Padayon Lang—inubanan sa Hugot nga Pagtuo

Ni Elder Carl B. Cook

Sa Kapangulohan sa Seventy

Apan ang pagbaton og hugot nga pagtuo diha sa atong Manluluwas, nga si Jesukristo, magtabang nato nga mabuntog ang pagkawala sa paglaom bisan unsa pa nga mga babag ang atong masugatan.

Si Elder George A. Smith, usa ka Apostol, nakadawat og tambag gikan ni Propeta Joseph Smith panahon sa dakong kalisod: “Siya miingon kanako nga ako kinahanglan dili gayod mawad-an og paglaom, bisan unsa nga matang sa kalisod nga mobilanggo kanako. Kon ako iunlod sa kinailadman sa Nova Scotia ug ang tanan nga mga Batoon nga Kabungtoran ipatong-patong pagdat-og kanako, ako dili angay mawad-an og paglaom apan makigbisog, mogamit sa hugot nga pagtuo, ug dili kawad-an sa maayong paglaom ug ako kinahanglan makalingkawas gikan niini nga tanan sa kataposan.”¹

Ngano nga si Propeta Joseph nakasulti man niana—ngadto sa tawo nga nag-antos? Tungod kay nasayod siya nga kini tinuod. Siya nakaagi niini. Si Joseph balikbalik nga nakasinati og grabe nga mga kalisod sa iyang kinabuhi. Hinoon, samtang nagbaton siya og hugot nga pagtuo kang Jesukristo ug sa Iyang Pag-ula ug nagpadayon lang, nabuntog niya ang ingon og imposible nga mga babag.²

Karon gusto nakong bag-ohon ang hangyo ni Joseph nga dili tugotan ang pagkawala sa paglaom nga mobuntog nato samtang mag-atubang kita og kahigawad, masakit nga mga kasinatian, atong kaugalingon nga mga kahuyang, o ubang mga hagit.

Kon ako moingon og nawad-an og paglaom, wala ko maghisgot mahitungod sa mas makadaot nga mga hagit sa klinikal nga depresyon, sa mga sakit sa pagkabalaka, o ubang mga sakit nga nagkinahanglan og espesyal nga pagtambal.³ Ako naghisgot lang sa normal nga kabahin sa kinabuhi nga moabot bisan sa maayo ug dili maayong mga butang sa kinabuhi.

Ako nadasig sa akong mga bayani nga mipadayon lang—inubanan sa hugot nga pagtuo—bisan unsay mahitabo.⁴ Sa Basahon ni Mormon, atong mabasa ang mahitungod ni Zoram, ang sulugoon ni Laban. Sa dihang nakuha ni Nephi ang tumbaga nga mga palid, si Zoram nag-atubang sa pagpili sa pagsunod ni Nephi ug sa iyang mga igsoong lalaki ngadto sa kamingawan o posibleng mamatay siya.

Pagkalisod nga pagpili! Ang una untang buhaton ni Zoram mao ang pagdagan, apan gigunitan siya ni Nephi ug misaad nga kon siya mouban nila, siya mahimong gawasnon ug adunay dapit sa ilang pamilya. Nadasig si Zoram ug miuban nila.⁵

Si Zoram nag-antos og daghang kasakit sa iyang bag-ong kinabuhi, apan siya mipadayon inubanan sa hugot nga pagtuo. Kita walay timailhan nga si Zoram adunay tinguha nga mobalik sa iyang kanhi kinabuhi o nagbaton og kaligutgot sa Dios o sa uban.⁶ Siya usa ka tinuod nga higala ni Nephi, usa ka propeta, ug siya ug ang iyang kaliwat nagpuyo nga gawasnon ug mauswagon didto sa gisaad nga yuta. Unsa unta nga dakong babag sa dalan ni Zoram sa kataposan misangpot sa daghang panalangin, tungod sa iyang pagkamatinud-anon ug pagkaandam nga mopadayon lang—inubanan sa hugot nga pagtuo.⁷

Karong bag-o naminaw ko sa usa ka maisugon nga sister nga mipakigbahin giunsa niya sa pagpadayon taliwala sa mga kalisod.⁸ Siya adunay mga hagit, ug usa ka Dominggo naglingkod siya sa Relief Society, naminaw sa magtutudlo nga sa iyang pagtuo walay mga pagsulay—hingpit nga lahi sa iyang kinabuhi. Gikapoy siya ug nawad-an og paglaom. Gibati niya nga siya dili maayo—o gani wala mahisakop—mao nga mibarog siya ug mibiya, nagplano nga dili na mobalik pag-usab sa simbahan. Naglakaw paingon sa iyang sakyanan, mibati siya og talagsaon nga impresyon: “Sulod ngadto sa chapel ug paminaw sa mamumulong sa panagtigom alang sa sakramento.” Nagduhaduha siya sa aghat apan mibati pag-usab niini nga mas maaghaton, mao nga siya miadto sa miting.

