“ວັນທີ 30 ເດືອນທັນວາ–ວັນທີ 5 ເດືອນມັງກອນ: ‘ການຟື້ນຟູທີ່ສັນຍາຍັງດຳເນີນໄປໜ້າ’: ການຟື້ນຟູຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ການຟື້ນຟູຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
ວັນທີ 30 ເດືອນທັນວາ–ວັນທີ 5 ເດືອນມັງກອນ: “ການຟື້ນຟູທີ່ສັນຍາຍັງດຳເນີນໄປໜ້າ”
ການຟື້ນຟູຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ
ເຮົາຈະສະເຫລີມສະຫລອງວັນຄົບຮອບ 200 ປີຂອງເຫດການທີ່ໄດ້ປ່ຽນແປງໂລກແນວໃດ? ນັ້ນກໍເປັນຄຳຖາມທີ່ຝ່າຍປະທານສູງສຸດ ແລະ ສະພາອັກຄະສາວົກສິບສອງ ໄດ້ໄຕ່ຕອງ ຂະນະທີ່ເດືອນເມສາ 2020 ໃກ້ຈະມາເຖິງ, ທີ່ເປັນວັນຄົບຮອບ 200 ປີນັບຕັ້ງແຕ່ພາບທີ່ມາໃຫ້ເຫັນຄັ້ງທຳອິດຂອງໂຈເຊັບ ສະມິດ. “ພວກເຮົາຄິດວ່າ ຄວນສ້າງອະນຸສອນຂຶ້ນຫລືບໍ່,” ປະທານຣະໂຊ ເອັມ ແນວສັນ ຈຳໄດ້. ແຕ່ເມື່ອພວກເຮົາໄຕ່ຕອງເຖິງຜົນກະທົບໂດຍທົ່ວໄປແຫ່ງປະຫວັດສາດທີ່ພິເສດຂອງພາບທີ່ມາໃຫ້ເຫັນຄັ້ງທຳອິດ, ພວກເຮົາໄດ້ຮັບຄວາມປະທັບໃຈໃຫ້ສ້າງອະນຸສອນທີ່ບໍ່ແມ່ນຈາກຫີນແກຣນເນັດ ຫລື ຈາກກ້ອນຫີນໃຫຍ່ ແຕ່ສ້າງດ້ວຍຖ້ອຍຄຳ … , ບໍ່ແມ່ນແກະສະຫລັກ ‘ໃສ່ໃນແຜ່ນຫີນ’ ແຕ່ໃຫ້ສະຫລັກໄວ້ໃນ ‘ເນື້ອໜັງ’ ຂອງຫົວໃຈ [2 ໂກຣິນໂທ 3:3]” (“Hear Him,” Liahona, May 2020, 90).
ອະນຸສອນແຫ່ງຖ້ອຍຄຳທີ່ພວກເພິ່ນໄດ້ສ້າງຂຶ້ນມີຊື່ວ່າ “ການຟື້ນຟູຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ: ການປະກາດຕໍ່ໂລກເນື່ອງໃນວາລະຄົບຮອບສອງຮ້ອຍປີ.” ມັນເປັນອະນຸສອນບໍ່ພຽງແຕ່ເຖິງພາບທີ່ມາໃຫ້ເຫັນຄັ້ງທຳອິດເທົ່ານັ້ນ ແຕ່ເຖິງທຸກສິ່ງທີ່ພຣະເຢຊູຄຣິດໄດ້ກະທຳ—ແລະ ຍັງກະທຳຢູ່—ນັບຕັ້ງແຕ່ເວລານັ້ນນຳອີກ. ການຟື້ນຟູພຣະກິດຕິຄຸນຂອງພຣະອົງ ໄດ້ເລີ່ມຕົ້ນເມື່ອຄົນຄົນໜຶ່ງໄດ້ຫັນໄປຫາພຣະເຈົ້າ ແລະ ໄດ້ຮັບຟັງພຣະອົງ. ມັນກໍສືບຕໍ່ໃນວິທີທາງດຽວກັນນັ້ນ: ຫົວໃຈໜຶ່ງດວງ, ປະສົບການສັກສິດແຕ່ລະເທື່ອ—ລວມທັງຂອງທ່ານດ້ວຍ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
“ພຣະເຈົ້າຮັກລູກໆຂອງພຣະອົງ ໃນທຸກປະຊາຊາດຂອງໂລກ.”
