ແຜນອັນຍິ່ງໃຫຍ່
ເຮົາຜູ້ທີ່ຮູ້ຈັກແຜນຂອງພຣະເຈົ້າ ແລະ ໄດ້ເຮັດພັນທະສັນຍາທີ່ຈະເຂົ້າຮ່ວມ ມີໜ້າທີ່ຮັບຜິດຊອບຢ່າງແຈ່ມແຈ້ງ ເພື່ອສິດສອນຄວາມຈິງເຫລົ່ານີ້.
ເຖິງແມ່ນໃນທ່າມກາງການທົດລອງ ແລະ ການທ້າທາຍທີ່ຕ່າງໝູ່ນີ້, ເຮົາກໍຍັງໄດ້ຮັບພອນຢ່າງຫລວງຫລາຍຢູ່! ກອງປະຊຸມໃຫຍ່ສາມັນນີ້ໄດ້ໃຫ້ຄວາມຈິງ ແລະ ຄວາມຊື່ນຊົມເຖິງການຟື້ນຟູພຣະກິດຕິຄຸນຂອງພຣະເຢຊູຄຣິດ. ເຮົາປິຕິຍິນດີກັບພາບທີ່ມາໃຫ້ເຫັນຂອງພຣະບິດາ ແລະ ພຣະບຸດ ຊຶ່ງໄດ້ເລີ່ມຕົ້ນການຟື້ນຟູ. ເຮົາໄດ້ຖືກເຕືອນເຖິງການອອກມາຢ່າງປະຕິຫານຂອງພຣະຄຳພີມໍມອນ, ຊຶ່ງຈຸດປະສົງແມ່ນເປັນພະຍານເຖິງພຣະເຢຊູຄຣິດ ແລະ ຄຳສອນຂອງພຣະອົງ. ເຮົາໄດ້ຮັບ ແລະ ຊື່ນຊົມກັບຄວາມຈິງຂອງການເປີດເຜີຍ—ທີ່ມອບໃຫ້ແກ່ສາດສະດາ ແລະ ເຮົາເປັນສ່ວນຕົວ. ເຮົາເຄີຍໄດ້ຍິນປະຈັກພະຍານທີ່ມີຄ່າເຖິງການຊົດໃຊ້ອັນບໍ່ມີຂອບເຂດຂອງພຣະເຢຊູຄຣິດ ແລະ ເຖິງການຟື້ນຄືນພຣະຊົນທີ່ແທ້ຈິງຂອງພຣະອົງ. ແລະ ເຮົາໄດ້ຖືກສິດສອນກ່ຽວກັບຄວາມຈິງຢ່າງອື່ນໆ ເຖິງພຣະກິດຕິຄຸນຂອງພຣະອົງທີ່ໄດ້ເປີດເຜີຍຕໍ່ ໂຈເຊັບ ສະມິດ ຫລັງຈາກພຣະບິດາໄດ້ປະກາດຕໍ່ຜູ້ຫາກໍຖືກເອີ້ນໃຫ້ເປັນສາດສະດາວ່າ: “ນີ້ຄືບຸດທີ່ຮັກຂອງເຮົາ. ຈົ່ງຟັງທ່ານ!” (ໂຈເຊັບ ສະມິດ—ປະຫວັດ 1:17).
ເຮົາໄດ້ຮັບການຢືນຢັນໃນຄວາມຮູ້ເຖິງເລື່ອງການຟື້ນຟູຂອງຖານະປະໂລຫິດ ແລະ ຂໍກະແຈຂອງມັນ. ເຮົາໄດ້ມີຄວາມຕັ້ງໃຈໃໝ່ທີ່ຈະເຮັດໃຫ້ສາດສະໜາຈັກທີ່ຟື້ນຟູຂອງພຣະຜູ້ເປັນເຈົ້າ ເປັນທີ່ຮູ້ຈັກໂດຍຊື່ແທ້ວ່າ, ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ແລະ ເຮົາໄດ້ຖືກເຊື້ອເຊີນໃຫ້ມີສ່ວນຮ່ວມໃນການຖືສິນອົດເຂົ້າ ແລະ ການອະທິຖານ ເພື່ອລົດການແຜ່ລາມຕະຫລອດທົ່ວໂລກ ໃນເວລານີ້ ແລະ ໃນອະນາຄົດ. ມື້ເຊົ້ານີ້ເຮົາໄດ້ຮັບການດົນໃຈໂດຍສາດສະດາທີ່ມີຊີວິດຢູ່ຂອງພຣະຜູ້ເປັນເຈົ້າ ສະເໜີການປະກາດແຫ່ງປະຫວັດສາດຂອງການຟື້ນຟູ. ພວກເຮົາຢືນຢັນການປະກາດນັ້ນວ່າ “ຜູ້ທີ່ສຶກສາຂ່າວສານເລື່ອງການຟື້ນຟູດ້ວຍການອະທິຖານ ແລະ ກະທຳຕາມດ້ວຍສັດທາ ຈະໄດ້ຮັບພອນໂດຍເປັນພະຍານເຖິງຈຸດປະສົງອັນສູງສົ່ງຂອງມັນ ເພື່ອກະກຽມໂລກສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ທີ່ສັນຍາໄວ້.”1
ແຜນ
ທັງໝົດນີ້ແມ່ນພາກສ່ວນຂອງແຜນແຫ່ງສະຫວັນ ຊຶ່ງມີຈຸດປະສົງທີ່ຈະຊ່ວຍລູກໆຂອງພຣະເຈົ້າໃຫ້ໄດ້ຮັບຄວາມສູງສົ່ງ ແລະ ກາຍເປັນເໝືອນດັ່ງພຣະອົງ. ໂດຍທີ່ຖືກກ່າວເຖິງຢູ່ໃນພຣະຄຳພີວ່າເປັນ “ແຜນແຫ່ງຄວາມສຸກອັນຍິ່ງໃຫຍ່,” “ແຜນແຫ່ງການໄຖ່,” ແລະ “ແຜນແຫ່ງຄວາມລອດ” (ແອວມາ 42:8, 11, 5), ແຜນນັ້ນ—ໄດ້ເປີດເຜີຍຢູ່ໃນການຟື້ນຟູ—ເລີ່ມຕົ້ນຈາກກອງປະຊຸມມະຫາສານຢູ່ໃນສະຫວັນ. ໂດຍທີ່ເປັນວິນຍານ, ເຮົາຢາກມີຊີວິດນິລັນດອນຄືກັນກັບພຣະບິດາມານດາໃນສະຫວັນຂອງເຮົາ. ໃນເວລານັ້ນເຮົາໄດ້ກ້າວໜ້າເທົ່າທີ່ເປັນໄປໄດ້ ປາດສະຈາກປະສົບການໃນຊ່ວງມະຕະ ຢູ່ໃນຮ່າງກາຍທີ່ມີເນື້ອໜັງ. ໃນການຈັດຫາປະສົບການນັ້ນໃຫ້, ພຣະເຈົ້າອົງເປັນພຣະບິດາໄດ້ວາງແຜນ ເພື່ອສ້າງໂລກນີ້. ໃນແຜນການມີຊີວິດໃນຊ່ວງມະຕະ, ເຮົາຈະເປື້ອນດ້ວຍບາບ ຂະນະທີ່ເຮົາປະເຊີນກັບການກົງກັນຂ້າມ ຊຶ່ງຈຳເປັນສຳລັບຄວາມເຕີບໂຕທາງວິນຍານຂອງເຮົາ. ເຮົາກໍຍັງຈະປະເຊີນກັບຄວາມຕາຍທາງຮ່າງກາຍນຳອີກ. ໃນການທວງເອົາເຮົາຄືນຈາກຄວາມຕາຍ ແລະ ບາບ, ແຜນຂອງພຣະບິດາເທິງສະຫວັນຈະຕ້ອງມີພຣະຜູ້ຊ່ວຍໃຫ້ລອດ. ການຟື້ນຄືນພຣະຊົນຂອງພຣະອົງຈະໄຖ່ທຸກຄົນຈາກຄວາມຕາຍ, ແລະ ການເສຍສະລະຊົດໃຊ້ຂອງພຣະອົງຈະຈ່າຍຄ່າສຳລັບການຊຳລະລ້າງບາບທັງໝົດ ໃນເງື່ອນໄຂທີ່ຈັດຕຽມໄວ້ເພື່ອສົ່ງເສີມຄວາມເຕີບໂຕຂອງເຮົາ. ການຊົດໃຊ້ຂອງພຣະເຢຊູຄຣິດນີ້ ເປັນຈຸດໃຫຍ່ໃຈກາງໃນແຜນຂອງພຣະບິດາ.
