ຮັບເອົາອະນາຄົດດ້ວຍສັດທາ
ອະນາຄົດຈະຮຸ່ງໂລດສຳລັບຜູ້ທີ່ຕຽມພ້ອມ ແລະ ຜູ້ທີ່ສືບຕໍ່ຕຽມພ້ອມທີ່ຈະເປັນເຄື່ອງມືໃນພຣະຫັດຂອງພຣະຜູ້ເປັນເຈົ້າ.
ມັນເປັນຄ່ຳຄືນທີ່ໜ້າຈົດຈຳແທ້ໆ. ເອື້ອຍນ້ອງທີ່ຮັກແພງຂອງຂ້າພະເຈົ້າ, ຖືວ່າເປັນກຽດຢ່າງຍິ່ງທີ່ຂ້າພະເຈົ້າໄດ້ມາຮ່ວມກັບທ່ານທັງຫລາຍ. ທ່ານໄດ້ຢູ່ໃນຈິດໃຈຂອງຂ້າພະເຈົ້າຕະຫລອດເວລາ ລະຫວ່າງສອງສາມເດືອນຜ່ານມານີ້. ທ່ານມີຄວາມໝາຍຫລາຍກວ່າ ແປດລ້ານຄົນທີ່ເຂັ້ມແຂງເທົ່ານັ້ນ. ບໍ່ພຽງແຕ່ທ່ານມີ ຈຳນວນ ຫລວງຫລາຍ, ແຕ່ ພະລັງທາງວິນຍານ ກໍປ່ຽນແປງໂລກນຳອີກ. ຂ້າພະເຈົ້າໄດ້ເບິ່ງທ່ານເຮັດສິ່ງນີ້ລະຫວ່າງການແຜ່ລະບາດ.
ທ່ານບາງຄົນກໍໄດ້ຟ້າວຊອກຫາອຸປະກອນ ຫລື ຊອກຫາວຽກງານໃໝ່. ຫລາຍຄົນໄດ້ຊ່ວຍລູກຮຽນໜັງສືຢູ່ບ້ານ ແລະ ຢ້ຽມຢາມຄົນບ້ານໃກ້ເຮືອນຄຽງ. ບາງຄົນໄດ້ຕ້ອນຮັບຜູ້ສອນສາດສະໜາກັບບ້ານກ່ອນກຳນົດເວລາ, ຂະນະທີ່ບາງຄົນໄດ້ປັບປ່ຽນບ້ານເຮືອນຂອງທ່ານໃຫ້ເປັນສູນຝຶກອົບຮົມຜູ້ສອນສາດສະໜາ. ທ່ານໄດ້ໃຊ້ເທັກໂນໂລຈີເພື່ອຕິດຕໍ່ຫາຄອບຄົວ ແລະ ໝູ່ເພື່ອນ, ເພື່ອປະຕິບັດສາດສະໜາກິດຕໍ່ຜູ້ທີ່ຮູ້ສຶກໂດດດ່ຽວ, ແລະ ໄດ້ສຶກສາປຶ້ມ ຈົ່ງຕາມເຮົາມາ ກັບຄົນອື່ນ. ທ່ານໄດ້ພົບເຫັນວິທີໃໝ່ທີ່ຈະເຮັດໃຫ້ວັນຊະບາໂຕເປັນວັນທີ່ມີຄວາມສຸກ. ແລະ ທ່ານໄດ້ເຮັດໜ້າກາກປິດປາກ—ຫລາຍລ້ານອັນ!
ດ້ວຍຄວາມເຫັນອົກເຫັນໃຈ ແລະ ຮັກແພງ, ຂ້າພະເຈົ້າຂໍສະແດງຄວາມເສຍໃຈກັບແມ່ຍິງຢ່າງຫລວງຫລາຍຕະຫລອດທົ່ວໂລກ ທີ່ໄດ້ສູນເສຍຄົນທີ່ເຂົາເຈົ້າຮັກໄປ. ພວກເຮົາຮ້ອງໄຫ້ກັບທ່ານ. ແລະ ພວກເຮົາອະທິຖານເພື່ອທ່ານ. ພວກເຮົາຍ້ອງຍໍ ແລະ ອະທິຖານເພື່ອຜູ້ທີ່ທຳງານຢ່າງບໍ່ອິດເມື່ອຍ ເພື່ອຊ່ວຍເຫລືອສຸຂະພາບຂອງຄົນອື່ນ.
