Si Jesukristo motabang kaninyo

Salmo 147:3

Si Jesukristo mao ang inyong kusog. Gibuhat Niya ang tanang butang nga gikinahanglan alang kaninyo aron makabaton og hingpit nga kalipay niining kinabuhia ug sa kahangtoran. Pinaagi sa pagpili Kaniya ug sa Iyang ebanghelyo, kamo nagpili sa mahangtoron nga kalipay.

Bisan kon kamo naningkamot sa pagbuhat sa inyong labing maayo sa paghimo og maayong mga pagpili, usahay makahimo kamo og kasaypanan. Makabuhat kamo og mga butang nga unta wala ninyo gibuhat. Ang tanan mao usab. Kon kana mahitabo, dali ra ang mobati og pagkawalay kadasig o maghunahuna kon igo ba ang inyong kamaayo. Apan adunay maayong balita—maanindot, malaomon nga balita! Tungod kay ang Dios nahigugma kaninyo, Siya mipadala sa Iyang Anak, si Jesukristo, kinsa midala diha sa Iyang Kaugalingon sa inyong mga sala aron kamo makahinulsol ug mopadayon sa pag-uswag.

Mahangtoron nga mga kamatuoran

Si Jesukristo makalig-on kaninyo. Siya makatabang kaninyo nga mousab sa inyong mga tinguha, sa inyong mga hunahuna, ug sa inyong mga lihok. Kon kamo nabalaka, nahadlok, o nanglimbasog sa bisan unsang paagi, Siya mohupay kaninyo. Siya motabang kaninyo sa tanang aspeto sa inyong kinabuhi.

Ang paghinulsol dili silot sa sala; kini ang paagi sa Manluluwas sa pagpalingkawas kanato gikan sa sala. Ang paghinulsol nagpasabot sa pag-usab—sa pagtalikod gikan sa sala ug moadto sa Dios. Kini nagpasabot sa paglambo ug pagdawat og kapasayloan. Kini nga matang sa kausaban dili kausa ra nga panghitabo; kini usa ka nagpadayon nga proseso.

Mga pagdapit

Paghinulsol. Dangop ngadto sa Ginoo inubanan sa tinguha nga molambo. Kon kamo nakabuhat og butang nga sayop, matinuoron nga moangkon niini sa atubangan sa Dios ug, kon gikinahanglan, ngadto sa inyong bishop ug ni bisan kinsa nga tingali imong napasakitan. Buhata ang imong labing maayo aron sa paghimo sa mga butang nga matarong.

Paglipay diha sa gasa sa pagbuhat og mas maayo ug mahimong mas maayo. Bisan kon kini dili sayon ug mas dugay kay sa inyong gusto, ayaw gayod paghunong sa pagpaningkamot. Padayon sa pagbuhat ug pagsalig sa Ginoo. Ang Manluluwas motabang kaninyo sa matag lakang.

Gisaad nga mga panalangin

Si Jesukristo mopasaylo ug moayo kaninyo kon kamo maghinulsol. Iyang pulihan ang inyong pagbati nga sad-an sa kalinaw ug hingpit nga kalipay. Siya dili na mohinumdom sa inyong mga sala. Diha sa Iyang kusog, ang inyong tinguha sa pagtuman sa Iyang mga sugo modako.

Siya mobag-o sa inyong kasingkasing ug sa inyong kinabuhi. Sa ginagmay nga paagi, kamo molambo ug mas mahisama Kaniya. Ang inyong koneksiyon sa pakigsaad uban Kaniya makahatag kaninyo og mas dakong access sa Iyang gahom.

Mga pangutana ug mga tubag

Unsaon nako sa pagkahibalo kon ang Dios mipasaylo na kanako? Ang Dios nagsaad nga Siya mopasaylo niadtong kinsa maghinulsol. Kon imong mabati ang kahupay gikan sa Espiritu, masayod ka nga ang maulaon nga gahom sa Manluluwas naglihok diha sa imong kinabuhi.

Kanus-a man ko magkinahanglan sa tabang sa bishop aron maghinulsol? Ang imong bishop naghupot sa mga yawe sa pagkapari ug espirituhanong mga gasa sa pagtabang nimo sa paghinulsol. Makapangayo ka sa iyang tabang ug tambag sa bisan unsang panahona. Kon ikaw nakahimo og bug-at nga kasaypanan, sama sa paglapas sa balaod sa kaputli, pakigkita sa imong bishop. Siya dili mohimaraot nimo. Siya mao ang representante ni Jesukristo ug motabang nimo nga masayod unsaon aron hingpit nga makahinulsol ug madawat ang makaalim ug makapalig-on nga gahom sa Manluluwas.

Naningkamot ko sa paghinulsol, apan permi kong makabuhat sa samang kasaypanan. Unsay angay kong buhaton karon? Magkinahanglan kini og taas nga panahon aron makaugmad og maayong pamatasan ug hunongon ang mga dili maayo, busa ayaw pag-undang. Dangop ngadto ni Kristo. Ang Iyang grasya paigo. Sulayi pag-usab. Wala gayod ikaw nag-inusara sa imong mga paningkamot sa pag-uswag. Si Jesukristo kanunayng magauban kanimo.

Tan-awa sa Enos 1:6 (ang pagbati nga sad-an mahimong mahanaw); Mosiah 4:3 (pinaagi sa Espiritu Santo, ang Dios mopahibalo kaninyo nga kamo gipasaylo); 26:30 (ang Manluluwas mopasaylo sa makadaghan kon kita maghinulsol); Ether 12:27 (ang kalooy sa Manluluwas makahimo sa huyang nga butang nga malig-on); Moroni 6:8 (kadtong kinsa maghinulsol mapasaylo); 10:32 (pagmahingpit diha ni Kristo); Doktrina ug mga Pakigsaad 1:32 (ang Ginoo mopasaylo niadtong maghinulsol); 58:42–43 (ang paghinulsol naglakip sa pagkompisal ug pagbiya sa sala).

Mga pangutana sa rekomend sa templo

Ikaw ba adunay pagtuo ug pagpamatuod sa Dios, ang Amahan sa Kahangtoran; sa Iyang Anak, si Jesukristo; ug sa Espiritu Santo?

Ikaw ba adunay pagpamatuod sa Pag-ula ni Jesukristo ug sa Iyang tahas isip imong Manluluwas ug Manunubos?