ວິທີທີ່ຖານະປະໂລຫິດເປັນພອນໃຫ້ແກ່ຊາວໜຸ່ມ
ຜ່ານທາງຖານະປະໂລຫິດ, ເຮົາສາມາດຖືກຍົກຂຶ້ນ. ຖານະປະໂລຫິດນຳຄວາມສະຫວ່າງເຂົ້າມາສູ່ໂລກຂອງເຮົາ.
ຂ້ານ້ອຍກະຕັນຍູທີ່ໄດ້ມາຮ່ວມຢູ່ທີ່ນີ້. ຕອນຂ້ານ້ອຍໄດ້ຮູ້ວ່າຂ້ານ້ອຍຈະໄດ້ມີໂອກາດມາກ່າວກັບທ່ານໃນມື້ນີ້, ຂ້ານ້ອຍໄດ້ຮູ້ສຶກຕື່ນເຕັ້ນ ແຕ່ໃນເວລາດຽວກັນ ກໍໄດ້ຮູ້ສຶກຖ່ອມຕົວ. ຂ້ານ້ອຍໄດ້ໃຊ້ເວລາຢ່າງຫລວງຫລາຍເພື່ອຄິດເຖິງສິ່ງທີ່ຂ້ານ້ອຍຈະສາມາດແບ່ງປັນ, ແລະ ຂ້ານ້ອຍຫວັງວ່າພຣະວິນຍານຈະກ່າວຕໍ່ທ່ານໂດຍກົງຜ່ານທາງຂ່າວສານຂອງຂ້ານ້ອຍ.
ຢູ່ໃນພຣະຄຳພີມໍມອນ, ລີໄຮໄດ້ໃຫ້ພອນແກ່ລູກຊາຍຂອງເພິ່ນແຕ່ລະຄົນກ່ອນເພິ່ນເສຍຊີວິດ ທີ່ຊ່ວຍເຂົາເຈົ້າໃຫ້ພົບເຫັນຄວາມສາມາດ ແລະ ສັກກະຍະພາບນິລັນດອນຂອງເຂົາເຈົ້າ. ຂ້ານ້ອຍເປັນລູກຫລ້າໃນບັນດາອ້າຍເອື້ອຍນ້ອງແປດຄົນ, ແລະ ປີແລ້ວນີ້ ຂ້ານ້ອຍໄດ້ເປັນລູກຄົນດຽວທີ່ຍັງຢູ່ທີ່ບ້ານເປັນເທື່ອທຳອິດ. ໂດຍທີ່ບໍ່ມີອ້າຍເອື້ອຍຂອງຂ້ານ້ອຍຢູ່ໃກ້ ແລະ ບໍ່ມີຄົນໃດຄົນໜຶ່ງທີ່ຈະເວົ້າລົມນຳກໍເປັນເລື່ອງຍາກສຳລັບຂ້ານ້ອຍ. ກໍມີບາງຄືນທີ່ຂ້ານ້ອຍຮູ້ສຶກໂດດດ່ຽວຫລາຍ. ຂ້ານ້ອຍກະຕັນຍູຫລາຍສຳລັບພໍ່ແມ່, ຜູ້ທີ່ໄດ້ພະຍາຍາມຊ່ວຍຂ້ານ້ອຍສຸດຄວາມສາມາດຂອງພວກເພິ່ນ. ຕົວຢ່າງໜຶ່ງແມ່ນຕອນພໍ່ຂອງຂ້ານ້ອຍສະເໜີທີ່ຈະມອບພອນຂອງຖານະປະໂລຫິດເພື່ອການປອບໂຍນໃຫ້ຂ້ານ້ອຍໃນຊ່ວງເວລາທີ່ທ້າທາຍໂດຍສະເພາະ. ຫລັງຈາກໄດ້ຮັບພອນຈາກເພິ່ນ, ກໍບໍ່ໄດ້ມີຫຍັງປ່ຽນແປງທັນທີ, ແຕ່ຂ້ານ້ອຍໄດ້ຮູ້ສຶກເຖິງຄວາມສະຫງົບ ແລະ ຄວາມຮັກທີ່ມາຈາກພຣະບິດາເທິງສະຫວັນ ແລະ ພໍ່ຂອງຂ້ານ້ອຍ. ຂ້ານ້ອຍໄດ້ຮູ້ສຶກວ່າໄດ້ຮັບພອນທີ່ມີພໍ່ທີ່ມີຄຸນຄ່າດີພໍ ຜູ້ທີ່ສາມາດໃຫ້ພອນຂອງຖານະປະໂລຫິດ ເມື່ອໃດກໍຕາມທີ່ຂ້ານ້ອຍຕ້ອງການ ແລະ ເປັນຜູ້ທີ່ຊ່ວຍຂ້ານ້ອຍໃຫ້ເຫັນຈຸດເດັ່ນ ແລະ ສັກກະຍະພາບນິລັນດອນຂອງຕົນ, ດັ່ງທີ່ລີໄຮໄດ້ເຮັດຕອນທີ່ເພິ່ນໄດ້ໃຫ້ພອນແກ່ລູກໆຂອງເພິ່ນ.
