“Magpuyo ngari Kanako, ug Ako nganha Kanimo; Busa, Maglakaw uban Kanako”

Ni Elder David A. Bednar

Sa Korum sa Napulog Duha ka Apostoles

Ang saad sa Manluluwas nga magpuyo nganhi kanato mao ang tinuod ug gikinahanglan sa matag miyembro nga nagtuman sa pakigsaad sa Iyang gipahiuli nga Simbahan.

Ang karaan nga propeta nga si Enoch, nga gihulagway sa Daang Tugon, sa Doktrina ug mga Pakigsaad, ug sa Perlas nga Labing Bililhon,¹ nahimong instrumento sa pagtukod sa siyudad sa Zion.

Ang asoy sa kasulatan sa pagkatawag ni Enoch sa pagserbisyo nagpakita nga “siya nakadungog og tingog gikan sa langit nga nag-ingon: Enoch, akong anak, panagna ngadto niini nga katawhan, ug isulti ngadto kanila—Paghinulsol, … kay ang ilang mga kasingkasing nag-anam pagkatig-a, ug ang ilang mga dunggan dili makadungog, ug ang ilang mga mata dili makakita sa layo.”²

Ug sa diha nga si Enoch nakadungog niini nga mga pulong, siya miyukbo sa iyang kaugalingon ngadto sa yuta, sa atubangan sa Ginoo, … ug misulti sa atubangan sa Ginoo, nag-ingon: Ngano nga ako nakakaplag og pag-uyon sa imong panan-aw, ug apan ako usa lamang ka batan-on, ug ang tanan nga katawhan nagdumot kanako; kay ako dili maayo nga mosulti; busa ako ba mao ang imong sulugoon?”³

Palihog hinumdomi nga sa panahon sa tawag ni Enoch sa pagserbisyo, siya nakahibalo gayod sa iyang personal nga mga kahuyang ug mga limitasyon. Ug ako nagtuo nga dunay panahon nga kitang tanan sa atong pagserbisyo sa Simbahan mibati sama ni Enoch. Apan ako nagtuo nga ang tubag sa Ginoo sa pangamuyo nga pangutana ni Enoch mapuslanon ug magamit sa matag usa kanato karon.

“Ug ang Ginoo miingon ngadto ni Enoch: Lakaw ug buhata ingon nga Ako misugo kanimo, ug walay tawo makatulisok kanimo. Bukha ang imong ba-ba, ug kini mapuno, ug Ako mohatag kanimo og igsusulti. …

“Tan-awa ang akong Espiritu anaa kanimo, busa ang imong tanan nga mga pulong Ako mohatag og kaangayan; ug ang mga bukid mahanaw sa imong atubangan, ug ang mga sapa mobalhin sa ilang agianan; ug ikaw magpuyo ngari kanako, ug Ako nganha kanimo; busa maglakaw uban kanako.”⁴

Si Enoch sa kataposan nahimong gamhanan nga propeta ug himan sa mga kamot sa Dios sa pagtuman sa usa ka mahinungdanon nga buhat, apan wala siya magsugod sa iyang pangalagad nianang paagiha! Hinoon, ang iyang kapasidad paglabay sa panahon milambo samtang nakat-on siya nga magpuyo ug maglakaw uban sa Anak sa Dios.

Ako sinsero nga nag-ampo alang sa tabang sa Espiritu Santo samtang atong gihunahuna pagdungan ang tambag nga gihatag sa Ginoo ngadto ni Enoch ug unsay gipasabot niini alang ninyo ug nako karon.

Ikaw Magpuyo ngari Kanako

Ang Ginoo nga si Jesukristo mihatag sa matag usa kanato sa imbitasyon sa pagpuyo diha Kaniya.⁵ Apan unsaon man nato nga tinuod nga makat-on ug moduol ug magpuyo diha Kaniya?

