ພະຍານທີ່ມີຊີວິດຢູ່ເຖິງພຣະຄຣິດທີ່ຊົງພຣະຊົນ

ໂດຍ ອະທິການ ແຈໂຣ ໂຄເຊ

ອະທິການຄວບຄຸມ

ຂ່າວສານທີ່ສຳຄັນຂອງພຣະຄຳພີມໍມອນແມ່ນເພື່ອຟື້ນຟູຄວາມຮູ້ທີ່ແທ້ຈິງຂອງບົດບາດທີ່ສຳຄັນຂອງພຣະເຢຊູຄຣິດ ໃນຄວາມລອດ ແລະ ຄວາມສູງສົ່ງຂອງມວນມະນຸດ.

ໃນມື້ທີ່ແຈ່ມໃສ ໃນລະດູໃບໄມ້ປົ່ງ ຂອງປີ 2017, ໃນວັນເປີດພຣະວິຫານປາຣີ ຝະຣັ່ງ ໃຫ້ຜູ້ຄົນເຂົ້າຊົມ, ທຸກສິ່ງກໍດຳເນີນການໄປດ້ວຍດີ ເມື່ອມີຊາຍຄົນໜຶ່ງໄດ້ຍ່າງມາຫາຜູ້ພາທ່ຽວເລາະຊົມ ດ້ວຍໃບໜ້າທີ່ໂສກເສົ້າ. ລາວເວົ້າວ່າ ເຮືອນລາວຢູ່ຂ້າງພຣະວິຫານ ແລະ ກໍຍອມຮັບວ່າລາວເປັນຜູ້ໜຶ່ງທີ່ຄັດຄ້ານການກໍ່ສ້າງ. ລາວບອກວ່າ ມື້ໜຶ່ງຕອນລາວຫລຽວເບິ່ງຈາກປ່ອງຢ້ຽມ, ລາວໄດ້ເຫັນລົດຍົກກຳລັງຢ່ອນຮູບປັ້ນພຣະເຢຊູລົງມາ ວາງໄວ້ຢູ່ເດີ່ນພຣະວິຫານ. ຊາຍຄົນນັ້ນໄດ້ເວົ້າວ່າ ປະສົບການນັ້ນໄດ້ປ່ຽນແປງຄວາມຮູ້ສຶກຂອງລາວຕໍ່ສາດສະໜາຈັກ. ລາວຮັບຮູ້ວ່າ ພວກເຮົາຕິດຕາມພຣະເຢຊູຄຣິດ ແລະ ໄດ້ຂໍໂທດສຳລັບສິ່ງທີ່ລາວໄດ້ເຮັດຜິດ.