ບໍ່ວ່າສະຖານະການຂອງທ່ານຈະເປັນແບບໃດກໍຕາມ, ທ່ານກໍສາມາດເຂົ້າເຖິງພອນຂອງຖານະປະໂລຫິດສະເໝີ. ຜ່ານທາງສະມາຊິກໃນຄອບຄົວ, ໝູ່ເພື່ອນ, ອ້າຍນ້ອງຜູ້ປະຕິບັດສາດສະໜາກິດ, ຜູ້ນຳຖານະປະໂລຫິດ, ແລະ ພຣະບິດາເທິງສະຫວັນຜູ້ຈະບໍ່ເຮັດໃຫ້ທ່ານຜິດຫວັງ, ທ່ານສາມາດໄດ້ຮັບພອນຂອງຖານະປະໂລຫິດໄດ້. ແອວເດີ ນຽວ ແອວ ແອນເດີເຊັນ ໄດ້ກ່າວວ່າ: “ພອນຂອງຖານະປະໂລຫິດແມ່ນຍິ່ງໃຫຍ່ຢ່າງບໍ່ມີຂອບເຂດຫລາຍກວ່າຜູ້ທີ່ຖືກຂໍໃຫ້ມອບພອນນັ້ນ. … ຂະນະທີ່ເຮົາມີຄຸນຄ່າດີພໍ, ພິທີການຕ່າງໆຂອງຖານະປະໂລຫິດຈະເຊີດຊູຊີວິດຂອງເຮົາ.”1
ຢ່າລັງເລໃຈທີ່ຈະຂໍພອນນັ້ນເມື່ອທ່ານຕ້ອງການ ການຊີ້ນຳເພີ່ມເຕີມ. ມັນແມ່ນຢູ່ໃນຊ່ວງເວລາທີ່ຍາກລຳບາກນັ້ນທີ່ເຮົາຕ້ອງການພຣະວິນຍານທີ່ຈະຊ່ວຍເຮົາໄດ້ດີທີ່ສຸດ. ບໍ່ມີຄົນໃດທີ່ດີພ້ອມ, ແລະ ເຮົາທຸກຄົນຈະປະສົບຄວາມຍາກລຳບາກ. ເຮົາບາງຄົນອາດທົນທຸກຢູ່ກັບຄວາມກັງວົນ, ອາການຊຶມເສົ້າ, ການຕິດແສດ, ຫລື ຄວາມຮູ້ສຶກວ່າເຮົາບໍ່ດີພໍ. ພອນຂອງຖານະປະໂລຫິດສາມາດຊ່ວຍເຮົາໃຫ້ເອົາຊະນະການທ້າທາຍເຫລົ່ານີ້ ແລະ ໄດ້ຮັບຄວາມສະຫງົບ ຂະນະທີ່ເຮົາກ້າວໄປໜ້າສູູ່ອະນາຄົດ. ຂ້ານ້ອຍຫວັງວ່າເຮົາຈະພະຍາຍາມດຳລົງຊີວິດທີ່ມີຄຸນຄ່າດີພໍສຳລັບການໄດ້ຮັບພອນເຫລົ່ານີ້.
ອີກທາງໜຶ່ງທີ່ພອນຂອງຖານະປະໂລຫິດຈະເປັນພອນໃຫ້ເຮົາແມ່ນຜ່ານທາງປິຕຸພອນ. ຂ້ານ້ອຍໄດ້ຮຽນຮູ້ທີ່ຈະຫັນໄປຫາປິຕຸພອນຂອງຂ້ານ້ອຍເມື່ອໃດກໍຕາມທີ່ຂ້ານ້ອຍຮູ້ສຶກໂສກເສົ້າ ຫລື ໂດດດ່ຽວ. ພອນຂອງຂ້ານ້ອຍຊ່ວຍຂ້ານ້ອຍໃຫ້ເຫັນສັກກະຍະພາບຂອງຕົນ ແລະ ແຜນໂດຍສະເພາະທີ່ພຣະເຈົ້າມີສຳລັບຂ້ານ້ອຍ. ມັນປອບໂຍນ ແລະ ຊ່ວຍຂ້ານ້ອຍໃຫ້ເຫັນໄປໄກເກີນກວ່າທັດສະນະທາງໂລກຂອງຂ້ານ້ອຍ. ມັນເຕືອນຂ້ານ້ອຍເຖິງຂອງປະທານ ແລະ ພອນຕ່າງໆທີ່ຂ້ານ້ອຍຈະໄດ້ຮັບ ຖ້າຫາກຂ້ານ້ອຍດຳລົງຊີວິດຢ່າງມີຄ່າຄວນ. ມັນຍັງຊ່ວຍຂ້ານ້ອຍໃຫ້ຈື່ຈຳ ແລະ ຮູ້ສືກເຖິງຄວາມສະຫງົບວ່າ ພຣະເຈົ້າຈະໃຫ້ຄຳຕອບ ແລະ ເປີດປະຕູໃຫ້ແກ່ຂ້ານ້ອຍໃນເວລາທີ່ເໝາະສົມ ຕອນທີ່ຂ້ານ້ອຍຕ້ອງການຫລາຍທີ່ສຸດ.
