ວິທີທີ່ຖານະປະໂລຫິດເປັນພອນໃຫ້ແກ່ຊາວໜຸ່ມ
ເຮົາໄດ້ຮັບໂອກາດທີ່ຈະປະຕິບັດສາດສະໜາກິດເໝືອນດັ່ງເຫລົ່າທູດ, ເພື່ອຈະສັ່ງສອນພຣະກິດຕິຄຸນໃນທຸກໆທະວີບຂອງແຜ່ນດິນໂລກ, ແລະ ຊ່ວຍຜູ້ຄົນໃຫ້ມາຫາພຣະຄຣິດ.
ອ້າຍເອື້ອຍນ້ອງທັງຫລາຍ, ຂ້ານ້ອຍກະຕັນຍູແທ້ໆ ທີ່ຈະກ່າວກັບທ່ານ ໃນຄ່ຳຄືນແຫ່ງປະຫວັດສາດນີ້ ກ່ຽວກັບຂອງປະທານອັນສັກສິດຂອງຖານະປະໂລຫິດ ແລະ ອຳນາດທີ່ອັດສະຈັນ ທີ່ມັນມີເພື່ອເປັນພອນໃຫ້ແກ່ຊາວໜຸ່ມ ໃນຍຸກສະໄໝນີ້. ຂ້ານ້ອຍອະທິຖານວ່າ ເຖິງແມ່ນວ່າຂ້ານ້ອຍມີຄວາມບົກຜ່ອງ, ພຣະວິນຍານຈະຊ່ວຍຂ້ານ້ອຍໃນການສິດສອນຄວາມຈິງ.
ຝ່າຍປະທານສູງສຸດໄດ້ເຕືອນຜູ້ດຳລົງຖານະປະໂລຫິດແຫ່ງອາໂຣນວ່າ “ພວກເຈົ້າມີຊີວິດຢູ່ໃນວັນເວລາຂອງໂອກາດ ແລະ ການທ້າທາຍທີ່ຍິ່ງໃຫຍ່—ວັນເວລາ ຊຶ່ງໃນນັ້ນຖານະປະໂລຫິດໄດ້ຖືກຟື້ນຟູແລ້ວ. ພວກເຈົ້າມີສິດອຳນາດທີ່ຈະປະຕິບັດພິທີການຂອງຖານະປະໂລຫິດແຫ່ງອາໂຣນ. ເມື່ອພວກເຈົ້າໃຊ້ສິດອຳນາດນັ້ນພ້ອມດ້ວຍການອະທິຖານ ແລະ ຢ່າງມີຄ່າຄວນ, ພວກເຈົ້າຈະໄດ້ເປັນພອນອັນຍິ່ງໃຫຍ່ ໃຫ້ແກ່ຊີວິດຂອງຄົນທີ່ຢູ່ອ້ອມຮອບພວກເຈົ້າ.”1 ໃນຖານະຊາຍໜຸ່ມຂອງສາດສະໜາຈັກ, ພວກເຮົາກໍຍັງໄດ້ຖືກເຕືອນວ່າ ພວກເຮົາເປັນ “[ບຸດ] ທີ່ຮັກຫອມຂອງພຣະເຈົ້າ, ແລະ ວ່າພຣະອົງມີວຽກງານໃຫ້ [ພວກເຮົາ] ເຮັດ”2 ແລະ ພວກເຮົາຈະຊ່ວຍພຣະອົງໃນວຽກງານຂອງພຣະອົງ “ຄືການທີ່ຈະເຮັດໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງມະນຸດ” (ໂມເຊ 1:39).