ພວກເຈົ້າ ກຸ່ມຍິງໜຸ່ມ ກໍໜ້າອັດສະຈັນ. ເຖິງແມ່ນສື່ສານມວນຊົນເຕັມໄປດ້ວຍຂ່າວເລື່ອງການຂັດແຍ້ງ, ແຕ່ພວກເຈົ້າຫລາຍຄົນໄດ້ພົບເຫັນວິທີທີ່ຈະສະໜັບສະໜູນ ແລະ ແບ່ງປັນຄວາມສະຫວ່າງຂອງພຣະຜູ້ຊ່ວຍໃຫ້ລອດໃຫ້ກັບຄົນອື່ນ.
ເອື້ອຍນ້ອງທັງຫລາຍ, ທ່ານເປັນວິລະຊົນແທ້ໆ! ຂ້າພະເຈົ້າປະຫລາດໃຈກັບຄວາມເຂັ້ມແຂງ ແລະ ສັດທາຂອງທ່ານ. ທ່ານໄດ້ສະແດງໃຫ້ເຫັນວ່າ ໃນສະຖານະການທີ່ຫຍຸ້ງຍາກ, ທ່ານໄດ້ດຳເນີນຕໍ່ໄປດ້ວຍຄວາມກ້າຫານ. ຂ້າພະເຈົ້າຮັກທ່ານ, ແລະ ຂ້າພະເຈົ້າຢາກໃຫ້ທ່ານແນ່ໃຈໄດ້ວ່າ ພຣະຜູ້ເປັນເຈົ້າຮັກທ່ານ ແລະ ເຫັນວຽກງານອັນຍິ່ງໃຫຍ່ທີ່ທ່ານກຳລັງເຮັດຢູ່. ຂອບໃຈຫລາຍໆ! ອີກເທື່ອໜຶ່ງ, ທ່ານໄດ້ພິສູດວ່າ ທ່ານເປັນຄວາມຫວັງຂອງອິດສະຣາເອນແທ້ໆ!
ທ່ານເປັນຕົວຢ່າງທີ່ປະທານກໍດອນ ບີ ຮິງລີ ຫວັງໃນຕົວທ່ານ ເມື່ອເພິ່ນນຳສະເໜີໃບ “ຄອບຄົວ: ການປະກາດຕໍ່ໂລກ” 25 ປີກ່ອນ ໃນເດືອນກັນຍາ ປີ 1995 ຢູ່ໃນກອງປະຊຸມສະມາຄົມສະຕີສົງເຄາະສາມັນ.1 ມັນສຳຄັນທີ່ເພິ່ນໄດ້ເລືອກສະເໜີການປະກາດນີ້ຕໍ່ບັນດາເອື້ອຍນ້ອງຂອງສາດສະໜາຈັກ. ໂດຍການເຮັດສິ່ງນັ້ນ, ປະທານຮິງລີໄດ້ເນັ້ນເຖິງອິດທິພົນຂອງຜູ້ຍິງໃນແຜນຂອງພຣະຜູ້ເປັນເຈົ້າ ທີ່ບໍ່ມີສິ່ງໃດຈະທົດແທນໄດ້.
ບັດນີ້, ຂ້າພະເຈົ້າຢາກຮູ້ວ່າ ທ່ານໄດ້ຮຽນຮູ້ຫຍັງແດ່ໃນປີນີ້. ທ່ານໄດ້ເຂົ້າໃກ້ພຣະຜູ້ເປັນເຈົ້າຫລາຍກວ່າເກົ່າບໍ, ຫລື ທ່ານຮູ້ສຶກຢູ່ຫ່າງໄກຈາກພຣະອົງຫລາຍກວ່າເກົ່າ? ແລະ ເຫດການໃນປະຈຸບັນເຮັດໃຫ້ທ່ານຮູ້ສຶກແນວໃດກ່ຽວກັບອະນາຄົດ?
