Mga Sumusunod sa Prinsipe sa Kalinaw
Samtang maningkamot kita sa pagpalambo sa mga kinaiya nga sama sa Manluluwas, kita mahimong mga instrumento sa Iyang kalinaw dinhi sa kalibotan.
Agi og katumanan sa panagna nga gihatag ngadto ni Zacarias,1 si Jesus madaogon nga misulod sa balaang siyudad nga nagsakay sa usa ka asno, nga gikonsiderar sa literatura nga “karaang simbolo sa Judeo nga pagkaharianon,”2 ingon nga nahiangay gayod sa Hari sa mga hari ug Prinsipe sa Kalinaw.3 Gilibotan Siya sa pundok sa masadyaong mga disipulo nga milatag sa ilang mga sapot, mga lukay, ug ubang mga dahon diha sa dalan diin si Jesus miagi. Sila midayeg sa Dios, nag-ingon sa kusog nga tingog, “Dalaygon ang Hari nga mianhi sa ngalan sa Ginoo: pakigdait didto sa langit, ug dalaygon ang Dios.”4 Ug usab, “Hosanna—dalaygon ang Kaliwat ni David: Bulahan siya nga mianhi sa ngalan sa Ginoo; Dalaygon ang Dios.”5 Kining maanindot nga panghitabo, nga atong gisaulog karong adlawa nga nailhan nga Dominggo sa Lukay, usa ka malipayong pasiuna sa hilabihan ka sakit nga mga panghitabo nga mahitabo nianang lisod nga semana nga misangpot sa dili hinakog nga sakripisyo sa Manluluwas ug sa talagsaong milagro sa walay sulod nga lubnganan.
Isip Iyang mga sumusunod, kita Iyang pinili nga katawhan, gitawag sa pagsangyaw sa Iyang mga hiyas,6 mga tigpasiugda og kalinaw nga madagayaong gitanyag pinaagi Kaniya ug sa Iyang maulaong sakripisyo. Kini nga kalinaw usa ka gasa nga gisaad ngadto sa tanan nga motugyan sa ilang mga kasingkasing ngadto sa Manluluwas ug magpuyo sa katarong; kana nga kalinaw maghatag nato og kalig-on sa pagtagamtam sa mortal nga kinabuhi ug makapahimo nato sa paglahutay sa sakit nga mga pagsulay sa atong panaw.
Niadtong 1847, ang Ginoo mihatag og piho nga mga instruksiyon ngadto sa pioneer nga mga Santos, nga nagkinahanglan og kalinaw aron magpabiling kalma ug magkahiusa samtang nag-atubang sila og wala damha nga mga kalisdanan sa ilang panaw paingon sa kasadpan. Pipila sa ubang mga butang, ang Ginoo mitudlo sa mga Santos nga “hunong sa pakigbisog sa usag usa; hunong sa pagsulti og daotan sa usag usa.”7 Ang mga kasulatan nagmatuod nga kadtong naghimo og mga buhat sa pagkamatarong ug naningkamot sa paglakaw diha sa kaaghop sa Espiritu sa Ginoo gisaaran og kalinaw nga ilang gikinahanglan aron makasugakod sa mga adlaw sa kagubot diin kita nagpuyo karon.8
Isip mga disipulo sa Prinsipe sa Kalinaw, kita gitudloan nga magpakabuhi nga ang “mga kasingkasing nabugkos diha sa pagkahiusa ug diha sa gugma sa usag usa.”9 Ang atong pinalanggang propeta, si Presidente Russell M. Nelson, bag-ohay lang nga namahayag, “Ang panagbingkil milapas sa tanang gibarogan ug gitudlo sa Manluluwas.”10 Ang atong propeta mipasabot usab nga buhaton nato kutob sa atong mahimo nga hunongon ang personal nga mga kasungian nga nagdilaab sa atong mga kasingkasing ug kinabuhi.11
Atong ikonsiderar kini nga mga baroganan kalabot sa putli nga gugma ni Kristo alang nato nga kita, isip Iyang mga sumusunod, magtinguha nga makabaton niini alang sa usag usa. Ang mga kasulatan mipasabot niining matang sa gugma isip gugmang putli.12 Kon maghunahuna kita og gugmang putli, ang atong mga hunahuna kasagaran mopunting ngadto sa madagayaon nga mga buhat ug mga donasyon aron mahupay ang pag-antos niadtong nagsinati og pisikal, materyal, o emosyonal nga mga kalisdanan. Sa gihapon, ang gugmang putli dili lamang kalabot sa butang nga atong gidonar ngadto sa usa ka tawo, apan usa kini ka hiyas sa Manluluwas ug mahimong kabahin sa atong kinaiya. Dili ikatingala nga ang Ginoo mitudlo kanato nga sul-oban ang atong kaugalingon og higot sa gugmang putli, “nga mao ang higot sa kahingpitan ug kalinaw.”13 Kon wala ang gugmang putli, kita walay bili,14 ug kita dili makapanunod sa luna nga giandam sa Ginoo alang nato diha sa mga balay sa atong Langitnong Amahan.15
