Detalye gikan sa Dalan sa Getsemani, ni Steve McGinty

Marso 3–9: “Pagkat-on Kanako”

Doktrina ug mga Pakigsaad 19

Miabot og katuigan alang ni Martin ug ni Lucy Harris nga makaangkon sa usa sa labing nindot nga umahan sa Palmyra, New York. Apan niadtong 1829 naklaro nga ang Basahon ni Mormon mahimong mamantala lang kon iprenda ni Martin ang iyang umahan aron makabayad sa tig-imprinta. Si Martin nakaangkon og pagpamatuod sa Basahon ni Mormon, apan si Lucy wala. Kon gipadayon ni Martin ang pagprenda ug ang Basahon ni Mormon dili kaayo mohalin, mawala kaniya ang iyang umahan ug maangin ang iyang kaminyoon, ug madaot ang iyang reputasyon sa komunidad. Bisan og ang atong mga sirkumstansiya lahi sa kang Martin, sa usa ka panahon o sa lain kitang tanan nag-atubang og malisod nga mga pangutana sama niadtong iyang giatubang: Unsa ang bili sa ebanghelyo ni Jesukristo ngari kanako? Unsay andam nakong isakripisyo aron pagtabang sa pagtukod sa gingharian sa Dios? Sa kataposan nakahukom si Martin Harris nga iyang iprenda ang iyang umahan aron ang unang 5,000 ka kopya sa Basahon ni Mormon maimprinta. Apan bisan niini nga sakripisyo—ug sa bisan unsa nga sakripisyo nga atong himoon—gamay ra itandi ngadto sa sakripisyo ni Jesukristo, “ang labing halangdon sa tanan” (Doktrina ug mga Pakigsaad 19:18), kinsa miagas ang dugo sa matag lungag aron sa pagluwas sa mahinulsolon.

Alang sa dugang impormasyon mahitungod sa pagmantala sa Basahon ni Mormon, tan-awa sa Mga Santos, 1:85–94.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 19:1–12

“Ako, ang Dios, walay kataposan.”

Si Joseph Smith mipasabot nga ang pagpadayag diha sa seksiyon 19 “usa ka sugo … ngadto ni Martin Harris, gihatag kaniya kinsa Mahangtoron” (ulohan sa seksiyon). Pangita og mga dapit diha sa mga bersikulo 1–12 diin ang Ginoo mihatag og gibug-aton sa Iyang mahangtoron nga kinaiyahan. Ngano kaha nga importante alang ni Martin Harris nga makaila sa Ginoo? Nganong importante alang kanimo nga makahibalo niini?

Ngano sa imong hunahuna nga si Jesukristo gitawag og “ang sinugdanan ug ang kataposan”? (bersikulo 1).

Doktrina ug mga Pakigsaad 19:15–20

Si Jesukristo nag-antos aron nga ako makahinulsol ug makaduol ngadto Kaniya.

Ang Bag-ong Tugon naghulagway sa pag-antos sa Manluluwas didto sa Getsemani gikan sa panglantaw sa mga tawo nga nag-obserbar niini. Sa Doktrina ug mga Pakigsaad 19:15–20, gisulti ni Jesukristo ang mahitungod sa Iyang pag-antos diha sa Iyang kaugalingong mga pulong. Samtang magbasa ka niining sagrado personal nga asoy, pangitaa ang mga pulong nga naghulagway sa pag-antos sa Manluluwas. Hunahunaa kon unsa ang gitudlo sa matag pulong o hugpong sa mga pulong diha nimo. Nganong ang Manluluwas andam nga mag-antos? Makadiskobre pa ikaw og dugang diha sa Juan 15:13; Mosiah 3:7; Alma 7:11–12; Doktrina ug mga Pakigsaad 18:10–13.

Ang imong mga pagbati samtang nagtuon ka sa pag-antos sa Manluluwas mahimong makapatumaw sa mga pangutana sama niini: Ngano nga ang Manluluwas kinahanglang mag-antos alang sa akong mga sala? Ngano nga ako kinahanglan nga maghinulsol aron modawat sa hingpit nga mga panalangin sa Iyang sakripisyo? Mahimong makakita ka og mga pagpasabot mahitungod niini nga mga pangutana ug sa uban diha sa mensahe ni Elder Ulisses Soares “Jesukristo: Ang Tig-atiman sa Atong Kalag” (Liahona, Mayo 2021, 82–84). Samtang ikaw magtuon, unsa nga mga impresyon ang mosulod sa imong hunahuna? Hunahunaa ang pagsulat sa imong mga gibati mahitungod kang Jesukristo ug sa Iyang sakripisyo alang kanimo.