ຮູບປັ້ນໄດ້ຖືກຕັ້ງໄວ້ຢູ່ທີ່ພຣະວິຫານປາຣີ ຝະຣັ່ງ

ຮູບປັ້ນ ພຣະຄຣິດ, ຊຶ່ງປະດັບບໍລິເວນພຣະວິຫານປາຣີ ແລະ ສະຖານທີ່ອື່ນໆຂອງສາດສະໜາຈັກ, ເປັນພະຍານເຖິງຄວາມຮັກຂອງເຮົາຕໍ່ພຣະຜູ້ຊ່ວຍໃຫ້ລອດ. ຮູບປັ້ນດັ້ງເດີມທີ່ເຮັດດ້ວຍຫີນອ່ອນ ເປັນວຽກງານຂອງນັກສິລະປະຊາວເດັນມາກ ຊື່ ແບຣຸນ ທໍວາວເຊັນ, ຜູ້ໄດ້ຄວັດສະຫລັກໃນປີ 1820—ຊຶ່ງເປັນປີດຽວກັນກັບ ພາບທີ່ມາໃຫ້ເຫັນຄັ້ງທຳອິດ. ຮູບປັ້ນຢືນຢູ່ຢ່າງສະຫງ່າ ແຕກຕ່າງຈາກຮູບປັ້ນອື່ນໆທີ່ນັກສິລະປະໄດ້ສ້າງຂຶ້ນໃນສະໄໝນັ້ນ, ຊຶ່ງສ່ວນຫລາຍຈະເປັນຮູບພຣະຄຣິດຮັບທຸກທໍລະມານຢູ່ເທິງໄມ້ກາງແຂນ. ວຽກງານຂອງທ່ານທໍວາວເຊັນ ເປັນຕົວແທນໃຫ້ແກ່ພຣະຄຣິດທີ່ຊົງພຣະຊົນ, ຜູ້ໄດ້ເອົາຊະນະຄວາມຕາຍ ແລະ, ດ້ວຍການວາພຣະພາຫາ, ໄດ້ເຊື້ອເຊີນທຸກຄົນໃຫ້ມາຫາພຣະອົງ. ພຽງແຕ່ຮອຍຕະປູຢູ່ໃນພຣະຫັດ ແລະ ພຣະບາດ ແລະ ຢູ່ຂ້າງຂອງພຣະອົງ ເປັນພະຍານເຖິງຄວາມທຸກທໍລະມານທີ່ເກີນກວ່າຈະບັນລະຍາຍໄດ້ ທີ່ພຣະອົງໄດ້ອົດທົນ ເພື່ອຊ່ວຍມວນມະນຸດໃຫ້ລອດ.

ພຣະຫັດຂອງພຣະຜູ້ຊ່ວຍໃຫ້ລອດດັ່ງທີ່ສະແດງຢູ່ໃນຮູບປັ້ນພຣະຄຣິດ

ບາງທີເຫດຜົນໜຶ່ງທີ່ເຮົາຜູ້ເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ມັກຮູບປັ້ນນີ້ ກໍເພາະວ່າມັນເຕືອນເຮົາເຖິງຄຳບັນຍາຍທີ່ພຣະຄຳພີມໍມອນໄດ້ກ່າວກ່ຽວກັບລັກສະນະຂອງພຣະອົງ ຕອນພຣະອົງມາປະກົດຢູ່ທະວີບອາເມຣິກາ:

“ແລະ ຈົ່ງເບິ່ງ, ພວກເຂົາໄດ້ເຫັນຊາຍຄົນໜຶ່ງລົງມາຈາກສະຫວັນ; ແລະ ພຣະອົງໄດ້ສວມເສື້ອຄຸມສີຂາວ; ແລະ ພຣະອົງໄດ້ລົງມາຢືນຢູ່ທ່າມກາງພວກເຂົາ. …

“ແລະ ເຫດການໄດ້ບັງເກີດຂຶ້ນຄື ພຣະອົງໄດ້ເດ່ພຣະຫັດອອກໄປ ແລະ ເວົ້າກັບຜູ້ຄົນ, ມີຄວາມວ່າ:

“ເຮົາຄື ພຣະເຢຊູຄຣິດ, …

“… ເຮົາໄດ້ດື່ມຈາກ ຈອກອັນຂົມຂື່ນ ຊຶ່ງພຣະບິດາໄດ້ປະທານໃຫ້ເຮົາແລ້ວ, ແລະ ຖວາຍບາລະມີພຣະບິດາໂດຍຮັບເອົາບາບຂອງໂລກມາໄວ້ກັບເຮົາ.”¹

ແລ້ວພຣະອົງໄດ້ເຊື້ອເຊີນຊາຍ, ຍິງ, ແລະ ເດັກນ້ອຍທຸກຄົນໃຫ້ອອກມາ ແລະ ສຳພັດຮອຍແຜຢູ່ໃນຂ້າງ ແລະ ຢູ່ທີ່ພຣະຫັດ ແລະ ພຣະບາດຂອງພຣະອົງ, ເພື່ອວ່າຈະໄດ້ເປັນພະຍານດ້ວຍຕົວເອງວ່າ ພຣະອົງຄືພຣະເມຊີອາທີ່ພວກເຂົາໄດ້ລໍຄອຍເປັນເວລາດົນນານ.²

