5).

Pangutana. Ang Doktrina ug mga Pakigsaad mao ang ebidensya nianang mga pangutana nga mosangpot ngadto sa pagpadayag. Samtang magtuon ka sa mga kasulatan, isulat ang imong mga pangutana. Dayon pamalandongi ug pag-ampo aron makapangita sa mga tubag.

Doktrina ug mga Pakigsaad 18:10–13

“Ang bili sa mga kalag mahinungdanon sa panan-aw sa Dios.”

Unsaon nato sa pagtino sa bili sa usa ka butang? Pananglitan, ngano nga ang usa ka butang sa merkado mas mahal kay sa lain? Samtang basahon nimo ang seksiyon 18 niini nga semana, ilabi na sa mga bersikulo 10–13, mahimo nimong itandi kon sa unsang paagi ang mga tawo kasagaran motino sa bili sa unsay makapahimo sa usa ka kalag nga bililhon sa mga mata sa Dios. Ikonsiderar ang pagpuli sa imong ngalan puli sa mga pulong “kalag,” “mga kalag,” ug “tanang tawo.” Sa unsang paagi nga kining mga bersikulo makatabang sa usa ka tawo kinsa nakapangutana sa iyang bili?

Ania ang pipila ka ubang mga tudling nga nagtudlo mahitungod sa bili sa usa ka kalag: Lucas 15:1–10; Juan 3:16–17; 2 Nephi 26:24–28; Moises 1:39. Base niini nga mga bersikulo, unsaon sa pag-summarize ang paagi sa gibati sa Dios mahitungod kanimo? Mahimo usab nga pangitaon sa mensahe ni Presidente Dieter F. Uchtdorf “Kamo Importante ngadto Kaniya” (Liahona, Nob. 2011, 19–22) sa pagpangita sa mga pulong ug hugpong sa mga pulong nga makatabang nimo nga makahibalo sa imong bili ngadto sa Dios.

Sa unsang paagi ang Dios nagpakita kanimo nga ikaw dako og bili ngadto Kaniya? Sa unsa nga paagi kini makaapekto sa paagi sa imong pagbati mahitungod sa imong kaugalingon ug sa uban?

Tan-awa usab sa Joy D. Jones, “Bili nga Dili Masukod,” Liahona, Nob. 2017, 13–15; Topics and Questions [Mga Hilisgotan ug mga Pangutana], “Children of God [Mga Anak sa Dios],” Gospel Library.

Doktrina ug mga Pakigsaad 18:11–16

Ang Ginoo magmaya kon kita maghinulsol.

Obserbahi makapila ang mga pulong sama sa paghinulsol ug hinulsol gigamit sa tibuok Doktrina ug mga Pakigsaad 18. Palandonga unsay imong makat-onan gikan niini nga mga pulong matag higayon nga kini gigamit. Ikonsiderar ilabi na ang mga bersikulo 11–16. Sa unsa nga paagi nga kini nga mga bersikulo makaapekto sa imong pagbati mahitungod sa paghinulsol—sa imong kaugalingon nga paghinulsol ug sa katungdanan sa pagdapit sa ubang mga tawo sa paghinulsol ug pagpalambo? Aniay usa ka paagi sa pagsulat unsay imong nakat-onan: paglista og daghang paagi nga ikaw makakompleto sa kapahayag “Ang paghinulsol .”

Tan-awa usab sa Alma 36:18–21; Ang Giya ngadto sa mga Kasulatan, “Paghinulol,” Gospel Library; Dale G. Renlund, “Paghinulsol: Usa ka Mahimayaon nga Pagpili,” Liahona, Nob. 2016, 121–24.

Detalye gikan sa Ang Mausikon nga Anak, ni Clark Kelley Price

Doktrina ug mga Pakigsaad 18:14–16

Ang hingpit nga kalipay magagikan sa pagtabang sa uban nga moduol ngadto ni Kristo.

Samtang imong basahon ang mga bersikulo 14–16, palandonga unsa ang gipasabot sa “pagsangyaw og paghinulsol”—ug ngano nga makahatag kini og hingpit nga kalipay. Unsa ang pipila ka paagi ang imong nakit-an sa pagtabang sa uban nga moduol ngadto sa Manluluwas ug modawat og kapasayloan? Sa unsa nga paagi nga ang ubang tawo nakahimo niana alang kanimo?

Tan-awa usab sa Craig C. Christensen, “Wala Nay Labaw ka Talagsaon ug Makapahimuot ingon sa Akong Hingpit nga Kalipay,” Liahona, Mayo 2023, 45–47.

Doktrina ug mga Pakigsaad 18:34–36

Madungog nako ang tingog sa Ginoo diha sa mga kasulatan.

