ຍັງມີເຂົ້າກິນ
ຂະນະທີ່ເຮົາສະແຫວງຫາທີ່ຈະຕຽມພ້ອມທາງຝ່າຍໂລກ, ເຮົາສາມາດປະເຊີນກັບການທົດລອງ ໃນຊີວິດດ້ວຍຄວາມໝັ້ນໃຈຫລາຍຂຶ້ນ.
ກ່ອນການຈຳກັດເລື່ອງການເດີນທາງທີ່ໄດ້ເກີດຂຶ້ນໂດຍການແຜ່ລະບາດໃນປະຈຸບັນ, ຂ້າພະເຈົ້າໄດ້ກັບບ້ານຈາກໜ້າທີ່ມອບໝາຍຢູ່ຕ່າງປະເທດ, ເພາະມີບັນຫາກັບຕາຕະລາງເດີນທາງ, ກໍເລີຍໄດ້ມີການລໍຖ້າຖ້ຽວບິນໃນວັນອາທິດ. ຂ້າພະເຈົ້າໄດ້ມີເວລາລະຫວ່າງລໍຖ້າຖ້ຽວບິນ ເພື່ອຈະໄປຮ່ວມກອງປະຊຸມສິນລະລຶກໃນທ້ອງຖິ່ນ, ບ່ອນທີ່ຂ້າພະເຈົ້າສາມາດແບ່ງປັບຂ່າວສານສັ້ນໆນຳອີກ. ຫລັງຈາກກອງປະຊຸມ, ມັກຄະນາຍົກທີ່ກະຕືລືລົ້ນຄົນໜຶ່ງໄດ້ມາຫາຂ້າພະເຈົ້າ ແລະ ໄດ້ຖາມຖ້າຫາກວ່າຂ້າພະເຈົ້າຮູ້ຈັກປະທານແນວສັນ ແລະ ຖ້າຫາກວ່າຂ້າພະເຈົ້າເຄີຍມີໂອກາດຈັບມືເພິ່ນ. ຂ້າພະເຈົ້າໄດ້ຕອບວ່າຂ້າພະເຈົ້າຮູ້ຈັກເພິ່ນ, ວ່າຂ້າພະເຈົ້າເຄີຍໄດ້ຈັບມືເພິ່ນ, ແລະ ວ່າ, ໃນຖານະສະມາຊິກໃນຝ່າຍອະທິການຄວບຄຸມ, ຂ້າພະເຈົ້າໄດ້ພົບກັບປະທານແນວສັນ ແລະ ທີ່ປຶກສາຂອງເພິ່ນອາທິດລະສອງເທື່ອ.
ແລ້ວມັກຄະນາຍົກໜຸ່ມຄົນນັ້ນກໍໄດ້ນັ່ງລົງໃນຕັ່ງ, ໄດ້ຍົກມືຂຶ້ນໃນອາກາດ, ແລະ ໄດ້ຮ້ອງຂຶ້ນວ່າ, “ນີ້ເປັນວັນທີ່ດີທີ່ສຸດໃນຊີວິດຂອງຂ້ານ້ອຍ!” ອ້າຍເອື້ອຍນ້ອງທັງຫລາຍ, ຂ້າພະເຈົ້າອາດບໍ່ຍົກມືຂອງຂ້າພະເຈົ້າຂຶ້ນໃນອາກາດ ແລະ ຮ້ອງອອກມາ, ແຕ່ຂ້າພະເຈົ້າກະຕັນຍູຊົ່ວນິລັນດອນສຳລັບສາດສະດາທີ່ມີຊີວິດຢູ່ ແລະ ສຳລັບການຊີ້ນຳທີ່ເຮົາໄດ້ຮັບຈາກບັນດາສາດສະດາ, ຜູ້ພະຍາກອນ, ແລະ ຜູ້ເປີດເຜີຍ, ໂດຍສະເພາະໃນຊ່ວງເວລາທີ່ທ້າທາຍເຫລົ່ານີ້.
