ຄຳອະທິຖານແຫ່ງສັດທາ
ເມື່ອເຮົາອະທິຖານດ້ວຍສັດທາ, ເຮົາກາຍເປັນພາກສ່ວນທີ່ສຳຄັນໃນວຽກງານຂອງພຣະຜູ້ເປັນເຈົ້າ ເມື່ອພຣະອົງຕຽມໂລກນີ້ເພື່ອການສະເດັດມາຄັ້ງທີສອງຂອງພຣະອົງ.
ຄຳອະທິຖານຂອງແອວເດີ ເມເນສ໌ ໃນຕອນຕົ້ນຂອງພາກທຳອິດຂອງກອງປະຊຸມໃຫຍ່ສາມັນນີ້ກຳລັງໄດ້ຮັບຄຳຕອບແລ້ວ. ເຮົາໄດ້ຮັບການດົນໃຈຈາກຂ່າວສານທີ່ດີງາມ ແລະ ເພງທີ່ມ່ວນອອນຊອນ. ຄຳສັນຍາຂອງປະທານຣະໂຊ ເອັມ ແນວສັນ ວ່າກອງປະຊຸມນີ້ຈະເປັນໜ້າຈົດຈຳນັ້ນ ກໍໄດ້ເລີ່ມປະກົດເປັນຈິງແລ້ວ.
ປະທານແນວສັນໄດ້ກຳນົດໃຫ້ປີນີ້ເປັນປີແຫ່ງ “ເວລາຂອງການສະເຫລີມສະຫລອງວັນຄົບຮອບ 200 ປີ ຕັ້ງແຕ່ພຣະເຈົ້າອົງເປັນພຣະບິດາ ແລະ ພຣະບຸດທີ່ຮັກຂອງພຣະອົງ, ພຣະເຢຊູຄຣິດ, ໄດ້ມາປະກົດຕໍ່ໂຈເຊັບ ສະມິດ ໃນພາບທີ່ມາໃຫ້ເຫັນ.” ປະທານແນວສັນໄດ້ເຊື້ອເຊີນໃຫ້ເຮົາເຮັດແຜນການສ່ວນຕົວ ເພື່ອກະກຽມຕົວເຮົາເອງ ສຳລັບກອງປະຊຸມໃຫຍ່ແຫ່ງປະຫວັດສາດ, ຊຶ່ງເພິ່ນໄດ້ກ່າວວ່າ ການສະເຫລີມສະຫລອງນັ້ນ ຈະເປັນ “ຈຸດສຳຄັນໃນປະຫວັດສາດຂອງສາດສະໜາຈັກ, ແລະ ພາກສ່ວນຂອງທ່ານກໍເປັນສິ່ງສຳຄັນຫລາຍ.”1
ທ່ານອາດຈະຖາມຕົວເອງ ເໝືອນດັ່ງຂ້າພະເຈົ້າໄດ້ຖາມວ່າ, “ພາກສ່ວນຂອງຂ້າພະເຈົ້ານັ້ນສຳຄັນແນວໃດ?” ບາງທີ ທ່ານຄົງໄດ້ອ່ານ ແລະ ໄດ້ອະທິຖານກ່ຽວກັບເຫດການແຫ່ງການຟື້ນຟູແລ້ວ. ບາງທີ, ທ່ານຄົງໄດ້ອ່ານຫລາຍກວ່າແຕ່ກ່ອນ ກ່ຽວກັບເຫດການ ເມື່ອພຣະເຈົ້າອົງເປັນພຣະບິດາໄດ້ແນະນຳພຣະບຸດຂອງພຣະອົງສອງສາມເທື່ອ. ບາງທີ ທ່ານຄົງໄດ້ອ່ານກ່ຽວກັບເວລາເມື່ອພຣະຜູ້ຊ່ວຍໃຫ້ລອດໄດ້ກ່າວກັບລູກໆຂອງພຣະບິດາເທິງສະຫວັນຂອງເຮົາ. ຂ້າພະເຈົ້າຮູ້ວ່າ ຂ້າພະເຈົ້າໄດ້ເຮັດໝົດທຸກຢ່າງນັ້ນແລ້ວ ແລະ ຫລາຍກວ່ານັ້ນອີກ.
