Pagsalig diha sa Doktrina ni Kristo
Kon kita nakatukod sa atong mga balay diha sa pundasyon sa pakigsaad nga relasyon uban ni Kristo, kita nagsalig sa doktrina ni Kristo.
Sa akong paghanduraw, akong nakita ang nagkatigulang nga propeta nga si Nephi diha sa iyang lamesa nga sulatanan, ang mga palid nga bulawan anaa nagbukhad sa iyang atubangan, ang iyang igkukulit [stylus] anaa sa iyang kamot.
Si Nephi anaa sa proseso nga hapit na mahuman sa iyang kataposang pagkulit sa rekord. Siya misulat, “Ug karon, akong hinigugma nga mga kaigsoonan, ako mohimo ug pagtapos sa akong mga pakigpulong.”1 Apan wala madugay, ang Espiritu miaghat ni Nephi sa pagbalik ngadto sa iyang rekord ug sa pagsulat og usa ka panapos nga mensahe. Ubos sa gamhanang impluwensya sa Espiritu Santo, kanang gamhanan nga propeta mikuha pag-usab sa iyang igkukulit ug misulat, “Busa, ang mga butang … ako misulat igo na kanako, gawas sa pipila pa ka mga pulong … ako kinahanglan nga mamulong mahitungod sa doktrina ni Kristo.”2
Unsa ka mapasalamaton kita sa walay kataposan alang niadtong “pipila ka pulong”3 ug alang sa Espiritu nga nagpugos ni Nephi sa pagsulat niini. Ang kang Nephi nga mga sinulat kabahin sa doktrina ni Kristo usa ka bahandi ngadto niadtong kinsa magbusog diha niini. Kini naglangkob og usa ka panan-awon sa bunyag sa Manluluwas4 ug ang tingog sa Anak, nagdapit sa tanan sa pagsunod Kaniya5 ug “buhat[on] ang mga butang diin [kita] nakakita [Kaniya] nga mibuhat.”6 Kini naglangkob sa kang Nephi nga pagsaksi nga kadto kinsa, uban sa hugot nga pagtuo diha ni Kristo, sinsero nga naghinulsol sa ilang mga sala ug nagsunod sa Manluluwas ngadto sa tubig sa bunyag “makadawat sa Espiritu Santo; oo, dayon ang bunyag sa kalayo ug sa Espiritu Santo.”7 Atong madungog usab ang tingog sa Amahan nga nagpamatuod: “Oo, ang mga pulong sa akong Hinigugma mga tinuod ug matinud-anon. Siya kinsa molahutay hangtod sa kataposan, ang mao maluwas.”8
Si Presidente Russel M. Nelson mihatag og gibug-aton sa bugtong nga importansiya sa doktrina ni Kristo atol sa mga komentaryo ngadto sa bag-ong gitawag nga mga lider sa misyon: “Labaw sa bisan unsa pa, gusto nato sa atong mga misyonaryo … nga magbaton sa doktrina ni Kristo nga nakulit diha sa ilang mga kasingkasing––migamot … diha sa kinauyokan sa ilang mga bukog.”9
Ang Isangyaw ang Akong Ebanghelyo nag-summarize sa lima ka importanting elemento sa doktrina ni Kristo. Kini nag-ingon, “[Kita] nangimbitar sa uban sa pagduol ngadto kang Kristo pinaagi sa pagtabang kanila nga makadawat sa gipahiuli nga ebanghelyo pinaagi sa pagbaton og hugot nga pagtuo kang Jesukristo ug sa Iyang Pag-ula, paghinulsol, pagpabunyag, pagdawat sa gasa sa Espiritu Santo, ug paglahutay hangtod sa kataposan.”10
Apan ang importansya sa doktrina ni Kristo dili lamang alang sa mga misyonaryo! Ug kini mas tulugkaron pa kay sa pagbalik-balik lamang sa summary sa lima ka elemento niini. Kini naglibot sa balaod sa ebanghelyo. Kini mao ang mahinungdanong plano alang sa kinabuhing dayon.
Mga kaigsoonan, kon kita modawat sa pagdapit ni Presidente Nelson sa pagbaton sa doktrina ni Kristo nga ipagamot diha sa kinauyokan sa atong mga bukog, kita kinahanglan gayod mopalig-on sa atong pagkakabig ngadto sa Ginoo pinaagi sa pagtuon, pag-ampo, matinud-anong pagkinabuhi ug makanunayong paghinulsol. Kita kinahanglan gayod nga modapit sa Espiritu Santo sa pagkulit sa doktrina ni Kristo diha sa “mga papan sa [atong] [mga] kasingkasing”11 ingon ka lawom ug ka permanente sama sa pagkulit ni Nephi diha sa mga palid nga bulawan.
