Mga Kapanguhaan sa Kasaysayan sa Doktrina ug mga Pakigsaad: Thomas B. Marsh Mga Kapanguhaan sa Kasaysayan sa Doktrina ug mga Pakigsaad (2025)
Thomas B. Marsh, Mga Kapanguhaan sa Kasaysayan sa Doktrina ug mga Pakigsaad (2025)
Thomas B. Marsh
(1800–66)
Thomas B. Marsh, litrato, Church History Library, MS 12377.
Si Thomas B. Marsh natawo sa Acton, Massachusetts. Niadtong 1820 iyang giminyoan si Elizabeth Godkin. Siya ug ang iyang pamilya mibalhin ngadto sa Palmyra, New York, pagka-Septiyembre 1830, sa dihang gibunyagan siya ngadto sa Ang Simbahan ni Jesukristo sa mga Santos sa Ulahing mga Adlaw ug giordinahan nga usa ka elder. Niadtong 1831 mibalhin sila kauban sa mga Santos ngadto sa Kirtland, Ohio, diin siya giordinahan nga usa ka high priest. Human matawag pinaagi sa pagpadayag (Doktrina ug mga Pakigsaad 52:22; 56:5; 75:31), pagkahuman miserbisyo siya og mga misyon ngadto sa Missouri ug sa silangang bahin sa Estados Unidos. Siya ug ang iyang pamilya mibalhin ngadto sa Missouri niadtong 1832. Niadtong 1834 si Marsh gitudlo nga usa ka sakop sa high council sa Zion sa Distrito sa Clay, Missouri. Pagkasunod tuig, giordinahan siya nga usa ka sakop sa Korum sa Napulog Duha ka Apostoles ug gipaluyohan nga presidente niana nga korum.
Sa dihang ang Doktrina ug mga Pakigsaad gimantala niadtong 1835, si Marsh ug ang ubang mga sakop sa Korum sa Napulog Duha midugang sa ilang pagpamatuod nga ang basahon “gihatag pinaagi sa pagdasig sa Dios” (Pasiuna sa Doktrina ug mga Pakigsaad). Duha ka pagpadayag sa basahon piho nga gitumong ngadto ni Marsh, personal nga nagtambag kaniya ug isip presidente sa Korum sa Napulog Duha (Doktrina ug mga Pakigsaad 31; 112).
Si Marsh mibiya gikan sa Simbahan niadtong 1838 ug gipahimulag niadtong 1839. Niadtong 1857, gibunyagan siya pag-usab ug milalin ngadto sa Teritoryo sa Utah.
Mga Pakisayran sa Doktrina ug mga Pakigsaad