Mga Kapanguhaan sa Kasaysayan sa Doktrina ug mga Pakigsaad: Brigham Young, Mga Kapanguhaan sa Kasaysayan sa Doktrina ug mga Pakigsaad (2025)
Brigham Young, Mga Kapanguhaan sa Kasaysayan sa Doktrina ug mga Pakigsaad (2025)
Brigham Young
(1801–77)
Brigham Young, ca. 1850–1860, litrato nga anaa sa tumbaga nga plato, Church History Library, PH 100.
Si Brigham Young natawo sa Whitingham, Vermont, niadtong 1801. Nakigminyo siya ni Miriam Angeline Works niadtong 1824. Niadtong Abril 1832, si Young gibunyagan sa Ang Simbahan ni Jesukristo sa mga Santos sa Ulahing mga Adlaw. Pagkahuman sa kamatayon ni Miriam niadtong Septiyembre 1832, siya nagserbisyo og mga misyon sa New York ug Upper Canada. Niadtong 1833 siya mibalhin ngadto sa Kirtland, Ohio, diin siya nakigminyo ni Mary Ann Angell niadtong Marso 1834. Sa wala madugay nianang tuiga, siya miapil sa ekspedisyon sa Kampo sa Israel. Niadtong 1835 si Young gi-orden nga usa ka sakop sa Korum sa Napulog Duha ka Apostoles. Gikan sa 1835 hangtod 1837, siya nagserbisyo og mga misyon sa New York ug New England. Si Young mibalhin ngadto sa Far West, Missouri, niadtong 1838, ug wala madugay mitabang sa pagdirekta sa pagpamalhin sa mga Santos sa Ulahing mga adlaw gikan sa Missouri padulong sa Illinois. Siya nagserbisyo og misyon sa England taliwala sa 1839 ug 1841. Siya dayon mibalhin ngadto sa Nauvoo, Illinois, diin siya miapil sa Konseho sa Kalim-an. Si Young gitudlo nga Presidente sa Korum sa Napulog Duha ka Apostoles niadtong 1840 ug giila isip mao niadtong Enero 1841 nga pagpadayag (Doktrina ug mga Pakigsaad 124:127). Niadtong 8 sa Agosto 1844, human sa kamatayon ni Joseph Smith, ang Napulog Duha gipaluyohan nga magdumala sa mga kalihokan sa Simbahan. Niadtong Abril 1845, si Young giila isip “Presidente sa tibuok Simbahan” sa usa ka komperensiya sa Nauvoo. Taliwala sa 1846 ug 1848, siya nagdirekta sa paglangyaw sa mga Santos sa Ulahing mga Adlaw ngadto sa Walog sa Salt Lake, sa Teritoryo sa Utah, ug giorganisar og usab ang Unang Kapangulohan. Sa Utah siya nagserbisyo isip Presidente sa Simbahan ug sa nagkalain-lain nga pangsibikong mga posisyon, lakip na ang gobernador ug superintendente sa mga kalihokan sa mga Indian sa Teritoryo sa Utah.
Mga Pakisayran sa Doktrina ug mga Pakigsaad