“ວັນທີ 6–12 ເດືອນມັງກອນ: ‘ຈົ່ງເຊື່ອຟັງ, ໂອ້ ເຈົ້າຜູ້ຄົນ’: ຄຳສອນ ແລະ ພັນທະສັນຍາ 1,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ຄຳສອນ ແລະ ພັນທະສັນຍາ 1,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
ວັນທີ 6–12 ເດືອນມັງກອນ: “ຈົ່ງເຊື່ອຟັງ, ໂອ້ ເຈົ້າຜູ້ຄົນ”
ຄຳສອນ ແລະ ພັນທະສັນຍາ 1
ໃນເດືອນພະຈິກ ປີ 1831, ສາດສະໜາຈັກທີ່ຖືກຟື້ນຟູຂອງພຣະເຢຊູຄຣິດ ຫາກໍຖືກຈັດຕັ້ງຂຶ້ນໄດ້ໜຶ່ງປີເຄິ່ງເທົ່ານັ້ນ. ເຖິງແມ່ນມັນໄດ້ເຕີບໂຕຂຶ້ນ, ແຕ່ມັນກໍເປັນພຽງກຸ່ມນ້ອຍຂອງຜູ້ທີ່ເຊື່ອກຸ່ມໜຶ່ງໃນບັນດາຜູ້ຄົນທີ່ອາໄສຢູ່ໃນເມືອງນ້ອຍໆ, ທີ່ຖືກນຳພາໂດຍສາດສະດາຜູ້ມີອາຍຸຊາວປາຍປີ. ແຕ່ພຣະເຈົ້າຖືວ່າ ຜູ້ທີ່ເຊື່ອເຫລົ່ານີ້ ເປັນຜູ້ຮັບໃຊ້ ແລະ ຜູ້ສົ່ງຂ່າວຂອງພຣະອົງ, ແລະ ພຣະອົງຕ້ອງການໃຫ້ການເປີດເຜີຍທີ່ພຣະອົງໄດ້ມອບໃຫ້ເຂົາເຈົ້າຖືກເຜີຍແຜ່ຕໍ່ໂລກ.
ຄຳສອນ ແລະ ພັນທະສັນຍາ ພາກທີ 1 ແມ່ນຄຳນຳ, ຫລື ການແນະນຳຂອງພຣະຜູ້ເປັນເຈົ້າ, ກ່ຽວກັບການເປີດເຜີຍເຫລົ່ານີ້. ມັນສະແດງອອກຢ່າງແຈ່ມແຈ້ງວ່າ ເຖິງແມ່ນວ່າສະມາຊິກຂອງສາດສະໜາຈັກມີຈຳນວນເລັກນ້ອຍ, ແຕ່ກໍບໍ່ມີຫຍັງເລັກນ້ອຍກ່ຽວກັບຂ່າວສານທີ່ພຣະເຈົ້າຕ້ອງການໃຫ້ໄພ່ພົນຂອງພຣະອົງແບ່ງປັນ. ມັນເປັນ “ສຽງເຕືອນ” ສຳລັບ “ຜູ້ອາໄສຂອງແຜ່ນດິນໂລກ” ທັງປວງ, ສິດສອນເຂົາເຈົ້າໃຫ້ກັບໃຈ ແລະ ສະຖາປະນາ “ພັນທະສັນຍາອັນເປັນນິດ” ຂອງພຣະເຈົ້າ (ຂໍ້ທີ 4, 8, 22). ຜູ້ຮັບໃຊ້ທີ່ກຳລັງນຳຂ່າວສານນີ້ອອກໄປແມ່ນ “ຄົນທີ່ອ່ອນແອ ແລະ ຄົນທີ່ຕ່ຳຕ້ອຍ.” ແຕ່ຜູ້ຮັບໃຊ້ທີ່ຖ່ອມຕົວເປັນຜູ້ທີ່ພຣະເຈົ້າຕ້ອງການ—ໃນເວລານັ້ນ ແລະ ໃນເວລານີ້—ເພື່ອພາສາດສະໜາຈັກຂອງພຣະອົງ “ອອກຈາກການປິດບັງ ແລະ ອອກຈາກຄວາມມືດ” (ຂໍ້ທີ 23, 30).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
“ຈົ່ງເຊື່ອຟັງ, ໂອ້ ເຈົ້າຜູ້ຄົນ.”