ເປັນທີ່ຍອມຮັບວ່າ ພຣະຜູ້ເປັນເຈົ້າໄດ້ກ່າວເຖິງວັນເວລາຂອງເຮົາຢ່າງໜັກແໜ້ນ. ພຣະອົງໄດ້ເຕືອນວ່າ ໃນວັນເວລາຂອງເຮົາ “ມະນຸດຈະສະຫລົບໄປດ້ວຍຄວາມຢ້ານກົວ”2 ແລະ ວ່າເຖິງແມ່ນຜູ້ທີ່ຖືກເລືອກກໍຍັງຕ້ອງສ່ຽງກັບການຖືກຫລອກລວງ.3 ພຣະອົງໄດ້ບອກສາດສະດາໂຈເຊັບ ສະມິດ ວ່າ “ສັນຕິສຸກຈະຖືກເອົາໄປຈາກແຜ່ນດິນໂລກ”4 ແລະ ໄພພິບັດຈະມາສູ່ມວນມະນຸດ.5
ແຕ່ພຣະຜູ້ເປັນເຈົ້າກໍໄດ້ມອບພາບນິມິດ ໃຫ້ເຫັນວ່າ ສະໄໝນີ້ໜ້າອັດສະຈັນຫລາຍພຽງໃດ. ພຣະອົງໄດ້ດົນໃຈສາດສະດາໂຈເຊັບ ສະມິດ ໃຫ້ປະກາດວ່າ “ວຽກງານຂອງ … ວັນເວລານີ້, ແມ່ນຍິ່ງໃຫຍ່ທີ່ສຸດ. … ລັດສະໝີພາບຂອງວຽກງານນັ້ນບໍ່ອາດພັນລະນາໄດ້, ແລະ ຄວາມຍິ່ງໃຫຍ່ຂອງມັນກໍບໍ່ມີຫຍັງປຽບທຽບໄດ້.”6
ບັດນີ້, ຄວາມຍິ່ງໃຫຍ່ ອາດບໍ່ແມ່ນຄຳທີ່ທ່ານຢາກເລືອກເອົາມາບັນຍາຍກ່ຽວກັບສອງສາມເດືອນຜ່ານມານີ້! ເຮົາ ຈະ ເຮັດແນວໃດກັບຄຳທຳນາຍທີ່ໜັກແໜ້ນ ແລະ ຄຳປະກາດທີ່ດີເລີດກ່ຽວກັບວັນເວລາຂອງເຮົານັ້ນ? ພຣະຜູ້ເປັນເຈົ້າໄດ້ບອກວິທີ ເຖິງແມ່ນລຽບງ່າຍ, ແຕ່ໃຫ້ຄວາມໝັ້ນໃຈທີ່ມີພະລັງ ທີ່ວ່າ: “ຖ້າຫາກພວກເຈົ້າຕຽມພ້ອມ ພວກເຈົ້າຈະບໍ່ຢ້ານກົວ.”7
ເປັນຄຳສັນຍາທີ່ປະເສີດແທ້ໆ! ເປັນຄຳສັນຍາທີ່ສາມາດປ່ຽນວິທີທີ່ເຮົາເບິ່ງອະນາຄົດຂອງເຮົາ. ເມື່ອບໍ່ດົນມານີ້ ຂ້າພະເຈົ້າໄດ້ຍິນປະຈັກພະຍານທີ່ເລິກເຊິ່ງຂອງຜູ້ຍິງຄົນໜຶ່ງ ທີ່ຍອມຮັບວ່າ ການແຜ່ລະບາດ, ພ້ອມທັງແຜ່ນດິນໄຫວ, ໄດ້ຊ່ວຍນາງໃຫ້ຮັບຮູ້ວ່າ ນາງບໍ່ໄດ້ຕຽມພ້ອມດັ່ງທີ່ຄິດ. ເມື່ອຂ້າພະເຈົ້າຖາມນາງວ່າ ມັນກ່ຽວກັບການສະສົມອາຫານ ຫລື ປະຈັກພະຍານຂອງນາງ, ນາງຍິ້ມ ແລະ ເວົ້າວ່າ, “ໂດຍ!”
ຖ້າຫາກການຕຽມພ້ອມເປັນສິ່ງສຳຄັນທີ່ຈະຮັບເອົາຍຸກສະໄໝນີ້ ແລະ ອະນາຄົດຂອງເຮົາດ້ວຍສັດທາ, ເຮົາຈະຕຽມພ້ອມໃຫ້ດີທີ່ສຸດໄດ້ແນວໃດ?
ຫລາຍທົດສະວັດມາແລ້ວ, ສາດສະດາຂອງພຣະຜູ້ເປັນເຈົ້າໄດ້ຊັກຊວນເຮົາໃຫ້ສະສົມອາຫານ, ນ້ຳ, ແລະ ອອມເງິນ ສຳລັບເວລາຄັບຂັນ. ການແຜ່ລະບາດໃນປະຈຸບັນໄດ້ເປັນພະຍານໃຫ້ແກ່ຄຳແນະນຳທີ່ສະຫລາດນັ້ນ. ຂ້າພະເຈົ້າຊັກຊວນທ່ານໃຫ້ຕຽມພ້ອມທາງຝ່າຍໂລກ. ແຕ່ຂ້າພະເຈົ້າເປັນຫ່ວງຫລາຍກວ່ານັ້ນກ່ຽວກັບການຕຽມພ້ອມທາງຝ່າຍວິນຍານ ແລະ ທາງຝ່າຍອາລົມຂອງທ່ານ.
