Marso 10–16: “Ang Pag-uswag sa Simbahan ni Kristo”

Doktrina ug mga Pakigsaad 20–22

Ang buhat sa Manluluwas sa pagpatungha sa Basahon ni Mormon nahuman na. Apan ang Iyang buhat sa Pagpahiuli mao pa lamang ang pagsugod. Agi og dugang sa pagpahiuli sa doktrina ug sa awtoridad sa pagkapari, ang Ginoo miklaro niini pinaagi sa nag-unang mga pagpadayag nga Siya gusto usab nga mopahiuli og usa ka pormal nga organisasyon—Iyang Simbahan (tan-awa sa Doktrina ug mga Pakigsaad 10:53; 18:5). Niadtong Abril 6, 1830, kapin sa 40 ka tumutuo ang naghugop ngadto sa balay nga ginama sa troso sa pamilyang Whitmer didto sa Fayette, New York, aron sa pagsaksi sa pag-organisar sa Simbahan ni Jesukristo.

Ang ubang mga tawo naghunahuna kon nganong ang usa ka giorganisar nga Simbahan kinahanglanon pa man. Ang tubag mahimong makit-an, bisan tipik, diha sa mga pagpadayag nga may kalabotan nianang unang panagtigom sa Simbahan niadtong 1830. Gihulagway nila ang mga panalangin nga dili mahimong posible kon ang tinuod nga Simbahan ni Jesukristo wala pa “gitukod ug gipahimutang” sa ulahing mga adlaw (Doktrina ug mga Pakigsaad 20:1).

Tan-awa usab sa Mga Santos, 1:94–97; “Build Up My Church [Itukod ang Akong Simbahan],” diha sa Konteksto sa mga Pagpadayag [Revelations in Context], 29–32.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 20–21

Si Jesukristo mipahiuli sa Iyang Simbahan.

Ngano man nga kita adunay usa ka giorganisar nga Simbahan? Tingali ang labing maayo nga tubag mao ang “Tungod kay si Jesukristo mi-organisar og usa kaniadto.” Samtang magtuon ka sa Doktrina ug mga Pakigsaad 20–21, tingali makamatikod ka og mga kasusama tali sa Simbahan nga Iyang giestablisar sa karaang panahon ug sa Simbahan nga Iyang gipahiuli karon. Gamita ang mosunod nga mga bersikulo sa pagkat-on mahitungod sa Simbahan sa Manluluwas sa karaang panahon: Mateo 16:15–19; Juan 7:16–17; Mga Taga-Efeso 2:19–22; 3 Nephi 11:23–26; Moroni 4–5. Gamita kini nga mga bersikulo sa pagkat-on mahitungod sa gipahiuli nga Simbahan: Doktrina ug mga Pakigsaad 20:17–25, 60, 72–79; 21:1–2. Mahimo nimong irekord unsay imong makit-an diha sa usa ka tsart sama niining usa:

	Doktrina	Mga Ordinansa	Awtoridad sa pagkapari	Mga propeta
Karaang Simbahan ni Kristo	Doktrina	Mga Ordinansa	Awtoridad sa pagkapari	Mga propeta
Gipahiuli nga Simbahan ni Kristo	Doktrina	Mga Ordinansa	Awtoridad sa pagkapari	Mga propeta

Unsay imong nakat-onan gikan niini nga kalihokan kon nganong si Jesukristo miestablisar—ug mipahiuli—sa Iyang Simbahan?

Tan-awa usab sa Dallin H. Oaks, “Ang Panginahanglan alang sa usa ka Simbahan,” Liahona, Nob. 2021, 24–26.

Modapit sa pagpakigbahin. Kon ikaw modapit sa mga tawo sa pagpakigbahin sa unsay ilang nakat-onan sa ilang kaugalingon, mobati sila og kadasig sa pagpadayon sa ilang personal nga pagtuon. Unsa ang madapit nimo sa uban nga ipakigbahin?

Doktrina ug mga Pakigsaad 20:37, 75–79; 22

Ang sagrado nga mga ordinansa makatabang nako nga mahimong sama sa Manluluwas.

Sa dihang naorganisar ang Simbahan, ang Ginoo mitudlo sa Iyang mga Santos mahitungod sa sagradong mga ordinansa, lakip sa bunyag ug sa sakramento. Samtang magbasa ka mahitungod niini nga mga ordinansa, pamalandongi kon sa unsang paagi nga makatabang kini nimo nga makonektar sa Manluluwas. Pananglitan, sa unsang paagi nga kini nga mga ordinansa makatabang nimo nga magpadayon ang imong “hugot nga tinguha sa pag-alagad [ni Jesukristo] ngadto sa kataposan”? (bersikulo 37). Mahimo usab nimong basahon ang mga pag-ampo sa sakramento (mga bersikulo 77, 79) ug maghanduraw nga nadungog nimo kini sa unang higayon. Unsa nga mga ideya ang imong nadawat?