ຄຳນຳເພື່ອແນະນຳໜັງສື. ມັນແຈ້ງບອກຫົວຂໍ້ ແລະ ຈຸດປະສົງຂອງໜັງສື ແລະ ຊ່ວຍຜູ້ອ່ານເພື່ອກະກຽມທີ່ຈະອ່ານ. ຂະນະທີ່ທ່ານອ່ານ ພາກທີ 1—“ບົດຄຳນຳ” ຂອງພຣະຜູ້ເປັນເຈົ້າກ່ຽວກັບ ຄຳສອນ ແລະ ພັນທະສັນຍາ (ຂໍ້ທີ 6)—ໃຫ້ຊອກຫາຫົວຂໍ້ ແລະ ຈຸດປະສົງທີ່ພຣະຜູ້ເປັນເຈົ້າໄດ້ມອບໃຫ້ ສຳລັບການເປີດເຜີຍຂອງພຣະອົງ. ທ່ານຮຽນຮູ້ຫຍັງແດ່ທີ່ຈະຊ່ວຍທ່ານໃນການສຶກສາ ຄຳສອນ ແລະ ພັນທະສັນຍາ ຂອງທ່ານໃນປີນີ້? ຍົກຕົວຢ່າງ, ທ່ານອາດໄຕ່ຕອງຄຳວ່າ “ຟັງສຸລະສຽງຂອງພຣະຜູ້ເປັນເຈົ້າ” ໃນການເປີດເຜີຍເຫລົ່ານີ້ (ຂໍ້ທີ 14) ຫລື ໄຕ່ຕອງຄຳວ່າ “ຄົ້ນຄວ້າບັນຍັດເຫລົ່ານີ້” (ຂໍ້ທີ 37) ວ່າມັນມີຄວາມໝາຍແນວໃດ.
ເບິ່ງ ຄຳນຳຕໍ່ ຄຳສອນ ແລະ ພັນທະສັນຍາ ນຳອີກ.
ຄຳສອນ ແລະ ພັນທະສັນຍາ 1:4–6, 23–24, 37–39
ພຣະຜູ້ເປັນເຈົ້າກ່າວຜ່ານທາງຜູ້ຮັບໃຊ້ຂອງພຣະອົງ, ລວມທັງສາດສະດາຍຸກສຸດທ້າຍ.
ພາກທີ 1 ເລີ່ມຕົ້ນ ແລະ ຈົບດ້ວຍການປະກາດຂອງພຣະຜູ້ເປັນເຈົ້າ ວ່າພຣະອົງກ່າວຜ່ານທາງຜູ້ຮັບໃຊ້ທີ່ຖືກເລືອກຂອງພຣະອົງ (ເບິ່ງ ຂໍ້ທີ 4–6, 23–24, 38). ໃຫ້ຂຽນສິ່ງທີ່ທ່ານໄດ້ຮຽນຮູ້ຈາກການເປີດເຜີຍນີ້:
-
ພຣະຜູ້ເປັນເຈົ້າ ແລະ ສຸລະສຽງຂອງພຣະອົງ.
-
ເຫດຜົນວ່າເປັນຫຍັງຈຶ່ງຈຳເປັນຕ້ອງມີສາດສະດາໃນວັນເວລາຂອງເຮົາ.
ທ່ານຮູ້ສຶກປະທັບໃຈໃຫ້ເຮັດສິ່ງໃດ ອັນເປັນຜົນຈາກສິ່ງທີ່ທ່ານໄດ້ພົບ?
