ພະລັງຂອງພຣະຄຳພີມໍມອນໃນການປ່ຽນໃຈເຫລື້ອມໃສ

ໂດຍ ແອວເດີ ເບັນຈາມິນ ເອັມ ຊີ ທາຍ

ແຫ່ງສາວົກເຈັດສິບ

ພຣະຄຳພີມໍມອນໃຫ້ການບຳລຸງລ້ຽງທາງວິນຍານ, ໃຫ້ແຜນການປະຕິບັດ, ແລະ ເຊື່ອມໂຍງເຮົາເຂົ້າກັບພຣະວິນຍານສັກສິດ.

ຫລັງຈາກໄດ້ທົບທວນບັນທຶກຈາກການໄປກວດສຸຂະພາບ, ຂ້າພະເຈົ້າເຫັນວ່າ ຕົວເອງຕ້ອງໄດ້ທຳການປ່ຽນແປງແບບແຜນຊີວິດ. ເພື່ອຊ່ວຍຂ້າພະເຈົ້າ, ທ່ານໝໍໄດ້ສັ່ງໃຫ້ກິນອາຫານທີ່ດີຕໍ່ສຸຂະພາບ ແລະ ວາງແຜນອອກກຳລັງກາຍ, ຊຶ່ງຖ້າຫາກຂ້າພະເຈົ້າເລືອກເຮັດຕາມນັ້ນ, ມັນຈະປ່ຽນແປງຂ້າພະເຈົ້າໃຫ້ມີສຸຂະພາບດີຂຶ້ນກວ່າເກົ່າ.

ຖ້າຫາກເຮົາແຕ່ລະຄົນກວດເບິ່ງສຸຂະພາບທາງວິນຍານ, ເຮົາຈະຮຽນຮູ້ຫຍັງແດ່ກ່ຽວກັບຕົວເຮົາເອງ? ການປ່ຽນແປງຢ່າງໃດແດ່ທີ່ທ່ານໝໍທາງວິນຍານຈະສັ່ງໃຫ້ເຮົາເຮັດ? ເພື່ອເຮົາຈະໄດ້ກາຍເປັນຜູ້ທີ່ເຮົາຄວນເປັນ, ມັນສຳຄັນທີ່ເຮົາຮູ້ສິ່ງທີ່ຈະເຮັດ ແລະ ເຮັດສິ່ງທີ່ເຮົາຮູ້.

ພຣະເຢຊູຄຣິດຄືທ່ານໝໍໃຫຍ່.¹ ຜ່ານທາງການຊົດໃຊ້ຂອງພຣະອົງ, ພຣະອົງໄດ້ພັນແຜໃຫ້ເຮົາ, ຮັບເອົາຄວາມອ່ອນແອຂອງເຮົາ, ແລະ ປິ່ນປົວໃຈທີ່ເຈັບປວດຂອງເຮົາ.² ຜ່ານທາງພຣະຄຸນຂອງພຣະອົງ, ຄວາມອ່ອນແອຂອງເຮົາສາມາດເຂັ້ມແຂງຂຶ້ນໄດ້.³ ພຣະອົງເຊື້ອເຊີນເຮົາໃຫ້ຕິດຕາມພຣະອົງ⁴ ໂດຍການຮຽນຮູ້ຈາກພຣະອົງ, ຮັບຟັງພຣະຄຳຂອງພຣະອົງ, ແລະ ເດີນໄປໃນຄວາມອ່ອນໂຍນແຫ່ງພຣະວິນຍານຂອງພຣະອົງ.⁵ ພຣະອົງໄດ້ສັນຍາທີ່ຈະຊ່ວຍເຮົາ⁶ ໃນຂັ້ນຕອນການປ່ຽນໃຈເຫລື້ອມໃສຕະຫລອດຊີວິດນີ້, ຊຶ່ງປ່ຽນແປງເຮົາ ແລະ ນຳຄວາມສຸກອັນເປັນນິດມາໃຫ້ເຮົາ.⁷