Isip kabahin sa imong pagtuon ug pagsimba, mahimong mangita ka og himno nga imong paminawon o kantahon nga nagpadayag sa imong pasalamat ngadto sa Manluluwas alang sa Iyang pag-antos alang kanimo. “Ako Nagpabilin nga Natingala” (Mga Himno, nu. 114) usa ka maayong pananglitan.

Unsay imong gibati nga ipabuhat sa Langitnong Amahan ug ni Jesukristo isip resulta sa unsay imong gibati ug gitun-an?

Tan-awa usab sa “Si Jesukristo motabang kaninyo,” Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022), 6–9; Topics and Questions [Mga Hilisgotan ug mga Pangutana], “Atonement of Jesus Christ [Pag-ula ni Jesukristo],” “Repentance [Paghinulsol],” Gospel Library; D. Todd Christofferson, “Ang Balaanong Gasa sa Paghinulsol,” Liahona, Nob. 2011, 38–41; “Jesus Suffers in Gethsemane [Si Jesus Nag-antos sa Getsemani]” (bidyo), Gospel Library.

The Savior Suffers in Gethsemane

Jesus, Peter, James, and John retire to the Garden of Gethsemane. Jesus submits to the Father's will and begins to suffer for the sins and afflictions of mankind. He is then betrayed and arrested. Matthew 26:36–57

Doktrina ug mga Pakigsaad 19:23

Ang kalinaw moabot gikan sa pagkat-on kabahin ni Jesukristo ug sa pagsunod Kaniya.

Hunahunaa ang pagdapit sa Manluluwas “Pagkat-on kanako.” Unsay imong makat-onan mahitungod ni Jesukristo diha sa Doktrina ug mga Pakigsaad 19? Isulat ang imong mga hunahuna, ug pamalandongi kon sa unsang paagi kining mga kamatuoran mahitungod sa Manluluwas makatabang nimo sa pagkaplag og kalinaw. Unsay gipasabot niini nganha kanimo sa “(pag)lakaw diha sa kaaghop sa [Iyang] Espiritu”?

Tan-awa usab sa Henry B. Eyring, “Pagkaplag og Personal nga Kalinaw,” Liahona, Mayo 2023, 29–31; “Peace in Christ” [Kalinaw diha ni Kristo] (bidyo), Gospel Library.

Peace in Christ

Doktrina ug mga Pakigsaad 19:26–41

Ang mga panalangin sa Dios mas dako pa kay sa mga bahandi sa yuta.

Wala kaayoy namalit sa Basahon ni Mormon didto sa Palmyra. Isip resulta, si Martin Harris kinahanglan nga mobaligya og dako nga bahin sa iyang umahan aron ibayad sa utang ngadto sa tig-imprinta (tan-awa sa “The Contributions of Martin Harris,” sa Konteksto sa mga Pagpadayag [Revelations in Context], 7–8). Pamalandongi ang sakripisyo ni Martin—ug ang mga panalangin nga imong nadawat tungod niini—samtang imong basahon ang Doktrina ug mga Pakigsaad 19:26–41. Mahimo usab nimong hunahunaon ang mahitungod sa unsay gipangayo sa Ginoo nga imong isakripisyo. Unsay imong nakit-an dinhi niini nga bersikulo nga nakapadasig nimo sa paghimo niini nga mga sakripisyo inubanan sa “pagmaya” ug “kalipay”? (tan-awa usab sa mga bersikulo 15–20).

Detalye gikan sa Umahan ni Martin Harris, ni Al Rounds

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Martin Harris

• Umahan ni Martin ug Lucy Harris

• Grandin Building: Dapit sa Pagmantala sa Basahon ni Mormon

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 19:16–19

Si Jesukristo nag-antos alang kanako.

