ການຮັບປະກັນການພິພາກສາອັນຊອບທຳ

ໂດຍ ແອວເດີ ເຈມສ໌ ອາ ແຣັສ໌ແບນ

ແຫ່ງສາວົກເຈັດສິບ

ເພື່ອຮັບປະກັນວ່າຈະມີການພິພາກສາອັນຊອບທຳ, ການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດຈະກຳຈັດຄວາມໂງ່ຈ້າ ແລະ ສ້ຽນໜາມແຫ່ງຄວາມເຈັບປວດ ທີ່ເກີດຈາກຄົນອື່ນ.

ພຣະຄຳພີມໍມອນສິດສອນຄຳສອນຂອງພຣະຄຣິດ

ເດືອນຕຸລາແລ້ວນີ້, ປະທານຣະໂຊ ເອັມ ແນວສັນ ໄດ້ທ້າທາຍເຮົາໃຫ້ພິຈາລະນາວິທີທີ່ຊີວິດຂອງເຮົາຈະແຕກຕ່າງແນວໃດ ຖ້າຫາກ “ຄວາມຮູ້ຂອງເຮົາທີ່ໄດ້ຮັບຈາກພຣະຄຳພີມໍມອນໄດ້ຖືກເອົາໄປຈາກເຮົາໃນທັນທີທັນໃດ.”¹ ຂ້າພະເຈົ້າໄດ້ໄຕ່ຕອງຄຳຖາມຂອງເພິ່ນ, ຊຶ່ງຂ້າພະເຈົ້າແນ່ໃຈວ່າ ພວກທ່ານຫລາຍຄົນກໍເຮັດຄືກັນ. ຄວາມຄິດໜຶ່ງໄດ້ຫວນກັບຄືນມາເທື່ອແລ້ວເທື່ອອີກ—ຖ້າປາດສະຈາກພຣະຄຳພີມໍມອນ ແລະ ຄວາມແຈ່ມແຈ້ງຂອງມັນກ່ຽວກັບຄຳສອນຂອງພຣະຄຣິດ ແລະ ການເສຍສະລະຊົດໃຊ້ຂອງພຣະອົງ, ແລ້ວຂ້າພະເຈົ້າຈະຫັນໄປຫາຄວາມສະຫງົບໄດ້ຢູ່ບ່ອນໃດ?

ຄຳສອນຂອງພຣະຄຣິດ—ຊຶ່ງປະກອບດ້ວຍຫລັກທຳ ແລະ ພິທີການຊ່ວຍໃຫ້ລອດແຫ່ງສັດທາໃນພຣະຄຣິດ, ການກັບໃຈ, ການບັບຕິສະມາ, ຂອງປະທານແຫ່ງພຣະວິນຍານບໍລິສຸດ, ແລະ ການອົດທົນຈົນເຖິງທີ່ສຸດ—ໄດ້ຖືກສິດສອນຫລາຍໆເທື່ອ ໃນພຣະຄຳພີທັງໝົດແຫ່ງການຟື້ນຟູ ແຕ່ດ້ວຍພະລັງຢູ່ໃນພຣະຄຳພີມໍມອນ ໂດຍສະເພາະ.² ຄຳສອນເລີ່ມຕົ້ນດ້ວຍສັດທາໃນພຣະຄຣິດ, ແລະ ທຸກພາກສ່ວນຂອງມັນແມ່ນຂຶ້ນກັບການໄວ້ວາງໃຈໃນການເສຍສະລະຊົດໃຊ້ຂອງພຣະອົງ.

