“Pebrero 3–9: ‘Kini Mao ang Espiritu sa Pagpadayag’: Doktrina ug mga Pakigsaad 6–9,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)

“Doktrina ug mga Pakigsaad 6–9,” Dali, Sunod Kanako—Alang sa Panimalay ug sa Simbahan: 2025

Pebrero 3–9: “Kini Mao ang Espiritu sa Pagpadayag”

Doktrina ug mga Pakigsaad 6–9

Sa tinglarag sa 1828, usa ka batan-ong magtutudlo nga ginganlan og Oliver Cowdery nakakuha og trabaho sa pagtudlo didto sa Manchester, New York, ug mipuyo uban sa pamilya ni Lucy ug Joseph Smith Sr. Si Oliver nakadungog mahitungod sa ilang anak nga si Joseph ug sa iyang talagsaong mga kasinatian, ug si Oliver, kinsa mikonsiderar sa iyang kaugalingon nga usa ka tawo nga nangita sa kamatuoran, gusto nga mahibalo og dugang pa. Ang mga Smith mihulagway sa mga pagbisita sa mga anghel, sa usa ka karaan nga talaan, ug sa gasa sa paghubad pinaagi sa gahom sa Dios. Si Oliver naikag. Tinuod ba kaha kini? Si Lucy ug si Joseph Sr. mihatag kaniya og tambag nga magamit ngadto ni bisan kinsa nga nangita sa kamatuoran: mag-ampo ug mangutana sa Ginoo.

Gihimo kini ni Oliver, ug ang Ginoo mitubag, namulong og “kalinaw ngadto sa [iyang] hunahuna” (Doktrina ug mga Pakigsaad 6:23). Ang pagpadayag, nadiskobrehan ni Oliver, dili lamang alang sa mga propeta sama ni Joseph Smith. Alang kini sa tanan nga nagkinahanglan niini ug makugihong nangita niini. Si Oliver aduna pay daghang angay nga makat-onan, apan siya igo nga nahibalo nga mohimo sa iyang sunod nga lakang. Siya nahibalo nga ang Ginoo nagbuhat og importante nga butang pinaagi ni Joseph Smith, ug si Oliver gusto nga mahimong kabahin niini.

Tan-awa usab sa Mga Santos, 1:65–71, Gospel Library.

Days of Harmony
Witness Oliver Cowdery’s experience as Joseph Smith’s scribe during the translation of the Book of Mormon.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 6; 8–9

Ang Langitnong Amahan namulong kanako pinaagi sa Espiritu Santo.

Niadtong tingpamulak sa 1829, si Oliver Cowdery miboluntaryo nga mahimong tigsulat ni Joseph Smith samtang nagpadayon siya sa paghubad sa Basahon ni Mormon. Ang kasinatian nakahatag niya og kalipay, ug naghunahuna kon siya makadawat ba usab kaha og pagpadayag ug gasa sa paghubad. Ang iyang unang pagsulay, hinuon, wala mosalir.

Kon ikaw naglisod sa pagdawat o pagsabot sa pagpadayag, tingali masabtan nimo ang kasinatian ni Oliver—ug makat-on gikan niini. Samtang magbasa ka sa Doktrina ug mga Pakigsaad 6, 8, ug 9, timan-i unsay gitudlo sa Ginoo kang Oliver mahitungod sa personal nga pagpadayag. Pananglitan:

Unsay gisugyot diha sa Doktrina ug mga Pakigsaad 6:5–7; 8:1; 9:7–8 mahitungod sa unsay gikinahanglan sa Ginoo kanimo sa dili pa Siya mopadayag sa Iyang kabubut-on?
Unsay imong nakat-onan gikan sa Doktrina ug mga Pakigsaad 6:14–17, 22–24; 8:2–3; 9:7–9 mahitungod sa lainlaing mga paagi nga ang pagpadayag mahimong moabot? Unsaon nimo sa pag-ila niini?
Unsa pa ang imong nakat-onan mahitungod sa pagpadayag gikan niini nga mga seksiyon?

Ang mga kasinatian ni Oliver tingali “makapahinumdom” nimo sa mga higayon nga gibati nimo nga ang Ginoo nakigsulti nimo (Doktrina ug mga Pakigsaad 6:22). Narekord ba nimo ang imong mga hunahuna mahitungod niini nga mga kasinatian? Kon mao, ikonsiderar ang pagbasa sa unsay imong gisulat. Kon wala, paggahin og pipila ka oras sa pagsulat sa unsay imong nahinumdoman. Ikonsiderar kon unsaon nga ikaw makapadayon sa pagkuha og kalig-on gikan niini nga mga kasinatian. Alang sa pipila ka ideya, tan-awa sa mensahe ni Elder Neil L. Andersen “Mga Espirituhanong Panumdoman nga Angay Hinumdoman” (Liahona, Mayo 2020, 18–22).

