ເອື້ອຍນ້ອງໃນຊີໂອນ

ໂດຍ ປະທານເຮັນຣີ ບີ ໄອຣິງ

ທີ່ປຶກສາທີສອງໃນຝ່າຍປະທານສູງສຸດ

ທ່ານຈະເປັນພະລັງທີ່ສຳຄັນໃນການເຕົ້າໂຮມອິດສະຣາເອນ ແລະ ໃນການສ້າງຕັ້ງຜູ້ຄົນແຫ່ງຊີໂອນ.

ເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າໄດ້ຮັບພອນທີ່ຈະກ່າວປາໄສລະຫວ່າງຊ່ວງເວລາທີ່ປະເສີດນີ້ ໃນປະຫວັດສາດຂອງໂລກ. ທຸກໆວັນ, ເຮົາກໍເຂົ້າໃກ້ເວລາທີ່ຮຸ່ງໂລດຫລາຍຂຶ້ນ ເມື່ອພຣະຜູ້ຊ່ວຍໃຫ້ລອດ ພຣະເຢຊູຄຣິດ ຈະສະເດັດມາສູ່ໂລກອີກຄັ້ງ. ເຮົາຮູ້ບາງສິ່ງເຖິງເຫດການທີ່ເປັນຕາຢ້ານ ທີ່ຈະເກີດຂຶ້ນກ່ອນການສະເດັດມາຂອງພຣະອົງ, ແຕ່ຫົວໃຈຂອງເຮົາຍັງເຕັມໄປດ້ວຍຄວາມສຸກ ແລະ ຄວາມໝັ້ນໃຈນຳອີກ ເພາະການຮັບຮູ້ເຖິງຄຳສັນຍາທີ່ຮຸ່ງໂລດ ທີ່ຈະເກີດເປັນຈິງກ່ອນການສະເດັດກັບຄືນມາຂອງພຣະອົງ.

ໃນຖານະທິດາທີ່ຮັກຫອມຂອງພຣະບິດາເທິງສະຫວັນ, ແລະ ໃນຖານະທິດາຂອງອົງພຣະເຢຊູຄຣິດເຈົ້າ ໃນອານາຈັກຂອງພຣະອົງ,¹ ທ່ານຈະມີພາກສ່ວນທີ່ສຳຄັນທີ່ສຸດໃນຊ່ວງເວລາທີ່ສະຫງ່າລາສີໃນພາຍໜ້າ. ເຮົາຮູ້ວ່າພຣະຜູ້ຊ່ວຍໃຫ້ລອດຈະສະເດັດມາຫາຜູ້ຄົນທີ່ໄດ້ເຕົ້າໂຮມກັນ ແລະ ກຽມພ້ອມແລ້ວທີ່ຈະດຳລົງຊີວິດດັ່ງທີ່ຜູ້ຄົນໃນເມືອງຂອງເອນົກໄດ້ເຮັດ. ຜູ້ຄົນຢູ່ທີ່ນັ້ນໄດ້ປຸ້ມລຸມກັນດ້ວຍສັດທາໃນພຣະເຢຊູຄຣິດ ແລະ ໄດ້ກາຍເປັນຜູ້ຄົນທີ່ບໍລິສຸດແທ້ໆເມື່ອເຂົາເຈົ້າຖືກຮັບຂຶ້ນສູ່ສະຫວັນ.

ຕໍ່ໄປນີ້ແມ່ນຄຳບັນຍາຍທີ່ພຣະຜູ້ເປັນເຈົ້າໄດ້ເປີດເຜີຍ ເຖິງສິ່ງທີ່ຈະເກີດຂຶ້ນກັບຜູ້ຄົນຂອງເອນົກ ແລະ ສິ່ງທີ່ຈະເກີດຂຶ້ນໃນຍຸກສະໄໝສຸດທ້າຍຂອງຄວາມສົມບູນແຫ່ງເວລາ ນີ້:

“ແລະ ວັນນັ້ນຈະມາເຖິງເມື່ອແຜ່ນດິນໂລກຈະພັກຜ່ອນ, ແຕ່ກ່ອນວັນນັ້ນ ຟ້າສະຫວັນຈະມືດດັບ, ແລະ ມ່ານແຫ່ງຄວາມມືດຈະປົກຄຸມແຜ່ນດິນໂລກ; ແລະ ຟ້າສະຫວັນສັ່ນສະເທືອນ, ແລະ ແຜ່ນດິນໂລກນຳອີກ; ແລະ ຄວາມທຸກຍາກລຳບາກອັນໃຫຍ່ຫລວງຈະມີຢູ່ໃນບັນດາລູກຫລານມະນຸດ, ແຕ່ເຮົາຈະຮັກສາຜູ້ຄົນຂອງເຮົາໄວ້;

“ແລະ ຄວາມຊອບທຳຈະຖືກສົ່ງລົງມາຈາກສະຫວັນ; ແລະ ເຮົາຈະສົ່ງຄວາມຈິງຂຶ້ນມາ ຈາກແຜ່ນດິນໂລກ, ເພື່ອເປັນປະຈັກພະຍານເຖິງພຣະອົງດຽວທີ່ຖືກຳເນີດຂອງເຮົາ; ການຟື້ນຄືນຊີວິດຂອງພຣະອົງຈາກຄວາມຕາຍ; ແທ້ຈິງແລ້ວ, ແລະ ການຟື້ນຄືນຊີວິດຂອງມະນຸດທຸກຄົນນຳອີກ; ແລະ ເຮົາຈະເຮັດໃຫ້ຄວາມຊອບທຳ ແລະ ຄວາມຈິງກວາດແຜ່ນດິນໂລກດັ່ງນ້ຳຖ້ວມ, ເພື່ອເຕົ້າໂຮມຜູ້ທີ່ເຮົາເລືອກໄວ້ຈາກສີ່ສ່ວນຂອງແຜ່ນດິນໂລກ, ໄປສູ່ສະຖານທີ່ຊຶ່ງເຮົາຈະຈັດຕຽມໄວ້, ເມືອງບໍລິສຸດ, ເພື່ອວ່າຜູ້ຄົນຂອງເຮົາຈະຄາດແອວຂອງພວກເຂົາ, ແລະ ຄອຍຖ້າເວລາແຫ່ງ ການສະເດັດມາຂອງເຮົາ, ເພາະວ່າ ສະຖານທີ່ນະມັດສະການຂອງເຮົາຈະຢູ່ ທີ່ນັ້ນ ແລະ ມັນຈະຖືກເອີ້ນວ່າ ຊີໂອນ, ເຢຣູຊາເລັມໃໝ່.

“ແລະ ພຣະຜູ້ເປັນເຈົ້າໄດ້ກ່າວກັບເອນົກວ່າ: ຈາກນັ້ນເຈົ້າກັບເມືອງຂອງເຈົ້າທັງເມືອງຈະພົບພວກເຂົາຢູ່ທີ່ນັ້ນ, ແລະ ພວກເຮົາຈະຮັບເອົາພວກເຂົາໄວ້ໃນຊວງເອິກຂອງພວກເຮົາ, ແລະ ພວກເຂົາຈະໄດ້ເຫັນພວກເຮົາ; ແລະ ພວກເຮົາຈະໂອບກອດຄໍພວກເຂົາ, ແລະ ພວກເຂົາຈະໂອບກອດຄໍພວກເຮົາ, ແລະ ພວກເຮົາຈະຈູບກັນ;

“ແລະ ທີ່ປະທັບຂອງເຮົາຈະຢູ່ ທີ່ນັ້ນ ແລະ ມັນຈະເປັນຊີໂອນ, ຊຶ່ງຈະອອກມາຈາກການສ້າງທັງປວງທີ່ເຮົາໄດ້ສ້າງໄວ້; ແລະ ແຜ່ນດິນໂລກຈະພັກຜ່ອນເປັນເວລາໜຶ່ງພັນປີ.”²