Sa milabay nga Oktubre, nangutana si Presidente Nelson, “Unsa ang kahulogan sa pagbuntog sa kalibotan?” Taliwala sa uban pang mga butang, siya miingon, “Kini nagpasabot sa pagsalig sa doktrina ni Kristo labaw pa kay sa mga pilosopiya sa mga tawo.”12
Ang pulong pagsalig gipatin-aw isip “usa ka gipasalig nga pagpiyal diha sa kinaiya, abilidad, kalig-on, o kamatuoran sa usa ka tawo o sa usa ka butang.”13 Kana nga usa ka tawo mao si Jesukristo, ug kana nga usa ka butang mao ang Iyang doktrina.
Sa unsang paagi nga ang tinuyo nga pagsalig sa doktrina ni Kristo nag-usab sa paagi nga kita nagpuyo sa atong mga kinabuhi?
Kon kita nagsalig sa doktrina ni Kristo, kita mosalig ni Kristo igo sa pagpuyo pinaagi sa Iyang matag pulong.14 Maghimo kita og tibuok kinabuhi nga pagtuon ni Jesukristo,15 sa Iyang pangalagad, sa Iyang mga pagtulon-an, ug sa Iyang malungtarong Pag-ula. Atong tun-an ang Iyang mga saad ug mga kahimtang diha diin kadto nga mga saad gihatag.16 Samtang kita nagtuon, mapuno kita uban sa mas dakong gugma alang sa Ginoo.
Kon kita nagsalig sa doktrina ni Kristo, kita moduol sa atong Langitnong Amahan kada adlaw diha sa mapainubsanon, hilom nga pag-ampo, diin kita makapahayag og pasalamat alang sa gasa sa Iyang Anak ug alang sa tanan natong mga panalangin.17 Makaampo kita alang sa mapadayagong pakig-uban sa Espiritu Santo,18 sa paglinya sa atong kabubut-on ngadto sa Iya,19 sa pagpamalandong diha sa atong mga pakigsaad ug sa pagbag-o sa atong pasalig sa pagsunod niini.20 Makaampo kita sa pagpaluyo ug pagpahayag og gugma alang sa atong mga propeta, mga manalagna, ug mga tigpadayag;21 sa pag-ampo alang sa makalimpyong gahom sa pagpasaylo;22 ug alang sa kalig-on sa pagsagubang sa tentasyon.23 Nagdapit ako kaninyo sa paghimo sa pag-ampo nga usa ka prayoridad sa inyong kinabuhi, nagtinguha kada adlaw sa pagpalambo sa inyong pakigsinultihanay uban sa Dios.
Kon kita nagsalig sa doktrina ni Kristo, atong ipadaplin ang makasilaw nga mga butang sa kalibotan aron kita makapunting diha sa Manunubos sa kalibotan.24 Atong limitahan o wad-on ang panahon nga gigahin sa social media; mga dula sa internet; pag-usik-usik, pagpatuyang, o dili angay nga mga kalingawan; ang pagdani sa mga bahandi ug mga pasigarbo niini nga kalibotan; ug bisan unsang uban nga mga kalihokan nga naghatag og luna ngadto sa bakak nga mga tradisyon ug sayop nga mga pilosopiya sa katawhan. Diha lamang ni Kristo kita makakaplag og kamatuoran ug mahangtorong katumanan.
Ang sinsero nga paghinulsol25 mahimong usa ka malipayong26 bahin sa atong mga kinabuhi—nga mapasaylo alang sa sala ug mausab ngadto sa imahe ni Kristo.27 Ang paghinulsol uban sa hugot nga pagtuo diha ni Kristo naghatag kanato og dalan ngadto sa Pag-ula ni Kristo. Si Presidente Dallin H. Oaks nagtudlo nga kon ang Manluluwas nagpasaylo, Siya “naghimo og labaw pa kay sa paglimpyo [kanato] gikan sa sala. Siya usab naghatag [kanato] og bag-ong kalig-on.”28 Ang matag usa kanato nagkinahanglan niini nga kalig-on sa pagsunod sa mga sugo sa Dios ug sa pagtuman sa mahangtorong katuyoan sa atong mga kinabuhi.
Diha ni Jesus ug sa Iyang doktrina, kita nagkaplag og kalig-on. Siya miingon, “Sa pagkatinuod, sa pagkatinuod, Ako moingon nganha kaninyo, nga kini mao ang akong doktrina, ug kinsa kadto nga magtukod diha niini nagtukod diha sa akong lig-on nga sukaranan, ug ang mga ganghaan sa impyerno dili makabuntog batok kanila.”29
Nakita nato kini nga saad nga natuman diha sa mga kinabuhi sa matinud-anong mga tawo. Kini lapas og gamay sa usa ka tuig ang milabay nga ako nahatagan og kahigayonan sa pakighimamat ni Travies ug Kacie. Naminyo sila sa sibil kaniadtong 2007. Nianang higayona, si Travis dili pa miyembro sa Simbahan. Si Kacie, bisan tuod og gipadako sa usa ka aktibo nga Santos sa Ulahing Adlaw nga panimalay, napalayo gikan sa iyang pagtuo sa pagkatin-edyer niya ug nahisalaag gikan sa iyang pundasyon.
