“Wala Nay Labaw ka Talagsaon ug Makapahimuot ingon sa Akong Hingpit nga Kalipay”

Ni Elder Craig C. Christensen

Sa Seventy

Ang paghinulsol sa kada adlaw ug pagduol ngadto ni Jesukristo mao ang dalan sa pagsinati og hingpit nga kalipay—kalipay nga molabaw pa sa atong mahunahuna.

Sa Iyang tibuok kinabuhi nga pagpangalagad, ang Manluluwas mipakita og dakong kalooy alang sa tanang anak sa Dios—ilabi na alang niadtong nag-antos o nahimulag. Sa dihang gisaway sa mga Pariseo tungod sa pagpakig-uban ug nakigpangaon taliwala sa mga makasasala, si Jesus mitubag pinaagi sa pagtudlo og tulo ka pamilyar nga sambingay.¹ Sa matag usa niining mga sambingay, Iyang gihatagan og gibug-aton ug kaimportante ang pagpangita niadtong nahisalaag, ug ang kalipay nga mabati kon sila mobalik. Pananglitan, sa sambingay sa nawala nga karnero Siya miingon, “[Dako] ang kalipay didto sa langit tungod sa usa ka makasasala nga naghinulsol.”²

Ang akong tinguha karo mao ang pagpalig-on sa koneksiyon tali sa hingpit nga kalipay ug sa paghinulsol—ilabi na, sa hingpit nga kalipay nga moabot kon kita maghinulsol ug ang mga pagbati og hingpit nga kalipay nga atong madawat kon kita modapit sa uban sa pagduol ngadto kang Kristo ug sa paggamit sa Iyang maulaon nga sakripisyo sa ilang kinabuhi.

Kita Naingon Nga Unta Kita Makabaton og Hingpit nga Kalipay

Sa mga kasulatan, ang pulong nga hingpit nga kalipay kasagaran nagpasabot og mas hilabihan pa kay sa lumalabay lang nga mga panahon sa katagbawan o gani sa mga pagbati og kamaya. Ang hingpit nga kalipay niining konteksto usa ka diosnon nga hiyas, makaplagan sa kahingpitan niini kon kita mobalik sa pagpuyo diha sa presensiya sa Dios.³ Kini mas tulukibon, makapabayaw, makapalahutay, ug makapausab sa kinabuhi kay sa bisan unsa nga kalipay o kahupay nga ikatanyag niining kalibotan.

Kita gilalang aron makabaton og hingpit nga kalipay. Mao kini ang gituyo nato nga padulngan isip mga anak sa mahigugmaon nga Langitnong Amahan. Siya gustong mopakigbahin sa Iyang hingpit nga kalipay uban kanato. Si propeta Lehi nagtudlo nga ang plano sa Dios alang sa matag usa kanato mao nga kita “unta … makabaton og hingpit nga kalipay.”⁴ Tungod kay kita nagpuyo sa napukan nga kalibotan, ang molahutay nga hingpit nga kalipay o ang walay kataposan nga kalipay kasagaran ingon og dili nato makab-ot. Apan sa matag bersikulo, si Lehi nagpadayon pinaagi sa pagpasabot nga “ang Mesiyas [mianhi] … sa pagtubos [kanato] gikan sa pagkapukan.”⁵ Ang katubsanan, tungod ug pinaagi sa Manluluwas nga si Jesukristo, nakapahimo sa hingpit nga kalipay nga posible.

Ang mensahe sa ebanghelyo mao ang mensahe sa paglaom, sa “maayong balita alang kaninyo nga makalipay kaayo,”⁶ ug sa mga paagi diin ang tanan makasinati og kalinaw ug mga okasyon sa hingpit nga kalipay niining kinabuhi ug makadawat og kahingpitan sa hingpit nga kalipay sa kinabuhi nga umaabot.⁷

Ang hingpit nga kalipay nga atong gihisgotan mao ang usa ka gasa alang sa matinud-anon, apan kini adunay kantidad. Ang hingpit nga kalipay dili sayon nga maangkon o dali ra nga ikahatag. Hinoon, kini gipalit “sa bililhong dugo ni [Jesus] ang Kristo.”⁸ Kon kita nakasabot gayod sa bili sa tinuod, balaanon nga kalipay, kita dili magduhaduha sa pagsakripisyo sa bisan unsa nga kalibotanon nga kabtangan o buhaton ang bisan unsa nga gikinahanglan nga mga kausaban sa kinabuhi aron madawat kini.

