“Mga Kapanguhaan sa Kasaysayan sa Doktrina ug mga Pakigsaad: William W. Phelps, Mga Kapanguhaan sa Kasaysayan sa Doktrina ug mga Pakigsaad (2025)
William W. Phelps, Mga Kapanguhaan sa Kasaysayan sa Doktrina ug mga Pakigsaad (2025)
William W. Phelps
(1792–1872)
William Wines Phelps, ca. 1865, gilitratohan ni Charles R. Savage, Church History Library, PH 1700 4495.
Si William W. Phelps natawo sa Hanover, New Jersey, niadtong 1792. Iyang giminyoan si Sally Waterman niadtong 1815. Niadtong Hunyo 1831, si Phelps nabunyagan ngadto sa Ang Simbahan ni Jesukristo sa mga Santos sa Ulahing mga Adlaw ug naordinahan nga usa ka elder didto sa Kirtland, Ohio. Sa misunod nga bulan, gitudlo siya isip ang tig-imprinta alang sa Simbahan (Doktrina ug mga Pakigsaad 57:11). Sa ulahing bahin sa 1831, mibalhin siya ngadto sa Independence, Missouri, diin iyang gi-edit ang The Evening and the Morning Star ug ang Upper Missouri Advertiser. Si Phelps nahimong sakop sa Literary Firm niadtong 1831 (Doktrina ug mga Pakigsaad 70) ug sakop sa Nagkahiusang Kapunongan niadtong 1832 (Doktrina ug mga Pakigsaad 82). Niadtong Nobiyembre 1833, upat ka bulan human ang mga maggugubot nga panon miguba sa buhatan sa pag-imprinta sa Simbahan didto sa Independence, si Phelps ug ang ubang mga Santos sa Ulahing mga Adlaw mibalhin ngadto sa Distrito sa Clay, Missouri. Gitudlo siya nga magtatambag o kaabag nga presidente ni David Whitmer, ang Presidente sa Simbahan sa Missouri, niadtong Hulyo 1834. Si Phelps mibalik ngadto sa Kirtland niadtong 1835, diin mitabang siya sa paghugpong sa Doktrina ug mga Pakigsaad ug sa unang himno sa Simbahan. Dayon mibalhin siya og balik ngadto sa Missouri niadtong 1836. Tali sa 1838 ug 1840, kaduha siya napahimulag ug kaduha siya gidawat pag-usab ngadto sa Simbahan. Pagka-Nobiyembre 1842, mibalhin siya ngadto sa Nauvoo, Illinois, diin mitabang siya sa pag-edit sa Times and Seasons ug Nauvoo Neighbor ug giabangan ni Willard Richards sa pagsulat sa kasaysayan ni Joseph Smith. Milalin siya ngadto sa Teritoryo sa Utah niadtong 1848.
Mga Pakisayran sa Doktrina ug mga Pakigsaad