ໃນເລື່ອງນັ້ນ, ເຮົາສາມາດຮຽນຮູ້ຢ່າງຫລວງຫລາຍຈາກນາຍທັບໂມໂຣໄນ. ໃນຖານະຜູ້ບັນຊາການຂອງກອງທັບຊາວນີໄຟ, ເພິ່ນໄດ້ປະເຊີນກັບສັດຕູທີ່ເຂັ້ມແຂງກວ່າ, ມີຈຳນວນພົນຫລາຍກວ່າ, ແລະ ໂຫດຮ້າຍກວ່າ. ສະນັ້ນ, ໂມໂຣໄນຈຶ່ງໄດ້ຕຽມຜູ້ຄົນຂອງເພິ່ນໃນສາມຢ່າງທີ່ສຳຄັນ.
ໜຶ່ງ, ເພິ່ນໄດ້ຊ່ວຍພວກເຂົາສ້າງບ່ອນທີ່ປອດໄພ—“ບ່ອນປ້ອງກັນ” ຊຶ່ງເພິ່ນເອີ້ນມັນແນວນັ້ນ.8 ສອງ, ເພິ່ນໄດ້ຕຽມ “ຈິດໃຈຂອງຜູ້ຄົນໃຫ້ຊື່ສັດຕໍ່ພຣະຜູ້ເປັນເຈົ້າ.”9 ແລະ ສາມ, ເພິ່ນບໍ່ເຄີຍຢຸດຕຽມຜູ້ຄົນຂອງເພິ່ນ—ທາງຮ່າງກາຍ ຫລື ທາງວິນຍານ.10 ໃຫ້ເຮົາມາພິຈາລະນາຫລັກທຳສາມຢ່າງນີ້.
ຫລັກທຳຂໍ້ທີໜຶ່ງ: ສ້າງບ່ອນປ້ອງກັນ
ໂມໂຣໄນໄດ້ປ້ອງກັນທຸກຫົວເມືອງຂອງຊາວນີໄຟດ້ວຍການຄູນດິນຂຶ້ນ, ດ້ວຍປ້ອມຍາມ, ແລະ ດ້ວຍກຳແພງ.11 ເມື່ອຊາວເລມັນມາຕໍ່ສູ້ກັບພວກເຂົາ, ພວກເຂົາ “ກໍແປກໃຈຢ່າງຍິ່ງເພາະປັນຍາຂອງຊາວນີໄຟໃນການຕຽມ ບ່ອນປ້ອງກັນຕົວຂອງພວກເຂົາ.”12
ໃນວິທີທີ່ຄ້າຍຄືກັນນີ້, ຂະນະທີ່ຄວາມວຸ້ນວາຍເກີດຂຶ້ນຢູ່ອ້ອມຂ້າງ ເຮົາ, ເຮົາຕ້ອງສ້າງບ່ອນທີ່ ເຮົາ ຈະປອດໄພ, ທັງທາງຝ່າຍໂລກ ແລະ ຝ່າຍວິນຍານ. ເມື່ອບ້ານເຮືອນຂອງທ່ານກາຍເປັນສະຖານທີ່ສັກສິດແຫ່ງສັດທາ—ບ່ອນທີ່ພຣະວິນຍານສະຖິດຢູ່—ບ້ານເຮືອນຂອງທ່ານຈະກາຍເປັນບ່ອນປ້ອງກັນແນວໜ້າ.
ເຊັ່ນດຽວກັນ, ສະເຕກຂອງຊີໂອນ ກໍເປັນ “ບ່ອນຫລົບໄພຈາກພະຍຸ”13 ເພາະມັນຖືກນຳພາໂດຍຜູ້ດຳລົງຂໍກະແຈຂອງຖານະປະໂລຫິດ ແລະ ໃຊ້ສິດອຳນາດຂອງຖານະປະໂລຫິດ. ຂະນະທີ່ທ່ານສືບຕໍ່ເຮັດຕາມຄຳແນະນຳຂອງຜູ້ທີ່ຖືກອະນຸມັດຈາກພຣະຜູ້ເປັນເຈົ້າໃຫ້ນຳພາທ່ານ, ແລ້ວທ່ານຈະຮູ້ສຶກປອດໄພຫລາຍກວ່າເກົ່າ.