ນັບຕັ້ງແຕ່ການເລີ່ມຕົ້ນຂອງເວລາ, ພຣະຜູ້ເປັນເຈົ້າໄດ້ປະທານການຊີ້ນຳ ເພື່ອຊ່ວຍຜູ້ຄົນຂອງພຣະອົງໃຫ້ຕຽມພ້ອມທາງຝ່າຍວິນຍານ ແລະ ຝ່າຍໂລກ ເພື່ອຮັບມືກັບໄພພິບັດ ແລະ ການທົດລອງທີ່ພຣະອົງຮູ້ວ່າຈະເກີດຂຶ້ນ ເພາະເປັນພາກສ່ວນຂອງປະສົບການມະຕະນີ້. ໄພພິບັດເຫລົ່ານີ້ອາດເປັບແບບສ່ວນຕົວ ຫລື ແບບທົ່ວໄປ, ແຕ່ການຊີ້ນຳຂອງພຣະຜູ້ເປັນເຈົ້າຈະໃຫ້ການປົກປ້ອງ ແລະ ການສະໜັບສະໜູນເທົ່າທີ່ເຮົາເຊື່ອຟັງ ແລະ ກະທຳຕາມຄຳແນະນຳຂອງພຣະອົງ. ຕົວຢ່າງທີ່ດີຢ່າງໜຶ່ງກໍມີໃຫ້ຢູ່ໃນເລື່ອງລາວຈາກໜັງສືປະຖົມມະການ, ບ່ອນທີ່ເຮົາຮຽນຮູ້ເຖິງ ໂຢເຊັບແຫ່ງເອຢິບ ແລະ ການແກ້ຄວາມຝັນທີ່ດົນໃຈຂອງເພິ່ນໃຫ້ແກ່ກະສັດຟາຣາໂອ.
“ໂຢເຊັບຕອບຟາຣາໂອວ່າ, … ພຣະເຈົ້າໄດ້ບອກທ່ານໃຫ້ຮູ້ເຖິງສິ່ງທີ່ພຣະອົງຈະໃຫ້ບັງເກີດຂຶ້ນ. …
“ຢູ່ໃນທົ່ວດິນແດນຂອງປະເທດເອຢິບ ຈະມີຄວາມອຸດົມສົມບູນເປັນເວລາເຈັດປີ:
“ຫລັງຈາກນັ້ນ ຈະມີການອຶດຢາກເກີດຂຶ້ນເປັນເວລາເຈັດປີອີກ ແລະ ປີແຫ່ງຄວາມອຸດົມສົມບູນໃນປະເທດເອຢິບຈະຖືກລຶບໄປ ຍ້ອນວ່າຄວາມອຶດຢາກຈະທຳລາຍປະເທດ.”1
ຟາຣາໂອ ໄດ້ຮັບຟັງໂຢເຊັບ, ໄດ້ຕອບຮັບຕໍ່ສິ່ງທີ່ພຣະເຈົ້າໄດ້ສະແດງໃຫ້ເພິ່ນເຫັນໃນຄວາມຝັນ, ແລະ ໃນທັນທີກໍໄດ້ຈັດຕຽມສຳລັບສິ່ງທີ່ຈະເກີດຂຶ້ນ. ແລ້ວພຣະຄຳພີບັນທຶກວ່າ:
“ໃນໄລຍະເຈັດປີທີ່ອຸດົມສົມບູນນັ້ນ ທີ່ດິນກໍຜະລິດຜົນລະປູກໄດ້ຢ່າງຫລວງຫລາຍ.
