ອຳນາດແຫ່ງການປິ່ນປົວຈາກການຊົດໃຊ້
ເມື່ອເຮົາມາຫາພຣະເຢຊູຄຣິດ ໂດຍການໃຊ້ສັດທາໃນພຣະອົງ, ການກັບໃຈ, ແລະ ການເຮັດ ແລະ ການຮັກສາພັນທະສັນຍາ, ແລ້ວຄວາມແຕກຫັກຂອງເຮົາ—ບໍ່ວ່າຈະເປັນດ້ວຍເຫດໃດ—ສາມາດຖືກເຮັດໃຫ້ດີຄືນ.
ນັບແຕ່ເລີ່ມຕົ້ນປີນີ້ມາ, ເຮົາໄດ້ຮັບມືກັບເຫດການທີ່ບໍ່ຄາດຄິດຫລາຍເຫດການທີ່ເກີດຂຶ້ນ. ການສູນເສຍຊີວິດ ແລະ ລາຍຮັບອັນເນື່ອງມາຈາກການແຜ່ລະບາດທົ່ວໂລກ ຊຶ່ງໄດ້ສົ່ງຜົນສະທ້ອນທີ່ໜ້າເປັນຫ່ວງໃຫ້ກັບຊຸມຊົນ ແລະ ເສດຖະກິດ.
ແຜ່ນດິນໄຫວ, ອັກຄີໄພ, ແລະ ອຸທົກກະໄພໃນຫລາຍພາກທົ່ວໂລກ, ພ້ອມທັງສະພາບອາກາດທີ່ສົ່ງຜົນເສຍຫາຍຫລາຍຢ່າງ, ເຮັດໃຫ້ຜູ້ຄົນຮູ້ສຶກບໍ່ໄດ້ຮັບການຊ່ວຍເຫລືອ, ໝົດຫວັງ, ແລະ ໃຈສະຫລາຍ, ກັງວົນວ່າຊີວິດຂອງເຂົາເຈົ້າຈະກັບມາເປັນຄືເກົ່າຫລືບໍ່.
ຂ້າພະເຈົ້າຂໍເລົ່າເລື່ອງສ່ວນຕົວເລື່ອງໜຶ່ງກ່ຽວກັບຄວາມແຕກຫັກ.
ໃນຕອນທີ່ລູກໆຂອງຂ້າພະເຈົ້າຍັງນ້ອຍ, ເຂົາເຈົ້າຕັດສິນໃຈວ່າຢາກຮຽນຫລິ້ນປີອາໂນ. ສາມີຂອງຂ້າພະເຈົ້າ, ລູດີ, ແລະ ຂ້າພະເຈົ້າປາດຖະໜາຈັດຫາໂອກາດນີ້ໃຫ້ລູກໆຂອງພວກເຮົາ, ແຕ່ວ່າພວກເຮົາບໍ່ມີປີອາໂນ. ພວກເຮົາບໍ່ມີເງິນພຽງພໍທີ່ຈະຊື້ປີອາໂນໃໝ່, ດັ່ງນັ້ນອ້າຍລູດີຈຶ່ງເລີ່ມຊອກຫາຊື້ປີອາໂນເກົ່າ.
ບຸນຄຣິດສະມາດປີນັ້ນ, ລາວໄດ້ເຮັດໃຫ້ພວກເຮົາຕົກຕະລຶງກັບປີອາໂນໜ່ວຍໜຶ່ງ, ແລະ ເວລາຜ່ານໄປຫລາຍປີ, ລູກໆຂອງພວກເຮົາກໍໄດ້ຮຽນຫລິ້ນມັນ.
ເມື່ອພວກລູກຊາຍຂອງພວກເຮົາເຕີບໃຫຍ່ຂຶ້ນ ແລະ ອອກເຮືອນໄປ, ປີອາໂນເກົ່າມີແຕ່ສະສົມຂີ້ຝຸ່ນ, ດັ່ງນັ້ນພວກເຮົາຈຶ່ງຂາຍມັນ. ສອງສາມປີຜ່ານໄປ, ແລະ ພວກເຮົາສະສົມເງິນໄດ້ຈຳນວນໜຶ່ງ. ມີມື້ໜຶ່ງອ້າຍລູດີໄດ້ເວົ້າວ່າ, “ຂ້ອຍຄິດວ່າເຖິງເວລາທີ່ພວກເຮົາຈະຊື້ປີອາໂນໜ່ວຍໃໝ່ແລ້ວ.”