ພຣະວິຫານ—ບ້ານຂອງພຣະຜູ້ເປັນເຈົ້າ—ເປັນບ່ອນປ້ອງກັນ ທີ່ແຕກຕ່າງຈາກບ່ອນອື່ນ. ຢູ່ທີ່ນັ້ນ, ເອື້ອຍນ້ອງທັງຫລາຍ ທ່ານໄດ້ຮັບຂອງປະທານສັກສິດ ດ້ວຍອຳນາດຂອງຖານະປະໂລຫິດ ຜ່ານທາງພັນທະສັນຍາຂອງຖານະປະໂລຫິດທີ່ສັກສິດ ທີ່ທ່ານໄດ້ເຮັດ.14 ຢູ່ທີ່ນັ້ນ, ຄອບຄົວຂອງທ່ານຖືກຜະນຶກເຂົ້າກັນຊົ່ວນິລັນດອນ. ແມ່ນແຕ່ໃນປີນີ້, ເມື່ອການເຂົ້າໄປໃນພຣະວິຫານຖືກຈຳກັດຫລາຍແທ້ໆ, ຂອງປະທານສັກສິດຂອງທ່ານຈະຊ່ວຍທ່ານໃຫ້ເຂົ້າເຖິງອຳນາດຂອງພຣະເຈົ້າ ຕາມທີ່ທ່ານໄດ້ຮັກສາພັນທະສັນຍາທີ່ທ່ານໄດ້ເຮັດໄວ້ກັບພຣະອົງ.
ຖ້າຈະເວົ້າງ່າຍໆແລ້ວ, ບ່ອນປ້ອງກັນແມ່ນ ທຸກບ່ອນ ທີ່ທ່ານຮູ້ສຶກເຖິງການສະຖິດຢູ່ຂອງພຣະວິນຍານບໍລິສຸດ ແລະ ຖືກນຳພາໂດຍພຣະອົງ.15 ເມື່ອພຣະວິນຍານບໍລິສຸດສະຖິດຢູ່ກັບທ່ານ, ທ່ານສາມາດສິດສອນຄວາມຈິງ, ເຖິງແມ່ນຈະມີຄວາມຄິດທີ່ແຕກຕ່າງກັນກໍຕາມ. ແລະ ທ່ານສາມາດໄຕ່ຕອງຄຳຖາມຢ່າງຈິງໃຈກ່ຽວກັບພຣະກິດຕິຄຸນໃນສະພາບແວດລ້ອມແຫ່ງການເປີດເຜີຍ.
ຂ້າພະເຈົ້າຂໍເຊື້ອເຊີນທ່ານ, ເອື້ອຍນ້ອງຂອງຂ້າພະເຈົ້າ, ໃຫ້ສ້າງບ້ານເຮືອນທີ່ເປັນບ່ອນປ້ອງກັນ. ແລະ ຂ້າພະເຈົ້າຂໍເຊື້ອເຊີນທ່ານອີກ ໃຫ້ເພີ່ມຄວາມເຂົ້າໃຈຫລາຍຂຶ້ນກ່ຽວກັບອຳນາດຂອງຖານະປະໂລຫິດ ແລະ ພັນທະສັນຍາ ແລະ ພອນຂອງພຣະວິຫານ. ການມີບ່ອນປ້ອງກັນທີ່ທ່ານສາມາດລີ້ໄພ ຈະຊ່ວຍທ່ານໃຫ້ຮັບເອົາອະນາຄົດດ້ວຍສັດທາໄດ້.
ຫລັກທຳຂໍ້ທີສອງ: ການຕຽມຈິດໃຈຂອງທ່ານໃຫ້ຊື່ສັດຕໍ່ພຣະເຈົ້າ
ພວກເຮົາໄດ້ເລີ່ມຕົ້ນໂຄງການທີ່ໃຫຍ່ໂຕ ເພື່ອບຸລະນະ ແລະ ດັດແປງພຣະວິຫານເຊົາເລັກໃຫ້ໝັ້ນຄົງກວ່າເກົ່າ.