ທ່ານໄດ້ຍິນສຸລະສຽງຂອງພຣະຜູ້ເປັນເຈົ້າ ຜ່ານທາງສຽງຂອງຜູ້ຮັບໃຊ້ຂອງພຣະອົງເມື່ອໃດ? (ເບິ່ງ ຂໍ້ທີ 38).
ທ່ານຍັງອາດຈິນຕະນາການໄດ້ວ່າ ມີເພື່ອນຄົນໜຶ່ງທີ່ບໍ່ຮູ້ກ່ຽວກັບສາດສະດາທີ່ມີຊີວິດຢູ່ ກຳລັງອ່ານ ພາກທີ 1 ກັບທ່ານ. ເພື່ອນຂອງທ່ານອາດມີຄຳຖາມຫຍັງແດ່? ຂໍ້ໃດແດ່ທີ່ທ່ານຕ້ອງການສົນທະນາກັບເພື່ອນຂອງທ່ານ ເພື່ອຊ່ວຍໃຫ້ເຂົາເຂົ້າໃຈວ່າ ທ່ານຮູ້ສຶກແນວໃດກ່ຽວກັບສາດສະດາໃນວັນເວລາຂອງເຮົາ?
ທ່ານອາດຈະສົນໃຈຢາກຮູ້ວ່າ ເມື່ອສະພາແອວເດີໄດ້ປະຊຸມກັນໃນປີ 1831 ເພື່ອເວົ້າລົມກັນກ່ຽວກັບການຈັດພິມການເປີດເຜີຍຂອງໂຈເຊັບ ສະມິດ, ບາງຄົນໄດ້ຄັດຄ້ານແນວຄິດນີ້. ເຂົາເຈົ້າມີຄວາມອັບອາຍກັບຄວາມອ່ອນແອໃນການຂຽນຂອງໂຈເຊັບ, ແລະ ເຂົາເຈົ້າເປັນຫ່ວງວ່າ ການຈັດພິມການເປີດເຜີຍອາດສ້າງບັນຫາໃຫ້ກັບໄພ່ພົນ (ເບິ່ງ Saints, 1:140–43). ຖ້າຫາກທ່ານເປັນຄົນໜຶ່ງໃນສະພານີ້, ທ່ານຈະແກ້ໄຂບັນຫາເຫລົ່ານີ້ແນວໃດ? ຄວາມຮູ້ແຈ້ງໃດແດ່ທີ່ທ່ານພົບເຫັນຢູ່ໃນ ພາກທີ 1 ທີ່ອາດຊ່ວຍໄດ້? (ເບິ່ງ, ຍົກຕົວຢ່າງ, ຂໍ້ທີ 6, 24, 38).
ໃຫ້ພິຈາລະນາລວມເພງສວດເຊັ່ນ “ເຮົາຂອບພຣະໄທສຳລັບສາດສະດາ” (ເພງສວດ ແລະ ເພງຂອງເດັກນ້ອຍ, 40) ໃນການສຶກສາ ແລະ ການນະມັດສະການຂອງທ່ານ. ຊອກຫາວະລີໃນເພງສວດທີ່ສິດສອນຫລັກທຳອັນດຽວກັນນີ້ ທີ່ກ່າວໃນ ພາກທີ 1.
ເບິ່ງ Topics and Questions, “Prophets,” ຫ້ອງສະໝຸດພຣະກິດຕິຄຸນ ນຳອີກ.
ພຣະຜູ້ເປັນເຈົ້າກ່າວກັບເຮົາຜ່ານທາງຜູ້ຮັບໃຊ້ຂອງພຣະອົງ, ສາດສະດາ.
ຄຳສອນ ແລະ ພັນທະສັນຍາ 1:12–30, 34–36
ການຟື້ນຟູຊ່ວຍເຮົາປະເຊີນກັບການທ້າທາຍຂອງຍຸກສຸດທ້າຍ.
