ດັ່ງນັ້ນ ຈົ່ງເຝົ້າລະວັງ, ແລະ ອະທິຖານຢູ່ທຸກເວລາ

ໂດຍ ປະທານ ເອັມ ຣະໂຊ ບາເລີດ

ປະທານກຸ່ມອັກຄະສາວົກສິບສອງແທນຊົ່ວຄາວ

ມື້ນີ້ ຂ້າພະເຈົ້າຈະຂະຫຍາຍການເຊື້ອເຊີນຕໍ່ທຸກຄົນ ຈາກທຸກໆປະເທດຕະຫລອດທົ່ວໂລກໃຫ້ອະທິຖານ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ລະຫວ່າງອາທິດສຸດທ້າຍຂອງການປະຕິບັດສາດສະໜາກິດໃນຊ່ວງມະຕະຂອງພຣະອົງ, ພຣະເຢຊູຄຣິດໄດ້ສິດສອນສານຸສິດໃຫ້ “ເຝົ້າລະວັງ, ແລະ ອະທິຖານຢູ່ທຸກເວລາ, ເພື່ອວ່າ ພວກເຈົ້າຈະມີກຳລັງພົ້ນຈາກເຫດການທຸກຢ່າງ ທີ່ໃກ້ຈະເກີດຂຶ້ນນັ້ນ, ແລະ ຢືນຢູ່ຕໍ່ໜ້າບຸດມະນຸດໄດ້.”¹

ໃນບັນດາ “ເຫດການທຸກຢ່າງ ທີ່ໃກ້ຈະເກີດຂຶ້ນນັ້ນ” ກ່ອນການສະເດັດມາຄັ້ງທີສອງຂອງພຣະອົງແມ່ນ “ສົງຄາມ ແລະ ຂ່າວເລົ່າລືເລື່ອງສົງຄາມ[,] … ການອຶດຢາກ, ໂຣກລະບາດ, ແລະ ແຜ່ນດິນໄຫວ, ຈະເກີດຂຶ້ນໃນທຸກແຫ່ງຫົນ.”²

ໃນ ຄຳສອນ ແລະ ພັນທະສັນຍາ ພຣະຜູ້ຊ່ວຍໃຫ້ລອດໄດ້ກ່າວວ່າ, “ແລະ ທຸກສິ່ງທັງປວງຈະຢູ່ໃນຄວາມສັບສົນວຸ້ນວາຍ; … ເພາະຄວາມຢ້ານກົວຈະມາສູ່ທຸກຜູ້ຄົນ.”³

ແນ່ນອນ, ເຮົາມີຊີວິດຢູ່ໃນຊ່ວງເວລາທີ່ ທຸກສິ່ງຢູ່ໃນຄວາມສັບສົນວຸ້ນວາຍ. ຫລາຍຄົນຢ້ານກົວອະນາຄົດ, ແລະ ຫລາຍຄົນກໍໄດ້ຫັນໄປຈາກສັດທາຂອງຕົນໃນພຣະເຈົ້າ ແລະ ພຣະບຸດຂອງພຣະອົງ, ພຣະເຢຊູຄຣິດ.

ສື່ຂ່າວກໍເຕັມໄປດ້ວຍເລື່ອງລາວຂອງຄວາມຮຸນແຮງ. ຄວາມດູຖູກທາງສິນທຳກໍຖືກພິມອອກມາໃນອິນເຕີເນັດ. ປ່າຊ້າ, ຕຶກໂບດ, ມັດສະຍິດ, ທຳມະສາລາ, ແລະ ສະຖານທີ່ສາດສະໜາຫລາຍແຫ່ງກໍຖືກທຳລາຍ.

ການແຜ່ລະບາດຕະຫລອດທົ່ວໂລກກໍເຂົ້າເຖິງທຸກໆມຸມຂອງແຜ່ນດິນໂລກ: ຫລາຍລ້ານຄົນກໍໄດ້ຕິດເຊື້ອໂຣກ, ຫລາຍກວ່າໜຶ່ງລ້ານຄົນກໍໄດ້ເສຍຊີວິດ. ພິທີຮັບປະລິນຍາຂອງໂຮງຮຽນ, ການນະມັດສະການຢູ່ທີ່ໂບດ, ພິທີສົມຣົດ, ການຮັບໃຊ້ເຜີຍແຜ່, ແລະ ກິດຈະກຳອື່ນໆທີ່ສຳຄັນໃນຊີວິດກໍຖືກລົບກວນ. ນອກເໜືອຈາກນັ້ນ, ຜູ້ຄົນເປັນຈຳນວນນັບບໍ່ຖ້ວນກໍຖືກປະຖິ້ມໃຫ້ຢູ່ຄົນດຽວ ແລະ ໂດດດ່ຽວ.