ປິຕຸພອນຊ່ວຍໃຫ້ເຮົາກະກຽມທີ່ຈະກັບຄືນໄປຢູ່ນຳພຣະບິດາເທິງສະຫວັນຂອງເຮົາ. ຂ້ານ້ອຍຮູ້ວ່າປິຕຸພອນມາຈາກພຣະເຈົ້າ ແລະ ສາມາດຊ່ວຍເຮົາປ່ຽນຄວາມອ່ອນແອໄປເປັນຄວາມເຂັ້ມແຂງໄດ້. ມັນບໍ່ໄດ້ເປັນຂ່າວສານຈາກໝໍດູ; ພອນເຫລົ່ານີ້ບອກເຮົາເຖິງສິ່ງທີ່ເຮົາຕ້ອງການຈະໄດ້ຍິນ. ມັນເປັນເໝືອນເລຍໂຮນາ ເຂັມຊີ້ທິດ ສຳລັບເຮົາແຕ່ລະຄົນ. ເມື່ອເຮົາໃຫ້ພຣະເຈົ້າມາກ່ອນ ແລະ ມີສັດທາໃນພຣະອົງ, ພຣະອົງຈະນຳພາເຮົາຜ່ານຜ່າຖິ່ນແຫ້ງແລ້ງກັນດານຂອງເຮົາເອງ.
ເໝືອນດັ່ງທີ່ພຣະເຈົ້າໄດ້ປະທານພອນໃຫ້ແກ່ ໂຈເຊັບ ສະມິດ ດ້ວຍຖານະປະໂລຫິດ ເພື່ອວ່າພອນແຫ່ງພຣະກິດຕິຄຸນຈະຖືກຟື້ນຟູ, ເຮົາກໍສາມາດໄດ້ຮັບພອນແຫ່ງພຣະກິດຕິຄຸນໃນຊີວິດຂອງເຮົາ ຜ່ານທາງຖານະປະໂລຫິດຄືກັນ. ແຕ່ລະອາທິດເຮົາໄດ້ຮັບສິດທິພິເສດ ແລະ ໂອກາດທີ່ຈະໄດ້ຮັບສ່ວນສິນລະລຶກ. ຜ່ານທາງພິທີການຂອງຖານະປະໂລຫິດນີ້, ເຮົາສາມາດມີພຣະວິນຍານສະຖິດຢູ່ກັບເຮົາຕະຫລອດເວລາ, ຊຶ່ງສາມາດຊຳລະ ແລະ ເຮັດໃຫ້ເຮົາສະອາດໄດ້. ຖ້າຫາກທ່ານຮູ້ສຶກຈຳເປັນຈະຕ້ອງກຳຈັດບາງສິ່ງອອກຈາກຊີວິດຂອງທ່ານ, ຂໍໃຫ້ເອື້ອມອອກໄປຫາຜູ້ນຳທີ່ໄວ້ວາງໃຈໄດ້ ຜູ້ທີ່ສາມາດຊ່ວຍທ່ານໃຫ້ກັບຄືນສູ່ເສັ້ນທາງທີ່ຖືກຕ້ອງ. ຜູ້ນຳຂອງທ່ານສາມາດຊ່ວຍທ່ານເຂົ້າເຖິງອຳນາດແຫ່ງການຊົດໃຊ້ຂອງພຣະເຢຊູຄຣິດຢ່າງເຕັມທີ່.
