ພອນຂອງການເປີດເຜີຍອັນຕໍ່ເນື່ອງແກ່ສາດສະດາ ແລະ ການເປີດເຜີຍສ່ວນຕົວ ເພື່ອນຳພາຊີວິດຂອງເຮົາ

ກອງປະຊຸມໃຫຍ່ສາມັນ ເດືອນເມສາ 2020

2:3

ພອນຂອງການເປີດເຜີຍອັນຕໍ່ເນື່ອງແກ່ສາດສະດາ ແລະ ການເປີດເຜີຍສ່ວນຕົວ ເພື່ອນຳພາຊີວິດຂອງເຮົາ

ໂດຍ ແອວເດີ ຄວິນຕິນ ແອວ ຄຸກ

ແຫ່ງກຸ່ມອັກຄະສາວົກສິບສອງ

ການເປີດເຜີຍອັນຕໍ່ເນື່ອງໄດ້ເກີດຂຶ້ນ ແລະ ກໍຍັງໄດ້ຮັບຢູ່ ຜ່ານຊ່ອງທາງທີ່ພຣະຜູ້ເປັນເຈົ້າໄດ້ຈັດຕັ້ງໄວ້.

ມື້ນີ້ຂ້າພະເຈົ້າຈະກ່າວກ່ຽວກັບການເປີດເຜີຍອັນຕໍ່ເນື່ອງແກ່ສາດສະດາ ແລະ ການເປີດເຜີຍສ່ວນຕົວອັນຕໍ່ເນື່ອງ ເພື່ອນຳພາຊີວິດຂອງເຮົາ.

ບາງເທື່ອເຮົາໄດ້ຮັບການເປີດເຜີຍ ແມ່ນແຕ່ໃນເວລາທີ່ເຮົາບໍ່ຮູ້ເຖິງຈຸດປະສົງຂອງພຣະຜູ້ເປັນເຈົ້າ. ບໍ່ດົນ ກ່ອນ ແອວເດີ ແຈັບຟະຣີ ອາ ຮໍແລນ ໄດ້ຖືກເອີ້ນໃຫ້ເປັນອັກຄະສາວົກ ໃນເດືອນມິຖຸນາ ປີ 1994, ຂ້າພະເຈົ້າໄດ້ຮັບການເປີດເຜີຍທີ່ງົດງາມ ວ່າເພິ່ນຈະໄດ້ຮັບການເອີ້ນ. ຂ້າພະເຈົ້າໄດ້ເປັນຕົວແທນພາກພື້ນ ແລະ ບໍ່ຮູ້ເຫດຜົນວ່າ ເປັນຫຍັງຂ້າພະເຈົ້າຈຶ່ງໄດ້ຮັບຄວາມຮູ້ນັ້ນ. ແຕ່ພວກເຮົາໄດ້ເປັນຄູ່ສອນສາດສະໜານຳກັນຕອນຍັງໜຸ່ມ ຢູ່ປະເທດອັງກິດ ໃນຊ່ວງໄລຍະປີ 1960, ແລະ ຂ້າພະເຈົ້າກໍຮັກແພງເພິ່ນຫລາຍ. ຂ້າພະເຈົ້າຄິດວ່າ ຂ້າພະເຈົ້າໄດ້ຮັບການເປີດເຜີຍເພາະຄວາມເມດຕາອັນລະອຽດອ່ອນ. ເມື່ອສອງສາມປີຜ່ານມານີ້, ຂ້າພະເຈົ້າໄດ້ຄິດວ່າພຣະຜູ້ເປັນເຈົ້າຄົງໄດ້ກະກຽມຂ້າພະເຈົ້າໃຫ້ເປັນລຸ້ນນ້ອງໃນກຸ່ມອັກຄະສາວົກສິບສອງ ຕໍ່ຄູ່ສອນສາດສະໜາຂອງຂ້າພະເຈົ້າ ຜູ້ໄດ້ເປັນລຸ້ນນ້ອງຂອງຂ້າພະເຈົ້າຕອນເປັນຜູ້ສອນສາດສະໜາໜຸ່ມ.¹ ບາງເທື່ອຂ້າພະເຈົ້າໄດ້ເຕືອນຜູ້ສອນສາດສະໜາໜຸ່ມໃຫ້ປະພຶດດີຕໍ່ຄູ່ສອນລຸ້ນນ້ອງຂອງເຂົາເຈົ້າ ເພາະເຂົາເຈົ້າບໍ່ຮູ້ວ່າ ລຸ້ນນ້ອງ ອາດກາຍເປັນລຸ້ນອ້າຍຂອງເຂົາເຈົ້າໃນມື້ໜຶ່ງກໍໄດ້.

ຂ້າພະເຈົ້າມີປະຈັກພະຍານທີ່ເຂັ້ມແຂງ ວ່າການຟື້ນຟູສາດສະໜາຈັກ ຖືກນຳພາໂດຍພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ. ພຣະອົງຮູ້ວ່າຈະເອີ້ນຜູ້ໃດມາເປັນອັກຄະສາວົກຂອງພຣະອົງ ແລະ ໃນລຳດັບໃດ. ພຣະອົງກໍຍັງຮູ້ຈັກວິທີກະກຽມອັກຄະສາວົກລຸ້ນອ້າຍຂອງພຣະອົງ ໃຫ້ເປັນສາດສະດາ ແລະ ເປັນປະທານຂອງສາດສະໜາຈັກນຳອີກ.

