ຈົ່ງສະແຫວງຫາພຣະຄຣິດໃນທຸກຄວາມຄິດ
ການຕໍ່ສູ້ກັບການລໍ້ລວງຈະໃຊ້ຄວາມພະຍາຍາມ ແລະ ຄວາມຊື່ສັດຕະຫລອດຊີວິດ. ແຕ່ຈົ່ງຮູ້ໄວ້ວ່າ ພຣະຜູ້ເປັນເຈົ້າພ້ອມແລ້ວທີ່ຈະຊ່ວຍເຫລືອເຮົາ ໃນຄວາມພະຍາຍາມສ່ວນຕົວຂອງເຮົາ.
ໃນກະວີເພງສວດສັນລະເສີນຂອງເພິ່ນ, ຜູ້ຂຽນເພງສັນລະເສີນໄດ້ປະກາດວ່າ:
“ຂ້າແດ່ພຣະຜູ້ເປັນເຈົ້າ, ພຣະອົງໄດ້ກວດເບິ່ງຂ້ານ້ອຍ, ແລະ ຮູ້ຈັກຈິດໃຈຂອງຂ້ານ້ອຍ.
“ພຣະອົງຮູ້ທຸກໆສິ່ງທີ່ຂ້ານ້ອຍກະທຳໄປ, ເຖິງວ່າຢູ່ໄກ ພຣະອົງເຂົ້າໃຈຄວາມນຶກຄິດຂອງຂ້ານ້ອຍໄດ້.
“ພຣະອົງເຫັນຂ້ານ້ອຍຕອນກຳລັງເຮັດວຽກງານ ຫລື ພັກຜ່ອນ, ແລະ ຮູ້ຈັກການກະທຳທຸກຢ່າງຂອງຂ້ານ້ອຍໄດ້.”1
ໃນຄຳກະວີທີ່ເທົ່າທຽມທາງຄວາມໝາຍນີ້, ຜູ້ຂຽນເພງສັນລະເສີນ ໄດ້ກ່າວສັນລະເສີນຄຸນລັກສະນະແຫ່ງສະຫວັນຂອງພຣະເຢຊູຄຣິດເລື່ອງຄວາມຮອບຮູ້ທຸກຢ່າງ ເພາະວ່າພຣະອົງຮູ້ທຸກໆດ້ານໃນຈິດວິນຍານຂອງເຮົາ.2 ໂດຍທີ່ຮູ້ວ່າທຸກສິ່ງຢ່າງນັ້ນຈຳເປັນຕໍ່ເຮົາໃນຊີວິດນີ້, ພຣະຜູ້ຊ່ວຍໃຫ້ລອດຈຶ່ງເຊື້ອເຊີນເຮົາໃຫ້ສະແຫວງຫາພຣະອົງໃນທຸກຄວາມຄິດ ແລະ ໃຫ້ຕິດຕາມພຣະອົງດ້ວຍສຸດໃຈ.3 ສິ່ງນີ້ໃຫ້ຄຳສັນຍາວ່າ ເຮົາສາມາດເດີນໄປໃນຄວາມສະຫວ່າງຂອງພຣະອົງ ແລະ ການນຳພາຂອງພຣະອົງກີດກັນອິດທິພົນຂອງຄວາມມືດໃນຊີວິດຂອງເຮົາ.4
ການສະແຫວງຫາພຣະຄຣິດໃນທຸກຄວາມຄິດ ແລະ ການຕິດຕາມພຣະອົງດ້ວຍສຸດໃຈ ຮຽກຮ້ອງໃຫ້ເຮົາປັບຈິດໃຈ ແລະ ຄວາມປາດຖະໜາຂອງເຮົາໃຫ້ສອດຄ່ອງກັບຂອງພຣະອົງ.5 ພຣະຄຳພີອ້າງເຖິງການປັບຈິດໃຈນີ້ ວ່າເປັນ “[ການ] ຕັ້ງໝັ້ນຢູ່ໃນພຣະຜູ້ເປັນເຈົ້າ.”6 ການເຮັດສິ່ງນີ້ຖືວ່າເຮົາສືບຕໍ່ດຳລົງຊີວິດໃຫ້ສອດຄ່ອງກັບພຣະກິດຕິຄຸນຂອງພຣະຄຣິດ ແລະ ເອົາໃຈໃສ່ກັບສິ່ງທີ່ດີທຸກໆວັນ.7 ພຽງແຕ່ເທົ່ານັ້ນທີ່ເຮົາຈະບັນລຸ “ສັນຕິສຸກທີ່ມາຈາກພຣະເຈົ້າ, ຊຶ່ງເກີນຄວາມເຂົ້າໃຈ” ແລະ ຈະ “ເຝົ້າຮັກສາຈິດໃຈ ແລະ ຄວາມຄິດ [ຂອງເຮົາ] ຜ່ານທາງພຣະເຢຊູຄຣິດ.”8 ພຣະຜູ້ຊ່ວຍໃຫ້ລອດເອງໄດ້ແນະນຳພວກແອວເດີຂອງສາດສະໜາຈັກໃນເດືອນກຸມພາ ປີ 1831 ວ່າ, “ຈົ່ງສະສົມເລື່ອງເຫລົ່ານີ້ໄວ້ໃນໃຈຂອງພວກເຈົ້າ, ແລະ ໃຫ້ຄວາມນອບນ້ອມຊົ່ວນິລັນດອນຢູ່ໃນຈິດໃຈຂອງພວກເຈົ້າ.”9
ເຖິງແມ່ນວ່າເຮົາສືບຕໍ່ພະຍາຍາມສະແຫວງຫາພຣະຜູ້ເປັນເຈົ້າ, ແຕ່ຄວາມຄິດທີ່ບໍ່ເໝາະສົມກໍຍັງ ແຊກຊຶມເຂົ້າສູ່ຈິດໃຈຂອງເຮົາຢູ່. ເມື່ອເຮົາຄິດ ຫລື ໃຫ້ຄວາມຄິດນັ້ນຢູ່ກັບເຮົາ, ມັນຈະມີອຳນາດປັບປ່ຽນຄວາມປາດຖະໜາຂອງໃຈເຮົາ ແລະ ນຳພາເຮົາໄປສູ່ຜູ້ທີ່ເຮົາຈະກາຍເປັນໃນຊີວິດນີ້ ແລະ ສິ່ງທີ່ເຮົາຈະໄດ້ຮັບເປັນມູນມໍລະດົກ ຊົ່ວນິລັນດອນ.10 ແອວເດີ ນຽວ ເອ ແມ໊ກສະແວວ ຄັ້ງໜຶ່ງເຄີຍເນັ້ນຫລັກທຳຂໍ້ນີ້ວ່າ, “ຄວາມປາດຖະໜາ … ເປັນສິ່ງກຳນົດຜົນທີ່ອອກມາເທື່ອລະເລັກເທື່ອລະນ້ອຍ, ລວມທັງເປັນຫຍັງ ‘ຫລາຍຄົນຖືກເອີ້ນ, ແຕ່ໜ້ອຍຄົນຖືກເລືອກ.’”11
ສາດສະດາໃນສະໄໝບູຮານ ແລະ ສະໄໝໃໝ່ ໄດ້ເຕືອນເຮົາສະເໝີ ເລື່ອງການຕ້ານທານກັບການລໍ້ລວງ ເພື່ອຫລີກລ້ຽງຈາກການສູນເສຍແຮງທ່ວງດຶງທາງວິນຍານ ແລະ ຊີວິດເກີດສັບສົນ, ງົງງັນ, ແລະ ທໍ້ແທ້.
ໃນການເວົ້າແບບປຽບທຽບ, ການຍອມຕໍ່ການລໍ້ລວງແມ່ນຄືກັນກັບການເຂົ້າໄປໃກ້ແມ່ເຫລັກພ້ອມກັບໂລຫະ. ພະລັງລຶກລັບຂອງແມ່ເຫລັກຈະດຶງດູດເອົາໂລຫະເຂົ້າໄປຕິດຢູ່ກັບມັນ. ແມ່ເຫລັກບໍ່ສາມາດດຶງດູດໂລຫະ ຖ້າຫາກໂລຫະຢູ່ຫ່າງໄກຈາກມັນ. ສະນັ້ນ, ຄືກັນກັບແມ່ເຫລັກບໍ່ສາມາດດຶງດູດໂລຫະທີ່ຢູ່ຫ່າງໄກຈາກມັນ, ເມື່ອເຮົາຫລີກລ້ຽງຈາກການລໍ້ລວງ, ມັນຈະສະຫລາຍໄປ ຫລື ບໍ່ມີພະລັງຄວບຄຸມຈິດໃຈ ແລະ ຫົວໃຈຂອງເຮົາ ແລະ, ໃນທີ່ສຸດ, ບໍ່ສາມາດຄວບຄຸມການປະພຶດຂອງເຮົາໄດ້.