ພຣະຜູ້ຊ່ວຍໃຫ້ລອດໄດ້ມອບພຣະຄຳພີມໍມອນໃຫ້ເຮົາ ເປັນເຄື່ອງມືທີ່ມີພະລັງໃນການຊ່ວຍໃຫ້ປ່ຽນໃຈເຫລື້ອມໃສ. ພຣະຄຳພີມໍມອນໃຫ້ການບຳລຸງລ້ຽງທາງວິນຍານ, ໃຫ້ແຜນການປະຕິບັດ, ແລະ ເຊື່ອມໂຍງເຮົາເຂົ້າກັບພຣະວິນຍານສັກສິດ. ໂດຍທີ່ຖືກຂຽນຂຶ້ນເພື່ອເຮົາ,⁸ ມັນບັນຈຸພຣະຄຳຂອງພຣະເຈົ້າໃນຄວາມແຈ່ມແຈ້ງ⁹ ແລະ ບອກເຮົາເຖິງເອກະລັກ, ຈຸດປະສົງ, ແລະ ຈຸດໝາຍປາຍທາງຂອງເຮົາ.¹⁰ ພ້ອມດ້ວຍພຣະຄຣິສຕະທຳຄຳພີ, ພຣະຄຳພີມໍມອນ ເປັນພະຍານເຖິງພຣະເຢຊູຄຣິດ¹¹ ແລະ ສິດສອນວິທີທີ່ເຮົາສາມາດຮູ້ຈັກຄວາມຈິງ ແລະ ກາຍເປັນເໝືອນດັ່ງພຣະອົງ.

ບຣາເດີ ຊໍ ໂປໂລ ມີອາຍຸໄດ້ 58 ປີ ຕອນເພິ່ນຖືກແນະນຳໃຫ້ຮູ້ຈັກພຣະກິດຕິຄຸນທີ່ຟື້ນຟູຂອງພຣະເຢຊູຄຣິດ. ຕອນຂ້າພະເຈົ້າພົບເຫັນເພິ່ນ, ເພິ່ນໄດ້ຮັບໃຊ້ເປັນປະທານສາຂາໄດ້ຫລາຍປີແລ້ວ, ແຕ່ຂ້າພະເຈົ້າໄດ້ຍິນວ່າ ເພິ່ນບໍ່ເຄີຍອ່ານພຣະຄຳພີມໍມອນຈັກເທື່ອ ເພາະວ່າມັນຍັງບໍ່ທັນຖືກແປໃນພາສາພະມ້າຂອງເພິ່ນເທື່ອ. ເມື່ອຂ້າພະເຈົ້າຖາມເພິ່ນວ່າ ເພິ່ນຮູ້ໄດ້ແນວໃດ ວ່າພຣະຄຳພີມໍມອນຈິງແທ້ ໂດຍທີ່ຍັງບໍ່ໄດ້ອ່ານມັນເທື່ອ, ເພິ່ນຕອບວ່າ ເພິ່ນໄດ້ສຶກສາປຶ້ມຮູບ ເລື່ອງພຣະຄຳພີມໍມອນ ທຸກມື້ ໂດຍການເບິ່ງຮູບພາບສະແດງ, ໂດຍການໃຊ້ປຶ້ມວັດຈະນະນຸກົມແປພາສາອັງກິດ, ແລະ ຈົດສິ່ງທີ່ເພິ່ນຮຽນຮູ້ລົງໄວ້. ເພິ່ນໄດ້ອະທິບາຍວ່າ, “ທຸກເທື່ອທີ່ຂ້ອຍສຶກສາ, ຂ້ອຍໄດ້ອະທິຖານກ່ຽວກັບສິ່ງທີ່ຂ້ອຍຮຽນຮູ້, ແລະ ຂ້ອຍຮູ້ສຶກສະຫງົບ ແລະ ມີຄວາມສຸກ, ຄວາມຄິດແຈ່ມໃສ, ແລະ ໃຈຂອງຂ້ອຍອ່ອນລົງ. ຂ້ອຍຮູ້ສຶກວ່າພຣະວິນຍານບໍລິສຸດເປັນພະຍານຕໍ່ຂ້ອຍວ່າ ມັນຈິງແທ້. ຂ້ອຍຮູ້ວ່າ ພຣະຄຳພີມໍມອນເປັນພຣະຄຳຂອງພຣະເຈົ້າ.”