Ang pulong nga magpuyo nagpasabot nga dili matarog o lig-on ug molahutay nga dili magpadaog. Si Elder Jeffrey R. Holland mipasabot nga ang “magpuyo” isip usa ka aksiyon nagpasabot “‘[sa] pagpabilin—apan [sa] pagpabilin sa kahangtoran.’ Kana mao ang awhag sa mensahe sa ebanghelyo ngadto sa … tanan … sa kalibotan. Duol, apan moduol aron sa pagpabilin. Duol uban sa konbiksyon ug paglahutay. Duol hangtod sa hangtod, alang kaninyo ug alang sa kaayohan sa tanang kaliwatan nga mosunod kaninyo.”⁶ Sa ingon, kita magpuyo diha kang Kristo samtang kita lig-on ug makanunayon sa atong debosyon ngadto sa Manunubos ug sa Iyang balaan nga mga katuyoan, sa mga panahon nga maayo ug dili maayo.⁷

Kita magsugod nga magpuyo diha sa Ginoo pinaagi sa paggamit sa atong moral nga kabubut-on sa pagpas-an mismo sa Iyang yugo⁸ pinaagi sa mga pakigsaad ug mga ordinansa sa Iyang gipahiuli nga ebanghelyo. Ang atong koneksyon sa pakigsaad uban sa atong Langitnong Amaan ug sa Iyang nabanhaw ug buhi nga Anak mao ang langitnon nga tinubdan sa panglantaw, paglaom, gahom, kalinaw, ug malahutayong kalipay; kini usab mao ang lig-on nga sukaranan⁹ diin kita angay nga motukod sa atong mga kinabuhi.

Kita magpuyo diha Kaniya pinaagi sa pagpaningkamot kanunay sa paglig-on sa atong indibidwal nga talikala sa pakigsaad ngadto sa Amahan ug sa Anak. Pananglitan, ang pag-ampo nga sinsero ngadto sa Mahangtorong Amahan pinaagi sa ngalan sa Iyang Hinigugma nga Anak mopalawom ug mopalig-on sa atong koneksyon sa pakigsaad ngadto Kanila.

Kita magpuyo diha Kaniya pinaagi sa tinud-anay nga pagbusog sa mga pulong ni Kristo. Ang doktrina sa Manluluwas modala kanato, isip mga anak sa pakigsaad, paduol ngadto Kaniya¹⁰ ug mosulti kanato sa tanang mga butang unsa ang kinahanglan natong buhaton.¹¹

Kita magpuyo diha Kaniya pinaagi sa mahinangpon nga moapil sa ordinansa sa sakramento, pagrebyo ug pagpamalandong sa atong mga saad sa pakigsaad ug sinserong maghinulsol. Ang takos nga pag-ambit sa sakramento mao ang usa ka saksi ngadto sa Dios nga kita andam sa pagdala sa atong mga kaugalingon sa ngalan ni Jesukristo ug maningkamot sa “kanunay nga paghinumdom kaniya”¹² human sa mubo nga panahon nga gipangayo aron sa pag-apil nianang sagrado nga ordinansa.

Ug kita magpuyo diha Kaniya pinaagi sa pagserbisyo sa Dios samtang kita moserbisyo sa Iyang mga anak ug mangalagad sa atong mga kaigsoonan.¹³

Ang Manluluwas miingon, “Kon tumanon ninyo ang akong mga sugo, magpabilin kamo sa akong gugma; sama nga Ako nagtuman sa mga sugo sa akong Amahan, ug nagpabilin sa Iyang gugma.”¹⁴

Ako sa mubong paagi mihulagway sa pipila sa daghang paagi nga kita magpabilin diha sa Manluluwas. Ug ako karon modapit sa matag usa kanato isip Iyang mga disipulo sa pagpangayo, pagtinguha, pagpanuktok, ug pagkat-on sa atong mga kaugalingon mismo pinaagi sa gahom sa Espiritu Santo og ubang makahuluganong mga paagi nga atong mahimo si Kristo nga sentro sa atong mga kinabuhi sa tanan natong buhaton.