ດັ່ງທີ່ປະທານແນວສັນໄດ້ສິດສອນວ່າ, “ພຣະຄຳພີມໍມອນໄດ້ໃຫ້ຄວາມເຂົ້າໃຈທີ່ສົມບູນ ແລະ ເຊື່ອຖືໄດ້ທີ່ສຸດ ເຖິງການຊົດໃຊ້ຂອງພຣະເຢຊູຄຣິດ ຫລາຍກວ່າໃນໜັງສືເຫລັ້ມອື່ນໆ.”³ ເມື່ອເຮົາເຂົ້າໃຈກ່ຽວກັບຂອງປະທານທີ່ສູງສົ່ງຂອງພຣະຜູ້ຊ່ວຍໃຫ້ລອດ ຫລາຍຂຶ້ນເທົ່າໃດ, ເຮົາຈະຮູ້ຈັກ, ໃນຈິດໃຈ ແລະ ໃນຫົວໃຈຂອງເຮົາຫລາຍຂຶ້ນເທົ່ານັ້ນ,⁴ ເຖິງຄວາມຈິງແທ້ ຊຶ່ງປະທານແນວສັນໄດ້ໃຫ້ເຮົາໝັ້ນໃຈໄດ້ ທີ່ວ່າ “ຄວາມຈິງຂອງພຣະຄຳພີມໍມອນ ມີ ພະລັງ ທີ່ຈະປິ່ນປົວ, ປອບໂຍນ, ຟື້ນຟູ, ຊ່ວຍເຫລືອ, ເພີ່ມຄວາມເຂັ້ມແຂງ, ເຮັດໃຫ້ສະບາຍໃຈຂຶ້ນ, ແລະ ເປັນກຳລັງໃຈໃຫ້ຈິດວິນຍານຂອງເຮົາ.”⁵

ການຊົດໃຊ້ຂອງພຣະຜູ້ຊ່ວຍໃຫ້ລອດສະໜອງຂໍ້ຮຽກຮ້ອງຂອງຄວາມຍຸດຕິທຳທັງໝົດ.

ສິ່ງຊ່ວຍເຫລືອທີ່ສຳຄັນ ແລະ ໃຫ້ຄວາມສະຫງົບຈາກພຣະຄຳພີມໍມອນ ຕໍ່ຄວາມເຂົ້າໃຈເຖິງການຊົດໃຊ້ຂອງພຣະຜູ້ຊ່ວຍໃຫ້ລອດ ແມ່ນຄຳສອນຂອງມັນ ວ່າການເສຍສະລະດ້ວຍຄວາມເມດຕາຂອງພຣະຄຣິດ ໄດ້ສະໜອງຂໍ້ຮຽກຮ້ອງຂອງຄວາມຍຸດຕິທຳ. ດັ່ງທີ່ແອວມາໄດ້ອະທິບາຍວ່າ, “ສະນັ້ນ ພຣະເຈົ້າເອງຈຶ່ງ ຊົດໃຊ້ແທນບາບຂອງໂລກ, ເພື່ອນຳແຜນແຫ່ງຄວາມເມດຕາມາ, ເພື່ອໃຫ້ພຽງພໍແກ່ຂໍ້ຮຽກຮ້ອງຂອງຄວາມຍຸດຕິທຳ, ເພື່ອພຣະເຈົ້າຈະເປັນພຣະເຈົ້າທີ່ດີພ້ອມ, ທ່ຽງທຳ, ແລະ ເປັນພຣະເຈົ້າຜູ້ເມດຕານຳອີກ.”⁶ ແຜນແຫ່ງຄວາມເມດຕາຂອງພຣະບິດາ⁷—ສິ່ງທີ່ພຣະຄຳພີເອີ້ນອີກວ່າ ແຜນແຫ່ງຄວາມສຸກ⁸ ຫລື ແຜນແຫ່ງຄວາມລອດ⁹—ບໍ່ສາມາດສຳເລັດ ຍົກເວັ້ນແຕ່ ຕ້ອງເຮັດຕາມຂໍ້ຮຽກຮ້ອງຂອງຄວາມຍຸດຕິທຳທັງໝົດ.

ແຕ່ “ຂໍ້ຮຽກຮ້ອງຂອງຄວາມຍຸດຕິທຳ” ຄືຫຍັງ? ໃຫ້ເຮົາມາພິຈາລະນາປະສົບການຂອງແອວມາ. ທ່ານຄົງຈື່ໄດ້ ຕອນຍັງໜຸ່ມ, ແອວມາໄດ້ເລາະຊອກ “ທຳລາຍສາດສະໜາຈັກ.”¹⁰ ຕາມຈິງແລ້ວ, ແອວມາໄດ້ບອກຮີລາມັນ ລູກຊາຍຂອງເພິ່ນວ່າ ເພິ່ນໄດ້ຮັບທຸກ “ທໍລະມານດ້ວຍຄວາມເຈັບປວດແຫ່ງນະລົກ” ເພາະເພິ່ນ “ໄດ້ຂ້າລູກຫລານ [ຂອງພຣະເຈົ້າ] ມາຢ່າງຫລວງຫລາຍ” ໂດຍການຊັກນຳ “ພວກເຂົາໄປຫາຄວາມທຸກທໍລະມານ.”¹¹

