ຈົ່ງຟັງທ່ານ

ໂດຍ ປະທານຣະໂຊ ເອັມ ແນວສັນ

ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ

ພຣະບິດາຂອງເຮົາຮູ້ວ່າ ເຮົາຖືກຫຸ້ມລ້ອມໂດຍສິ່ງທີ່ບໍ່ແນ່ນອນ ແລະ ໜ້າຢ້ານກົວ, ສິ່ງໜຶ່ງທີ່ຈະຊ່ວຍເຮົາໄດ້ຫລາຍແມ່ນການຮັບຟັງພຣະບຸດຂອງພຣະອົງ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າກະຕັນຍູທີ່, ຜ່ານທາງການໃຊ້ ເທັກໂນໂລຈີ ເຮົາສາມາດມາຊຸມນຸມ ແລະ ນະມັດສະການນຳກັນໃນເຊົ້າວັນອາທິດມື້ນີ້. ຊ່າງເປັນພອນແທ້ໆທີ່ເຮົາຮູ້ວ່າ ພຣະກິດຕິຄຸນຂອງພຣະເຢຊູຄຣິດໄດ້ຖືກຟື້ນຟູສູ່ໂລກແລ້ວ!

ໃນຫລາຍອາທິດມານີ້, ຊີວິດຂອງພວກເຮົາຫລາຍຄົນໄດ້ຮັບການກະທົບກະເທືອນ. ແຜ່ນດິນໄຫວ, ໄຟໃໝ້, ນ້ຳຖ້ວມ, ໂຣກລະບາດ, ແລະ ຜົນຂອງສິ່ງເຫລົ່ານີ້ໄດ້ປ່ຽນແປງຊີວິດປະຈຳວັນ ແລະ ເຮັດໃຫ້ເກີດມີການຂາດແຄນເລື່ອງອາຫານການກິນ, ສິ່ງໃຊ້ສອຍທີ່ຈຳເປັນ, ແລະ ເລື່ອງການເງິນ.

ໃນທ່າມກາງທຸກສິ່ງທັງໝົດນີ້, ພວກເຮົາຊົມເຊີຍ ແລະ ຂອບໃຈທ່ານ ທີ່ເລືອກຮັບຟັງພຣະຄຳຂອງພຣະຜູ້ເປັນເຈົ້າ ໃນຊ່ວງເວລາທີ່ວຸ້ນວາຍ ໂດຍການມີພາກສ່ວນກັບພວກເຮົາສຳລັບກອງປະຊຸມໃຫຍ່ສາມັນ. ການຂະຫຍາຍຕົວຂອງຄວາມມືດມົນ ຊຶ່ງມາກັບຄວາມລຳບາກ ໄດ້ເຮັດໃຫ້ຄວາມສະຫວ່າງຂອງພຣະເຢຊູຄຣິດຮຸ່ງແຈ້ງຫລາຍກວ່າເກົ່າ. ໃຫ້ຄິດເຖິງຄວາມດີທີ່ເຮົາແຕ່ລະຄົນສາມາດເຮັດໄດ້ໃນຊ່ວງເວລາຂອງການປ່ຽນແປງຢ່າງຫລວງຫລາຍຢູ່ໃນໂລກນີ້. ຄວາມຮັກ ແລະ ສັດທາຂອງທ່ານໃນພຣະຜູ້ຊ່ວຍໃຫ້ລອດ ສາມາດກະຕຸ້ນບາງຄົນໃຫ້ຄົ້ນພົບການຟື້ນຟູອັນສົມບູນຂອງພຣະກິດຕິຄຸນຂອງພຣະເຢຊູຄຣິດໄດ້.

ໃນສອງປີຜ່ານມານີ້, ຊິດສະເຕີ ແນວສັນ ແລະ ຂ້າພະເຈົ້າໄດ້ພົບກັບພວກທ່ານຫລາຍພັນຄົນຕະຫລອດທົ່ວໂລກ. ພວກເຮົາໄດ້ຮ່ວມປະຊຸມກັບພວກທ່ານຢູ່ສະໜາມກາງແຈ້ງ ແລະ ຢູ່ໃນຫ້ອງປະຊຸມຂອງໂຮງແຮມ. ໃນແຕ່ລະບ່ອນ, ຂ້າພະເຈົ້າຮູ້ສຶກວ່າ ຂ້າພະເຈົ້າໄດ້ຢູ່ໃນທ່າມກາງຜູ້ທີ່ຖືກເລືອກໄວ້ຂອງພຣະຜູ້ເປັນເຈົ້າ ແລະ ວ່າຂ້າພະເຈົ້າເຫັນການເຕົ້າໂຮມອິດສະຣາເອນ ທີ່ກຳລັງເກີດຂຶ້ນຢູ່ຕໍ່ໜ້າຂ້າພະເຈົ້າ.

ເຮົາມີຊີວິດຢູ່ໃນວັນເວລາທີ່ “ບັນພະບຸລຸດຂອງເຮົາໄດ້ຄອຍຖ້າຢ່າງກະຕືລືລົ້ນ.”¹ ເຮົາໄດ້ນັ່ງຢູ່ແຖວໜ້າ ເພື່ອ ເປັນພະຍານດ້ວຍຕົວເອງ ເຖິງສິ່ງທີ່ສາດສະດານີໄຟໄດ້ເຫັນ ພຽງຢູ່ໃນພາບນິມິດ, ວ່າອຳນາດຂອງພຣະເມສານ້ອຍຂອງພຣະເຈົ້າ ຈະລົງມາ “ເທິງຜູ້ຄົນແຫ່ງພັນທະສັນຍາຂອງພຣະຜູ້ເປັນເຈົ້າ ຊຶ່ງກະຈັດກະຈາຍໄປຕາມຜືນແຜ່ນດິນໂລກ; ແລະ ພວກເຂົາມີອາວຸດຄືຄວາມຊອບທຳ ພ້ອມກັບອຳນາດຂອງພຣະເຈົ້າໃນລັດສະໝີພາບອັນຍິ່ງໃຫຍ່.”²

ທ່ານ, ອ້າຍເອື້ອຍນ້ອງຂອງຂ້າພະເຈົ້າທັງຫລາຍ, ເປັນຜູ້ໜຶ່ງໃນບັນດາຊາຍ, ຍິງ, ແລະ ເດັກນ້ອຍ ຜູ້ທີ່ນີໄຟໄດ້ເຫັນ. ໃຫ້ຄິດກ່ຽວກັບສິ່ງນີ້!