ຢູ່ໃນກອງປະຊຸມມະຫາສານຢູ່ໃນສະຫວັນ, ລູກໆທາງວິນຍານຂອງພຣະເຈົ້າທຸກຄົນໄດ້ເຫັນແຜນຂອງພຣະບິດາ, ລວມທັງຜົນສະທ້ອນ ແລະ ການທົດລອງ, ຄວາມຊ່ວຍເຫລືອຈາກສະຫວັນ, ແລະ ຈຸດໝາຍປາຍທາງທີ່ສະຫງ່າລາສີຂອງມັນ. ເຮົາໄດ້ເຫັນຈຸດໝາຍປາຍທາງແຕ່ຕອນຕົ້ນ. ມະນຸດເປັນຈຳນວນຫລວງຫລາຍ ທີ່ໄດ້ເກີດໃນໂລກນີ້ ໄດ້ເລືອກແຜນຂອງພຣະບິດາ ແລະ ໄດ້ຕໍ່ສູ້ເພື່ອແຜນນັ້ນ ໃນການແຂ່ງຂັນຢູ່ໃນສະຫວັນທີ່ຕິດຕາມມາ. ຫລາຍຄົນກໍໄດ້ເຮັດພັນທະສັນຍານຳພຣະບິດາ ກ່ຽວກັບສິ່ງທີ່ເຂົາເຈົ້າຈະເຮັດ ຢູ່ໃນຊ່ວງມະຕະ. ໃນວິທີທີ່ຍັງບໍ່ໄດ້ເປີດເຜີຍເທື່ອ, ການກະທຳຂອງເຮົາຢູ່ໃນໂລກວິນຍານໄດ້ເປັນອິດທິພົນຕໍ່ສະຖານະການຂອງເຮົາຢູ່ໃນຄວາມເປັນມະຕະ.
ຄວາມເປັນມະຕະ ແລະ ໂລກວິນຍານ
ບັດນີ້ ຂ້າພະເຈົ້າຈະທົບທວນສ່ວນປະກອບຂອງຫລັກທຳບາງຢ່າງຢູ່ໃນແຜນຂອງພຣະບິດາ ໃນເມື່ອມັນມີຜົນກະທົບຕໍ່ເຮົາລະຫວ່າງການເດີນທາງໃນຊ່ວງມະຕະຂອງເຮົາ ແລະ ຢູ່ໃນໂລກວິນຍານຫລັງຈາກຊີວິດນີ້.
ຈຸດປະສົງຂອງຊີວິດມະຕະ ແລະ ຄວາມເຕີບໂຕຫລັງຈາກຊີວິດມະຕະ ແມ່ນເພື່ອໃຫ້ເຊື້ອສາຍຂອງພຣະເຈົ້າກາຍເປັນເໝືອນດັ່ງພຣະອົງ. ນີ້ຄືພຣະປະສົງຂອງພຣະບິດາເທິງສະຫວັນສຳລັບລູກໆຂອງພຣະອົງທັງໝົດ. ໃນການບັນລຸຈຸດໝາຍປາຍທາງທີ່ຊື່ນຊົມນີ້, ກົດນິລັນດອນລະບຸວ່າ ເຮົາຕ້ອງຖືກຊຳລະໃຫ້ສະອາດຜ່ານທາງການຊົດໃຊ້ຂອງພຣະເຢຊູຄຣິດ ເພື່ອວ່າເຮົາຈະສາມາດຢູ່ໃນທີ່ປະທັບຂອງພຣະບິດາ ແລະ ພຣະບຸດ ແລະ ຊື່ນຊົມກັບພອນຂອງຄວາມສູງສົ່ງ. ດັ່ງທີ່ພຣະຄຳພີມໍມອນສິດສອນ, ພຣະອົງເຊື້ອເຊີນ “ເຂົາທັງໝົດໃຫ້ເຂົ້າມາຫາພຣະອົງ ແລະ ຮັບສ່ວນພຣະກະລຸນາທິຄຸນຂອງພຣະອົງ; ແລະ ພຣະອົງບໍ່ປະຕິເສດຜູ້ໃດທີ່ມາຫາພຣະອົງເລີຍ, ບໍ່ວ່າດຳ ແລະ ຂາວ, ຂ້າທາດ ແລະ ຜູ້ເປັນອິດສະລະ, ຊາຍ ແລະ ຍິງ; ແລະ ພຣະອົງລະນຶກເຖິງຄົນທີ່ບໍ່ມີສາດສະໜານຳອີກ; ແລະ ທຸກຄົນເທົ່າທຽມກັນໝົດສຳລັບພຣະເຈົ້າ,” (2 ນີໄຟ 26:33; ເບິ່ງ ແອວມາ 5:49 ນຳອີກ).