ພາບທີ່ໜ້າປະທັບໃຈນີ້ ເປັນຈຸດເດັ່ນຂອງພຣະຄຳພີມໍມອນ. “ຂ່າວປະເສີດ” ທັງໝົດຂອງພຣະກິດຕິຄຸນ ບັນຈຸຢູ່ໃນຮູບປັ້ນນີ້ຂອງພຣະຜູ້ຊ່ວຍໃຫ້ລອດ ຊຶ່ງພຣະອົງເດ່ “ພຣະພາຫາແຫ່ງຄວາມເມດຕາ” ຂອງພຣະອົງອອກມາ³ ເພື່ອເຊື້ອເຊີນເຮົາແຕ່ລະຄົນໃຫ້ມາຫາພຣະອົງ ແລະ ຮັບເອົາພອນຂອງການຊົດໃຊ້ຂອງພຣະອົງ.

ຂ່າວສານທີ່ສຳຄັນຂອງພຣະຄຳພີມໍມອນແມ່ນເພື່ອຟື້ນຟູຄວາມຮູ້ທີ່ແທ້ຈິງຂອງບົດບາດທີ່ສຳຄັນຂອງພຣະເຢຊູຄຣິດ ໃນຄວາມລອດ ແລະ ຄວາມສູງສົ່ງຂອງມວນມະນຸດ. ຫົວຂໍ້ນີ້ດັງລັ່ນຈາກໜ້າຄຳນຳ ເຖິງຄຳສຸດທ້າຍຂອງບົດສຸດທ້າຍ. ຕະຫລອດທົ່ວສັດຕະວັດຂອງການປະຖິ້ມຄວາມເຊື່ອ ແລະ ຄວາມສັບສົນທາງວິນຍານ, ຄວາມໝາຍເລິກເຖິງສິ່ງທີ່ພຣະຄຣິດໄດ້ກະທຳຢູ່ໃນເຄັດເຊມາເນ ແລະ ຢູ່ເທິງພູຫົວກະໂຫລກ ໄດ້ສູນເສຍໄປ ຫລື ເສື່ອມໂຊມລົງ. ໂຈເຊັບ ສະມິດ ຄົງຕື່ນເຕັ້ນຫລາຍຂະໜາດໃດ ເມື່ອ, ຂະນະທີ່ເພິ່ນແປ 1 ນີໄຟ, ເພິ່ນໄດ້ພົບເຫັນຄຳສັນຍາທີ່ໜ້າອັດສະຈັນໃຈນີ້ ທີ່ວ່າ: “ບັນທຶກສະບັບຫລັງ [ພຣະຄຳພີມໍມອນ] … ຈະສະຖາປະນາຄວາມຈິງຂອງສະບັບທຳອິດ [ພຣະຄຣິສຕະທຳຄຳພີ] … ຈະເຮັດໃຫ້ຮູ້ສິ່ງທີ່ແຈ່ມແຈ້ງ ແລະ ມີຄ່າ ຊຶ່ງຖືກເອົາໄປຈາກໜັງສືເຫລົ່ານີ້, ແລະ ຈະເຮັດໃຫ້ຮູ້ກັນໃນທຸກຕະກຸນ, ທຸກພາສາ, ແລະ ທຸກຜູ້ຄົນທັງປວງ, ວ່າພຣະເມສານ້ອຍຂອງພຣະເຈົ້າຄືພຣະບຸດຂອງພຣະບິດາຜູ້ສະຖິດນິລັນດອນ, ແລະ ພຣະຜູ້ຊ່ວຍໃຫ້ລອດຂອງໂລກ, ແລະ ວ່າຄົນທັງປວງຕ້ອງມາຫາພຣະອົງຖ້າບໍ່ດັ່ງນັ້ນເຂົາຈະລອດບໍ່ໄດ້.”⁴