Kon adunay tawo nga mangutana nimo sama sa unsa ang tingog sa Ginoo, unsa man ang imong isulti? Hunahunaa kini nga pangutana samtang magbasa ka sa Doktrina ug mga Pakigsaad 18:34–36. Unsay imong nakat-onan mahitungod sa tingog sa Ginoo gikan sa pagbasa sa Doktrina ug mga Pakigsaad? Unsay mahimo nimong buhaton aron madungog ang Iyang tingog og mas klaro?

Tan-awa usab sa “Sa Ako nga Pagsiksik sa Balaang Kasulatan,” Mga Himno, nu. 175.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Oliver Cowdery

• Mga Kapanguhaan sa Kasaysayan sa Doktrina ug mga Pakigsaad: David Whitmer

• Umahan sa Whitmer: Dapit sa Pagka-organisar sa Simbahan

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 18:10–13

Kada usa kanato mahinungdanon ang bili ngadto sa Dios.

• Samtang ikaw ug ang imong mga anak mobasa sa Doktrina ug mga Pakigsaad 18:10–13, ikonsiderar ang pagpuli sa matag ngalan sa usag usa puli sa mga pulong nga “kalag,” “mga kalag,” ug “tanan nga mga tawo.” Dayon mahimo nimong hisgotan kon sa unsa nga paagi kini nga mga bersikulo makatabang nato nga makasabot unsay gibati sa Langitnong Amahan sa matag usa kanato.

• Mahimo usab nimong pangutan-on ang mga bata mahitungod sa mga butang nga giisip sa mga tawo nga bililhon. O mahimo nimong pakit-on sila og butang nga bililhon nganha kanimo. Unsaon nato pagtratar ang mga butang nga bililhon kanato? Papuli-puliha sila sa pagtan-aw diha sa salamin. Samtang buhaton nila, sultihi ang matag bata nga sila usa ka anak sa Dios ug mahinungdanon ang ilang bili. Unsaon nato sa pagpakita sa uban nga “ang bili sa [ilang] mga kalag mahinungdanon” sa atong panan-aw?

• Sa paghatag og gibug-aton nga ang tanang tawo adunay mahinungdanon nga bili ngadto sa Langitnong Amahan, ang imong mga bata mahimong motan-aw sa litrato sa kataposan niini nga latid samtang imong basahon ang Doktrina ug mga Pakigsaad 18:10–13.

Detalye gikan sa Bili sa usa ka Kalag, ni Liz Lemon Swindle

Doktrina ug mga Pakigsaad 18:13–16

Ang pagpakigbahin sa ebanghelyo nagdala og hingpit nga kalipay.

• Aron sa pagdasig sa imong mga bata sa pagpakigbahin sa ebanghelyo ni Jesukristo, mahimong mag-istorya kamo sa usag usa mahitungod sa mga kasinatian sa dihang inyong nakaplagan ang butang nga gusto ninyo ipakigbahin sa inyong mga higala o pamilya. Ngano nga gusto nimo nga mopakigbahin niini, ug unsay imong gibati sa pagpakigbahin niini? Dayon mahimong basahon nimo ang Doktrina ug mga Pakigsaad 18:13, 16. Unsa ang nakahatag sa Ginoo og hingpit nga kalipay? Unsa ang Iyang gisulti nga makahatag nato og hingpit nga kalipay? Ikaw ug ang imong mga anak mahimong mag-istorya mahitungod sa bisan unsa nga mga kasinatian nga imong nasinati sa pagpakigbahin sa hingpit nga kalipay sa ebanghelyo sa Manluluwas.

• Usa ka kanta mahitungod sa ebanghelyo, sama sa “Gusto Ko Karon nga Mamisyonaryo” (Songbook sa mga Bata, 90) makatabang sa inyong mga anak og mga ideya sa paghunahuna og mga paagi nga mahimo nilang ipakigbahin ang ebanghelyo.

Doktrina ug mga Pakigsaad 18:34–36

Madungog nako ang tingog sa Ginoo diha sa mga kasulatan.

• Ang imong mga anak mahimong malingaw sa usa ka dula diin ilang sulayan sa pag-ila ang mga tingog sa lain-laing mga tawo, sama sa mga sakop sa pamilya, mga higala, o mga lider sa Simbahan. Unsaon nato sa pag-ila ang mga tingog sa usag usa? Unsaon nato sa pag-ila ang tingog sa Ginoo? Mahimong basahon ninyo pagdungan ang Doktrina ug mga Pakigsaad 18:34–36 aron hisgotan kini nga pangutana. Mahimo usab kamong mopakigbahin sa usag usa sa unsa nga paagi ninyo nadungog ang tingog sa Ginoo diha sa mga kasulatan.

Alang sa dugang nga mga ideya, tan-awa ang isyu karong bulana sa Higala nga magasin.

Ang matag usa bililhon ngadto sa Dios.