ແຜນແຫ່ງສະຫວັນສຳລັບເຮົາທີ່ຈະກາຍເປັນຜູ້ທີ່ເຮົາຄວນເປັນ ຮຽກຮ້ອງເຮົາໃຫ້ເລືອກປະຕິເສດການກົງກັນຂ້າມທີ່ຊົ່ວຮ້າຍ ທີ່ລໍ້ລວງມະນຸດໃຫ້ເຮັດສິ່ງກົງກັນຂ້າມກັບພຣະບັນຍັດຂອງພຣະເຈົ້າ ແລະ ແຜນຂອງພຣະອົງ. ມັນຍັງຮຽກຮ້ອງອີກວ່າ ເຮົາຕ້ອງປະເຊີນກັບການກົງກັນຂ້າມໃນຊ່ວງມະຕະ, ດັ່ງເຊັ່ນຈາກບາບຂອງຄົນອື່ນ ຫລື ຈາກການເກີດທີ່ບໍ່ສົມປະກອບ. ບາງເທື່ອເຮົາເຕີບໂຕຜ່ານທາງການຮັບທຸກທໍລະມານ ແລະ ຄວາມຍາກລຳບາກ ໄດ້ດີກວ່າຊ່ວງເວລາທີ່ເຮົາຢູ່ສະບາຍ ແລະ ສະຫງົບສຸກ. ແລະ ເຮົາຈະບໍ່ສາມາດຜ່ານຜ່າການກົງກັນຂ້າມໃນຊ່ວງມະຕະນີ້ໄດ້ ຖ້າຫາກສະຫວັນມາແຊກແຊງ ຊ່ວຍເຫລືອເຮົາຈາກຜົນສະທ້ອນທີ່ບໍ່ເພິ່ງປາດຖະໜາຂອງຄວາມເປັນມະຕະ.
ແຜນໄດ້ເປີດເຜີຍຈຸດໝາຍປາຍທາງຂອງເຮົາໃນນິລັນດອນ, ຈຸດປະສົງ ແລະ ສະພາບຂອງຈຸດໝາຍປາຍທາງໃນຄວາມເປັນມະຕະ, ແລະ ຄວາມຊ່ວຍເຫລືອຈາກສະຫວັນທີ່ເຮົາໄດ້ຮັບ. ພຣະບັນຍັດຂອງພຣະເຈົ້າເຕືອນເຮົາບໍ່ໃຫ້ເຂົ້າຫາສະຖານະການທີ່ອັນຕະລາຍ. ຄຳສອນຂອງຜູ້ນຳທີ່ດົນໃຈ ນຳພາເສັ້ນທາງເດີນຂອງເຮົາ ແລະ ໃຫ້ຄວາມໝັ້ນໃຈທີ່ສົ່ງເສີມການເດີນທາງນິລັນດອນຂອງເຮົາ.
ແຜນຂອງພຣະເຈົ້າໃຫ້ຄວາມໝັ້ນໃຈສີ່ຢ່າງທີ່ດີເລີດ ເພື່ອຊ່ວຍເຮົາໃນເສັ້ນທາງຜ່ານຄວາມເປັນມະຕະ. ທັງໝົດໄດ້ຖືກມອບໃຫ້ເຮົາຜ່ານທາງການຊົດໃຊ້ຂອງພຣະເຢຊູຄຣິດ, ຊຶ່ງເປັນຜູ້ສຳຄັນຫລາຍທີ່ສຸດຢູ່ໃນແຜນ. ຢ່າງທີ ໜຶ່ງ ໃຫ້ຄວາມໝັ້ນໃຈວ່າ ຜ່ານທາງການຮັບທຸກທໍລະມານຂອງພຣະອົງ ສຳລັບບາບທີ່ເຮົາໄດ້ກັບໃຈ, ເຮົາສາມາດຖືກເຮັດໃຫ້ສະອາດຈາກບາບເຫລົ່ານັ້ນໄດ້. ແລ້ວ ຜູ້ພິພາກສາຄັ້ງສຸດທ້າຍທີ່ເຕັມໄປດ້ວຍຄວາມເມດຕາຈະ “ບໍ່ຈື່ຈຳມັນອີກເລີຍ” (ຄຳສອນ ແລະ ພັນທະສັນຍາ 58:42).
