Marso 17–23: “Tinguhaa ang mga Butang sa Mas Maayo nga Kalibotan”

Doktrina ug mga Pakigsaad 23–26

Alang sa kadaghanan sa mga tawo, ang pagpabunyag usa ka balaan nga kamatinahoron, malinawon nga kasinatian. Apan ang bunyag ni Emma Smith ug sa uban gibalda sa manggugubot nga panon kinsa mibugalbugal nila, mihulga nila, ug mipugos nila sa pagpahawa. Wala madugay, sa dihang si Joseph mokompirmar na unta sa bag-ong mga miyembro, gidakop siya tungod kay nakasamok siya sa komunidad tungod sa iyang pagsangyaw. Sa tanan niini nga pagsupak, sa unsang paagi nga si Emma nakakaplag og kaseguroan nga nagbuhat siya sa unsay matarong? Sa samang paagi kitang tanan makakaplag niini—pinaagi sa pagpadayag gikan sa Ginoo. Siya namulong kang Emma bahin sa “mga butang sa maayo [nga kalibotan]”—Iyang gingharian—ug ang iyang luna dinhi niini. Siya misulti kaniya nga dili mahadlok, nga “ipataas ang [iyang] kasingkasing ug maglipay,” ug “mohupot ngadto sa mga pakigsaad nga [iyang] gihimo.” Ug kini nga mga pulong sa pagdasig ug tambag mao ang Iyang “tingog ngadto sa tanan” (Doktrina ug mga Pakigsaad 25:9–10, 13, 16).

Tan-awa usab sa Mga Santos, 1:101–102, 106–110.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 24

Ang Manluluwas makabayaw kanako “gikan sa [akong] mga kasakit.”

Ang pagpadayag diha sa Doktrina ug mga Pakigsaad 24 gihatag aron sa “paglig-on, pagdasig, ug pagtudlo” ni Joseph ug ni Oliver sa usa ka panahon sa pagsulay (ulohan nga seksiyon; tan-awa usab sa Mga Santos, 1:94–96). Pangitaa ang mga pulong diha sa Doktrina ug mga Pakigsaad 24 nga sa imong pamati nakapalig-on ug nakapadasig nila.

Unsay gisugyot sa mosunod nga mga kasulatan diha nimo mahitungod kon sa unsang paagi nga ang Manluluwas motabang nimo sa imong mga hagit?

Doktrina ug mga Pakigsaad 24:1–3

Doktrina ug mga Pakigsaad 24:8

Doktrina ug mga Pakigsaad 121:7–8

Isaias 40:28–31

Mosiah 24:14–15

Detalye gikan sa He Healed Many of Diverse Diseases [Giayo Niya ang Daghan sa Nagkalain-laing mga Sakit], ni J. Kirk Richards

Doktrina ug mga Pakigsaad 25

Ako adunay importante nga tahas nga angayng buhaton diha sa gingharian sa Dios.

Samtang nagtan-aw si Emma Smith sa Pagpahiuli nga gipahibalo pinaagi sa iyang bana, si Joseph Smith, tingali naghunahuna siya kon unsa kaha ang iyang tahas. Pangitaa ang mga tubag nga gihatag sa Ginoo diha sa Doktrina ug mga Pakigsaad 25. Aduna ka bay nakit-an niini nga seksiyon nga imong nabati ang Iyang “tingog nganha [kanimo]”? (bersikulo 16).

Tan-awa usab sa “An Elect Lady” (bidyo), Gospel Library; “Thou Art an Elect Lady,” diha sa Konteksto sa mga Pagpadayag [Revelations in Context], 33–39; Joy D. Jones, “Usa ka Talagsaong Balaanon nga Tawag,” Liahona, Mayo 2020, 15–18.

"An Elect Lady"

(D&C 25:2-3) Video portraying events in the life of Emma Smith.

Doktrina ug mga Pakigsaad 25:5, 14

“Pagpadayon diha sa espiritu sa kaaghop.”