ບັນຫາທາງເສດຖະກິດໄດ້ກໍ່ໃຫ້ເກີດການທ້າທາຍສຳລັບຫລາຍໆຄົນ, ໂດຍສະເພາະຜູ້ຄົນທີ່ອ່ອນແອທີ່ສຸດໃນບັນດາລູກໆຂອງພຣະບິດາເທິງສະຫວັນຂອງເຮົາ.

ເຮົາໄດ້ເຫັນຜູ້ຄົນນຳໃຊ້ສິດທິຢ່າງກະຕືລືລົ້ນ ເພື່ອປະທ້ວງຢ່າງສັນຕິ, ແລະ ໄດ້ເຫັນກຸ່ມອັນຕະພານທີ່ຄຽດແຄ້ນກໍ່ການຮ້າຍ.

ໃນເວລາດຽວກັນນັ້ນ, ເຮົາຍັງເຫັນການຄັດແຍ້ງຕະຫລອດທົ່ວໂລກຢູ່ຕໍ່ໄປ.

ຂ້າພະເຈົ້າຄິດເຖິງພວກທ່ານເລື້ອຍໆ ຜູ້ທີ່ທົນທຸກທໍລະມານ, ກັງວົນ, ຢ້ານກົວ, ຫລື ຮູ້ສຶກວ່າໂດດດ່ຽວ. ຂ້າພະເຈົ້າຮັບຮອງທ່ານແຕ່ລະຄົນວ່າ ພຣະຜູ້ເປັນເຈົ້າຮູ້ຈັກທ່ານ, ວ່າພຣະອົງຮັບຮູ້ເຖິງຄວາມກັງວົນ ແລະ ຄວາມເຈັບປວດ, ແລະ ວ່າພຣະອົງຮັກທ່ານ—ຢ່າງໃກ້ຊິດ, ເປັນສ່ວນຕົວ, ຢ່າງເລິກເຊິ່ງ ແລະ ຕະຫລອດໄປ.

ແຕ່ລະຄືນເມື່ອຂ້າພະເຈົ້າອະທິຖານ, ຂ້າພະເຈົ້າທູນຂໍພຣະຜູ້ເປັນເຈົ້າໃຫ້ອວຍພອນທຸກຄົນ ທີ່ໜັກໜ່ວງໃຈດ້ວຍຄວາມໂສກເສົ້າ, ຄວາມເຈັບປວດ, ຄວາມໂດດດ່ຽວ, ແລະ ຄວາມເສົ້າໃຈ. ຂ້າພະເຈົ້າຮູ້ວ່າຜູ້ນຳຄົນອື່ນໆຂອງສາດສະໜາຈັກກໍກ່າວຄຳອະທິຖານອັນດຽວກັນນັ້ນ. ຫົວໃຈຂອງພວກເຮົາ, ເປັນສ່ວນບຸກຄົນ ແລະ ສ່ວນລວມ, ກໍເອື້ອມອອກໄປຫາທ່ານ, ແລະ ຄຳອະທິຖານຂອງພວກເຮົາກໍຂຶ້ນໄປເຖິງພຣະເຈົ້າເພື່ອທ່ານ.

ຂ້າພະເຈົ້າໄດ້ໃຊ້ເວລາຫລາຍວັນເມື່ອປີແລ້ວນີ້ ໃນພາກຕາເວັນອອກສ່ຽງເໜືອຂອງສະຫະລັດອາເມຣິກາ ເພື່ອຢ້ຽມຢາມສະຖານທີ່ຕ່າງໆໃນປະຫວັດສາດຂອງອາເມຣິກາ ແລະ ສາດສະໜາຈັກ, ໄປຮ່ວມກອງປະຊຸມນຳຜູ້ສອນສາດສະໜາ ແລະ ສະມາຊິກຂອງເຮົາ, ແລະ ຢ້ຽມຢາມຜູ້ນຳລັດຖະບານ ແລະ ທຸລະກິດນຳອີກ.

ໃນວັນອາທິດ, ວັນທີ 20 ເດືອນຕຸລາ, ຂ້າພະເຈົ້າໄດ້ກ່າວປາໄສຕໍ່ຜູ້ຄົນກຸ່ມໃຫຍ່ໃກ້ເມືອງບອສ໌ຕັນ, ລັດມາສາຊູເສດສ໌. ຂະນະທີ່ຂ້າພະເຈົ້າກຳລັງກ່າວປາໄສຢູ່ນັ້ນ, ຂ້າພະເຈົ້າໄດ້ຖືກກະຕຸ້ນໃຫ້ກ່າວວ່າ, “ຂ້າພະເຈົ້າຂໍອ້ອນວອນກັບທ່ານ … ໃຫ້ອະທິຖານເພື່ອປະເທດນີ້, ເພື່ອຜູ້ນຳຂອງເຮົາ, ເພື່ອຜູ້ຄົນຂອງເຮົາ, ແລະ ເພື່ອຄອບຄົວທີ່ອາໄສຢູ່ໃນປະເທດທີ່ຍິ່ງໃຫຍ່ນີ້ ທີ່ພຣະເຈົ້າໄດ້ຈັດຕັ້ງຂຶ້ນ.”⁴