ຄວາມຈິງທີ່ລຽບງ່າຍ ແລະ ປະເສີດກ່ຽວກັບການຊົດໃຊ້ຂອງພຣະຜູ້ຊ່ວຍໃຫ້ລອດດັງລັ່ນຕະຫລອດທົ່ວພຣະຄຳພີມໍມອນ. ຂະນະທີ່ຂ້າພະເຈົ້າກ່າວຄວາມຈິງຫລາຍຢ່າງດັ່ງຕໍ່ໄປນີ້, ຂ້າພະເຈົ້າຂໍເຊື້ອເຊີນທ່ານໃຫ້ສະທ້ອນຄິດເຖິງວິທີທີ່ຄວາມຈິງເຫລົ່ານີ້ໄດ້ປ່ຽນແປງ ຫລື ສາມາດປ່ຽນແປງຊີວິດຂອງທ່ານແນວໃດ.

ການຊົດໃຊ້ຂອງພຣະເຢຊູຄຣິດ ເປັນຂອງປະທານທີ່ສະເໜີມອບໃຫ້ແກ່ ທຸກຄົນ ຜູ້ທີ່ ເຄີຍ ມີຊີວິດຢູ່, ຜູ້ທີ່ມີຊີວິດຢູ່ ໃນປະຈຸບັນ, ແລະ ຜູ້ທີ່ ຈະ ມີຊີວິດຢູ່ໃນໂລກນີ້.⁵
ນອກເໜືອໄປຈາກການຮັບເອົາບາບທີ່ໜັກໜ່ວງຂອງເຮົາ, ພຣະຄຣິດຍັງໄດ້ຮັບເອົາຄວາມໂສກເສົ້າ, ຄວາມອ່ອນແອ, ຄວາມທຸກທໍລະມານ, ແລະ ຄວາມເຈັບປ່ວຍຂອງເຮົາ ແລະ ຄວາມທຸກທັງໝົດໂດຍທຳມະຊາດໃນສະພາບມະຕະຂອງມະນຸດ. ບໍ່ມີຄວາມທຸກທໍລະມານໃດ, ບໍ່ມີຄວາມເຈັບປວດ ຫລື ຄວາມໂສກເສົ້າໃດ ທີ່ພຣະອົງບໍ່ໄດ້ຮັບທຸກທໍລະມານເພື່ອເຮົາ.⁶
ການຊົດໃຊ້ຂອງພຣະຜູ້ຊ່ວຍໃຫ້ລອດ ຊ່ວຍເຮົາໃຫ້ເອົາຊະນະຜົນສະທ້ອນທາງລົບ ຂອງການຕົກຂອງອາດາມ, ລວມທັງຄວາມຕາຍທາງຮ່າງກາຍ. ເປັນເພາະພຣະຄຣິດ, ລູກໆທັງໝົດຂອງພຣະເຈົ້າທີ່ເກີດມາຢູ່ໃນໂລກນີ້, ບໍ່ວ່າຈະຊອບທຳ ຫລື ບໍ່ຊອບທຳ, ຈະມີປະສົບການ ເລື່ອງທີ່ຮ່າງກາຍ ແລະ ວິນຍານຂອງເຂົາເຈົ້າຈະລວມເຂົ້າກັນ ຜ່ານທາງອຳນາດຂອງການຟື້ນຄືນພຣະຊົນ⁷ ແລະ ກັບຄືນຫາພຣະອົງ ເພື່ອ “ຖືກພິພາກສາ … ຕາມວຽກງານຂອງພວກເຂົາ.”⁸
ກົງກັນຂ້າມ, ການຮັບເອົາພອນອັນເຕັມປ່ຽມຂອງການຊົດໃຊ້ຂອງພຣະຜູ້ຊ່ວຍໃຫ້ລອດ ເປັນເງື່ອນໄຂທີ່ຂຶ້ນກັບຄວາມພາກພຽນຂອງເຮົາ⁹ ໃນການດຳລົງຊີວິດຕາມ “ຄຳສອນຂອງພຣະຄຣິດ.”¹⁰ ໃນຄວາມຝັນຂອງເພິ່ນ, ລີໄຮໄດ້ເຫັນ “ທາງຄັບ ແລະ ແຄບ”¹¹ ທີ່ພາໄປຫາຕົ້ນໄມ້ແຫ່ງຊີວິດ. ໝາກຂອງມັນ, ຊຶ່ງເປັນຕົວແທນໃຫ້ແກ່ຄວາມຮັກຂອງພຣະເຈົ້າ ຊຶ່ງຖືກສະແດງອອກຜ່ານທາງພອນທີ່ປະເສີດຂອງການຊົດໃຊ້ຂອງພຣະຄຣິດ ທີ່ວ່າ, “ມີຄ່າ ແລະ ໜ້າເພິ່ງປາດຖະໜາທີ່ສຸດ … [ແລະ] ເປັນສິ່ງທີ່ຍິ່ງໃຫຍ່ທີ່ສຸດໃນຂອງປະທານຈາກພຣະເຈົ້າ.”¹² ໃນການເຂົ້າເຖິງໝາກໄມ້ນີ້, ເຮົາຕ້ອງໃຊ້ສັດທາໃນພຣະເຢຊູຄຣິດ, ກັບໃຈ, “ເຊື່ອຟັງພຣະຄຳຂອງພຣະເຈົ້າ,”¹³ ຮັບເອົາພິທີການທີ່ຈຳເປັນ, ແລະ ຮັກສາພັນທະສັນຍາທີ່ສັກສິດ ຈົນເຖິງທີ່ສຸດຂອງຊີວິດເຮົາ.¹⁴
ຜ່ານທາງການຊົດໃຊ້ຂອງພຣະອົງ, ພຣະເຢຊູຄຣິດບໍ່ໄດ້ລ້າງພຽງແຕ່ບາບຂອງເຮົາເທົ່ານັ້ນ, ແຕ່ພຣະອົງຍັງໄດ້ມອບອຳນາດ ທີ່ເປັນໄປໄດ້ ໃຫ້ສານຸສິດຂອງພຣະອົງນຳອີກ ຊຶ່ງຜ່ານທາງນັ້ນພວກເຂົາຈະສາມາດ “[ກຳຈັດ] ມະນຸດທີ່ມີຈິດໃຈທຳມະດາ,”¹⁵ ກ້າວໜ້າ “ເປັນບັນທັດ,”¹⁶ ແລະ ເພີ່ມພູນໃນຄວາມບໍລິສຸດ¹⁷ ເພື່ອວ່າໃນມື້ໜຶ່ງພວກເຂົາຈະກາຍເປັນຄົນດີພ້ອມ ໃນລັກສະນະຂອງພຣະຄຣິດ,¹⁸ ເໝາະສົມທີ່ຈະຢູ່ນຳພຣະເຈົ້າອີກ¹⁹ ແລະ ຮັບເອົາພອນທັງໝົດຂອງອານາຈັກສະຫວັນ.²⁰