Pipila sa mga lider sa Simbahan mipakigbahin sa ilang mga kasinatian sa pagpadayag diha sa “Paminaw Kaniya” nga koleksiyon sa bidyo. Human sa pagtan-aw sa usa o daghan pa niini nga mga bidyo, tingali madasig ka sa pagrekord sa imong kaugalingong mga kasinatian, mopakigbahin sa unsay gipamulong sa Ginoo nganha nimo.

Tan-awa usab sa Topics and Questions [Mga Hilisgotan ug mga Pangutana], “Personal Revelation [Personal nga Pagpadayag],” Gospel Library; “Oliver Cowdery’s Gift [Ang Gasa ni Oliver Cowdery],” diha sa Konteksto sa mga Pagpadayag [Revelations in Context], 15–19.

Doktrina ug mga Pakigsaad 6:18–21, 29–37

Paghunahuna ngadto kang Kristo sa matag hunahuna.

Ang Ginoo nahibalo nga si Joseph Smith makasinati og “malisod nga mga kahimtang” sa umaabot nga katuigan (Doktrina ug mga Pakigsaad 6:18). Siya nahibalo usab kon unsa nga mga pagsulay ang imong masinati sa umaabot. Unsa ang imong nakita diha sa Iyang tambag nila ni Joseph ug Oliver diha sa Doktrina ug mga Pakigsaad 6:18–21, 29–37 nga makatabang nimo nga mosalig Kaniya?

Sa imong pamati unsa ang ipasabot sa “paghunahuna [ngadto kang Kristo] sa matag hunahuna”? (bersikulo 36). Sa unsang paagi nga ikaw makahimo niini sa mas makanunayong paagi—atol sa maayo nga mga panahon ug sa “malisod nga mga kahimtang”? Ikonsiderar kini nga tambag gikan ni Presidente Russell M. Nelson: “Nagkinahanglan og grabeng paningkamot sa pangisip nga motan-aw Kaniya sa matag hunahuna. Apan kon atong buhaton, ang atong mga pagduha-duha ug mga kahadlok mahanaw” (“Pagdawat sa Gahom ni Jesukristo diha sa Atong mga Kinabuhi,” Liahona, 40).

Tan-awa usab sa Neil L. Andersen, “Ang Akong Hunahuna Mihupot Niini nga Panumdoman mahitungod ni Jesukristo,” Liahona, Mayo 2023, 91–94.

usa ka hulagway sa kamot sa Manluluwas, nga adunay marka sa lansang sa Iyang bukas nga palad — Detalye gikan sa Behold My Hand [Tan-awa ang Akong Kamot], ni Jeffrey Ward

Doktrina ug mga Pakigsaad 6:29–37

“Ayaw kahadlok sa pagbuhat og maayo.”

Nganong kita usahay “[ma]hadlok sa pagbuhat og maayo”? (bersikulo 33). Unsa ang imong nakita diha sa Doktrina ug mga Pakigsaad 6:29–37 nga makahatag nimo og kaisog sa pagbuhat og maayo? Ikonsiderar ang pagkanta o pagpaminaw sa usa ka himno nga nakapadasig nimo sa pagbaton og kaisog diha kang Kristo, sama sa “Magpadayon Tang Tanan” (Mga Himno, nu. 150).

Doktrina ug mga Pakigsaad 6–7; 9:3, 7–14

“Bisan ingon nga ikaw nagtinguha kanako busa kini mahimo nganha kanimo.”

Timan-i kon pila ka higayon ang mga pulong sama sa “tinguha” o “mga tinguha” makita diha sa seksiyon 6 ug 7. Unsay imong nakat-onan gikan niini nga mga seksiyon mahitungod sa importansya nga gibutang sa Dios diha sa imong mga tinguha? Ipangutana sa imong kaugalingon ang pangutana sa Ginoo diha sa Doktrina ug mga Pakigsaad 7:1: “Unsa ang imong gitinguha?”

Usa sa mga matarong nga tinguha ni Oliver Cowdery—ang paghubad sama sa gibuhat ni Joseph Smith—wala matuman. Samtang nagbasa ka sa Doktrina ug mga Pakigsaad 9:3, 7–14, unsa nga mga pagbati ang imong nadawat nga tingali makatabang nimo kon ang imong matarong nga mga gitinguha wala matuman sa pagkakaron?

Tan-awa usab sa Doktrina ug mga Pakigsaad 11:8; Dallin H. Oaks, “Tinguha,” Liahona, Mayo 2011, 42–45.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 6:5, 15–16, 22–23; 8:2; 9:7–9

Ang Langitnong Amahan mamulong kanako pinaagi sa Espiritu Santo.