ຂ້າພະເຈົ້າໄດ້ກ່າວນຳອີກວ່າ ອາເມຣິກາ ແລະ ຫລາຍໆປະເທດຢູ່ໃນໂລກ, ເມື່ອເວລາຜ່ານມາ, ຈະໄປເຖິງຈຸດທີ່ຕ້ອງຕັດສິນໃຈລົງມືເຮັດບາງຢ່າງທີ່ຈຳເປັນ ແລະ ຕ້ອງການ ການອະທິຖານຂອງເຮົາ.⁵

ຄຳອ້ອນວອນຂອງຂ້າພະເຈົ້າບໍ່ໄດ້ຢູ່ໃນຄຳປາໄສຂອງຂ້າພະເຈົ້າທີ່ໄດ້ຕຽມໄວ້ແລ້ວ. ຖ້ອຍຄຳເຫລົ່ານັ້ນໄດ້ມາສູ່ຂ້າພະເຈົ້າ ເມື່ອຂ້າພະເຈົ້າໄດ້ຮູ້ສຶກເຖິງພຣະວິນຍານກະຕຸ້ນ ຂ້າພະເຈົ້າໃຫ້ເຊື້ອເຊີນຜູ້ທີ່ຢູ່ທີ່ນັ້ນໃຫ້ອະທິຖານເພື່ອປະເທດ ແລະ ຜູ້ນຳຂອງເຂົາເຈົ້າ.

ມື້ນີ້ ຂ້າພະເຈົ້າຈະຂະຫຍາຍການເຊື້ອເຊີນຕໍ່ທຸກຄົນ ຈາກທຸກໆປະເທດຕະຫລອດທົ່ວໂລກໃຫ້ອະທິຖານ. ບໍ່ວ່າທ່ານຈະອະທິຖານແນວໃດ ຫລື ເຖິງຜູ້ໃດ, ຂໍໃຫ້ໃຊ້ສັດທາຂອງທ່ານ—ບໍ່ວ່າທ່ານເຊື່ອຖືສາດສະໜາໃດກໍຕາມ—ແລະ ໃຫ້ອະທິຖານເພື່ອປະເທດຂອງທ່ານ ແລະ ເພື່ອຜູ້ນຳໃນປະເທດຂອງທ່ານ. ດັ່ງທີ່ຂ້າພະເຈົ້າໄດ້ກ່າວໃນເດືອນຕຸລາປີແລ້ວນີ້ ໃນລັດມາສາຊູເສດສ໌, ໃນເວລານີ້ເຮົາຢືນຢູ່ໃນຊ່ວງເວລາທີ່ຕ້ອງຕັດສິນໃຈລົງມືເຮັດບາງຢ່າງທີ່ສຳຄັນໃນປະຫວັດສາດ, ແລະ ປະເທດທັງຫລາຍຂອງແຜ່ນດິນໂລກຕ້ອງການ ການດົນໃຈ ແລະ ການຊີ້ນຳຈາກສະຫວັນຫລາຍແທ້ໆ. ນີ້ບໍ່ແມ່ນກ່ຽວກັບເລື່ອງການເມືອງ ຫລື ນະໂຍບາຍ. ນີ້ແມ່ນກ່ຽວກັບຄວາມສະຫງົບ ແລະ ການປິ່ນປົວທີ່ມາສູ່ຈິດວິນຍານຂອງບຸກຄົນ ແລະ ຈິດວິນຍານຂອງປະເທດຊາດນຳອີກ—ນະຄອນ, ເມືອງ, ແລະ ໝູ່ບ້ານຂອງເຂົາເຈົ້າ—ຜ່ານທາງອົງສັນຕິລາດ ແລະ ແຫລ່ງຂອງການປິ່ນປົວທັງໝົດ, ອົງພຣະເຢຊູຄຣິດເຈົ້າ.