ແອວມາໄດ້ອະທິບາຍຕໍ່ຮີລາມັນວ່າ ໃນທີ່ສຸດຄວາມສະຫງົບໄດ້ມາສູ່ເພິ່ນ ເມື່ອເພິ່ນ “ລະນຶກເຖິງ” ຄຳສອນຂອງບິດາຂອງເພິ່ນ “ກ່ຽວກັບການສະເດັດມາຂອງ … ພຣະເຢຊູຄຣິດ … ເພື່ອຊົດໃຊ້ແທນບາບຂອງໂລກ.”¹² ແອວມາຜູ້ສຳນຶກຜິດໄດ້ອ້ອນວອນຂໍຄວາມເມດຕາຈາກພຣະຄຣິດ¹³ ແລະ ແລ້ວໄດ້ຮູ້ສຶກມີຄວາມສຸກ ແລະ ຮັບຄວາມບັນເທົາ ເມື່ອເພິ່ນຮັບຮູ້ວ່າ ພຣະຄຣິດໄດ້ຊົດໃຊ້ແທນບາບຂອງເພິ່ນ ແລະ ໄດ້ຈ່າຍຄ່າທັງໝົດທີ່ຄວາມຍຸດຕິທຳຮຽກຮ້ອງ. ອີກເທື່ອໜຶ່ງ, ຄວາມຍຸດຕິທຳຮຽກຮ້ອງສິ່ງໃດຈາກແອວມາ? ດັ່ງທີ່ແອວມາໄດ້ສິດສອນຈາກນັ້ນ, “ຈະບໍ່ມີສິ່ງທີ່ບໍ່ສະອາດຈະສາມາດຮັບເອົາອານາຈັກຂອງພຣະເຈົ້າເປັນມູນມໍລະດົກໄດ້.”¹⁴ ດັ່ງນັ້ນ, ຄວາມບັນເທົາສ່ວນໜຶ່ງຂອງແອວມາ ອາດເປັນວ່າ ຖ້າຄວາມເມດຕາບໍ່ໄດ້ຮ້ອງຂໍ, ຄວາມຍຸດຕິທຳອາດກີດກັນເພິ່ນຈາກການກັບໄປຢູ່ນຳພຣະບິດາເທິງສະຫວັນ.¹⁵

ພຣະຜູ້ຊ່ວຍໃຫ້ລອດປິ່ນປົວບາດແຜທີ່ເຮົາບໍ່ສາມາດປິ່ນປົວ

ແຕ່ຄວາມສຸກຂອງແອວມາ ເຈາະຈົງຢູ່ທີ່ຕົວເພິ່ນເອງບໍ—ຢູ່ທີ່ການຫລີກເວັ້ນຈາກການລົງໂທດ ຂອງເພິ່ນ ແລະ ການທີ່ ເພິ່ນ ສາມາດກັບຄືນໄປຫາພຣະບິດາເທົ່ານັ້ນບໍ? ເຮົາຮູ້ວ່າແອວມາກໍຍັງທຸກທໍລະມານກ່ຽວກັບຜູ້ທີ່ເພິ່ນໄດ້ຊັກນຳໃຫ້ໜີຈາກຄວາມຈິງນຳອີກ.¹⁶ ແຕ່ແອວມາເອງບໍ່ສາມາດປິ່ນປົວ ແລະ ພາຜູ້ທີ່ເພິ່ນໄດ້ຊັກນຳໃຫ້ໜີໄປກັບຄືນມາ. ດ້ວຍຕົວເພິ່ນເອງ ເພິ່ນບໍ່ສາມາດຮັບປະກັນວ່າ ພວກເຂົາຈະໄດ້ຮັບໂອກາດທີ່ສົມຄວນ ເພື່ອຮຽນຮູ້ຄຳສອນຂອງພຣະຄຣິດ ແລະ ໄດ້ຮັບພອນໂດຍການດຳລົງຊີວິດຕາມຫລັກທຳທີ່ປິຕິຍິນດີຂອງມັນຫລືບໍ່. ເພິ່ນບໍ່ສາມາດພາຄົນທີ່ຕາຍໄປແລ້ວ ຊຶ່ງຍັງຕາບອດກັບຄຳສອນເທັດຂອງເພິ່ນກັບຄືນມາ.