Tan-awa usab sa D. Todd Christofferson, “Nganong Mahinungdanon ang Dalan sa Pakigsaad,” Liahona, Mayo 2021, 116–19.

Doktrina ug mga Pakigsaad 20:38–60

Ang pagserbisyo sa pagkapari nakapanalangin sa mga miyembro sa Simbahan ug sa ilang mga pamilya.

Nakahunahuna ka ba kon nganong importante kadto sa Manluluwas nga ipahiuli ang pagkapari diha sa Iyang Simbahan? Ang pagbasa sa unsay Iyang ipabuhat sa mga naghupot sa pagkapari diha sa Doktrina ug mga Pakigsaad 20:38–60 tingali makahatag nimo og pipila ka ideya. Sa unsang paagi nga ang Manluluwas mipanalangin nimo ug sa imong pamilya pinaagi sa buhat nga gihulagway niini nga mga bersikulo?

Agi og dugang niadtong giorden ngadto sa pagkapari, ang mga babaye nga gi-set apart aron moserbisyo diha sa Simbahan naggamit usab sa awtoridad sa Dios samtang moapil sila sa Iyang buhat. Aron makat-on kon unsaon, tan-awa sa mensahe ni Presidente Dallin H. Oaks “Ang mga Yawe ug Awtoridad sa Pagkapari” (Liahona, Mayo 2014, 49–52).

Doktrina ug mga Pakigsaad 21

Ang pagsunod sa pulong sa Dios pinaagi sa Iyang mga propeta makahatag nako og balaanong proteksiyon.

Ang Doktrina ug mga Pakigsaad 21:4–9 naglangkob og mga pagdapit sa pagsunod sa propeta sa Ginoo ug gamhanang mga saad alang sa mga tawo nga mobuhat niini. Ang mosunod nga mga ideya makatabang nimo sa pagpamalandong niini nga mga bersikulo:

• Unsa nga mga pulong diha sa mga bersikulo 4–5 ang naghulagway sa unsay gusto sa Manluluwas nga imong buhaton sa mga pulong sa Iyang buhi nga propeta? Sa imong pamati nganong ang “pagpailob ug hugot nga pagtuo” gikinahanglan man sa pagbuhat niini?

• Pamalandongi ang deskripsiyon nga gigamit sa Manluluwas diha sa bersikulo 6 aron sa paghulagway sa mga panalangin sa pagsunod sa Iyang propeta. Sa imong hunahuna unsa ang ipasabot sa “ang mga ganghaan sa impyerno”? Sa unsang paagi nga ang Ginoo “mopatibulaag sa mga gahom sa kangitngit” alang kanimo? Unsa ang ipasabot sa “mga langit nga mokurog alang sa imong kaayohan”?

• Unsa ang gihangyo sa Ginoo nga buhaton nimo pinaagi sa kasamtangan nga Presidente sa Simbahan? Sa unsang paagi nga ang Ginoo mituman sa Iyang mga saad samtang gisunod nimo ang Iyang tambag?

Ilista ang dugang nga mga ideya nga imong nakuha gikan sa mosunod nga mga seksiyon sa mensahe ni Elder Neil L. Andersen “Ang Propeta sa Dios” (Liahona, Mayo 2018, 24–27):

• Nganong Mosunod Kita sa Propeta:

• Ang Magbalantay sa Tore:

• Ayaw Katingala:

Tan-awa usab sa “Watchman on the Tower” (bidyo), ChurchofJesusChrist.org; Topics and Questions [Mga Hilisgotan ug mga Pangutana], “Prophets [Mga Propeta],” Gospel Library; “Maminaw Kita sa Propeta,” Mga Himno, nu. 16.

Watchman on the Tower

(Ezekiel 33:1-7) The Lord calls prophets to be the "watchmen" on the tower.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Peter Whitmer Sr.

• Umahan sa Whitmer: Dapit sa Pagka-organisar sa Simbahan

• Miting sa Pagsugod sa Simbahan ni Kristo

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 20–21

Ang Simbahan ni Jesukristo gipahiuli.