ໃນຄວາມຄິດເຫັນຂອງທ່ານ, ເປັນຫຍັງການປະກາດກ່ຽວກັບການຟື້ນຟູຈຶ່ງເລີ່ມຕົ້ນດ້ວຍການຖະແຫລງການກ່ຽວກັບຄວາມຮັກຂອງພຣະເຈົ້າ? ຂະນະທີ່ທ່ານສຶກສາການປະກາດນີ້, ໃຫ້ຊອກຫາການສະແດງອອກເຖິງຄວາມຮັກຂອງພຣະເຈົ້າທີ່ມີໃຫ້ແກ່ “ລູກໆຂອງພຣະອົງ ໃນທຸກປະຊາຊາດຂອງໂລກ.” ການຟື້ນຟູພຣະກິດຕິຄຸນໄດ້ຊ່ວຍທ່ານໃຫ້ຮູ້ສຶກເຖິງຄວາມຮັກຂອງພຣະອົງແນວໃດ?
ເບິ່ງ Gerrit W. Gong, “All Nations, Kindreds, and Tongues,” Liahona, Nov. 2020, 38–41 ນຳອີກ.
ການຟື້ນຟູໄດ້ເລີ່ມຕົ້ນດ້ວຍຄຳຕອບຕໍ່ຄຳຖາມ.
ສາມາດກ່າວໄດ້ວ່າ ພຣະຜູ້ຊ່ວຍໃຫ້ລອດໄດ້ເລີ່ມຕົ້ນການຟື້ນຟູພຣະກິດຕິຄຸນຂອງພຣະອົງ ໂດຍການຕອບຄຳຖາມ. ທ່ານຮູ້ສຶກວ່າ ການປະກາດການຟື້ນຟູ ມີຂ່າວສານຫຍັງແດ່ສຳລັບຄົນຄົນໜຶ່ງທີ່ມີຄຳຖາມກ່ຽວກັບພຣະເຈົ້າ, ພຣະກິດຕິຄຸນ, ຫລື “ຄວາມລອດຂອງຈິດວິນຍານຂອງ [ເຂົາ]”? ທ່ານອາດສຶກສາ ໂຈເຊັບ ສະມິດ—ປະຫວັດ 1:5–20 ນຳອີກ ເພື່ອຈະເຫັນສິ່ງທີ່ທ່ານສາມາດຮຽນຮູ້ຈາກໂຈເຊັບ ສະມິດ ກ່ຽວກັບການຊອກຫາຄຳຕອບຕໍ່ຄຳຖາມເລື່ອງພຣະກິດຕິຄຸນ.
ເບິ່ງ Topics and Questions, “Seeking Answers,” ຫ້ອງສະໝຸດພຣະກິດຕິຄຸນ ນຳອີກ.
ລາຍລະອຽດຈາກ The Desires of My Heart [ຄວາມປາດຖະໜາຂອງໃຈເຮົາ], ໂດຍ ວາວເຕີ ເຣນ
ພຣະເຢຊູຄຣິດໄດ້ຟື້ນຟູສາດສະໜາຈັກຂອງພຣະອົງ.
ທ່ານຮູ້ຫຍັງແດ່ກ່ຽວກັບ “ສາດສະໜາຈັກຂອງພຣະຄຣິດໃນພຣະຄຳພີໃໝ່,” ທີ່ພຣະຜູ້ຊ່ວຍໃຫ້ລອດໄດ້ຟື້ນຟູຜ່ານທາງໂຈເຊັບ ສະມິດ? ໃຫ້ຄິດທີ່ຈະສຶກສາຂໍ້ພຣະຄຳພີເຫລົ່ານີ້ ແລະ ລະບຸຈຸດເດັ່ນບາງຢ່າງຂອງສາດສະໜາຈັກຂອງພຣະອົງ:
ຕໍ່ໄປ, ທ່ານສາມາດຈັບຄູ່ຂໍ້ພຣະຄຳພີຢູ່ຂ້າງເທິງກັບຂໍ້ທີ່ຢູ່ຂ້າງລຸ່ມ, ຊຶ່ງບັນຍາຍວິທີທີ່ພຣະເຢຊູຄຣິດໄດ້ຟື້ນຟູຈຸດເດັ່ນເຫລົ່ານັ້ນຂອງສາດສະໜາຈັກຂອງພຣະອົງແນວໃດ ຜ່ານທາງໂຈເຊັບ ສະມິດ:
ເປັນຫຍັງທ່ານຈຶ່ງກະຕັນຍູສຳລັບການຟື້ນຟູພຣະກິດຕິຄຸນຂອງພຣະເຢຊູຄຣິດ.