ລະຫວ່າງສາມສີ່ເດືອນຜ່ານມານີ້ ຂ້າພະເຈົ້າໄດ້ຮັບຄວາມປະທັບໃຈທີ່ມາສູ່ຂ້າພະເຈົ້າວ່າ ວິທີທີ່ດີທີ່ສຸດທີ່ຈະຊ່ວຍສະພາບການຂອງໂລກໃນປະຈຸບັນແມ່ນ ໃຫ້ຜູ້ຄົນທັງປວງເພິ່ງອາໄສພຣະເຈົ້າຫລາຍຂຶ້ນ ແລະ ຫັນຫົວໃຈຂອງເຮົາມາຫາພຣະອົງ ຜ່ານທາງການອະທິຖານທີ່ຈິງໃຈ. ການຖ່ອມຕົວຂອງເຮົາ ແລະ ການສະແຫວງຫາການດົນໃຈຈາກສະຫວັນ ເພື່ອຈະອົດທົນຕໍ່ ແລະ ເອົາຊະນະສິ່ງທີ່ຢູ່ຕໍ່ໜ້າເຮົາ ຈະເປັນວິທີທີ່ປອດໄພ ແລະ ແນ່ນອນທີ່ສຸດ ເພື່ອຈະກ້າວໄປໜ້າດ້ວຍຄວາມໝັ້ນໃຈ ຜ່ານຜ່າວັນເວລາທີ່ຍາກລຳບາກເຫລົ່ານີ້.

ພຣະຄຳພີເນັ້ນໃຫ້ເຫັນຄຳອະທິຖານທີ່ພຣະເຢຊູໄດ້ກ່າວ ລວມທັງຄຳສອນຂອງພຣະອົງກ່ຽວກັບການອະທິຖານ ລະຫວ່າງການປະຕິບັດສາດສະໜາກິດຂອງພຣະອົງໃນຊ່ວງມະຕະ. ທ່ານຄົງຈື່ຈຳຄຳອະທິຖານຂອງພຣະຜູ້ເປັນເຈົ້າ ທີ່ວ່າ:

“ຂ້າແດ່ພຣະບິດາເຈົ້າ ຂອງພວກຂ້ານ້ອຍທັງຫລາຍ ຜູ້ສະຖິດຢູ່ໃນສະຫວັນ, ຂໍໃຫ້ພຣະນາມຂອງພຣະອົງເປັນທີ່ເຄົາລົບບູຊາ.

“ອານາຈັກຂອງພຣະອົງຕັ້ງຢູ່ ຂໍໃຫ້ພຣະປະສົງຂອງພຣະອົງເປັນໄປໃນແຜ່ນດິນໂລກ, ເໝືອນດັ່ງທີ່ເປັນໄປໃນສະຫວັນ.

“ຂໍຊົງໂຜດປະທານເຂົ້າຈີ່ປະຈຳວັນໃຫ້ແກ່ຂ້ານ້ອຍທັງຫລາຍໃນກາລະວັນນີ້.

“ແລະ ຂໍຈົ່ງໂຜດຍົກໂທດໃຫ້ຂ້ານ້ອຍ, ເໝືອນດັ່ງທີ່ຂ້ານ້ອຍໄດ້ຍົກໂທດໃຫ້ຜູ້ທີ່ເຮັດຜິດຕໍ່ຂ້ານ້ອຍ.

“ແລະ ຂໍຢ່າພາຂ້ານ້ອຍເຂົ້າໄປໃນການທົດລອງ, ແຕ່ຂໍຊົງໂຜດໃຫ້ພົ້ນຈາກການຊົ່ວຮ້າຍ: ເຫດວ່າຣາຊາອານາຈັກ, ແລະ ອຳນາດ, ແລະ ລັດສະໝີພາບກໍເປັນຂອງພຣະອົງ, ສືບໆໄປເປັນນິດ. ອາແມນ.”⁶

ການອະທິຖານທີ່ເຈາະຈົງສວຍງາມນີ້, ທີ່ຖືກກ່າວຊ້ຳເລື້ອຍໆຕະຫລອດທົ່ວສາດສະໜາຊາວຄຣິດສະຕຽນ, ເຮັດໃຫ້ແຈ່ມແຈ້ງວ່າມັນຖືກຕ້ອງທີ່ຈະອ້ອນວອນ “ພຣະບິດາເຈົ້າ ຂອງພວກຂ້ານ້ອຍທັງຫລາຍ ຜູ້ສະຖິດຢູ່ໃນສະຫວັນ” ໂດຍກົງ ສຳລັບຄຳຕອບຕໍ່ສິ່ງທີ່ເຮັດໃຫ້ເຮົາໜັກໃຈ. ດັ່ງນັ້ນ, ຂໍໃຫ້ເຮົາຈົ່ງອະທິຖານເພື່ອທູນຂໍການຊີ້ນຳຈາກສະຫວັນ.