ພວກເຮົາໄດ້ຮັບພອນຫລາຍໃນເຊົ້າມື້ນີ້ ທີ່ໄດ້ຍິນຈາກສາດສະດາທີ່ຮັກແພງຂອງເຮົາ, ປະທານຣະໂຊ ເອັມ ແນວສັນ, ກ່າວການປະກາດກ່ຽວກັບສອງຮ້ອຍປີທີ່ເລິກຊຶ້ງຕໍ່ໂລກ ດ້ວຍຄວາມນັບຖືຕໍ່ການຟື້ນຟູຄວາມສົມບູນຂອງພຣະກິດຕິຄຸນຂອງພຣະເຢຊູຄຣິດ.² ການປະກາດທີ່ສຳຄັນນີ້ ໂດຍປະທານແນວສັນໄດ້ໃຫ້ຄວາມແຈ່ມແຈ້ງວ່າ ສາດສະໜາຈັກຂອງພຣະເຢຊູຄຣິດເປັນໜີ້ບຸນຄຸນຫລັກທຳຂອງການເປີດເຜີຍອັນຕໍ່ເນື່ອງສຳລັບ ທີ່ມາ, ການດຳລົງຢູ່, ແລະ ການຊີ້ນຳສຳລັບອະນາຄົດ. ການປະກາດໃໝ່ນີ້ເປັນຕົວແທນໃຫ້ແກ່ການສື່ສານດ້ວຍຄວາມຮັກຂອງພຣະບິດາຕໍ່ລູກໆຂອງພຣະອົງ.

ໃນອະດີດ, ປະທານສະເປັນເຊີ ດັບເບິນຢູ ຄິມໂບ ໄດ້ສະແດງຄວາມຮູ້ສຶກ ທີ່ຂ້າພະເຈົ້າມີໃນວັນນີ້. ເພິ່ນໄດ້ກ່າວວ່າ: “ໃນທຸກສິ່ງ, ທີ່ … ຄວນຮູ້ບຸນຄຸນຫລາຍທີ່ສຸດ [ສຳລັບ] ນັ້ນຄື ສະຫວັນໄດ້ເປີດແທ້ໆ ແລະ ວ່າ ສາດສະໜາຈັກທີ່ຟື້ນຟູຂອງພຣະເຢຊູຄຣິດຖືກຈັດຕັ້ງຂຶ້ນເທິງດານຫີນແຫ່ງການເປີດເຜີຍ. ການເປີດເຜີຍອັນຕໍ່ເນື່ອງເປັນສິ່ງທີ່ຈຳເປັນທີ່ສຸດຂອງພຣະກິດຕິຄຸນຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດ, ພຣະເຢຊູຄຣິດທີ່ຊົງພຣະຊົນ.”³

ສາດສະດາເອໂນກໄດ້ເຫັນລ່ວງໜ້າເຖິງວັນເວລາທີ່ເຮົາມີຊີວິດຢູ່. ພຣະຜູ້ເປັນເຈົ້າໄດ້ບອກເອໂນກເຖິງຄວາມຊົ່ວຮ້າຍທີ່ຍິ່ງໃຫຍ່ ຊຶ່ງຈະມີຢູ່ຢ່າງຫລວງຫລາຍ ແລະ ຄຳທຳນາຍເຖິງ “ຄວາມທຸກຍາກລຳບາກອັນໃຫຍ່ຫລວງ” ທີ່ຈະເກີດຂຶ້ນ. ເຖິງຢ່າງໃດກໍຕາມ, ພຣະຜູ້ເປັນເຈົ້າໄດ້ສັນຍາວ່າ, “ແຕ່ເຮົາຈະຮັກສາຜູ້ຄົນຂອງເຮົາໄວ້.”⁴ “ແລະ ຄວາມຊອບທຳຈະຖືກສົ່ງລົງມາຈາກສະຫວັນ; ແລະ ເຮົາຈະສົ່ງຄວາມຈິງຂຶ້ນມາຈາກແຜ່ນດິນໂລກ, ເພື່ອເປັນປະຈັກພະຍານເຖິງພຣະອົງດຽວທີ່ຖືກຳເນີດຂອງເຮົາ.”⁵

ປະທານເອສະຣາ ແທັບ ເບັນສັນ ໄດ້ສິດສອນດ້ວຍພະລັງອັນຍິ່ງໃຫຍ່ວ່າ ພຣະຄຳພີມໍມອນ, ຫີນສຳຄັນຂອງສາດສະໜາຈັກຂອງເຮົາ, ຈະຂຶ້ນມາຈາກແຜ່ນດິນໂລກ ໃນການບັນລຸການປະກາດຂອງພຣະຜູ້ເປັນເຈົ້າຕໍ່ເອໂນກ. ການປະກົດຂອງພຣະບິດາ ແລະ ພຣະບຸດ ແລະ ເຫລົ່າທູດ ແລະ ສາດສະດາຕໍ່ສາດສະດາໂຈເຊັບ ສະມິດ “ເປັນການຊີ້ນຳຈາກສະຫວັນເພື່ອໃຫ້ຟື້ນຟູອຳນາດທີ່ຈຳເປັນຕໍ່ອານາຈັກ.”⁶