ຖານະປະໂລຫິດເປັນ ສິດອຳນາດທີ່ຈະປະຕິບັດພິທີການ ແລະ ພັນທະສັນຍາຕ່າງໆຂອງພຣະກິດຕິຄຸນຂອງພຣະຜູ້ຊ່ວຍໃຫ້ລອດ ໃຫ້ແກ່ຜູ້ຄົນທີ່ມີຄ່າຄວນທີ່ຈະຮັບເອົາມັນ. ຜ່ານທາງພິທີການຂອງຖານະປະໂລຫິດ ແລະ ພັນທະສັນຍາທີ່ສັກສິດເຫລົ່ານີ້ ພອນແຫ່ງການຊົດໃຊ້ທີ່ສົມບູນຂອງພຣະຜູ້ຊ່ວຍໃຫ້ລອດໄດ້ມີມາ ທີ່ຈະຊ່ວຍເຮົາໃຫ້ບັນລຸຈຸດໝາຍປາຍທາງແຫ່ງສະຫວັນຂອງເຮົາ.
ໂຈເຊັບ ສະມິດ ເປັນຊາຍໜຸ່ມ ຜູ້ທີ່ພຣະເຈົ້າໄດ້ເອີ້ນໃຫ້ຟື້ນຟູພຣະກິດຕິຄຸນຂອງພຣະເຢຊູຄຣິດ ແລະ, ເພື່ອຈຸດປະສົງນັ້ນ, ຈຶ່ງໄດ້ຮັບຖານະປະໂລຫິດ ຊຶ່ງເພິ່ນໄດ້ໃຊ້ເພື່ອເປັນພອນໃຫ້ແກ່ມະນຸດທັງປວງ. ຄຳສອນ ແລະ ພັນທະສັນຍາ 135 ກ່າວເຖິງພອນຫລາຍໆຢ່າງ ທີ່ໂຈເຊັບໄດ້ມອບໃຫ້ແກ່ຊາວໜຸ່ມໃນຍຸກສະໄໝນີ້. ເຮົາອ່ານວ່າ: “ໂຈເຊັບ ສະມິດ … ໄດ້ເຮັດເພື່ອຄວາມລອດຂອງມະນຸດໃນໂລກນີ້ ຫລາຍກວ່າຄົນອື່ນ, ຍົກເວັ້ນແຕ່ພຣະເຢຊູເທົ່ານັ້ນ. … ເພິ່ນໄດ້ນຳພຣະຄຳພີມໍມອນອອກມາ … ; ໄດ້ສົ່ງຄວາມສົມບູນແຫ່ງພຣະກິດຕິຄຸນອັນເປັນນິດ … ໄປຍັງສີ່ສ່ວນຂອງແຜ່ນດິນໂລກ; ໄດ້ນຳການເປີດເຜີຍ ແລະ ພຣະບັນຍັດອອກມາ ຊຶ່ງລວມເປັນໜັງສື ຄຳສອນ ແລະ ພັນທະສັນຍາ … ; ໄດ້ເຕົ້າໂຮມໄພ່ພົນຍຸກສຸດທ້າຍຫລາຍໆພັນຄົນ, … ແລະ ໄດ້ຝາກກຽດຕິຍົດ ແລະ ຊື່ສຽງທີ່ບໍ່ມີວັນຖືກທຳລາຍໄວ້” (ຄຳສອນ ແລະ ພັນທະສັນຍາ 135:3).