“ໂຢເຊັບເກັບ ແລະ ຮິບໂຮມອາຫານທຸກໆຊະນິດໄວ້ຕາມເມືອງຕ່າງໆສຳລັບເຈັດປີ. …
“ແລະ ໂຢເຊັບໄດ້ຮິບໂຮມເຂົ້າໄວ້ຢ່າງຫລວງຫລາຍ ດັ່ງເມັດດິນຊາຍທີ່ແຄມທະເລ, … ຈົນບໍ່ມີໃຜສາມາດຈະຊັ່ງຕວງໄດ້.”2
ເມື່ອເວລາເຈັດປີຂອງຄວາມອຸດົມສົມບູນໄດ້ຜ່ານໄປ, ເຮົາໄດ້ຖືກບອກວ່າ “ຄວາມອຶດຢາກເປັນເວລາເຈັດປີກໍເກີດຂຶ້ນ ຕາມທີ່ໂຢເຊັບໄດ້ກ່າວໄວ້ລ່ວງໜ້າ: ຢູ່ໃນປະເທດອື່ນບໍ່ມີເຂົ້າກິນແລ້ວ; ແຕ່ຢູ່ໃນປະເທດເອຢິບຍັງມີເຂົ້າກິນທົ່ວປະເທດ.”3
ໃນເວລານີ້ເຮົາໄດ້ຮັບພອນທີ່ຖືກນຳພາໂດຍສາດສະດາ ຜູ້ທີ່ເຂົ້າໃຈຄວາມຕ້ອງການ ໃຫ້ເຮົາຕຽມພ້ອມເພື່ອຮັບມືກັບໄພພິບັດ “ທີ່ຈະມາເຖິງ”4 ແລະ ຜູ້ທີ່ຮັບຮູ້ຂໍ້ກຳນົດ ຫລື ຂໍ້ຈຳກັດທີ່ເຮົາອາດປະເຊີນໃນຄວາມພະຍາຍາມທີ່ຈະເຮັດຕາມຄຳແນະນຳຂອງພວກເພິ່ນ.
ມີຄວາມເຂົ້າໃຈຢ່າງແຈ່ມແຈ້ງດີວ່າ ຜົນກະທົບຂອງພະຍາດໂຄວິດ-19, ລວມທັງໄພພິບັດທຳມະຊາດທີ່ຮ້າຍແຮງ, ບໍ່ລະເວັ້ນຜູ້ໃດ ແລະ ຂ້າມຜ່ານຊົນເຜົ່າ, ສັງຄົມ, ແລະ ຂອບເຂດສາດສະໜາໃນທຸກໆທະວີບ. ຜູ້ຄົນໄດ້ສູນເສຍການງານ ແລະ ລາຍຮັບກໍໄດ້ຫລຸດຜ່ອນລົງ ຂະນະທີ່ໂອກາດຈະທຳງານກໍຖືກກະທົບກະເທືອນ ໂດຍການຕົກງານ ແລະ ຄວາມສາມາດທີ່ຈະທຳງານ ກໍຖືກກະທົບກະເທືອນໂດຍການທ້າທາຍທາງສຸຂະພາບ ແລະ ທາງກົດໝາຍ.
ຕໍ່ທຸກໆຄົນທີ່ຖືກກະທົບກະເທືອນ, ພວກເຮົາຂໍສະແດງຄວາມເຂົ້າໃຈ ແລະ ຄວາມຫ່ວງໃຍສຳລັບສະພາບການຂອງທ່ານ, ພ້ອມທັງຄວາມເຊື່ອໝັ້ນວ່າ ວັນເວລາທີ່ດີກວ່າຍັງຢູ່ຂ້າງໜ້າ. ທ່ານໄດ້ຮັບພອນທີ່ມີອະທິການ ແລະ ປະທານສາຂາ ຜູ້ທີ່ຊອກຫາສະມາຊິກໃນໜ່ວຍຂອງພວກເພິ່ນທີ່ມີຄວາມຕ້ອງການທາງຝ່າຍໂລກ ແລະ ພວກເພິ່ນເຂົ້າເຖິງເຄື່ອງມື ແລະ ແຫລ່ງຕ່າງໆທີ່ສາມາດຊ່ວຍທ່ານໃຫ້ປັບຊີວິດຂອງທ່ານຄືນໃໝ່ ແລະ ວາງທ່ານໄວ້ຢູ່ໃນເສັ້ນທາງສູ່ການກຸ້ມຕົນເອງ ຂະນະທີ່ທ່ານນຳໃຊ້ຫລັກທຳແຫ່ງການຕຽມພ້ອມ.
ໃນສະພາບແວດລ້ອມໃນວັນເວລານີ້, ດ້ວຍການແຜ່ລະບາດທີ່ໄດ້ທຳລາຍເສດຖະກິດທັງໝົດ ຕະຫລອດທັງຊີວິດສ່ວນຕົວ, ມັນຈະບໍ່ສອດຄ່ອງກັບພຣະຜູ້ຊ່ວຍໃຫ້ລອດທີ່ເຫັນອົກເຫັນໃຈ ທີ່ຈະເມີນເສີຍກັບຄວາມເປັນຈິງວ່າ ຫລາຍຄົນກຳລັງດີ້ນລົນຢູ່ ແລະ ຂໍຮ້ອງໃຫ້ເຂົາເຈົ້າເລີ່ມສະສົມອາຫານ ແລະ ເງິນເພື່ອອະນາຄົດ. ເຖິງຢ່າງໃດກໍຕາມ, ນັ້ນບໍ່ໄດ້ໝາຍຄວາມວ່າ ເຮົາຄວນເມີນເສີຍກັບຫລັກທຳແຫ່ງການຕຽມພ້ອມຕະຫລອດໄປ—ພຽງແຕ່ວ່າຫລັກທຳເຫລົ່ານີ້ຄວນຖືກນຳໃຊ້ “ດ້ວຍປັນຍາ ແລະ ເປັນລະບຽບ”5 ເພື່ອວ່າໃນອະນາຄົດເຮົາອາດກ່າວອອກມາໄດ້, ດັ່ງທີ່ໂຢເຊັບແຫ່ງເອຢິບໄດ້ກ່າວວ່າ, “ຍັງມີເຂົ້າກິນ.”6
ພຣະຜູ້ເປັນເຈົ້າບໍ່ຄາດຫວັງໃຫ້ເຮົາເຮັດຫລາຍເກີນກວ່າທີ່ເຮົາສາມາດ, ແຕ່ພຣະອົງຄາດຫວັງໃຫ້ເຮົາເຮັດສິ່ງທີ່ເຮົາເຮັດໄດ້, ເມື່ອເຮົາສາມາດເຮັດໄດ້. ດັ່ງທີ່ປະທານແນວສັນໄດ້ເຕືອນໃຈເຮົາຢູ່ໃນກອງປະຊຸມໃຫຍ່ສາມັນຜ່ານມານີ້ວ່າ “ພຣະຜູ້ເປັນເຈົ້າມັກຄວາມພະຍາຍາມ.”7
ຜູ້ນຳໃນສາດສະໜາຈັກໄດ້ຊຸກຍູ້ໄພ່ພົນຍຸກສຸດທ້າຍເລື້ອຍໆວ່າໃຫ້ “ກະກຽມສຳລັບຄວາມຍາກລຳບາກໃນຊີວິດ ໂດຍການມີສະບຽງອາຫານ ແລະ ນ້ຳທີ່ຈຳເປັນ ແລະ ມີເງິນໃນສ່ວນເກັບອອມ.”8 ໃນເວລາດຽວກັນ, ເຮົາຖືກຊຸກຍູ້ໃຫ້ “ສະຫລາດ” ແລະ “ບໍ່ໃຫ້ເຮັດເກີນຄວນ”9 ໃນຄວາມພະຍາຍາມຂອງເຮົາທີ່ຈະຈັດຕຽມການສະສົມສະບຽງອາຫານຢູ່ທີ່ບ້ານ ແລະ ການເກັບອອມເງິນ. ແຫລ່ງຊ່ວຍເຫລືອເປັນປຶ້ມນ້ອຍ ຊື່ວ່າ Personal Finances for Self-Reliance [ການເງິນສ່ວນຕົວສຳລັບການກຸ້ມຕົນເອງ], ຈັດພິມໃນປີ 2017 ແລະ ໃນເວລານີ້ມີໃຫ້ຢູ່ໃນເວບໄຊ້ຂອງສາດສະໜາຈັກໃນ 36 ພາສາ, ເລີ່ມດ້ວຍຂ່າວສານຈາກຝ່າຍປະທານສູງສຸດ, ຊຶ່ງກ່າວວ່າ:
“ພຣະຜູ້ເປັນເຈົ້າໄດ້ປະກາດວ່າ, ‘ມັນເປັນຈຸດປະສົງຂອງເຮົາທີ່ຈະຈັດຫາໃຫ້ໄພ່ພົນຂອງເຮົາ’ [ຄຳສອນ ແລະ ພັນທະສັນຍາ 104:15]. ການເປີດເຜີຍນີ້ແມ່ນຄຳສັນຍາຈາກພຣະຜູ້ເປັນເຈົ້າວ່າ ພຣະອົງຈະຈັດຫາພອນທາງຝ່າຍໂລກໃຫ້ ແລະ ຈະເປີດປະຕູສະຫວັນຂອງການກຸ້ມຕົນເອງ. …
“… ການຍອມຮັບ ແລະ ການດຳລົງຊີວິດຕາມຫລັກທຳເຫລົ່ານີ້ ຈະຊ່ວຍໃຫ້ທ່ານໄດ້ຮັບພອນທາງຝ່າຍໂລກທີ່ພຣະຜູ້ເປັນເຈົ້າໄດ້ສັນຍາໄວ້.