Usa ka gamhanan apan mapaubsanon nga hari sa Basahon ni Mormon nakasabot niini. “Unsa ang akong buhaton,” siya nangutana, “nga ako mahimo nga matawo sa Dios, nakaangkon niining daotan nga espiritu nga malangkat gikan sa akong dughan, ug makadawat sa iyang Espiritu, aron ako mapuno sa hingpit nga kalipay … ? Tan-awa, miingon siya, ako mobiya sa tanan nga ako nanag-iya, oo, ako mobiya sa akong gingharian, aron ako mahimo nga makadawat niining dako nga hingpit nga kalipay.”⁹

Agig tubag sa pangutana sa hari, ang misyonaryo nga si Aaron miingon, “Kon ikaw nagtinguha niini nga butang, … ikaw moyukbo sa atubangan sa Dios … [ug] maghinulsol sa tanan nimo nga mga sala.”¹⁰ Ang paghinulsol mao ang dalan ngadto sa hingpit nga kalipay¹¹ tungod kay kini ang dalan paingon ngadto sa Manluluwas nga si Jesukristo.¹²

Ang Hingpit nga Kalipay Moabot pinaagi sa Sinsero nga Paghinulsol

Alang sa uban, ang paghunahuna og paghinulsol isip dalan ngadto sa hingpit nga kalipay tingali ingon og nagkasumpaki. Ang paghinulsol, usahay, mahimong sakit ug lisod. Nagkinahanglan kini og pag-angkon nga ang pipila sa atong mga hunahuna ug mga lihok—bisan pipila sa atong mga gituohan—nasayop. Ang paghinulsol nagkinahanglan usab og kausaban, nga, usahay, mahimong dili komportable. Apan ang hingpit nga kalipay ug kahupay dili managsamang butang. Ang sala—lakip na sa sala sa pagkatagbaw sa kaugalingon—mopugong sa atong hingpit nga kalipay.

Sama sa gipahayag sa Salmista nga, “May paghilak sa gabii, apan sa pagkabuntag mobanos ang kalipay.”¹³ Kon kita maghinulsol sa atong mga sala, kita kinahanglan gayod nga motutok sa talagsaong hingpit nga kalipay nga mosunod. Ang espirituhanon nga kangitngit ingon og taas, apan sa kataposan mobati kita og kalipay, ug, o, pagkatalagsaon sa kalinaw ug kasanag sa kalipay nga atong mabati tungod kay ang Pag-ula sa Manluluwas nakapalingkawas kanato gikan sa sala ug pag-antos.

Wala Nay Labaw Katalagsaon ug Makapahimuot

Hunahunaa ang kasinatian ni Alma diha sa Basahon ni Mormon. Siya “gisakit uban sa walay kataposan nga kahasol” ug ang iyang kalag “gisamok” tungod sa iyang mga sala. Apan sa higayon nga siya midangop ngadto sa Manluluwas alang sa kalooy, siya “wala na mahinumdom sa [iyang] mga kasakit.”¹⁴

“Ug, unsa nga hingpit nga kalipay,” siya namahayag, “ug unsa ka kahibulongan nga kahayag ang akong nakita; oo, … wala nay labaw katalagsaon ug makapahimuot ingon sa akong hingpit nga kalipay.”¹⁵

Kining matang sa hingpit nga kalipay maanaa niadtong moduol ngadto ni Jesukristo pinaagi sa paghinulsol.¹⁶ Si Presidente Russell M. Nelson nagtudlo:

“Ang paghinulsol moabli sa atong agianan ngadto sa gahom sa Pag-ula ni Jesukristo. …

“Kon kita mopili nga maghinulsol, kita mopili nga mag-usab! Atong gitugutan ang Manluluwas nga mousab kanato ngadto sa labing maayo nga bersyon sa atong mga kaugalingon. Kita mopili nga molambo sa espirituhanon nga paagi ug makadawat sa hingpit nga kalipay––ang hingpit nga kalipay sa katubsanan diha Kaniya. Kon kita mopili sa paghinulsol, kita mopili nga mas mahisama ni Jesukristo!”¹⁷

Ang paghinulsol magdala og hingpit nga kalipay tungod kay kini nag-andam sa atong mga kasingkasing sa pagdawat sa impluwensiya sa Espiritu Santo. Ang mapuno sa Espiritu Santo nagpasabot nga gipuno sa hingpit nga kalipay. Ug ang mapuno sa hingpit nga kalipay nagpasabot sa kapuno sa Espiritu Santo.¹⁸ Ang atong hingpit nga kalipay mousbaw samtang kita maningkamot sa kada adlaw sa pagdala sa Espiritu diha sa atong mga kinabuhi. Sigun sa gitudlo ni propeta Mormon: “Bisan pa niana sila nagpuasa ug nag-ampo sa kanunay, ug nag-anam sa pagkalig-on ug pagkalig-on diha sa ilang pagpaubos, ug nagkalig-on ug nagkalig-on diha sa [ilang] hugot nga pagtuo ni Kristo, ngadto sa pagpuno sa ilang mga kalag uban sa hingpit nga kalipay ug kahupayan.”¹⁹ Ang Ginoo nagsaad sa tanan nga naningkamot sa pagsunod Kaniya, “Ako mohatag nganha kanimo … sa akong Espiritu, nga mohatag og kahayag sa imong hunahuna, nga mopuno sa imong kalag uban sa hingpit nga kalipay.”²⁰

Ang Hingpit nga Kalipay sa Pagtabang sa Uban nga Maghinulsol

Human kita mibati sa hingpit nga kalipay nga naggikan sa sinsero nga paghinulsol, kita natural lang nga gustong mopakigbahin niana nga kalipay ngadto sa uban. Kon atong buhaton, ang atong hingpit nga kalipay mapilo-pilo. Mao kana ang eksaktong nahitabo kang Alma.