ເພື່ອຈະຮັບໃຊ້ຢ່າງມີປະສິດທິພາບດັ່ງທີ່ໂຈເຊັບໄດ້ຮັບໃຊ້, ເຮົາຕ້ອງເໝາະສົມຢ່າງມີຄ່າຄວນ ທີ່ຈະໃຊ້ອຳນາດຂອງຖານະປະໂລຫິດຂອງພຣະຜູ້ເປັນເຈົ້າ. ຂະນະທີ່ແປພຣະຄຳພີມໍມອນ, ໂຈເຊັບ ແລະ ອໍລີເວີ ຄາວເດີຣີ ຢາກຮັບບັບຕິສະມາ, ແຕ່ພວກເພິ່ນຂາດສິດອຳນາດທີ່ຖືກຕ້ອງ. ໃນວັນທີ 15 ເດືອນພຶດສະພາ, 1829, ພວກເພິ່ນໄດ້ຄຸເຂົ່າອະທິຖານ ແລະ ໂຢຮັນ ບັບຕິສະໂຕ ໄດ້ມາຢ້ຽມຢາມພວກເພິ່ນ, ຜູ້ທີ່ໄດ້ມອບຂໍກະແຈ ແລະ ສິດອຳນາດຂອງຖານະປະໂລຫິດແຫ່ງອາໂຣນໃຫ້ແກ່ພວກເພິ່ນ, ໂດຍກ່າວວ່າ, “ແກ່ພວກທ່ານ ເພື່ອນຜູ້ຮັບໃຊ້ຮ່ວມກັບຂ້າພະເຈົ້າ, ໃນພຣະນາມຂອງພຣະເມຊີອາ ຂ້າພະເຈົ້າຂໍ ມອບຖານະປະໂລຫິດແຫ່ງອາໂຣນ, ຊຶ່ງຖືຂໍກະແຈແຫ່ງການປະຕິບັດຂອງເຫລົ່າທູດ, ແລະ ຂອງພຣະກິດຕິຄຸນແຫ່ງການກັບໃຈ, ແລະ ຂອງການບັບຕິສະມາ ໂດຍການລົງໄປໃນນ້ຳໝົດທັງຕົວເພື່ອການປົດບາບ” (ຄຳສອນ ແລະ ພັນທະສັນຍາ 13:1).
ເຮົາໄດ້ຮັບໂອກາດທີ່ຈະປະຕິບັດສາດສະໜາກິດເໝືອນດັ່ງເຫລົ່າທູດ, ເພື່ອຈະສັ່ງສອນພຣະກິດຕິຄຸນໃນທຸກໆທະວີບຂອງແຜ່ນດິນໂລກ, ແລະ ຊ່ວຍຜູ້ຄົນໃຫ້ມາຫາພຣະຄຣິດ. ການຮັບໃຊ້ນີ້ຈັດໃຫ້ເຮົາຮ່ວມອອກແຮງງານກັບໂຢຮັນ ບັບຕິສະໂຕ, ໂມໂຣໄນ, ໂຈເຊັບ ສະມິດ, ປະທານຣະໂຊ ເອັມ ແນວສັນ, ແລະ ຜູ້ຮັບໃຊ້ຄົນອື່ນໆ ທີ່ຂະຫຍັນໝັ່ນພຽນຂອງພຣະຜູ້ເປັນເຈົ້າ.