ເອື້ອຍນ້ອງທັງຫລາຍ, ລູກສາວຂອງທ່ານ, ຫລານສາວຂອງທ່ານ, ແລະ ຜູ້ຍິງທີ່ທ່ານໄດ້ລ້ຽງດູຈະເປັນຈຸດໃຈກາງຂອງການສ້າງຕັ້ງສັງຄົມຂອງຜູ້ຄົນ ທີ່ຈະເຂົ້າຮ່ວມໃນສະມາຄົມອັນຮຸ່ງໂລດກັບພຣະຜູ້ຊ່ວຍໃຫ້ລອດນັ້ນ. ທ່ານຈະເປັນພະລັງທີ່ສຳຄັນໃນການເຕົ້າໂຮມອິດສະຣາເອນ ແລະ ໃນການສ້າງຕັ້ງຜູ້ຄົນແຫ່ງຊີໂອນ ທີ່ຈະອາໄສຢູ່ໃນເຢຣູຊາເລັມໃໝ່ຢ່າງສັນຕິ.

ຜ່ານທາງສາດສະດາຂອງພຣະອົງ, ພຣະຜູ້ເປັນເຈົ້າໄດ້ໃຫ້ສັນຍາກັບທ່ານ. ໃນສະໄໝເລີ່ມຕົ້ນຂອງສະມາຄົມສະຕິສົງເຄາະ, ສາດສະດາໂຈເຊັບ ສະມິດ ໄດ້ກ່າວຕໍ່ບັນດາເອື້ອຍນ້ອງວ່າ, “ຖ້າຫາກທ່ານດຳລົງຊີວິດໃຫ້ເໝາະສົມກັບສິດທິພິເສດຂອງທ່ານ, ແລ້ວທູດສະຫວັນກໍຈະບໍ່ຖືກຢັບຢັ້ງຈາກການເປັນ ພັນທະມິດ ຂອງທ່ານ.”³

ສັກກະຍະພາບອັນປະເສີດນັ້ນຊ້ອນຢູ່ພາຍໃນຕົວທ່ານ, ແລະ ທ່ານກຳລັງຖືກຕຽມພ້ອມ.

ປະທານກໍດອນ ບີ ຮິງລີ ໄດ້ກ່າວວ່າ:

“ພວກທ່ານເອື້ອຍນ້ອງ … ບໍ່ໄດ້ຢູ່ໃນລະດັບທີສອງໃນແຜນຂອງພຣະບິດາ ສຳລັບຄວາມສຸກນິລັນດອນ ແລະ ຄວາມຜາສຸກຂອງລູກໆຂອງພຣະອົງ. ພວກທ່ານເປັນພາກສ່ວນທີ່ສຳຄັນຂອງແຜນນັ້ນ.

“ຖ້າບໍ່ມີພວກທ່ານ ແຜນນັ້ນກໍຈະໃຊ້ການບໍ່ໄດ້. ຖ້າບໍ່ມີພວກທ່ານ ໂຄງການທັງໝົດຈະເກີດຂຶ້ນບໍ່ໄດ້. …

“ທ່ານແຕ່ລະຄົນເປັນທິດາຂອງພຣະເຈົ້າ, ທີ່ໄດ້ຮັບສິດທິແຫ່ງສະຫວັນເປັນຂອງປະທານ.”⁴

ສາດສະດາໃນປະຈຸບັນຂອງເຮົາ, ປະທານຣະໂຊ ເອັມ ແນວສັນ, ໄດ້ໃຫ້ຄຳບັນຍາຍເຖິງພາກສ່ວນຂອງທ່ານ ໃນການກະກຽມສຳລັບການສະເດັດມາຂອງພຣະຜູ້ຊ່ວຍໃຫ້ລອດວ່າ:

“ເຮົາບໍ່ສາມາດວັດແທກອິດທິພົນທີ່ … ຜູ້ຍິງມີ, ບໍ່ພຽງແຕ່ການປະຕິບັດຕໍ່ຄອບຄົວເທົ່ານັ້ນ ແຕ່ຕໍ່ສາດສະໜາຈັກຂອງພຣະຜູ້ເປັນເຈົ້າອີກດ້ວຍ, ໃນໜ້າທີ່ເປັນ ພັນລະຍາ, ແມ່, ແມ່ຕູ້, ເອື້ອຍ, ນ້ອງ, ປ້າ, ນ້າ, ອາ, ນາຍຄູ, ແລະ ຜູ້ນຳ ໂດຍສະເພາະເປັນຕົວຢ່າງ ແລະ ເປັນຜູ້ພິທັກຄວາມເຊື່ອຢ່າງອາດຫານ.

“ສິ່ງນີ້ເປັນຄວາມຈິງ ໃນທຸກສະໄໝຂອງພຣະກິດຕິຄຸນ ນັບຕັ້ງແຕ່ສະໄໝອາດາມ ແລະ ເອວາ ມາ. ແຕ່ວ່າ ຜູ້ຍິງໃນສະໄໝ ນີ້ ຕ່າງຈາກຜູ້ຍິງໃນສະໄໝ ໃດໆ ເພາະສະໄໝນີ້ແຕກຕ່າງຈາກສະໄໝອື່ນ. ໃນສະໄໝນີ້ເຂົາເຈົ້າມີສິດທິພິເສດ ແລະ ໜ້າທີ່ຮັບຜິດຊອບຕ່າງໆ.”⁵

ສະໄໝນີ້ແມ່ນແຕກຕ່າງເພາະວ່າພຣະຜູ້ເປັນເຈົ້າຈະນຳພາເຮົາໃຫ້ຕຽມພ້ອມ ທີ່ຈະເປັນເໝືອນດັ່ງເມືອງຂອງເອນົກ. ພຣະອົງໄດ້ບັນຍາຍຜ່ານທາງອັກຄະສາວົກ ແລະ ສາດສະດາຂອງພຣະອົງ ວ່າການປ່ຽນແປງຕໍ່ຜູ້ຄົນແຫ່ງຊີໂອນນັ້ນຈະຮ່ວມດ້ວຍຫຍັງແດ່.

ແອວເດີ ບະຣຸສ໌ ອາ ມັກຄອງກີ ໄດ້ສິດສອນວ່າ:

“ສະໄໝຂອງ [ເອນົກ] ເປັນວັນເວລາແຫ່ງຄວາມຊົ່ວຮ້າຍ ແລະ ສາມານ, ວັນເວລາແຫ່ງຄວາມມືດ ແລະ ການກະບົດ, ວັນເວລາແຫ່ງສົງຄາມ ແລະ ການເສຍຫາຍ, ວັນເວລາທີ່ນຳໜ້າການຊຳລະແຜ່ນດິນໂລກໃຫ້ສະອາດດ້ວຍນ້ຳ.

