Mga Kapanguhaan sa Kasaysayan sa Doktrina ug mga Pakigsaad: Frederick G. Williams, Mga Kapanguhaan sa Kasaysayan sa Doktrina ug mga Pakigsaad (2025)
Frederick G. Williams, Mga Kapanguhaan sa Kasaysayan sa Doktrina ug mga Pakigsaad (2025)
Frederick G. Williams
(1787–1842)
Frederick G. Williams, ca. 1836, lana nga pintal diha sa canvas, Church History Museum.
Si Frederick G. Williams natawo sa Suffield, Connecticut. Niadtong 1815 siya nakigminyo ni Rebecca Swain, ug niadtong 1830 siya mibalhin sa Kirtland, Ohio, diin siya gibunyagan ngadto sa Ang Simbahan ni Jesukristo sa mga Santos sa Ulahing mga Adlaw ug gi-orden nga elder. Siya mikuyog dayon ni Oliver Cowdery og misyon ngadto sa Missouri. Si Williams gi-orden isip halangdon nga pari niadtong 1831 ug human niana nahimong klerk ug tigsulat ni Joseph Smith (tan-awa sa Doktrina ug mga Pakigsaad 90:19). Niadtong 1833, si Williams mitambong sa miting sa pag-organisar sa Tulunghaan sa mga Propeta, nahimong sakop sa Nagkahiusang Kapunongan (Doktrina ug mga Pakigsaad 92:1–2), ug nagsugod sa pagserbisyo isip kaabag nga pangulo o magtatambag sa kapangulohan sa Simbahan (Doktrina ug mga Pakigsaad 81:1; 90:6; 102:3). Niadtong 1834, siya miapil sa ekspedisyon sa Kampo sa Israel ngadto sa Missouri. Si Williams nagserbisyo sa komitiba sa pagmantala nga nag-imprinta sa Doktrina ug mga Pakigsaad ug sa kang Emma Smith nga A Collection of Sacred Hymns [Usa ka Koleksiyon sa Sagrado nga mga Himno] niadtong 1835. Usa siya ka stockholder sa Nagkahiusang Kapunongan sa Kirtland. Niadtong 1837 usa ka kinatibuk-an nga katigoman sa Simbahan ang miboto sa pagtangtang ni Williams gikan sa kapangulohan sa Simbahan ug siya pulihan ni Hyrum Smith. Siya gipahimulag sa Simbahan niadtong Marso 1839 apan napabalik sa pakigdait usa ka tuig human niana. Siya namatay sa Quincy, Illinois, niadtong Oktubre 1842.
Mga Pakisayran sa Doktrina ug mga Pakigsaad
Doktrina ug mga Pakigsaad 56, 64, 81, 90, 92, 93, 102, 103, 104