• Makatabang ka sa imong mga anak nga mobati og balaan nga pagtahod ug pasalamat alang sa Manluluwas pinaagi sa pagbasa pagdungan sa Doktrina ug mga Pakigsaad 19:16–19 o “Kapitulo 51: Si Jesus Nag-antos didto sa Tanaman sa Getsemani,” sa Mga Istorya sa Bag-ong Tugon, 129–32, o sa katugbang nga bidyo sa Gospel Library. Ikonsiderar ang paghunong aron sa pagseguro nga ang imong mga anak nakasabot ug tugoti sila nga mopadayag sa ilang mga pagbati. Pananglitan, sa bersikulo 16, unsa “kini nga mga butang” nga giantos ni Jesus? (tan-awa sa Mosiah 3:7; Alma 7:11–12). Unsay atong nakat-onan gikan sa Iyang paghulagway sa Iyang pag-antos? Sa unsang paagi nato ikapakita ang atong pasalamat sa unsay Iyang gihimo alang kanato?

Chapter 51: Jesus Suffers in the Garden of Gethsemane

Tabangi ang mga bata sa pagkat-on gikan sa mga kasulatan. Ang pipila sa mga bata adunay kalisod sa pagbasa sa mga kasulatan. Ang pagtutok sa usa ka bersikulo o hugpong sa mga pulong mahimong makatabang kanila.

• Ikaw ug ang imong mga anak makapangita diha sa Mga Himno o sa Songbook sa mga Bata og mga kanta nga motabang nimo sa pagpahayag sa imong mga pagbati mahitungod ni Jesukristo (tan-awa ang topic indexes niini nga mga basahon).

Doktrina ug mga Pakigsaad 19:18–19, 24

Gisunod ni Jesukristo ang Langitnong Amahan, bisan og kini lisod.

• Ang pag-antos alang sa atong mga sala lisod kaayo apan si Jesukristo andam sa pagbuhat niini sa pagsunod sa Iyang Amahan ug sa pagpakita sa Iyang gugma alang Kaniya ug alang kanato. Mahimong motan-aw kamo og dungan sa usa ka litrato ni Jesukristo nga nag-antos sa Getsemani (sama niadtong anaa niini nga latid) ug mohangyo sa imong mga anak sa pagsulti kanimo unsay ilang nahibaloan mahitungod sa unsay nahitabo diha sa litrato. Mahimong basahon ninyo pagdungan ang Doktrina ug mga Pakigsaad 19:18–19, 24 sa paghatag og gibug-aton nga ang pag-antos alang sa atong mga sala mao ang labing lisod nga butang nga sukad gihimo ni bisan kinsa, apan tungod kay gihigugma ni Jesus ang Iyang Amahan ug kita, Siya misunod sa kabubut-on sa Dios (tan-awa usab sa Mosiah 3:7). Unsa nga lisod nga mga butang ang gisugo sa Dios kanato nga buhaton? Unsaon nato sa pagpangita og kaisog sa pagsunod Kaniya?

Doktrina ug mga Pakigsaad 19:23

“Pagkat-on kanako, ug paminaw sa akong mga pulong.”

• Mahimong imong tabangan ang imong mga anak sa paghunahuna sa yanong mga aksiyon uban sa hugpong sa mga pulong diha sa Doktrina ug mga Pakigsaad 19:23. Basaha ang bersikulo sa makadaghan nga higayon samtang ilang himoon ang mga aksyon. Unsa ang pipila ka paagi nga atong makat-onan bahin ni Kristo ug sa pagpaminaw sa Iyang mga pulong?

Doktrina ug mga Pakigsaad 19:38

Ang mga panalangin sa Dios mas dako pa kay sa mga bahandi sa yuta.

• Ikaw ug ang imong mga anak mahimong magpulipuli sa paggunit og kopya sa Basahon ni Mormon ug mopakigbahin unsa inyong ganahan niini. Sa lakbit pagsulti mahitungod sa sakripisyo ni Martin Harris aron ang Basahon ni Mormon ma-imprinta (tan-awa sa Mga Istorya sa Doktrina ug mga Pakigsaad,, 33). Unsa ang gisulti sa Ginoo ngadto ni Martin diha sa Doktrina ug mga Pakigsaad 19:38 nga tingali nakatabang kaniya nga magmatinud-anon ug magmasulundon? Tabangi ang imong mga bata sa paghunahuna og usa ka butang nga ilang ikasakripisyo aron sa pagsunod sa Dios o pagtabang sa Iyang buluhaton.

  Chapter 7: Witnesses See the Gold Plates: 1829–1830

Alang sa dugang nga mga ideya, tan-awa ang isyu karong bulana sa Higala nga magasin.

Christ Praying in the Garden of Gethsemane [Si Kristo nga Nag-ampo didto sa Tanaman sa Getsemani], ni Hermann Clementz