Si Jesus hingpit nga mipakita sa unsay gipasabot sa pagbaton niining higot sa kahingpitan ug kalinaw, ilabi na sa dihang nag-atubang sa makapanghingotas nga panghitabo sa wala pa ang Iyang kamatayon. Hunahunaa sa makadiyot kon unsa kaha ang gibati ni Jesus samtang Siya mapaubsanong mihugas sa mga tiil sa Iyang mga disipulo, nasayod nga ang usa nila magluib Kaniya niana gayong gabhiona.16 O sa dihang si Jesus, pipila ka oras ang milabay, maluloy-ong miayo sa dunggan sa usa sa mga tawo nga mikuyog ni Judas, ang nagluib Kaniya, sa pagdakop Kaniya.17 O gani sa dihang ang Manluluwas, nagbarog sa atubangan ni Pilato, dili makiangayon nga giakusahan sa labaw nga mga pari ug mga anciano, ug walay pulong nga Iyang gisulti sa sayop nga mga pag-akusar batok Kaniya, ug gipasagdan Niya ang gobernador sa Roma nga matingala.18
Pinaagi niining tulo ka lisod nga panghitabo, ang Manluluwas, bisan kon nabug-atan sa hilabihan nga kagul-anan ug kakapoy, mitudlo kanato pinaagi sa Iyang ehemplo nga ang “gugma mapailobon ug maluloy-on; … dili masinahon; … [dili] tigpanghambog, dili mapahitas-on, dili mamugos sa kaugalingong kagustohan, dili masuk-anon [ug] madinumtanon.”19
Ang laing importante nga aspeto nga angayng ipasabot og maayo, ug adunay direkta nga mga kalambigitan sa atong pagkadisipulo ug kon unsaon nga atong mapasiugdahan ang kalinaw sa Manluluwas, mao ang pamaagi sa atong pagtagad sa usag usa. Atol sa Iyang yutan-ong pangalagad, ang mga pagtulon-an sa Manluluwas nagtutok—dili lang, apan ilabi na—sa mga hiyas sa gugma, gugmang putli, pailob, kamapainubsanon, ug kaluoy—mahinungdanong mga kinaiya niadtong gusto nga mas mapaduol ngadto Kaniya ug mopasiugda sa Iyang kalinaw. Kana nga mga kinaiya mao ang mga gasa gikan sa Dios, ug kon kita maningkamot sa pagpalambo niini, magsugod kita sa pagkakita sa mga kalainan ug mga kahuyang sa atong mga silingan uban sa mas dugang nga empatiya, kasensitibo, respeto, ug kamatugtanon. Usa sa labing klaro nga mga timailhan nga kita mas nagpaduol ngadto sa Manluluwas ug mas mahisama Kaniya mao ang mahigugmaon, mapailobon, ug mabination nga paagi nga kita motagad sa atong isigkatawo, bisan unsa pa ang mga kahimtang.
Kanunay natong makita ang mga tawo nga moapil sa negatibo ug gani makapaubos nga mga komentaryo mahitungod sa tataw nga mga kinaiya, mga kahuyang, ug mga opinyon sa uban, ilabi na kon kana nga mga kinaiya ug mga opinyon lahi o sukwahi sa ilang binuhatan ug hunahuna. Komon kaayo nga makita kini nga mga tawo nga mopasa nianang mga komentaryo ngadto sa uban, nga mosubli sa unsay ilang nadungog nga wala gayod masayod sa tanang kahimtang nga naglibot sa usa ka sitwasyon. Subo lang, ang social media nag-awhag niining matang sa kinaiya alang kunohay sa mga kamatuoran ug katin-awan. Walay pagpugong, ang digital nga panagsultihanay sagad mosangpot sa personal nga mga pag-ataki ug init nga mga panagbangi, nagmugna og mga kasagmuyo, nagsamad sa mga kasingkasing, ug nagpakatap og grabe nga pagdumot.
Si Nephi nanagna nga sa ulahing mga adlaw, ang kaaway mopapungot ug moaghat sa mga tawo nga masuko nianang unsay maayo.20 Ang mga kasulatan nagtudlo nga “ang matag butang nga magdapit ug magdani sa pagbuhat sa maayo, ug sa paghigugma sa Dios, ug sa pag-alagad kaniya, dinasig sa Dios.”21 Sa laing bahin, “kana nga mga daotan nagagikan sa yawa; kay ang yawa kaaway ngadto sa Dios, ug nakig-away batok kaniya sa kanunay, ug nagdapit ug nagdani sa pagpakasala, ug sa pagbuhat niana nga daotan sa kanunay.”22
Sa pagkonsiderar niining propetikanhon nga pagtulon-an, dili ikatingala nga usa sa mga taktika sa kaaway mao ang pag-aghat og pagdumot ug kasilag diha sa mga kasingkasing sa mga anak sa Dios. Malipay siya kon makita niya ang mga tawo nga nagsaway, nagbiay-biay, ug nagpakaulaw sa usag usa. Kini nga batasan makaguba sa kinaiya, reputasyon, ug pagtamod sa kaugalingon sa usa ka tawo, ilabi na kon ang tawo gihukman sa dili makiangayon nga paagi. Importante kaayo nga ipasabot nga kon kita motugot niining matang sa kinaiya ngari sa atong kinabuhi, naghatag kita og luna sa atong mga kasingkasing alang sa kaaway sa pagtisok sa liso sa panagsumpaki taliwala kanato, nameligro nga mahulog ngadto sa iyang hinakog nga laang.