Ang mensahe mao gayod unsay iyang gikinahanglan. Gibati niya ang Espiritu. Nasayod siya nga ang Ginoo gusto nga siya magpabilin uban Kaniya, nga mahimo nga Iyang disipulo, ug sa pagtambong sa simbahan, mao nga siya nagpabilin.

Nasayod ba kamo unsay iyang gipasalamatan? Nga siya wala mohunong. Nagpadayon lang siya—inubanan sa hugot nga pagtuo kang Jesukristo, bisan kon kini lisod, ug siya ug ang iyang pamilya gipanalanginan pag-ayo samtang siya nagpadayon.

Ang Dios sa langit ug yuta motabang nato nga mabuntog ang pagkawalay paglaom ug sa bisan unsa nga mga babag nga atong masugatan kon kita magtinguha sa Iyang tabang, mosunod sa mga pag-aghat sa Espiritu Santo,⁹ ug mopadayon lang—inubanan sa hugot nga pagtuo.

Maayo gani, kon kita maluya o dili makahimo, ang Ginoo makalig-on sa atong hugot nga pagtuo. Siya makadugang sa atong kapasidad lapas pa sa atong kaugalingon. Nakasinati ako niana. Sobra na sa 20 ka tuig ang milabay, wala ako magdahom nga tawagon isip usa ka Area Seventy, ug gibati nako nga dili gyod angayan. Human ako mabansay sa akong mga buluhaton, gikinahanglan kong modumala sa akong unang komperensiya sa stake.¹⁰ Ang presidente sa stake ug ako miplano pag-ayo sa matag detalye. Sa hapit na ang komperensiya, si Presidente Boyd K. Packer, kanhi–Akting nga Presidente sa Korum sa Napulog Duha ka Apostoles, mitawag aron mahibalo kon mahimo ba siyang mokuyog nako. Nasurprisa ko ug, dayag lang, nga miuyon. Nangutana ko kon unsay iyang gusto nga ipadayon tungod kay siya ang modumala. Siya misugyot nga among usbon ang plano ug mag-andam sa pagsunod sa Espiritu. Maayo na lang, ako aduna pay 10 ka adlaw sa pagtuon, pag-ampo, ug pag-andam.

Uban sa bukas nga agenda, didto na kami sa atubangan 20 minutos sa wala pa magsugod ang miting sa pagpangulo. Midap-ig ko sa presidente sa stake ug mihunghong, “Usa ni ka talagsaong stake.”

Gisiko ko og hinay ni Presidente Packer ug miingon, “Walay tabi.”

Mihunong ko sa pagtabi, ug ang iyang pakigpulong sa kinatibuk-ang komperensiya nga “Ang Balaang Pagtahod Nagdapit og Pagpadayag”¹¹ misantop sa hunahuna. Nakaobserbar ko nga si Presidente Packer nagsulat og mga pakisayran nga kasulatan. Ang Espiritu mikompirmar nako nga siya nakadawat og mga impresyon alang sa miting. Ang akong kasinatian bag-o lang misugod.

Si Presidente Packer namulong sulod sa unang 15 minutos ug mihatag og gibug-aton sa kaimportante sa pagpahigayon sa tanang mga miting sumala sa giya sa Espiritu Santo.¹² Dayon siya miingon, “Maminaw na kita karon ni Elder Cook.”

Sa akong pagpadulong sa pulpito, nangutana ko kon unsa ka taas nga gusto niya nga ako mamulong ug kon aduna bay hilisgotan nga gusto niya nga akong hisgotan. Siya miingon, “Kuha og 15 minutos ug padayon sumala sa imong inspirasyon.” Miabot ko og 14 minutos ug mipakigbahin sa tanan nga diha sa akong hunahuna.

Si Presidente Packer mibarog pag-usab ug namulong sulod sa laing 15 minutos. Siya mipakigbahin niini nga kasulatan:

“Ipamulong ang mga hunahuna diin Ako mobutang sa inyong mga kasingkasing, ug kamo dili pagalibugon sa atubangan sa mga tawo;

“Kay ihatag kini kaninyo … sa diha gayod nga higayon, unsa ang inyong isulti.”¹³

Dayon siya miingon, “Maminaw na kita karon gikan ni Elder Cook.”

