“ແນວຄິດເພື່ອປັບປຸງການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ແນວຄິດເພື່ອປັບປຸງການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ແນວຄິດເພື່ອປັບປຸງການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຂະນະທີ່ທ່ານສຶກສາພຣະກິດຕິຄຸນຂອງພຣະຜູ້ຊ່ວຍໃຫ້ລອດຢູ່ທີ່ບ້ານ ແລະຢູ່ທີ່ໂບດ, ໃຫ້ພິຈາລະນາຄຳຖາມຕໍ່ໄປນີ້:

ທ່ານຈະສາມາດເຊື້ອເຊີນພຣະວິນຍານໃຫ້ເຂົ້າມາສູ່ການສຶກສາຂອງທ່ານໄດ້ແນວໃດ?
ທ່ານຈະສາມາດສຸມໃຈໃສ່ພຣະຜູ້ຊ່ວຍໃຫ້ລອດໃນການສຶກສາຂອງທ່ານໄດ້ແນວໃດ?
ທ່ານຈະສາມາດໃຊ້ປະໂຫຍດຈາກຊ່ວງເວລາຂອງການຮຽນຮູ້ໃນແຕ່ລະມື້ໄດ້ແນວໃດ?
ທ່ານຈະສາມາດຊຸກຍູ້ສະມາຊິກໃນຄອບຄົວ ແລະ ໃນຫ້ອງຮຽນໃຫ້ສຶກສາພຣະຄຳພີດ້ວຍຕົວເອງ ແລະ ແບ່ງປັນໃນສິ່ງທີ່ເຂົາເຈົ້າກຳລັງຮຽນຮູ້ໄດ້ແນວໃດ?

ຕໍ່ໄປນີ້ແມ່ນວິທີທີ່ລຽບງ່າຍບາງຢ່າງ ເພື່ອສົ່ງເສີມການສຶກສາຂອງທ່ານກ່ຽວກັບພຣະຄຳຂອງພຣະເຈົ້າ.

ອະທິຖານເພື່ອການດົນໃຈ

ພຣະຄຳພີຄືພຣະຄຳຂອງພຣະເຈົ້າ, ສະນັ້ນ ຈົ່ງທູນຂໍໃຫ້ພຣະອົງຊ່ວຍໃຫ້ເຂົ້າໃຈພຣະຄຳພີ.

ຊອກຫາຄວາມຈິງກ່ຽວກັບພຣະເຢຊູຄຣິດ

ທຸກສິ່ງເປັນພະຍານເຖິງພຣະຄຣິດ (ເບິ່ງ 2 ນີໄຟ 11:4; ໂມເຊ 6:63), ສະນັ້ນ ໃຫ້ຄິດທີ່ຈະໝາຍເຫດ ແລະ ໝາຍຂໍ້ທີ່ເປັນພະຍານເຖິງພຣະຜູ້ຊ່ວຍໃຫ້ລອດ, ມີຄວາມຮັກຢ່າງເລິກເຊິ່ງຕໍ່ພຣະອົງ, ແລະ ສິດສອນວິທີທີ່ຈະຕິດຕາມພຣະອົງ. ບາງເທື່ອຄວາມຈິງກ່ຽວກັບພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງໄດ້ຖືກກ່າວກົງໄປກົງມາ, ແລະ ບາງເທື່ອມັນກ່າວຜ່ານທາງຕົວຢ່າງ ຫລື ເລື່ອງລາວ. ໃຫ້ຖາມຕົວເອງວ່າ, “ຄວາມຈິງນິລັນດອນຢ່າງໃດແດ່ທີ່ສິດສອນຢູ່ໃນຂໍ້ເຫລົ່ານີ້? ຄວາມຈິງເຫລົ່ານີ້ສິດສອນເຮົາຫຍັງແດ່ກ່ຽວກັບພຣະຜູ້ຊ່ວຍໃຫ້ລອດ?”

ຮັບຟັງພຣະວິນຍານ

ໃຫ້ເອົາໃຈໃສ່ຕໍ່ຄວາມນຶກຄິດ ແລະ ຄວາມຮູ້ສຶກຂອງທ່ານ, ເຖິງແມ່ນວ່າມັນບໍ່ກ່ຽວຂ້ອງກັບສິ່ງທີ່ທ່ານກຳລັງອ່ານຢູ່ກໍຕາມ. ຄວາມປະທັບໃຈເຫລົ່ານີ້ອາດເປັນສິ່ງທີ່ພຣະບິດາເທິງສະຫວັນຕ້ອງການໃຫ້ທ່ານຮຽນຮູ້.