ຂ້າພະເຈົ້າຂໍເຊື້ອເຊີນທ່ານໃຫ້ອະທິຖານຢູ່ທຸກເວລາ.⁷ ອະທິຖານເພື່ອຄອບຄົວຂອງທ່ານ. ອະທິຖານເພື່ອຜູ້ນຳຂອງປະເທດທັງປວງ. ອະທິຖານເພື່ອຜູ້ຄົນທີ່ກ້າຫານ ຜູ້ທີ່ອອກໜ້າຢູ່ໃນການສູ້ຮົບໃນປະຈຸບັນ ຕໍ່ຕ້ານການແຜ່ລະບາດທາງດ້ານສັງຄົມ, ສິ່ງແວດລ້ອມ, ການເມືອງ, ແລະ ທາງດ້ານຊີວະພາບ ທີ່ກະທົບກະເທືອນຜູ້ຄົນຕະຫລອດທົ່ວໂລກ: ຄົນຮັ່ງມີ ແລະ ຄົນຍາກຈົນ, ຄົນໜຸ່ມ ແລະ ຄົນແກ່.

ພຣະຜູ້ຊ່ວຍໃຫ້ລອດໄດ້ສິດສອນເຮົາບໍ່ໃຫ້ຈຳກັດຜູ້ຄົນທີ່ເຮົາອະທິຖານເພື່ອ. ພຣະອົງໄດ້ກ່າວວ່າ, “ຈົ່ງຮັກສັດຕູຂອງເຈົ້າ, ຈົ່ງໃຫ້ພອນແກ່ຄົນທີ່ປ້ອຍດ່າເຈົ້າ, ຈົ່ງເຮັດດີຕໍ່ຜູ້ທີ່ກຽດຊັງເຈົ້າ, ແລະ ອະທິຖານເພື່ອຜູ້ທີ່ໃຊ້ເຈົ້າຢ່າງໝິ່ນປະໝາດ ແລະ ຂົ່ມເຫັງເຈົ້າ.”⁸

ຢູ່ເທິງໄມ້ກາງແຂນທີ່ພູກະໂຫລກຫົວ, ບ່ອນທີ່ພຣະເຢຊູໄດ້ສິ້ນພຣະຊົນເພື່ອບາບຂອງເຮົາ, ພຣະອົງໄດ້ປະຕິບັດຕາມທີ່ພຣະອົງໄດ້ສິດສອນ ເມື່ອພຣະອົງໄດ້ອະທິຖານວ່າ, “ພຣະບິດາເຈົ້າເອີຍ, ໂຜດຍົກໂທດໃຫ້ພວກເຂົາດ້ວຍເຖີດ; ເພາະພວກເຂົາບໍ່ຮູ້ຈັກວ່າ ພວກເຂົາກຳລັງເຮັດຫຍັງ.”⁹

ການອະທິຖານຢ່າງຈິງໃຈເພື່ອຜູ້ຄົນທີ່ອາດຖືວ່າເປັນສັດຕູຂອງເຮົາ ສະແດງໃຫ້ເຫັນຄວາມເຊື່ອຂອງເຮົາວ່າ ພຣະເຈົ້າສາມາດປ່ຽນຫົວໃຈຂອງເຮົາ ແລະ ຫົວໃຈຂອງຄົນອື່ນ. ການອະທິຖານດັ່ງກ່າວ ຄວນເພີ່ມຄວາມເຂັ້ມແຂງໃຫ້ຄວາມຕັ້ງໃຈຂອງເຮົາ ເພື່ອຈະເຮັດການປ່ຽນແປງໃດໆກໍຕາມ ທີ່ຈຳເປັນໃນຊີວິດຂອງເຮົາເອງ, ຂອງຄອບຄົວ, ແລະ ຂອງຊຸມຊົນຂອງເຮົາ.

ບໍ່ວ່າທ່ານອາໄສຢູ່ໃສ, ບໍ່ວ່າທ່ານເວົ້າພາສາໃດ, ຫລື ວ່າທ່ານຈະປະເຊີນກັບການທ້າທາຍໃດໆກໍຕາມ, ພຣະເຈົ້າໄດ້ຍິນ ແລະ ຕອບຄຳອະທິຖານຂອງທ່ານ ໃນວິທີທາງ ແລະ ໃນເວລາຂອງພຣະອົງ. ເພາະເຮົາເປັນລູກຂອງພຣະອົງ, ເຮົາສາມາດເຂົ້າເຝົ້າພຣະອົງ ເພື່ອສະແຫວງຫາຄວາມຊ່ວຍເຫລືອ, ການປອບໂຍນ, ແລະ ຄວາມປາດຖະໜາໃໝ່ ທີ່ຈະສ້າງຄວາມແຕກຕ່າງທີ່ເປັນທາງບວກຢູ່ໃນໂລກ.