ຄືກັນກັບ ບຣາເດີ ຊໍ ໂປໂລ, ເຮົາແຕ່ຄົນສາມາດສຶກສາພຣະຄຳພີມໍມອນ ອີງຕາມສະຖານະການຂອງເຮົາ. ເມື່ອເຮົາປາດຖະໜາທີ່ຈະເຊື່ອ ແລະ ໄຕ່ຕອງ ຄຳສອນຂອງມັນຢູ່ໃນໃຈ, ແລ້ວເຮົາສາມາດທູນຖາມພຣະເຈົ້າ ໃນສັດທາຖ້າຫາກຄຳສອນເປັນຄວາມຈິງຫລືບໍ່.¹² ຖ້າຫາກເຮົາຈິງໃຈໃນຄວາມປາດຖະໜາຂອງເຮົາ ທີ່ຈະຮູ້ຈັກ ແລະ ກະທຳດ້ວຍເຈດຕະນາອັນແທ້ຈິງ, ແລ້ວພຣະອົງຈະຕອບເຮົາໃນໃຈຜ່ານທາງພຣະວິນຍານບໍລິສຸດ. ແມ່ນໂດຍອຳນາດຂອງພຣະວິນຍານບໍລິສຸດ ທີ່ເຮົາຈະຮູ້ຈັກຄວາມຈິງຂອງທຸກເລື່ອງ.¹³ ເມື່ອເຮົາໄດ້ຮັບພະຍານຈາກສະຫວັນເຖິງພຣະຄຳພີມໍມອນ, ເຮົາຈະຮູ້ອີກໂດຍອຳນາດດຽວກັນນັ້ນວ່າ ພຣະເຢຊູຄຣິດຄືພຣະຜູ້ຊ່ວຍໃຫ້ລອດຂອງໂລກ, ວ່າໂຈເຊັບ ສະມິດ ເປັນສາດສະດາຂອງພຣະອົງ, ແລະ ວ່າສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເປັນສາດສະໜາຈັກທີ່ຟື້ນຟູຂອງພຣະອົງ.¹⁴

ຄາວຍັງໜຸ່ມ ຕອນເລີ່ມຕົ້ນການຮັບໃຊ້ເຜີຍແຜ່ຂອງຂ້າພະເຈົ້າ, ຂ້າພະເຈົ້າໄດ້ຂຶ້ນຍົນມຸ້ງໜ້າໄປຫາປະເທດອົດສະຕາລີ. ໂດຍທີ່ຮູ້ສຶກໂດດດ່ຽວ, ກັງວົນ, ແລະ ບໍ່ພຽບພ້ອມ ແຕ່ໄດ້ສັນຍາທີ່ຈະຮັບໃຊ້, ຂ້າພະເຈົ້າຕ້ອງການຄວາມໝັ້ນໃຈຫລາຍທີ່ສຸດ ກ່ຽວກັບວ່າສິ່ງທີ່ຂ້າພະເຈົ້າເຊື່ອຖືເປັນຄວາມຈິງຫລືບໍ່. ຂ້າພະເຈົ້າໄດ້ອະທິຖານ ແລະ ອ່ານພຣະຄຳພີຢ່າງພາກພຽນ, ແຕ່ເມື່ອໃກ້ຊິຮອດຫລາຍເທົ່າໃດ ຂ້າພະເຈົ້າຍິ່ງຮູ້ສຶກສົງໃສຫລາຍກວ່າເກົ່າ ແລະ ສະພາບທາງຮ່າງກາຍເລີ່ມອ່ອນແອລົງ. ຫລັງຈາກທີ່ຂ້າພະເຈົ້າໄດ້ດີ້ນລົນເປັນເວລາຫລາຍຊົ່ວໂມງ, ພະນັກງານໄດ້ຍ່າງມາ ແລະ ຢຸດຢູ່ຂ້າງຕັ່ງຂອງຂ້າພະເຈົ້າ. ລາວໄດ້ຈັບເອົາພຣະຄຳພີມໍມອນ ທີ່ຂ້າພະເຈົ້າກຳລັງອ່ານຢູ່ ຈາກມືຂອງຂ້າພະເຈົ້າ. ລາວໄດ້ຫລຽວເບິ່ງໜ້າປົກ ແລະ ເວົ້າວ່າ, “ປຶ້ມນີ້ດີຫລາຍ!” ແລ້ວໄດ້ສົ່ງມັນຄືນໃຫ້ຂ້າພະເຈົ້າ ແລະ ຍ່າງໄປຕໍ່. ຂ້າພະເຈົ້າບໍ່ເຄີຍເຫັນລາວອີກ.