ດັ່ງທີ່ປະທານບອຍ ເຄ ແພ໊ກເກີ ຄັ້ງໜຶ່ງໄດ້ສິດສອນວ່າ: “ຄວາມຄິດທີ່ຊ່ວຍກູ້ແອວມາ … ແມ່ນສິ່ງນີ້: ການຟື້ນຟູສິ່ງທີ່ເຈົ້າບໍ່ສາມາດຟື້ນຟູ, ການປິ່ນປົວສິ່ງທີ່ເຈົ້າບໍ່ສາມາດປິ່ນປົວ, ການດັດແປງສິ່ງທີ່ເຈົ້າເຮັດແຕກຫັກ ແລະ ເຈົ້າບໍ່ສາມາດສ້ອມແປງ ນັ້ນຄືຈຸດປະສົງຂອງການຊົດໃຊ້ຂອງພຣະຄຣິດ.”¹⁷ ຄວາມຈິງທີ່ໜ້າຊື່ນຊົມຢູ່ໃນຄວາມຄິດຂອງແອວມາ ແມ່ນການ “ລະນຶກເຖິງ” ບໍ່ແມ່ນແຕ່ກ່ຽວກັບເພິ່ນໄດ້ຖືກຊຳລະໃຫ້ສະອາດເທົ່ານັ້ນ ແຕ່ຜູ້ທີ່ເພິ່ນໄດ້ທຳຮ້າຍສາມາດຫາຍດີນຳອີກ.

ການເສຍສະລະຂອງພຣະຜູ້ຊ່ວຍໃຫ້ລອດຮັບປະກັນການພິພາກສາອັນຊອບທຳ

ຫລາຍປີ ກ່ອນແອວມາໄດ້ຖືກຊ່ວຍກູ້ໂດຍຄຳສອນທີ່ໃຫ້ຄວາມໝັ້ນໃຈ, ກະສັດເບັນຢາມິນໄດ້ສິດສອນກ່ຽວກັບຄວາມກວ້າງຂວາງຂອງການປິ່ນປົວ ທີ່ການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດສະເໜີມອບໃຫ້. ກະສັດເບັນຢາມິນໄດ້ປະກາດວ່າ ເພິ່ນໄດ້ຮັບ “ຂ່າວອັນໜ້າຊື່ນຊົມ” ຈາກ “ທູດອົງໜຶ່ງຈາກພຣະເຈົ້າ.”¹⁸ ໃນບັນດາຂ່າວອັນໜ້າຊື່ນຊົມເຫລົ່ານັ້ນ ແມ່ນຄວາມຈິງທີ່ວ່າພຣະຄຣິດຈະຮັບທຸກທໍລະມານ ແລະ ສິ້ນພຣະຊົນແທນບາບ ແລະ ຄວາມຜິດຂອງເຮົາ ເພື່ອຮັບປະກັນວ່າ “ການ ພິພາກສາອັນຊອບທຳ ຈະໄດ້ມາເຖິງລູກຫລານມະນຸດ.”¹⁹

ແມ່ນຫຍັງທີ່ “ການພິພາກສາອັນຊອບທຳ” ຮຽກຮ້ອງ? ໃນຂໍ້ຕໍ່ໄປ, ກະສັດເບັນຢາມິນໄດ້ອະທິບາຍວ່າ ເພື່ອຮັບປະກັນການພິພາກສາອັນຊອບທຳ, ໂລຫິດຂອງພຣະຜູ້ຊ່ວຍໃຫ້ລອດ ຈຶ່ງໄດ້ຊົດໃຊ້ແທນ “ບາບຂອງຄົນທີ່ຕົກໄປຍ້ອນການລ່ວງລະເມີດຂອງອາດາມ” ແລະ ແທນ “ຜູ້ທີ່ຕາຍໂດຍບໍ່ຮູ້ຈັກພຣະປະສົງຂອງພຣະເຈົ້າກ່ຽວກັບພວກເຂົາ, ຫລື ຜູ້ທີ່ເຮັດບາບ ໂດຍບໍ່ຮູ້.”²⁰ ເພິ່ນໄດ້ສິດສອນວ່າ ການພິພາກສາອັນຊອບທຳກໍຍັງຮຽກຮ້ອງໃຫ້ “ໂລຫິດຂອງພຣະຄຣິດຊົດໃຊ້ແທນ” ບາບຂອງເດັກນ້ອຍໆ.²¹

