ຂ່າວສານເປີດກອງປະຊຸມ
ເຮົາຕ້ອງສະແຫວງຫາ, ໃນທຸກວິທີທາງທີ່ເຮົາສາມາດ, ເພື່ອຮັບຟັງພຣະເຢຊູຄຣິດ, ຜູ້ກ່າວກັບເຮົາຜ່ານທາງອຳນາດຂອງການປະຕິບັດສາດສະໜາກິດຂອງພຣະວິນຍານບໍລິສຸດ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂະນະທີ່ພວກເຮົາຕ້ອນຮັບທ່ານສູ່ກອງປະຊຸມໃຫຍ່ສາມັນແຫ່ງປະຫວັດສາດ ເດືອນເມສາ 2020 ຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ຕາມເຫດຜົນທີ່ທ່ານຮູ້ຈັກ, ຂ້າພະເຈົ້າຢືນຢູ່ຕໍ່ໜ້າທ່ານໃນສະໂມສອນທີ່ວ່າງເປົ່າ!
ຂ້າພະເຈົ້າຮູ້ໜ້ອຍໄປ, ຕອນຂ້າພະເຈົ້າໄດ້ສັນຍາກັບທ່ານ ຢູ່ໃນກອງປະຊຸມໃຫຍ່ສາມັນເດືອນຕຸລາ ປີ 2019 ວ່າກອງປະຊຸມຄັ້ງນີ້ ຈະເປັນ “ໜ້າຊົງຈຳ” ແລະ “ບໍ່ສາມາດລືມ,” ຊຶ່ງການກ່າວກັບຜູ້ມາປະຊຸມໜ້ອຍກວ່າ 10 ຄົນຢູ່ໃນນີ້ ຈະເປັນກອງປະຊຸມທີ່ໜ້າຊົງຈຳ ແລະ ບໍ່ສາມາດລືມແທ້ໆ ສຳລັບຂ້າພະເຈົ້າ! ແຕ່ເມື່ອຮູ້ວ່າ ທ່ານມາຮ່ວມການຖ່າຍທອດຜ່ານທາງ ອີເລັກໂທຣນິກ, ແລະ ກຸ່ມນັກຮ້ອງໄດ້ຮ້ອງເພງທີ່ມ່ວນອອນຊອນຊື່ “It Is Well with My Soul,” ໄດ້ນຳການປອບໂຍນມາໃຫ້ຈິດວິນຍານ ຂອງຂ້າພະເຈົ້າ.
ດັ່ງທີ່ທ່ານຮູ້, ການມາຮ່ວມກອງປະຊຸມໃຫຍ່ສາມັນຄັ້ງນີ້ໄດ້ຖືກຈຳກັດ ຊຶ່ງເປັນພາກສ່ວນໜຶ່ງທີ່ພວກເຮົາຢາກເປັນປະຊາຄົມຂອງໂລກທີ່ດີ ແລະ ເຮັດທຸກສິ່ງທີ່ພວກເຮົາສາມາດເຮັດໄດ້ ເພື່ອປ້ອງກັນການແຜ່ລາມຂອງພະຍາດ ໂຄວິດ-19. ພະຍາດນີ້ມີຜົນກະທົບກະເທືອນຕະຫລອດທົ່ວໂລກ. ມັນຍັງໄດ້ປ່ຽນການປະຊຸມໂບດ, ການຮັບໃຊ້ເຜີຍແຜ່ສາດສະໜາ, ແລະ ວຽກງານພຣະວິຫານຂອງພວກເຮົາ ໃນຊົ່ວໄລຍະໜຶ່ງນຳອີກ.
ເຖິງແມ່ນຂໍ້ຈຳກັດມີຄວາມກ່ຽວຂ້ອງກັບໄວຣັສທີ່ໂຫດຮ້າຍ, ແຕ່ການທົດລອງໃນຊີວິດສ່ວນຕົວແມ່ນມີຫລາຍກວ່າການລະບາດນີ້. ການທົດລອງໃນອະນາຄົດ ສາມາດເປັນຜົນຈາກອຸບັດຕິເຫດ, ໄພທຳມະຊາດ, ຫລື ບັນຫາສ່ວນຕົວທີ່ບໍ່ຄາດຄິດ.
ເຮົາຈະອົດທົດກັບການທົດລອງເຊັ່ນນັ້ນໄດ້ແນວໃດ? ພຣະຜູ້ເປັນເຈົ້າໄດ້ບອກເຮົາວ່າ “ຖ້າຫາກພວກເຈົ້າຕຽມພ້ອມ ພວກເຈົ້າຈະບໍ່ຢ້ານກົວ.”1 ແນ່ນອນ, ເຮົາສາມາດກັກຕຸນອາຫານ, ນ້ຳ, ແລະ ເງິນຄຳ. ແຕ່ຄວາມຕ້ອງການອັນສຳຄັນທີ່ເທົ່າທຽມກັນນັ້ນ ແມ່ນຄວາມຕ້ອງການ ທາງວິນຍານ ທີ່ຕ້ອງກັກຕຸນສັດທາ, ຄວາມຈິງ, ແລະ ປະຈັກພະຍານໄວ້ຄືກັນ.