ຂ້າພະເຈົ້າຖາມວ່າ, “ເປັນຫຍັງພວກເຮົາຕ້ອງຢາກຊື້ປີອາໂນໜ່ວຍໃໝ່, ເມື່ອເຮົາທັງສອງຄົນບໍ່ໄດ້ຫລິ້ນເປັນ?”
ລາວຕອບວ່າ, “ໂອ, ແຕ່ພວກເຮົາສາມາດຊື້ປີອາໂນທີ່ຫລິ້ນເອງໄດ້! ໂດຍການໃຊ້ໄອແພດ, ເຈົ້າສາມາດໂປແກມປີອາໂນໃຫ້ຫລິ້ນເພງໄດ້ຫລາຍກວ່າ 4,000 ເພງ, ລວມທັງ ເພງສວດ, ເພງຂອງກຸ່ມນັກຮ້ອງປະສານສຽງ ແທໂບແນໂກ, ເພງເດັກປະຖົມໄວທັງໝົດ, ແລະ ເພງອື່ນອີກຫລາຍໆເພງ.”
ຖ້າຈະເວົ້າແລ້ວ, ອ້າຍລູດີເປັນພະນັກງານຂາຍເກັ່ງແທ້ໆ.
ພວກເຮົາໄດ້ຊື້ປີອາໂນໃໝ່ທີ່ງາມ, ແລະ ສອງສາມມື້ຕໍ່ມາ, ຜູ້ຊາຍຮູບຮ່າງໃຫຍ່, ແຂງແຮງສອງຄົນໄດ້ມາສົ່ງມັນທີ່ບ້ານຂອງພວກເຮົາ.
ຂ້າພະເຈົ້າໄດ້ບອກບ່ອນທີ່ໃຫ້ເອົາມັນໄປວາງ ແລະ ກໍໄດ້ຫຍັບອອກຈາກທາງ.
ມັນເປັນປີອາໂນລຸ້ນ ເບບີແກຣນ ທີ່ໜັກ, ແລະ ເພື່ອໃຫ້ຜ່ານປະຕູໄດ້, ເຂົາເຈົ້າໄດ້ເອົາຂາຕັ້ງອອກ ແລະ ພະຍາຍາມງ່ຽງຂ້າງປີອາໂນໃສ່ເທິງລໍ້ຂົນເຄື່ອງທີ່ເຂົາເຈົ້າໄດ້ນຳມາພ້ອມ.
ເຮືອນຂອງພວກເຮົາຕັ້ງຢູ່ເນີນຄ້ອຍເລັກນ້ອຍ, ແລະ ໂຊກບໍ່ດີທີ່ໃນເຊົ້າມື້ນັ້ນຫິມະໄດ້ຕົກ, ເຮັດໃຫ້ດິນປຽກ ແລະ ມື່ນ. ທ່ານສາມາດເບິ່ງເຫັນໄດ້ບໍວ່າຈະເປັນແນວໃດຕໍ່?
ໃນຂະນະທີ່ພວກຜູ້ຊາຍກຳລັງຍູ້ປີອາໂນຂຶ້ນຄ້ອຍ, ມັນໄດ້ໄຫລອອກ, ແລະ ຂ້າພະເຈົ້າໄດ້ຍິນສຽງຕົກຢ່າງແຮງ. ປີອາໂນໄດ້ຕົກອອກຈາກລໍ້ຂົນເຄື່ອງ ແລະ ຕຳກັບພື້ນດິນຢ່າງແຮງຈົນເກີດເປັນຮອຍຫລຸບໃຫຍ່ໃນເດີ່ນຫຍ້າຂອງພວກເຮົາ.
ຂ້າພະເຈົ້າໄດ້ເວົ້າຂຶ້ນວ່າ, “ໂອຍ, ຕາຍແລ້ວ. ພວກເຈົ້າບໍ່ເປັນຫຍັງບໍ?”
ໂຊກດີທີ່ຊາຍທັງສອງຄົນນັ້ນບໍ່ເປັນຫຍັງ.
ເຂົາເຈົ້າແນມເບິ່ງກັນ ຕາຕັ້ງດ້ວຍຄວາມຕົກໃຈ, ແລ້ວໄດ້ຫລຽວເບິ່ງຂ້າພະເຈົ້າ ແລະ ເວົ້າວ່າ, “ພວກເຮົາຂໍໂທດຫລາຍໆ. ພວກເຮົາຊິເອົາມັນກັບຄືນໄປຮ້ານ ແລະ ໃຫ້ຜູ້ຈັດການຂອງພວກເຮົາໂທຫາເຈົ້າເດີ.”