ບໍ່ວ່າທ່ານຈະອາໄສຢູ່ບ່ອນໃດ ຫລື ສະຖານະການຂອງທ່ານຈະເປັນແນວໃດ, ອົງພຣະເຢຊູຄຣິດເຈົ້າຄືພຣະຜູ້ຊ່ວຍໃຫ້ລອດ ຂອງທ່ານ, ແລະ ສາດສະດາຂອງພຣະເຈົ້າ ໂຈເຊັບ ສະມິດ ເປັນສາດສະດາ ຂອງທ່ານ. ເພິ່ນໄດ້ຖືກແຕ່ງຕັ້ງລ່ວງໜ້າກ່ອນການວາງຮາກຖານຂອງໂລກ ເພື່ອໃຫ້ເປັນສາດສະດາຂອງຍຸກສຸດທ້າຍ, ເມື່ອ “ບໍ່ມີສິ່ງໃດຈະຖືກຢັບຢັ້ງໄວ້”³ ຈາກໄພ່ພົນ. ການເປີດເຜີຍສືບຕໍ່ຫລັ່ງໄຫລມາຈາກພຣະຜູ້ເປັນເຈົ້າໃນວິທີການຂອງການຟື້ນຟູ.

ມັນໝາຍຄວາມວ່າແນວໃດສຳລັບທ່ານ ທີ່ພຣະກິດຕິຄຸນຂອງພຣະເຢຊູຄຣິດໄດ້ຖືກຟື້ນຟູສູ່ໂລກນີ້?

ມັນໝາຍຄວາມວ່າ ທ່ານ ແລະ ຄອບຄົວຂອງທ່ານສາມາດຜະນຶກເຂົ້າກັນຕະຫລອດໄປ! ມັນໝາຍຄວາມວ່າ ເພາະທ່ານໄດ້ຮັບບັບຕິສະມາໂດຍຜູ້ທີ່ມີສິດອຳນາດຈາກພຣະເຢຊູຄຣິດ ແລະ ໄດ້ຮັບການຢືນຢັນເປັນສະມາຊິກຂອງສາດສະໜາຈັກຂອງພຣະອົງ, ທ່ານສາມາດຊື່ນຊົມກັບການມີພຣະວິນຍານບໍລິສຸດເປັນເພື່ອນຕະຫລອດເວລາ. ພຣະອົງຈະນຳພາ ແລະ ປົກປ້ອງທ່ານ. ມັນໝາຍຄວາມວ່າ ທ່ານຈະບໍ່ເຄີຍຖືກປະຖິ້ມໃຫ້ເປັນລູກກຳພ້າ ຫລື ບໍ່ສາມາດເຂົ້າເຖິງອຳນາດຂອງພຣະເຈົ້າ ເພື່ອຊ່ວຍເຫລືອທ່ານ. ມັນໝາຍຄວາມວ່າ ອຳນາດຖານະປະໂລຫິດສາມາດເປັນພອນໃຫ້ແກ່ທ່ານ ເມື່ອທ່ານຮັບເອົາພິທີການທີ່ຈຳເປັນ ແລະ ເຮັດພັນທະສັນຍາກັບພຣະເຈົ້າ ແລະ ຮັກສາມັນ. ຄວາມຈິງເຫລົ່ານີ້ເປັນຫລັກໝັ້ນໃຫ້ແກ່ຈິດວິນຍານຂອງເຮົາແທ້ໆ, ໂດຍສະເພາະໃນຊ່ວງເວລາເມື່ອພະຍຸຝົນຟ້າຄະນອງກຳລັງກະໜ່ຳ.

ພຣະຄຳພີມໍມອນເລົ່າເຖິງຄວາມເລີນຮຸ່ງເຮືອງ ແລະ ການເສື່ອມໂຊມຂອງຜູ້ຄົນສອງກຸ່ມ. ປະຫວັດສາດຂອງເຂົາເຈົ້າສະແດງໃຫ້ເຫັນກ່ຽວກັບຜູ້ຄົນຢ່າງຫລວງຫລາຍໄດ້ລືມໄລພຣະເຈົ້າຢ່າງງ່າຍດາຍ, ປະຕິເສດຄຳເຕືອນຂອງສາດສະດາຂອງພຣະຜູ້ເປັນເຈົ້າ, ແລະ ສະແຫວງຫາອຳນາດ, ຄວາມນິຍົມຊົມຊອບ, ແລະ ຄວາມພໍໃຈທາງເນື້ອໜັງ.⁴ ສາດສະດາທີ່ຜ່ານມາໄດ້ປະກາດຫລາຍຕໍ່ຫລາຍເທື່ອກ່ຽວກັບ “ເລື່ອງທີ່ຍິ່ງໃຫຍ່ ແລະ ໜ້າອັດສະຈັນແກ່ຜູ້ຄົນ, ຊຶ່ງພວກເຂົາບໍ່ເຊື່ອ.”⁵

ໃນວັນເວລາຂອງເຮົາກໍບໍ່ແຕກຕ່າງ. ເປັນເວລາຫລາຍປີ, ສິ່ງທີ່ຍິ່ງໃຫຍ່ ແລະ ໜ້າອັດສະຈັນ ໄດ້ຖືກກ່າວໂດຍຜູ້ນຳຂອງສາດສະໜາຈັກທີ່ແທ່ນປາໄສຕະຫລອດທົ່ວໂລກ. ແຕ່ຜູ້ຄົນສ່ວນຫລາຍ ບໍ່ ຮັບເອົາຄວາມຈິງເຫລົ່ານີ້—ບາງທີເປັນເພາະເຂົາເຈົ້າບໍ່ຮູ້ວ່າຈະຊອກຫາມັນໄດ້ຢູ່ບ່ອນໃດ⁶ ຫລື ເພາະເຂົາເຈົ້າຟັງຄວາມຂອງຜູ້ທີ່ບໍ່ຮູ້ຄວາມຈິງທັງໝົດ ເພາະເຂົາເຈົ້າໄດ້ປະຕິເສດຄວາມຈິງ ເພື່ອຈະໄດ້ສະແຫວງຫາສິ່ງທີ່ເປັນຂອງໂລກ.