ສອງ, ໃນພາກສ່ວນໜຶ່ງຂອງການຊົດໃຊ້ຂອງພຣະຜູ້ຊ່ວຍໃຫ້ລອດ, ພຣະອົງໄດ້ຮັບເອົາຄວາມອ່ອນແອຢ່າງອື່ນໆຂອງມະນຸດທຸກຄົນ. ສິ່ງນີ້ຊ່ວຍເຮົາໃຫ້ໄດ້ຮັບຄວາມຊ່ວຍເຫລືອ ແລະ ພະລັງ ຈາກສະຫວັນ ເພື່ອສາມາດທົນກັບຄວາມໜັກໜ່ວງຂອງຄວາມເປັນມະຕະ, ສ່ວນຕົວ ແລະ ທົ່ວໄປ, ດັ່ງເຊັ່ນ ສົງຄາມ ແລະ ໂຣກລະບາດ. ພຣະຄຳພີມໍມອນໃຫ້ຄຳອະທິບາຍຢ່າງແຈ່ມແຈ້ງ ເຖິງຄວາມສຳຄັນຂອງອຳນາດຂອງການຊົດໃຊ້. ພຣະຜູ້ຊ່ວຍໃຫ້ລອດໄດ້ຮັບເອົາ “ຄວາມເຈັບປວດ [ແລະ ຄວາມທຸກ] ຂອງຜູ້ຄົນຂອງພຣະອົງ. … ພຣະອົງຈະຮັບເອົາຄວາມບົກພ່ອງຂອງພວກເຂົາ, ເພື່ອອຸທອນຂອງພຣະອົງຈະເຕັມໄປດ້ວຍຄວາມເມດຕາຕາມທາງຂອງເນື້ອໜັງ ເພື່ອພຣະອົງຈະຮູ້ຈັກຕາມທາງຂອງເນື້ອໜັງ ຈະຊ່ວຍເຫລືອຜູ້ຄົນຂອງພຣະອົງຕາມຄວາມບົກພ່ອງຂອງພວກເຂົາໄດ້ແນວໃດ” (ແອວມາ 7:11–12).
ສາມ, ພຣະຜູ້ຊ່ວຍໃຫ້ລອດ, ຜ່ານທາງການຊົດໃຊ້ອັນບໍ່ມີຂອບເຂດຂອງພຣະອົງ, ໄດ້ຖອນວາລະສຸດທ້າຍຂອງຄວາມຕາຍ ແລະ ໃຫ້ຄວາມໝັ້ນໃຈທີ່ໜ້າຊື່ນຊົມແກ່ເຮົາວ່າ ທຸກຄົນຈະຟື້ນຄືນຊີວິດ. ພຣະຄຳພີມໍມອນສິດສອນວ່າ, “ການກັບຄືນມານີ້ຈະເກີດກັບຄົນທັງປວງ, ທັງແກ່ ແລະ ໜຸ່ມ ທັງຂ້າທາດ ແລະ ຜູ້ເປັນອິດສະລະ, ທັງຊາຍ ແລະ ຍິງ, ທັງຄົນຊົ່ວ ແລະ ຄົນຊອບທຳ; ແລະ ເຖິງແມ່ນຜົມໃນຫົວຂອງພວກເຂົາເສັ້ນໜຶ່ງກໍຈະບໍ່ເສຍໄປ; ແຕ່ທຸກຢ່າງຈະກັບຄືນສູ່ໂຄງຮ່າງອັນສົມບູນຂອງມັນ” (ແອວມາ 11:44).
ເຮົາສະເຫລີມສະຫລອງຄວາມຈິງແທ້ຂອງການຟື້ນຄືນພຣະຊົນ ໃນເທດສະການບຸນອີດສະເຕີນີ້. ສິ່ງນີ້ຊ່ວຍເຮົາໃຫ້ເຫັນທັດສະນະ ແລະ ຄວາມເຂັ້ມແຂງທີ່ຈະອົດທົນກັບການທ້າທາຍໃນຊ່ວງມະຕະ ທີ່ເຮົາທຸກຄົນ ແລະ ຄົນທີ່ເຮົາຮັກຈະປະເຊີນ, ດັ່ງເຊັ່ນ ສຸຂະພາບ, ຈິດໃຈ, ຫລື ຄວາມຮູ້ສຶກ ທີ່ເຮົາເອົາມານຳແຕ່ເກີດ ຫລື ໃນປະສົບການລະຫວ່າງຊ່ວງມະຕະຂອງເຮົາ. ເພາະການຟື້ນຄືນພຣະຊົນ, ເຮົາຈຶ່ງຮູ້ວ່າ ຄວາມບົກພ່ອງເຫລົ່ານີ້ໃນຄວາມເປັນມະຕະ ຈະເປັນຢູ່ພຽງຊົ່ວຄາວເທົ່ານັ້ນ!
ພຣະກິດຕິຄຸນທີ່ຖືກຟື້ນຟູໃຫ້ເຮົາໝັ້ນໃຈໄດ້ວ່າ ການຟື້ນຄືນພຣະຊົນສາມາດຮ່ວມດ້ວຍໂອກາດທີ່ຈະໄດ້ຢູ່ນຳສະມາຊິກໃນຄອບຄົວຂອງເຮົາ—ສາມີ, ພັນລະຍາ, ລູກໆ, ແລະ ພໍ່ແມ່. ນີ້ຄືການໃຫ້ກຳລັງໃຈທີ່ມີພະລັງ ເພື່ອໃຫ້ເຮົາບັນລຸໜ້າທີ່ຮັບຜິດຊອບໃນຄວາມເປັນມະຕະ. ມັນຊ່ວຍເຮົາໃຫ້ຢູ່ນຳກັນໃນຄວາມຮັກ ໃນຊີວິດນີ້ ດ້ວຍການລໍຄອຍທີ່ຈະໄດ້ຢູ່ນຳກັນອີກ ແລະ ມີຄວາມສຳພັນໃນຊີວິດຕໍ່ໄປ.