ສາດສະດາໂຈເຊັບ ສະມິດ ໄດ້ຮັບການເປີດເຜີຍຫລາຍເທື່ອ. ບາງຢ່າງໄດ້ຖືກອ້າງເຖິງຢູ່ໃນກອງປະຊຸມໃຫຍ່ນີ້. ການເປີດເຜີຍຫລາຍຢ່າງທີ່ສາດສະດາໂຈເຊັບໄດ້ຮັບ ຖືກຮັກສາໄວ້ສຳລັບເຮົາ ຢູ່ໃນ ຄຳສອນ ແລະ ພັນທະສັນຍາ. ໜັງສືມາດຕະຖານທັງໝົດຂອງສາດສະໜາຈັກ ບັນຈຸພຣະດຳລັດ ແລະ ພຣະປະສົງຂອງພຣະຜູ້ເປັນເຈົ້າສຳລັບເຮົາໃນຍຸກສຸດທ້າຍນີ້.⁷

ນອກເໜືອໄປຈາກພຣະຄຳພີພື້ນຖານທີ່ຍິ່ງໃຫຍ່ເຫລົ່ານີ້, ເຮົາໄດ້ຮັບພອນທີ່ການເປີດເຜີຍຍັງມີຕໍ່ເນື່ອງແກ່ສາດສາດາທີ່ມີຊີວິດຢູ່. ສາດສະດາເປັນ “ຕົວແທນທີ່ໄດ້ຮັບການມອບໝາຍຂອງພຣະຜູ້ເປັນເຈົ້າ, ໄດ້ຮັບສິດອຳນາດທີ່ຈະກ່າວແທນພຣະອົງ.”⁸

ການເປີດເຜີຍບາງຢ່າງມີຄວາມສຳຄັນຫລາຍທີ່ສຸດ, ແລະ ບາງຢ່າງສົ່ງເສີມຄວາມເຂົ້າໃຈຂອງເຮົາ ເລື່ອງຄວາມສຳຄັນຂອງຄວາມຈິງຈາກສະຫວັນ ແລະ ໃຫ້ການນຳພາເຮົາໃນວັນເວລາຂອງເຮົາ.⁹

ເຮົາຮູ້ບຸນຄຸນຫລາຍສຳລັບການເປີດເຜີຍທີ່ປະທານສະເປັນເຊີ ດັບເບິນຢູ ຄິມໂບ ໄດ້ປະກາດການມອບພອນຖານະປະໂລຫິດ ແລະ ພອນຂອງພຣະວິຫານ ໃຫ້ແກ່ສະມາຊິກຜູ້ຊາຍທີ່ມີຄ່າຄວນຂອງສາດສະໜາຈັກໃນເດືອນມິຖຸນາ 1978.¹⁰

ຂ້າພະເຈົ້າໄດ້ຮັບໃຊ້ກັບອັກຄະສາວົກສິບສອງຫລາຍຄົນຜູ້ທີ່ໄດ້ຢູ່ນຳ ແລະ ມີພາກສ່ວນ ຕອນໄດ້ຮັບການເປີດເຜີຍອັນລ້ຳຄ່ານີ້. ເພິ່ນແຕ່ລະຄົນ, ໃນການສົນທະນາເປັນສ່ວນຕົວ, ໄດ້ຢືນຢັນການນຳພາທາງວິນຍານອັນມີພະລັງ ແລະ ເປັນເອກະສັນ ຊຶ່ງປະທານຄິມໂບ ແລະ ພວກເພິ່ນໄດ້ຮັບ. ພວກເພິ່ນຫລາຍຄົນເວົ້າວ່າ ມັນເປັນການເປີດເຜີຍທີ່ມີພະລັງອັນຍິ່ງໃຫຍ່ ທີ່ພວກເພິ່ນເຄີຍໄດ້ຮັບມາກ່ອນ ຫລື ຫລັງຈາກເວລານັ້ນ.¹¹

ພວກເຮົາຜູ້ທີ່ຮັບໃຊ້ຢູ່ໃນກຸ່ມອັກຄະສາວົກສິບສອງໃນເວລານີ້ ກໍໄດ້ຮັບພອນຫລາຍ ເມື່ອພວກເຮົາໄດ້ຮັບການເປີດເຜີຍອັນສຳຄັນ ຜ່ານທາງສາດສະດາໃນປະຈຸບັນຂອງພວກເຮົາ.¹² ປະທານຣະໂຊ ເອັມ ແນວສັນ ໄດ້ເປັນຕົວແທນທີ່ໄດ້ຮັບການມອບໝາຍຂອງພຣະຜູ້ເປັນເຈົ້າ ໂດຍສະເພາະ ການເປີດເຜີຍກ່ຽວກັບການຊ່ວຍຄອບຄົວເຮັດໃຫ້ບ້ານເຮືອນຂອງເຂົາເຈົ້າເປັນສະຖານທີ່ສັກສິດແຫ່ງສັດທາ, ການເຕົ້າໂຮມອິດສະຣາເອນທີ່ກະຈັດກະຈາຍ ຢູ່ທັງສອງຟາກມ່ານ, ແລະ ພອນຂອງສະມາຊິກທີ່ໄດ້ຮັບຂອງປະທານສັກສິດແລ້ວ ເລື່ອງການເຮັດພິທີການທີ່ສັກສິດຢູ່ໃນພຣະວິຫານ.