ຄຳປຽບທຽບນີ້ເຕືອນຂ້າພະເຈົ້າເຖິງປະສົບການໜຶ່ງທີ່ສະມາຊິກທີ່ຊື່ສັດຄົນໜຶ່ງຂອງສາດສະໜາຈັກໄດ້ແບ່ງປັນກັບຂ້າພະເຈົ້າ ດົນນານມາແລ້ວ. ສະມາຊິກຄົນນີ້ໄດ້ບອກຂ້າພະເຈົ້າວ່າ ເມື່ອນາງຕື່ນຂຶ້ນໃນເຊົ້າມື້ໜຶ່ງ, ຄວາມຄິດທີ່ບໍ່ດີ ທີ່ນາງບໍ່ເຄີຍຄິດມາກ່ອນ ແລະ ບໍ່ນຶກບໍ່ຝັນໄດ້ເຂົ້າມາສູ່ຈິດໃຈຂອງນາງ. ເຖິງແມ່ນມັນເຮັດໃຫ້ນາງຕົກຕະລຶງ, ແຕ່ນາງກໍໄດ້ຕ້ານມັນທັນທີ, ໂດຍການເວົ້າວ່າ, “ບໍ່!” ແລະ ໄດ້ຄິດກ່ຽວກັບເລື່ອງອື່ນ ເພື່ອປ່ຽນຄວາມຄິດທີ່ບໍ່ເພິ່ງປາດຖະໜານັ້ນ. ນາງບອກຂ້າພະເຈົ້າວ່າ ເມື່ອນາງໃຊ້ອຳເພີໃຈໃນທາງທີ່ຊອບທຳ, ຄວາມຄິດບໍ່ດີນັ້ນ, ໄດ້ຫາຍໜີຢ່າງໄວ.
ເມື່ອໂມໂຣໄນໄດ້ເອີ້ນໃຫ້ຜູ້ຄົນເຊື່ອໃນພຣະຄຣິດ ແລະ ກັບໃຈ, ເພິ່ນໄດ້ເຕືອນພວກເຂົາໃຫ້ມາຫາພຣະຜູ້ຊ່ວຍໃຫ້ລອດດ້ວຍສຸດໃຈ, ປົດເປື້ອງຕົວອອກຈາກຄວາມບໍ່ສະອາດທຸກຢ່າງ. ຍິ່ງໄປກວ່ານັ້ນ, ໂມໂຣໄນຍັງໄດ້ເຊື້ອເຊີນພວກເຂົາໃຫ້ທູນຕໍ່ພຣະເຈົ້າ, ດ້ວຍຄວາມຕັ້ງໃຈທີ່ບໍ່ປ່ຽນແປງ, ຂໍໃຫ້ພວກເຂົາບໍ່ຕົກໄປສູ່ການລໍ້ລວງ.12 ການນຳໃຊ້ຫລັກທຳເຫລົ່ານີ້ໃນຊີວິດຂອງເຮົາ ຮຽກຮ້ອງຫລາຍກວ່າພຽງແຕ່ເຊື່ອ; ມັນຮຽກຮ້ອງໃຫ້ປັບປ່ຽນຈິດໃຈ ແລະ ຫົວໃຈຂອງເຮົາໃຫ້ເຂົ້າກັບຫລັກທຳແຫ່ງສະຫວັນເຫລົ່ານີ້ນຳອີກ. ການປັບປ່ຽນເຊັ່ນນັ້ນຮຽກຮ້ອງຄວາມພະຍາຍາມທຸກວັນ, ນອກເໜືອໄປຈາກການເພິ່ງອາໄສພຣະຜູ້ຊ່ວຍໃຫ້ລອດ, ເພາະວ່າຄວາມໂນ້ມອຽງຂອງຄວາມເປັນມະຕະຂອງເຮົາ ຈະບໍ່ສູນຫາຍໄປເອງ. ການຕໍ່ສູ້ກັບການລໍ້ລວງຈະໃຊ້ຄວາມພະຍາຍາມ ແລະ ຄວາມຊື່ສັດຕະຫລອດຊີວິດ. ແຕ່ຈົ່ງຮູ້ໄວ້ວ່າ ພຣະຜູ້ເປັນເຈົ້າພ້ອມແລ້ວທີ່ຈະຊ່ວຍເຫລືອເຮົາ ໃນຄວາມພະຍາຍາມສ່ວນຕົວຂອງເຮົາ ແລະ ສັນຍາຈະປະທານພອນທີ່ໜ້າອັດສະຈັນໃຫ້ເຮົາ ຖ້າຫາກເຮົາອົດທົນຈົນເຖິງທີ່ສຸດ.