ບາງຄົນໄດ້ສົງໄສຖ້າຫາກວ່າ ເຮົາຄວນສ້ອມແປງພຣະວິຫານຢ່າງຫລວງຫລາຍແບບນັ້ນຫລືບໍ່. ເຖິງຢ່າງໃດກໍຕາມ, ເມື່ອຮ່ອມພູເມືອງເຊົາເລັກເກີດແຜ່ນດິນໄຫວແຮງ 5.7 ໃນຕົ້ນປີນີ້, ພຣະວິຫານໄດ້ສັ່ນສະເທື່ອນຈົນວ່າ ແກຂອງທູດໂມໂຣໄນຫລົ່ນລົງ!16
ເຊັ່ນດຽວກັນກັບພື້ນຖານຂອງພຣະວິຫານເຊົາເລັກຕ້ອງໝັ້ນຄົງພໍທີ່ຈະຕ້ານທານກັບໄພທຳມະຊາດໄດ້, ພື້ນຖານ ທາງວິນຍານ ຂອງເຮົາກໍຕ້ອງໝັ້ນຄົງຄືກັນ. ແລ້ວ, ເມື່ອແຜ່ນດິນໄຫວທີ່ປຽບທຽບໄດ້ເກີດຂຶ້ນກັບຊີວິດຂອງເຮົາ, ເຮົາຈະສາມາດຕັ້ງຢູ່ຢ່າງ “ແນ່ວແນ່ ແລະ ບໍ່ຫວັ່ນໄຫວ” ເພາະສັດທາຂອງເຮົາ.17
ພຣະຜູ້ເປັນເຈົ້າໄດ້ສິດສອນເຮົາໃຫ້ເພີ່ມສັດທາຂອງເຮົາ ໂດຍການສະແຫວງຫາ “ການຮຽນຮູ້, ແມ່ນແຕ່ໂດຍການສຶກສາ ແລະ ໂດຍສັດທານຳອີກ.”18 ເຮົາເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາໃນພຣະເຢຊູຄຣິດ ຂະນະທີ່ເຮົາພະຍາຍາມຮັກສາພຣະບັນຍັດຂອງພຣະອົງ ແລະ “ລະນຶກເຖິງພຣະອົງຕະຫລອດເວລາ.”19 ຍິ່ງໄປກວ່ານັ້ນ, ສັດທາຂອງເຮົາຈະເພີ່ມທະວີຂຶ້ນທຸກເທື່ອທີ່ເຮົາ ໃຊ້ ສັດທາຂອງເຮົາໃນພຣະອົງ. ນັ້ນຄືຄວາມໝາຍຂອງການຮຽນຮູ້ໂດຍສັດທາ.
ຍົກຕົວຢ່າງ, ທຸກເທື່ອທີ່ເຮົາມີສັດທາທີ່ຈະເຊື່ອຟັງກົດຂອງພຣະເຈົ້າ—ເຖິງແມ່ນວ່າຄວາມຄິດເຫັນທີ່ເປັນທີ່ນິຍົມຈະດູຖູກເຮົາກໍຕາມ—ຫລື ທຸກເທື່ອທີ່ເຮົາຕ້ານກັບການບັນເທີງ ຫລື ທິດສະດີ ທີ່ຝ່າຝືນພັນທະສັນຍາ, ເຮົາກຳລັງ ໃຊ້ ສັດທາຂອງເຮົາ, ຊຶ່ງຈະເຮັດໃຫ້ສັດທາຂອງເຮົາ ເຂັ້ມແຂງ ຫລາຍຂຶ້ນກວ່າເກົ່າ.
ຍິ່ງໄປກວ່ານັ້ນ, ບໍ່ມີຫລາຍສິ່ງທີ່ເຮົາສາມາດສ້າງສັດທາໄດ້ຫລາຍກວ່າການເຂົ້າຫາພຣະຄຳພີມໍມອນເປັນປະຈຳ. ບໍ່ມີໜັງສືອື່ນໃດທີ່ເປັນພະຍານເຖິງພຣະເຢຊູຄຣິດ ດ້ວຍພະລັງ ແລະ ດ້ວຍຄວາມແຈ່ມແຈ້ງເຊັ່ນນັ້ນ. ບັນດາສາດສະດາ, ຕາມທີ່ໄດ້ຮັບການດົນໃຈຈາກພຣະຜູ້ເປັນເຈົ້າ, ໄດ້ເຫັນວັນເວລາຂອງເຮົາ ແລະ ໄດ້ເລືອກຄຳສອນ ແລະ ຄວາມຈິງທີ່ຈະຊ່ວຍ ເຮົາ ໄດ້ຫລາຍທີ່ສຸດ. ພຣະຄຳພີມໍມອນ ເປັນ ປຶ້ມຄູ່ມືຊ່ວຍໃຫ້ລອດໃນ ຍຸກສຸດທ້າຍ ຂອງເຮົາ.