ເມື່ອການປ່ຽນແປງທີ່ສຳຄັນເພື່ອເປັນພອນໃຫ້ແກ່ບ້ານເຮືອນຂອງເຮົາ ໄດ້ຖືກປະກາດຢູ່ໃນກອງປະຊຸມໃຫຍ່ສາມັນເດືອນຕຸລາ ປີ 2018, ຂ້າພະເຈົ້າໄດ້ເປັນພະຍານວ່າ “ໃນການໄຕ່ຕອງຂອງສະພາຂອງຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ ຢູ່ໃນພຣະວິຫານ, … ຫລັງຈາກສາດສະດາທີ່ຮັກແພງຂອງເຮົາ ໄດ້ອ້ອນວອນຂໍການເປີດເຜີຍ … , ທຸກຄົນກໍໄດ້ຮັບການຢືນຢັນທີ່ມີພະລັງ.”¹³

ໃນເວລານັ້ນ, ກໍໄດ້ຮັບການເປີດເຜີຍຢ່າງອື່ນອີກທີ່ກ່ຽວກັບພິທີການສັກສິດຂອງພຣະວິຫານ ແຕ່ບໍ່ໄດ້ປະກາດ ຫລື ນຳໃຊ້.¹⁴ ການຊີ້ນຳນີ້ເລີ່ມຕົ້ນດ້ວຍການເປີດເຜີຍຕໍ່ສາດສະດາເປັນສ່ວນຕົວແກ່ປະທານຣະໂຊ ເອັມ ແນວສັນ ແລະ ການຢືນຢັນທີ່ລະອຽດອ່ອນ ແລະ ມີພະລັງຕໍ່ຜູ້ທີ່ມີພາກສ່ວນໃນຂະບວນການນັ້ນ. ປະທານແນວສັນໄດ້ມີພາກສ່ວນສະເພາະກັບບັນດາເອື້ອຍນ້ອງຜູ້ຄວບຄຸມສະມາຄົມສະຕີສົງເຄາະ, ອົງການຍິງໜຸ່ມ, ແລະ ອົງການປະຖົມໄວ. ການຊີ້ນຳຢ່າງສຸດທ້າຍ, ຢູ່ໃນພຣະວິຫານ, ຕໍ່ຝ່າຍປະທານສູງສຸດ ແລະ ກຸ່ມອັກຄະສາວົກສິບສອງແມ່ນເລິກຊຶ້ງທາງວິນຍານ ແລະ ມີພະລັງຫລາຍ. ພວກເຮົາແຕ່ລະຄົນຮູ້ວ່າ ພວກເຮົາໄດ້ຮັບພຣະດຳລັດ, ພຣະປະສົງ, ແລະ ໄດ້ຍິນສຸລະສຽງຂອງພຣະຜູ້ເປັນເຈົ້າ.¹⁵

ຂ້າພະເຈົ້າປະກາດດ້ວຍຄວາມໜັກແໜ້ນທັງໝົດວ່າ ການເປີດເຜີຍອັນຕໍ່ເນື່ອງໄດ້ເກີດຂຶ້ນ ແລະ ກໍຍັງໄດ້ຮັບຢູ່ ຜ່ານຊ່ອງທາງທີ່ພຣະຜູ້ເປັນເຈົ້າໄດ້ຈັດຕັ້ງໄວ້. ຂ້າພະເຈົ້າເປັນພະຍານວ່າ ການປະກາດໃໝ່ທີ່ປະທານແນວສັນໄດ້ກ່າວໃນເຊົ້າມື້ນີ້ ເປັນການເປີດເຜີຍທີ່ຈະເປັນພອນໃຫ້ແກ່ທຸກຄົນ.