ຈຸດເປົ້າໝາຍສູງສຸດໃນຊີວິດຂອງເຮົາແມ່ນການກະກຽມທີ່ຈະພົບກັບພຣະຜູ້ສ້າງ. ເຮົາເຮັດສິ່ງນີ້ໂດຍການໃຊ້ຄວາມພະຍາຍາມທຸກວັນ ທີ່ຈະກາຍເປັນເໝືອນດັ່ງພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ.2 ແລະ ເຮົາເຮັດ ເຊັ່ນນັ້ນ ເມື່ອເຮົາກັບໃຈທຸກວັນ ແລະ ຮັບເອົາການຊຳລະລ້າງຂອງພຣະອົງ, ການປິ່ນປົວ, ແລະ ການເສີມພະລັງທຸກມື້. ເຮົາຈະສາມາດຮູ້ສຶກເຖິງຄວາມສະຫງົບ ແລະ ຄວາມສຸກໄດ້ດົນນານ, ແມ່ນແຕ່ໃນຊ່ວງເວລາທີ່ປັ່ນປ່ວນນີ້. ນີ້ຄືເຫດຜົນທີ່ພຣະຜູ້ເປັນເຈົ້າໄດ້ຂໍຮ້ອງເຮົາໃຫ້ຢືນຢູ່ໃນສະຖານທີ່ສັກສິດ ແລະ “ບໍ່ຫວັ່ນໄຫວ.”3
ປີນີ້, ເຮົາສະເຫລີມສະຫລອງວັນຄົບຮອບ 200 ປີ ຂອງເຫດການທີ່ສຳຄັນໃນປະຫວັດສາດຂອງໂລກ—ມັນເປັນການມາປະກົດຂອງພຣະເຈົ້າອົງເປັນພຣະບິດາ ແລະ ພຣະບຸດທີ່ຮັກຂອງພຣະອົງ, ພຣະເຢຊູຄຣິດ, ຕໍ່ໂຈເຊັບ ສະມິດ. ໃນການມາຢ້ຽມຢາມເທື່ອນັ້ນ, ພຣະເຈົ້າອົງເປັນພຣະບິດາໄດ້ຊີ້ໄປຫາພຣະເຢຊູຄຣິດ ແລະ ກ່າວວ່າ: “ນີ້ຄືບຸດທີ່ຮັກຂອງເຮົາ. ຈົ່ງຟັງທ່ານ!”4
ຄຳແນະນຳນັ້ນ ທີ່ກ່າວກັບໂຈເຊັບ ກໍແມ່ນສຳລັບເຮົາແຕ່ລະຄົນຄືກັນ. ເຮົາຕ້ອງສະແຫວງຫາ, ໃນທຸກວິທີທາງທີ່ເຮົາສາມາດ, ເພື່ອຮັບຟັງພຣະເຢຊູຄຣິດ, ຜູ້ກ່າວກັບເຮົາຜ່ານທາງອຳນາດຂອງການປະຕິບັດສາດສະໜາກິດຂອງພຣະວິນຍານບໍລິສຸດ.
ຈຸດປະສົງຂອງກອງປະຊຸມໃຫຍ່ສາມັນເທື່ອນີ້ ແລະ ເທື່ອອື່ນໆ ແມ່ນເພື່ອຊ່ວຍເຮົາໃຫ້ຮັບຟັງພຣະອົງ. ພວກເຮົາໄດ້ອະທິຖານ, ແລະ ຂໍເຊື້ອເຊີນທ່ານໃຫ້ອະທິຖານ, ເພື່ອວ່າພຣະວິນຍານຂອງພຣະຜູ້ເປັນເຈົ້າຈະສະຖິດຢູ່ກັບທ່ານຢ່າງຫລວງຫລາຍ ຈົນວ່າທ່ານສາມາດໄດ້ຍິນຂ່າວສານທີ່ພຣະຜູ້ຊ່ວຍໃຫ້ລອດມີໃຫ້ສຳລັບທ່ານໂດຍສະເພາະ—ຊຶ່ງເປັນຂ່າວສານທີ່ຈະນຳຄວາມສະຫງົບມາສູ່ຈິດວິນຍານຂອງທ່ານ. ເປັນຂ່າວສານທີ່ຈະປິ່ນປົວຫົວໃຈທີ່ເຈັບປວດຂອງທ່ານ. ເປັນຂ່າວສານທີ່ຈະໃຫ້ຄວາມສະຫວ່າງແກ່ຈິດໃຈຂອງທ່ານ. ເປັນຂ່າວສານທີ່ຈະຊ່ວຍທ່ານໃຫ້ຮູ້ຈັກສິ່ງທີ່ຈະເຮັດ ເພື່ອວ່າທ່ານຈະເດີນຜ່ານຜ່າຊ່ວງເວລາທີ່ວຸ້ນວາຍ ແລະ ມີການທົດລອງນີ້.