ບັນທຶກຄວາມປະທັບໃຈຂອງທ່ານ

ມັນມີຫລາຍວິທີທາງທີ່ຈະບັນທຶກຄວາມປະທັບໃຈ ທີ່ມາສູ່ທ່ານ ຂະນະທີ່ທ່ານສຶກສາ. ຍົກຕົວຢ່າງ, ທ່ານອາດພົບເຫັນຖ້ອຍຄຳ ແລະ ວະລີໃດໜຶ່ງບາງອັນຢູ່ໃນພຣະຄຳພີທີ່ປະທັບໃຈທ່ານ; ທ່ານສາມາດໝາຍມັນ ແລະ ບັນທຶກຄວາມຄິດຂອງທ່ານໄວ້ ເປັນຄຳໝາຍເຫດຢູ່ໃນພຣະຄຳພີຂອງທ່ານ. ທ່ານກໍສາມາດບັນທຶກຄວາມຮູ້ແຈ້ງ, ຄວາມຮູ້ສຶກ, ແລະ ຄວາມປະທັບໃຈ ທີ່ທ່ານໄດ້ຮັບ ໄວ້ໃນປຶ້ມບັນທຶກສ່ວນຕົວນຳອີກ.

ແບ່ງປັນສິ່ງທີ່ທ່ານກຳລັງຮຽນຮູ້ກັບຄົນອື່ນ

ການສົນທະນາຄວາມຮູ້ແຈ້ງຈາກການສຶກສາສ່ວນຕົວຂອງທ່ານ ເປັນວິທີທີ່ດີ ໃນການສິດສອນຄົນອື່ນ, ແລະ ມັນຍັງຈະຊ່ວຍເສີມສ້າງຄວາມເຂົ້າໃຈຂອງທ່ານໃນສິ່ງທີ່ທ່ານໄດ້ອ່ານນຳອີກ. ແບ່ງປັນສິ່ງທີ່ທ່ານກຳລັງຮຽນຮູ້ຢູ່ກັບສະມາຊິກໃນຄອບຄົວ ແລະ ໝູ່ເພື່ອນ (ດ້ວຍຕົວເອງ ຫລື ທາງດິຈີຕັນ), ແລະ ເຊື້ອເຊີນເຂົາເຈົ້າໃຫ້ເຮັດຄືກັນ.

ສົມທຽບພຣະຄຳພີກັບຊີວິດຂອງທ່ານ

ໃຫ້ພິຈາລະນາວິທີທີ່ເລື່ອງລາວ ແລະ ຄຳສອນທີ່ທ່ານກຳລັງອ່ານຢູ່ ກ່ຽວຂ້ອງກັບຊີວິດຂອງທ່ານແນວໃດ. ຍົກຕົວຢ່າງ, ທ່ານສາມາດຖາມຕົວເອງວ່າ, “ປະສົບການໃດແດ່ທີ່ເຮົາເຄີຍມີ ທີ່ຄ້າຍຄືກັນກັບສິ່ງທີ່ເຮົາກຳລັງອ່ານຢູ່ນີ້?”

ຖາມຄຳຖາມຂະນະທີ່ທ່ານສຶກສາ

ຂະນະທີ່ທ່ານສຶກສາພຣະຄຳພີ, ອາດມີຄຳຖາມທີ່ເຂົ້າມາສູ່ຈິດໃຈຂອງທ່ານ. ຄຳຖາມເຫລົ່ານີ້ອາດກ່ຽວຂ້ອງກັບສິ່ງທີ່ທ່ານກຳລັງອ່ານຢູ່ ຫລື ກັບຊີວິດຂອງທ່ານໂດຍທົ່ວໄປ. ໃຫ້ໄຕ່ຕອງຄຳຖາມເຫລົ່ານີ້ ແລະ ຊອກຫາຄຳຕອບ ຂະນະທີ່ທ່ານສຶກສາພຣະຄຳພີຕໍ່ໄປ.

ໃຊ້ສິ່ງຊ່ວຍເຫລືອການສຶກສາພຣະຄຳພີ

ເພື່ອຈະໄດ້ຄວາມຮູ້ແຈ້ງເພີ່ມເຕີມຈາກຂໍ້ທີ່ທ່ານອ່ານ, ໃຫ້ໃຊ້ໝາຍເຫດຢູ່ທາງລຸ່ມໜ້າປຶ້ມ, Topical Guide, Bible Dictionary, ຄູ່ມືພຣະຄຳພີ, ແລະ ແຫລ່ງຊ່ວຍເຫລືອການສຶກສາຢ່າງອື່ນໆ.

