Higugmaa ang Dios, higugmaa ang inyong silingan

Mateo 22:37–40

Aron matabangan kamo sa paghimo og maayong mga pagpili, ang Dios naghatag og mga sugo. Siya mihimo niini tungod kay Siya nahigugma kaninyo. Ug ang labing maayong rason sa pagsunod sa mga sugo sa Dios mao nga kamo mohigugma Kaniya. Ang gugma mao ang labing importante sa mga sugo sa Dios.

Mahangtoron nga mga kamatuoran

Ang Dios nahigugma kaninyo. Siya ang inyong Amahan. Ang iyang hingpit nga gugma makadasig kaninyo sa paghigugma Kaniya. Kon ang inyong gugma alang sa Langitnong Amahan mao ang labing importante nga impluwensiya sa inyong kinabuhi, daghang desisyon ang mahimong mas sayon.

Ang duha sa labing mahinungdanon sa tanang sugo, si Jesus mitudlo, mao ang paghigugma sa Dios ug paghigugma sa inyong silingan. Ug kinsa ang inyong silingan? Ang tanan! Ang tanan nga gitudlo diha sa mga kasulatan ug sa mga propeta konektado ngadto niining duha ka sugo.

Ang tanang tawo inyong igsoon nga mga lalaki ug igsoon nga mga babaye—lakip, siyempre, sa mga tawo kinsa lahi kaninyo o dili mouyon kaninyo. Ang Langitnong Amahan gusto nga ang Iyang mga anak mohigugma sa usag usa. Kon moserbisyo kamo sa Iyang mga anak, nagserbisyo kamo Kaniya.

Mga pagdapit

Pagpakita og gugma sa Dios pinaagi sa pagtuman sa Iyang mga sugo. Sama pananglit, pinaagi sa pagbalaan sa adlaw nga Igpapahulay, lakip sa matinud-anong pagpangandam alang sa ug pag-ambit sa sakramento, inyong ipakita sa Dios nga andam kamo sa pagpahinungod og usa ka adlaw kada semana ngadto Kaniya. Samtang kamo magpuasa ug mobayad og mga ikapulo ug mga halad, inyong ipakita sa Dios nga ang Iyang buhat mas importante kaninyo kay sa materyal nga mga butang. Kon gamiton ninyo ang mga ngalan sa Dios ug ni Kristo nga adunay pagtahod, dili sa walay kapuslanan o kaswal nga paagi, inyong gipakita nga kamo mapasalamaton sa tanan nga Ilang gibuhat alang kaninyo.

Tagda ang tanan isip usa ka anak sa Dios. Isip usa ka disipulo ni Jesukristo, kamo mahimong mangulo sa pagtratar sa mga tawo sa tanang kaliwat ug relihiyon ug bisan unsang grupo uban sa gugma, respeto, ug paglakip—ilabi na niadtong kinsa usahay mga biktima sa makapasakit nga mga pulong ug mga aksiyon. Tabangi kadtong mibati nga nag-inusara, nahilayo, o walay mahimo. Tabangi sila nga mobati sa gugma sa Langitnong Amahan pinaagi kaninyo.

Seguroha nga ang inyong pinulongan nagpakita sa gugma sa Dios ug sa uban—nakig-istorya man kamo sa personal o sa birtuwal nga paagi. Pagsulti og mga butang nga makapabayaw—dili makapabahin, makapasakit, o makapasilo, bisan og tiawtiaw. Ang inyong mga pulong gamhanan. Tugoti kini nga mahimong gamhanan alang sa kaayohan.

Ang paghigugma sa tanang anak sa Dios magsugod sa panimalay. Himoa ang inyong bahin aron sa paghimo sa inyong panimalay nga usa ka dapit diin ang tanan makabati sa gugma sa Manluluwas.

Gisaad nga mga panalangin

Ang inyong relasyon sa Dios mapalawman samtang kamo mopahayag sa inyong gugma pinaagi sa pagsunod sa Iyang mga sugo ug pagtuman sa inyong mga pakigsaad Kaniya.

Ang inyong relasyon sa uban mapalawman samtang kamo mopahayag sa inyong gugma pinaagi sa Kristohanan nga pagserbisyo. Makakaplag kamo og hingpit nga kalipay sa paghimo sa kalibotan nga usa ka mas mahigugmaon nga dapit.