ຜູ້ປໍລະປັກກໍສະຫລາດແທ້ໆ. ສຳລັບຄົນລຸ້ນໃໝ່ ມັນເຮັດໃຫ້ຄວາມດີເບິ່ງຄືວ່າເປັນຄວາມຊົ່ວ ແລະ ຄວາມຊົ່ວເປັນຄວາມດີ.⁷ ຂ່າວສານຂອງມັນດັງສະນັ່ນ, ກ້າຫານ, ແລະ ອວດອົ່ງ.

ເຖິງຢ່າງໃດກໍຕາມ, ຂ່າວສານຈາກພຣະບິດາເທິງສະຫວັນຂອງເຮົາແມ່ນແຕກຕ່າງຈາກນັ້ນ. ພຣະອົງສື່ສານແບບລຽບງ່າຍ, ແຜ່ວເບົາ, ແລະ ແຈ່ມແຈ້ງທີ່ສຸດ ຈົນເຮົາເຂົ້າໃຈຜິດບໍ່ໄດ້.⁸

ຍົກຕົວຢ່າງ, ເມື່ອໃດກໍຕາມທີ່ພຣະອົງໄດ້ແນະນຳພຣະບຸດອົງດຽວທີ່ຖືເກີດເນີດຂອງພຣະອົງ ຕໍ່ມະນຸດຢູ່ເທິງໂລກ, ພຣະອົງໄດ້ກ່າວແບບສັ້ນໆ. ພຣະເຈົ້າໄດ້ກ່າວກັບເປໂຕ, ຢາໂກໂບ, ແລະ ໂຢຮັນ ຢູ່ເທິງພູແຫ່ງການປ່ຽນລັກສະນະວ່າ, “ນີ້ຄື ບຸດທີ່ຮັກຂອງເຮົາ: ຈົ່ງຟັງທ່ານ.”⁹ ພຣະຄຳຂອງພຣະອົງຕໍ່ຊາວນີໄຟຢູ່ໃນເມືອງອຸດົມສົມບູນໃນສະໄໝບູຮານແມ່ນ “ຈົ່ງເບິ່ງ ບຸດທີ່ຮັກຂອງເຮົາເຖີດ, ໃນຜູ້ເຮົາພໍໃຈຫລາຍ, ໃນຜູ້ທີ່ສັນລະເສີນພຣະນາມຂອງເຮົາ—ຈົ່ງຟັງທ່ານ.”¹⁰ ແລະ ໂຈເຊັບ ສະມິດ, ໃນການປະກາດທີ່ເລິກຊຶ້ງ ຊຶ່ງໄດ້ເປີດຍຸກສະໄໝນີ້, ພຣະເຈົ້າພຽງກ່າວວ່າ, “ນີ້ຄືບຸດທີ່ຮັກຂອງເຮົາ. ຈົ່ງຟັງທ່ານ!”¹¹

ບັດນີ້, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ໃຫ້ພິຈາລະນາຄວາມຈິງສາມຢ່າງເຫລົ່ານີ້ ທີ່ຫາກໍກ່າວເຖິງ, ກ່ອນພຣະບິດາໄດ້ແນະນຳພຣະບຸດ, ຜູ້ທີ່ຢູ່ໃນເຫດການ ຈະມີຄວາມຢ້ານກົວ ແລະ, ໃນລະດັບໃດໜຶ່ງ, ມີຄວາມສິ້ນຫວັງ.

ອັກຄະສາວົກໄດ້ເກີດມີຄວາມຢ້ານກົວ ເມື່ອພວກເພິ່ນໄດ້ເຫັນພຣະເຢຊູຄຣິດຖືກຫຸ້ມລ້ອມດ້ວຍກ້ອນເມກຢູ່ເທິງພູແຫ່ງການປ່ຽນລັກສະນະ.

ຊາວນີໄຟໄດ້ເກີດມີຄວາມຢ້ານກົວ ເພາະເຂົາເຈົ້າຫາກໍໄດ້ຜ່ານຜ່າໄພພິບັດ ແລະ ຄວາມມືດເປັນເວລາຫລາຍວັນ.

ໂຈເຊັບ ສະມິດ ໄດ້ຖືກຄວບຄຸມໂດຍອຳນາດຂອງຄວາມມືດ ກ່ອນສະຫວັນໄດ້ເປີດອອກ.

ເພາະວ່າ ເມື່ອເຮົາສະແຫວງຫາທີ່ຈະຮັບຟັງ—ຟັງແທ້ໆ—ພຣະບຸດຂອງພຣະອົງ, ເຮົາຈະໄດ້ຮັບການຊີ້ນຳ ເພື່ອໃຫ້ຮູ້ເຖິງສິ່ງທີ່ຈະເຮັດຢູ່ໃນທຸກສະຖານະການ.

ຂໍ້ຄວາມທຳອິດຢູ່ໃນ ຄຳສອນ ແລະ ພັນທະສັນຍາ ແມ່ນ ຈົ່ງເຊື່ອຟັງ.¹² ມັນໝາຍຄວາມວ່າ “ຟັງດ້ວຍຄວາມຕັ້ງໃຈທີ່ຈະເຊື່ອຟັງ.”¹³ ເຊື່ອຟັງ ໝາຍເຖິງ “ຈົ່ງຟັງທ່ານ”—ເພື່ອ ຮັບຟັງ ສິ່ງທີ່ພຣະຜູ້ຊ່ວຍໃຫ້ລອດກ່າວ ແລະ ແລ້ວ ເອົາໃຈໃສ່ຕໍ່ ຄຳແນະນຳຂອງພຣະອົງ. ໃນສາມຄຳເຫລົ່ານັ້ນ—“ຈົ່ງຟັງທ່ານ”—ພຣະເຈົ້າໄດ້ມອບແບບແຜນຂອງຄວາມສຳເລັດຜົນ, ຄວາມສຸກ, ແລະ ຄວາມຊື່ນຊົມໃນຊີວິດນີ້ໃຫ້ເຮົາ. ເຮົາຕ້ອງ ຮັບຟັງ ພຣະຄຳຂອງພຣະຜູ້ເປັນເຈົ້າ, ເຊື່ອຟັງ ຕາມນັ້ນ, ເອົາໃຈໃສ່ ຕໍ່ສິ່ງທີ່ພຣະອົງໄດ້ບອກເຮົາ!