ຂ້າພະເຈົ້າເຫັນຄຳອ້າງອີງເວລາອ່ານກ່ຽວກັບຖານະປະໂລຫິດຂອງພຣະເຈົ້າ ແລະ ການເປີດຍຸກສະໄໝ. ຂ້າພະເຈົ້າຖ່ອມຕົວ ເມື່ອຂ້າພະເຈົ້າສຳນຶກໄດ້ວ່າ ການຕຽມພ້ອມຂອງຂ້າພະເຈົ້າສຳລັບກອງປະຊຸມໃຫຍ່ນີ້ ແມ່ນເປັນຈຸດສຳຄັນໃນປະຫວັດສ່ວນຕົວຂອງຂ້າພະເຈົ້າເອງ. ຂ້າພະເຈົ້າຮູ້ສຶກວ່າ ຈິດໃຈຕົນເອງປ່ຽນແປງ. ຂ້າພະເຈົ້າຮູ້ສຶກມີຄວາມກະຕັນຍູແບບໃໝ່. ຂ້າພະເຈົ້າດີໃຈຫລາຍ ທີ່ຫວັງຈະໄດ້ຖືກເຊີນໃຫ້ມີສ່ວນຮ່ວມໃນການສະເຫລີມສະຫລອງການຟື້ນຟູອັນຕໍ່ເນື່ອງນີ້.
ຂ້າພະເຈົ້າກໍນຶກເຖິງຄວາມຮູ້ສຶກຂອງຄົນອື່ນ ເມື່ອເຂົາເຈົ້າຕຽມພ້ອມຢ່າງຮອບຄອບ ໂດຍມີຄວາມດີໃຈຫລາຍຂຶ້ນ, ມີຄວາມຫວັງ, ແລະ ຕັ້ງໃຈແທ້ໆເພື່ອຮັບໃຊ້ຕາມຄວາມສາມາດທີ່ພຣະຜູ້ເປັນເຈົ້າປະສົງ.
ເຫດການໂດດເດັ່ນທີ່ເຮົາເຄົາລົບນັ້ນ ເປັນການເລີ່ມຕົ້ນຂອງຍຸກສຸດທ້າຍ, ທີ່ຖືກທຳນາຍໄວ້, ຊຶ່ງພຣະຜູ້ເປັນເຈົ້າກຳລັງຕຽມພ້ອມສາດສະໜາຈັກ ແລະ ຜູ້ຄົນຂອງພຣະອົງ, ຜູ້ຮັບພຣະນາມຂອງພຣະອົງ, ທີ່ຈະຮັບເອົາພຣະອົງ. ສ່ວນໜຶ່ງຂອງການຕຽມພ້ອມສຳລັບການສະເດັດມາຂອງພຣະອົງ, ພຣະອົງຈະຊ່ວຍເຮົາແຕ່ລະຄົນ ເພື່ອເອົາຊະນະຄວາມທ້າທາຍທາງວິນຍານ ແລະ ໂອກາດຕ່າງໆທີ່ບໍ່ເໝືອນສິ່ງໃດໆທີ່ເຄີຍໄດ້ເຫັນມາກ່ອນ ໃນປະຫວັດສາດຂອງໂລກນີ້.
ໃນເດືອນກັນຍາ ປີ 1840, ສາດສະດາໂຈເຊັບ ສະມິດ ແລະ ທີ່ປຶກສາຂອງເພິ່ນໃນຝ່າຍປະທານສູງສຸດ ໄດ້ປະກາດດັ່ງຕໍ່ໄປນີ້:“ວຽກງານຂອງພຣະຜູ້ເປັນເຈົ້າໃນວັນເວລາສຸດທ້າຍ, ແມ່ນຍິ່ງໃຫຍ່ ແລະ ມວນມະນຸດເກືອບຈະນຶກພາບບໍ່ອອກເລີຍ. ລັດສະໝີພາບຂອງວຽກງານນັ້ນບໍ່ອາດພັນລະນາໄດ້, ແລະ ຄວາມຍິ່ງໃຫຍ່ຂອງມັນກໍບໍ່ມີຫຍັງປຽບທຽບໄດ້. ບັນດາສາດສະດາ ແລະ ຜູ້ຊາຍທີ່ຊອບທຳ ໄດ້ຮັບການດົນໃຈ ແລະ ຕື່ນເຕັ້ນກັບເລື່ອງນີ້ ນັບຈາກການສ້າງໂລກ ຈົນເຖິງຄົນລຸ້ນຫລັງທຸກໆລຸ້ນຈົນຮອດປະຈຸບັນ; ແລະ ມັນເປັນຍຸກສະໄໝຂອງຄວາມສົມບູນແຫ່ງເວລາໂດຍແທ້ຈິງ, ເມື່ອທຸກສິ່ງທີ່ກ່ຽວກັບພຣະເຢຊູຄຣິດ, ບໍ່ວ່າໃນສະຫວັນ ຫລື ຢູ່ເທິງໂລກນີ້, ຈະຖືກໂຮມເຂົ້າກັນກັບພຣະອົງ, ແລະ ເມື່ອທຸກສິ່ງຈະໄດ້ຮັບການຟື້ນຟູ ຕາມທີ່ໄດ້ກ່າວໄວ້ໂດຍສາດສະດາຜູ້ບໍລິສຸດທຸກຄົນ ນັບຕັ້ງແຕ່ໂລກໄດ້ເລີ່ມຕົ້ນ, ຈາກສິ່ງເຫລົ່ານັ້ນກໍຈະເກີດມີຄວາມສຳເລັດຜົນອັນຮູ່ງເຮືອງ ຕາມທີ່ຄຳສັນຍາທີ່ໄດ້ໃຫ້ໄວ້ກັບບັນພະບຸລຸດ, ໃນຂະນະທີ່ການສະແດງລິດເດດຂອງຜູ້ຊົງລິດອຳນາດຍິ່ງໃຫຍ່ນັ້ນຈະຍິ່ງໃຫຍ່ ຮຸ່ງເຫລື້ອມ ແລະ ປະເສີດ.”