• Ikonsiderar ang paggamit sa ulohan nga seksiyon sa Doktrina ug mga Pakigsaad 21, kapitulo 9 sa Mga Istorya sa Doktrina ug mga Pakigsaad, o sa bidyo nga “Organization of the Church” (ChurchofJesusChrist.org) aron matabangan ang imong mga anak nga makasabot sa unsay nahitabo sa adlaw nga ang Simbahan giorganisar.

  Chapter 9: Organization of the Church of Jesus Christ: 6•April 1830

• Tingali ang imong mga anak mahimong mopatugma sa mga hulagway ni Jesukristo, usa ka tawo nga nangalagad, usa ka bunyag, ug sa sakramento ngadto sa mga bersikulo diha sa seksiyon 20 (tan-awa sa mga bersikulo 21–23, 47, 72–74, 75–79). Gamita kini nga mga hulagway ug mga bersikulo sa paghisgot sa mga panalangin nga anaa nato tungod kay gipahiuli ni Jesukristo ang Iyang Simbahan.

Doktrina ug mga Pakigsaad 20:37, 41, 71–74

Sa higayon nga ako gibunyagan ug gikompirmahan, ako nagsaad nga mosunod ni Jesukristo.

• Ang imong mga anak tingali malingaw nga magtan-aw og hulagway sa usa ka bata ng gibunyagan ug gikompirmahan. Mahimo sila nga mopasabot kon sa unsang paagi nga nagtukma kini sa mga panudlo diha sa Doktrina ug mga Pakigsaad 20:41, 71–74. Unsa ang atong makat-onan gikan sa Doktrina ug mga Pakigsaad 20:37 mahitungod sa mga tawo nga gusto nga magpabunyag? Mahimo usab kamo nga manganta og dungan sa “Kon Ako Bunyagan” (Songbook sa mga Bata, 53) o motan-aw sa bidyo nga “The Baptism of Jesus [Ang Bunyag ni Jesus]” (Gospel Library).

  The Baptism of Jesus

  Jesus seeks out John the Baptist and is baptized in order to fulfill all righteousness.

  

• Kon ang imong mga anak nabunyagan ug nakompirmahan na, pangutan-a sila mahitungod sa ilang kasinatian. Aduna ba silay mga litrato nga mahimo nilang ipakigbahin? Pakigsulti nila mahitungod sa kon unsay ilang gibuhat aron mosunod ni Jesukristo ug sa unsang paagi nga Siya mipanalangin nila.

Doktrina ug mga Pakigsaad 20:75–79

Makahimo ko sa pagdala sa ngalan ni Jesus ngari kanako ug sa kanunay mohinumdom Kaniya.

• Ang imong mga anak mahimong mangita sa pulong nga “andam” diha sa Doktrina ug mga Pakigsaad 20:37 (mahitungod sa bunyag) ug sa bersikulo 77 (ang pag-ampo sa sakramento). Unsa ang gusto ni Jesukristo nga atong andam nga buhaton? Tingali ang imong mga anak mahimong mangita og usa ka butang nga adunay ngalan diha niini (sama sa usa ka marka sa butang o personal nga ngalan). Unsa ang gisulti sa ngalan mahitungod sa butang? Unsa ang ipasabot sa pagdala sa ngalan ni Jesukristo ngari kanato?

• Ikonsiderar ang pagbasa og dungan sa Doktrina ug mga Pakigsaad 20:77 ug ang paghangyo sa imong mga anak sa pag-ila sa mga saad nga atong himoon isip kabahin sa sakramento. Tingali mahimo sila nga magpulipuli sa pagdrama-drama sa usa ka butang nga ilang buhaton aron “kanunay nga mohinumdom” sa Manluluwas ug motag-an kon unsay mga aksiyon nga gihimo sa usag usa. Sumala sa bersikulo 77, sa unsang paagi nga kita mapanalanginan kon kita sa kanunay mohinumdom sa Manluluwas?

Doktrina ug mga Pakigsaad 21:4–6

Si Jesus mopanalangin nako samtang mosunod ko sa Iyang propeta.

• Human sa pagdiskobre sa mga pagdapit ug mga saad diha sa Doktrina ug mga Pakigsaad 21:4–6, ang imong mga bata mahimong motan-aw sa usa ka litrato sa kasamtangan nga propeta ug mopakigbahin og usa ka butang nga ilang nakat-onan o nadungog gikan niya. Mopakigbahin sa usag usa og mga paagi nga si Jesukristo mipanalangin ninyo sa pagsunod sa Iyang propeta.

Alang sa dugang nga mga ideya, tan-awa ang isyu karong bulana sa Higala nga magasin.

Oliver Cowdery Ordains Joseph Smith [Si Oliver Cowdery nga Nag-orden ni Joseph Smith], ni Walter Rane