ຄວາມຈິງທີ່ອຸ່ນໃຈອີກຢ່າງໜຶ່ງ ທີ່ບັນຈຸຢູ່ໃນພຣະຄຳພີມໍມອນແມ່ນວ່າ, ເຖິງແມ່ນການເຂົ້າເຖິງນັ້ນ ບໍ່ມີທີ່ສິ້ນສຸດ ແລະ ສຳລັບທຸກຄົນ, ແຕ່ການຊົດໃຊ້ຂອງພຣະຜູ້ເປັນເຈົ້າເປັນຂອງປະທານສ່ວນຕົວ ແລະ ພິເສດ, ເໝາະສົມສຳລັບເຮົາແຕ່ລະຄົນໂດຍສະເພາະ.²¹ ດັ່ງທີ່ພຣະເຢຊູໄດ້ເຊື້ອເຊີນຊາວນີໄຟແຕ່ລະຄົນໃຫ້ມາສຳພັດຮອຍແຜຂອງພຣະອົງ, ການສິ້ນພຣະຊົນຂອງພຣະອົງສຳລັບເຮົາແຕ່ລະຄົນ, ເມື່ອເປັນສ່ວນຕົວແລ້ວ, ມັນຄືກັບວ່າ ທ່ານ ຫລື ຂ້າພະເຈົ້າເປັນພຽງຄົນດຽວເທົ່ານັ້ນຢູ່ໃນໂລກນີ້. ພຣະອົງໄດ້ມອບຄຳເຊື້ອເຊີນເປັນສ່ວນຕົວໃຫ້ເຮົາ ເພື່ອໃຫ້ມາຫາພຣະອົງ ແລະ ຮັບເອົາພອນທີ່ໜ້າອັດສະຈັນໃຈຂອງການຊົດໃຊ້ຂອງພຣະອົງ.²²

ລັກສະນະສ່ວນຕົວຂອງການຊົດໃຊ້ຂອງພຣະຄຣິດ ກາຍເປັນເລື່ອງຈິງ ເມື່ອເຮົາພິຈາລະນາຕົວຢ່າງທີ່ດີເດັ່ນຂອງຊາຍ ແລະ ຍິງ ຢູ່ໃນພຣະຄຳພີມໍມອນ. ໃນບັນດາຜູ້ຄົນເຫລົ່ານັ້ນແມ່ນເອໂນດ, ແອວມາ, ຊີເອສຣອມ, ກະສັດລາໂມໄນ ແລະ ມະເຫສີຂອງເພິ່ນ, ແລະ ຜູ້ຄົນຂອງກະສັດເບັນຢາມິນ. ການປ່ຽນໃຈເຫລື້ອມໃສ ແລະ ປະຈັກພະຍານທີ່ກ້າຫານຂອງເຂົາເຈົ້າ ໄດ້ເປັນພະຍານທີ່ມີຊີວິດຢູ່ເຖິງວິທີທີ່ໃຈ ແລະ ຊີວິດຂອງເຮົາສາມາດປ່ຽນແປງໄດ້ ຜ່ານທາງພຣະກະລຸນາທິຄຸນ ແລະ ຄວາມເມດຕາອັນບໍ່ມີທີ່ສິ້ນສຸດຂອງພຣະຜູ້ເປັນເຈົ້າ.²³

ສາດສະດາແອວມາໄດ້ຖາມຄຳຖາມທີ່ສຳຄັນກັບຜູ້ຄົນຂອງເພິ່ນ. ເພິ່ນໄດ້ກ່າວວ່າ, “ຖ້າຫາກພວກທ່ານເຄີຍປະສົບກັບການປ່ຽນແປງໃນໃຈ, ແລະ ຖ້າຫາກພວກທ່ານຮູ້ສຶກຢາກຮ້ອງເພງສັນລະເສີນຄວາມຮັກທີ່ໄຖ່, ຂ້າພະເຈົ້າຈະຖາມວ່າ ພວກທ່ານສາມາດຮູ້ສຶກເຊັ່ນນັ້ນບໍ່ໃນ ຂະນະນີ້?”²⁴ ຄຳຖາມນີ້ແມ່ນສຳຄັນຫລາຍໃນທຸກວັນນີ້, ເພາະໃນຖານະສານຸສິດຂອງພຣະຜູ້ເປັນເຈົ້າ, ອຳນາດແຫ່ງການໄຖ່ຂອງພຣະອົງຄວນຢູ່ກັບເຮົາ, ຜັກດັນເຮົາ, ແລະ ປ່ຽນແປງເຮົາແຕ່ລະຄົນ ໃນແຕ່ລະວັນ.