ເມື່ອເຮົາສະແຫວງຫາທີ່ຈະເປັນສານຸສິດຂອງພຣະເຢຊູຄຣິດ, ເຮົາຕ້ອງພະຍາຍາມຕັ້ງໃຈ ຮັບຟັງພຣະອົງ ໃຫ້ຫລາຍກວ່າເກົ່າ. ຕ້ອງໄດ້ໃຊ້ຄວາມພະຍາຍາມຢ່າງມີສະຕິ ແລະ ສະໝ່ຳສະເໝີ ເພື່ອເຮັດໃຫ້ຊີວິດປະຈຳວັນຂອງເຮົາເຕັມໄປດ້ວຍພຣະຄຳ, ຄຳສອນ, ແລະ ຄວາມຈິງຂອງພຣະອົງ.

ເຮົາບໍ່ສາມາດເພິ່ງອາໄສຂໍ້ມູນທີ່ເຮົາພົບເຫັນຢູ່ໃນສື່ສານມວນຊົນ. ດ້ວຍຖ້ອຍຄຳຢ່າງຫລວງຫລາຍຢູ່ໃນອອນລາຍ ແລະ ໃນໂລກທີ່ເຕັມໄປດ້ວຍຄຳໂຄສະນາ ແລະ ສຽງດັງ, ຄວາມພະຍາຍາມຂອງຜູ້ປໍລະປັກທີ່ຊົ່ວຮ້າຍ, ເຮົາຈະ ສາມາດ ໄປຊອກຮັບຟັງພຣະອົງໄດ້ຢູ່ບ່ອນໃດ?

ເຮົາສາມາດໄປຫາພຣະຄຳພີ. ມັນສິດສອນເຮົາກ່ຽວກັບພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ, ການຊົດໃຊ້ທີ່ຍິ່ງໃຫຍ່ຂອງພຣະອົງ, ແລະ ແຜນແຫ່ງຄວາມສຸກ ແລະການໄຖ່ທີ່ຍິ່ງໃຫຍ່ຂອງພຣະບິດາຂອງເຮົາ. ການເຂົ້າຫາພຣະຄຳຂອງພຣະເຈົ້າທຸກວັນ ເປັນສິ່ງຈຳເປັນຕໍ່ການຢູ່ລອດທາງຈິດວິນຍານ, ໂດຍສະເພາະໃນວັນເວລາທີ່ຫຍຸ້ງຍາກຫລາຍຂຶ້ນເລື້ອຍໆເຫລົ່ານີ້. ເມື່ອເຮົາຊື່ນຊົມຢູ່ດ້ວຍພຣະຄຳຂອງພຣະຄຣິດທຸກວັນ, ແລ້ວພຣະຄຳຂອງພຣະຄຣິດຈະບອກເຮົາໃຫ້ຮູ້ວິທີຕອບຮັບຄວາມຫຍຸ້ງຍາກ ທີ່ເຮົາບໍ່ເຄີຍຄິດວ່າ ມັນຈະເກີດກັບເຮົາ.

ເຮົາກໍສາມາດ ຮັບຟັງພຣະອົງ ຢູ່ໃນພຣະວິຫານ. ບ້ານຂອງພຣະຜູ້ເປັນເຈົ້າ ເປັນ ບ້ານແຫ່ງການຮຽນຮູ້. ຢູ່ທີ່ນັ້ນພຣະຜູ້ເປັນເຈົ້າສິດສອນໃນວິທີທາງຂອງພຣະອົງເອງ. ຢູ່ທີ່ນັ້ນພິທີການແຕ່ລະຢ່າງສິດສອນກ່ຽວກັບພຣະຜູ້ຊ່ວຍໃຫ້ລອດ. ຢູ່ທີ່ນັ້ນເຮົາຮຽນຮູ້ວິທີເປີດຜ້າມ່ານ ແລະ ສົນທະນາກັບສະຫວັນຢ່າງແຈ່ມແຈ້ງກວ່າເກົ່າ. ຢູ່ທີ່ນັ້ນເຮົາຮຽນຮູ້ວິທີທີ່ຈະຕຳນິຜູ້ປໍລະປັກ ແລະ ເຂົ້າໃກ້ອຳນາດຖານະປະໂລຫິດຂອງພຣະຜູ້ເປັນເຈົ້າ ເພື່ອເພີ່ມກຳລັງໃຫ້ເຮົາ ແລະ ຜູ້ຄົນທີ່ເຮົາຮັກ. ເຮົາແຕ່ລະຄົນຄວນກະຕືລືລົ້ນຫລາຍຂະໜາດໃດ ທີ່ຈະສະແຫວງຫາບ່ອນຫລົບໄພຢູ່ໃນນັ້ນ.

ເມື່ອຂໍ້ຈຳກັດຊົ່ວຄາວກ່ຽວກັບພະຍາດໂຄວິດ-19 ຖືກຍົກເລີກ, ຂໍໃຫ້ທ່ານຫາເວລາໄປນະມັດສະການ ແລະ ຮັບໃຊ້ຢູ່ໃນພຣະວິຫານເປັນປະຈຳ. ທຸກນາທີຂອງເວລານັ້ນ ຈະເປັນພອນໃຫ້ແກ່ທ່ານ ແລະ ຄອບຄົວຂອງທ່ານໃນວິທີທາງທີ່ ບໍ່ມີສິ່ງອື່ນໃດ ສາມາດເຮັດໄດ້. ໃຫ້ໃຊ້ເວລາໄຕ່ຕອງສິ່ງທີ່ທ່ານໄດ້ຍິນ ແລະ ຮູ້ສຶກ ເມື່ອທ່ານຢູ່ທີ່ນັ້ນ. ຂໍໃຫ້ພຣະຜູ້ເປັນເຈົ້າສິດສອນທ່ານໃຫ້ຮູ້ຈັກວິທີເປີດສະຫວັນ ເພື່ອເປັນພອນໃຫ້ແກ່ຊີວິດຂອງທ່ານ ແລະ ຊີວິດຂອງຜູ້ຄົນທີ່ທ່ານຮັກ ແລະ ຮັບໃຊ້.

ເຖິງແມ່ນການນະມັດສະການຢູ່ໃນພຣະວິຫານເປັນໄປບໍ່ໄດ້ໃນເວລານີ້, ແຕ່ຂ້າພະເຈົ້າເຊື້ອເຊີນທ່ານໃຫ້ມີພາກສ່ວນສືບປະຫວັດຄອບຄົວ, ລວມທັງການຄົ້ນຫາ ແລະ ການເຮັດດັດຊະນີປະຫວັດຄອບຄົວຫລາຍກວ່າເກົ່າ. ຂ້າພະເຈົ້າສັນຍາວ່າ ເມື່ອທ່ານໃຊ້ເວລາໃນພຣະວິຫານ ແລະ ໃນວຽກງານປະຫວັດຄອບຄົວຫລາຍກວ່າເກົ່າ, ແລ້ວທ່ານຈະຮັບຟັງພຣະອົງ ຫລາຍກວ່າເກົ່າ ແລະ ດີກວ່າເກົ່າ.