ສີ່ ແລະ ສຸດທ້າຍ, ການເປີດເຜີຍສະໄໝໃໝ່ ສິດສອນເຮົາວ່າ ຄວາມກ້າວໜ້າຂອງເຮົາ ບໍ່ຈຳເປັນຕ້ອງສິ້ນສຸດລົງກັບຄວາມເປັນມະຕະ. ບໍ່ມີການເປີດເຜີຍຫຍັງຫລາຍກ່ຽວກັບເລື່ອງນີ້. ເຮົາໄດ້ຖືກບອກວ່າ ຊີວິດນີ້ເປັນເວລາທີ່ຕຽມພົບພຣະເຈົ້າ ແລະ ວ່າເຮົາບໍ່ຄວນຜັດວັນແຫ່ງການກັບໃຈຂອງເຮົາ (ເບິ່ງ ແອວມາ 34:32–33). ພ້ອມນີ້, ເຮົາຍັງໄດ້ຖືກສິດສອນວ່າ ຢູ່ໃນໂລກວິນຍານ ພຣະກິດຕິຄຸນໄດ້ຖືກສັ່ງສອນໃຫ້ ແມ່ນແຕ່ “ຄົນຊົ່ວ ແລະ ຄົນບໍ່ເຊື່ອຟັງ ຜູ້ໄດ້ປະຕິເສດຄວາມຈິງ” (ຄຳສອນ ແລະ ພັນທະສັນຍາ 138:29) ແລະ ຜູ້ທີ່ໄດ້ຮັບການສິດສອນ ສາມາດກັບໃຈລ່ວງໜ້າກ່ອນການພິພາກສາຄັ້ງສຸດທ້າຍ (ເບິ່ງ ຂໍ້ທີ 31–34, 57–59).
ຕໍ່ໄປນີ້ແມ່ນພື້ນຖານບາງຢ່າງອື່ນອີກ ໃນແຜນຂອງພຣະບິດາເທິງສະຫວັນ:
ພຣະກິດຕິຄຸນທີ່ຟື້ນຟູຂອງພຣະເຢຊູຄຣິດ ຊ່ວຍເຮົາໃຫ້ເຫັນທັດສະນະເລື່ອງພົມມະຈັນ, ການແຕ່ງງານ, ແລະ ການມີລູກ. ມັນສອນວ່າ ການແຕ່ງງານອີງຕາມແຜນຂອງພຣະເຈົ້າແມ່ນຈຳເປັນໃນການບັນລຸຕາມແຜນຂອງພຣະເຈົ້າ, ເພື່ອຈັດຫາບ່ອນທີ່ສະຫວັນກຳນົດໄວ້ສຳລັບການເກີດຂອງມະນຸດ, ແລະ ກະກຽມສະມາຊິກໃນຄອບຄົວສຳລັບຊີວິດນິລັນດອນ. “ການແຕ່ງງານໄດ້ຮັບການແຕ່ງຕັ້ງຈາກພຣະເຈົ້າເພື່ອມະນຸດ,” ພຣະຜູ້ເປັນເຈົ້າໄດ້ກ່າວ, “… ເພື່ອວ່າແຜ່ນດິນໂລກຈະສາມາດຕອບສະໜອງຈຸດປະສົງຂອງການສ້າງຂອງມັນ” (ຄຳສອນ ແລະ ພັນທະສັນຍາ 49:15–16). ໃນສິ່ງນີ້, ແຜນຂອງພຣະອົງ, ແນ່ນອນ, ຈະຂັດກັບພະລັງບາງຢ່າງຂອງໂລກ ກ່ຽວກັບກົດ ແລະ ປະເພນີ.