Ang mga kamatuoran nga nakat-onan ni Oliver Cowdery mahitungod sa personal nga pagpadayag makatabang sa imong mga bata samtang nagpalambo sila sa ilang abilidad sa pag-ila sa Espiritu Santo. Mahimo nimong gamiton ang “Kapitulo 5: Joseph Smith ug Oliver Cowdery” (sa Mga Istorya sa Doktrina ug mga Pakigsaad, 22–25, o ang katugma nga bidyo diha Gospel Library) sa pagtudlo nila mahitungod kang Oliver ug sa unsay iyang nakat-onan. Ipakigbahin sa usag usa ang inyong paborito nga mga bahin sa istorya. Samtang maghimo kamo niini, hatagi og gibug-aton ang mga butang nga gitudlo sa Ginoo kang Oliver mahitungod kon unsaon pagpaminaw sa tingog sa Dios, ug basaha ang may kalabotan nga mga bersikulo, sama sa Doktrina ug mga Pakigsaad 6:23 o 9:7–9.

2:49
Chapter 5: Joseph Smith and Oliver Cowdery: February–April 1829

Si Oliver Cowdery nakakat-on mahitungod sa pagpadayag samtang nagtabang ni Joseph Smith sa paghubad sa Basahon ni Mormon.
Mahimo usab nimong dapiton ang imong mga bata sa paghikap sa ilang mga ulo ug mga dughan samtang magbasa ka sa mga pulong nga “hunahuna” ug “kasingkasing” diha sa Doktrina ug mga Pakigsaad 8:2. Sultihi ang mga bata, gikan sa imong mga kasinatian, kon unsa ang bation kon ang Espiritu Santo mamulong nganha sa imong hunahuna ug kasingkasing. Tabangi sila nga makaplagan ang mga tubag sa pangutana nga “Sa unsang paagi nga ang Espiritu Santo mamulong ngari kanato?” niini nga mga bersikulo: Doktrina ug mga Pakigsaad 6:15–16, 22–23; 8:2; 9:7–9.

Paggamit og mga istorya. Ang mga istorya makatabang sa mga bata nga makasabot sa mga baroganan sa ebanghelyo tungod kay nagpakita kini kon giunsa sa ubang mga tawo pagsunod kini nga mga baroganan. Samtang nagtudlo ka, pangita og mga paagi sa paglakip og mga istorya—gikan sa mga kasulatan, gikan sa kasaysayan sa Simbahan, o gikan sa imong kaugalingon nga kinabuhi—nga naghulagway sa mga baroganan diha sa mga kasulatan.

Doktrina ug mga Pakigsaad 6:34

Tungod ni Jesukristo, ako “dili mahadlok.”

Ang Ginoo misulti nila ni Joseph ug Oliver, “ayaw kahadlok, gagmay nga panon” (Doktrina ug mga Pakigsaad 6:34). Mahimo nimong dapiton ang imong mga bata nga isulti og balik kana nga pulongan uban nimo sa pipila ka higayon. Mahimo usab sila nga malingaw sa pagpakaaron-ingon nga usa ka panon sa nahadlok nga mga karnero. Unsa kaha ang gikahadlokan sa mga karnero? Dayon ikaw ug ang imong mga anak mahimong motan-aw sa usa ka hulagway sa Manluluwas isip usa ka magbalantay sa karnero (adunay usa nga anaa sa kataposan niini nga latid) ug hisgoti kon sa unsang paagi nga Siya nagbantay kanato sama sa pagbantay sa usa ka magbalantay sa karnero ngadto sa Iyang mga karnero.
Ikonsiderar ang pagdula o pagkanta og usa ka awit mahitungod sa pagkaplag og kaisog diha kang Kristo, sama sa “Buhata Gayod ang Matarong” (Songbook sa mga Bata, 80) o “Magpadayon Tang Tanan” (Mga Himno, nu. 150). Unsa ang gitudlo sa kanta ngari kanato mahitungod sa kon unsaon sa Manluluwas sa pagtabang nato nga dili mahadlok?

Doktrina ug mga Pakigsaad 6:36

Ako makatan-aw ngadto kang Jesukristo sa matag hunahuna.

Human sa pagbasa og dungan sa Doktrina ug mga Pakigsaad 6:36, ikaw ug ang imong mga anak mahimong magdrowing aron matabangan kamo sa “pagtan-aw [ngadto kang Jesukristo] sa matag hunahuna.” Ipakigbahin sa usag usa ang inyong mga gidrowing, ug tabangi ang imong mga anak sa paghunahuna og mga dapit nga kabutangan nila niini aron makita nila kini kanunay.

Alang sa dugang nga mga ideya, tan-awa ang isyu karong bulana sa Higala nga magasin.

Si Kristo uban ang mga panon sa karnero — The Lord Is My Shepherd [Ang Ginoo Mao Ang Akong Magbalantay], ni Yongsung Kim