ຂໍ້ພຣະຄຳພີເຫລົ່ານີ້ ສິດສອນຄຳສອນທີ່ສະຫງ່າລາສີ: ການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດ ປິ່ນປົວ, ມອບໃຫ້ລ້າໆ, ຕໍ່ຜູ້ທີ່ເຮັດບາບໂດຍບໍ່ຮູ້—ຜູ້ທີ່ຢາໂຄບກ່າວເຖິງວ່າ ເປັນຄົນທີ່, “ບໍ່ມີກົດໄວ້ໃຫ້.”²² ຄວາມຮັບຜິດຊອບສຳລັບບາບ ຂຶ້ນຢູ່ກັບຄວາມຮູ້ທີ່ເຮົາໄດ້ຮັບ ແລະ ກັບຄວາມສາມາດທີ່ເຮົາໃຊ້ນຳອຳເພີໃຈ.²³ ເຮົາຮູ້ເຖິງຄວາມຈິງທີ່ປິ່ນປົວ ແລະ ປອບໂຍນນີ້ ພຽງແຕ່ເປັນເພາະ ພຣະຄຳພີມໍມອນ ແລະ ພຣະຄຳພີອື່ນໆແຫ່ງການຟື້ນຟູເທົ່ານັ້ນ.²⁴

ແນ່ນອນ, ໃນບ່ອນທີ່ມີກົດຕັ້ງໄວ້, ເມື່ອເຮົາຮູ້ວ່າເຮົາເຮັດຫຍັງກັບພຣະປະສົງຂອງພຣະເຈົ້າ, ເຮົາຈະຕ້ອງຮັບຜິດຊອບ. ດັ່ງທີ່ກະສັດເບັນຢາມິນໄດ້ເນັ້ນວ່າ: “ວິບັດແກ່ຜູ້ທີ່ຮູ້ວ່າຕົນກະບົດຕໍ່ພຣະເຈົ້າ! ເພາະຄວາມລອດຈະບໍ່ມາຫາຄົນແນວນັ້ນ ນອກຈາກຈະເປັນໂດຍທາງການກັບໃຈ ແລະ ມີສັດທາໃນອົງພຣະເຢຊູຄຣິດເຈົ້າ” ເທົ່ານັ້ນ.²⁵

ສິ່ງນີ້ກໍເປັນຂ່າວອັນໜ້າຊື່ນຊົມຂອງຄຳສອນຂອງພຣະຄຣິດຄືກັນ. ພຣະຜູ້ຊ່ວຍໃຫ້ລອດບໍ່ພຽງແຕ່ປິ່ນປົວ ແລະ ຟື້ນຟູຜູ້ທີ່ໄດ້ເຮັດບາບໂດຍບໍ່ຮູ້ເທົ່ານັ້ນ, ແຕ່ສຳລັບຜູ້ທີ່ໄດ້ເຮັດບາບຕ້ານຄວາມຮູ້, ພຣະຜູ້ຊ່ວຍໃຫ້ລອດໄດ້ສະເໜີການປິ່ນປົວ ໃນເງື່ອນໄຂແຫ່ງການກັບໃຈ ແລະ ມີສັດທາໃນພຣະອົງນຳອີກ.²⁶

