Pagkaplag og Personal nga Kalinaw
Ako nag-ampo nga unta inyong makaplagan ang kalinaw, motabang sa daghan pa nga makakaplag niini, ug mopasa niini.
Akong minahal nga mga kaigsoonan, napanalanginan kita og dinasig nga mga pagtulon-an ug matahom nga musika nga nakapatandog nato niining pangbukas nga sesyon sa kinatibuk-ang komperensiya. Magpasalamat kami kaninyo sa inyong partisipasyon ug sa inyong hugot nga pagtuo.
Karon mamulong ako bahin sa unsay akong nakat-onan mahitungod sa milagro sa pagkaplag og personal nga kalinaw, bisan unsa pa ang atong mga sirkumstansiya. Ang Manluluwas nasayod nga ang tanang anak sa Langitnong Amahan nangandoy og kalinaw, ug Siya miingon nga makahatag Siya niini kanato. Nahinumdom kamo sa mga pulong ni Jesukristo nga narekord diha sa basahon ni Juan: “Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibotan. Kinahanglan dili magkaguol ang inyong kasingkasing, ni magtalaw.”1
Ang Iyang buot ipasabot sa kalinaw ug kon unsaon nga mahatag Niya kini gipadayag pinaagi sa mga sirkumstansiya niadtong nakadungog Kaniya nga misulti niana nga mga pulong. Paminawa ang asoy diha sa Juan bahin sa naghinapos nga pangalagad ni Kristo. Grabe nga mga pwersa sa daotan ang mibira Kaniya ug sa dili madugay moabot ngadto sa Iyang mga disipulo.
Ania ang mga pulong sa Manluluwas:
“Kon nahigugma kamo kanako, inyong pagatumanon ang akong mga sugo.
“Ug ako mangamuyo sa Amahan, ug kamo iyang pagahatagan og laing Manlalaban, nga magapakig-uban kaninyo hangtod sa kahangtoran;
“Nga mao ang Espiritu sa kamatuoran; kang kinsa ang kalibotan dili makadawat tungod kay ang kalibotan dili man makakita kaniya ni makaila kaniya: apan kamo nakaila na kaniya, kay siya nagapuyo man uban kaninyo, ug maanha siya sa sulod ninyo.
“Dili ko kamo pagabiyaan nga daw mga ilo: ako mobalik ra kaninyo.
“Hamubo na lang ang panahon, ug unya ang kalibotan dili na makakita kanako; apan kamo makakita ra unya kanako: tungod kay ako buhi, kamo usab mabuhi.
“Niadto unyang adlawa inyong masuta nga ako anaa sa akong Amahan, ug nga kamo ania kanako, ug ako anaa kaninyo.
“Ang nagabaton sa akong mga sugo ug nagatuman niini, kini siya mao ang nahigugma kanako; ug ang nahigugma kanako pagahigugmaon sa akong Amahan, ug ako mahigugma kaniya ug magapadayag sa akong kaugalingon ngadto kaniya.
“Si Judas, dili ang Iscariote miingon kaniya, Ginoo, naunsa ba nga anhi ka man kanamo magpadayag sa imong kaugalingon, ug dili hinoon ngadto sa kalibotan?
“Si Jesus mitubag kaniya, Kon kinsa ang nahigugma kanako, iyang pagabantayan ang akong pulong: ug ang akong Amahan mahigugma kaniya, ug moanha kami kaniya, ug anha kami mopuyo diha kaniya.
“Ang wala mahigugma kanako dili magabantay sa akong mga pulong: ug ang pulong nga inyong nadungog dili akong kaugalingon, kondili iya sa Amahan nga mao ang nagpadala kanako.
“Kining mga butanga gisulti ko kaninyo, samtang ania pa ako uban kaninyo.
“Apan ang Manlalaban, ang Espiritu Santo, nga sa akong ngalan igapadala sa Amahan, siya mao ang magatudlo kaninyo sa tanang butang, ug magapahinumdom kaninyo sa tanan nga akong gikasulti kaninyo.
“Kaninyo ibilin ko ang kalinaw, kaninyo ihatag ko ang akong kalinaw: Hatagan ko kamo niini dili sama sa hinatagan sa kalibotan. Kinahanglan dili magkaguol ang inyong kasingkasing, ni magtalaw.”2
Nakakat-on ko labing minos lima ka kamatuoran gikan niana nga pagtulon-an sa Manluluwas.