“ແຕ່, ເອນົກ, ເປັນຄົນຊື່ສັດ. ເພິ່ນ ‘ໄດ້ເຫັນພຣະຜູ້ເປັນເຈົ້າ,’ ແລະ ໄດ້ເວົ້າລົມກັບພຣະອົງ ‘ໜ້າຕໍ່ໜ້າ’ ຄືກັນກັບຄົນຜູ້ໜຶ່ງເວົ້າກັບຄົນອີກຜູ້ໜຶ່ງ. (ໂມເຊ 7:4.) ພຣະຜູ້ເປັນເຈົ້າໄດ້ສົ່ງເພິ່ນອອກໄປກ່າວການກັບໃຈຕໍ່ຊາວໂລກ, ແລະ ມອບໝາຍໃຫ້ເພິ່ນ ‘ບັບຕິສະມາໃນພຣະນາມຂອງພຣະບິດາ, ແລະ ຂອງພຣະບຸດ, ຊຶ່ງເຕັມໄປດ້ວຍພຣະຄຸນ ແລະ ຄວາມຈິງ, ແລະ ຂອງພຣະວິນຍານບໍລິສຸດ, ຊຶ່ງເປັນພະຍານເຖິງພຣະບິດາ ແລະ ພຣະບຸດ.’ (ໂມເຊ 7:11.) ເອນົກໄດ້ເຮັດພັນທະສັນຍາ ແລະ ໄດ້ເຕົ້າໂຮມກຸ່ມຜູ້ຄົນທີ່ເປັນຜູ້ເຊື່ອທີ່ແທ້ຈິງ, ທັງໝົດ ໄດ້ກາຍເປັນ ຜູ້ຄົນທີ່ຊື່ສັດຈົນວ່າ ‘ພຣະຜູ້ເປັນເຈົ້າໄດ້ສະເດັດລົງມາ ແລະ ດຳລົງຢູ່ນຳຜູ້ຄົນຂອງພຣະອົງ, ແລະ ເຂົາເຈົ້າໄດ້ດຳລົງຢູ່ໃນຄວາມຊອບທຳ,’ ແລະ ໄດ້ຮັບພອນຈາກເບື້ອງບົນ. ‘ແລະ ພຣະຜູ້ເປັນເຈົ້າໄດ້ເອີ້ນຜູ້ຄົນຂອງພຣະອົງວ່າ ຊີໂອນ, ເພາະວ່າພວກເຂົາມີໃຈດຽວ ແລະ ມີຄວາມຄິດດຽວ, ແລະ ໄດ້ດຳລົງຢູ່ໃນຄວາມຊອບທຳ; ແລະ ບໍ່ມີຄົນຍາກຈົນໃນບັນດາພວກເຂົາ.’ (ໂມເຊ 7:18.) …

“ຫລັງຈາກພຣະຜູ້ເປັນເຈົ້າໄດ້ເອີ້ນຜູ້ຄົນຂອງພຣະອົງວ່າຊີໂອນ, ພຣະຄຳພີກ່າວວ່າເອນົກ ‘ໄດ້ສ້າງເມືອງທີ່ເອີ້ນວ່າ ເມືອງບໍລິສຸດ, ແມ່ນແຕ່ ຊີໂອນ;’ ວ່າຊີໂອນ ‘ຖືກຮັບຂຶ້ນສູ່ສະຫວັນ’ ບ່ອນທີ່ ‘ພຣະເຈົ້າໄດ້ຮັບເອົາມັນໄປໄວ້ໃນຊວງເອິກຂອງພຣະອົງເອງ;” ແລະ “ນັບແຕ່ນັ້ນມາ ມີການກ່າວວ່າ, ຊີໂອນຫລົບໜີໄປແລ້ວ.’ (ໂມເຊ 7:19, 21, 69.) …

“ຊີໂອນດຽວກັນນີ້ທີ່ຖືກຮັບຂຶ້ນສູ່ສະຫວັນຈະກັບຄືນມາ … ເມື່ອພຣະຜູ້ເປັນເຈົ້າຈະນຳຊີໂອນກັບມາອີກ, ແລະ ຜູ້ຄົນທີ່ອາໄສຢູ່ຂອງມັນຈະເຂົ້າຮ່ວມກັບເຢຣູຊາເລັມໃໝ່, ຊຶ່ງຈະຖືກສະຖາປະນາໃນຕອນນັ້ນ.”⁶

ຖ້າຫາກອະດີດເປັນຄຳນຳ, ໃນເວລາຂອງການສະເດັດມາຂອງພຣະຜູ້ຊ່ວຍໃຫ້ລອດ, ທິດາຜູ້ທີ່ຊື່ສັດຕໍ່ພັນທະສັນຍາຂອງເຂົາເຈົ້າກັບພຣະເຈົ້າ ຈະມີຈຳນວນເກີນເຄິ່ງໜຶ່ງຂອງຜູ້ທີ່ພ້ອມແລ້ວເພື່ອຕ້ອນຮັບພຣະອົງເມື່ອພຣະອົງສະເດັດມາ. ແຕ່ບໍ່ວ່າຈຳນວນນັ້ນຈະຫລາຍເທົ່າໃດກໍຕາມ, ສ່ວນປະກອບຂອງທ່ານໃນການສ້າງຄວາມເປັນໜຶ່ງດຽວກັນ ໃນບັນດາຜູ້ຄົນທີ່ພ້ອມແລ້ວສຳລັບຊີໂອນນັ້ນ ຈະມີຫລາຍກວ່າເຄິ່ງໜຶ່ງ.

