“Mga Tingog sa Pagpahiuli: Emma Hale Smith,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)
“Emma Hale Smith,” Dali, Sunod Kanako—Alang sa Panimalay ug sa Simbahan: 2025
Mga Tingog sa Pagpahiuli
Emma Hale Smith
Ang mga pulong sa Ginoo ngadto ni Emma Smith nasulat diha sa Doktrina ug mga Pakigsaad 25 nagpadayag kon unsa ang Iyang gibati kabahin niya ug sa iyang mga gikatampo ngadto sa Iyang buhat. Apan unsa man si Emma? Unsa ang atong nahibaloan kabahin sa iyang pagkatawo, sa iyang mga relasyon, sa iyang kalig-on? Ang usa sa paagi nga mailhan kining “pinili nga babaye” diha sa (Doktrina ug mga Pakigsaad 25:3) mao ang pagbasa sa mga gisulti sa mga tawo kinsa nakaila sa iyang pagkatawo.
Joseph Smith Jr., iyang bana
“Uban sa dili matukib nga kahimuot, ug unsa ka dako nga pagbati sa kalipay ang mipuno sa akong dughan, sa dihang gikuha ko ang kamot, nianang gabhiona, sa akong minahal nga Emma—siya nga mao ang akong asawa, gani ang asawa sa akong kabatan-on, ug ang pinili sa akong kasingkasing. Daghan ang mga hulagway diha sa akong hunahuna sa dihang ako naghinuktok sa makadiyot sa daghang mga panghitabo nga gihatag kanamo nga masinati. Ang kakapoy ug mga kahago, ang mga kasakit ug mga pag-antos, ug ang mga kalipay ug mga pahalipay, matag karon ug unya, nga gisabwag diha sa among dalan ug mipanalangin sa among kinabuhi. Oh! daghang talagsaon nga mga hunahuna ang mipuno sa akong alimpatakan. Sa makausa anaa siya, bisan pa sa daghang kasamok, walay kahadlok, lig-on, ug makanunayon, walay kausaban, mabination nga Emma.”
Si Lucy Mack Smith, ang iyang ugangan nga babaye
“Batan-on pa siya kaniadto, ug, ang pagka natural nga puno sa pangandoy, ang iyang tibuok kasingkasing hingpit nga mapahinungoron sa buhat sa Ginoo, ug hingpit siya nga masaligon alang sa simbahan ug sa kawsa sa kamatuoran. Bisan unsa ang mahimong buhaton sa iyang mga kamot, buhaton niya kini sa tibuok niyang gahom ug dili hakog maghunahuna nga, ‘Aduna ba koy makuha nga bisan unsang kaayohan kay sa uban?’ Kon ang mga elder gipadala aron sa pagsangyaw, siya ang unang moboluntaryo sa iyang pag-alagad aron motabang sa ilang mga sinina alang sa ilang pagbiyahe, bisan unsa pa ang kalisod nga ilang masinati.”
Si Joseph Smith Sr., ang iyang ugangan nga lalaki
Sa patriyarkal nga panalangin ni Emma, gipahayag ni Joseph Smith Sr., kinsa nagserbisyo isip patriyarka sa Simbahan:
“Emma, akong umagad nga babaye, ikaw gipanalanginan sa Ginoo, tungod sa imong kamatinud-anon ug sa kamatuoran: ikaw mapanalanginan uban sa imong bana, ug maglipay diha sa himaya diin moabot diha kaniya: Ang imong kalag gisakit tungod sa kadaotan sa mga tawo sa pagtinguha sa paglaglag sa imong bana, ug ang imong tibuok kalag nangamuyo diha sa pag-ampo alang sa iyang katubsanan: paglipay, tungod kay ang Ginoo nga imong Dios nakadungog sa imong pangaliya.
“Ikaw nagbangutan tungod sa katig-a sa mga kasingkasing sa panimalay sa imong amahan, ug ikaw nangandoy alang sa ilang kaluwasan. Ang Ginoo naminaw sa imong mga pangamuyo, ug pinaagi sa iyang mga paghukom iyang buhaton nga ang pipila kanila makakita sa ilang mga kabuang ug maghinulsol sa ilang mga sala; apan kini ipaagi sa kasakit aron sila maluwas. Imong makita ang daghang mga adlaw; oo, ang Ginoo moluwas kanimo hangtod nga ikaw pagatagbawon, tungod kay imong makita ang imong Manunubos. Ang imong kasingkasing magmaya diha sa talagsaong buhat sa Ginoo, ug walay usa nga makakuha sa imong pagmaya gikan kanimo.
“Ikaw mahinumdom gayod sa dakong pagpakig-angay sa imong Dios diha sa pagtugot kanimo nga makauban ang akong anak sa dihang ang anghel mihatag sa mga talaan sa mga Nephite sa iyang pag-atiman. Imong nakita ang daghang kasub-anan tungod kay gikuha sa Ginoo ang imong tulo ka anak: niini ikaw dili pagabasolon, tungod kay siya nasayod sa imong lunsay nga mga tinguha sa pagpasanay og usa ka pamilya, nga ang bansagon sa akong anak mahimong mapanalanginan. Ug karon, tan-awa, ako moingon kanimo, nga ingon sa gipamulong sa Ginoo, kon ikaw magatuo, ikaw mapanalanginan niini nga butang ug ikaw magdala og laing mga anak, hangtod sa kalipay ug katagbawan sa imong kalag, ug ngadto sa kalipayan sa imong kahigalaan.
“Ikaw mapanalanginan uban sa salabotan, ug makabaton og gahom sa pagtudlo sa imong isig ka babaye. Tudloi ang imong pamilya sa pagkamatarong, ug ang imong mga gagmayng bata sa pamaagi sa kinabuhi, ug ang balaan nga mga anghel magabantay kanimo: ug ikaw maluwas diha sa gingharian sa Dios, bisan pa man. Amen.”
Si Emma Smith uban sa iyang mga anak. Panahon sa Pagkatawa,ni Liz Lemon Swindle