ເຮົາ ຮັບຟັງພຣະອົງ ດີກວ່າເກົ່າ ເມື່ອເຮົາຫລໍ່ຫລອມຄວາມສາມາດຂອງເຮົາ ທີ່ຈະຮັບຮູ້ສຸລະສຽງທີ່ແຜ່ວເບົາຂອງພຣະວິນຍານບໍລິສຸດ. ບໍ່ເຄີຍມີເວລາໃດທີ່ຕ້ອງການພຣະວິນຍານໃຫ້ກ່າວກັບທ່ານ ຫລາຍກວ່າໃນເວລານີ້. ຢູ່ໃນຝ່າຍພຣະເຈົ້າ, ພຣະວິນຍານບໍລິສຸດເປັນຜູ້ສົ່ງຂ່າວ. ພຣະອົງຈະນຳຄວາມຄິດເຂົ້າສູ່ຈິດໃຈຂອງທ່ານ ອັນທີ່ພຣະບິດາ ແລະ ພຣະບຸດປະສົງທີ່ຈະມອບໃຫ້ທ່ານ. ພຣະອົງເປັນພຣະຜູ້ປອບໂຍນ. ພຣະອົງຈະນຳຄວາມຮູ້ສຶກແຫ່ງຄວາມສະຫງົບເຂົ້າສູ່ໃຈຂອງທ່ານ. ພຣະອົງເປັນພະຍານເຖິງຄວາມຈິງ ແລະ ຈະຢືນຢັນສິ່ງທີ່ເປັນຄວາມຈິງ ຂະນະທີ່ທ່ານໄດ້ຍິນ ແລະ ອ່ານພຣະຄຳຂອງພຣະຜູ້ເປັນເຈົ້າ.

ຂ້າພະເຈົ້າຂໍອ້ອນວອນທ່ານອີກ ໃຫ້ເຮັດ ສິ່ງໃດກໍຕາມ ທີ່ທ່ານສາມາດເຮັດໄດ້ ເພື່ອເພີ່ມຄວາມສາມາດທາງວິນຍານຂອງທ່ານ ເພື່ອຈະໄດ້ຮັບການເປີດເຜີຍເປັນສ່ວນຕົວ.

ການເຮັດແນວນັ້ນຈະຊ່ວຍທ່ານໃຫ້ຮູ້ຈັກວິທີທີ່ຈະດຳເນີນໄປໜ້າໃນຊີວິດຂອງທ່ານ, ຮູ້ຈັກສິ່ງທີ່ຈະເຮັດໃນຊ່ວງວິກິດ, ແລະ ຮູ້ຈັກວິທີທີ່ຈະເບິ່ງອອກ ແລະ ຫລີກເວັ້ນຈາກການລໍ້ລວງ ແລະ ການຫລອກລວງຂອງຜູ້ປໍລະປັກ.

ແລະ, ສຸດທ້າຍ, ເຮົາ ຮັບຟັງພຣະອົງ ເມື່ອເຮົາເອົາໃຈໃສ່ຕໍ່ພຣະຄຳຂອງສາດສະດາ, ຜູ້ພະຍາກອນ, ແລະ ຜູ້ເປີດເຜີຍ. ອັກຄະສາວົກທີ່ຖືກແຕ່ງຕັ້ງໄວ້ຂອງພຣະເຢຊູຄຣິດໄດ້ເປັນພະຍານເຖິງພຣະອົງຕະຫລອດເວລາ. ພວກເພິ່ນຊີ້ທາງ ຂະນະທີ່ເຮົາເດີນໄປໃນເສັ້ນທາງອັນໂສກເສົ້າ ແລະ ສັບສົນຫລາຍທີ່ສຸດ ໃນຄວາມເປັນມະຕະຂອງເຮົາ.

ຈະມີຫຍັງເກີດຂຶ້ນ ຖ້າຫາກທ່ານຮັບຟັງ, ເຊື່ອຟັງ, ແລະ ເອົາໃຈໃສ່ດ້ວຍຄວາມຕັ້ງໃຈ ຕໍ່ສິ່ງທີ່ພຣະຜູ້ຊ່ວຍໃຫ້ລອດໄດ້ກ່າວ ແລະ ສິ່ງທີ່ພຣະອົງກຳລັງກ່າວໃນເວລານີ້ ຜ່ານທາງສາດສະດາຂອງພຣະອົງ? ຂ້າພະເຈົ້າສັນຍາວ່າ ທ່ານຈະໄດ້ຮັບພອນດ້ວຍພະລັງເພີ່ມເຕີມ ທີ່ຈະສາມາດປະເຊີນກັບການລໍ້ລວງ, ການດີ້ນລົນ, ແລະ ຄວາມອ່ອນແອໄດ້. ຂ້າພະເຈົ້າສັນຍາວ່າ ການແຕ່ງງານ, ຄວາມສຳພັນໃນຄອບຄົວ, ແລະ ວຽກງານຂອງທ່ານຈະເປັນສິ່ງມະຫັດສະຈັນ. ແລະ ຂ້າພະເຈົ້າສັນຍາວ່າ ຄວາມສາມາດຂອງທ່ານທີ່ຈະຮູ້ສຶກເຖິງຄວາມສຸກ ຈະມີເພີ່ມທະວີຂຶ້ນ ແມ່ນແຕ່ໃນເວລາທີ່ມີຄວາມວຸ້ນວາຍຫລາຍກວ່າເກົ່າ ໃນຊີວິດຂອງທ່ານ.

ກອງປະຊຸມໃຫຍ່ສາມັນ ເດືອນເມສາ 2020 ນີ້ ເປັນເວລາຂອງເຮົາທີ່ຈະສະເຫລີມສະຫລອງເຫດການທີ່ໄດ້ປ່ຽນແປງໂລກ. ຂະນະທີ່ພວກເຮົາລໍຄອຍໃຫ້ຮອດວັນຄົບຮອບ 200 ປີ ຂອງພາບທີ່ມາໃຫ້ເຫັນຄັ້ງທຳອິດຂອງໂຈເຊັບ ສະມິດ, ຝ່າຍປະທານສູງສຸດ ແລະ ສະພາອັກຄະສາວົກສິບສອງ ໄດ້ຄິດຫາສິ່ງທີ່ ພວກເຮົາ ຈະເຮັດເພື່ອສະເຫລີມສະຫລອງເຫດການທີ່ສຳຄັນນີ້ໃຫ້ເໝາະສົມ.