ຂ້າພະເຈົ້າຈະບອກທ່ານວ່າເປັນຫຍັງຂ້າພະເຈົ້າເຊື່ອວ່າມັນຈະເປັນດັ່ງນັ້ນ. ພຣະຄຳພີມໍມອນໃຫ້ເລື່ອງລາວເຖິງຜູ້ຄົນແຫ່ງຊີໂອນ. ທ່ານຈຳໄດ້ວ່າ ຫລັງຈາກເຂົາເຈົ້າຖືກສິດສອນ, ໄດ້ເປັນທີ່ຮັກຫອມ, ແລະ ໄດ້ຮັບພອນຈາກພຣະຜູ້ຊ່ວຍໃຫ້ລອດແລ້ວວ່າ “ມັນບໍ່ມີການຂັດແຍ້ງກັນໃນແຜ່ນດິນ, ຍ້ອນວ່າຄວາມຮັກຂອງພຣະເຈົ້າ ຊຶ່ງມີຢູ່ໃນໃຈຂອງຜູ້ຄົນ.”⁷

ປະສົບການຂອງຂ້າພະເຈົ້າໄດ້ສອນຂ້າພະເຈົ້າວ່າ ທິດາຂອງພຣະບິດາເທິງສະຫວັນມີພອນສະຫວັນ ເພື່ອຫລຸດຜ່ອນການຂັດແຍ້ງ ແລະ ສົ່ງເສີມຄວາມຊອບທຳດ້ວຍຄວາມຮັກຂອງເຂົາເຈົ້າທີ່ມີແດ່ພຣະເຈົ້າ ແລະ ດ້ວຍຄວາມຮັກຂອງພຣະເຈົ້ານັ້ນ ເຂົາເຈົ້າຈະນຳມັນໄປສູ່ຜູ້ຄົນທີ່ເຂົາເຈົ້າຮັບໃຊ້.

ຂ້າພະເຈົ້າໄດ້ເຫັນມັນໃນໄວໜຸ່ມຂອງຂ້າພະເຈົ້າ ເມື່ອສາຂານ້ອຍໆຂອງພວກເຮົາໄດ້ປະຊຸມກັນຢູ່ທີ່ບ້ານຂອງຂ້າພະເຈົ້າ. ອ້າຍຂອງຂ້າພະເຈົ້າ ແລະ ຂ້າພະເຈົ້າເປັນຜູ້ດຳລົງຖານະປະໂລຫິດແຫ່ງອາໂຣນພຽງສອງຄົນ, ພໍ່ຂອງຂ້າພະເຈົ້າກໍເປັນຜູ້ດຳລົງຖານະປະໂລຫິດແຫ່ງເມນຄີເສເດັກພຽງຜູ້ດຽວ. ປະທານສະມາຄົມສະຕີສົງເຄາະຂອງສາຂາແມ່ນຜູ້ປ່ຽນໃຈເຫລື້ອມໃສ ຜູ້ທີ່ສາມີຂອງນາງບໍ່ພໍໃຈນຳການຮັບໃຊ້ຂອງນາງໃນສາດສະໜາຈັກ. ສະມາຊິກກໍເປັນເອື້ອຍນ້ອງຜູ້ສູງອາຍຸທີ່ບໍ່ມີຜູ້ດຳລົງຖານະປະໂລຫິດຢູ່ໃນບ້ານເຮືອນ. ຂ້າພະເຈົ້າໄດ້ເຫັນແມ່ຂອງຂ້າພະເຈົ້າ ແລະ ເອື້ອຍນ້ອງເຫລົ່ານັ້ນຮັກ, ເຊີດຊູ, ແລະ ດູແລກັນແລະກັນຢ່າງບໍ່ປ່ຽນແປງ. ບັດນີ້ຂ້າພະເຈົ້າຮູ້ແລ້ວວ່າ ຂ້າພະເຈົ້າໄດ້ເຫັນພາບແຫ່ງຊີໂອນ.