“ພວກເຮົາຂໍເຊື້ອເຊີນທ່ານໃຫ້ສຶກສາ ແລະ ນຳໃຊ້ຫລັກທຳເຫລົ່ານີ້ຢ່າງພາກພຽນ ແລະ ສິດສອນມັນໃຫ້ແກ່ສະມາຊິກໃນຄອບຄົວຂອງທ່ານ. ຂະນະທີ່ທ່ານເຮັດດັ່ງນັ້ນ, ຊີວິດຂອງທ່ານຈະໄດ້ຮັບພອນ … [ເພາະ] ທ່ານເປັນລູກຂອງພຣະບິດາຜູ້ສະຖິດໃນສະຫວັນຂອງເຮົາ. ພຣະອົງຮັກທ່ານ ແລະ ຈະບໍ່ປະຖິ້ມທ່ານຈັກເທື່ອ. ພຣະອົງຮູ້ຈັກທ່ານ ແລະ ພ້ອມທີ່ຈະປະທານພອນທາງຝ່າຍວິນຍານ ແລະ ທາງຝ່າຍໂລກຂອງການກຸ້ມຕົນເອງໃຫ້ແກ່ທ່ານ.”10
ແຫລ່ງຊ່ວຍເຫລືອນີ້ແມ່ນຮ່ວມດ້ວຍບົດຕ່າງໆ ທີ່ຈັດຂຶ້ນໂດຍສະເພາະ ເພື່ອການສ້າງ ແລະ ການດຳລົງຊີວິດພາຍໃນງົບປະມານ, ການປົກປ້ອງຄອບຄົວຂອງທ່ານເພື່ອຮັບມືກັບຄວາມຍາກລຳບາກ, ການບໍລິຫານວິກິດການເງິນ, ການລົງທຶນເພື່ອອະນາຄົດ ແລະ, ຫລາຍຢ່າງອື່ນອີກກໍມີໃຫ້ທຸກຄົນຢູ່ທີ່ເວບໄຊ້ຂອງສາດສະໜາຈັກ ຫລື ຜ່ານຜູ້ນຳໃນທ້ອງຖິ່ນຂອງທ່ານ.
ເມື່ອພິຈາລະນາຫລັກທຳແຫ່ງການຕຽມພ້ອມ, ເຮົາສາມາດກັບໄປເບິ່ງ ໂຢເຊັບແຫ່ງເອຢິບ ສຳລັບການດົນໃຈ. ການຮູ້ຈັກສິ່ງທີ່ຈະເກີດຂຶ້ນຈະບໍ່ພຽງພໍທີ່ຈະພາເຂົາເຈົ້າໃຫ້ຜ່ານພົ້ນປີແຫ່ງ “ການອຶດຢາກ” ໂດຍບໍ່ໄດ້ເສຍສະລະໃນລະດັບໃດລະຫວ່າງປີທີ່ອຸດົມສົມບູນ. ແທນທີ່ຈະບໍລິໂພກທຸກສິ່ງທີ່ລາດຊະດອນຂອງກະສັດຟາຣາໂອໄດ້ເກັບກ່ຽວ, ກໍມີການຈັດອັດຕາກຳນົດ ແລະ ໄດ້ປະຕິບັດຕາມ, ເພື່ອໃຫ້ໄດ້ມີພໍຢູ່ພໍກິນສຳລັບຄວາມຕ້ອງການໃນເວລານັ້ນ, ພ້ອມທັງຄວາມຕ້ອງການໃນອະນາຄົດຂອງເຂົາເຈົ້ານຳອີກ. ມັນບໍ່ພຽງພໍທີ່ຈະຮູ້ວ່າຊ່ວງເວລາທີ່ທ້າທາຍຈະມາເຖິງ. ເຂົາເຈົ້າຕ້ອງໄດ້ລົງມືປະຕິບັດ, ແລະ ຍ້ອນຄວາມພະຍາຍາມຂອງເຂົາເຈົ້າ, ຈຶ່ງ “ຍັງມີເຂົ້າກິນ.”11