ພວກເພິ່ນໄດ້ກ່າວຕໍ່ໄປວ່າ: “ພວກເຮົາຮູ້ສຶກວ່າ ຕ້ອງພາກັນກ້າວໄປຂ້າງໜ້າ ແລະ ຮວມພະລັງກັນເພື່ອການເສີມສ້າງອານາຈັກ, ແລະ ຈັດຕັ້ງຖານະປະໂລຫິດໃຫ້ມີຄວາມສົມບູນ ແລະ ມີລັດສະໝີພາບ. ວຽກງານຊຶ່ງຕ້ອງເຮັດໃຫ້ສຳເລັດໃນວັນເວລາສຸດທ້າຍ ແມ່ນວຽກງານຢ່າງໜຶ່ງທີ່ສຳຄັນ, ແລະ ເຮົາຕ້ອງເອີ້ນເອົາໄພ່ພົນທີ່ມີພະລັງ, ທັກສະ, ພອນສະຫວັນ, ແລະ ຄວາມສາມາດມາ, ເພື່ອເຂົາເຈົ້າຈະໄດ້ເລີ່ມປະຕິບັດໜ໊າທີ່ອັນມີກຽດ ແລະ ເລີດລ້ຳດັ່ງທີ່ສາດສະດາ [ດານີເອນ] ໄດ້ກ່າວໄວ້ [ເບິ່ງ ດານີເອນ 2:34–35, 44–45]; ແລະ ສະນັ້ນເຮົາຕ້ອງອາໄສຄວາມໃສ່ໃຈໃນການປະຕິບັດໜ້າທີ່ຂອງໄພ່ພົນຕ່າງໆ, ເພື່ອຈະໄດ້ຮັບຄວາມສຳເລັດໃນວຽກງານທີ່ສຳຄັນ ແລະ ຍິ່ງໃຫຍ່ແບບນີ້ໄດ້.”2
ສິ່ງສະເພາະເຈາະຈົງຫລາຍຢ່າງວ່າເຮົາຈະເຮັດຫຍັງ ແລະ ຈະເຮັດເມື່ອໃດໃນການຟື້ນຟູອັນຕໍ່ເນື່ອງ ຍັງບໍ່ທັນໄດ້ເປີດເຜີຍເທື່ອ. ແຕ່ຝ່າຍປະທານສູງສຸດໃນສະໄໝເລີ່ມຕົ້ນ ໄດ້ຮູ້ບາງຢ່າງກ່ຽວກັບວຽກງານຂອງພຣະຜູ້ເປັນເຈົ້າ ທີ່ຖືກຕຽມໄວ້ໃຫ້ເຮົາ. ນີ້ເປັນສອງສາມຕົວຢ່າງຊຶ່ງເຮົາຮູ້ວ່າຈະເກີດຂຶ້ນ:
ຜ່ານທາງໄພ່ພົນຂອງພຣະອົງ, ພຣະຜູ້ເປັນເຈົ້າຈະສະເໜີຂອງປະທານແຫ່ງພຣະກິດຕິຄຸນຂອງພຣະອົງ “ແກ່ທຸກປະຊາຊາດ, ທຸກຕະກຸນ, ທຸກພາສາ, ແລະ ທຸກຜູ້ຄົນທັງປວງ.”3 ເທັກໂນໂລຈີ ແລະ ສິ່ງມະຫັດສະຈັນຈະສືບຕໍ່ມີພາກສ່ວນ—ສ່ວນບຸກຄົນກໍເໝືອນກັນໃນການເປັນ “ຜູ້ຫາຄົນ”4 ຜູ້ຊຶ່ງປະຕິບັດສາດສະໜາກິດດ້ວຍອຳນາດ ແລະ ດ້ວຍສັດທາຫລາຍກວ່າເກົ່າ.