ຄັ້ງໜຶ່ງ ແອວເດີ ແຈັບຟະຣີ ອາ ຮໍແລນ ແລະ ພັນລະຍາຂອງເພິ່ນ ໄດ້ພະຍາຍາມວາດພາບເຫັນວ່າ ພວກເພິ່ນຈະຮູ້ສຶກແນວໃດ ຖ້າມີຊີວິດຢູ່ກ່ອນທີ່ສາດສະໜາຈັກຖືກຟື້ນຟູ. “ພວກເຮົາຫວັງຢາກໃຫ້ມີຫຍັງແດ່?” ພວກເພິ່ນໄດ້ຖາມຕົນເອງ. ໃຫ້ອ່ານກ່ຽວກັບປະສົບການຂອງພວກເພິ່ນຢູ່ໃນ “A Perfect Brightness of Hope” (Liahona, May 2020, 81–82). ການຟື້ນຟູໄດ້ຊ່ວຍໃຫ້ທ່ານບັນລຸຄວາມຫວັງທາງວິນຍານຂອງທ່ານແນວໃດ?
ເບິ່ງ Topics and Questions, “Apostasy and the Restoration of the Gospel,” ຫ້ອງສະໝຸດພຣະກິດຕິຄຸນ ນຳອີກ.
“ການຟື້ນຟູທີ່ສັນຍາຍັງດຳເນີນໄປໜ້າ.”
ທ່ານເຄີຍຄິດວ່າຕົນເອງເປັນພາກສ່ວນຂອງການຟື້ນຟູພຣະກິດຕິຄຸນບໍ? ໃຫ້ພິຈາລະນາຖ້ອຍຄຳເຫລົ່ານີ້ຂອງ ປະທານດີເດີ ແອັຟ ອຸກດອບ: “ບາງເທື່ອເຮົາຄິດເຖິງການຟື້ນຟູພຣະກິດຕິຄຸນເປັນບາງສິ່ງທີ່ບັນລຸຜົນສຳເລັດແລ້ວ, ມັນກາຍເປັນອະດີດແລ້ວ. … ໃນຄວາມເປັນຈິງແລ້ວ, ການຟື້ນຟູແມ່ນພວມເກີດຂຶ້ນຢູ່; ເຮົາມີຊີວິດຢູ່ໃນຊ່ວງໄລຍະຂອງມັນໃນຕອນນີ້” (“Are You Sleeping through the Restoration?,” Liahona, May 2014, 59).
ຂະນະທີ່ທ່ານກຽມສຶກສາວິທີທີ່ພຣະກິດຕິຄຸນຖືກຟື້ນຟູໃນຊ່ວງຊຸມປີ 1800, ທ່ານອາດເລີ່ມຕົ້ນໂດຍການໄຕ່ຕອງວິທີທີ່ມັນຖືກຟື້ນຟູໃນຊີວິດຂອງທ່ານແນວໃດ. ອ່ານ ການປະກາດການຟື້ນຟູ ດ້ວຍຄຳຖາມແບບເຊັ່ນນີ້ຢູ່ໃນໃຈ: ເຮົາໄດ້ມາຮູ້ວ່າສິ່ງນີ້ເປັນຄວາມຈິງແນວໃດ? ເຮົາມີສ່ວນຮ່ວມໃນການຟື້ນຟູໃນທຸກວັນນີ້ແນວໃດ?
“ສະຫວັນເປີດຢູ່.”
ວະລີທີ່ວ່າ “ສະຫວັນເປີດຢູ່” ມີຄວາມໝາຍແນວໃດຕໍ່ທ່ານ? ທ່ານເຫັນຫລັກຖານຫຍັງແດ່—ຢູ່ໃນ ການປະກາດການຟື້ນຟູ, ໃນສາດສະໜາຈັກໃນທຸກວັນນີ້, ໃນພຣະຄຳພີ, ແລະ ໃນຊີວິດຂອງທ່ານ—ທີ່ວ່າ ສະຫວັນເປີດຢູ່ແທ້ໆ?