ແນ່ນອນ, ເຮົາຈະຮູ້ສຶກປອດໄພຫລາຍທີ່ສຸດ ເມື່ອເຮົາເພິ່ງອາໄສພຣະບິດາເທິງສະຫວັນ ແລະ ພຣະເຢຊູຄຣິດ! ຊີວິດທີ່ ປາດສະຈາກ ພຣະເຈົ້າ ເປັນຊີວິດທີ່ເຕັມໄປດ້ວຍຄວາມຢ້ານກົວ. ຊີວິດທີ່ ຢູ່ກັບ ພຣະເຈົ້າ ເປັນຊີວິດທີ່ເຕັມໄປດ້ວຍຄວາມສະຫງົບ. ນີ້ກໍເພາະພອນທາງວິນຍານທີ່ມາເຖິງຄົນທີ່ຊື່ສັດ. ການໄດ້ຮັບການເປີດເຜີຍເປັນສ່ວນຕົວ ເປັນໜຶ່ງໃນພອນທີ່ຍິ່ງໃຫຍ່ທີ່ສຸດເຫລົ່ານັ້ນ.
ພຣະຜູ້ເປັນເຈົ້າໄດ້ສັນຍາວ່າ ຖ້າຫາກເຮົາຈະທູນຂໍ, ເຮົາອາດໄດ້ຮັບ “ການເປີດເຜີຍຕື່ມໃສ່ການເປີດເຜີຍ.”20 ຂ້າພະເຈົ້າສັນຍາວ່າ ເມື່ອທ່ານເພີ່ມຄວາມສາມາດຂອງທ່ານທີ່ຈະຮັບການເປີດເຜີຍຫລາຍຂຶ້ນ, ພຣະຜູ້ເປັນເຈົ້າຈະອວຍພອນທ່ານ ດ້ວຍການຊີ້ນຳເພີ່ມເຕີມສຳລັບຊີວິດຂອງທ່ານ ແລະ ດ້ວຍຂອງປະທານແຫ່ງພຣະວິນຍານທີ່ບໍ່ມີຂອບເຂດ.
ຫລັກທຳຂໍ້ທີສາມ: ບໍ່ເຄີຍຢຸດການຕຽມພ້ອມ
ເຖິງແມ່ນເມື່ອທຸກສິ່ງ ດີຂຶ້ນ, ນາຍທັບໂມໂຣໄນ ກໍຍັງສືບຕໍ່ຕຽມຜູ້ຄົນຂອງເພິ່ນ. ເພິ່ນບໍ່ເຄີຍຢຸດ. ເພິ່ນ ບໍ່ເຄີຍ ກາຍເປັນຄົນທີ່ພໍໃຈແລ້ວ.
ຜູ້ປໍລະປັກບໍ່ເຄີຍຢຸດໂຈມຕີ. ສະນັ້ນ, ເຮົາຈຶ່ງ ບໍ່ ສາມາດຢຸດການຕຽມພ້ອມ! ເມື່ອເຮົາເປັນຄົນກຸ້ມຕົນເອງຫລາຍຂຶ້ນເທົ່າໃດ—ທາງຝ່າຍໂລກ, ທາງຝ່າຍອາລົມ, ແລະ ທາງຝ່າຍວິນຍານ—ເຮົາຈະຕຽມພ້ອມທີ່ຈະຕໍ່ຕ້ານກັບການໂຈມຕີທີ່ບໍ່ຢຸດຢ່ອນຂອງຊາຕານໄດ້ຫລາຍກວ່າເກົ່າ.
ເອື້ອຍນ້ອງທີ່ຮັກແພງທັງຫລາຍ, ທ່ານຊ່ຽວຊານເລື່ອງການສ້າງບ່ອນປ້ອງກັນສຳລັບຕົວເອງ ແລະ ຜູ້ທີ່ທ່ານຮັກ. ຍິ່ງໄປກວ່ານັ້ນ, ທ່ານມີຄວາມສາມາດອັນສູງສົ່ງທີ່ຈະສ້າງສັດທາໃນຄົນອື່ນ ໃນວິທີທາງທີ່ໜ້າສົນໃຈ.21 ແລະ ທ່ານ ບໍ່ເຄີຍຢຸດ. ທ່ານໄດ້ສະແດງເຖິງສິ່ງນັ້ນອີກໃນປີນີ້.
ຈົ່ງເຮັດຕໍ່ໄປ! ຄວາມລະມັດລະວັງຂອງທ່ານໃນການປົກປ້ອງບ້ານເຮືອນຂອງທ່ານ ແລະ ໃນການປູກຝັງສັດທາໄວ້ໃນຫົວໃຈຂອງຄົນທີ່ທ່ານຮັກ ຈະເປັນລາງວັນສຳລັບຫລາຍລຸ້ນຄົນໃນພາຍຂ້າງໜ້າ.