ຜູ້ຄົນພວກເຮົາ ຈະມີຄວາມສາມັກຄີກັນຫລາຍກວ່າເກົ່າໃນທ່າມກາງການຂັດແຍ້ງທີ່ທະວີຂຶ້ນ. ເຮົາຈະມາເຕົ້າໂຮມກັນໃນກຸ່ມທີ່ເຂັ້ມແຂງທາງວິນຍານ ແລະ ໃນຄອບຄົວທີ່ເຕັມປ່ຽມດ້ວຍຄວາມສະຫວ່າງແຫ່ງພຣະກິດຕິຄຸນ.
ແມ່ນແຕ່ຄົນທາງໂລກທີ່ຂາດຄວາມເຊື່ອ ກໍຍັງຈະຮັບຮູ້ກ່ຽວກັບສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ແລະ ຮັບຮູ້ວ່າມີອຳນາດຂອງພຣະເຈົ້າສະຖິດຢູ່ກັບສາດສະໜາຈັກນີ້. ສານຸສິດທີ່ຊື່ສັດ ແລະ ກ້າຫານ ຈະເປີດໃຈຮັບເອົາພຣະນາມຂອງພຣະຄຣິດຢ່າງເດັດດ່ຽວ, ແລະ ຖ່ອມຕົວໃນຊີວິດປະຈຳວັນຂອງເຂົາເຈົ້າ.
ແລ້ວເຮົາແຕ່ລະຄົນຈະສາມາດມີສ່ວນຮ່ວມໃນວຽກງານທີ່ຍິ່ງໃຫຍ່ ແລະ ເລີດລ້ຳນີ້ໄດ້ແນວໃດ? ປະທານແນວສັນໄດ້ສິດສອນເຮົາເຖິງວິທີເຕີບໂຕໃນພະລັງທາງວິນຍານ. ເມື່ອເຮົາຮັບເອົາການກັບໃຈວ່າເປັນໂອກາດແຫ່ງຄວາມຊື່ນຊົມ ຍ້ອນມີສັດທາເພີ່ມຂຶ້ນວ່າ ພຣະເຢຊູຄືພຣະຄຣິດ, ເມື່ອເຮົາເຂົ້າໃຈ ແລະ ເຊື່ອວ່າພຣະບິດາເທິງສະຫວັນໄດ້ຍິນທຸກໆຄຳອະທິຖານຂອງເຮົາ, ເມື່ອເຮົາຕັ້ງໃຈເຊື່ອຟັງ ແລະ ຮັກສາພຣະບັນຍັດ, ແລ້ວ ເຮົາຈະມີອຳນາດເພີ່ມຂຶ້ນ ທີ່ຈະຮັບເອົາການເປີດເຜີຍອັນຕໍ່ເນື່ອງ. ພຣະວິນຍານບໍລິສຸດສາມາດຢູ່ເປັນເພື່ອນເຮົາຕະຫລອດເວລາ. ເຮົາຈະຮູ້ສຶກວ່າມີຄວາມສະຫວ່າງ ເຖິງແມ່ນວ່າໂລກທີ່ຢູ່ອ້ອມຮອບເຮົາມືດມົນຂຶ້ນ.