ໃນ ຄຳສອນ ແລະ ພັນທະສັນຍາ ພາກທີ 1, ພຣະຜູ້ເປັນເຈົ້າອະທິບາຍວ່າ ເປັນຫຍັງພຣະອົງຈຶ່ງໄດ້ຟື້ນຟູພຣະກິດຕິຄຸນຂອງພຣະອົງ. ເບິ່ງວ່າມີຈັກເຫດຜົນທີ່ທ່ານສາມາດລະບຸໄດ້ຂະນະທີ່ທ່ານອ່ານ ຂໍ້ທີ 12–23. ໃນປະສົບການຂອງທ່ານ, ຈຸດປະສົງຂອງພຣະຜູ້ເປັນເຈົ້າໃນການຟື້ນຟູບັນລຸຜົນແນວໃດ?
ພຣະຜູ້ເປັນເຈົ້າຮູ້ວ່າ ວັນເວລາຂອງເຮົາຈະມີການທ້າທາຍຢ່າງຮ້າຍແຮງ (ເບິ່ງ ຂໍ້ທີ 17). ທ່ານພົບເຫັນຫຍັງໃນ ຂໍ້ທີ 17–30, 34–36 ທີ່ຊ່ວຍໃຫ້ທ່ານຮູ້ສຶກສະຫງົບ ແລະ ໝັ້ນໃຈ ເຖິງແມ່ນຈະມີການທ້າທາຍເຫລົ່ານີ້ກໍຕາມ?
ເບິ່ງ Russell M. Nelson, “Embrace the Future with Faith,” Liahona, Nov. 2020, 73–76 ນຳອີກ.
ຄຳສອນ ແລະ ພັນທະສັນຍາ 1:19–28
ພຣະຜູ້ເປັນເຈົ້າໃຊ້ “ຄົນທີ່ອ່ອນແອ ແລະ ຄົນທີ່ຕ່ຳຕ້ອຍ” ເພື່ອບັນລຸວຽກງານຂອງພຣະອົງ.
ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 1:19–28, ທ່ານອາດຈະໄຕ່ຕອງວ່າ ການເປັນຜູ້ຮັບໃຊ້ຂອງພຣະຜູ້ເປັນເຈົ້ານັ້ນ ໝາຍຄວາມວ່າແນວໃດ. ບຸກຄະລິກລັກສະນະໃດ ທີ່ພຣະຜູ້ເປັນເຈົ້າຕ້ອງການໃຫ້ຜູ້ຮັບໃຊ້ຂອງພຣະອົງມີ? ພຣະຜູ້ເປັນເຈົ້າກຳລັງບັນລຸສິ່ງໃດຜ່ານທາງຜູ້ຮັບໃຊ້ຂອງພຣະອົງ? ການທຳນາຍໃນຂໍ້ເຫລົ່ານີ້ກຳລັງເກີດເປັນຈິງຕະຫລອດທົ່ວໂລກ ແລະ ໃນຊີວິດຂອງທ່ານແນວໃດ?
ຊອກຫາພຣະເຢຊູຄຣິດ. ຈຸດປະສົງຂອງພຣະຄຳພີແມ່ນເພື່ອເປັນພະຍານເຖິງພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງ. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 1, ໃຫ້ຄິດທີ່ຈະໝາຍ ຫລື ບັນທຶກຂໍ້ທີ່ສິດສອນທ່ານບາງສິ່ງກ່ຽວກັບພຣະເຢຊູຄຣິດ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ຄຳສອນ ແລະ ພັນທະສັນຍາ 1:4, 37–39
ຜ່ານທາງສາດສະດາຂອງພຣະອົງ, ພຣະຜູ້ເປັນເຈົ້າເຕືອນເຮົາເຖິງອັນຕະລາຍທາງວິນຍານ.