ການຮັບໃຊ້ຂອງເຮົາ ໃນ ແລະ ກັບຖານະປະໂລຫິດຂອງພຣະອົງ ຈະນຳຜູ້ຄົນທີ່ອຸທິດຕົນມາຮ່ວມກັນ ເພື່ອຕິດຕາມ ແລະ ດຳລົງຊີວິດຕາມຄຳສອນຂອງພຣະຜູ້ເປັນເຈົ້າດ້ວຍຄວາມແນ່ນອນ, ຊຶ່ງຂ້ານ້ອຍຮູ້ດ້ວຍຕົວເອງ ວ່າສາມາດເປັນເລື່ອງຍາກ ຂະນະທີ່ເຮົາປະເຊີນໜ້າກັບການທ້າທາຍຂອງຊາວໜຸ່ມ. ແຕ່ການເປັນນ້ຳໜຶ່ງໃຈດຽວກັບເພື່ອນຜູ້ຮັບໃຊ້ຮ່ວມກັນຂອງພຣະຜູ້ເປັນເຈົ້າ ໃນການສຳເລັດວຽກງານຂອງພຣະອົງ ຈະຊ່ວຍເຮັດໃຫ້ເຮົາເຂັ້ມແຂງເພື່ອຕ້ານທານກັບການລໍ້ລວງ ແລະ ການຫລອກລວງຂອງຜູ້ປໍລະປັກ. ທ່ານສາມາດເປັນສັນຍານແຫ່ງຄວາມສະຫວ່າງໃຫ້ແກ່ຜູ້ຄົນທີ່ບໍ່ມີຄວາມແນ່ໃຈໃນຕົວເຂົາເອງ. ຄວາມສະຫວ່າງຢູ່ພາຍໃນຕົວທ່ານຈະສ່ອງແສງຢ່າງເຈີດຈ້າ ເພື່ອວ່າຜູ້ຄົນທີ່ທ່ານປະຕິບັດຕໍ່ດ້ວຍຈະໄດ້ຮັບພອນ ໂດຍທີ່ໄດ້ຢູ່ເປັນເພື່ອນກັບທ່ານ. ບາງເທື່ອມັນກໍຍາກທີ່ຈະຮັບຮູ້ການສະຖິດຢູ່ຂອງເພື່ອນທາງວິນຍານ, ແຕ່ຂ້ານ້ອຍກະຕັນຍູທີ່ຮູ້ວ່າຂ້ານ້ອຍເປັນສະມາຊິກຂອງກຸ່ມຖານະປະໂລຫິດທີ່ຊື່ສັດ ທີ່ຂ້ານ້ອຍສາມາດພະຍາຍາມກັບໝູ່ເພື່ອນ ເພື່ອຈະເຂົ້າໃກ້ຊິດພຣະຄຣິດຫລາຍກວ່າເກົ່າ.
ພ້ອມດ້ວຍໝູ່ເພື່ອນ ແລະ ຄອບຄົວ, ພຣະວິນຍານບໍລິສຸດເປັນເພື່ອນທີ່ຈົງຮັກພັກດີ ແລະ ເພິ່ງພາໄດ້ຫລາຍທີ່ສຸດ. ແຕ່ເພື່ອຈະເຊື້ອເຊີນໃຫ້ພຣະອົງສະຖິດຢູ່ເປັນເພື່ອນຕະຫລອດເວລາ, ເຮົາຕ້ອງວາງຕົວເຮົາເອງໃຫ້ຢູ່ໃນສະພາບການ ແລະ ສະຖານທີ່ ບ່ອນທີ່ພຣະອົງປະສົງຈະສະຖິດຢູ່ດ້ວຍ. ສິ່ງນີ້ສາມາດເລີ່ມຕົ້ນຢູ່ໃນບ້ານເຮືອນຂອງເຮົາເອງ ຂະນະທີ່ເຮົາພະຍາຍາມເຮັດໃຫ້ມັນເປັນສະຖານທີ່ສັກສິດ ໂດຍການມີພາກສ່ວນໃນການສຶກສາພຣະຄຳພີທຸກໆວັນ ແລະ ອະທິຖານເປັນຄອບຄົວ ແລະ, ສຳຄັນໄປກວ່ານັ້ນ, ຂະນະທີ່ເຮົາສຶກສາພຣະຄຳພີເປັນສ່ວນຕົວ ແລະ ອະທິຖານດ້ວຍຕົວເອງ.