ໃຫ້ພິຈາລະນາບໍລິບົດຂອງພຣະຄຳພີ

ທ່ານສາມາດພົບເຫັນຄວາມຮູ້ແຈ້ງທີ່ມີຄວາມໝາຍກ່ຽວກັບຂໍ້ພຣະຄຳພີ ຂະນະທີ່ທ່ານພິຈາລະນາບໍລິບົດຂອງມັນ, ລວມທັງສະຖານະການ ຫລື ສະພາບແວດລ້ອມຂອງຂໍ້ພຣະຄຳພີ. ຍົກຕົວຢ່າງ, ການຮູ້ຈັກພື້ນຖານ ແລະ ຄວາມເຊື່ອຖືຂອງຜູ້ຄົນ ທີ່ພຣະເຈົ້າໄດ້ກ່າວກັບ ສາມາດຊ່ວຍທ່ານໃຫ້ເຂົ້າໃຈເຈດຕະນາຂອງພຣະຄຳຂອງພຣະອົງໄດ້ດີຂຶ້ນ. ທ່ານສາມາດຮຽນຮູ້ກ່ຽວກັບສີ່ງເຫລົ່ານັ້ນໄດ້ໃນ Saint, Revelations in Context, ຫົວຂໍ້ພາກໃນຄຳສອນ ແລະ ພັນທະສັນຍາ, ແລະ ແຫລ່ງຊ່ວຍເຫລືອອື່ນໆ.

ສຶກສາຖ້ອຍຄຳຂອງສາດສະດາ ແລະ ອັກຄະສາວົກຂອງຍຸກສຸດທ້າຍ

ອ່ານສິ່ງທີ່ສາດສະດາ ແລະ ອັກຄະສາວົກຂອງຍຸກສຸດທ້າຍໄດ້ສິດສອນກ່ຽວກັບຫລັກທຳທີ່ທ່ານພົບເຫັນຢູ່ໃນພຣະຄຳພີ.

ດຳລົງຊີວິດຕາມສິ່ງທີ່ທ່ານຮຽນຮູ້

ການສຶກສາພຣະຄຳພີບໍ່ຄວນພຽງແຕ່ດົນໃຈເຮົາເທົ່ານັ້ນ ແຕ່ຍັງນຳເຮົາໃຫ້ປ່ຽນວິທີທີ່ເຮົາດຳລົງຊີວິດນຳອີກ. ໃຫ້ຮັບຟັງສິ່ງທີ່ພຣະວິນຍານກະຕຸ້ນທ່ານໃຫ້ເຮັດ ຂະນະທີ່ທ່ານອ່ານ, ແລະ ແລ້ວໃຫ້ເຮັດຕາມການກະຕຸ້ນເຫລົ່ານັ້ນ.

ໃຊ້ເພງ

ແນະນຳເພງສວດ ແລະ ເພງຂອງເດັກນ້ອຍທີ່ພົບເຫັນຕະຫລອດທົ່ວ ຈົ່ງຕາມເຮົາມາ. ນຳໃຊ້ບົດເພງສັກສິດໃນການເຊື້ອເຊີນພຣະວິນຍານ ແລະ ເຮັດໃຫ້ສັດທາ ແລະ ປະຈັກພະຍານຂອງທ່ານເລິກເຊິ່ງຫລາຍຂື້ນໃນພຣະກິດຕິຄຸນແຫ່ງຄວາມຈິງ.

ທ່ອງຈຳຂໍ້ພຣະຄຳພີ

ໃຫ້ເລືອກເອົາຂໍ້ພຣະຄຳພີໃດໜຶ່ງທີ່ມີຄວາມໝາຍຕໍ່ທ່ານ, ຄອບຄົວຂອງທ່ານ, ຫລື ຫ້ອງຮຽນຂອງທ່ານ, ແລະ ທ່ອງຈຳມັນ ໂດຍການກ່າວລຶ້ມຄືນທຸກວັນ ຫລື ໂດຍການຫລິ້ນເກມທ່ອງຈຳ.

ແບ່ງປັນບົດຮຽນທີ່ໃຊ້ສິ່ງຂອງ

ໃຫ້ຊອກຫາສິ່ງຂອງທີ່ກ່ຽວພັນກັບບົດ ຫລື ຂໍ້ທີ່ທ່ານກຳລັງອ່ານ. ພິຈາລະນາວ່າສິ່ງຂອງແຕ່ລະອັນກ່ຽວພັນກັບຄຳສອນຢູ່ໃນພຣະຄຳພີແນວໃດ.