ຂະນະທີ່ຖ້ອຍຄຳຂອງລາວດັງກ້ອງຢູ່ໃນຫູຂອງຂ້າພະເຈົ້າ, ຂ້າພະເຈົ້າໄດ້ຍິນສຽງຢ່າງແຈ່ມແຈ້ງ ແລະ ຮູ້ສຶກມັນຢູ່ໃນໃຈວ່າ, “ເຮົາຢູ່ນີ້, ແລະ ເຮົາຮູ້ວ່າເຈົ້າຢູ່ໃສ. ຈົ່ງເຮັດຈົນສຸດຄວາມສາມາດຂອງເຈົ້າ, ສ່ວນທີ່ເຫລືອຢູ່ນັ້ນ ເຮົາຈະເຮັດເອງ.” ໃນຍົນລຳນັ້ນ ທີ່ບິນຢູ່ເທິງມະຫາສະໝຸດປາຊີຟິກ, ຂ້າພະເຈົ້າໄດ້ຮັບການເປັນພະຍານສ່ວນຕົວ ຜ່ານທາງການສຶກສາພຣະຄຳພີມໍມອນ ແລະ ການກະຕຸ້ນຂອງພຣະວິນຍານບໍລິສຸດ ວ່າພຣະຜູ້ຊ່ວຍໃຫ້ລອດຂອງຂ້າພະເຈົ້າຮູ້ວ່າ ຂ້າພະເຈົ້າເປັນໃຜ ແລະ ວ່າພຣະກິດຕິຄຸນເປັນຄວາມຈິງ.

ແອວເດີ ເດວິດ ເອ ແບ໊ດນາ ໄດ້ສິດສອນວ່າ: “ການຮູ້ວ່າພຣະກິດຕິຄຸນເປັນຄວາມຈິງ ເປັນສິ່ງສຳຄັນຕໍ່ປະຈັກພະຍານ. ຄວາມຈິງໃຈຕໍ່ພຣະກິດຕິຄຸນຢ່າງສະໝ່ຳສະເໝີ ເປັນສິ່ງສຳຄັນຕໍ່ການປ່ຽນໃຈເຫລື້ອມໃສ.”¹⁵ ການປ່ຽນໃຈເຫລື້ອມໃສຮຽກຮ້ອງເຮົາໃຫ້ “ບໍ່ພຽງແຕ່ຟັງເທົ່ານັ້ນ, ແຕ່ຈົ່ງປະຕິບັດຕາມ.”¹⁶ ແຜນການປະຕິບັດຂອງພຣະຜູ້ເປັນເຈົ້າສຳລັບເຮົາ—ຄຳສອນຂອງພຣະຄຣິດ—ຖືກສິດສອນຢ່າງແຈ່ມແຈ້ງທີ່ສຸດຢູ່ໃນພຣະຄຳພີມໍມອນ.¹⁷ ມັນລວມທັງ:

ໜຶ່ງ, ການໃຊ້ ສັດທາໃນພຣະເຢຊູຄຣິດໂດຍ ການໄວ້ວາງໃຈ ໃນພຣະອົງ, ການຮັກສາ ພຣະບັນຍັດຂອງພຣະອົງ, ແລະ ການຮູ້ ວ່າພຣະອົງຈະຊ່ວຍເຫລືອເຮົາ.¹⁸
ສອງ, ການກັບໃຈ ທຸກວັນຈາກຄວາມຂາດຕົກບົກພ່ອງຂອງເຮົາ ແລະ ປະສົບ ກັບຄວາມສຸກ ແລະ ຄວາມສະຫງົບເມື່ອພຣະອົງໃຫ້ອະໄພແກ່ເຮົາ.¹⁹ ການກັບໃຈຮຽກຮ້ອງເຮົາ ໃຫ້ອະໄພ ແກ່ຄົນອື່ນ²⁰ ແລະ ຊ່ວຍເຮົາໃຫ້ກ້າວໄປໜ້າ. ພຣະຜູ້ຊ່ວຍໃຫ້ລອດໄດ້ສັນຍາທີ່ຈະໃຫ້ອະໄພແກ່ເຮົາເລື້ອຍໆເທົ່າທີ່ເຮົາກັບໃຈ.²¹
ສາມ, ການເຮັດ ແລະ ການຮັກສາ ພັນທະສັນຍາກັບພຣະເຈົ້າຜ່ານທາງພິທີການເຊັ່ນການບັບຕິສະມາ. ສິ່ງນີ້ຈະຊ່ວຍເຮົາຢູ່ໃນເສັ້ນທາງແຫ່ງພັນທະສັນຍາ ທີ່ພາໄປຫາພຣະອົງ.²²
ສີ່, ການຮັບເອົາ ຂອງປະທານແຫ່ງພຣະວິນຍານບໍລິສຸດ. ຂອງປະທານນີ້ຊ່ວຍເຮົາໃຫ້ມີເພື່ອນໃກ້ຊິດ ຜູ້ທີ່ຊຳລະລ້າງ, ປອບໂຍນ, ແລະ ນຳພາເຮົາ.²³
ຫ້າ, ການອົດທົນ ຈົນເຖິງທີ່ສຸດ ໂດຍ ການດຳເນີນໄປໜ້າ ດ້ວຍຄວາມໝັ້ນຄົງ ຂະນະທີ່ ຊື່ນຊົມ ຢູ່ດ້ວຍພຣະຄຳຂອງພຣະຄຣິດໃນແຕ່ລະວັນ.²⁴ ໂດຍການຊື່ນຊົມຢູ່ດ້ວຍພຣະຄຳພີມໍມອນ ແລະ ຍຶດໝັ້ນຢູ່ໃນຄຳສອນຂອງມັນ, ເຮົາສາມາດເອົາຊະນະການລໍ້ລວງ ແລະ ຮັບເອົາການນຳພາ ແລະ ການປົກປ້ອງຕະຫລອດຊີວິດຂອງເຮົາ.²⁵

ໂດຍການນຳໃຊ້ຄຳສອນຂອງພຣະຄຣິດໃນຊີວິດຂອງເຮົາຢ່າງສະໝ່ຳສະເໝີ, ເຮົາຈະເອົາຊະນະຄວາມໂນ້ມອຽງທີ່ກີດກັນຄວາມກ້າວໜ້າຂອງເຮົາ. ເຮົາຈະໄດ້ຮັບການເປີດເຜີຍສ່ວນຕົວ, ເພາະພຣະວິນຍານບໍລິສຸດ “ຈະ ສະແດງ ທຸກຢ່າງທີ່ພວກທ່ານຄວນເຮັດໃຫ້ແກ່ພວກທ່ານ,”²⁶ ແລະ “ພຣະຄຳຂອງພຣະຄຣິດ ບອກ ພວກທ່ານທຸກຢ່າງທີ່ພວກທ່ານຄວນເຮັດ.”²⁷