ໃນໄລຍະໜຶ່ງຕອນໂຈເຊັບ ສະມິດ ແລະ ໝູ່ເພື່ອນຜູ້ບຸກເບີກທີ່ຢູ່ໃນຄຸກລີເບີຕີກັບເພິ່ນ ບໍ່ມີອິດສະລະທີ່ຈະເຮັດສິ່ງໃດ ນອກຈາກພຽງແຕ່ຄິດເທົ່ານັ້ນ, ພຣະຜູ້ເປັນເຈົ້າໄດ້ແນະນຳ ແລະ ສັນຍາກັບພວກເພິ່ນ ຊຶ່ງກ່ຽວພັນກັບເຮົາຄືກັນ ທີ່ວ່າ:
“ໃຫ້ອຸທອນຂອງເຈົ້າເຕັມປ່ຽມໄປດ້ວຍຄວາມໃຈບຸນຕໍ່ມະນຸດທັງປວງນຳອີກ, ແລະ ຕໍ່ຄອບຄົວແຫ່ງສັດທາ, ແລະ ໃຫ້ຄຸນນະທຳປະດັບ ຄວາມນຶກຄິດຂອງເຈົ້າຢ່າງບໍ່ເສື່ອມຄາຍ; ເມື່ອນັ້ນຄວາມໝັ້ນໃຈຂອງເຈົ້າຈະແຂງແກ່ນຂຶ້ນໃນທີ່ປະທັບຂອງພຣະເຈົ້າ; …
“ພຣະວິນຍານບໍລິສຸດຈະເປັນເພື່ອນຂອງເຈົ້າສະເໝີ, ແລະ ໄມ້ຄ້ອນເທົ້າແຫ່ງອຳນາດຂອງເຈົ້າ ຈະເປັນໄມ້ຄ້ອນເທົ້າອັນບໍ່ປ່ຽນແປງແຫ່ງຄວາມຊອບທຳ ແລະ ຄວາມຈິງ.”13
ໃນການເຮັດເຊັ່ນນັ້ນ, ຄວາມຄິດທີ່ບໍລິສຸດຈະສືບຕໍ່ປະດັບຢູ່ໃນຈິດໃຈຂອງເຮົາ ແລະ ຄວາມປາດຖະໜາທີ່ບໍລິສຸດຈະນຳພາເຮົາເຮັດສິ່ງທີ່ຊອບທຳ.