ເລື່ອງນີ້ນຳມາເຖິງຄຳຖາມທີ່ສຳຄັນວ່າ: “ດັ່ງນັ້ນ, ຕ້ອງເຮັດຫຍັງ?” ຈຸດເລີ່ມຕົ້ນທີ່ດີແມ່ນທີ່ຈະເຂົ້າໃຈວ່າ ທຸກສິ່ງເປັນທາງຝ່າຍວິນຍານສຳລັບພຣະຜູ້ເປັນເຈົ້າ, “ແລະ ບໍ່ມີຈັກເທື່ອ” ທີ່ພຣະອົງໄດ້ມອບ “ກົດທີ່ເປັນທາງຝ່າຍໂລກ” ໃຫ້ແກ່ເຮົາ.”12 ແລ້ວ, ທຸກສິ່ງທັງໝົດ, ກໍຊີ້ໄປທີ່ພຣະເຢຊູຄຣິດ ທີ່ເປັນພື້ນຖານທີ່ເຮົາຕ້ອງສ້າງຂຶ້ນເທິງນັ້ນ ແມ່ນແຕ່ການຕຽມພ້ອມທາງຝ່າຍໂລກ.
ການຕຽມພ້ອມທາງຝ່າຍໂລກ ແລະ ການເປັນຄົນກຸ້ມຕົນເອງໝາຍຄວາມວ່າ “ການເຊື່ອວ່າ ຜ່ານທາງພຣະຄຸນ, ຫລື ອຳນາດທີ່ເຮັດໃຫ້ສາມາດ, ຂອງພຣະເຢຊູຄຣິດ ແລະ ຄວາມພະຍາຍາມຂອງເຮົາເອງ, ເຮົາຈະສາມາດມີທຸກສິ່ງທີ່ເປັນທາງຝ່າຍວິນຍານ ແລະ ທາງຝ່າຍໂລກທີ່ຈຳເປັນຕໍ່ຊີວິດ ທີ່ເຮົາຕ້ອງການສຳລັບຕົວເຮົາເອງ ແລະ ຄອບຄົວຂອງເຮົາ.”13
ພື້ນຖານທາງຝ່າຍວິນຍານອີກດ້ານອື່ນ ສຳລັບການຕຽມພ້ອມທາງຝ່າຍໂລກແມ່ນຮ່ວມດ້ວຍການກະທຳ “ດ້ວຍປັນຍາ ແລະ ເປັນລະບຽບ,”14 ຊຶ່ງໝາຍເຖິງ ການສະສົມອາຫານເທື່ອລະເລັກເທື່ອລະນ້ອຍ ແລະ ການເກັບອອມເງິນເປັນເວລາດົນນານ, ຕະຫລອດທັງ ການຍອມຮັບ “ເລື່ອງເລັກນ້ອຍ ແລະ ງ່າຍໆ,”15 ຊຶ່ງເປັນການສະແດງສັດທາວ່າ ພຣະຜູ້ເປັນເຈົ້າຈະຂະຫຍາຍຄວາມພະຍາຍາມເລັກໆນ້ອຍໆແຕ່ສະໝ່ຳສະເໝີຂອງເຮົາ.
ໂດຍມີພື້ນຖານທາງຝ່າຍວິນຍານທີ່ຄົງຢູ່, ແລ້ວເຮົາຈະສາມາດນຳໃຊ້ສ່ວນປະກອບສຳຄັນ ຂອງການຕຽມພ້ອມທາງຝ່າຍໂລກສອງຢ່າງ—ການບໍລິຫານການເງິນ ແລະ ການສະສົມອາຫານຢູ່ທີ່ບ້ານ ດ້ວຍຄວາມສຳເລັດຜົນ.
ຫລັກທຳສຳຄັນເພື່ອບໍລິຫານການເງິນຂອງທ່ານ ແມ່ນຮ່ວມດ້ວຍການຈ່າຍເງິນສ່ວນສິບ ແລະ ເງິນບໍລິຈາກ, ການກຳຈັດ ແລະ ການຫລີກລ້ຽງໜີ້ສິນ, ການກະກຽມ ແລະ ການໃຊ້ຈ່າຍພາຍໃນງົບປະມານ, ແລະ ການເກັບອອມເພື່ອອະນາຄົດ.