-
ເພື່ອເລີ່ມຕົ້ນການສົນທະນາກ່ຽວກັບຄຳເຕືອນຈາກພຣະຜູ້ເປັນເຈົ້າ, ພວກທ່ານສາມາດເວົ້າລົມກັນກ່ຽວກັບຄຳເຕືອນທີ່ພວກທ່ານໄດ້ຮັບຈາກຄົນອື່ນ ກ່ຽວກັບສິ່ງອັນຕະລາຍທີ່ເຮົາບໍ່ສາມາດຫລຽວເຫັນ. ບາງຕົວຢ່າງອາດລວມທັງພື້ນທີ່ມື່ນ, ພະຍຸກຳລັງຈະມາ, ຫລື ລົດທີ່ກຳລັງແລ່ນມາໃກ້. ບາງທີທ່ານ ແລະ ລູກໆຂອງທ່ານສາມາດຊອກຫາຕົວຢ່າງຂອງສັນຍານເຕືອນໄພ ແລະ ປຽບທຽບຄຳເຕືອນເຫລົ່ານີ້ໃສ່ກັບຄຳເຕືອນຂອງພຣະຜູ້ເປັນເຈົ້າທີ່ມອບໃຫ້ເຮົາ. ອີງຕາມ ຄຳສອນ ແລະ ພັນທະສັນຍາ 1:4, 37–39, ພຣະຜູ້ເປັນເຈົ້າເຕືອນເຮົາໃນວິທີໃດ? ພຣະອົງໄດ້ເຕືອນເຮົາຫຍັງແດ່ ເມື່ອບໍ່ດົນມານີ້? ບາງທີພວກທ່ານຄວນເບິ່ງ ຫລື ອ່ານຂ່າວສານພາກສ່ວນໃດໜຶ່ງຂອງກອງປະຊຸມໃຫຍ່ສາມັນ ແລະ ຊອກຫາຕົວຢ່າງກ່ຽວກັບ “ສຽງເຕືອນ” ຂອງພຣະເຈົ້າ.
-
ຮ້ອງເພງກ່ຽວກັບສາດສະດານຳກັນ, ເຊັ່ນວັກສຸດທ້າຍຂອງ “ເຮົາຂອບພຣະໄທສຳລັບສາດສະດາ” (ເພງສວດ ແລະ ເພງຂອງເດັກນ້ອຍ, 40). ແບ່ງປັນປະຈັກພະຍານຂອງທ່ານວ່າ ສາດສະດາກ່າວພຣະຄຳຂອງພຣະເຈົ້າ.
ການຟື້ນຟູຊ່ວຍເຮົາປະເຊີນກັບການທ້າທາຍຂອງຍຸກສຸດທ້າຍ.
-
ເພື່ອຊຸກຍູ້ການສົນທະນາກ່ຽວກັບ ຄຳສອນ ແລະ ພັນທະສັນຍາ 1:17, ທ່ານ ແລະ ລູກໆຂອງທ່ານສາມາດຈິນຕະນາການໄດ້ວ່າ ພວກທ່ານກຳລັງກຽມພ້ອມສຳລັບການເດີນທາງ. ພວກທ່ານຈະເອົາຫຍັງໄປນຳແດ່? ຖ້າຫາກພວກທ່ານຮູ້ລ່ວງໜ້າວ່າ ຝົນຈະຕົກ ຫລື ລົດ ຫລື ລົດເມຂອງພວກທ່ານຈະຢາງແບນ, ມັນຈະມີຜົນກະທົບແນວໃດກັບວິທີທີ່ທ່ານກຽມພ້ອມສຳລັບການເດີນທາງນັ້ນ? ອ່ານ ຂໍ້ທີ 17 ນຳກັນ, ແລະ ເວົ້າລົມກັນກ່ຽວກັບວ່າພຣະຜູ້ເປັນເຈົ້າຮູ້ວ່າ ຈະມີຫຍັງເກີດຂຶ້ນກັບເຮົາແນວໃດ. ພຣະອົງໄດ້ກະກຽມກ່ຽວກັບມັນແນວໃດ? (ຖ້າຈຳເປັນ, ໃຫ້ອະທິບາຍວ່າ “ຄວາມເສຍຫາຍ” ຄືໄພພິບັດ ຫລື ສິ່ງທີ່ໜ້າຢ້ານ.) ພຣະບັນຍັດຂອງພຣະເຈົ້າຊ່ວຍໃຫ້ເຮົາຮັບມືກັບການທ້າທາຍໃນສະໄໝຂອງເຮົາແນວໃດ?