Unsa ang kahulogan alang nimo sa kapulongan nga “sa espiritu sa kaaghop”? Ikonsiderar ang pagpangita sa seksiyon 25 alang sa mga pulong ug mga kapulongan nga makatabang nimo nga masabtan kon unsay kahulogan nga magmahimong maaghop. Ang mensahe ni Elder David A. Bednar “Maaghop ug Mapaubsanon sa Kasingkasing” mahimong makatabang usab (Liahona, Mayo 2018, 30–33). Sa unsang paagi nga si Jesukristo usa ka ehemplo sa kaaghop nganha nimo? (tan-awa sa Mateo 11:28–30). Hunahunaa ang mga butang sa imong kinabuhi nga imong mabuhat “diha sa espiritu sa kaaghop.”

Doktrina ug mga Pakigsaad 25:10, 13

“Isalikway ang mga butang niini nga kalibotan, ug pangitaa ang mga butang nga maayo.”

Samtang mamalandong ka sa tambag sa Ginoo diha sa Doktrina ug mga Pakigsaad 25:10, tingali makatabang ang paglista sa “mga butang niining kalibotan” nga gusto Niya nga inyong “isalikway.” Dayon mahimo nimong ilista ang “mga butang sa mas maayo [nga kalibotan]” nga gusto Niya nga inyong tinguhaon. Mahimo ka nga mopili og labing minos usa ka butang gikan sa unang lista nga imong isalikway ug usa ka butang gikan sa imong ikaduha nga lista nga imong tinguhaon.

Si Presidente Russell M. Nelson mihatag og tambag ug mga saad mahitingod sa “pagsalikway sa daghang mga butang niini nga kalibotan.” Pangitaa kini diha sa pahina 77 sa iyang mensahe “Espirituhanon nga mga Bahandi” (Liahona, Nob. 2019). Sa unsang paagi nga imong masunod kini nga tambag?

Samtang magbasa ka sa bersikulo 13, hunahunaa ang mga pakigsaad nga imong gihimo ngadto sa Langitnong Amahan ug ni Jesukristo. Unsa ang ipasabot sa “hupot ngadto” niini nga mga pakigsaad? Sa unsang paagi nga ang imong mga pakigsaad makatabang nimo nga “mosalikway sa mga butang niini nga kalibotan, ug pangitaa ang mga butang nga maayo”?

Ania ang pipila sa uban nga mga kasulatan nga makatabang nimo sa pag-ila tali sa “mga butang niini nga kalibotan” ug “mga butang sa mas maayo nga kalibotan”: Mateo 6:19, 21, 25–34; Lucas 10:39–42; 2 Nephi 9:51.

Modapit sa pagpakigbahin. Kon nagtudlo ka sa uban kon unsaon nga “mosalikway sa daghang mga butang niini nga kalibotan,” ikonsiderar ang mga paagi sa pagdapit nila sa pagpakigbahin kon unsay ilang gihimo sa pagsunod niini nga tambag. Makakuha kita og dakong kalig-on ug kadasig gikan sa pagpaminaw sa mga ideya ug mga kasinatian sa usag usa.

Doktrina ug mga Pakigsaad 25:11–12

Ang Ginoo nahimuot sa akong “awit sa kasingkasing.”

Unsa man ang pipila sa imong “[mga] awit sa kasingkasing”—mga awit nga nagpahayag sa imong mga pagbati mahitungod sa Langitnong Amahan o ni Jesukristo? Ikonsiderar ang pagkanta o pagpaminaw sa pipila niini. Unsay anaa nini nga mga awit nga nakapahimo niining espesyal nganha nimo?

Mahimo usab ka nga mamalandong kon sa unsang paagi nga kini nga mga himno susama sa usa ka pag-ampo. Unsa ang komon sa musika ug pag-ampo? Sa unsang paagi nga ang imong sagrado nga mga awit “gitubag uban sa usa ka panalangin”?

Tan-awa usab sa “O, Unsa ang Awit sa Kasingkasing,” Mga Himno, nu. 178.

Doktrina ug mga Pakigsaad 26:2

“Ang tanan nga mga butang mabuhat nga inuyonan sa kadaghanan diha sa simbahan.”