ໂຈເຊັບ ສະມິດ ເປັນຕົວຢ່າງແຫ່ງການເຕີບໂຕໃນອຳນາດທາງວິນຍານດັ່ງກ່າວ. ເພິ່ນໄດ້ສະແດງໃຫ້ເຮົາເຫັນວ່າ ການອະທິຖານດ້ວຍສັດທາແມ່ນຂໍກະແຈທີ່ນຳໄປສູ່ການເປີດເຜີຍຈາກພຣະເຈົ້າ. ເພິ່ນໄດ້ອະທິຖານດ້ວຍສັດທາ, ໂດຍເຊື່ອວ່າພຣະເຈົ້າອົງເປັນພຣະບິດາຈະຕອບຄຳອະທິຖານຂອງເພິ່ນ. ເພິ່ນໄດ້ອະທິຖານດ້ວຍສັດທາ, ໂດຍເຊື່ອວ່າຜ່ານທາງພຣະເຢຊູຄຣິດເທົ່ານັ້ນ ເພິ່ນຈະປາດສະຈາກຄວາມຮູ້ສຶກຜິດຈາກບາບຂອງເພິ່ນໄດ້. ແລະ ເພິ່ນອະທິຖານດ້ວຍສັດທາ, ໂດຍເຊື່ອວ່າເພິ່ນຕ້ອງຊອກຫາສາດສະໜາທີ່ແທ້ຈິງຂອງພຣະເຢຊູຄຣິດ ເພື່ອຈະໄດ້ຮັບການອະໄພນັ້ນ.
ຕະຫລອດການປະຕິບັດສາດສະໜາກິດໃນຖານະສາດສະດາ, ໂຈເຊັບ ສະມິດ ໄດ້ໃຊ້ການອະທິຖານດ້ວຍສັດທາ ເພື່ອໃຫ້ໄດ້ຮັບການເປີດເຜີຍອັນຕໍ່ເນື່ອງ. ເມື່ອເຮົາປະເຊີນກັບການທ້າທາຍໃນສະໄໝນີ້ ແລະ ໃນພາຍໜ້າ, ເຮົາຕ້ອງເຮັດແບບດຽວກັນ. ປະທານບຣິກຳ ຢັງ ໄດ້ກ່າວວ່າ, “ຂ້າພະເຈົ້າບໍ່ຮູ້ວິທີອື່ນໃດສຳລັບໄພ່ພົນຍຸກສຸດທ້າຍ ນອກຈາກການອະທິຖານຢ່າງຕໍ່ເນື່ອຫາພຣະເຈົ້າ ເພື່ອຂໍໃຫ້ພຣະອົງຊີ້ນຳແນວທາງເພື່ອຜູ້ຄົນຂອງພຣະອົງ.”5
ແລ້ວຖ້ອຍຄຳຈາກຄຳອະທິຖານສຳລັບສິນລະລິກຄວນເປັນຄຳຂວັນຂອງຊີວິດປະຈຳວັນຂອງເຮົາ ທີ່ວ່າ: “ລະນຶກເຖິງພຣະອົງຕະຫລອດເວລາ.” ຄຳວ່າ “ພຣະອົງ” ແມ່ນໝາຍເຖິງພຣະເຢຊູຄຣິດ. ຄຳຕໍ່ໄປແມ່ນ “ ແລະ ຮັກສາພຣະບັນຍັດຂອງພຣະອົງ,” ແນະນຳເຮົາວ່າແນວໃດ ທີ່ຈະລະນຶກເຖິງພຣະອົງ ມີຄວາມໝາຍແນວໃດ.6 ເມື່ອເຮົາລະນຶກເຖິງພຣະເຢຊູຄຣິດຕະຫລອດເວລາ, ເຮົາອາດຖາມຕອນອະທິຖານໃນໃຈວ່າ, “ພຣະອົງຢາກໃຫ້ເຮົາເຮັດຫຍັງແດ່?”
ການອະທິຖານດ້ວຍການມີສັດທາໃນພຣະເຢຊູຄຣິດ, ເປັນການນຳໄປສູ່ຍຸກສຸດທ້າຍ. ແລະ ມັນຈະເປັນພາກສ່ວນສຳຄັນທີ່ສຸດທີ່ເຮົາຈະມີສ່ວນຮ່ວມໃນການເປີດເຜີຍອັນຕໍ່ເນື່ອງ. ຂ້າພະເຈົ້າໄດ້ພົບເຫັນຕົວຢ່າງອັນດີເລີດຂອງການອະທິຖານ, ຄືກັນກັບທີ່ທ່ານໄດ້ພົບ.
ອັນທີໜຶ່ງແມ່ນຕົວຢ່າງຂອງໂຈເຊັບ ສະມິດ. ເພິ່ນໄດ້ທູນຖາມຕາມສັດທາຂອງເດັກນ້ອຍວ່າ ພຣະຜູ້ເປັນເຈົ້າປະສົງໃຫ້ເພິ່ນເຮັດຫຍັງແດ່. ຄຳຕອບຂອງພຣະອົງໄດ້ປ່ຽນປະຫວັດສາດຂອງໂລກ.