Nakalitan ko. Ako wala gayod maghunahuna sa posibilidad nga ako hangyoon sa pagpamulong kaduha sa usa ka miting. Ako walay bisan unsa sa hunahuna nga isulti. Nag-ampo nga mainiton ug nagsalig sa Ginoo alang sa panabang, sa bisan unsang paagi, ako napanalanginan og usa ka hunahuna, usa ka kasulatan, ug ako nakapamulong sulod sa laing 15 minutos. Ako milingkod nga hingpit nga gikapoy.

Si Presidente Packer namulong pag-usab sulod sa 15 minutos mahitungod sa pagsunod sa Espiritu ug mipakigbahin sa mga pagtulon-an ni Pablo nga kita kinahanglan nga dili mamulong sa “mga pulong sa kaalam sa tawo kondili sa mga pulong nga gitudlo sa Espiritu sa Dios.”¹⁴ Sama sa inyong mahunahuna, ako nakuratan sa dihang siya nadasig sa pagsulti sa ikatulo nga higayon, “Maminaw na kita karon ni Elder Cook.”

Ako gikapoy. Ako wala nay ikasulti. Ako nasayod nga oras kadto nga ako magbaton og dugang nga hugot nga pagtuo. Hinay, akong mipaingon sa pulpito, nangamuyo sa Dios alang sa panabang. Samtang akong gitarong ang mikropono, ang Ginoo milagrosong mipanalangin nako nga mihatag og laing 15 minutos nga mensahe.¹⁵

Ang miting sa kataposan nahuman, apan dali kong nakaamgo nga ang sesyon sa mga hamtong magsugod sa usa ka oras. Pastilan! Sama ni Zoram, gusto kaayo ko nga modagan, apan sama ni Nephi nga midakop kaniya, nasayod ko nga madakpan ko ni Presidente Packer. Ang miting sa mga hamtong misunod sa mao gihapon nga paagi. Namulong ko og tulo pa ka higayon. Pagkasunod adlaw atol sa kinatibuk-ang sesyon, ako namulong kausa.

Human sa komperensiya, si Presidente Packer misulti uban sa pagmahal, “Buhaton nato kini pag-usab sa umaabot.” Ako nagmahal ni Presidente Boyd K. Packer ug nagpasalamat sa tanan nakong nakat-onan.

Nasayod ba kamo unsay akong gipasalamatan? Nga ako wala mohunong—o mobatok. Kon ako nagpadala pa sa akong dili maayong tinguha sa pag-ikyas gikan niadto nga mga miting, nawala unta nako ang oportunidad sa paglig-on sa akong hugot nga pagtuo ug pagdawat sa buhong nga pagbubo sa gugma ug suporta gikan sa akong Langitnong Amahan. Ako nakat-on sa Iyang kaluoy, sa milagrosong gahom ni Jesukristo ug sa Iyang Pag-ula, ug sa gamhanang impluwensya sa Espiritu Santo. Bisan pa sa akong kahuyang,¹⁶ nakat-on ko nga ako makaserbisyo; ako makatampo kon ang Ginoo anaa sa akong kiliran kon ako magpadayon lang—inubanan sa hugot nga pagtuo.

Bisan pa sa gidak-on, gidaghanon, ug ka seryoso sa mga hagit nga atong atubangon sa kinabuhi, kitang tanan adunay mga panahon nga kita mobati nga mohunong, mobiya, moeskapo, o tingali moundang. Apan ang pagbaton og hugot nga pagtuo diha sa atong Manluluwas, nga si Jesukristo, motabang nato nga mabuntog ang pagkawalay paglaom bisan unsa pa nga mga babag ang atong masugatan.

Sama nga ang Manluluwas mitapos sa buhat nga gihatag nga Iyang buhaton, Siya adunay gahom sa pagtabang nato sa pagtapos sa buhat nga gihatag kanato.¹⁷ Kita mapanalanginan sa pagpadayon subay sa dalan sa pakigsaad, bisan unsa pa ka batoon kini, ug sa kataposan makadawat og kinabuhing dayon.¹⁸

Sama sa gisulti ni Propeta Joseph Smith, “Pagpabilin nga malig-on, kamo nga mga Santos sa Dios, dugangi og taas-taas nga pakigbisog, ug ang bagyo sa kinabuhi lumalabay, ug kamo pagagantihan niana nga Dios kansang mga sulugoon mao kamo.”¹⁹ Sa ngalan ni Jesukristo, amen.