Mga Kapanguhaan sa Kasaysayan sa Doktrina ug mga Pakigsaad: Lyman Wight, Mga Kapanguhaan sa Kasaysayan sa Doktrina ug mga Pakigsaad (2025)
Lyman Wight, Mga Kapanguhaan sa Kasaysayan sa Doktrina ug mga Pakigsaad (2025)
Lyman Wight
(1796–1858)
Si Lyman Wight natawo sa Fairfield, New York. Siya nakigminyo ni Harriet Benton niadtong 1823. Niadtong Nobiyembre 1830, siya gibunyagan ngadto sa Ang Simbahan ni Jesukristo sa mga Santos sa Ulahing mga Adlaw ug gi-orden nga elder. Atol sa 1831 ug 1832, siya miserbisyo og mga misyon sa Missouri, Ohio, ug Virginia (tan-awa sa Doktrina ug mga Pakigsaad 52:3, 7). Niadtong Nobiyembre 1833, siya ug uban nga mga Santos sa Ulahing mga Adlaw gipapahawa sa Distrito sa Jackson, Missouri. Sa misunod nga tuig, siya mitabang nga mang-agni og mga boluntaryo ug miapil sa ekspedisyon sa Kampo sa Israel (tan-awa sa Doktrina ug mga Pakigsaad 103:30). Mibalhin siya ngadto sa Distrito sa Caldwell, Missouri, niadtong 1837 ug sa Adam-Ondi-Ahman, Missouri, diin siya miserbisyo sa kapangulohan sa stake, niadtong 1838. Atol sa 1838 ug 1839, siya nabilanggo kauban ni Joseph Smith sa lain-laing dapit sa Missouri. Si Wight sa kataposan mibalhin sa Nauvoo, Illinois, diin siya nahimong sakop sa Korum sa Napulog Duha ka Apostoles. Taliwala sa 1841 ug 1844, siya miserbisyo og pipila ka misyon sa Estados Unidos (tan-awa sa Doktrina ug mga Pakigsaad 124:18). Siya gidawat sa Konseho sa Kalim-an niadtong Mayo 1844, apan siya gisalikway gikan sa konseho niadtong Pebrero 1845. Sa misunod nga Nobiyembre, siya nangulo og pundok sa mga Santos sa Ulahing mga Adlaw gikan sa Teritoryo sa Wisconsin ngadto sa Republika sa Texas. Si Wight gipahimulag niadtong 1848.
Mga Pakisayran sa Doktrina ug mga Pakigsaad