ບົດຮຽນຂອງຂ້າພະເຈົ້າພາຍໃຕ້ອິດທິພົນຂອງຜູ້ຍິງທີ່ຊື່ສັດ ກໍໄດ້ສືບຕໍ່ຢູ່ໃນສາຂານ້ອຍໆຂອງສາດສະໜາຈັກອີກແຫ່ງໜຶ່ງ ໃນເມືອງອາເບີເຄີກີ ລັດນິວແມັກຊີໂກ. ຂ້າພະເຈົ້າໄດ້ເຫັນພັນລະຍາຂອງປະທານສາຂາ, ພັນລະຍາຂອງປະທານທ້ອງຖິ່ນ, ແລະ ປະທານສະມາຄົມສະຕີສົງເຄາະຕ້ອນຮັບຄົນໃໝ່ ແລະ ຜູ້ປ່ຽນໃຈເຫລື້ອມໃສທຸກໆຄົນດ້ວຍຄວາມອົບອຸ່ນ. ວັນອາທິດທີ່ຂ້າພະເຈົ້າໄດ້ຈາກເມືອງອາເບີເຄີກີໄປ, ຫລັງຈາກໄດ້ສັງເກດເຫັນອິດທິພົນຂອງບັນດາເອື້ອຍນ້ອງ ຢູ່ບ່ອນນັ້ນເປັນເວລາສອງປີ, ສະເຕກທຳອິດກໍໄດ້ຖືກຈັດຕັ້ງຂຶ້ນ. ບັດນີ້ ພຣະຜູ້ເປັນເຈົ້າກໍໄດ້ສ້າງພຣະວິຫານຢູ່ທີ່ນັ້ນ.

ຕໍ່ມາຂ້າພະເຈົ້າໄດ້ຍ້າຍໄປເມືອງບອສ໌ຕັນ, ບ່ອນທີ່ຂ້າພະເຈົ້າໄດ້ຮັບໃຊ້ໃນຝ່າຍປະທານທ້ອງຖິ່ນ ທີ່ຄວບຄຸມສາຂານ້ອຍໆທີ່ກະຈາຍກັນຢູ່ຂ້າມສອງລັດ. ໄດ້ມີການຂັດແຍ້ງກັນຢູ່ທີ່ນັ້ນທີ່ໄດ້ແກ້ໄຂຫລາຍກວ່າໜຶ່ງເທື່ອ ໂດຍຜູ້ຍິງທີ່ມີຄວາມຮັກ ແລະ ໃຫ້ອະໄພ ຜູ້ທີ່ໄດ້ຊ່ວຍເຮັດໃຫ້ຫົວໃຈອ່ອນລົງ. ວັນອາທິດທີ່ຂ້າພະເຈົ້າໄດ້ຈາກເມືອງບອສ໌ຕັນໄປ, ສະມາຊິກໃນຝ່າຍປະທານສູງສຸດໄດ້ຈັດຕັ້ງສະເຕກທຳອິດຂຶ້ນໃນລັດມາສາຊູເສດສ໌. ດຽວນີ້ກໍມີພຣະວິຫານແຫ່ງໜຶ່ງຢູ່ທີ່ນັ້ນ, ໃກ້ໆບ່ອນທີ່ປະທານທ້ອງຖິ່ນເຄີຍອາໄສຢູ່. ເພິ່ນຖືກນຳກັບມາຮ່ວມສາດສະໜາຈັກ ແລະ ຕໍ່ມາໄດ້ຖືກເອີ້ນໃຫ້ຮັບໃຊ້ເປັນປະທານສະເຕກ ແລະ ແລ້ວເປັນປະທານເຜີຍແຜ່, ໂດຍອິດທິພົນຂອງພັນລະຍາທີ່ຊື່ສັດ ແລະ ຮັກຫອມ.