ແອວມາຄົງໄດ້ “ລະນຶກເຖິງ” ຄວາມຈິງທັງສອງຢ່າງນີ້. ແອວມາຈະຮູ້ສຶກສິ່ງທີ່ເພິ່ນບັນຍາຍແທ້ໆບໍ ທີ່ວ່າ “ຄວາມສຸກ … ທີ່ງົດງາມ”²⁷ ຖ້າຫາກເພິ່ນຄິດວ່າພຣະຄຣິດໄດ້ກູ້ຊີວິດເພິ່ນ ແຕ່ໄດ້ປະຖິ້ມຜູ້ທີ່ເພິ່ນໄດ້ຊັກນຳໃຫ້ໜີໄປຈາກຄວາມຈິງ? ຄົງບໍ່ເປັນແນວນັ້ນ. ກ່ອນທີ່ແອວມາຈະຮູ້ສຶກສະຫງົບຢ່າງສົມບູນໄດ້, ຄົນທີ່ເພິ່ນໄດ້ທຳຮ້າຍ ກໍຈະຕ້ອງໄດ້ຮັບໂອກາດຖືກເຮັດໃຫ້ດີຄືນ.

ເຮັດແນວໃດເຂົາເຈົ້າ—ຫລື ຜູ້ທີ່ເຮົາໄດ້ທຳຮ້າຍ—ຈະຖືກເຮັດໃຫ້ດີຄືນໄດ້? ເຖິງແມ່ນວ່າເຮົາບໍ່ເຂົ້າໃຈຂັ້ນຕອນທີ່ສັກສິດທັງໝົດຂອງການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດ ທີ່ປິ່ນປົວ ແລະ ຟື້ນຟູ, ແຕ່ເຮົາຮູ້ວ່າ ເພື່ອຮັບປະກັນການພິພາກສາອັນຊອບທຳ, ພຣະຜູ້ຊ່ວຍໃຫ້ລອດຈະກຳຈັດສິ່ງທີ່ກີດຂວາງຄວາມໂງ່ຂ້າ ແລະ ສ້ຽນໜາມແຫ່ງຄວາມເຈັບປວດ ທີ່ເກີດຈາກຄົນອື່ນ.²⁸ ໂດຍການເຮັດສິ່ງນີ້ ພຣະອົງຮັບປະກັນວ່າ ລູກໆຂອງພຣະເຈົ້າທຸກຄົນຈະໄດ້ຮັບໂອກາດ, ດ້ວຍວິໄສທັດແບບບໍ່ມືດມົວ, ເພື່ອເລືອກຕິດຕາມພຣະອົງ ແລະ ຮັບເອົາແຜນແຫ່ງຄວາມສຸກທີ່ຍິ່ງໃຫຍ່.²⁹

ພຣະຜູ້ຊ່ວຍໃຫ້ລອດຈະສ້ອມແປງທຸກສິ່ງທີ່ເຮົາເຮັດແຕກຫັກ

ຄົງເປັນຄວາມຈິງເຫລົ່ານີ້ ທີ່ນຳຄວາມສະຫງົບມາໃຫ້ແອວມາ. ແລະ ຄວາມຈິງເຫລົ່ານີ້ຈະນຳຄວາມສຸກອັນຍິ່ງໃຫຍ່ມາໃຫ້ເຮົາຄືກັນ. ຕາມທຳມະຊາດຂອງມະນຸດຊາຍ ແລະ ຍິງ, ເຮົາຈະກະທົບກະແທກກັນ, ບາງເທື່ອເຮົາຈະມີປາກມີສຽງ, ແລະ ເຮັດໃຫ້ເກີດມີຄວາມເຈັບປວດ. ດັ່ງທີ່ຜູ້ເປັນພໍ່ແມ່ສາມາດກ່າວເປັນພະຍານ, ຄວາມເຈັບປວດທີ່ກ່ຽວກັບຄວາມຜິດຂອງເຮົາ ບໍ່ພຽງແຕ່ເຮົາຢ້ານຖືກລົງໂທດເທົ່ານັ້ນ ແຕ່ເຮົາຍັງຢ້ານວ່າເຮົາຈະຈຳກັດຄວາມສຸກຂອງລູກເຮົານຳອີກ ໃນທາງທີ່ກີດກັນເຂົາຈາກການເຫັນ ແລະ ການເຂົ້າໃຈຄວາມຈິງ. ຄຳສັນຍາທີ່ສະຫງ່າລາສີຂອງການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດແມ່ນວ່າ ໃນກໍລະນີເລື່ອງຄວາມຜິດຂອງພໍ່ແມ່, ພຣະອົງຖືວ່າຜູ້ເປັນລູກບໍ່ມີຄວາມຜິດ ແລະ ສັນຍາທີ່ຈະປິ່ນປົວພວກເຂົາ.³⁰ ແລະ ແມ່ນແຕ່ເວລາທີ່ພວກເຂົາໄດ້ເຮັດບາບຕ້ານຄວາມຮູ້—ດັ່ງທີ່ເຮົາທຸກຄົນຮູ້—ແຂນແຫ່ງຄວາມເມດຕາຂອງພຣະອົງຍັງເດ່ອອກມາຢູ່,³¹ ແລະ ພຣະອົງຈະໄຖ່ພວກເຂົາ ຖ້າຫາກພວກເຂົາພຽງແຕ່ຫວັງເພິ່ງພຣະອົງ ແລະ ມີຊີວິດ.³²