ເປັນເພາະຖານະປະໂລຫິດ, ເຮົາຈຶ່ງສາມາດໄດ້ຮັບພອນຂອງພິທີການຕ່າງໆໃນພຣະວິຫານນຳອີກ. ນັບຕັ້ງແຕ່ຂ້ານ້ອຍສາມາດເຂົ້າໄປໃນພຣະວິຫານໄດ້, ຂ້ານ້ອຍໄດ້ຕັ້ງເປົ້າໝາຍ ແລະ ລະດັບຄວາມສຳຄັນທີ່ຈະໄປພຣະວິຫານເປັນປະຈຳ. ໂດຍການໃຊ້ເວລາ ແລະ ການເສຍສະລະທີ່ຈຳເປັນເພື່ອຈະເຂົ້າໃກ້ພຣະບິດາເທິງສະຫວັນຂອງຂ້ານ້ອຍໃນບ້ານທີ່ສັກສິດຂອງພຣະອົງ, ຂ້ານ້ອຍໄດ້ຮັບພອນ ດ້ວຍການໄດ້ຮັບການເປີດເຜີຍ ແລະ ການກະຕຸ້ນເຕືອນທີ່ໄດ້ຊ່ວຍຂ້ານ້ອຍຫລາຍຕະຫລອດຊີວິດຂອງຂ້ານ້ອຍ.
ຜ່ານທາງຖານະປະໂລຫິດ, ເຮົາສາມາດຖືກຍົກຂຶ້ນ. ຖານະປະໂລຫິດນຳຄວາມສະຫວ່າງເຂົ້າມາສູ່ໂລກຂອງເຮົາ. ແອວເດີ ຣໍເບີດ ດີ ແຮວສ໌ ໄດ້ກ່າວວ່າ: “ປາດສະຈາກອຳນາດຂອງຖານະປະໂລຫິດ, ‘ທັງແຜ່ນດິນໂລກຈະຖືກທຳລາຍໃຫ້ໝົດສິ້ນ’ (ເບິ່ງ ຄ&ພ 2:1–3). ຈະບໍ່ມີຄວາມສະຫວ່າງ, ບໍ່ມີຄວາມຫວັງ—ຈະມີພຽງແຕ່ຄວາມມືດມົວເທົ່ານັ້ນ.”2
ພຣະເຈົ້າກຳລັງເຊຍເຮົາຢູ່. ພຣະອົງປະສົງໃຫ້ເຮົາກັບຄືນໄປຫາພຣະອົງ. ພຣະອົງຮູ້ຈັກເຮົາຢ່າງໃກ້ຊິດ. ພຣະອົງຮູ້ຈັກທ່ານ. ພຣະອົງຮັກເຮົາ. ພຣະອົງຮັບຮູ້ເຮົາສະເໝີ ແລະ ປະທານພອນໃຫ້ແກ່ເຮົາ ແມ່ນແຕ່ເມື່ອເຮົາຮູ້ສຶກວ່າເຮົາບໍ່ເໝາະສົມທີ່ຈະໄດ້ຮັບມັນ. ພຣະອົງຮູ້ສິ່ງທີ່ເຮົາຕ້ອງການ ແລະ ເວລາທີ່ເຮົາຕ້ອງການມັນ.
“ຈົ່ງໝັ່ນຂໍແລ້ວເຈົ້າຈະໄດ້ຮັບ, ຈົ່ງໝັ່ນຊອກຫາແລ້ວເຈົ້າກໍຈະໄດ້ພົບ; ຈົ່ງໝັ່ນເຄາະແລ້ວຈະມີຜູ້ໄຂໃຫ້ເຈົ້າ:
“ດ້ວຍວ່າ ທຸກຄົນທີ່ຂໍກໍຈະໄດ້ຮັບ, ທຸກຄົນທີ່ຊອກຫາກໍຈະໄດ້ພົບ, ແລະ ທຸກຄົນທີ່ເຄາະກໍຈະມີຜູ້ໄຂໃຫ້” (ມັດທາຍ 7:7–8).
ຖ້າຫາກທ່ານຍັງບໍ່ທັນມີປະຈັກພະຍານກ່ຽວກັບຖານະປະໂລຫິດເທື່ອ, ຂ້ານ້ອຍຂໍຊຸກຍູ້ທ່ານໃຫ້ອະທິຖານ ແລະ ທູນຂໍເພື່ອຈະຮູ້ດ້ວຍຕົວເອງ ເຖິງອຳນາດຂອງມັນ, ແລ້ວໃຫ້ອ່ານພຣະຄຳພີເພື່ອຈະໄດ້ຍິນພຣະຄຳຂອງພຣະເຈົ້າ. ຂ້ານ້ອຍຮູ້ວ່າ ຖ້າຫາກເຮົາພະຍາຍາມທີ່ຈະປະສົບກັບອຳນາດຂອງຖານະປະໂລຫິດຂອງພຣະເຈົ້າໃນຊີວິດຂອງເຮົາ, ແລ້ວເຮົາຈະໄດ້ຮັບພອນ. ໃນພຣະນາມຂອງພຣະເຢຊູຄຣິດ, ອາແມນ.