ການມາປະກົດນັ້ນໄດ້ເລີ່ມຕົ້ນການຟື້ນຟູຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ ແລະ ນຳເຂົ້າສູ່ຍຸກສະໄໝຂອງຄວາມສົມບູນແຫ່ງເວລາ.

ພວກເຮົາຄິດວ່າ ຄວນສ້າງອະນຸສອນຂຶ້ນຫລືບໍ່. ແຕ່ເມື່ອພວກເຮົາໄຕ່ຕອງເຖິງຜົນກະທົບໂດຍທົ່ວໄປແຫ່ງປະຫວັດສາດທີ່ພິເສດຂອງພາບທີ່ມາໃຫ້ເຫັນຄັ້ງທຳອິດ, ພວກເຮົາໄດ້ຮັບຄວາມປະທັບໃຈໃຫ້ສ້າງອະນຸສອນ ທີ່ບໍ່ແມ່ນຈາກຫີນແກຼນເນັດ ຫລື ຈາກກ້ອນຫີນໃຫຍ່ ແຕ່ສ້າງດ້ວຍຖ້ອຍຄຳ—ເປັນການປະກາດຖ້ອຍຄຳທີ່ໜັກແໜ້ນ ແລະ ສັກສິດ—ຖືກຂຽນຂຶ້ນ, ບໍ່ແມ່ນແກະສະຫລັກ “ໃສ່ໃນແຜ່ນຫີນ” ແຕ່ໃຫ້ສະຫລັກໄວ້ໃນ “ເນື້ອໜັງ” ຂອງຫົວໃຈ.¹⁴

ນັບຕັ້ງແຕ່ສາດສະໜາຈັກໄດ້ຖືກຈັດຕັ້ງຂຶ້ນມາ, ມີການປະກາດທີ່ສຳຄັນພຽງແຕ່ຫ້າຄັ້ງເທົ່ານັ້ນ, ຄັ້ງສຸດທ້າຍແມ່ນ “ຄອບຄົວ: ການປະກາດຕໍ່ໂລກ,” ຊຶ່ງສະເໜີໂດຍປະທານກໍດອນ ບີ ຮິງລີ ໃນປີ 1995.

ບັດນີ້ ຂະນະທີ່ພວກເຮົາໄຕ່ຕອງກ່ຽວກັບເວລາທີ່ສຳຄັນນີ້ໃນປະຫວັດສາດຂອງໂລກ ແລະ ຄຳສັ່ງຂອງພຣະຜູ້ເປັນເຈົ້າໃຫ້ເຕົ້າໂຮມອິດສະຣາເອນ ໃນການກະກຽມສຳລັບການສະເດັດມາຄັ້ງທີສອງຂອງພຣະເຢຊູຄຣິດ, ພວກເຮົາ, ຝ່າຍປະທານສູງສຸດ ແລະ ສະພາອັກຄະສາວົກສິບສອງ, ຈຶ່ງໄດ້ລະບຸການປະກາດທີ່ສຳຄັນດັ່ງຕໍ່ໄປນີ້. ຫົວຂໍ້ແມ່ນ “ການຟື້ນຟູຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ: ການປະກາດສອງຮ້ອຍປີຕໍ່ໂລກ.” ຖືກຂຽນຂຶ້ນໂດຍຝ່າຍປະທານສູງສຸດ ແລະ ສະພາອັກຄະສາວົກສິບສອງ ຂອງສາດສະໜາຈັກຂອງພຣະເຢຊູຄຣິດແຫ່ງໄພພົນຍຸກສຸດທ້າຍ. ລົງວັນທີ ເດືອນເມສາ 2020. ເພື່ອກະກຽມສຳລັບມື້ນີ້, ຂ້າພະເຈົ້າໄດ້ອັດການປະກາດລ່ວງໜ້າແລ້ວຢູ່ໃນປ່າສັກສິດ, ບ່ອນທີ່ໂຈເຊັບ ສະມິດ ໄດ້ເຫັນພຣະບິດາ ແລະ ພຣະບຸດເປັນເທື່ອທຳອິດ.

“ພວກເຮົາປະກາດຢ່າງໜັກແໜ້ນວ່າ ພຣະເຈົ້າຮັກລູກໆຂອງພຣະອົງ ໃນທຸກປະຊາຊາດຂອງໂລກ. ພຣະເຈົ້າອົງເປັນພຣະບິດາໄດ້ມອບການກຳເນີດອັນສູງສົ່ງ, ພຣະຊົນຊີບທີ່ຫາອັນປຽບບໍ່ໄດ້, ແລະ ການເສຍສະລະຊົດໃຊ້ອັນບໍ່ມີຂອບເຂດຂອງພຣະບຸດທີ່ຮັກຂອງພຣະອົງ, ພຣະເຢຊູຄຣິດໃຫ້ເຮົາ. ດ້ວຍອຳນາດຂອງພຣະບິດາ, ພຣະເຢຊູໄດ້ລຸກຂຶ້ນອີກ ແລະ ໄດ້ເອົາຊະນະຄວາມຕາຍ. ພຣະອົງເປັນພຣະຜູ້ຊ່ວຍໃຫ້ລອດຂອງເຮົາ, ເປັນຕົວຢ່າງຂອງເຮົາ, ແລະ ເປັນພຣະຜູ້ໄຖ່ຂອງເຮົາ.

“ເມື່ອສອງຮ້ອຍປີກ່ອນ, ໃນວັນທີ່ສວຍງາມຂອງລະດູໃບໄມ້ປົ່ງ ໃນປີ 1820, ຊາຍໜຸ່ມໂຈເຊັບ ສະມິດ, ຢາກຮູ້ວ່າສາດສະໜາຈັກໃດທີ່ເພິ່ນຄວນເຂົ້າຮ່ວມ, ຈຶ່ງໄດ້ເຂົ້າໄປໃນປ່າ ຢູ່ໃກ້ເຮືອນຂອງເພິ່ນ ໃນເຂດເໜືອຂອງລັດນິວຢອກ, ປະເທດສະຫະລັດ ເພື່ອອະທິຖານ. ເພິ່ນມີຄຳຖາມກ່ຽວກັບຄວາມລອດຂອງຈິດວິນຍານຂອງເພິ່ນ ແລະ ໄວ້ວາງໃຈວ່າພຣະເຈົ້າຈະຊີ້ນຳ.