ບໍ່ດົນຜູ້ຈັດການໄດ້ລົມກັບອ້າຍລູດີເພື່ອຈັດແຈງຂົນສົ່ງປີອາໂນໜ່ວຍໃໝ່. ອ້າຍລູດີເປັນຄົນໃຈດີ ແລະ ໃຫ້ອະໄພ ແລະ ໄດ້ບອກກັບຜູ້ຈັດການໄປວ່າບໍ່ເປັນຫຍັງ ຖ້າຫາກວ່າເຂົາເຈົ້າພຽງແຕ່ສ້ອມແປງບ່ອນເປ່ເພ ແລະ ເອົາປີອາໂນໜ່ວຍເກົ່າກັບຄືນມາກໍໄດ້, ແຕ່ຜູ້ຈັດການຍັງປະຕິເສດຢາກໃຫ້ພວກເຮົາເອົາໜ່ວຍໃໝ່.
ອ້າຍລູດີໄດ້ຕອບກັບໄປ, ໂດຍເວົ້າວ່າ, “ຄົງບໍ່ເປັນຫຍັງຫລາຍຕີ້. ພຽງແຕ່ສ້ອມແປງມັນ ແລະ ເອົາມັນກັບຄືນມາສົ່ງກໍໄດ້.”
ຜູ້ຈັດການໄດ້ເວົ້າວ່າ, “ໄມ້ແຕກ, ແລະ ເມື່ອໄມ້ແຕກ, ສຽງຂອງມັນກໍບໍ່ຄືເກົ່າ. ເຈົ້າຈະຕ້ອງເອົາປີອາໂນໜ່ວຍໃໝ່.”
ເອື້ອຍອ້າຍນ້ອງທັງຫລາຍ, ບໍ່ແມ່ນເຮົາທຸກຄົນເປັນຄ້າຍຄືກັບປີອາໂນນີ້ບໍ, ເວລາເປ່ເພເລັກນ້ອຍ, ມີຮອຍແຕກ, ແລະ ໄດ້ຮັບຄວາມເສຍຫາ, ກໍຮູ້ສຶກຄືກັບວ່າເຮົາຈະບໍ່ສາມາດກັບມາເປັນຄືເກົ່າໄດ້ອີກຄັ້ງ? ເຖິງຢ່າງໃດກໍຕາມ, ເມື່ອເຮົາມາຫາພຣະເຢຊູຄຣິດ ໂດຍການໃຊ້ສັດທາໃນພຣະອົງ, ການກັບໃຈ, ແລະ ການເຮັດ ແລະ ການຮັກສາພັນທະສັນຍາ, ແລ້ວຄວາມແຕກຫັກຂອງເຮົາ—ບໍ່ວ່າຈະເປັນດ້ວຍເຫດໃດ—ສາມາດຖືກເຮັດໃຫ້ດີຄືນ. ຂັ້ນຕອນນີ້, ຊຶ່ງເຊື້ອເຊີນອຳນາດແຫ່ງການປິ່ນປົວຂອງພຣະຜູ້ຊ່ວຍໃຫ້ລອດມາສູ່ຊີວິດຂອງເຮົາ, ບໍ່ພຽງແຕ່ຟື້ນຟູສິ່ງທີ່ເຄີຍເປັນມາກ່ອນ ແຕ່ຍັງເຮັດໃຫ້ເຮົາດີຂຶ້ນກວ່າເກົ່ານຳອີກ. ຂ້າພະເຈົ້າຮູ້ວ່າຜ່ານທາງພຣະຜູ້ຊ່ວຍໃຫ້ລອດ, ພຣະເຢຊູຄຣິດ, ເຮົາທຸກຄົນສາມາດຖືກສ້ອມແຊມ, ຖືກເຮັດໃຫ້ດີຄືນ, ແລະ ຖືກເຮັດໃຫ້ມີສຽງທີ່ມ່ວນອອນຊອນ, ຄືກັນກັບປີອາໂນໜ່ວຍໃໝ່.