ຫລັກທຳສຳຄັນຂອງການສະສົມທີ່ບ້ານ ແມ່ນຮ່ວມດ້ວຍການສະສົມອາຫານ, ສະສົມນ້ຳ, ແລະ ສະສົມສິ່ງຂອງຢ່າງອື່ນທີ່ຈຳເປັນ ອີງຕາມຄວາມຕ້ອງການຂອງຕົນ ແລະ ຄອບຄົວ, ທັງໝົດເປັນເພາະ “ສາງເລົ້າທີ່ດີທີ່ສຸດ”16 ແມ່ນບ້ານເຮືອນ, ຊຶ່ງຈະກາຍເປັນ “ສາງສຳຮອງທີ່ເຂົ້າເຖິງໄດ້ດີທີ່ສຸດໃນຍາມຈຳເປັນ.”17
ເມື່ອເຮົາຍອມຮັບເອົາຫລັກທຳທາງຝ່າຍວິນຍານ ແລະ ສະແຫວງຫາການດົນໃຈຈາກພຣະຜູ້ເປັນເຈົ້າ ເຮົາຈະຖືກນຳພາໃຫ້ຮູ້ຈັກພຣະປະສົງຂອງພຣະເຈົ້າສຳລັບເຮົາ, ເປັນສ່ວນບຸກຄົນ ແລະ ເປັນຄອບຄົວ, ແລະ ຮູ້ຈັກວິທີທີ່ຈະນຳໃຊ້ຫລັກທຳທີ່ສຳຄັນເລື່ອງການກະກຽມທາງວິນຍານ. ຂັ້ນຕອນທີ່ສຳຄັນທີ່ສຸດທັງໝົດແມ່ນທີ່ຈະເລີ່ມຕົ້ນ.
ແອວເດີ ແບ໊ດນາ ໄດ້ສິດສອນຫລັກທຳຂໍ້ນີ້ ເມື່ອເພິ່ນໄດ້ກ່າວວ່າ: “ການລົງມືກະທຳຄືການໃຊ້ສັດທາ. … ສັດທາທີ່ແທ້ຈິງຄືການເອົາໃຈໃສ່ຕໍ່ອົງພຣະເຢຊູຄຣິດເຈົ້າ ແລະ ຈະນຳໄປສູ່ການປະຕິບັດທີ່ຊອບທຳສະເໝີ.”18
ອ້າຍເອື້ອຍນ້ອງທັງຫລາຍ, ໃນໂລກທີ່ນັບມື້ນັບປ່ຽນແປງ, ເຮົາຕ້ອງຕຽມພ້ອມສຳລັບຄວາມບໍ່ແນ່ນອນ. ແມ່ນແຕ່ດ້ວຍວັນເວລາທີ່ດີກວ່າໃນພາຍຂ້າງໜ້າ, ເຮົາຮູ້ວ່າສະພາບການທີ່ຂຶ້ນໆລົງໆທາງຝ່າຍໂລກຂອງຊີວິດມະຕະຈະຄົງຢູ່ຕໍ່ໄປ. ຂະນະທີ່ເຮົາສະແຫວງຫາເພື່ອຕຽມພ້ອມທາງຝ່າຍໂລກ, ເຮົາສາມາດປະເຊີນໜ້າກັບຄວາມຍາກລຳບາກຂອງຊີວິດດ້ວຍຄວາມໝັ້ນໃຈຫລາຍຂຶ້ນໄດ້, ດ້ວຍຄວາມສະຫງົບຢູ່ໃນຫົວໃຈເຮົາ, ແລະ ເໝືອນດັ່ງໂຢເຊັບແຫ່ງເອຢິບ, ເຮົາຈະກ່າວໄດ້, ແມ່ນແຕ່ໃນສະຖານະການທີ່ມີຄວາມກົດດັນວ່າ, “ຍັງມີເຂົ້າກິນ.”19 ໃນພຣະນາມຂອງພຣະເຢຊູຄຣິດ, ອາແມນ.