“ໃນຄວາມຖ່ອມຕົວ, ພວກເຮົາປະກາດວ່າ ໃນການຕອບຄຳອະທິຖານຂອງເພິ່ນ, ພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ, ໄດ້ມາປະກົດຕໍ່ໂຈເຊັບ ແລະ ໄດ້ເລີ່ມຕົ້ນເວລາທີ່ ‘ທຸກສິ່ງຈະຖືກຕັ້ງຂຶ້ນໃໝ່’ (ກິດຈະການ 3:21) ດັ່ງທີ່ຖືກບອກໄວ້ລ່ວງໜ້າຢູ່ໃນພຣະຄຣິສຕະທຳຄຳພີ. ຢູ່ໃນພາບນິມິດນີ້, ເພິ່ນໄດ້ຮຽນຮູ້ວ່າ ຫລັງຈາກການຕາຍຂອງພວກອັກຄະສາວົກລຸ້ນດັ້ງເດີມ, ສາດສະໜາຈັກຂອງພຣະຄຣິດໃນພຣະຄຳພີໃໝ່ ໄດ້ສູນຫາຍໄປຈາກໂລກນີ້. ໂຈເຊັບຈະເປັນເຄື່ອງມືໃນການນຳສາດສະໜາຈັກກັບຄືນມາ.

“ພວກເຮົາຢືນຢັນວ່າ ພາຍໃຕ້ການຊີ້ນຳຂອງພຣະບິດາ ແລະ ພຣະບຸດ, ທູດຈາກສະຫວັນໄດ້ມາແນະນຳໂຈເຊັບ ແລະ ສະຖາປະນາສາດສະໜາຈັກຂອງພຣະເຢຊູຄຣິດຄືນໃໝ່. ໂຢຮັນບັບຕິສະໂຕທີ່ໄດ້ຟື້ນຄືນຊີວິດແລ້ວໄດ້ຟື້ນຟູສິດອຳນາດຂອງການບັບຕິສະມາໂດຍການລົງໄປໃນນ້ຳໝົດທັງຕົວເພື່ອການປົດບາບ. ສາມຄົນຂອງກຸ່ມອັກຄະສາວົກສິບສອງລຸ້ນດັ້ງເດີມ—ເປໂຕ, ຢາໂກໂບ, ແລະ ໂຢຮັນ—ໄດ້ຟື້ນຟູການເປັນອັກຄະສາວົກ ແລະ ຂໍກະແຈຂອງສິດອຳນາດຖານະປະໂລຫິດ. ຄົນອື່ນໆກໍໄດ້ມາຄືກັນ, ລວມທັງເອລີຢາ, ຜູ້ຊຶ່ງໄດ້ຟື້ນຟູສິດອຳນາດເພື່ອໃຫ້ເຕົ້າໂຮມຄອບຄົວເຂົ້າກັນຕະຫລອດໄປ ໃນຄວາມສຳພັນນິລັນດອນ ທີ່ເໜືອກວ່າຄວາມຕາຍ.

“ພວກເຮົາເປັນພະຍານອີກວ່າ ໂຈເຊັບ ສະມິດ ໄດ້ຮັບຂອງປະທານ ແລະ ອຳນາດຂອງພຣະເຈົ້າ ເພື່ອໃຫ້ແປບັນທຶກບູຮານ: ພຣະຄຳພີມໍມອນ—ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ. ຢູ່ໃນບັນທຶກທີ່ສັກສິດນີ້ ແມ່ນລວມທັງເລື່ອງລາວກ່ຽວກັບການປະຕິບັດສາດສະໜາກິດເປັນສ່ວນຕົວຂອງພຣະເຢຊູຄຣິດ ໃນບັນດາຜູ້ຄົນຢູ່ຊີກໂລກເບື້ອງຕາເວັນຕົກ ບໍ່ດົນຫລັງຈາກການຟື້ນຄືນພຣະຊົນຂອງພຣະອົງ. ມັນສິດສອນເຖິງຈຸດປະສົງຂອງຊີວິດ ແລະ ອະທິບາຍຄຳສອນຂອງພຣະຄຣິດ, ຊຶ່ງເປັນຈຸດໃຈກາງຂອງຈຸດປະສົງນັ້ນ. ໂດຍທີ່ເປັນພຣະຄຳພີຄຽງຄູ່ໄປກັບພຣະຄຣິສຕະທຳຄຳພີ, ພຣະຄຳພີມໍມອນເປັນພະຍານວ່າ ມະນຸດທຸກຄົນເປັນບຸດ ແລະ ທິດາຂອງພຣະບິດາຜູ້ສະຖິດຢູ່ໃນສະຫວັນທີ່ຊົງຮັກ, ວ່າພຣະອົງມີແຜນແຫ່ງສະຫວັນສຳລັບຊີວິດຂອງເຮົາ, ແລະ ວ່າພຣະບຸດຂອງພຣະອົງ, ພຣະເຢຊູຄຣິດ, ກ່າວໃນທຸກວັນນີ້ ເທົ່າໆກັບໃນສະໄໝກ່ອນ.

“ພວກເຮົາປະກາດວ່າ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ຊຶ່ງໄດ້ຖືກຈັດຕັ້ງຂຶ້ນໃນວັນທີ 6 ເດືອນເມສາ, 1830, ຄືສາດສະໜາຈັກຂອງພຣະຄຣິດໃນພຣະຄຳພີໃໝ່ທີ່ຖືກຟື້ນຟູ. ສາດສະໜາຈັກນີ້ຍຶດໝັ້ນຢູ່ທີ່ພຣະຊົນຊີບທີ່ດີພ້ອມຂອງຫີນເສົາເອກອັນສຳຄັນ, ພຣະເຢຊູຄຣິດ, ແລະ ໃນການຊົດໃຊ້ອັນບໍ່ມີຂອບເຂດຂອງພຣະອົງ ແລະ ໃນການຟື້ນຄືນພຣະຊົນທີ່ຈິງແທ້ຂອງພຣະອົງ. ອີກເທື່ອໜຶ່ງ ພຣະເຢຊູຄຣິດໄດ້ເອີ້ນເອົາອັກຄະສາວົກຂອງພຣະອົງ ແລະ ໄດ້ມອບສິດອຳນາດຖານະປະໂລຫິດໃຫ້ພວກເພິ່ນ. ພຣະອົງເຊື້ອເຊີນເຮົາທຸກຄົນໃຫ້ມາຫາພຣະອົງ ແລະ ມາຫາສາດສະໜາຈັກຂອງພຣະອົງ, ເພື່ອຮັບເອົາພຣະວິນຍານບໍລິສຸດ, ພິທີການແຫ່ງຄວາມລອດ, ແລະ ຄວາມສຸກທີ່ຍືນຍາວ.