ເຖິງແມ່ນວ່າພຣະຜູ້ຊ່ວຍໃຫ້ລອດມີອຳນາດທີ່ຈະສ້ອມແປງສິ່ງທີ່ເຮົາບໍ່ສາມາດສ້ອມແປງ, ແຕ່ພຣະອົງບັນຊາເຮົາໃຫ້ເຮັດທຸກສິ່ງທີ່ເຮົາສາມາດເຮັດໄດ້ເພື່ອສ້ອມແປງ ຊຶ່ງເປັນພາກສ່ວນຂອງການກັບໃຈ.³³ ບາບ ແລະ ຄວາມຜິດຂອງເຮົາບໍ່ພຽງແຕ່ຕັດຄວາມສຳພັນຂອງເຮົາກັບພຣະເຈົ້າເທົ່ານັ້ນ ແຕ່ຍັງຕັດຄວາມສຳພັນຂອງເຮົາກັບຄົນອື່ນໆນຳອີກ. ບາງເທື່ອຄວາມພະຍາຍາມຂອງເຮົາທີ່ຈະປິ່ນປົວ ແລະ ຟື້ນຟູ ແມ່ນພຽງແຕ່ການກ່າວຄຳຂໍໂທດເທົ່ານັ້ນ, ແຕ່ບາງເທື່ອການສ້ອມແປງອາດຮຽກຮ້ອງຫລາຍປີດ້ວຍຄວາມພະຍາຍາມທີ່ຖ່ອມຕົວ.³⁴ ແຕ່, ສຳລັບບາບ ແລະ ຄວາມຜິດຂອງເຮົາຫລາຍຢ່າງ, ເຮົາອາດບໍ່ສາມາດປິ່ນປົວຄົນທີ່ເຮົາໄດ້ເຮັດໃຫ້ເຈັບປວດ ໃຫ້ຫາຍດີເປັນປົກກະຕິໄດ້. ຄຳສັນຍາທີ່ງົດງາມ ແລະ ໃຫ້ຄວາມສະຫງົບຂອງພຣະຄຳພີມໍມອນ ແລະ ພຣະກິດຕິຄຸນທີ່ຟື້ນຟູແມ່ນວ່າ ພຣະຜູ້ຊ່ວຍໃຫ້ລອດຈະສ້ອມແປງທຸກສິ່ງທີ່ເຮົາເຮັດແຕກຫັກ.³⁵ ແລະ ພຣະອົງຈະສ້ອມແປງເຮົານຳອີກ ຖ້າຫາກເຮົາກັບຄືນມາຫາພຣະອົງດ້ວຍສັດທາ ແລະ ກັບໃຈຈາກຄວາມເຈັບປວດທີ່ເຮົາໄດ້ເຮັດ.³⁶ ພຣະອົງສະເໜີມອບຂອງປະທານທັງສອງນີ້ ເພາະວ່າພຣະອົງຮັກເຮົາທຸກຄົນດ້ວຍຄວາມຮັກທີ່ບໍລິບູນ³⁷ ແລະ ເພາະວ່າພຣະອົງໄດ້ສັນຍາຮັບປະກັນການພິພາກສາອັນຊອບທຳ ທີ່ນັບຖືຄວາມຍຸດຕິທຳ ແລະ ຄວາມເມດຕາ. ຂ້າພະເຈົ້າເປັນພະຍານວ່າ ສິ່ງນີ້ເປັນຄວາມຈິງ ໃນພຣະນາມຂອງພຣະເຢຊູຄຣິດ, ອາແມນ.