Una, ang gasa sa kalinaw ihatag human kita makabaton og hugot nga pagtuo nga mosunod sa Iyang mga sugo. Niadtong mga miyembro sa pakigsaad sa Simbahan sa Ginoo, ang pagkamasulondon mao ang ato nang gisaad nga buhaton.
Ikaduha, ang Espiritu Santo moabot ug mag-uban kanato. Ang Ginoo miingon nga kon magpadayon kita nga magmatinud-anon, ang Espiritu Santo maanaa kanato. Mao kana ang saad diha sa pag-ampo sa sakramento nga ang Espiritu atong ikauban ug atong mabati, sa atong mga kasingkasing ug hunahuna, ang Iyang paghupay.
Ikatulo, ang Manluluwas nagsaad nga kon atong tumanon ang atong mga pakigsaad, atong mabati ang gugma sa Amahan ug sa Anak alang sa usag usa ug alang kanato. Atong mabati ang Ilang kaduol sa atong mortal nga kinabuhi, ingon nga maoy mahitabo kanato kon kita mapanalanginan nga ikauban Sila sa kahangtoran.
Ikaupat, ang pagtuman sa mga sugo sa Ginoo nagkinahanglan og labaw pa sa pagkamasulondon. Atong higugmaon ang Dios sa tibuok natong kasingkasing, gahom, hunahuna, ug kalag.3
Kadtong wala mahigugma Kaniya dili mosunod sa Iyang mga sugo. Ug mao nga sila walay gasa sa kalinaw niini nga kinabuhi ug sa kalibotan nga moabot.
Ikalima, klaro nga ang Ginoo nahigugma gayod nato aron mobayad sa bugti sa atong mga sala aron kita—pinaagi sa atong hugot nga pagtuo diha Kaniya ug sa atong paghinulsol, pinaagi sa mga epekto sa Iyang Pag-ula—makabaton sa gasa sa kalinaw nga “lapaw sa tanang pagpanabot,”4 niini nga kinabuhi ug uban Kaniya sa kahangtoran.
Pipila kaninyo, tingali daghan, wala mobati sa kalinaw nga gisaad sa Ginoo. Tingali nag-ampo kamo alang sa personal nga kalinaw ug espirituhanong kahupayan. Apan kamo tingali mobati nga ang kalangitan walay imik sa inyong pangaliyupo alang sa kalinaw.
Adunay kaaway sa inyong kalag nga dili gusto nga kamo ug kadtong inyong gimahal, makakaplag og kalinaw. Dili siya makatagamtam niini. Siya naningkamot nga mapugngan kamo gani sa pagpangandoy nga makakaplag og kalinaw nga gitinguha sa Manluluwas ug sa atong Langitnong Amahan nga inyong mabatonan.
Ang mga paningkamot ni Satanas sa pagtisok og kasuko ug panagbingkil sa atong palibot morag nagkadaghan. Atong makita ang ebidensiya niini nga nahitabo taliwala sa kanasoran ug mga siyudad, sa kasilinganan, sa elektronik nga media, ug sa tibuok kalibotan.
Apan adunay rason alang sa paglaom: kay ang Kahayag ni Kristo gihatag sa matag bag-ong natawo nga bata. Pinaagi nianang gasa nga alang sa tanan moabot ang pagbati kon unsa ang matarong, usa ka tinguha nga mahigugma ug higugmaon. Adunay dala sa pagkatawo nga pagbati og kaangayan ug kamatuoran diha sa matag anak sa Dios sa iyang pag-anhi sa mortalidad.
Ang atong kamalaomon alang sa personal nga kalinaw niana nga mga bata anaa sa mga tawo nga nag-atiman nila. Kon kadtong nag-atiman nila ug nagserbisyo nila naningkamot nga madawat ang gasa sa kalinaw gikan sa Manluluwas, sila, pinaagi sa personal nga ehemplo ug paningkamot, moawhag og hugot nga pagtuo sa bata aron mahimong sarang sa talagsaong gasa sa kalinaw.
Mao kana ang gisaad sa kasulatan: “Bansaya ang bata diha sa dalan nga iyang pagalaktan: ug bisan kong siya matigulang na, siya dili mobiya gikan niana.”5 Magkinahanglan kini nga ang usa ka tawo nga gitugyanan sa pag-atiman ug pag-amuma sa bata mahimong takos sa gasa sa kalinaw.