ເປັນເວລາ 20 ປີ, ບຣາເດີ ຮວງ ຈຸນຄົງ ໄດ້ດີ້ນລົນກັບການຕິດເຫລົ້າ, ຢາສູບ, ແລະ ການພະນັນ. ເມື່ອຖືກແນະນຳໃຫ້ຮູ້ຈັກພຣະເຢຊູຄຣິດ ແລະ ພຣະກິດຕິຄຸນທີ່ຟື້ນຟູຂອງພຣະອົງ, ບຣາເດີ ຮວງ ໄດ້ປາດຖະໜາທີ່ຈະປ່ຽນແປງ ເພື່ອຄອບຄົວນ້ອຍຂອງລາວ. ການທ້າທາຍອັນໜັກໜ່ວງທີ່ສຸດແມ່ນການສູບຢາ. ໂດຍທີ່ສູບຢາກອກຕໍ່ກອກ, ລາວໄດ້ພະຍາຍາມເຊົາຫລາຍເທື່ອແລ້ວ ແຕ່ກໍບໍ່ສຳເລັດ. ມື້ໜຶ່ງ ຖ້ອຍຄຳເຫລົ່ານີ້ຢູ່ໃນພຣະຄຳພີມໍມອນ ໄດ້ເຂົ້າສູ່ຈິດໃຈຂອງລາວ: “ດ້ວຍໃຈຈິງ, ດ້ວຍເຈດຕະນາອັນແທ້ຈິງ.”²⁸ ເຖິງແມ່ນວ່າ ແຕ່ກ່ອນລາວເຮັດບໍ່ສຳເລັດ, ລາວຮູ້ສຶກວ່າ ລາວສາມາດປ່ຽນແປງໄດ້ດ້ວຍຄວາມຊ່ວຍເຫລືອຂອງພຣະບິດາເທິງສະຫວັນ ແລະ ພຣະເຢຊູຄຣິດ.

ຜູ້ສອນສາດສະໜາເຕັມເວລາໄດ້ລວມສັດທາເຂົ້າກັບລາວ ແລະ ໄດ້ວາງແຜນການປະຕິບັດເພື່ອແຊກແຊງ, ພ້ອມດ້ວຍການອະທິຖານຢ່າງພາກພຽນ ແລະ ການສຶກສາພຣະຄຳຂອງພຣະເຈົ້າ. ດ້ວຍໃຈຈິງ ແລະ ດ້ວຍເຈດຕະນາອັນແທ້ຈິງ, ບຣາເດີ ຮວງ ໄດ້ປະຕິບັດດ້ວຍຄວາມຕັ້ງໃຈທີ່ຊື່ສັດ ແລະ ພົບເຫັນວ່າ ຂະນະທີ່ລາວເອົາໃຈໃສ່ຕໍ່ນິໄສໃໝ່ທີ່ລາວຢາກພັດທະນາ, ດັ່ງເຊັ່ນການສຶກສາພຣະຄຳພີມໍມອນ, ລາວເລີຍບໍ່ໄດ້ເອົາໃຈໃສ່ຕໍ່ນິໄສທີ່ລາວຢາກປະຖິ້ມ.