ອຳນາດແຫ່ງການສ້າງມະນຸດ ເປັນອຳນາດສູງສົ່ງຂອງພຣະເຈົ້າ ທີ່ໄດ້ມອບໃຫ້ລູກໆຂອງພຣະອົງ. ການໃຊ້ມັນໄດ້ຖືກອະນຸມັດຢູ່ໃນພຣະບັນຍັດຂໍ້ທີໜຶ່ງໃຫ້ແກ່ອາດາມ ແລະ ເອວາ, ແຕ່ພຣະບັນຍັດທີ່ສຳຄັນຂໍ້ໜຶ່ງອີກ ໄດ້ຖືກມອບໃຫ້ເປັນການຫ້າມບໍ່ໃຫ້ໃຊ້ມັນໃນທາງທີ່ຜິດ. ນອກການແຕ່ງງານ, ອຳນາດແຫ່ງການສ້າງມະນຸດແມ່ນການເຮັດບາບໃນລະດັບໃດໜຶ່ງ ທີ່ລົດຄ່າ ແລະ ບິດເບືອນຄຸນລັກສະນະແຫ່ງສະຫວັນຂອງຊາຍ ແລະ ຍິງ. ພຣະກິດຕິຄຸນທີ່ຖືກຟື້ນຟູໄດ້ເນັ້ນເລື່ອງກົດພົມມະຈັນ ເພາະຈຸດປະສົງຂອງອຳນາດແຫ່ງການສ້າງຂອງເຮົາຢູ່ໃນການບັນລຸແຜນຂອງພຣະເຈົ້າ.
ມີຫຍັງຕື່ມອີກ?
ລະຫວ່າງວັນຄົບຮອບ 200 ປີ ຂອງພາບທີ່ມາໃຫ້ເຫັນຄັ້ງທຳອິດ, ຊຶ່ງເລີ່ມຕົ້ນການຟື້ນຟູ, ເຮົາຮູ້ເຖິງແຜນຂອງພຣະຜູ້ເປັນເຈົ້າ ແລະ ເຮົາຖືກຊຸກຍູ້ໂດຍພອນຂອງສອງສັດຕະວັດ ຜ່ານທາງສາດສະໜາຈັກທີ່ຟື້ນຟູຂອງພຣະອົງ. ໃນປີ 2020 ນີ້, ເຮົາມີສິ່ງທີ່ຜູ້ຊ່ຽວຊານດ້ານສຸຂະພາບອາດເອີ້ນວ່າ ສາຍຕາ 20/20 ສຳລັບເຫດການໃນອະດີດ.
ເຖິງຢ່າງໃດກໍຕາມ, ເມື່ອເຮົາເບິ່ງໄປຂ້າງໜ້າ, ສາຍຕາຂອງເຮົາບໍ່ສາມາດຫລຽວເຫັນແຈ້ງຊັດ. ເຮົາຮູ້ວ່າ ສອງສັດຕະວັດຜ່ານໄປຫລັງຈາກການຟື້ນຟູ, ບັດນີ້ໂລກວິນຍານໄດ້ລວມພະນັກງານທີ່ມີປະສົບການໃນຊ່ວງມະຕະ ຊ່ວຍບັນລຸການສັ່ງສອນ ທີ່ເກີດຂຶ້ນຢູ່ທີ່ນັ້ນ. ເຮົາກໍຮູ້ອີກວ່າ ບັດນີ້ເຮົາມີພຣະວິຫານຫລາຍໆແຫ່ງເພື່ອປະຕິບັດພິທີການແຫ່ງນິລັນດອນ ແທນຜູ້ທີ່ກັບໃຈ ແລະ ຮັບເອົາພຣະກິດຕິຄຸນຂອງພຣະຜູ້ເປັນເຈົ້າ ຢູ່ຟາກມ່ານແຫ່ງຄວາມຕາຍ. ທັງໝົດນີ້ຊ່ວຍໃຫ້ແຜນຂອງພຣະບິດາເທິງສະຫວັນກ້າວໄປໜ້າ. ຄວາມຮັກຂອງພຣະເຈົ້າແມ່ນຫລວງຫລາຍທີ່ສຸດ, ຍົກເວັ້ນແຕ່ຜູ້ທີ່ຕັ້ງໃຈຈະກາຍເປັນບຸດແຫ່ງຄວາມຈິບຫາຍ, ພຣະອົງໄດ້ຈັດໃຫ້ມີຈຸດໝາຍປາຍທາງທີ່ຮຸ່ງໂລດສຳລັບລູກໆຂອງພຣະອົງທຸກຄົນ (ເບິ່ງ ຄຳສອນ ແລະ ພັນທະສັນຍາ 76:43).
ເຮົາຮູ້ວ່າພຣະຜູ້ຊ່ວຍໃຫ້ລອດຈະກັບມາ ແລະ ວ່າຈະມີການປົກຄອງໜຶ່ງພັນປີແຫ່ງຄວາມສະຫງົບ ໃນການສະຫລຸບແຜນຂອງພຣະເຈົ້າ. ເຮົາທຸກຄົນຮູ້ວ່າ ຈະມີການຟື້ນຄືນຊີວິດທີ່ແຕກຕ່າງກັນ, ສຳລັບຜູ້ທ່ຽງທຳ ແລະ ສຳລັບຜູ້ທີ່ບໍ່ທ່ຽງທຳ, ການຕັດສິນຂອງທຸກຄົນຈະເກີດຂຶ້ນຫລັງຈາກການຟື້ນຄືນຊີວິດຂອງເຂົາ.