Niadtong 2018, nahimamat ni Travis ang mga misyonaryo, ug nabunyagan niadtong Marso 2019. Si Travis nahimong misyonaryo ngadto ni Kacie, kinsa misinati usab og usa ka makapausab sa kinabuhi nga pagkakabig. Naselyo sila sa templo kaniadtong Septyembre 2020. Mga duha ka tuig human sa iyang bunyag, si Travis natawag sa pagserbisyo diha sa bishopric.
Si Travis dihay talagsaong sakit nga nagpadayon sa pagporma og mga pundok sa mga tumor diha sa iyang mga organo sulod sa lawas. Nakaagi siya og daghang operasyon sa pagkuha sa nagbalik-balik nga mga tumor, apan ang sakit dili mamaayo. Daghang tuig ang milabay, gihatagan si Travis og mas menos pa sa 10 ka tuig nga mabuhi.
Si Kacie adunay retinitis pigmentosa, usa ka talagsaong sakit nga nasunod o nakuha gikan sa pamilya hinungdan nga dili na mapugngan ang paggamay sa gilapdon sa panan-aw hangtod ang kompleto nga pagkabuta moabot.
Gisultihan ako ni Kacie kabahin sa iyang kaugmaon. Siya nagpaabot sa panahon, dili kaayo layo, nga siya mabiyuda, mabuta, walay pinansyal nga suporta, ug mahibilin nga mag-inusara sa pagpadako sa upat nga nagtubo nga mga anak. Nangutana ako ni Kacie kon unsaon niya sa pag-atubang ang mangitngit nga kaugmaon. Mipahiyom siya nga malinawon ug miingon, “Wala ako sukad mas malipayon o mas malaomon sa akong kinabuhi. Kami mihupot ngadto sa mga saad nga among nadawat didto sa templo.”
Si Travis karon mao ang bishop. Duha ka bulan ang milabay siya dihay lain nga dakong operasyon. Apan siya malaomon ug malinawon. Ang panan-aw ni Kacie nagkagrabe. Karon siya aduna nay iro nga gibansay sa paggiya og buta ug dili na makamaneho og sakyanan. Apan siya kontento, nagpadako sa iyang mga anak ug nagserbisyo isip usa ka magtatambag diha sa kapangulohan sa Young women.
Sila ni Travis ug Kacie nagtukod sa ilang balay diha sa dakong bato. Si Travis ug Kacie nagsalig sa doktrina ni Kristo ug sa saad nga ang Dios “mopahinungod sa [ilang] mga kasakit alang sa [ilang] kaayohan.”30 Diha sa hingpit nga plano sa Dios, ang pag-antos uban sa hugot nga pagtuo diha ni Kristo gisumpay ngadto sa atong pagkamahimo nga mahingpit diha ni Kristo.31 Sama sa maalamon nga tawo diha sa sambingay kinsa mitukod sa iyang balay diha sa dakong bato,32 kon mobundak ang ulan ug mobul-og ang mga baha ug mohuros ang mga hangin ug mohapak diha sa balay nga gitukod ni Travis ug Kacie, dili kini mapukan, tungod kay kini natukod man diha sa dakong bato.33
Si Jesus wala mamulong sa posibilidad sa ulan ug baha ug hangin sa atong mga kinabuhi; Siya namulong kabahin sa kasegurohan nga adunay mga unos nga moabot. Ang elemento nga mausab-usab diha niini nga sambingay dili kon moabot ba ang unos apan sa unsang paagi kita nagtubag sa Iyang mahigugmaong pagdapit sa pagpaminaw ug pagbuhat sa unsay Iyang gitudlo.34 Walay laing paagi sa pagpabilin nga buhi.
Kon kita nakatukod sa atong mga balay diha sa pundasyon sa pakigsaad nga relasyon uban ni Kristo, kita nagsalig sa doktrina ni Kristo, ug samtang kita moduol ngadto Kaniya, kita makabaton sa Iyang saad sa kinabuhing dayon. Ang mga tawo kinsa nagsalig sa doktrina ni Kristo nagpadayon sa unahan uban sa pagkamaunungon ug pagkamalahutayon hangtod sa kataposan. Walay laing paagi nga maluwas diha sa gingharian sa langit.35
Ako mohatag sa akong personal nga pagsaksi sa buhi, realidad nga pagkabanhaw ni Jesukristo. Ako nagpamatuod nga ang Dios nga atong Amahan nahigugma pag-ayo sa kalibotan nga Siya mipadala sa Iyang Anak sa pagtubos kanato gikan sa sala36 ug sa pag-ayo kanato gikan sa kasubo.37 Ako nagpamatuod nga Siya nagtawag og propeta sa Dios sa atong panahon, gani si Presidente Russell M. Nelson, pinaagi kang kinsa Siya nagsulti ug naggiya kanato.
Uban sa akong tibuok kasingkasing, ako nagdapit kaninyo sa pagsalig sa doktrina ni Kristo ug sa pagtukod sa inyong mga kinabuhi diha sa pundasyon sa Manunubos. Siya dili gayod mopakyas kaninyo. Sa ngalan ni Jesukristo, amen.