ເມື່ອຫວນຄິດກ່ຽວກັບປະສົບການຈາກ 15 ປີກ່ອນຂອງລາວ, ລາວເວົ້າວ່າ, “ຂ້ອຍຈື່ບໍ່ໄດ້ວ່າ ຂ້ອຍເຊົາສູບຢາຕອນໃດ, ແຕ່ເມື່ອຂ້ອຍພະຍາຍາມຫລາຍທີ່ສຸດໃນແຕ່ລະວັນ ເພື່ອເຮັດສິ່ງທີ່ຂ້ອຍຮູ້ວ່າຂ້ອຍຕ້ອງເຮັດ ໃນການເຊື້ອເຊີນໃຫ້ພຣະວິນຍານຂອງພຣະຜູ້ເປັນເຈົ້າເຂົ້າມາສູ່ຊີວິດຂອງຂ້ອຍ ແລະ ໄດ້ເຮັດມັນຕໍ່ໄປ, ຂ້ອຍເລີຍບໍ່ຄິດຢາກສູບຢາ ແລະ ກໍໄດ້ເຊົາສູບແຕ່ນັ້ນມາ.” ຜ່ານທາງການໃຊ້ຄຳສອນຂອງພຣະຄຳພີມໍມອນ, ຊີວິດຂອງບຣາເດີ ຮວງ ໄດ້ປ່ຽນແປງ, ແລະ ລາວໄດ້ກາຍເປັນສາມີ ແລະ ເປັນພໍ່ທີ່ດີກວ່າເກົ່າ.

ປະທານ ຣະໂຊ ເອັມ ແນວສັນ ໄດ້ສັນຍາວ່າ: “ເມື່ອທ່ານສຶກສາພຣະຄຳພີມໍມອນດ້ວຍການອະທິຖານ ທຸກວັນ, ທ່ານຈະສາມາດຕັດສິນໃຈໄດ້ດີກວ່າເກົ່າ—ໃນທຸກວັນ. ຂ້າພະເຈົ້າສັນຍາວ່າ ເມື່ອທ່ານໄຕ່ຕອງສິ່ງທີ່ທ່ານສຶກສາ, ປະຕູສະຫວັນຈະເປີດອອກ, ແລະ ທ່ານຈະໄດ້ຮັບຄຳຕອບໃຫ້ແກ່ຄຳຖາມຂອງທ່ານ ແລະ ໄດ້ຮັບການຊີ້ນຳສຳລັບຊີວິດຂອງທ່ານເອງ. ຂ້າພະເຈົ້າສັນຍາວ່າ ເມື່ອທ່ານສຶກສາພຣະຄຳພີມໍມອນທຸກວັນ, ທ່ານຈະມີພູມຕ້ານທານສິ່ງຊົ່ວຮ້າຍທຸກວັນ, ໂຣກລະບາດຂອງຮູບພາບລາມົກ ແລະ ການຕິດແສດທາງຈິດໃຈອື່ນໆ.”²⁹

ເພື່ອນທີ່ຮັກແພງ, ພຣະຄຳພີມໍມອນເປັນພຣະຄຳຂອງພຣະເຈົ້າ, ແລະ ເຮົາຈະເຂົ້າໃກ້ພຣະອົງຫລາຍຂຶ້ນ ຖ້າຫາກເຮົາສຶກສາມັນ.³⁰ ເມື່ອເຮົາທົດສອບຖ້ອຍຄຳຂອງມັນ, ເຮົາຈະໄດ້ຮັບພະຍານເຖິງຄວາມຈິງແທ້ຂອງມັນ.³¹ ຂະນະທີ່ເຮົາດຳລົງຊີວິດຕາມຄຳສອນຂອງມັນຢ່າງສະໝ່ຳສະເໝີ, ເຮົາຈະ “ບໍ່ປາດຖະໜາຈະເຮັດຄວາມຊົ່ວອີກຕໍ່ໄປ.”³² ໃຈ, ໃບໜ້າ, ແລະ ທຳມະຊາດຂອງເຮົາຈະປ່ຽນແປງ ເພື່ອກາຍເປັນເໝືອນດັ່ງພຣະຜູ້ຊ່ວຍໃຫ້ລອດຫລາຍກວ່າເກົ່າ.³³ ຂ້າພະເຈົ້າຂໍເປັນພະຍານວ່າ ພຣະເຢຊູຄື ພຣະຄຣິດ, ພຣະຜູ້ຊ່ວຍໃຫ້ລອດ, ພຣະຜູ້ໄຖ່, ແລະ ເພື່ອນຂອງເຮົາ. ໃນພຣະນາມຂອງພຣະເຢຊູຄຣິດ, ອາແມນ.