Makaguol lang, kitang tanan mibati sa kasakit sa dihang ang mga bata nga gipadako sa dinasig nga mga ginikanan—usahay nag-inusara lamang nga ginikanan—human sa tibuok kinabuhi nga hugot nga pagtuo ug kalinaw, mopili sa dalan sa kagul-anan.
Bisan kon kana nga kagul-anan mahitabo, ang akong paglaom anaa sa laing gasa gikan sa Ginoo. Nga mao kini: nga Siya nagtawag og daghang tigpasiugda og kalinaw taliwala sa Iyang sinaligan nga mga disipulo. Sila mibati sa kalinaw ug gugma sa Dios. Anaa kanila ang Espiritu Santo diha sa ilang mga kasingkasing, ug ang Ginoo makagiya nila sa pagtabang sa nahisalaag nga mga karnero.
Ako nakakita niini sa akong tibuok kinabuhi ug sa tibuok kalibotan. Kamo nakakita usab niini. Usahay, kon kamo giyahan aron motabang og usa ka tawo, daw sulagma ra kini.
Kausa, nangutana ra ko sa usa ka tawo nga akong nakaila sa biyahe, “Pwede ba ko nimo sultihan og gamay bahin sa imong pamilya?” Ang panagsultihanay miresulta sa akong paghangyo nga motan-aw sa litrato sa iyang hamtong nga anak nga babaye, nga giingon niya nga nanglimbasog. Nakadayeg ko sa kabuotan sa panagway nianang babaye diha sa litrato. Gibati nako nga mangutana kon pwede ba kong mangayo sa iyang email address. Ang anak nga babaye nianang higayona nahisalaag ug naghunahuna kon ang Dios aduna bay mensahe alang niya. Siya aduna gayod. Mao kini: “Ang Ginoo nahigugma kanimo. Siya nahigugma gayod sa kanunay. Ang Ginoo gusto nga mobalik ka. Ang gisaad nga mga panalangin alang nimo anaa pa gihapon.”
Ang mga miyembro sa tibuok Simbahan mibati sa gasa sa Ginoo nga personal nga kalinaw. Siya miawhag sa tanan sa pagtabang sa uban nga makabaton og mga oportunidad sa pagduol ngadto Kaniya ug mahimong sarang nianang sama nga kalinaw. Sila, agig balos, mopili sa pagtinguha og inspirasyon aron masayod kon unsaon nga mapasa nila kana nga gasa ngadto sa uban.
Ang bag-ong henerasyon mahimong mga tig-amuma sa mosunod nga henerasyon. Ang ilang mga paningkamot magkadaghan sa milagrosong paagi. Mokatap kini ug molambo sa paglabay sa panahon, ug ang gingharian sa Ginoo dinhi sa yuta mahimo nang andam sa pagsugat Kaniya uban sa mga pagsinggit og hosanna. Adunay mahitabong kalinaw sa yuta.
Ako mohatag sa akong sigurado nga pagsaksi nga ang Manluluwas buhi ug Siya ang nangulo niini nga Simbahan. Akong gibati ang Iyang gugma sa akong kinabuhi ug ang Iyang gugma ug pagpakabana alang sa tanang anak sa Langitnong Amahan. Ang pagdapit sa Manluluwas nga moduol ngadto Kaniya usa ka tanyag sa kalinaw.
Si Presidente Russell M. Nelson mao ang buhi nga propeta sa Dios sa tibuok yuta. Siya miingon, “Akong ihatag kaninyo ang akong kasiguroan nga bisan pa sa kahimtang sa kalibotan ug sa inyong personal nga mga sirkumstansiya, inyong maatubang ang umaabot uban sa paglaom ug hingpit nga kalipay.”6
Akong ipahayag ang akong gugma alang kaninyo. Ang inyong dakong pagtuo ug gugma nagtabang sa mga tawo ug nagtugot sa Ginoo sa pag-usab sa mga kasingkasing ug pinaagi niini makabaton og tinguha sa pagtanyag sa uban sa gasa sa kalinaw nga lapaw sa tanang pagpanabot.
Ako nag-ampo nga unta inyong makaplagan ang kalinaw, motabang sa daghan pa nga makakaplag niini, ug mopasa niini. Adunay mahitabong maanindot nga liboan ka katuigan sa kalinaw kon ang Ginoo moanhi pag-usab. Ako mopamatuod niini diha sa kamaya ug sa ngalan ni Jesukristo, amen.