Vinson Knight

(1804–42)

Si Vinson Knight natawo sa Norwich, Massachusetts, niadtong 1804. Iyang giminyoan si Martha McBride niadtong 1826. Niadtong tingpamulak sa 1834, si Knight nabunyagan ngadto sa Ang Simbahan ni Jesukristo sa mga Santos sa Ulahing mga Adlaw. Pagkasunod tuig, mibalhin siya ngadto sa Kirtland, Ohio, diin giordinahan siya nga usa ka elder ug usa ka high priest. Didto sa Kirtland miserbisyo siya isip usa ka magtatambag ni Bishop Newel K. Whitney ug usa ka stockholder sa Kirtland Safety Society. Niadtong 1837 si Knight mibalhin ngadto sa Far West, Missouri. Pagkasunod tuig, gitudlo siya nga akting nga bishop sa Adam-ondi-Ahman, Missouri. Human gipapahawa gikan sa Missouri kauban sa ubang mga Santos sa Ulahing mga Adlaw, si Knight mitabang sa pagpalit og pito ka libo dosyentos otsentay singko ka ektarya nga yuta alang sa Simbahan sa Teritoryo sa Iowa. Dayon nanimuyo siya sa Commerce, Illinois, nga sa kaulahian giusab ang ngalan og Nauvoo, diin gitudlo siya nga bishop sa Lower Ward ug miserbisyo sa daghan nga sibiko nga posisyon. Niadtong Enero 1841, usa ka pagpadayag misugo ni Knight nga mopalit og stock alang sa pagtukod sa Balay sa Nauvoo ug “sa pagdumala sa bishopric” (Doktrina ug mga Pakigsaad 124:74, 141). Sa misunod nga tuig namatay siya didto sa Nauvoo.

Mga Pakisayran sa Doktrina ug mga Pakigsaad

Doktrina ug mga Pakigsaad 124

Dugang nga Impormasyon

Biyograpikanhong mga kamatuoran ug mga tinubdan, The Joseph Smith Papers [Ang mga Papeles ni Joseph Smith]

Si Vinson Knight diha sa Biyograpikanhong Database sa Kasaysayan sa Simbahan

Tan-awa ang Vinson Knight sa FamilySearch