ການອະທິຖານເພື່ອຄວາມຍຸດຕິທຳ, ຄວາມສະຫງົບ, ເພື່ອຄົນຍາກຈົນ, ແລະ ຄົນເຈັບໄຂ້ໄດ້ປ່ວຍ ສ່ວນຫລາຍແລ້ວຈະບໍ່ພຽງພໍ. ຫລັງຈາກເຮົາ ຄຸເຂົ່າ ລົງໃນການອະທິຖານ, ເຮົາຕ້ອງລຸກຂຶ້ນຈາກການຄຸເຂົ່າ ແລະ ເຮັດສິ່ງທີ່ເຮົາເຮັດໄດ້—ເພື່ອຊ່ວຍທັງຕົວເຮົາເອງ ແລະ ຄົນອື່ນ.¹⁰

ພຣະຄຳພີກໍເຕັມໄປດ້ວຍຕົວຢ່າງຂອງຜູ້ຄົນແຫ່ງສັດທາ ຜູ້ທີ່ໄດ້ຮ່ວມການອະທິຖານເຂົ້າກັບການກະທຳ ເພື່ອສ້າງຄວາມແຕກຕ່າງໃນຊີວິດຂອງເຂົາເຈົ້າເອງ ແລະ ໃນຊີວິດຂອງຄົນອື່ນ. ໃນພຣະຄຳພີມໍມອນ, ຍົກຕົວຢ່າງ, ເຮົາອ່ານກ່ຽວກັບເອໂນດ. ສັງເກດເຫັນໄດ້ວ່າ “ປະມານໜຶ່ງສ່ວນສາມຂອງໜັງສືສັ້ນໆຂອງເພິ່ນບັນຍາຍເຖິງການອະທິຖານ ຫລື ລຳດັບຂອງການອະທິຖານ, ແລະ ທັງໝົດກໍບອກເຖິງສິ່ງທີ່ເພິ່ນໄດ້ເຮັດຍ້ອນຄຳຕອບທີ່ເພິ່ນໄດ້ຮັບ.”¹¹

ເຮົາມີຕົວຢ່າງ ຢ່າງຫລວງຫລາຍເຖິງວິທີທີ່ ການອະທິຖານໄດ້ສ້າງຄວາມແຕກຕ່າງແນວໃດ ໃນປະຫວັດສາດຂອງສາດສະໜາຈັກຂອງເຮົາເອງ, ເລີ່ມຕົ້ນດ້ວຍການອະທິຖານອອກສຽງຄັ້ງທຳອິດຂອງ ໂຈເຊັບ ສະມິດ ຢູ່ໃນປ່າໃກ້ບ້ານໄມ້ທ່ອນຂອງພໍ່ແມ່ຂອງເພິ່ນ ໃນລະດູໃບໄມ້ປົ່ງຂອງປີ 1820. ໂດຍການສະແຫວງຫາການໃຫ້ອະໄພ ແລະ ການຊີ້ນຳທາງວິນຍານ, ຄຳອະທິຖານຂອງ ໂຈເຊັບ ໄດ້ເປີດຟ້າສະຫວັນ. ໃນວັນເວລານີ້ ເຮົາເປັນຜູ້ໄດ້ຮັບຜົນປະໂຫຍດຈາກ ສາດສະດາໂຈເຊັບ ສະມິດ ແລະ ຈາກຊາຍ ແລະ ຍິງໄພ່ພົນຍຸກສຸດທ້າຍທີ່ຊື່ສັດ ຜູ້ທີ່ໄດ້ອະທິຖານ ແລະ ໄດ້ລົງມືກະທຳເພື່ອຊ່ວຍສະຖາປະນາ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.

ຂ້າພະເຈົ້າຄິດເລື້ອຍໆເຖິງການອະທິຖານຂອງຜູ້ຍິງທີ່ຊື່ສັດດັ່ງເຊັ່ນ ແມຣີ ຟຽວດິງ ສະມິດ, ຜູ້ທີ່ດ້ວຍຄວາມຊ່ວຍເຫລືອຂອງພຣະເຈົ້າ, ໄດ້ນຳພາຄອບຄົວຂອງນາງຢ່າງອາດຫານ ໜີຈາກການຂົ່ມເຫັງທີ່ຮ້າຍແຮງໃນລັດອິລິນອຍ ມາສູ່ຄວາມປອດໄພຢູ່ໃນຮ່ອມພູນີ້, ບ່ອນທີ່ຄອບຄົວຂອງນາງໄດ້ຈະເລີນຮຸ່ງເຮືອງທັງທາງດ້ານວິນຍານ ແລະ ທາງໂລກ. ຫລັງຈາກໄດ້ຄຸເຂົ່າອະທິຖານຢ່າງຈິງໃຈ, ແລ້ວນາງໄດ້ເຮັດວຽກໜັກເພື່ອເອົາຊະນະການທ້າທາຍຂອງນາງ ແລະ ເປັນພອນໃຫ້ແກ່ຄອບຄົວຂອງນາງ.