ພວກເຮົາຂໍເຊື້ອເຊີນທຸກຄົນໃຫ້ມາຊື່ນຊົມຢູ່ທີ່ໂຕະຂອງພຣະຜູ້ເປັນເຈົ້າ

ພວກເຮົາກໍຂໍປະກາດຄວາມປາດຖະໜາຈາກໃຈຂອງພວກເຮົາ ທີ່ຈະຜູກພັນໃໝ່ກັບຜູ້ທີ່ດີ້ນລົນເລື່ອງປະຈັກພະຍານຂອງຕົນ, ຜູ້ບໍ່ເຂັ້ມແຂງ, ຫລື ຜູ້ທີ່ຂໍໃຫ້ລຶບຊື່ຂອງຕົນອອກຈາກບັນທຶກຂອງສາດສະໜາຈັກ. ພວກເຮົາຢາກຊື່ນຊົມກັບທ່ານ “ດ້ວຍພຣະຄຳຂອງພຣະຄຣິດ,” ຢູ່ທີ່ໂຕະຂອງພຣະຜູ້ເປັນເຈົ້າ, ເພື່ອຮຽນຮູ້ສິ່ງທີ່ພວກເຮົາທຸກຄົນຄວນເຮັດ.¹⁶ ພວກເຮົາຕ້ອງການທ່ານ! ສາດສະໜາຈັກຕ້ອງການທ່ານ! ພຣະຜູ້ເປັນເຈົ້າຕ້ອງການທ່ານ! ຄຳອະທິຖານດ້ວຍໃຈຈິງຂອງພວກເຮົາແມ່ນວ່າ ທ່ານຈະມາຮ່ວມກັບພວກເຮົາໃນການນະມັດສະການພຣະຜູ້ຊ່ວຍໃຫ້ລອດຂອງໂລກ. ພວກເຮົາຮູ້ວ່າ ພວກທ່ານບາງຄົນອາດຖືກຄົນອື່ນເຮັດໃຫ້ຜິດໃຈ, ເຮັດບໍ່ດີນຳ, ຫລື ຖືກປະຕິບັດຕໍ່ໃນທາງທີ່ບໍ່ເປັນເໝືອນພຣະຄຣິດ. ພວກເຮົາກໍຍັງຮູ້ອີກວ່າ ບາງຄົນກໍປະເຊີນກັບການທ້າທາຍເລື່ອງສັດທາ ທີ່ຍັງບໍ່ຮູ້ຄຸນຄ່າ, ເຂົ້າໃຈ, ຫລື ແກ້ໄຂເທື່ອ.

ສະມາຊິກທີ່ເຂັ້ມແຂງ ແລະ ຊື່ສັດຫລາຍທີ່ສຸດບາງຄົນກໍເຄີຍມີການທ້າທາຍເລື່ອງສັດທາເປັນບາງຄັ້ງ. ຂ້າພະເຈົ້າມັກເລື່ອງລາວກ່ຽວກັບ ດັບເບິນຢູ ດັບເບິນຢູ ແຟ້ວສ໌, ຜູ້ໄດ້ປະຖິ້ມສາດສະໜາຈັກໄປ ແລະ ໄດ້ເປັນພະຍານຕ້ານສາດສະດາໂຈເຊັບ ສະມິດ ຢູ່ໃນສານຂອງລັດມີເຊີຣີ. ຫລັງຈາກໄດ້ກັບໃຈ, ລາວໄດ້ຂຽນຈົດໝາຍເຖິງໂຈເຊັບ ມີຄວາມວ່າ, “ຂ້ອຍຮູ້ຈັກສະພາບຂອງຂ້ອຍດີ, ເຈົ້າກໍຮູ້ຈັກ, ແລະ ພຣະເຈົ້າກໍຮູ້ຈັກ, ແລະ ຂ້ອຍຢາກໄດ້ຮັບຄວາມລອດ ຖ້າຫາກໝູ່ເພື່ອນຂອງຂ້ອຍຊິຊ່ວຍຂ້ອຍ.”¹⁷ ໂຈເຊັບກໍໄດ້ໃຫ້ອະໄພແກ່ລາວ, ໄດ້ມອບໜ້າທີ່ຄືນໃຫ້ລາວ, ແລະ ໄດ້ຂຽນຕອບດ້ວຍຄວາມຮັກແພງວ່າ, “ເພື່ອນໃນຕອນຕົ້ນ ແລະ ເພື່ອນໃນທີ່ສຸດ.”¹⁸

ອ້າຍເອື້ອຍນ້ອງທັງຫລາຍ, ບໍ່ວ່າສະຖານະການຂອງທ່ານຈະເປັນແບບໃດ, ຂໍໃຫ້ທ່ານຮູ້ວ່າ ສາດສະໜາຈັກ ແລະ ສະມາຊິກໃນສາດສະໜາຈັກ ຈະຕ້ອນຮັບທ່ານກັບຄືນ!

ການເປີດເຜີຍສ່ວນຕົວເພື່ອນຳພາຊີວິດຂອງເຮົາ

ການເປີດເຜີຍສ່ວນຕົວມີໃຫ້ທຸກຄົນ ທີ່ຖ່ອມຕົວ ແລະ ສະແຫວງຫາການຊີ້ນຳຈາກພຣະຜູ້ເປັນເຈົ້າ. ມັນສຳຄັນເທົ່າໆກັບການເປີດເຜີຍຂອງສາດສະດາ. ການເປີດເຜີຍສ່ວນຕົວ ແລະ ທາງວິນຍານຈາກພຣະວິນຍານບໍລິສຸດ ໄດ້ເປັນສິ່ງທີ່ເຮັດໃຫ້ຫລາຍລ້ານຄົນມີປະຈັກພະຍານທີ່ຈຳເປັນຕໍ່ການຮັບບັບຕິສະມາ ແລະ ຮັບການຢືນຢັນເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.

