Mga Kapanguhaan sa Kasaysayan sa Doktrina ug mga Pakigsaad: Oliver Cowdery, Mga Kapanguhaan sa Kasaysayan sa Doktrina ug mga Pakigsaad (2025)
Oliver Cowdery, Mga Kapanguhaan sa Kasaysayan sa Doktrina ug mga Pakigsaad (2025)
Oliver Cowdery
(1806–50)
Oliver Cowdery, ca. 1845, daguerreotype, copy by Coe studio, 1883, Church History Library, PH 1700 3773.
Si Oliver Cowdery natawo sa Wells, Vermont, niadtong 1806. Nagtrabaho siya isip schoolmaster sa Manchester, New York, sa dihang nahimamat niya ang pamilya Smith. Niadtong 1829, misugod siya sa pagtabang ni Joseph Smith sa paghubad sa Basahon ni Mormon sa Harmony, Pennsylvania, ug alang niya ang pipila ka pagpadayag nianang higayona (Doktrina ug mga Pakigsaad 6–9). Atol sa pagpadayag, si Cowdery nabunyagan ug nakadawat og awtoridad sa pagkapari (Doktrina ug mga Pakigsaad 13), ug sa ulahing bahin nianang tuiga nahimo siya nga usa sa Tulo ka Saksi sa Basahon ni Mormon (Doktrina ug mga Pakigsaad 17). Anaa siya didto sa dihang Ang Simbahan ni Jesukristo sa mga Santos sa Ulahing mga Adlaw opisyal nga naorganisar niadtong 6 sa Abril 1830. Pipila sa nag-una nga mga pagpadayag gitumong sa kinatibuk-an o sa bahin niini ngadto ni Cowdery (Doktrina ug mga Pakigsaad 18; 23:1–2; 24; 26). Niadtong Septiyembre 1830, gitawag siya pinaagi sa pagpadayag nga “moadto ngadto sa mga Lamanita [Lumad nga mga Taga-Amerika] ug mosangyaw sa akong ebanghelyo ngadto kanila” (Doktrina ug mga Pakigsaad 28:8; tan-awa usab sa Doktrina ug mga Pakigsaad 32). Agi og pagtuman niini nga pagpadayag, atol sa tingtugnaw sa 1830–1831, si Cowdery nangulo sa usa ka grupo sa mga misyonaryo paingon sa gitawag karong panahona og Kansas. Sulod sa dul-an sa duha ka tuig mipuyo siya sa Distrito sa Jackson, Missouri, diin mitabang siya sa pagdumala sa mga buluhaton sa Simbahan sa pag-imprinta (Doktrina ug mga Pakigsaad 57:13; tan-awa usab sa seksiyon 69). Pagka-Disyembre 1832, iyang giminyoan si Elizabeth Ann Whitmer, anak nga babaye ni Peter Whitmer Sr. ug ni Mary Musselman Whitmer. Pagka-Septiyembre 1833, mibalhin sila ngadto sa Kirtland, Ohio, diin si Cowdery gitudlo nga kaabag sa presidente sa Simbahan, miserbisyo sa high council sa Kirtland (Doktrina ug Pakigsaad 102:3), mitabang sa pag-edit sa pipila sa mantalaan sa Simbahan. Siya ug ang iyang pamilya mibalhin ngadto sa Far West, Missouri, pagka-1837, apan si Cowdery napahimulag ug natangtang pagkasunod tuig. Pagka-1848, si Cowdery mihangyo ug gidawat og balik sa Simbahan sa Kanesville, Iowa.
Mga Pakisayran sa Doktrina ug mga Pakigsaad
Doktrina ug mga Pakigsaad 6, 7, 8, 9, 13, 17, 18, 20, 21, 23, 24, 25, 26, 27, 28, 30, 32, 35, 37, 47, 52, 53, 55, 57, 58, 60, 61, 66, 68, 69, 70, 102, 104, 106, 110, 111, 124