ສຳລັບຂ້າພະເຈົ້າແລ້ວ, ບົດຮຽນທີ່ສຳຄັນທີ່ສຸດແມ່ນມາຈາກຄຳຕອບຂອງໂຈເຊັບ, ຕໍ່ການໂຈມຕີຂອງຊາຕານຕອນເພິ່ນຄຸເຂົ່າອະທິຖານ.
ຂ້າພະເຈົ້າຮູ້ຈາກປະສົບການວ່າ ຊາຕານ ແລະ ບໍລິວານຂອງມັນພະຍາຍາມເຮັດໃຫ້ເຮົາຮູ້ສຶກວ່າເຮົາບໍ່ຈຳເປັນຕ້ອງອະທິຖານ. ເມື່ອໂຈເຊັບ ສະມິດ ທຸ້ມເທພະລັງທັງໝົດຂອງເພິ່ນເພື່ອວິງວອນຫາພຣະເຈົ້າໃຫ້ປົດປ່ອຍເພິ່ນຈາກອຳນາດທີ່ຮັດກຸມເພິ່ນ, ການວິງວອນເພື່ອຂໍຄວາມບັນເທົາກໍເປັນຜົນ ແລະ ພຣະບິດາເທິງສະຫວັນ ແລະ ພຣະເຢຊູຄຣິດໄດ້ມາປະກົດຕໍ່ເພິ່ນ.
ການຕໍ່ຕ້ານຂອງຊາຕານໃນຕອນທຳອິດຂອງການຟື້ນຟູນັ້ນແມ່ນຮ້າຍແຮງຫລາຍ ເພາະວ່າການອະທິຖານຂອງໂຈເຊັບສຳຄັນຫລາຍ. ທ່ານ ແລະ ຂ້າພະເຈົ້າຈະມີສ່ວນຮ່ວມທີ່ນ້ອຍກວ່າໃນການຟື້ນຟູອັນຕໍ່ເນື່ອງ. ແຕ່ສັດຕູຂອງການຟື້ນຟູຈະພະຍາຍາມກີດກັນເຮົາບໍ່ໃຫ້ອະທິຖານ. ຕົວຢ່າງຂອງສັດທາຂອງໂຈເຊັບ ແລະ ຄວາມຕັ້ງໃຈຂອງເພິ່ນສາມາດເພີ່ມຄວາມເຂັ້ມແຂງໃຫ້ແກ່ຄວາມມຸ່ງໝັ້ນຂອງເຮົາໄດ້. ນີ້ແມ່ນໜຶ່ງໃນຫລາຍໆເຫດຜົນ ຊຶ່ງການອະທິຖານຂອງຂ້າພະເຈົ້າ ຕ້ອງລວມທັງການຂອບພຣະຄຸນຕໍ່ພຣະບິດາເທິງສະຫວັນ ສຳລັບສາດສະດາໂຈເຊັບ.
ເອໂນດ ໃນພຣະຄຳພີມໍມອນ ເປັນຕົວຢ່າງອີກຄົນໜຶ່ງສຳລັບການອະທິຖານແຫ່ງສັດທາຂອງຂ້າພະເຈົ້າ ເມື່ອຂ້າພະເຈົ້າພະຍາຍາມເຮັດພາກສ່ວນຂອງຕົນ ໃນການຟື້ນຟູອັນຕໍ່ເນື່ອງ. ບໍ່ວ່າທ່ານຈະມີພາກສ່ວນແນວໃດກໍຕາມ, ທ່ານສາມາດເພິ່ງອາໄສເພິ່ນໃນຖານະເປັນຜູ້ຊີ້ແນະນຳສ່ວນຕົວ.
ເອໂນດ ກໍໄດ້ອະທິຖານດ້ວຍສັດທາຄືກັນກັບໂຈເຊັບ. ເພິ່ນໄດ້ພັນລະນາເຖິງປະສົບການຂອງເພິ່ນດັ່ງນີ້ວ່າ:
“ແລະ ຈິດວິນຍານຂອງຂ້າພະເຈົ້າຫິວໂຫຍ; ແລະ ຂ້າພະເຈົ້າໄດ້ຄຸເຂົ່າລົງຕໍ່ພຣະພັກຂອງພຣະຜູ້ສ້າງ ຂອງຂ້າພະເຈົ້າ, ແລະ ຂ້າພະເຈົ້າໄດ້ອະທິຖານ ແລະ ອ້ອນວອນຕໍ່ພຣະອົງຢ່າງສຸດກຳລັງເພື່ອຈິດວິນຍານຂອງຂ້າພະເຈົ້າເອງ; ແລະ ຕະຫລອດທັງວັນຂ້າພະເຈົ້າໄດ້ຮ້ອງທູນພຣະອົງ; ແລະ ເມື່ອເຖິງຕອນກາງຄືນຂ້າພະເຈົ້າກໍຍັງເປັ່ງສຽງຂອງຂ້າພະເຈົ້າຂຶ້ນເຖິງຟ້າສະຫວັນ.