ພວກເຮົາອະທິຖານວ່າ ກອງປະຊຸມໃຫຍ່ນີ້ຈະເປັນໜ້າຊົງຈຳ ແລະ ບໍ່ສາມາດລືມ ເພາະຂ່າວສານທີ່ທ່ານຈະໄດ້ຍິນ, ການປະກາດພິເສດທີ່ຈະແຈ້ງບອກ, ແລະ ປະສົບການທີ່ທ່ານຈະຖືກເຊື້ອເຊີນໃຫ້ມີສ່ວນຮ່ວມ.
ຍົກຕົວຢ່າງ, ໃນທ້າຍກອງປະຊຸມວັນອາທິດພາກເຊົ້າ, ພວກເຮົາຈະທຳການຮ່ວມຊຸມນຸມສັກສິດທົ່ວໂລກ ຕອນຂ້າພະເຈົ້ານຳພາທ່ານໃນການໂຮ່ຮ້ອງ ໂຮຊັນນາ. ພວກເຮົາອະທິຖານວ່າ ສິ່ງນີ້ຈະເປັນສິ່ງສຳຄັນທາງວິນຍານສຳລັບທ່ານ ໃນການສະແດງອອກເຖິງຄວາມເປັນເອກະສັນທົ່ວໂລກ ເຖິງຄວາມຮູ້ບຸນຄຸນຂອງເຮົາຕໍ່ພຣະເຈົ້າອົງເປັນພຣະບິດາ ແລະ ພຣະບຸດທີ່ຮັກຂອງພຣະອົງ ໂດຍການສັນລະເສີນພວກພຣະອົງໃນວິທີທາງທີ່ພິເສດນີ້.
ສຳລັບປະສົບການທີ່ສັກສິດນີ້, ພວກເຮົາຈະໃຊ້ຜ້າແພມົນສີຂາວ. ແຕ່ຖ້າຫາກທ່ານບໍ່ມີ, ກໍໃຫ້ໃຊ້ມືແທນ. ໃນທ້າຍຂອງການໂຮ່ຮ້ອງ ໂຮຊັນນາ, ຜູ້ມາຮ່ວມປະຊຸມທຸກຄົນຈະຮ້ອງເພງນຳກຸ່ມນັກຮ້ອງ ໃນເພງຊື່ວ່າ “ພຣະວິນຍານພຣະເຈົ້າ.”5
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ກອງປະຊຸມໃຫຍ່ນີ້ຈະເປັນສິ່ງສະຫງ່າລາສີ. ປີນີ້ ຈະເປັນປີພິເສດ ຂະນະທີ່ເຮົາເອົາໃຈໃສ່ຕໍ່ພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນທີ່ຟື້ນຟູຂອງພຣະອົງ. ກອງປະຊຸມໃຫຍ່ແຫ່ງປະຫວັດສາດນີ້ ຈະມີຜົນກະທົບອັນຍາວນານ ເມື່ອໃຈຂອງເຮົາປ່ຽນແປງ ແລະ ເຮົາເລີ່ມຕົ້ນສະແຫວງຫາທີ່ຈະຮັບຟັງພຣະອົງຕະຫລອດຊີວິດຂອງເຮົາ.
ຂໍຕ້ອນຮັບທ່ານສູ່ກອງປະຊຸມໃຫຍ່ສາມັນ ເດືອນເມສາ ປີ 2020! ຂ້າພະເຈົ້າຮູ້ວ່າ ພຣະເຈົ້າ, ພຣະບິດາເທິງສະຫວັນຂອງເຮົາ, ແລະ ພຣະບຸດຂອງພຣະອົງ, ພຣະ ເຢຊູຄຣິດ, ສົນໃຈກັບເຮົາ. ພວກພຣະອົງຈະສະຖິດຢູ່ກັບເຮົາ ທັງສອງມື້ນີ້ ຂະນະທີ່ເຮົາສະແຫວງຫາທີ່ຈະເຂົ້າໃກ້ພວກພຣະອົງຫລາຍກວ່າເກົ່າ ແລະ ໃຫ້ກຽດພວກພຣະອົງ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.