Ang kapulongan nga “inuyonan sa kadaghanan” niini nga bersikulo nagpasabot nga paglihok sa pagpataas sa atong mga kamot aron ipakita nga kita mopaluyo ug mosuporta sa usa ka tawo nga nakadawat og katungdanan o na-orden sa pagkapari. Unsaon nimo sa pagpasabot ngadto sa usa ka bisita diha sa panagtigom sa Simbahan kon unsay ipasabot niini kon kita mopaluyo sa usa ka tawo? Unsa nga mga tubag ang imong nakit-an diha sa mensahe ni Presidente Henry B. Eyring “Ang Kalig-on nga Naggikan sa Hugot nga Pagtuo diha sa Pagpaluyo”? (Liahona, Mayo 2019, 58–60).

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Emma Hale Smith

• Mga Himno

• Inuyunan sa Kadaghanan

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 24:1, 8

Ang Manluluwas makabayaw kanako “gikan sa [akong] mga kasakit.”

• Sa pagkat-on bahin sa pipila sa mga kasakit o mga hagit nga giatubang ni Joseph Smith ug sa nahaunang mga Santos, mahimo nimong rebyohon ang “Kapitulo 11: Daghang mga Katawhan Nagpasakop sa Simbahan,” diha sa Mga Istorya sa Doktrina ug mga Pakigsaad, 46–47, o ang katugma nga bidyo diha sa Gospel Library. Dayon madiskobrehan nimo ug sa imong mga anak kon unsay gisulti sa Ginoo ngadto ni Joseph mahitungod sa iyang mga kasakit Doktrina ug mga Pakigsaad 24:1, 8. Mahimo usab kamo nga mopakigbahin sa usag usa kon giunsa sa Ginoo sa pagtabang kaninyo atol sa lisod nga mga panahon.

  Chapter 11: More People Join the Church: April–June 1830

• Unsa ang gitudlo kanato sa Doktrina ug mga Pakigsaad 24:8 mahitungod sa pailob? Sa unsang paagi nga ang Manluluwas mopahibalo nato nga Siya “uban [kanato]” sa panahon sa atong mga kasakit?

  Continue in Patience

  Patience requires that we obey God's commandments and faithfully wait for His will to be fulfilled.

Doktrina ug mga Pakigsaad 25:11–12

Nahimuot si Jesus “sa awit sa kasingkasing.”

• Human sa pagbasa sa Doktrina ug mga Pakigsaad 25:12, mahimo kamo nga mosulti sa usag usa mahitungod sa inyong paborito nga himno o awit sa Simbahan—inyong “awit sa kasingkasing”—ug magdungan sa pagpanganta niini. Mopakigbahin sa usag usa kon ngano nga ganahan kamo niini nga mga awit. Ngano nga malipay man ang Ginoo kon kita mokanta niini nga mga awit? Sa unsang paagi nga ang atong pagkanta sama sa “usa ka pag-ampo ngadto [Kaniya]”?

Doktrina ug mga Pakigsaad 25:13, 15

Ang akong pakigsaad ngadto sa Langitnong Amahan makahatag nako og hingpit nga kalipay.

• Aron masabtan kon unsay ipasabot sa “paghupot ngadto sa mga pakigsaad” (Doktrina ug mga Pakigsaad 25:13), ang imong mga bata mahimong magpulipuli sa paggunit sa usa ka butang og hugot kaayo kutob sa ilang mahimo. Dayon ikaw ug ang imong mga anak mahimong maghisgot kon unsaon nga kamo “mohupot” o mogunit og maayo sa inyong mga pakigsaad. Kon gikinahanglan, rebyoha uban sa imong mga anak ang mga pakigsaad nga atong gihimo (tan-awa sa Mosiah 18:8–10; Doktrina ug mga Pakigsaad 20:37; ug ang pahina sa kalihokan karong semanaha).

• Aron mahatagan ang imong mga bata sa konteksto alang sa Doktrina ug mga Pakigsaad 25:13, mahimo nimong ipasabot nga mao kini ang usa ka butang nga gisulti sa Ginoo kang Emma Smith human dayon sa iyang bunyag. Nganong maayo man kini nga tambag alang sa usa ka tawo nga bag-ohay lang gibunyagan?

Alang sa dugang nga mga ideya, tan-awa ang isyu karong bulana sa Higala nga magasin.

Emma’s Hymns [Mga Himno ni Emma], ni Liz Lemon Swindle