ໂມໂຣໄນຍັງໄດ້ຕັກເຕືອນຜູ້ຄົນຂອງເພິ່ນບໍ່ໃຫ້ຖືກຄວບຄຸມໂດຍກິເລດຕັນຫາຂອງຕົນເອງນຳອີກ.14 ຄຳວ່າ ກິເລດຕັນຫາ ແມ່ນຄວາມປາດຖະໜາທີ່ຮຸນແຮງ ແລະ ບໍ່ເໝາະສົມສຳລັບບາງສິ່ງບາງຢ່າງ.15 ມັນລວມດ້ວຍຄວາມຄິດທີ່ມືດມົນ ຫລື ຄວາມປາດຖະໜາທີ່ຊົ່ວຮ້າຍ ອັນທີ່ເຮັດໃຫ້ບຸກຄົນເອົາໃຈໃສ່ກັບການເຮັດບາງສິ່ງແບບເຫັນແກ່ຕົວ ຫລື ສະແຫວງຫາສິ່ງທີ່ເປັນຂອງໂລກ ແທນທີ່ຈະສະແຫວງຫາສິ່ງທີ່ດີ, ການມີເມດຕາ, ການຮັກສາພຣະບັນຍັດຂອງພຣະເຈົ້າ ແລະ, ອື່ນໆ. ມັນມັກສະແດງໃຫ້ປະຈັກຜ່ານທາງຄວາມຮູ້ສຶກທີ່ເຕັມໄປດ້ວຍກາມມະລົມຂອງຈິດວິນຍານ. ອັກຄະສາວົກໂປໂລໄດ້ຊີ້ບອກກ່ຽວກັບຄວາມຮູ້ສຶກບາງຢ່າງເຫລົ່ານີ້, ດັ່ງເຊັ່ນ, ຄວາມສົກກະປົກ, ຄວາມບ້າຕັນຫາ, … ຄວາມກຽດຊັງ, … ຄວາມໂມໂຫ, ຄວາມຂັດແຍ້ງ, … ຄວາມອິດສາບັງບຽດ, … ແລະ ອື່ນໆທີ່ຄືກັນນີ້.”16 ນອກເໜືອໄປຈາກຄວາມຊົ່ວຮ້າຍທຸກດ້ານຂອງກິເລດຕັນຫາແລ້ວ, ເຮົາບໍ່ຄວນລືມສັດຕູທີ່ໃຊ້ມັນເປັນອາວຸດທີ່ລຶກລັບ ແລະ ລໍ້ລວງຕ້ານເຮົາ ເມື່ອມັນພະຍາຍາມລໍ້ລວງເຮົາໃຫ້ເຮັດສິ່ງທີ່ບໍ່ຖືກຕ້ອງ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າເປັນພະຍານວ່າ ເມື່ອເຮົາເພິ່ງອາໄສຫີນສີລາແຫ່ງຄວາມລອດ, ພຣະຜູ້ເປັນເຈົ້າແຫ່ງຈິດວິນຍານຂອງເຮົາ, ແລະ ດ້ວຍການເຮັດຕາມຄຳແນະນຳຂອງໂມໂຣໄນ, ແລ້ວເຮົາຈະສາມາດບັງຄັບຄວາມຄິດຂອງເຮົາໄດ້ຫລາຍທີ່ສຸດ. ຂ້າພະເຈົ້າຂໍໃຫ້ທ່ານໝັ້ນໃຈໄດ້ວ່າ ການໃຫຍ່ເຕັມຕົວທາງວິນຍານຂອງເຮົາຈະເຕີບໂຕຂຶ້ນຢ່າງໄວ, ປ່ຽນແປງຫົວໃຈຂອງເຮົາ, ເຮັດໃຫ້ເຮົາເປັນເໝືອນດັ່ງພຣະເຢຊູຄຣິດຫລາຍຂຶ້ນກວ່າເກົ່າ. ພ້ອມນີ້, ອິດທິພົນຂອງພຣະວິນຍານບໍລິສຸດຈະແຮງກ້າຫລາຍກວ່າເກົ່າ ແລະ ມີສືບຕໍ່ຢູ່ໃນຊີວິດຂອງເຮົາ. ການລໍ້ລວງຂອງສັດຕູ ຈະເສື່ອມພະລັງໄປເທື່ອລະເລັກເທື່ອລະນ້ອຍ, ໃນທີ່ສຸດເຮົາຈະມີຄວາມສຸກ ແລະ ມີຊີວິດທີ່ບໍລິສຸດ ແລະ ອຸທິດຕົນຫລາຍກວ່າເກົ່າ.