“ແລະ ສຸລະສຽງມາເຖິງຂ້າພະເຈົ້າ, ມີຄວາມວ່າ: ເອໂນດ, ບາບຂອງເຈົ້າໄດ້ຮັບການອະໄພໃຫ້ແລ້ວ, ແລະ ເຈົ້າຈະໄດ້ຮັບພອນ.
“ແລະ ຂ້າພະເຈົ້າເອໂນດຮູ້ວ່າພຣະເຈົ້າຈະບໍ່ຕົວະ; ດັ່ງນັ້ນ, ຄວາມຜິດຂອງຂ້າພະເຈົ້າຈຶ່ງຖືກກວາດລ້າງໄປ.
“ແລະ ຂ້າພະເຈົ້າໄດ້ທູນຖາມວ່າ: ຂ້າແດ່ພຣະອົງເຈົ້າ, ມັນເປັນໄປໄດ້ແນວໃດ?
“ແລະ ພຣະອົງໄດ້ກ່າວກັບຂ້າພະເຈົ້າວ່າ: ເພາະສັດທາຂອງເຈົ້າໃນພຣະຄຣິດ, ຜູ້ທີ່ເຈົ້າບໍ່ເຄີຍໄດ້ຍິນ ຫລື ໄດ້ເຫັນມາກ່ອນ. ແລະ ຫລາຍປີຈະຜ່ານໄປກ່ອນທີ່ພຣະອົງຈະສະແດງພຣະອົງເອງໃຫ້ປະຈັກໃນເນື້ອໜັງ; ດັ່ງນັ້ນ, ຈົ່ງໄປເຖີດ, ສັດທາຂອງເຈົ້າເຮັດໃຫ້ເຈົ້າບໍລິບູນແລ້ວ.”7
ບົດຮຽນທີ່ໄດ້ເປັນພອນໃຫ້ແກ່ຂ້າພະເຈົ້າແມ່ນຢູ່ໃນຖ້ອຍຄຳເຫລົ່ານີ້: “ເພາະສັດທາຂອງເຈົ້າໃນພຣະຄຣິດ, ຜູ້ທີ່ເຈົ້າບໍ່ເຄີຍໄດ້ຍິນ ຫລື ໄດ້ເຫັນມາກ່ອນ.”
ໂຈເຊັບມີສັດທາໃນພຣະຄຣິດ ທີ່ຈະເຂົ້າໄປໃນປ່າ ແລະ ອະທິຖານທູນຂໍໃຫ້ຫລຸດພົ້ນຈາກອຳນາດຂອງຊາຕານ. ເພິ່ນຍັງບໍ່ທັນໄດ້ເຫັນພຣະບິດາ ແລະ ພຣະບຸດເທື່ອ, ແຕ່ເພິ່ນໄດ້ອະທິຖານດ້ວຍສັດທາ ແລະ ດ້ວຍພະລັງທັງໝົດໃນໃຈຂອງເພິ່ນ.
ປະສົບການຂອງເອໂນດກໍເປັນບົດຮຽນທີ່ດີແກ່ຂ້າພະເຈົ້າຄືກັນ. ເມື່ອຂ້າພະເຈົ້າອະທິຖານດ້ວຍສັດທາ, ຂ້າພະເຈົ້າມີພຣະຜູ້ຊ່ວຍໃຫ້ລອດເປັນຜູ້ວິງວອນແທນກັບພຣະບິດາ ແລະ ຂ້າພະເຈົ້າກໍຮູ້ສຶກວ່າຄຳອະທິຖານຂອງຂ້າພະເຈົ້າຂຶ້ນໄປຮອດສະຫວັນ. ເຮົາຈະໄດ້ຮັບຄຳຕອບ. ມີການຮັບພອນຕ່າງໆ. ເຖິງແມ່ນຢູ່ໃນຍາມຂັດສົນ ເຮົາຈະມີຄວາມສະຫງົບ ແລະ ຄວາມປິຕິຍິນດີ.