ໃນຕົ້ນປີນີ້, ຂ້ານ້ອຍໄດ້ຮັບໂອກາດທີ່ຕື່ນເຕັ້ນ ແຕ່ຖ່ອມຕົວ ທີ່ໄດ້ຊ່ວຍນ້ອງສາວຂອງຂ້ານ້ອຍ, ນາງໂອເຊອາເນ, ກ້າວໄປໜ້າໃນເສັ້ນທາງແຫ່ງພັນທະສັນຍາ ໂດຍການຮັບເອົາຄຳເຊື້ອເຊີນໃຫ້ຮັບບັບຕິສະມາ ແລະ ບັນລຸຂໍ້ຮຽກຮ້ອງທີ່ຈຳເປັນ ເພື່ອຈະເຂົ້າສູ່ອານາຈັກຊັ້ນສູງ. ນາງໄດ້ເລື່ອນການບັບຕິສະມາຂອງນາງໜຶ່ງເດືອນ, ຈົນກວ່າຂ້ານ້ອຍໄດ້ຖືກແຕ່ງຕັ້ງເປັນປະໂລຫິດ, ເພື່ອຈະໃຫ້ຂ້ານ້ອຍໄດ້ຮັບສິດທິພິເສດ ທີ່ຈະກະທຳພິທີການ, ຂະນະທີ່ເອື້ອຍນ້ອງຂອງພວກເຮົາກໍໄດ້ຮັບສິດທິພີເສດເປັນພະຍານພາຍໃຕ້ການມອບໝາຍຂອງຖານະປະໂລຫິດ. ຂະນະທີ່ພວກເຮົາໄດ້ຢືນຢູ່ທີ່ກົງກັນຂ້າມກັນ ຢູ່ໃນອ່າງບັບຕິສະມາ, ແລະ ໄດ້ຕຽມຈະລົງໄປໃນນ້ຳ, ຂ້ານ້ອຍໄດ້ສັງເກດເຫັນຄວາມຕື່ນເຕັ້ນຂອງນາງ, ທີ່ກົງກັບຂ້ານ້ອຍ. ແລະ ຂ້ານ້ອຍໄດ້ຮູ້ສຶກວ່າເປັນໜຶ່ງກັບນາງ, ເຫັນນາງໄດ້ຕັດສິນເຮັດສິ່ງທີ່ຖືກຕ້ອງ. ໂອກາດທີ່ຈະນຳໃຊ້ຖານະປະໂລຫິດໄດ້ຮຽກຮ້ອງໃຫ້ຂ້ານ້ອຍລະມັດລະວັງ ແລະ ເອົາໃຈໃສ່ຕໍ່ການດຳລົງຊີວິດຕາມພຣະກິດຕິຄຸນຫລາຍຂື້ນ. ເພື່ອຈະກະກຽມ, ຂ້ານ້ອຍໄດ້ໄປພຣະວິຫານທຸກມື້ໃນອາທິດນັ້ນ, ໂດຍທີ່ໄດ້ຮັບການສະໜັບສະໜູນຈາກແມ່, ແມ່ຕູ້, ແລະ ນ້ອງສາວຂອງຂ້ານ້ອຍ, ເພື່ອຮັບບັບຕິສະມາແທນຄົນຕາຍ.
ປະສົບການນີ້ໄດ້ສອນຂ້ານ້ອຍຫລາຍຢ່າງ ກ່ຽວກັບຖານະປະໂລຫິດ ແລະ ວິທີທີ່ຂ້ານ້ອຍຈະນຳໃຊ້ມັນຢ່າງມີຄ່າຄວນແນວໃດ. ຂ້ານ້ອຍຮູ້ວ່າຜູ້ດຳລົງຖານະປະໂລຫິດທຸກຄົນກໍສາມາດຮູ້ສຶກແບບດຽວກັບທີ່ຂ້ານ້ອຍໄດ້ຮູ້ສຶກ ຖ້າຫາກເຮົາເຮັດຕາມຕົວຢ່າງຂອງນີໄຟ ທີ່ຈະ “ໄປ ແລະ ເຮັດ” (ເບິ່ງ 1 ນີໄຟ 3:7). ເຮົາຈະນັ່ງຢູ່ຊື່ໆບໍ່ໄດ້ ແລະ ຄາດຫວັງໃຫ້ພຣະຜູ້ເປັນເຈົ້າໃຊ້ເຮົາໃນວຽກງານອັນຍິ່ງໃຫຍ່ຂອງພຣະອົງ. ເຮົາບໍ່ຕ້ອງລໍຖ້າໃຫ້ຜູ້ຄົນທີ່ຕ້ອງການຄວາມຊ່ວຍເຫລືອຈາກເຮົາ ຊອກຫາເຮົາ; ມັນເປັນໜ້າທີ່ຂອງເຮົາ ໃນຖານະຜູ້ດຳລົງຖານະປະໂລຫິດ ທີ່ຈະເປັນຕົວຢ່າງ ແລະ ຢືນເປັນພະຍານຂອງພຣະເຈົ້າ. ຖ້າຫາກເຮົາຕັດສິນເຮັດສິ່ງທີ່ກີດກັນເຮົາຈາກຄວາມກ້າວໜ້າທາງວິນຍານຂອງເຮົາ, ເຮົາຕ້ອງປ່ຽນແປງດຽວນີ້ເລີຍ. ຊາຕານຈະພະຍາຍາມສຸດຄວາມສາມາດຂອງມັນ ທີ່ຈະກັກເຮົາໄວ້ຢູ່ໃນສະພາບແຫ່ງກາມມະລົມຂອງການສະແຫວງຫາຄວາມພໍໃຈທີ່ຕ່ຳຊ້າ. ແຕ່ຂ້ານ້ອຍຮູ້ວ່າ ຖ້າຫາກເຮົາໃຊ້ຄວາມພະຍາຍາມ, ຊອກຫາຜູ້ຄົນທີ່ຈະສະໜັບສະໜູນເຮົາ, ແລະ ກັບໃຈແຕ່ລະວັນ, ພອນທີ່ຕາມມາຈະເປັນທີ່ບໍ່ໜ້າເຊື່ອ ແລະ ຊີວິດຂອງເຮົາຈະຖືກປ່ຽນໄປຕະຫລອດການ ຂະນະທີ່ເຮົາມຸ້ງໄປໜ້າຢູ່ໃນເສັ້ນທາງແຫ່ງພັນທະສັນຍາ.
ຂ້ານ້ອຍຮູ້ວ່າ ນີ້ເປັນສາດສະໜາຈັກທີ່ແທ້ຈິງຂອງພຣະເຢຊູຄຣິດ, ຜູ້ຊຶ່ງເປັນພຣະຜູ້ຊ່ວຍໃຫ້ລອດຂອງເຮົາ ແລະ ໄດ້ມອບຂໍກະແຈຂອງຖານະປະໂລຫິດໃຫ້ແກ່ອັກຄະສາວົກຂອງພຣະອົງ, ຜູ້ໄດ້ໃຊ້ມັນເພື່ອນຳພາເຮົາ, ໂດຍສະເພາະໃນວັນເວລາທີ່ທ້າທາຍເຫລົ່ານີ້, ແລະ ເພື່ອກະກຽມໂລກສຳລັບການສະເດັດຄືນມາຂອງພຣະອົງ.
ຂ້ານ້ອຍຮູ້ວ່າ ໂຈເຊັບ ສະມິດ ໄດ້ເປັນສາດສະດາແຫ່ງການຟື້ນຟູ ແລະ ວ່າປະທານແນວສັນ ເປັນສາດສະດາທີ່ມີຊີວິດຢູ່ຂອງເຮົາໃນທຸກວັນນີ້. ຂ້ານ້ອຍຂໍເຊື້ອເຊີນເຮົາທຸກຄົນ ໃຫ້ສຶກສາຊີວິດຂອງຜູ້ດຳລົງຖານະປະໂລຫິດທີ່ຍິ່ງໃຫຍ່ເຫລົ່ານີ້ ແລະ ສະແຫວງຫາທີ່ຈະພັດທະນາຕົວເຮົາເອງທຸກໆວັນ ເພື່ອວ່າເຮົາຈະພ້ອມທີ່ຈະພົບພຣະຜູ້ສ້າງຂອງເຮົາ. ໃນພຣະນາມຂອງພຣະເຢຊູຄຣິດ, ອາແມນ.