ທ່ານອາດລວມດ້ວຍເພງ “ການອະທິຖານຄັ້ງທຳອິດຂອງໂຈເຊັບ ສະມິດ” (ເພງສວດ ແລະ ເພງຂອງເດັກນ້ອຍ, 14) ໃຫ້ເປັນພາກສ່ວນຂອງການສຶກສາຂອງທ່ານນຳອີກ. ທ່ານພົບເຫັນຫຍັງແດ່ຢູ່ໃນເພງສວດນີ້ທີ່ເພີ່ມຄວາມເຂົ້າໃຈຂອງທ່ານເຖິງວະລີທີ່ວ່າ “ສະຫວັນເປີດຢູ່”?
ເບິ່ງ Quentin L. Cook, “The Blessing of Continuing Revelation to Prophets and Personal Revelation to Guide Our Lives,” Liahona, May 2020, 96–100 ນຳອີກ.
ຮຽນຮູ້ນຳກັນ. ປະທານແນວສັນໄດ້ເຊື້ອເຊີນເຮົາໃຫ້ “ສຶກສາ [ການປະກາດການຟື້ນຟູ] ເປັນສ່ວນຕົວ ແລະ ກັບສະມາຊິກໃນຄອບຄົວ ແລະ ໝູ່ເພື່ອນ [ຂອງເຮົາ]” (“Hear Him,” 92). ໃຫ້ພິຈາລະນາວິທີທີ່ທ່ານຈະລວມຄົນອື່ນເຂົ້າໃນການສຶກສາຂອງທ່ານ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
“ພວກເຮົາປະກາດຢ່າງໜັກແໜ້ນ.”
-
ຂະນະທີ່ທ່ານອ່ານພາກສ່ວນຈາກ ການປະກາດການຟື້ນຟູ ກັບລູກໆຂອງທ່ານ (ຫລື ເບິ່ງວິດີໂອທີ່ປະທານແນວສັນອ່ານມັນຢູ່), ຊ່ວຍພວກເຂົາໃຫ້ຊອກຫາປະໂຫຍກທີ່ເລີ່ມຕົ້ນດ້ວຍວະລີເຊັ່ນ “ພວກເຮົາປະກາດ,” “ພວກເຮົາຖະແຫລງ,” ຫລື “ພວກເຮົາເປັນພະຍານ.” ມີຄວາມຈິງຫຍັງແດ່ທີ່ສາດສະດາ ແລະ ອັກຄະສາວົກຂອງເຮົາກຳລັງປະກາດຢູ່? ບາງທີທ່ານ ແລະ ລູກໆຂອງທ່ານສາມາດແບ່ງປັນປະຈັກພະຍານຂອງພວກທ່ານເອງ ເຖິງຄວາມຈິງອັນດຽວກັນເຫລົ່ານີ້.
6:0The Restoration of the Fulness of the Gospel of Jesus Christ
President Russell M. Nelson, with the First Presidency and Quorum of the Twelve Apostles, makes a bicentennial proclamation on The Restoration of the Fulness of the Gospel of Jesus Christ.
“ໂຈເຊັບ ສະມິດ … ມີຄຳຖາມ.”
-
ມັນອາດເປັນທີ່ໜ້າສົນໃຈຕໍ່ລູກໆຂອງທ່ານ ທີ່ຈະຄົ້ນຫາຄຳຖາມບາງຂໍ້ທີ່ໂຈເຊັບ ສະມິດ ໄດ້ມີທີ່ໄດ້ນຳໄປສູ່ການຟື້ນຟູພຣະກິດຕິຄຸນຂອງພຣະຜູ້ຊ່ວຍໃຫ້ລອດ. ຊ່ວຍພວກເຂົາໃຫ້ຊອກຫາບາງຕົວຢ່າງຢູ່ໃນ ໂຈເຊັບ ສະມິດ—ປະຫວັດ 1:10, 29, 68. ເຮົາໄດ້ຮັບພອນແນວໃດໃນທຸກວັນນີ້ ເພາະພຣະເຈົ້າໄດ້ຕອບຄຳຖາມຂອງໂຈເຊັບ ສະມິດ?
-
ທ່ານອາດໃຫ້ໂອກາດລູກໆຂອງທ່ານເວົ້າລົມກັນກ່ຽວກັບຄຳຖາມທີ່ພວກເຂົາມີນຳອີກ. ເຮົາຮຽນຮູ້ຫຍັງແດ່ຈາກໂຈເຊັບ ສະມິດ ກ່ຽວກັບວິທີທີ່ຈະພົບເຫັນຄຳຕອບ? (ເບິ່ງ ໂຈເຊັບ ສະມິດ—ປະຫວັດ 1:8–17; ເບິ່ງ ຂໍ້ທີ 3 ແລະ 4 ຈາກ “This Is My Beloved Son,” Children’s Songbook, 76) ນຳອີກ.