ການເປີດເຜີຍສ່ວນຕົວເປັນພອນທີ່ເລິກຊຶ້ງ ຊຶ່ງໄດ້ຮັບຫລັງຈາກການຮັບບັບຕິສະມາ ເມື່ອເຮົາຖືກ “ຊຳລະໃຫ້ບໍລິສຸດໂດຍການຮັບພຣະວິນຍານບໍລິສຸດ.”¹⁹ ຂ້າພະເຈົ້າຈື່ຈຳການເປີດເຜີຍພິເສດທາງວິນຍານໄດ້ ຕອນຂ້າພະເຈົ້າມີອາຍຸໄດ້ 15 ປີ. ອ້າຍທີ່ດີຂອງຂ້າພະເຈົ້າໄດ້ສະແຫວງຫາການຊີ້ນຳຈາກພຣະຜູ້ເປັນເຈົ້າ ເຖິງວິທີທີ່ຈະຕອບຮັບກັບພໍ່ທີ່ຮັກຂອງພວກເຮົາ, ຜູ້ບໍ່ຢາກໃຫ້ອ້າຍຂອງຂ້າພະເຈົ້າໄປຮັບໃຊ້ເຜີຍແຜ່ສາດສະໜາ. ຂ້າພະເຈົ້າໄດ້ອະທິຖານດ້ວຍຄວາມຈິງໃຈຄືກັນ ແລະ ໄດ້ຮັບການເປີດເຜີຍສ່ວນຕົວ ເຖິງຄວາມສົມບູນຂອງພຣະກິດຕິຄຸນ.

ບົດບາດຂອງພຣະວິນຍານບໍລິສຸດ

ການເປີດເຜີຍສ່ວນຕົວແມ່ນຂຶ້ນກັບຄວາມຈິງທາງວິນຍານທີ່ໄດ້ຮັບຈາກພຣະວິນຍານບໍລິສຸດ.²⁰ ພຣະວິນຍານບໍລິສຸດເປັນຜູ້ເປີດເຜີຍ ແລະ ເປັນພະຍານເຖິງຄວາມຈິງທັງໝົດ, ໂດຍສະເພາະກ່ຽວກັບພຣະຜູ້ຊ່ວຍໃຫ້ລອດ. ຖ້າປາດສະຈາກພຣະວິນຍານບໍລິສຸດ, ເຮົາຈະບໍ່ສາມາດຮູ້ໄດ້ວ່າ ພຣະເຢຊູຄື ພຣະຄຣິດ. ບົດບາດທີ່ສຳຄັນຂອງພຣະອົງຄືການເປັນພະຍານເຖິງພຣະບິດາ ແລະ ພຣະບຸດ ແລະ ຕຳແໜ່ງ ແລະ ລັດສະໝີພາບຂອງພວກພຣະອົງ.

ພຣະວິນຍານບໍລິສຸດສາມາດເປັນອິດທິພົນໃຫ້ແກ່ທຸກຄົນໃນທາງທີ່ມີພະລັງ.²¹ ອິດທິພົນນີ້ຈະບໍ່ຢູ່ຄົງທີ່ ຍົກເວັ້ນແຕ່ບຸກຄົນໄດ້ຮັບບັບຕິສະມາ ແລະ ຮັບເອົາຂອງປະທານແຫ່ງພຣະວິນຍານບໍລິສຸດ. ພຣະວິນຍານບໍລິສຸດຮັບໃຊ້ເປັນຜູ້ຊຳລະລ້າງນຳອີກ ໃນຂັ້ນຕອນຂອງການກັບໃຈ ແລະ ການໃຫ້ອະໄພ.

ພຣະວິນຍານສື່ສານໃນທາງທີ່ມະຫັດສະຈັນ. ພຣະຜູ້ເປັນເຈົ້າໄດ້ໃຊ້ການບັນຍາຍທີ່ງົດງາມນີ້ວ່າ:

“ແທ້ຈິງແລ້ວ, ຈົ່ງເບິ່ງ, ເຮົາຈະບອກເຈົ້າໃນຈິດໃຈ ແລະ ໃນຫົວໃຈຂອງເຈົ້າ, ໂດຍພຣະວິນຍານບໍລິສຸດ, ຊຶ່ງຈະມາສູ່ເຈົ້າ ແລະ ຈະມາສະຖິດຢູ່ໃນຫົວໃຈຂອງເຈົ້າ.