ປະທານຣະໂຊ ເອັມ ແນວສັນ ໄດ້ສິດສອນວ່າ: “ເມື່ອການທົດລອງທີ່ແສນເຈັບປວດມາເຖິງເຮົາ, ມັນແມ່ນເວລາທີ່ເຮົາຕ້ອງມີສັດທາຫລາຍຂຶ້ນໃນພຣະເຈົ້າ, ເຮັດວຽກໜັກ, ແລະ ຮັບໃຊ້ຄົນອື່ນ. ຈາກນັ້ນພຣະອົງຈະປິ່ນປົວຫົວໃຈທີ່ຊອກຊໍ້າຂອງເຮົາ. ພຣະອົງຈະປະທານຄວາມສະຫງົບ ແລະ ການປອບໂຍນສ່ວນຕົວໃຫ້ກັບເຮົາ. ຂອງປະທານທີ່ຍິ່ງໃຫຍ່ເຫລົ່ານັ້ນຈະບໍ່ຖືກທຳລາຍໄດ້, ແມ່ນແຕ່ຄວາມຕາຍ.”1
ພຣະເຢຊູໄດ້ກ່າວວ່າ:
“ຈົ່ງມາຫາເຮົາ, ທຸກຄົນທີ່ອິດເມື່ອຍຈາກການແບກຫາບພາລະໜັກ, ແລະ ເຮົາຈະໃຫ້ພວກເຈົ້າໄດ້ພັກຜ່ອນ.
“ຈົ່ງເອົາແອກຂອງເຮົາແບກໄວ້, ແລ້ວຮຽນຮູ້ຈາກເຮົາ; ເພາະວ່າເຮົາເປັນຜູ້ມີໃຈອ່ອນສຸພາບ ແລະ ຖ່ອມລົງ: ແລ້ວຈິດໃຈຂອງພວກເຈົ້າ ຈະໄດ້ພົບຄວາມເຊົາເມື່ອຍ.
“ດ້ວຍວ່າແອກຂອງເຮົາກໍພໍເໝາະ, ແລະ ພາລະຂອງເຮົາກໍເບົາ” (ມັດທາຍ 11:28–30).
ເພື່ອສ້ອມແປງຄວາມແຕກຫັກໃຫ້ດີຄືນໂດຍການມາຫາພຣະອົງ, ເຮົາຕ້ອງມີສັດທາໃນພຣະເຢຊູຄຣິດ. “ການມີສັດທາໃນພຣະເຢຊູຄຣິດໝາຍເຖິງການເພິ່ງອາໄສພຣະອົງຢ່າງເຕັມທີ່—ໄວ້ວາງໃຈໃນອຳນາດທີ່ບໍ່ມີຂອບເຂດ … ແລະ ຄວາມຮັກຂອງພຣະອົງ. ມັນລວມທັງຄວາມເຊື່ອໃນຄຳສອນຂອງພຣະອົງ. ໝາຍເຖິງເຊື່ອ ທັງໆທີ່ເຮົາບໍ່ເຂົ້າໃຈທຸກສິ່ງ, ແຕ່ພຣະອົງເຂົ້າໃຈ. ຍ້ອນວ່າພຣະອົງໄດ້ປະສົບກັບຄວາມເຈັບປວດ, ຄວາມທຸກທໍລະມານ, ແລະ ຄວາມບົກຜ່ອງທັງໝົດຂອງເຮົາ, ພຣະອົງຮູ້ວິທີຊ່ວຍເຫລືອເຮົາໃຫ້ສາມາດຜ່ານຜ່າຄວາມຫຍຸ້ງຍາກໃນແຕ່ລະວັນຂອງເຮົາໄດ້.”2
ຂະນະທີ່ເຮົາມາຫາພຣະອົງ, “ເຮົາສາມາດເຕັມໄປດ້ວຍຄວາມສຸກ, ຄວາມສະຫງົບ, ແລະ ການປອບໂຍນ. [ຄວາມຫຍຸ້ງຍາກ ແລະ ການທ້າທາຍ] ທຸກຢ່າງໃນຊີວິດ ສາມາດຖືກແກ້ໄຂໃຫ້ຖືກຕ້ອງໄດ້ ຜ່ານທາງການຊົດໃຊ້ຂອງພຣະເຢຊູຄຣິດ.”3 ພຣະອົງແນະນຳເຮົາວ່າ, “ຈົ່ງເບິ່ງທີ່ເຮົາໃນຄວາມນຶກຄິດທຸກຢ່າງ; ຢ່າສົງໄສ, ຢ່າສູ່ຢ້ານ.”(ຄຳສອນ ແລະ ພັນທະສັນຍາ 6:36).