Ug Ako nganha Kanimo

Ang saad sa Manluluwas ngadto sa Iyang mga sumusunod duha ka bahin: kon kita magpuyo diha Kaniya, Siya mopuyo diri kanato. Apan posible ba gayod alang ni Kristo nga mopuyo diha kaninyo ug kanako—sa indibidwal ug sa personal? Ang tubag niini nga pangutana mao ang lanog nga oo!

Sa Basahon ni Mormon, atong makat-onan ang mahitungod sa pagtulon-an ug pagpamatuod ni Alma ngadto sa mga kabos kansang mga kasakit nakapugos nila nga magpaubos. Sa iyang panudlo, iyang gitandi ang pulong ngadto sa usa ka binhi nga kinahanglan nga itanom ug alimahan, ug iyang gihulagway “ang pulong” isip ang kinabuhi, misyon, ug maulaong sakripisyo ni Jesukristo.

Si Alma miingon, “Sugdi ang pagtuo sa Anak sa Dios, nga siya moanhi sa pagtubos sa iyang katawhan, ug nga siya mag-antos ug mamatay aron sa pagtubos sa ilang mga sala; ug nga siya mobangon pag-usab gikan sa mga patay, nga mao ang magpahinabo sa pagkabanhaw, nga ang tanan nga mga tawo mobarog sa iyang atubangan, aron pagahukman sa kataposan ug sa adlaw sa paghukom, sumala sa ilang mga buhat.”¹⁵

Gihatagan niini nga deskripsiyon nga “ang pulong” ni Alma, palihog hunahunaa ang makadasig nga koneksyon nga dayon iyang gihatag.

“Ug karon … ako nagtinguha nga inyong itanom kini nga pulong sa inyong mga kasingkasing, ug samtang kini magsugod na sa pagtubo bisan pa niana alimahi kini pinaagi sa inyong hugot nga pagtuo. Ug tan-awa, kini mahimo nga usa ka kahoy, magtubo diha kaninyo ngadto sa kinabuhi nga walay kataposan. Ug hinaot pa unta nga ang Dios maghatag nganha kaninyo nga ang inyong mga kabudlay mahimo nga magaan, pinaagi sa hingpit nga kalipay sa iyang Anak. Ug gani kining tanan kamo makabuhat kon kamo buot.”¹⁶

Ang binhi nga kinahanglan natong paningkamotan nga itanom sa atong mga kasingkasing mao ang pulong—bisan ang kinabuhi, misyon, ug doktrina ni Jesukristo. Ug samtang ang pulong maalimahan pinaagi sa hugot nga pagtuo kini mahimong usa ka kahoy nga motubo diha kanato ngadto sa walay kataposan nga kinabuhi.¹⁷

Unsa ang simbolismo sa kahoy sa panan-awon ni Lehi? Ang kahoy mahimong makonsiderar isip usa ka representasyon ni Jesukristo.¹⁸

Akong minahal nga kaigsoonan, ang Pulong ba anaa kanato? Ang mga kamatuoran sa ebanghelyo sa Manluluwas nahisulat ba sa mga papan nga bato sa atong mga kasingkasing?¹⁹ Kita ba nagpadulong ug hinayhinay nga nahimong mas sama Kaniya? Ang kahoy ba ni Kristo nagtubo diha kanato? Naningkamot ba kita nga mahimong “bag-o nga [mga nilalang]”²⁰ diha Kaniya?²¹

Tingali kining milagroso nga potensiyal nakapadasig ni Alma sa pagpangutana: “Kamo sa espirituhanong paagi natawo ba sa Dios? Kamo nakadawat ba sa iyang hitsura diha sa inyong mga panagway? Kamo nakasinati ba niining dako nga kausaban diha sa inyong mga kasingkasing?”²²

Kita kinahanglan mahinumdom kanunay sa panudlo sa Ginoo ngadto ni Enoch, “Ikaw magpuyo ngari kanako, ug ako nganha kanimo.”²³ Ug ako mopamatuod sa saad sa Manluluwas nga magpuyo nganhi kanato mao ang tinuod ug gikinahanglan sa matag miyembro nga nagtuman sa pakigsaad sa Iyang gipahiuli nga Simbahan.

Pagkinabuhi ngari Kanako

Si Apostol Pablo mipasidaan sa mga tumutuo kinsa midawat sa Ginoo: “Busa pagkinabuhi diha kaniya.”²⁴

Ang pagkinabuhi diha ug uban sa Manluluwas nagpatigbabaw sa duha ka importante nga mga aspeto sa pagkadisipulo: (1) pagsunod sa mga sugo sa Dios, ug (2) paghinumdom ug pagtahod sa sagrado nga mga pakigsaad nga nagkonektar nato ngadto sa Amahan ug sa Anak.

Si Juan mipahayag:

“Kon tumanon nato ang mga sugo sa Dios, mapaniguro nato nga nakaila kita kaniya.

“Kon may moingon, Nakaila ako sa Dios, apan wala magtuman sa iyang gisugo, bakakon kanang tawhana ug wala kaniya ang kamatuoran.

“Apan ang nagtuman sa iyang sugo, nahingpit diha kaniya ang gugma sa Dios. Mahibaloan nato nga nagkinabuhi kita sumala sa kabubut-on sa Dios pinaagi niini.

“Siya nga nag-ingon nga siya anaa sa Dios kinahanglan nga magkinabuhi sama kang Jesukristo.”²⁵

Si Jesus nanawag sa matag usa kanato, “Dali, sunod kanako”²⁶ ug “lakaw uban kanako.”²⁷

Ako mopamatuod nga samtang kita mopadayon pinaagi sa hugot nga pagtuo ug maglakaw sa kaaghop sa Espirtu sa Ginoo,²⁸ kita panalanginan sa gahom, giya, panalipod, ug kalinaw.

Pagpamatuod ug Saad

Si Alma mihulagway sa mahigugmaon nga pangamuyo gikan sa Ginoo ngadto sa tanang buhi nga mga tawo:

“Tan-awa, siya nagpadala og usa ka pagdapit ngadto sa tanan nga mga tawo, kay ang mga bukton sa kalooy gitunol ngadto kanila, ug siya miingon: Paghinulsol, ug Ako modawat kaninyo.

“… Duol ngari kanako ug kamo moambit sa bunga sa kahoy sa kinabuhi; oo, kamo mokaon ug moinom sa pan ug tubig sa kinabuhi sa walay kalisud.”²⁹

Ako mohatag og gibug-aton sa pagkakompleto sa pangamuyo sa Manluluwas. Siya gusto nga mopanalangin sa Iyang grasya ug kaluoy sa matag tawo kinsa buhi karon, kinsa buhi sa una, ug kinsa mabuhi pa dinhi sa yuta.

Pipila ka miyembro sa Simbahan midawat isip tinuod nga doktrina, mga baroganan, ug mga pagpamatuod nga balik-balik nga gipahayag gikan niini nga pulpito sa Sentro sa Komperensiya ug sa lokal nga mga kongregasyon sa tibuok kalibotan—ug nakigbisog gihapon sa pagtuo niining mahangtorong mga kamatuoran nga pihong magamit sa ilang mga kinabuhi ug sa ilang mga sirkumstansiya. Sila sinserong nagtuo ug maunungong nagserbisyo, apan ang ilang koneksyon sa pakigsaad ngadto sa Amahan ug sa Iyang matubsanong Anak wala pa mahimong buhi ug makapausab nga reyalidad sa ilang mga kinabuhi.

Ako mosaad nga pinaagi sa gahom sa Espiritu Santo, kamo makahibalo og mobati sa mga kamatuoran sa ebanghelyo nga akong gisulayan sa paghulagway alang ninyo—alang ninyo sa indibidwal ug sa personal.

Ako malipayong mosaksi nga si Jesukristo mao ang atong mahigugmaon ug buhi nga Manluluwas ug Manunubos. Kon kita magpuyo diha Kaniya, Siya magpuyo diri kanato.³⁰ Ug samtang kita maglakaw ug uban Kaniya, kita mapanalanginan nga magdala og daghan nga mga bunga. Ako mopamatuod pinaagi sa sagradong ngalan ni Ginoong Jesukristo, amen.