ບໍ່ວ່າຜູ້ໃດກໍຕາມ, ເປັນດ້ວຍເຫດໃດກໍຕາມ, ທີ່ໄດ້ຕົກໄປສູ່ການລໍ້ລວງ ແລະ ເຮັດສິ່ງທີ່ບໍ່ຊອບທຳ, ຂ້າພະເຈົ້າໃຫ້ທ່ານແນ່ໃຈໄດ້ວ່າ ມີທາງກັບມາຢູ່, ມີຄວາມຫວັງຢູ່ ໃນພຣະຄຣິດ. ສອງສາມປີຜ່ານມານີ້, ຂ້າພະເຈົ້າໄດ້ມີໂອກາດເວົ້າລົມກັບສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍຄົນໜຶ່ງ ຜູ້ມີບັນຫາໃນຊີວິດຫລາຍທີ່ສຸດ ຫລັງຈາກທີ່ລາວໄດ້ທຳຄວາມຜິດທີ່ຮ້າຍແຮງ. ທັນທີທີ່ຂ້າພະເຈົ້າຫລຽວເບິ່ງລາວ, ກໍເຫັນຄວາມໂສກເສົ້າຢູ່ໃນສາຍຕາຂອງລາວ, ແຕ່ຍັງເຫັນຄວາມຫວັງທີ່ແຈ່ມໃສຢູ່ໃນໃບໜ້າຂອງລາວຢູ່. ສິ່ງເຫລົ່ານັ້ນສະແດງໃຫ້ເຫັນເຖິງຄວາມຖ່ອມຕົວ ແລະ ໃຈທີ່ປ່ຽນແປງ. ລາວໄດ້ເປັນຊາວຄຣິດທີ່ອຸທິດຕົນມາຕະຫລອດ ແລະ ໄດ້ຮັບພອນຢ່າງຫລວງຫລາຍຈາກພຣະຜູ້ເປັນເຈົ້າ. ເຖິງຢ່າງໃດກໍຕາມ, ລາວໄດ້ເກີດມີຄວາມຄິດທີ່ບໍ່ເໝາະສົມຢ່າງໜຶ່ງ, ຊຶ່ງພາໃຫ້ຄິດຢ່າງອື່ນໆອີກ. ເມື່ອລາວຍອມຕໍ່ຄວາມຄິດເຫລົ່ານັ້ນຫລາຍຂຶ້ນເທົ່າໃດ, ມັນກໍສຸມຢູ່ໃນຈິດໃຈຂອງລາວຫລາຍຍິ່ງຂຶ້ນເທົ່ານັ້ນ ແລະ ລາມເຂົ້າເຖິງຫົວໃຈ. ໃນທີ່ສຸດ ລາວກໍໄດ້ເຮັດຕາມຄວາມປາດຖະໜາເຫລົ່ານັ້ນ, ຊຶ່ງນຳພາລາວໃຫ້ຕໍ່ຕ້ານທຸກສິ່ງທີ່ມີຄ່າທີ່ສຸດໃນຊີວິດຂອງລາວ. ລາວບອກຂ້າພະເຈົ້າວ່າ ຖ້າຫາກລາວໄດ້ກຳຈັດຄວາມຄິດທີ່ໂງ່ຈ້າແຕ່ຕອນຕົ້ນ, ລາວຄົງບໍ່ກາຍເປັນເຫຍື່ອ ແລະ ອ່ອນໄຫວຕໍ່ການລໍ້ລວງຂອງສັດຕູ—ການລໍ້ລວງທີ່ນຳຄວາມໂສກເສົ້າຫລາຍທີ່ສຸດມາສູ່ຊີວິດຂອງລາວ, ຢ່າງໜ້ອຍໃນຊົ່ວໄລຍະໜຶ່ງ.
ແຕ່ຍັງໂຊກດີຢູ່, ຄືກັນກັບລູກຊາຍທີ່ເສຍ ໃນຄຳອຸປະມາຢູ່ໃນພຣະທຳລູກາ, “ລາວສຳນຶກໄດ້” ແລະ ຕື່ນຈາກການຝັນຮ້າຍ.17 ລາວໄດ້ເລີ່ມຕົ້ນໄວ້ວາງໃຈໃນພຣະຜູ້ເປັນເຈົ້າອີກ ແລະ ສຳນຶກຜິດ ແລະ ປາດຖະໜາທີ່ຈະກັບຄືນມາຫາຝູງຂອງພຣະຜູ້ເປັນເຈົ້າ. ໃນມື້ນັ້ນ ພວກເຮົາທັງສອງຮູ້ສຶກເຖິງຄວາມຮັກທີ່ໄຖ່ຂອງພຣະຜູ້ຊ່ວຍໃຫ້ລອດສຳລັບພວກເຮົາ. ໃນທ້າຍການພົບປະຂອງພວກເຂົາ, ພວກເຮົາທັງສອງໄດ້ນ້ຳຕາໄຫລ, ແລະ ຈົນເຖິງມື້ນີ້, ຂ້າພະເຈົ້າຍັງຈື່ຈຳຄວາມສຸກຢູ່ເທິງໃບໜ້າຂອງລາວ ຂະນະທີ່ລາວເດີນອອກຈາກຫ້ອງການຂອງຂ້າພະເຈົ້າໄປ.