ຄຳຖາມຂອງແອວມາກໍສາມາດຖາມໃນແບບອື່ນໄດ້ ດັ່ງເຊັ່ນ, ເທື່ອສຸດທ້າຍທີ່ທ່ານໄດ້ຮູ້ສຶກເຖິງອິດທິພົນອັນຫວານຊື່ນຂອງການຊົດໃຊ້ຂອງພຣະຜູ້ຊ່ວຍໃຫ້ລອດໃນຊີວິດຂອງທ່ານ ແມ່ນດົນປານໃດແລ້ວ? ສິ່ງນີ້ເກີດຂຶ້ນເມື່ອທ່ານຮູ້ສຶກມີຄວາມສຸກອັນ “ງົດງາມ ແລະ ຫວານຊື່ນ”²⁵ ທີ່ມາສູ່ທ່ານ ເພື່ອເປັນພະຍານຕໍ່ຈິດວິນຍານຂອງທ່ານວ່າ ບາບຂອງທ່ານໄດ້ຖືກອະໄພໃຫ້ແລ້ວ; ຫລື ເມື່ອການທົດລອງທີ່ເຈັບປວດໄດ້ເບົາບາງລົງທັນທີ; ຫລື ເມື່ອໃຈຂອງທ່ານອ່ອນໂຍນລົງ ແລະ ທ່ານສາມາດກ່າວຄຳໃຫ້ອະໄພແກ່ບາງຄົນທີ່ເຮັດໃຫ້ທ່ານເຈັບປວດ. ຫລື ທຸກເທື່ອທີ່ທ່ານສັງເກດເຫັນວ່າ ທ່ານມີຄວາມສາມາດທີ່ຈະຮັກ ແລະ ຮັບໃຊ້ຄົນອື່ນຫລາຍກວ່າເກົ່າ ຫລື ຂັ້ນຕອນຂອງການຊຳລະໃຫ້ສະອາດ ເຮັດໃຫ້ທ່ານເປັນຄົນໃໝ່, ຕາມຕົວຢ່າງຂອງພຣະຜູ້ຊ່ວຍໃຫ້ລອດ.²⁶

ຂ້າພະເຈົ້າເປັນພະຍານວ່າ ປະສົບການທັງໝົດເຫລົ່ານີ້ ແມ່ນຈິງແທ້ ແລະ ມີຫລັກຖານວ່າ ຊີວິດສາມາດປ່ຽນແປງໄດ້ ຜ່ານທາງສັດທາໃນພຣະເຢຊູຄຣິດ ແລະ ການຊົດໃຊ້ຂອງພຣະອົງ. ພຣະຄຳພີມໍມອນໃຫ້ຄວາມແຈ່ມແຈ້ງ ແລະ ຂະຫຍາຍຄວາມຮູ້ຂອງເຮົາ ເຖິງຂອງປະທານທີ່ຍອດຍ້ຽມນີ້. ຂະນະທີ່ທ່ານສຶກສາພຣະຄຳພີນີ້, ທ່ານຈະໄດ້ຍິນສຸລະສຽງຂອງພຣະຄຣິດທີ່ຊົງພຣະຊົນ ເຊື້ອເຊີນທ່ານໃຫ້ມາຫາພຣະອົງ. ຂ້າພະເຈົ້າສັນຍາວ່າ ຖ້າຫາກທ່ານຮັບເອົາຄຳເຊື້ອເຊີນນີ້ ແລະ ດຳລົງຊີວິດຕາມຕົວຢ່າງຂອງພຣະອົງ, ແລ້ວອິດທິພົນແຫ່ງການໄຖ່ຂອງພຣະອົງ ຈະມາສູ່ຊີວິດຂອງທ່ານ. ຜ່ານທາງອຳນາດຂອງພຣະວິນຍານບໍລິສຸດ, ພຣະຜູ້ຊ່ວຍໃຫ້ລອດຈະປ່ຽນແປງທ່ານ ໄປແຕ່ລະວັນ “ຈົນເຖິງວັນທີ່ສົມບູນ”²⁷ ເມື່ອທ່ານ, ດັ່ງທີ່ພຣະອົງໄດ້ປະກາດ, ຈະ “ເຫັນໜ້າຂອງເຮົາ ແລະ ຮູ້ວ່າເຮົາເປັນຢູ່.”²⁸ ໃນພຣະນາມຂອງພຣະເຢຊູຄຣິດ, ອາແມນ.