ເຮົາຈະຖືກພິພາກສາອີງຕາມການກະທຳຂອງເຮົາ, ອີງຕາມຄວາມປາດຖະໜາຂອງໃຈເຮົາ, ແລະ ອີງຕາມບຸກຄົນທີ່ເຮົາກາຍເປັນ. ການພິພາກສາຈະເຮັດໃຫ້ລູກໆຂອງພຣະເຈົ້າທຸກຄົນ ໄດ້ຮັບອານາຈັກແຫ່ງລັດສະໝີພາບໃດໜຶ່ງ ຊຶ່ງຂຶ້ນກັບການເຊື່ອຟັງຂອງເຂົາເຈົ້າ ແລະ ເປັນບ່ອນທີ່ເໝາະສົມສຳລັບເຂົາເຈົ້າ. ຜູ້ພິພາກສາຂອງສິ່ງທັງໝົດນີ້ ແມ່ນພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ (ເບິ່ງ ໂຢຮັນ 5:22; 2 ນີໄຟ 9:41). ການຮອບຮູ້ທັງໝົດຂອງພຣະອົງເຮັດໃຫ້ພຣະອົງຮູ້ກ່ຽວກັບການກະທຳ ແລະ ຄວາມປາດຖະໜາທັງໝົດຂອງເຮົາ, ທັງສິ່ງທີ່ຍັງບໍ່ໄດ້ກັບໃຈ ຫລື ບໍ່ປ່ຽນແປງ ແລະ ສິ່ງທີ່ໄດ້ກັບໃຈ ຫລື ຊອບທຳ. ສະນັ້ນ, ຫລັງຈາກການພິພາກສາຂອງພຣະອົງ ເຮົາທຸກຄົນຈະສາລະພາບວ່າ “ການພິພາກສາຂອງພຣະອົງນັ້ນຍຸດຕິທຳ” (ໂມໄຊຢາ 16:1).
ສຸດທ້າຍນີ້, ຂ້າພະເຈົ້າຂໍແບ່ງປັນຄວາມເຊື່ອໝັ້ນທີ່ມາສູ່ຂ້າພະເຈົ້າ ຈາກຈົດໝາຍຫລາຍໆສະບັບ ແລະ ໂດຍການທົບທວນຄຳຂໍຮ້ອງຂອງບາງຄົນ ທີ່ຢາກກັບຄືນມາຫາສາດສະໜາຈັກ ຫລັງຈາກທີ່ລາຍຊື່ຂອງເຂົາເຈົ້າຖືກລຶບອອກ ຫລື ເປັນເພາະການປະຖິ້ມຄວາມເຊື່ອ. ສະມາຊິກຫລາຍຄົນຂອງພວກເຮົາບໍ່ເຂົ້າໃຈແຜນແຫ່ງຄວາມລອດຂອງພຣະອົງທັງໝົດ, ຊຶ່ງຕອບຄຳຖາມສ່ວນຫລາຍກ່ຽວກັບຄຳສອນ ແລະ ນະໂຍບາຍທີ່ດົນໃຈຂອງສາດສະໜາຈັກທີ່ຟື້ນຟູ. ເຮົາຜູ້ທີ່ຮູ້ຈັກແຜນຂອງພຣະເຈົ້າ ແລະ ໄດ້ເຮັດພັນທະສັນຍາທີ່ຈະເຂົ້າຮ່ວມ ມີໜ້າທີ່ຮັບຜິດຊອບຢ່າງແຈ່ມແຈ້ງ ເພື່ອສິດສອນຄວາມຈິງເຫລົ່ານີ້ ແລະ ເຮັດຈົນສຸດຄວາມສາມາດ ເພື່ອໃຫ້ຄົນອື່ນເຂົ້າໃຈຫລາຍຂຶ້ນກວ່າເກົ່າ ແລະ ໃນສະຖານະການຂອງເຮົາເອງ ໃນຄວາມເປັນມະຕະ. ຂ້າພະເຈົ້າເປັນພະຍານເຖິງພຣະເຢຊູຄຣິດ, ພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ, ຜູ້ເຮັດໃຫ້ທຸກສິ່ງເປັນໄປໄດ້, ໃນພຣະນາມຂອງພຣະເຢຊູຄຣິດ, ອາແມນ.