ການອະທິຖານຈະຍົກເຮົາຂຶ້ນ ແລະ ນຳເຮົາມາຮ່ວມກັນໃນຖານະສ່ວນບຸກຄົນ, ຄອບຄົວ, ສາດສະໜາຈັກ, ແລະ ໃນຖານະຊາວໂລກ. ການອະທິຖານຈະມີອິດທິພົນຕໍ່ນັກວິທະຍາສາດ ແລະ ຊ່ວຍເຂົາເຈົ້າໄປສູ່ການຄົ້ນພົບຢາວັກຊີນປ້ອງກັນໂຣກ ແລະ ຢາອື່ນໆທີ່ຈະຢຸດຕິການແຜ່ລະບາດນີ້. ການອະທິຖານຈະປອບໂຍນຜູ້ຄົນທີ່ໄດ້ສູນເສຍຄົນທີ່ເຂົາເຈົ້າຮັກໄປ. ມັນຈະນຳພາເຮົາໃຫ້ຮູ້ສິ່ງທີ່ຈະເຮັດເພື່ອປ້ອງກັນຕົວເຮົາເອງ.

ອ້າຍເອື້ອຍນ້ອງທັງຫລາຍ, ຂ້າພະເຈົ້າຂໍຊັກຊວນທ່ານໃຫ້ເອົາໃຈໃສ່ຄຳໝັ້ນສັນຍາຂອງທ່ານ ຕໍ່ການອະທິຖານຫລາຍຂຶ້ນ. ຂ້າພະເຈົ້າຂໍຊັກຊວນທ່ານໃຫ້ອະທິຖານຢູ່ໃນຫ້ອງນອນຂອງທ່ານ, ໃນການເລາະຍ່າງຂອງທ່ານ, ໃນບ້ານເຮືອນຂອງທ່ານ, ໃນຫວອດຂອງທ່ານ, ແລະ ໃນໃຈຂອງທ່ານສະເໝີໄປ.¹²

ໃນຖານະເປັນຜູ້ຕາງໜ້າໃຫ້ຜູ້ນຳຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ຂ້າພະເຈົ້າຂໍຂອບໃຈທ່ານສຳລັບການອະທິຖານຂອງທ່ານເພື່ອພວກເຮົາ. ຂ້າພະເຈົ້າຂໍຊັກຊວນທ່ານໃຫ້ສືບຕໍ່ອະທິຖານ ເພື່ອວ່າເຮົາຈະໄດ້ຮັບການດົນໃຈ ແລະ ການເປີດເຜີຍ ທີ່ຈະນຳພາສາດສະໜາຈັກໃຫ້ຜ່ານຜ່າຊ່ວງເວລາທີ່ຍາກລຳບາກນີ້.

ການອະທິຖານສາມາດປ່ຽນແປງຊີວິດຂອງເຮົາໄດ້. ເມື່ອໄດ້ຮັບແຮງຈູງໃຈຈາກການອະທິຖານທີ່ຈິງໃຈ, ເຮົາສາມາດປັບປຸງຕົວໃຫ້ດີຂຶ້ນ ແລະ ຊ່ວຍຄົນອື່ນໃຫ້ເຮັດແບບດຽວກັນ.

ຂ້າພະເຈົ້າຮູ້ພະລັງຂອງການອະທິຖານຈາກປະສົບການຂອງຂ້າພະເຈົ້າເອງ. ເມື່ອບໍ່ດົນມານີ້ ຂ້າພະເຈົ້າໄດ້ຢູ່ຄົນດຽວໃນຫ້ອງທຳງານ. ມືຂອງຂ້າພະເຈົ້າຫາກໍໄດ້ຮັບການປິ່ນປົວທາງການແພດ. ມັນຊ້ຳດຳຂຽວ, ໄຄ່ບວມ, ແລະ ມັນເຈັບປວດຫລາຍ. ຂະນະທີ່ຂ້າພະເຈົ້ານັ່ງຢູ່ໂຕະ, ຂ້າພະເຈົ້າບໍ່ສາມາດເອົາໃຈໃສ່ວຽກງານທີ່ສຳຄັນ ແລະ ຈຳເປັນເພາະຄວາມເຈັບປວດໄດ້ລົບກວນຂ້າພະເຈົ້າ.