ເອື້ອຍນ້ອງທີ່ຮັກແພງຂອງຂ້າພະເຈົ້າ, ເຮົາມີ ຫລາຍຢ່າງ ທີ່ເຮົາລໍຄອຍ! ພຣະຜູ້ເປັນເຈົ້າໄດ້ສົ່ງທ່ານມາຢູ່ໃນໂລກ ໃນເວລານີ້ ເພາະພຣະອົງຮູ້ວ່າ ທ່ານມີຄວາມສາມາດທີ່ຈະຈັດການກັບຄວາມຊັບຊ້ອນໃນໄລຍະຂ້າງໜ້າຂອງຍຸກສຸດທ້າຍ. ພຣະອົງຮູ້ວ່າທ່ານເຂົ້າໃຈກ່ຽວກັບວຽກງານທີ່ຍິ່ງໃຫຍ່ຂອງພຣະອົງ ແລະ ກະຕືລືລົ້ນທີ່ຈະຊ່ວຍມັນໃຫ້ເກີດເປັນຈິງ.
ຂ້າພະເຈົ້າບໍ່ໄດ້ເວົ້າວ່າ ວັນຂ້າງໜ້າຈະງ່າຍ, ແຕ່ຂ້າພະເຈົ້າສັນຍາກັບທ່ານວ່າ ອະນາຄົດຈະຮຸ່ງໂລດສຳລັບຜູ້ທີ່ຕຽມພ້ອມ ແລະ ຜູ້ທີ່ສືບຕໍ່ຕຽມພ້ອມ ເພື່ອເປັນເຄື່ອງມືໃນພຣະຫັດຂອງພຣະຜູ້ເປັນເຈົ້າ.
ເອື້ອຍນ້ອງທີ່ຮັກແພງຂອງຂ້າພະເຈົ້າ, ຂໍໃຫ້ເຮົາບໍ່ພຽງແຕ່ ອົດທົນ ກັບສະຖານະການໃນປະຈຸບັນນີ້ເທົ່ານັ້ນ. ຂໍໃຫ້ເຮົາຈົ່ງ ຮັບເອົາອະນາຄົດດ້ວຍສັດທາ! ຊ່ວງເວລາທີ່ປັ່ນປ່ວນເປັນໂອກາດໃຫ້ເຮົາຈະເລີນກ້າວໜ້າທາງວິນຍານ. ມັນເປັນເວລາເມື່ອອິດທິພົນຂອງເຮົາສາມາດມີພະລັງຫລາຍກວ່າເວລາທີ່ສະຫງົບສຸກ.
ຂ້າພະເຈົ້າສັນຍາວ່າ ຂະນະທີ່ເຮົາສ້າງບ່ອນປ້ອງກັນ, ຕຽມຈິດໃຈຂອງເຮົາໃຫ້ຊື່ສັດຕໍ່ພຣະເຈົ້າ, ແລະ ບໍ່ເຄີຍຢຸດການຕຽມພ້ອມ, ແລ້ວພຣະເຈົ້າຈະອວຍພອນເຮົາ. ພຣະອົງຈະ “ປົດປ່ອຍເຮົາ; ແທ້ຈິງແລ້ວ, ເຖິງຂະໜາດທີ່ພຣະອົງໄດ້ກ່າວຄວາມສະຫງົບແກ່ຈິດວິນຍານຂອງເຮົາ, ແລະ ໄດ້ປະທານສັດທາອັນແຮງກ້າໃຫ້ແກ່ເຮົາ, ແລະ … ເຮັດໃຫ້ເຮົາ [ສາມາດ] ມີຄວາມຫວັງໃນຄວາມລອດພົ້ນຂອງເຮົາຈາກພຣະອົງ.”22
ເມື່ອທ່ານຕຽມທີ່ຈະຮັບເອົາອະນາຄົດດ້ວຍສັດທາ, ຄຳສັນຍາເຫລົ່ານີ້ ຈະ ເປັນຂອງທ່ານ! ຂ້າພະເຈົ້າເປັນພະຍານ, ດ້ວຍການສະແດງຄວາມຮັກ ຕໍ່ ທ່ານ ແລະ ດ້ວຍຄວາມໝັ້ນໃຈຂອງຂ້າພະເຈົ້າ ໃນ ຕົວທ່ານ, ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.