Kon dili kita magbantay sa atong mga hunahuna, mga pulong, ug mga binuhatan, mahimong magapos kita sa malimbongon nga mga paglingla sa kaaway, moguba sa atong mga relasyon sa mga tawo nga naglibot nato ug sa atong mga minahal.
Mga kaigsoonan, isip pinili sa Ginoo ug tigpasiugda sa Iyang kalinaw, dili kita makatugot niini nga mga paglingla sa daotan nga mopatigbabaw sa atong mga kasingkasing. Dili kita mahimong magpas-an nianang makadaot nga mga palas-anon nga makaguba sa mga pagbati, sa mga relasyon, ug gani sa mga kinabuhi. Ang ebangjelyo nagrepresentar sa maayong balita sa dakong kalipay.
Siyempre, walay usa nato nga hingpit, ug sa pagkatinuod adunay mga higayon nga kita malingla niini nga matang sa batasan. Pinaagi sa Iyang hingpit nga gugma ug walay kinutoban nga kahibalo sa atong tawhanong mga kalagmitan, ang Manluluwas kanunay nga naningkamot sa pagpasidaan nato niana nga mga kakuyaw. Siya mitudlo kanato, “Kay hukman kamo sa Dios sama sa paghukom ninyo sa uban ug sukdon kamo niya sa samang sukdanan nga inyong gigamit sa uban.”23
Akong minahal nga mga kaigsoonan, samtang maningkamot kita sa pagpalambo sa mga kinaiya nga sama sa Manluluwas, kita mahimong mga instrumento sa Iyang kalinaw sa kalibotan sumala sa sumbanan nga Siya Mismo ang miestablisar. Ako modapit ninyo sa pagkonsiderar sa mga paagi nga kita makausab sa atong kaugalingon ngadto sa mobayaw ug mosuporta nga mga tawo, mga tawo nga adunay masinabtanon ug mapasayloon nga kasingkasing, mga tawo nga nagtan-aw alang sa labing maayo diha sa uban, kanunayng naghinumdom nga “kon adunay mga butang nga mahiyason, matahom, o maayo og dungog o dalaygon, kami naninguha sa pagpangita niining mga butanga.”24
Ako mosaad ninyo nga kon tinguhaon nato ug palamboon kini nga mga kinaiya, kita mas mag-anam ka mahigalaon ug sensitibo sa mga panginahanglan sa atong isigkatawo25 ug masinati ang kalipay, kalinaw, ug espirituhanong pagtubo.26 Sa walay pagduhaduha, ang Ginoo moila sa atong mga paningkamot ug mohatag nato sa mga gasa nga atong gikinahanglan aron mas matugtanon ug mapailobon sa mga kalainan, mga kahuyang, ug pagkadili hingpit sa usag usa. Dugang pa, mas makapugong kita sa pag-aghat nga masilo o mopasilo niadtong mipasakit kanato. Ang atong tinguha sa pagpasaylo, sama sa gibuhat sa Manluluwas, niadtong dili maayo ang pagtagad kanato o nagsulti og daotan mahitungod kanato sigurado nga molambo ug mahimong kabahin sa atong kinaiya.
Hinaot nga kita karon, niining Dominggo sa Lukay, molatag sa atong mga sapot sa gugma ug mga lukay sa gugmang putli, molakaw subay sa gilaktan sa Prinsipe sa Kalinaw samtang nangandam kita sa pagsaulog, karong umaabot nga Dominggo, sa milagro sa walay sulod nga lubnganan. Isip mga kaigsoonan diha ni Kristo, kita malipayong mopahayag, “Hosanna—dalaygon ang Kaliwat ni David! Bulahan siya nga mianhi sa ngalan sa Ginoo! Dalaygon ang Dios.”27
Ako mopamatuod nga si Jesukristo buhi ug ang Iyang hingpit nga gugma, nga gipahayag pinaagi sa Iyang maulaong sakripisyo, gipadangat ngadto sa tanang nagtinguha sa paglakaw uban Kaniya ug sa pagtagamtam sa Iyang kalinaw niini nga kalibotan ug sa kalibotan nga moabot. Namulong ko niining mga butanga diha sa balaan nga ngalan sa Manluluwas ug Manunubos, nga si Jesukristo, amen.