“ທູດຈາກສະຫວັນໄດ້ມາສັ່ງສອນໂຈເຊັບ.”
-
ຜູ້ໃດຄື “ທູດຈາກສະຫວັນ [ຜູ້] ໄດ້ມາສັ່ງສອນໂຈເຊັບ”? ລູກໆຂອງທ່ານອາດມັກຊອກຫາຮູບພາບຂອງພວກເພິ່ນຢູ່ໃນ ປຶ້ມຮູບພຣະກິດຕິຄຸນ (ເບິ່ງ ເລກທີ 91, 93, 94, 95). ທູດແຕ່ລະອົງເຫລົ່ານີ້ໄດ້ຊ່ວຍ “ສະຖາປະນາສາດສະໜາຈັກຂອງພຣະເຢຊູຄຣິດຄືນໃໝ່” ແນວໃດ? ຂໍ້ພຣະຄຳພີທີ່ຖືກແນະນຳໃນ ໜ້າກິດຈະກຳ ຂອງອາທິດນີ້ສາມາດຊ່ວຍລູກໆຂອງທ່ານຕອບຄຳຖາມນີ້ໄດ້.
ພຣະເຢຊູຄຣິດໄດ້ຟື້ນຟູສາດສະໜາຈັກຂອງພຣະອົງແລ້ວ.
-
ທ່ານອາດຊ່ວຍລູກໆຂອງທ່ານໃຫ້ເຂົ້າໃຈວ່າ ສາດສະໜາຈັກຂອງພຣະຜູ້ຊ່ວຍໃຫ້ລອດຕ້ອງຖືກຟື້ນຟູນັ້ນໝາຍຄວາມວ່າແນວໃດ? ບາງທີພວກເຂົາສາມາດສ້າງຫໍທີ່ລຽບງ່າຍດ້ວຍທ່ອນບະລ໊ອກ ຫລື ຈອກ ແລະ “ຟື້ນຟູ,” ຫລື ສ້າງມັນຄືນໃໝ່. ຫລື, ຖ້າຫາກລູກໆຂອງທ່ານເຄີຍເອົາບາງສິ່ງມາທົດແທນສິ່ງໃດສິ່ງໜຶ່ງ ເພາະມັນໄດ້ເສຍໄປ ຫລື ຖືກທຳລາຍ, ທ່ານສາມາດປຽບທຽບປະສົບການນັ້ນກັບການທີ່ພຣະຜູ້ຊ່ວຍໃຫ້ລອດຟື້ນຟູສາດສະໜາຈັກຂອງພຣະອົງ. ຊ່ວຍພວກເຂົາຊອກຫາສິ່ງໃດສິ່ງໜຶ່ງໂດຍສະເພາະທີ່ຖືກກ່າວເຖິງຢູ່ໃນ ການປະກາດການຟື້ນຟູ ທີ່ພຣະຜູ້ຊ່ວຍໃຫ້ລອດໄດ້ຟື້ນຟູ.
“ສະຫວັນເປີດຢູ່.”
-
ເພື່ອສະແດງໃຫ້ເຫັນຄວາມໝາຍຂອງວະລີທີ່ວາ “ສະຫວັນເປີດຢູ່,” ບາງທີທ່ານສາມາດແບ່ງປັນຂ່າວສານໃດໜຶ່ງກັບລູກໆຂອງທ່ານ, ທຳອິດຫລັງປະຕູທີ່ປິດຢູ່ ແລະ ແລ້ວຜ່ານປະຕູທີ່ເປີດຢູ່. ປ່ອຍໃຫ້ພວກເຂົາປ່ຽນຜຽນກັນແບ່ງປັນຂ່າວສານໃດໜຶ່ງເຊັ່ນກັນ. ຂ່າວສານໃດແດ່ທີ່ພຣະເຢຊູຄຣິດ ມີສຳລັບເຮົາ? ປະສົບການໃດແດ່ທີ່ໄດ້ຊ່ວຍເຮົາໃຫ້ຮູ້ວ່າ ສະຫວັນເປີດໃຫ້ເຮົາຢູ່?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.