ຂ້າພະເຈົ້າໄດ້ຄຸເຂົ່າ ແລະ ທູນຂໍພຣະຜູ້ເປັນເຈົ້າໃຫ້ຊ່ວຍຂ້າພະເຈົ້າຕັ້ງໃຈ ເພື່ອວ່າຂ້າພະເຈົ້າຈະສາມາດສຳເລັດວຽກງານຂອງຂ້າພະເຈົ້າ. ຂ້າພະເຈົ້າໄດ້ຢືນຂຶ້ນ ແລະ ກັບຄືນໄປຫາກອງເຈ້ຍຢຸ່ເທິງໂຕະຂອງຂ້າພະເຈົ້າ. ເກືອບໃນທັນທີ, ຄວາມແຈ່ມແຈ້ງ ແລະ ຄວາມຕັ້ງໃຈກໍໄດ້ມາສູ່ຈິດໃຈຂອງຂ້າພະເຈົ້າ, ແລະ ຂ້າພະເຈົ້າກໍສາມາດສຳເລັດວຽກງານທີ່ຮີບດ່ວນຂອງຂ້າພະເຈົ້າໄດ້.

ສະພາບການທີ່ວຸ້ນວາຍຂອງໂລກໃນປະຈຸບັນນີ້ ອາດເບິ່ງຄືວ່າເປັນຕາຢ້ານ ເມື່ອເຮົາພິຈາລະນາເຖິງບັນຫາ ແລະ ການທ້າທາຍຢ່າງຫລວງຫລາຍ. ແຕ່ມັນເປັນປະຈັກພະຍານອັນແຮງກ້າຂອງຂ້າພະເຈົ້າວ່າ ຖ້າຫາກເຮົາຈະອະທິຖານ ແລະ ທູນຂໍພອນ ແລະ ການຊີ້ນຳທີ່ຈຳເປັນຈາກພຣະບິດາເທິງສະຫວັນ, ເຮົາຈະຮູ້ຈັກວ່າ ເຮົາຈະສາມາດເປັນພອນໃຫ້ແກ່ຄອບຄົວຂອງເຮົາ, ເພື່ອນບ້ານ, ຊຸມຊົນຂອງເຮົາ, ແລະ ແມ່ນແຕ່ປະເທດທີ່ເຮົາອາໄສຢູ່ໄດ້ແນວໃດ.

ພຣະຜູ້ຊ່ວຍໃຫ້ລອດໄດ້ອະທິຖານ ແລະ ແລ້ວພຣະອົງ “ໄດ້ໄປທຸກຫົນທຸກແຫ່ງເຮັດຄຸນງາມຄວາມດີ”¹³ ໂດຍການໃຫ້ອາຫານຄົນທີ່ຍາກຈົນ, ໃຫ້ຄວາມກ້າຫານ ແລະ ການຊ່ວຍເຫລືອຄົນທີ່ຂັດສົນ, ແລະ ເອື້ອມອອກໄປດ້ວຍຄວາມຮັກ, ໃຫ້ອະໄພ,ໃຫ້ຄວາມສະຫງົບ, ແລະ ໃຫ້ການພັກຜ່ອນແກ່ທຸກຄົນທີ່ມາຫາພຣະອົງ. ພຣະອົງສືບຕໍ່ເອື້ອມອອກມາຫາເຮົາ.

ຂ້າພະເຈົ້າຂໍເຊື້ອເຊີນສະມາຊິກຂອງສາດສະໜາຈັກທຸກຄົນ, ພ້ອມທັງເພື່ອນບ້ານ ແລະ ໝູ່ເພື່ອນຈາກສາດສະໜາອື່ນຕະຫລອດທົ່ວໂລກ, ໃຫ້ເຮັດດັ່ງທີ່ພຣະຜູ້ຊ່ວຍໃຫ້ລອດໄດ້ແນະນຳສານຸສິດຂອງພຣະອົງວ່າ: “ດັ່ງນັ້ນ ຈົ່ງເຝົ້າລະວັງ, ແລະ ອະທິຖານຢູ່ທຸກເວລາ,” ເພື່ອຄວາມສະຫງົບ, ເພື່ອການປອບໂຍນ, ເພື່ອຄວາມປອດໄພ, ແລະ ເພື່ອໂອກາດທີ່ຈະຮັບໃຊ້ກັນແລະກັນ.¹⁴

ພະລັງແຫ່ງການອະທິຖານຊ່າງຍິ່ງໃຫຍ່, ແລະ ການອະທິຖານດ້ວຍສັດທາຂອງເຮົາ ໃນພຣະເຈົ້າ ແລະ ພຣະບຸດທີ່ຮັກຂອງພຣະອົງກໍເປັນສິ່ງທີ່ຕ້ອງການຫລາຍແທ້ໆ! ຂໍໃຫ້ເຮົາຈົ່ງຈື່ຈຳ ແລະ ຮູ້ບຸນຄຸນພະລັງຂອງການອະທິຖານ. ໃນພຣະນາມຂອງພຣະເຢຊູຄຣິດ, ອາເມນ.