ຂ້າພະເຈົ້າຈື່ໄດ້ວ່າ ຕອນເປັນສະມາຊິກຂອງກຸ່ມອັກຄະສາວົກສິບສອງໃໝ່ໆ, ຂ້າພະເຈົ້າໄດ້ນັ່ງຄຸເຂົ່າອະທິຖານກັບແອວເດີ ເດວິດ ບີ ເຮດ. ຕອນນັ້ນເພິ່ນມີອາຍຸສ່ຳຂ້າພະເຈົ້າໃນຕອນນີ້, ແລະ ໄດ້ມີບັນຫາຄືກັນກັບເພິ່ນໃນຕອນນັ້ນ. ຂ້າພະເຈົ້າຈື່ນ້ຳສຽງຂອງເພິ່ນໄດ້ຕອນເພິ່ນອະທິຖານ. ຂ້າພະເຈົ້າບໍ່ໄດ້ມືນຕາເບິ່ງເພິ່ນ, ແຕ່ຟັງແລ້ວຄືວ່າເພິ່ນກຳລັງຍິ້ມຢູ່. ເພິ່ນໄດ້ເວົ້າລົມກັບພຣະບິດາເທິງສະຫວັນດ້ວຍນ້ຳສຽງທີ່ດີໃຈ.
ຂ້າພະເຈົ້າສາມາດໄດ້ຍິນນ້ຳສຽງທີ່ດີໃຈຂອງເພິ່ນ ເມື່ອເພິ່ນເວົ້າວ່າ. “ໃນພຣະນາມຂອງພຣະເຢຊູຄຣິດ.” ຟັງແລ້ວຄືວ່າ ແອວເດີ ເຮດ ໄດ້ຮູ້ສຶກວ່າພຣະຜູ້ຊ່ວຍໄດ້ຮັບຮອງຄຳເວົ້າຂອງເພິ່ນເມື່ອເພິ່ນອະທິຖານຫາພຣະບິດາ. ແລະ ຂ້າພະເຈົ້າແນ່ໃຈວ່າ ພຣະອົງຮັບຟັງຄຳອະທິຖານນັ້ນດ້ວຍຮອຍຍິ້ມເຊັ່ນກັນ.
ຄວາມສາມາດຂອງເຮົາໃນການມີສ່ວນຊ່ວຍທີ່ສຳຄັນໃນການຟື້ນຟູອັນຕໍ່ເນື່ອງທີ່ດີເລີດ ຈະເພີ່ມຂຶ້ນເມື່ອມີສັດທາອັນແຮງກ້າໃນພຣະເຢຊູຄຣິດ ວ່າເປັນພຣະຜູ້ຊ່ວຍໃຫ້ລອດຂອງເຮົາ ແລະ ພຣະບິດາເທິງສະຫວັນເປັນພຣະບິດາທີ່ຊົງຮັກຂອງເຮົາ. ເມື່ອເຮົາອະທິຖານດ້ວຍສັດທາ, ເຮົາກາຍເປັນພາກສ່ວນທີ່ສຳຄັນໃນວຽກງານຂອງພຣະຜູ້ເປັນເຈົ້າ ເມື່ອພຣະອົງຕຽມໂລກນີ້ເພື່ອການສະເດັດມາຄັ້ງທີສອງຂອງພຣະອົງ. ຂ້າພະເຈົ້າອະທິຖານວ່າ ເຮົາຈະພົບເຫັນຄວາມສຸກໃນວຽກງານທີ່ພຣະອົງເຊື້ອເຊີນໃຫ້ເຮົາແຕ່ລະຄົນກະທຳ.
ຂ້າພະເຈົ້າເປັນພະຍານວ່າ ພຣະເຢຊູຄຣິດ ຊົງພຣະຊົນຢູ່. ນີ້ແມ່ນສາດສະໜາຈັກ ແລະ ອານາຈັກຂອງພຣະອົງຢູ່ເທິງໂລກ. ໂຈເຊັບ ສະມິດ ເປັນສາດສະດາແຫ່ງການຟື້ນຟູ. ປະທານຣະໂຊ ເອັມ ແນວສັນ ເປັນສາດສະດາຂອງພຣະຜູ້ເປັນເຈົ້າຢູ່ເທິງໂລກໃນປະຈຸບັນນີ້. ເພິ່ນເປັນຜູ້ຖືຂໍກະແຈທັງໝົດຂອງຖານະປະໂລຫິດ ໃນສາດສະໜາຈັກຂອງພຣະເຢູຄຣິດແຫ່ງໄພ່ພົນຍຸກສຸດທ້າຍ. ໃນພຣະນາມຂອງພຣະເຢຊູຄຣິດ, ອາແມນ.