“ສອງຮ້ອຍປີໄດ້ຜ່ານພົ້ນໄປນັບຕັ້ງແຕ່ພຣະເຈົ້າອົງເປັນພຣະບິດາ ແລະ ພຣະບຸດທີ່ຮັກຂອງພຣະອົງ, ພຣະເຢຊູຄຣິດ ໄດ້ເລີ່ມຕົ້ນການຟື້ນຟູນີ້. ຫລາຍລ້ານຄົນຕະຫລອດທົ່ວໂລກໄດ້ຮັບເອົາຄວາມຮູ້ເຫລົ່ານີ້ຂອງເຫດການທີ່ຖືກທຳນາຍໄວ້.

“ພວກເຮົາຍິນດີທີ່ຈະປະກາດວ່າ ການຟື້ນຟູ ທີ່ສັນຍາຍັງດຳເນີນໄປໜ້າ ຜ່ານທາງການເປີດເຜີຍອັນຕໍ່ເນື່ອງ. ແຜ່ນດິນໂລກຈະບໍ່ເໝືອນເດີມອີກ, ຂະນະທີ່ພຣະເຈົ້າ ‘ຮວບຮວມສິ່ງສາລະພັດໄວ້ໃນພຣະຄຣິດ’ (ເອເຟໂຊ 1:10).

“ດ້ວຍຄວາມຄາລະວະ ແລະ ຮູ້ບຸນຄຸນ, ພວກເຮົາໃນຖານະອັກຄະສາວົກຂອງພຣະອົງ ຂໍເຊື້ອເຊີນທຸກຄົນ ໃຫ້ຮູ້—ດັ່ງທີ່ພວກເຮົາຮູ້—ວ່າສະຫວັນເປີດຢູ່. ພວກເຮົາຢືນຢັນວ່າ ພຣະເຈົ້າໄດ້ເຮັດໃຫ້ພຣະປະສົງຂອງພຣະອົງເປັນທີ່ຮູ້ຈັກແກ່ບຸດ ແລະ ທິດາຂອງພຣະອົງ. ພວກເຮົາຢືນຢັນວ່າ ຜູ້ທີ່ສຶກສາຂ່າວສານເລື່ອງການຟື້ນຟູດ້ວຍການອະທິຖານ ແລະ ກະທຳຕາມດ້ວຍສັດທາ ຈະໄດ້ຮັບພອນ ໂດຍການເປັນພະຍານເຖິງຈຸດປະສົງອັນສູງສົ່ງຂອງມັນ ເພື່ອກະກຽມໂລກສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ທີ່ສັນຍາໄວ້.”¹⁵

ອ້າຍເອື້ອຍນ້ອງທີ່ຮັກແພງ, ນັ້ນຄືການປະກາດທີ່ສຳຄັນສອງຮ້ອຍປີຂອງພວກເຮົາຕໍ່ໂລກ ກ່ຽວກັບການຟື້ນຟູພຣະກິດຕິຄຸນຂອງພຣະເຢຊູຄຣິດ ໃນຄວາມສົມບູນຂອງມັນ. ມັນໄດ້ຖືກແປໃນ 12 ພາສາ. ບໍ່ດົນກໍຈະຖືກແປໃນພາສາອື່ນໆຕື່ມອີກ. ມັນຈະມີໃຫ້ບໍລິການທັນທີຢູ່ໃນເວບໄຊ້ຂອງສາດສະໜາຈັກ, ຊຶ່ງທ່ານສາມາດເຂົ້າເອົາໄດ້. ຈົ່ງສຶກສາມັນເປັນສ່ວນຕົວ ແລະ ກັບສະມາຊິກໃນຄອບຄົວ ແລະ ໝູ່ເພື່ອນຂອງທ່ານ. ຈົ່ງໄຕ່ຕອງກ່ຽວກັບຄວາມຈິງ ແລະ ຜົນກະທົບຂອງຄວາມຈິງເຫລົ່ານັ້ນຕໍ່ຊີວິດຂອງທ່ານຈະເປັນແນວໃດ ຖ້າຫາກທ່ານຮັບຟັງມັນ, ເຊື່ອຟັງມັນ, ແລະ ເອົາໃຈໃສ່ຕໍ່ພຣະບັນຍັດ ແລະ ພັນທະສັນຍາ ທີ່ມາກັບມັນ.

ຂ້າພະເຈົ້າຮູ້ວ່າ ໂຈເຊັບ ສະມິດ ໄດ້ຖືກແຕ່ງຕັ້ງໄວ້ລ່ວງໜ້າ ໃຫ້ເປັນສາດສະດາ ຜູ້ທີ່ພຣະຜູ້ເປັນເຈົ້າໄດ້ເລືອກໃຫ້ເປີດຍຸກສຸດທ້າຍນີ້. ຜ່ານທາງເພິ່ນ ສາດສະໜາຈັກຂອງພຣະຜູ້ເປັນເຈົ້າຈຶ່ງໄດ້ຖືກຟື້ນຟູຄືນສູ່ໂລກ. ໂຈເຊັບໄດ້ຜະນຶກປະຈັກພະຍານຂອງເພິ່ນດ້ວຍເລືອດຂອງເພິ່ນເອງ. ຂ້າພະເຈົ້າຮັກ ແລະ ໃຫ້ກຽດເພິ່ນຫລາຍທີ່ສຸດ!

ພຣະເຈົ້າຊົງພຣະຊົນຢູ່! ພຣະເຢຊູ ຄືພຣະຄຣິດ! ສາດສະໜາຈັກຂອງພຣະອົງໄດ້ຖືກຟື້ນຟູແລ້ວ! ພຣະອົງ ແລະ ພຣະບິດາຂອງພຣະອົງ, ພຣະບິດາເທິງສະຫວັນຂອງເຮົາ, ເຝົ້າດູແລເຮົາຢູ່. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.