“Kini mao ang akong himaya,” miingon siya, “nga tingali ako mahimo unta nga himan diha sa mga kamot sa Dios aron sa pagdala sa pipila ka mga kalag ngadto sa paghinulsol; ug kini mao ang akong hingpit nga kalipay.

“Ug tan-awa, kon ako makakita og daghan sa akong mga kaigsoonan nga matinud-anon nga naghinulsol, ug moduol sa Ginoo nga ilang Dios, niana ang akong kalag mapuno uban sa hingpit nga kalipay; niana ako mahinumdom unsa ang nahimo sa Ginoo alang kanako, … oo, niana ako mahinumdom sa iyang maloloy-on nga kamot nga iyang gitunol ngari kanako.”²¹

Ang pagtabang sa uban sa paghinulsol usa ka natural nga pagpahayag sa atong pasalamat ngadto sa Manluluwas, ug kini mao ang usa ka tinubdan sa talagsaong kalipay. Ang Ginoo misaad:

“Ug kon kini mahimo nga ikaw … magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!

“Ug karon, kon ang imong hingpit nga kalipay dako tungod sa usa ka kalag nga imong gidala ngari kanako … , unsa kaha kadako ang imong hingpit nga kalipay kon ikaw makadala og daghan nga mga kalag ngari kanako!”²²

Unsa ka Dako ang Iyang Hingpit nga Kalipay diha sa Kalag nga Naghinulsol

Akong nakita nga makatabang ang pagsulay sa paghanduraw sa hingpit nga kalipay nga bation gayod sa Manluluwas sa matag higayon nga atong madawat ang mga panalangin sa Iyang maulaong sakripisyo sa atong kinabuhi.²³ Sumala sa kinutlo ni Presidente Nelson,²⁴ si Apostol Pablo diha sa iyang sulat ngadto sa Mga Hebreo mipakigbahin niining malumo nga panabot: “Iwakli ta ang tanang … sala nga nagapiit paglikos kanato, … nga magatutok kang Jesus nga mao ang mag-uugmad ug maghihingpit sa atong pagtuo; nga tungod sa kalipay nga gibutang sa iyang atubangan miantos sa krus … ug karon nagalingkod siya diha sa tuo sa trono sa Dios.”²⁵ Kita naghisgot kanunay sa kasakit ug pag-antos sa Getsemani ug sa Kalbaryo, apan talagsa ra kita maghisgot sa talagsaong kalipay nga tingali gipaabot gayod sa Manluluwas samtang Siya mihalad sa Iyang kinabuhi alang kanato. Klaro, nga ang Iyang kasakit ug ang Iyang pag-antos maoy alang kanato, nga kita tingali makasinati og hingpit nga kalipay sa pagbalik uban Kaniya ngadto sa presensiya sa Dios.

Human sa pagtudlo sa katawhan sa karaan nga Amerika, ang Manluluwas mipahayag sa Iyang dakong gugma alang kanila pinaagi sa pag-ingon:

“Karon, tan-awa, hilabihan ang akong hingpit nga kalipay, gani ngadto sa kahingpitan, tungod kaninyo … ; Oo, [ug] bisan ang Amahan nalipay, ug usab ang tanan nga balaan nga mga anghel. …

“… Diha [kaninyo] Ako adunay [usa ka] kahingpitan sa kalipay.”²⁶

Duol kang Kristo ug Dawata ang Iyang Hingpit nga Kalipay

Mga kaigsoonan, ako motapos pinaagi sa pagpakigbahin sa akong personal nga pagsaksi, nga akong giisip nga usa ka sagrado nga gasa. Mopamatuod ako nga si Jesukristo mao ang Manluluwas ug Manunubos sa kalibotan. Nasayod ako nga Siya nagmahal sa matag usa kanato. Ang Iyang nagbinugtong nga gitutokan, ang Iyang “buhat ug [Iyang] himaya,”²⁷ mao ang pagtabang kanato sa pagdawat og usa ka kahingpitan sa hingpit nga kalipay uban Kaniya. Ako usa ka personal nga saksi nga ang paghinulsol sa kada adlaw ug pagduol ngadto ni Jesukristo mao ang paagi sa pagsinati og hingpit nga kalipay—kalipay nga molabaw pa sa atong mahunahuna.²⁸ Mao kana ang hinungdan nganong ania kita dinhi sa yuta. Mao kana ang hinungdan nganong giandam sa Dios ang Iyang talagsaong plano sa kalipay alang kanato. Si Jesukristo mao gayod “ang dalan, ang kamatuoran, ug ang kinabuhi”²⁹ ug ang bugtong “ngalan nga gihatag ubos sa langit diin ang tawo maluwas diha sa gingharian sa Dios.”³⁰ Ako sa ingon mopamatuod pinaagi sa sagradong ngalan ni Jesukristo, amen.