ເອື້ອຍນ້ອງທັງຫລາຍ, ທ່ານໄດ້ຮັບພອນຂອງການເປັນທິດາຂອງພຣະເຈົ້າດ້ວຍຂອງປະທານພິເສດ. ທ່ານໄດ້ນຳຄວາມສາມາດທາງວິນຍານມາສູ່ຊີວິດມະຕະກັບທ່ານ ເພື່ອຈະລ້ຽງດູຄົນອື່ນ ແລະ ຍົກເຂົາເຈົ້າຂຶ້ນສູງກວ່າ ສູ່ຄວາມຮັກ ແລະ ຄວາມບໍລິສຸດທີ່ຈະໃຫ້ເຂົາເຈົ້າເໝາະສົມທີ່ຈະຢູ່ນຳກັນໃນສະມາຄົມແຫ່ງຊີໂອນ. ມັນບໍ່ໄດ້ເປັນການບັງເອີນທີ່ສະມາຄົມສະຕິສົງເຄາະ, ອົງການພິເສດທຳອິດໂດຍສະເພາະ ຂອງສາດສະໜາຈັກ ສຳລັບທິດາຂອງພຣະບິດາເທິງສະຫວັນ, ມີຄຳຂວັນວ່າ “ຄວາມໃຈບຸນດຳລົງຢູ່ຕະຫລອດໄປ.”

ຄວາມໃຈບຸນຄືຄວາມຮັກອັນບໍລິສຸດຂອງພຣະຄຣິດ. ແລະ ມັນເປັນເພາະສັດທາໃນພຣະອົງ ແລະ ຜົນກະທົບຂອງການຊົດໃຊ້ອັນບໍ່ມີຂອບເຂດຂອງພຣະອົງທີ່ຊ່ວຍໃຫ້ທ່ານ, ແລະ ຜູ້ຄົນທີ່ທ່ານຮັກ ແລະ ຮັບໃຊ້, ເໝາະສົມກັບຂອງປະທານອັນສູງສົ່ງ ເພື່ອຈະດຳລົງຢູ່ໃນສັງຄົມທີ່ເພິ່ງປາດຖະໜາ ແລະ ຊີໂອນທີ່ສັນຍາໄວ້. ຢູ່ທີ່ນັ້ນທ່ານຈະເປັນເອື້ອຍນ້ອງໃນຊີໂອນ, ເປັນທີ່ຮັກຫອມຂອງພຣະຜູ້ເປັນເຈົ້າ ແລະ ຜູ້ຄົນທີ່ທ່ານໄດ້ນຳພອນມາໃຫ້.

ຂ້າພະເຈົ້າເປັນພະຍານວ່າທ່ານເປັນປະຊາຊົນຂອງອານາຈັກຂອງພຣະຜູ້ເປັນເຈົ້າຢູ່ເທິງໂລກ. ທ່ານເປັນທິດາຂອງພຣະບິດາເທິງສະຫວັນທີ່ຮັກແພງ, ຜູ້ທີ່ໄດ້ສົ່ງທ່ານມາສູ່ໂລກດ້ວຍຂອງປະທານພິເສດ ທີ່ທ່ານໄດ້ສັນຍາຈະນຳໃຊ້ເພື່ອເປັນພອນໃຫ້ແກ່ຄົນອື່ນ. ຂ້າພະເຈົ້າສັນຍາກັບທ່ານວ່າ ພຣະຜູ້ເປັນເຈົ້າຈະນຳພາທ່ານໄປ, ຜ່ານທາງພຣະວິນຍານບໍລິສຸດ. ພຣະອົງຈະນຳໜ້າທ່ານໄປ ຂະນະທີ່ທ່ານຊ່ວຍພຣະອົງຕຽມຜູ້ຄົນຂອງພຣະອົງ ໃຫ້ກາຍເປັນຊີໂອນທີ່ສັນຍາໄວ້ຂອງພຣະອົງ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.