ໃນພຣະຄຳພີມໍມອນ ເມື່ອແອວມາ ແລະ ຜູ້ຄົນຂອງເພິ່ນແບກພາລະອັນໜັກໜ່ວງເທິງບ່າຂອງເຂົາເຈົ້າ ຈົນເກືອບຈະທົນບໍ່ໄຫວ, ຜູ້ຄົນໄດ້ອ້ອນວອນຂໍຄວາມຊ່ວຍເຫລືອ. ພຣະຜູ້ເປັນເຈົ້າບໍ່ໄດ້ຍົກເອົາພາລະໜັກໜ່ວງຂອງເຂົາເຈົ້າອອກໄປທັງໝົດ; ແຕ່ພຣະອົງໄດ້ໃຫ້ຄຳສັນຍາກັບເຂົາເຈົ້າວ່າ:
“ແລະ ເຮົາຈະໃຫ້ພາລະແບກຫາບຢູ່ບ່າຂອງພວກເຈົ້າເບົາບາງລົງຈົນວ່າພວກເຈົ້າບໍ່ຮູ້ສຶກວ່າ ມີຫຍັງຢູ່ເທິງຫລັງເລີຍ, ເຖິງແມ່ນໃນຂະນະທີ່ພວກເຈົ້າເປັນທາດ; ແລະ ເລື່ອງນີ້ເຮົາຈະເຮັດໄປເພື່ອພວກເຈົ້າຈະໄດ້ຢືນເປັນພະຍານໃຫ້ເຮົາໃນພາຍໜ້າ, ແລະ ເພື່ອພວກເຈົ້າຈະຮູ້ຈັກຢ່າງແນ່ນອນວ່າ ເຮົາຄື ອົງພຣະຜູ້ເປັນເຈົ້າ, ໄດ້ມາຢ້ຽມຢາມຜູ້ຄົນຂອງເຮົາໃນຄວາມທຸກຂອງພວກເຂົາ.
“ແລະ ເຫດການໄດ້ບັງເກີດຂຶ້ນຄື ພາລະແບກຫາບຊຶ່ງຢູ່ເທິງບ່າຂອງແອວມາກັບພີ່ນ້ອງຂອງເພິ່ນ ຖືກເຮັດໃຫ້ເບົາບາງລົງ; ແທ້ຈິງແລ້ວ, ພຣະຜູ້ເປັນເຈົ້າໄດ້ເພີ່ມພະລັງໃຫ້ພວກເຂົາ ເພື່ອພວກເຂົາຈະໄດ້ທົນຕໍ່ພາລະແບກຫາບຢ່າງງ່າຍດາຍ, ແລະ ພວກເຂົາໄດ້ຍອມຮັບຢ່າງເບີກບານມ່ວນຊື່ນ ແລະ ດ້ວຍຄວາມອົດທົນຕໍ່ພຣະປະສົງທັງໝົດຂອງພຣະຜູ້ເປັນເຈົ້າ” (ໂມໄຊຢາ 24:15).