“ບັດນີ້, ຈົ່ງເບິ່ງ, ນີ້ຄືວິນຍານແຫ່ງການເປີດເຜີຍ.”²²

ເຖິງແມ່ນວ່າ ຜົນກະທົບຂອງພຣະວິນຍານອາດເປັນແບບມີພະລັງຫລາຍທີ່ສຸດ, ແຕ່ສ່ວນຫລາຍມັນຈະເປັນແບບທີ່ງຽບໆ ໃນສຽງແຜ່ວເບົາ.²³ ພຣະຄຳພີບັນຈຸຫລາກຫລາຍຕົວຢ່າງກ່ຽວກັບວິທີທີ່ພຣະວິນຍານເປັນອິດທິພົນຕໍ່ຄວາມຄິດຂອງເຮົາ, ລວມທັງການກ່າວຄວາມສະຫງົບຕໍ່ຄວາມຄິດຂອງເຮົາ,²⁴ ເຕັມຢູ່ໃນຄວາມຄິດຂອງເຮົາ,²⁵ ໃຫ້ຄວາມຮູ້ແກ່ຄວາມຄິດຂອງເຮົາ,²⁶ ແມ່ນແຕ່ກ່າວຕໍ່ຄວາມຄິດຂອງເຮົາ.²⁷

ຫລັກທຳບາງຢ່າງທີ່ກະກຽມເຮົາໃຫ້ຮັບເອົາການເປີດເຜີຍ ແມ່ນລວມທັງ:

ອະທິຖານຂໍການນຳພາທາງວິນຍານ. ດ້ວຍຄວາມຄາລະວະ ແລະ ຄວາມຖ່ອມ ເຮົາຄວນສະແຫວງຫາ ແລະ ທູນຂໍ²⁸ ແລະ ມີຄວາມອົດທົນ ແລະ ຍອມກະທຳຕາມ.²⁹
ການກະກຽມສຳລັບການດົນໃຈ. ສິ່ງນີ້ຮຽກຮ້ອງໃຫ້ເຮົາສອດຄ່ອງກັບຄຳສອນຂອງພຣະຜູ້ເປັນເຈົ້າ ແລະ ປະຕິບັດຕາມພຣະບັນຍັດຂອງພຣະອົງ.
ການຮັບສ່ວນສິນລະລຶກຢ່າງມີຄ່າຄວນ. ເມື່ອເຮົາເຮັດແນວນີ້, ເຮົາໄດ້ເປັນພະຍານ ແລະ ເຮັດພັນທະສັນຍາກັບພຣະເຈົ້າ ວ່າເຮົາຮັບເອົາພຣະນາມຂອງພຣະບຸດທີ່ບໍລິສຸດຂອງພຣະອົງ ແລະ ວ່າເຮົາຈະລະນຶກເຖິງພຣະອົງ ແລະ ຮັກສາພຣະບັນຍັດຂອງພຣະອົງ.

ຫລັກທຳເຫລົ່ານີ້ກະກຽມເຮົາໃຫ້ຮັບເອົາ, ຮັບຮູ້, ແລະ ເຮັດຕາມການກະຕຸ້ນ ແລະ ການນຳພາຂອງພຣະວິນຍານບໍລິສຸດ. ສິ່ງນີ້ແມ່ນລວມທັງ “ສິ່ງທີ່ເປັນສັນຕິສຸກ … ຊຶ່ງນຳຄວາມຊື່ນຊົມ [ແລະ] … ຊີວິດນິລັນດອນມາໃຫ້.”³⁰

ການກະກຽມທາງວິນຍານຂອງເຮົາຈະປັບປຸງຫລາຍຍິ່ງຂຶ້ນ ເມື່ອເຮົາສຶກສາພຣະຄຳພີ ແລະ ຄວາມຈິງຂອງພຣະກິດຕິຄຸນເປັນປະຈຳ ແລະ ໄຕ່ຕອງການນຳພາທີ່ເຮົາສະແຫວງຫາຢູ່ໃນໃຈຂອງເຮົາ. ແຕ່ຈົ່ງຈື່ຈຳວ່າ ໃຫ້ມີຄວາມອົດທົນ ແລະ ໄວ້ວາງໃຈໃນເວລາຂອງພຣະຜູ້ເປັນເຈົ້າ. ການນຳພາໄດ້ຖືກມອບໃຫ້ໂດຍພຣະຜູ້ເປັນເຈົ້າທີ່ຮູ້ແຈ້ງ ເມື່ອພຣະອົງ “ເລືອກທີ່ຈະສິດສອນເຮົາ.”³¹

ການເປີດເຜີຍໃນການເອີ້ນ ແລະ ການມອບໝາຍຂອງເຮົາ

ພຣະວິນຍານບໍລິສຸດ ຈະມອບການເປີດເຜີຍໃຫ້ໃນການເອີ້ນ ແລະ ການມອບໝາຍນຳອີກ. ໃນປະສົບການຂອງຂ້າພະເຈົ້າ, ການນຳພາທາງວິນຍານທີ່ສຳຄັນສ່ວນຫລາຍຈະໄດ້ຮັບ ຕອນທີ່ເຮົາພະຍາຍາມເປັນພອນໃຫ້ແກ່ຄົນອື່ນ ໃນການເຮັດໜ້າທີ່ຮັບຜິດຊອບຂອງເຮົາ.