ຄຳສອນ ແລະ ພັນທະສັນຍາ 1:17, 29
ພຣະຜູ້ເປັນເຈົ້າໄດ້ເອີ້ນໂຈເຊັບ ສະມິດ ໃຫ້ເປັນສາດສະດາ.
-
ເພື່ອຮຽນຮູ້ກ່ຽວກັບບົດບາດຂອງໂຈເຊັບ ສະມິດ ໃນການຟື້ນຟູພຣະກິດຕິຄຸນຂອງພຣະຜູ້ຊ່ວຍໃຫ້ລອດ, ທ່ານ ແລະ ລູກໆຂອງທ່ານສາມາດເບິ່ງຮູບພາບຂອງພຣະຜູ້ຊ່ວຍໃຫ້ລອດ ແລະ ຮູບພາບຂອງໂຈເຊັບ ສະມິດ (ເບິ່ງຮູບພາບເຫລົ່ານີ້ຢູ່ໃນໂຄງຮ່າງນີ້) ແລະ ເວົ້າລົມກັນວ່າພຣະຜູ້ຊ່ວຍໃຫ້ລອດໄດ້ມອບສິ່ງໃດໃຫ້ເຮົາຜ່ານທາງໂຈເຊັບ ສະມິດ. ລູກໆຂອງທ່ານສາມາດຊອກຫາຕົວຢ່າງໃນ ຄຳສອນ ແລະ ພັນທະສັນຍາ 1:17, 29. ບອກລູກໆຂອງທ່ານວ່າ ທ່ານຮູ້ໄດ້ແນວໃດວ່າພຣະເຈົ້າ “ໄດ້ເອີ້ນຜູ້ຮັບໃຊ້ຂອງເຮົາ ໂຈເຊັບ ສະມິດ, ຜູ້ລູກ, ແລະ ໄດ້ກ່າວກັບລາວຈາກສະຫວັນ” (ຂໍ້ທີ 17).
© 1998 David Lindsley
ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເປັນ “ສາດສະໜາຈັກທີ່ແທ້ຈິງ ແລະ ດຳລົງຢູ່” ຂອງພຣະຜູ້ເປັນເຈົ້າ.
-
ການເວົ້າວ່າ ສາດສະໜາຈັກນີ້ ເປັນສາດສະໜາຈັກ “ທີ່ແທ້ຈິງ ແລະ ດຳລົງຢູ່” ໝາຍຄວາມວ່າແນວໃດ? ເພື່ອໃຫ້ລູກໆຂອງທ່ານຄິດກ່ຽວກັບຄຳຖາມນີ້, ບາງທີທ່ານສາມາດສະແດງຮູບຂອງສິ່ງທີ່ມີຊີວິດຢູ່ ແລະ ສິ່ງທີ່ບໍ່ມີຊີວິດ—ເຊັ່ນພືດທີ່ມີຊີວິດ ແລະ ພືດທີ່ຕາຍແລ້ວ. ເຮົາຮູ້ໄດ້ແນວໃດວ່າບາງສິ່ງມີຊີວິດຢູ່? ແລ້ວທ່ານສາມາດອ່ານ ຄຳສອນ ແລະ ພັນທະສັນຍາ 1:30 ແລະ ເວົ້າລົມກັນວ່າ ການທີ່ສາດສະໜາຈັກເປັນສາດສະໜາຈັກ “ທີ່ແທ້ຈິງ ແລະ ດຳລົງຢູ່” ອາດໝາຍຄວາມວ່າແນວໃດ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Beside Still Waters [ບໍ່ນ້ຳອັນສົດໃສ ແລະ ມິດງຽບ], ໂດຍ ຊາຍມັນ ດູວີ