Mga pangutana ug mga tubag

Unsaon nako nga mobati sa gugma sa Dios? Kanunayng anaa ang gugma sa Langitnong Amahan. Pakig-istorya Kaniya kanunay pinaagi sa pag-ampo. Ipaambit ang inyong mga pagbati Kaniya, ug paminaw alang sa mga impresyon gikan Kaniya. Basaha ang Iyang mga pulong diha sa mga kasulatan. Hunahunaa ang tanan nga Iyang nabuhat para kaninyo. Paggahin og panahon diha sa mga dapit ug mga kalihokan diin anaa ang Iyang Espiritu.

Nagdahom ba ang Ginoo kanako nga mohigugma sa tanan, bisan kadtong dili maayo nga motagad kanako? Ang Ginoo nagdahom kaninyo nga mohigugma sa inyong mga kaaway ug mag-ampo alang niadtong kinsa dili maayong motratar kaninyo. Apan, kana wala magpasabot nga kinahanglan kamong magpabilin diha sa usa ka sitwasyon nga makaingon kaninyo og emosyonal, pisikal, ug espirituwal nga kadaot. Pagtakda og maayo nga mga utlanan aron ipabilin ang inyong kaugalingon nga luwas. Kon kamo gidaogdaog o giabuso—o kon kamo nasayod nga nahitabo kini ngadto sa laing tawo—pakig-istorya ngadto sa usa ka kasaligan nga hamtong.

Kanus-a ug unsaon nako sa pag-ila-ila ang mga sakop sa lain nga sekso? Ang labing maayong paagi aron maila-ila ang uban mao ang pinaagi sa tinuoray nga panaghigalaay. Samtang kamo batan-on pa, pagpalambo og maayo nga mga panaghigalaay sa daghang tawo. Sa ubang mga kultura, ang kabatan-onan makaila-ila sa mga sakop sa lain nga sekso pinaagi sa maayo nga mga kalihokan sa grupo. Alang sa inyong emosyonal ug espirituwal nga paglambo ug kahilwasan, ang usa-usa nga mga kalihokan kinahanglang ilangay hangtod nga kamo hingkod na—ang edad nga 16 usa ka maayo nga sumbanan. Pagpakitambag sa inyong mga ginikanan ug mga lider. Ireserba ang eksklusibo nga mga relasyon kon mas tigulang na kamo. Paggahin og panahon uban niadtong kinsa motabang ninyo sa pagtuman sa inyong mga pasalig ngadto kang Jesukristo.

Unsa man ang akong mabuhat kon ang akong panimalay dili usa ka dapit sa gugma? Ang inyong Manluluwas nahibalo sa inyong sitwasyon, ug Siya nahigugma kaninyo. Pagmapailobon, padayon sa pagsunod sa mga sugo sa Dios, ug pagmahimong usa ka maayo nga ehemplo ngadto sa inyong pamilya. Pag-ugmad og mga relasyon diha sa inyong pamilya sa ward. Pangandam karon sa pag-ugmad og inyong kaugalingon nga pamilya nga gipasikad sa mga pagtulon-an ni Jesukristo.

Tan-awa sa Isaias 58:3–11 (mga katuyoan sa pagpuasa); 58:13–14 (mga panalangin sa pagtahod sa Igpapahulay); Malaquias 3:8–10 (mga panalangin sa pagbayad og ikapulo); Lucas 6:27–28 (higugmaa ang inyong mga kaaway); 10:25–37 (kinsa ang akong silingan?); Juan 3:16–17 (gihigugma kita sa Dios, maong gipadala Niya ang Iyang Anak); 14:15 (mosunod kita sa mga sugo tungod kay gihigugma nato ang Dios); 1 Juan 4:19 (gihigugma nato ang Dios tungod kay Siya naghigugma kanato); Mosiah 2:17 (kon nagserbisyo kita sa uban, nagserbisyo kita sa Dios).

Mga pangutana sa rekomend sa templo

Ikaw ba nagsunod sa mga pagtulon-an sa Simbahan ni Jesukristo diha sa imong pribado ug publiko nga kinaiya kauban sa mga sakop sa imong pamilya ug sa uban?

Ikaw ba naningkamot sa pagbalaan sa adlaw nga Igpapahulay, diha sa panimalay ug sa simbahan; sa pagtambong sa imong mga miting; sa pag-andam ug takos nga pag-ambit sa sakramento; ug sa pagpakabuhi subay sa mga balaod ug mga kasugoan sa ebanghelyo?

Ikaw ba hingpit nga tigbayad sa ikapulo?