ແຕ້ມ, ຊອກຫາ, ຫລື ຖ່າຍຮູບ

ໃຫ້ອ່ານສອງສາມຂໍ້, ແລະ ແລ້ວໃຫ້ແຕ້ມບາງສິ່ງທີ່ກ່ຽວພັນກັບສິ່ງທີ່ທ່ານໄດ້ອ່ານ. ຫລື ທ່ານອາດຈະຊອກຫາຮູບພາບຢູ່ໃນ ປຶ້ມຮູບພຣະກິດຕິຄຸນ ຫລື ໃນບ່ອນອື່ນໆໃນຫ້ອງສະໝຸດພຣະກິດຕິຄຸນ. ທ່ານຍັງສາມາດຖ່າຍຮູບທີ່ອະທິບາຍກ່ຽວກັບສິ່ງທີ່ທ່ານໄດ້ຮຽນຮູ້ນຳອີກ.

ສ້າງເລື່ອງລາວເປັນລະຄອນ

ຫລັງຈາກອ່ານເລື່ອງໃດເລື່ອງໜຶ່ງແລ້ວ, ໃຫ້ເຊື້ອເຊີນສະມາຊິກໃນຄອບຄົວ ຫລື ໃນຫ້ອງຮຽນໃຫ້ສະແດງຕາມເລື່ອງນັ້ນ. ຫລັງຈາກນັ້ນ, ໃຫ້ເວົ້າລົມກັນກ່ຽວກັບວິທີທີ່ເລື່ອງລາວກ່ຽວພັນກັບສິ່ງທີ່ພວກທ່ານໄດ້ປະເຊີນແນວໃດ.

ປັບຕົວໃຫ້ເຂົ້າໄດ້ກັບທີ່ບ້ານ

ຖ້າຫາກທ່ານມີສະມາຊິກຄອບຄົວຜູ້ທີ່ບໍ່ຢາກມີສ່ວນຮ່ວມໃນການສຶກສາພຣະຄຳພີເປັນຄອບຄົວ, ໃຫ້ຊອກຫາວິທີອື່ນທີ່ຈະເຊື່ອມໂຍງເຂົ້າກັບພວກເຂົາ. ຍົກຕົວຢ່າງ, ໃຫ້ທ່ານແບ່ງປັນຄວາມຈິງນິລັນດອນແບບທຳມະຊາດໃນການສົນທະນາຂອງທ່ານ ຫລື ແບ່ງປັນຂໍ້ພຣະຄຳພີທີ່ມີຄວາມໝາຍ ໃນວິທີທີ່ບໍ່ເປັນການສັ່ງສອນ ຫລື ການຄວບຄຸມຊິໄດ້ບໍ? ການສຶກສາພຣະຄຳພີບໍ່ຈຳເປັນຕ້ອງເປັນແບບຄືກັນຢູ່ໃນທຸກຄອບຄົວ. ເດັກນ້ອຍບາງຄົນອາດຕອບຮັບໄດ້ດີກວ່າ ໃນການສຶກສາພຣະຄຳພີແບບສອງຕໍ່ສອງ. ໃຫ້ອະທິຖານ ແລະ ເຮັດຕາມການກະຕຸ້ນຂອງພຣະວິນຍານ.

ການປະຊຸມສະພາຄູສອນສຳລັບພໍ່ແມ່. ຖ້າວ່າທ່ານຕ້ອງການຄວາມຊ່ວຍເຫລືອເພີ່ມເຕີມໃນຄວາມພະຍາຍາມໃນການສິດສອນລູກໆຂອງທ່ານ, ໃຫ້ຊອກຖາມເບິ່ງວ່າຫວອດຂອງທ່ານໄດ້ມີການຈັດປະຊຸມສະພາຄູສອນສຳລັບພໍ່ແມ່ຫລືບໍ່ (ເບິ່ງ ຄູ່ມືທົ່ວໄປ, 17.5). ການປະຊຸມເຫລົ່ານີ້ເປັນໂອກາດສຳລັບພໍ່ແມ່ທີ່ຈະປຶກສາຫາລື ແລະ ຮຽນຮູ້ນຳກັນກ່ຽວກັບວິທີທີ່ຈະປັບປຸງການສິດສອນຂອງເຂົາເຈົ້າ. ເຂົາເຈົ້າສາມາດສົນທະນາກັນກ່ຽວກັບຫລັກທຳໃນ ການສິດສອນໃນວິທີຂອງພຣະຜູ້ຊ່ວຍໃຫ້ລອດ, ແນວຄິດໃນໜ້າເຫລົ່ານີ້ ເພື່ອປັບປຸງການສຶກສາພຣະຄຳພີເປັນຄອບຄົວ, ແລະ ການຮຽນຮູ້ ແລະ ຄຳແນະນຳໃນການສິດສອນຕ່າງໆທີ່ພົບເຫັນຕະຫລອດທົ່ວ ຈົ່ງຕາມເຮົາມາ.