ຈາກຄວາມສາມາດຂອງພຣະຜູ້ຊ່ວຍໃຫ້ລອດໃນການປິ່ນປົວ ແລະ ແບ່ງເບົາພາລະຂອງເຮົາ, ແອວເດີ ແທດ ອາ ຄາລິດສະເຕີ ໄດ້ສິດສອນວ່າ:
“ພອນຢ່າງໜຶ່ງຈາກການຊົດໃຊ້ນັ້ນຄື ເຮົາສາມາດໄດ້ຮັບອຳນາດແຫ່ງການຊ່ວຍເຫລືອຂອງພຣະຜູ້ຊ່ວຍໃຫ້ລອດ. ເອຊາຢາໄດ້ເວົ້າຄືນຫລາຍເທື່ອເຖິງອິດທິພົນຂອງການປິ່ນປົວ, ການເຮັດໃຫ້ສະຫງົບຂອງພຣະຜູ້ເປັນເຈົ້າ. ເພິ່ນໄດ້ເປັນພະຍານເຖິງພຣະຜູ້ຊ່ວຍໃຫ້ລອດໄດ້ຊ່ວຍ ‘ຄົນຍາກຈົນທີ່ປົບມາຫາພຣະອົງ ແລະ ໄດ້ມີຄວາມປອດໄພໃນຄາວເດືອດຮ້ອນ’ (ເອຊາຢາ 25:4). ເຖິງຜູ້ທີ່ເສົ້າສະຫລົດໃຈ, ເອຊາຢາໄດ້ປະກາດວ່າ ພຣະຜູ້ຊ່ວຍໃຫ້ລອດຄອບຄອງອຳນາດ ‘ໃນການອອຍໃຈຜູ້ເສົ້າໂສກ’ (ເອຊາຢາ 61:2), ແລະ ‘ພຣະອົງຈະເຊັດນໍ້າຕາໃຫ້ກັບໝົດທຸກຄົນ’ (ເອຊາຢາ 25:8; ເບິ່ງ ພຣະນິມິດ 7:17); ‘ຟື້ນຟູຈິດວິນຍານທີ່ຖ່ອມໃຈ’ (ເອຊາຢາ 57:15); ແລະ ປິ່ນປົວຄົນລະທົມໃຈ’ (ເອຊາຢາ 61:1; ເບິ່ງ ລູກາ 4:18; ເພງສັນລະເສີນ 147:3 ນຳອີກ). ອຳນາດແຫ່ງການຊ່ວຍເຫລືອຂອງພຣະອົງໄດ້ຂະຫຍາຍກວ້າງເຖິງຂັ້ນທີ່ພຣະອົງສາມາດແລກປ່ຽນ ‘ໃຫ້ຊົມຊື່ນຍິນດີແທນທີ່ຈະໂສກເສົ້າ, ຮ້ອງເພງສັນລະເສີນພຣະເຈົ້າໃດ ແທນທີ່ຈະເສົ້າໂສກເສຍໃຈຢູ່ເລື້ອຍໆ’ (ເອຊາຢາ 61:3).
“ໂອ, ຊ່າງເປັນຄວາມຫວັງໃນຄຳສັນຍາເຫລົ່ານັ້ນ! … ພຣະວິນຍານຂອງພຣະອົງປິ່ນປົວ; ເຮັດໃຫ້ດີຂຶ້ນ; ປອບໂຍນ; ເປົ່າລົມຫາຍໃຈໃຫ້ກັບຫົວໃຈທີ່ໝົດຫວັງເພື່ອຈະມີຊີວິດໃໝ່. ມີອຳນາດໃນການປ່ຽນແປງສິ່ງທີ່ບໍ່ຈົບງາມ ແລະ ໂຫດຮ້າຍ ແລະ ບໍ່ມີຄຸນຄ່າທັງໝົດໃນຊີວິດ ມາເປັນບາງສິ່ງບາງຢ່າງທີ່ມີຄຸນຄ່າສູງ ແລະ ຮຸ່ງເຮືອງເຫລືອງເຫລື້ອມ. ພຣະອົງມີອຳນາດໃນການປ່ຽນແປງຈາກຂີ້ເທົ່າຂອງຄວາມເປັນມະຕະ ໃຫ້ກາຍເປັນຄວາມສວຍງາມຊົ່ວນິລັນດອນໄດ້.”4
ຂ້າພະເຈົ້າເປັນພະຍານວ່າ ພຣະເຢຊູຄຣິດຄືພຣະຜູ້ຊ່ວຍໃຫ້ລອດ, ພຣະຜູ້ໄຖ່ຂອງເຮົາ, ພຣະອາຈານແຫ່ງການປິ່ນປົວ, ເພື່ອນຜູ້ຊື່ສັດຂອງເຮົາ ທີ່ເຮົາຮັກ. ຖ້າວ່າເຮົາຫັນມາຫາພຣະອົງ, ພຣະອົງຈະປິ່ນປົວເຮົາ ແລະ ເຮັດໃຫ້ເຮົາຫາຍດີອີກຄັ້ງ. ຂ້າພະເຈົ້າເປັນພະຍານວ່າ ນີ້ແມ່ນສາດສະໜາຈັກຂອງພຣະອົງ ແລະ ພຣະອົງກຳລັງກຽມພ້ອມທີ່ຈະກັບຄືນມາສູ່ໂລກນີ້ອີກຄັ້ງ ເພື່ອປົກຄອງດ້ວຍອຳນາດ ແລະ ລັດສະໝີພາບ. ໃນພຣະນາມຂອງພຣະເຢຊູຄຣິດ, ອາແມນ.