ຂ້າພະເຈົ້າຍັງຈື່ຕອນເປັນອະທິການໜຸ່ມ ເວລາຄູ່ຜົວເມຍໄດ້ໂທມາຫາແບບຕ້ອງການຄວາມຊ່ວຍເຫລືອດ່ວນ ຂະນະທີ່ຂ້າພະເຈົ້າກະກຽມທີ່ຈະໄປຂຶ້ນຍົນ ເພື່ອໄປເຮັດທຸລະກິດ. ຂ້າພະເຈົ້າໄດ້ອ້ອນວອນຂໍໃຫ້ພຣະຜູ້ເປັນເຈົ້າຊ່ວຍເຫລືອ ກ່ອນເຂົາເຈົ້າມາຫາ ເພື່ອວ່າຈະສາມາດຊ່ວຍເຫລືອເຂົາເຈົ້າໄດ້. ບັນຫາໄດ້ຖືກເປີດເຜີຍໃຫ້ຂ້າພະເຈົ້າເຫັນ ແລະ ສິ່ງທີ່ຂ້າພະເຈົ້າຄວນແກ້ໄຂ. ການນຳພາຂອງການເປີດເຜີຍນັ້ນໄດ້ຊ່ວຍຂ້າພະເຈົ້າໃຫ້ສາມາດເຮັດໜ້າທີ່ຮັບຜິດຊອບທີ່ສັກສິດຂອງຂ້າພະເຈົ້າໄດ້ ໃນຖານະອະທິການທີ່ບໍ່ມີເວລາຫລາຍ. ອະທິການຕະຫລອດທົ່ວໂລກກໍໄດ້ແບ່ງປັນປະສົບການແບບດຽວກັນນີ້ກັບຂ້າພະເຈົ້າ. ຕອນເປັນປະທານສະເຕກ, ຂ້າພະເຈົ້າບໍ່ພຽງແຕ່ໄດ້ຮັບການເປີດເຜີຍທີ່ສຳຄັນເທົ່ານັ້ນ ແຕ່ກໍຍັງໄດ້ຮັບ ການແກ້ໄຂ ສ່ວນຕົວນຳອີກ ເພື່ອບັນລຸຈຸດປະສົງຂອງພຣະຜູ້ເປັນເຈົ້າ.

ຂ້າພະເຈົ້າຮັບປະກັນວ່າ ທຸກຄົນສາມາດໄດ້ຮັບການນຳພາຈາກການເປີດເຜີຍ ເມື່ອເຮົາອອກແຮງງານຢູ່ໃນສວນອະງຸ່ນຂອງພຣະຜູ້ເປັນເຈົ້າ ດ້ວຍຄວາມຖ່ອມຕົວ. ການນຳພາສ່ວນຫລາຍຂອງເຮົາມາຈາກພຣະວິນຍານບໍລິສຸດ. ບາງເທື່ອ ແລະ ສຳລັບບາງຈຸດປະສົງ, ມັນອາດມາຈາກພຣະຜູ້ເປັນເຈົ້າໂດຍກົງ. ຂ້າພະເຈົ້າເປັນພະຍານວ່າ ສິ່ງນີ້ເປັນຄວາມຈິງ. ການນຳພາສຳລັບສາດສະໜາຈັກ, ທັງໝົດ, ຈະຖືກມອບໃຫ້ປະທານ ແລະ ສາດສະດາຂອງສາດສະໜາຈັກ.

ພວກເຮົາ, ໃນຖານະອັກຄະສາວົກຂອງສະໄໝປະຈຸບັນ, ໄດ້ຮັບສິດທິພິເສດ ທີ່ໄດ້ເຮັດວຽກງານ ແລະ ໄດ້ເດີນທາງໄປກັບສາດສະດາໃນປະຈຸບັນ, ປະທານແນວສັນ. ຂ້າພະເຈົ້າຂໍຖອດໃຈຄວາມທີ່ ວິວເຝີດ ວູດດຣັບ ໄດ້ກ່າວກ່ຽວກັບສາດສະດາໂຈເຊັບ ສະມິດ; ມັນເປັນຄວາມຈິງເທົ່າໆກັບປະທານແນວສັນ. ຂ້າພະເຈົ້າເຄີຍເຫັນ “ພຣະວິນຍານຂອງພຣະເຈົ້າໄດ້ທຳງານກັບເພິ່ນ, ແລະ ການເປີດເຜີຍຂອງພຣະເຢຊູຄຣິດໄດ້ຖືກມອບໃຫ້ແກ່ເພິ່ນ ແລະ ໄດ້ເຫັນການເປີດເຜີຍເຫລົ່ານັ້ນເກີດເປັນຈິງ.”³²

ຄຳອ້ອນວອນດ້ວຍຄວາມຖ່ອມຂອງຂ້າພະເຈົ້າໃນມື້ນີ້ຄື ເຮົາແຕ່ລະຄົນຈະສະແຫວງຫາການເປີດເຜີຍອັນຕໍ່ເນື່ອງ ເພື່ອນຳພາຊີວິດຂອງເຮົາ ແລະ ຕິດຕາມພຣະວິນຍານ ເມື່ອເຮົານະມັດສະການພຣະເຈົ້າອົງເປັນພຣະບິດາ ໃນພຣະນາມຂອງພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ຜູ້ຊຶ່ງຂ້າພະເຈົ້າເປັນພະຍານເຖິງ ໃນພຣະນາມຂອງພຣະເຢຊູຄຣິດ, ອາແມນ.