ພີ່ນ້ອງເອີຍ, ເມື່ອເຮົາຫລີກລ້ຽງຈາກການລໍ້ລວງອັນເລັກນ້ອຍ, ຊຶ່ງມັກຈະມາເຖິງແບບບໍ່ຮູ້ສຶກຕົວໃນຊີວິດຂອງເຮົາ, ແລ້ວເຮົາຈະສາມາດຫລີກເວັ້ນຈາກການລ່ວງລະເມີດທີ່ຮ້າຍແຮງ ໄດ້ດີກວ່າເກົ່າ. ດັ່ງທີ່ປະທານສະເປັນເຊີ ດັບເບິນຢູ ຄິມໂບ ໄດ້ກ່າວວ່າ: “ໜ້ອຍເທື່ອທີ່ຜູ້ຄົນລ່ວງລະເມີດຢ່າງຮ້າຍແຮງ ປາດສະຈາກການຍອມຕໍ່ບາບອັນເລັກໆນ້ອຍໆກ່ອນ, ຊຶ່ງເປີດປະຕູໃຫ້ກວ້າງອອກຫລາຍຍິ່ງຂຶ້ນ. … ‘ທົ່ງທີ່ສະອາດ [ຈະບໍ່] [ເຕັມໄປດ້ວຍ] ຫຍ້າໃນທັນທີທັນໃດ.’”18
ຂະນະທີ່ກະກຽມເພື່ອບັນລຸພາລະກິດແຫ່ງສະຫວັນຂອງພຣະອົງຢູ່ເທິງໂລກ, ພຣະຜູ້ຊ່ວຍໃຫ້ລອດ ພຣະເຢຊູຄຣິດໄດ້ເປັນຕົວຢ່າງເຖິງຄວາມສຳຄັນຂອງການຕໍ່ຕ້ານທັນທີກັບທຸກສິ່ງທີ່ອາດຂັດຂວາງເຮົາຈາກການບັນລຸຈຸດປະສົງນິລັນດອນຂອງເຮົາ. ຫລັງຈາກທີ່ສັດຕູໂຈມຕີບໍ່ສຳເລັດຫລາຍເທື່ອ, ພະຍາຍາມກີດກັນພຣະອົງ ຈາກພາລະກິດຂອງພຣະອົງ, ພຣະຜູ້ຊ່ວຍໃຫ້ລອດໄດ້ຂັບໄລ່ມານຮ້າຍ ຢ່າງເດັດຂາດ ໂດຍກ່າວວ່າ: “ຈົ່ງໜີໄປ, ອ້າຍຊາຕານ. … ແລ້ວມານຮ້າຍກໍໄດ້ໜີໄປຈາກພຣະອົງ, ແລະ ມີເຫລົ່າທູດມາບົວລະບັດຮັບໃຊ້ພຣະອົງ.”19
ອ້າຍເອື້ອຍນ້ອງທັງຫລາຍ, ທ່ານຄິດອອກບໍວ່າ ແມ່ນຫຍັງຈະເກີດຂຶ້ນຖ້າຫາກເຮົາໄດ້ຮັບຄວາມເຂັ້ມແຂງ ແລະ ຄວາມກ້າຫານຈາກພຣະຜູ້ຊ່ວຍໃຫ້ລອດ ແລະ ກ່າວວ່າ, “ບໍ່” ແລະ “ຈົ່ງໜີໄປ” ກັບຄວາມຄິດທີ່ບໍ່ດີງາມ ໃນນາທີທີ່ມັນເຂົ້າມາສູ່ຈິດໃຈຂອງເຮົາ? ແມ່ນຫຍັງຄືຜົນກະທົບຂອງຄວາມປາດຖະໜາຂອງໃຈເຮົາ? ຜົນຂອງການກະທຳຂອງເຮົາຈະຊ່ວຍເຮົາໃຫ້ເຂົ້າໃກ້ພຣະຜູ້ຊ່ວຍໃຫ້ລອດຫລາຍຂຶ້ນກວ່າເກົ່າ ແລະ ປ່ອຍໃຫ້ອິດທິພົນອັນຕໍ່ເນື່ອງຂອງພຣະວິນຍານບໍລິສຸດ ເຂົ້າມາສູ່ຊີວິດຂອງເຮົາໄດ້ແນວໃດ? ຂ້າພະເຈົ້າຮູ້ວ່າ ໂດຍການເຮັດຕາມຕົວຢ່າງຂອງພຣະເຢຊູ, ເຮົາຈະຫລີກເວັ້ນຈາກຄວາມໂສກເສົ້າ ແລະ ການປະພຶດທີ່ບໍ່ເພິ່ງປາດຖະໜາຫລາຍຢ່າງ ທີ່ອາດເຮັດໃຫ້ເກີດບັນຫາໃນຄອບຄົວ ແລະ ມີການຜິດຖຽງກັນ, ຄວາມຮູ້ສຶກ ແລະ ຄວາມໂນ້ມອຽງໃນທາງລົບ, ການກະທຳທີ່ບໍ່ຍຸດຕິທຳ ແລະ ການຂົ່ມເຫັງ, ການຕົກເປັນທາດຂອງການຕິດແສດທີ່ຊົ່ວຮ້າຍ, ແລະ ທຸກສິ່ງອື່ນອີກທີ່ຕໍ່ຕ້ານພຣະບັນຍັດຂອງພຣະຜູ້ເປັນເຈົ້າ.
ໃນຂ່າວສານແຫ່ງປະຫວັດສາດ ແລະ ປະທັບໃຈຂອງເພິ່ນ ຈາກເດືອນເມສາປີນີ້, ສາດສະດາທີ່ຮັກແພງຂອງເຮົາ, ປະທານຣະໂຊ ເອັມ ແນວສັນ ໄດ້ສັນຍາວ່າ ທຸກຄົນທີ່ເຕັມໃຈ “ຟັງພຣະອົງ”—ຟັງ ພຣະເຢຊູຄຣິດ—ແລະ ເຊື່ອຟັງພຣະບັນຍັດຂອງພຣະອົງ “ຈະໄດ້ຮັບພອນດ້ວຍພະລັງເພີ່ມເຕີມ ທີ່ຈະສາມາດປະເຊີນກັບການລໍ້ລວງ, ການດີ້ນລົນ, ແລະ ຄວາມອ່ອນແອໄດ້” ແລະ ວ່າເຮົາຈະຮູ້ສຶກມີຄວາມສຸກຫລາຍຂຶ້ນກວ່າເກົ່າ, ແມ່ນແຕ່ໃນໄລຍະທີ່ມີຄວາມປັ່ນປ່ວນຫລາຍຂຶ້ນໃນປະຈຸບັນນີ້.20
ຂ້າພະເຈົ້າເປັນພະຍານຕໍ່ທ່ານວ່າ ຄຳສັນຍາທີ່ມອບໃຫ້ໂດຍສາດສະດາຂອງເຮົາ ແມ່ນມາຈາກພຣະຜູ້ຊ່ວຍໃຫ້ລອດໂດຍກົງ. ຂ້າພະເຈົ້າເຊື້ອເຊີນເຮົາທຸກຄົນໃຫ້ “ຟັງພຣະອົງ” ໃນທຸກຄວາມຄິດ ແລະ ຕິດຕາມພຣະອົງດ້ວຍສຸດໃຈ ເພື່ອຮັບເອົາຄວາມເຂັ້ມແຂງ ແລະ ຄວາມກ້າຫານ ທີ່ຈະກ່າວວ່າ, “ບໍ່” ແລະ “ຈົ່ງໜີໄປ” ຕໍ່ທຸກສິ່ງທີ່ອາດນຳຄວາມໂສກເສົ້າມາສູ່ຊີວິດຂອງເຮົາ. ຖ້າຫາກເຮົາເຮັດເຊັ່ນນັ້ນ, ຂ້າພະເຈົ້າສັນຍາວ່າ ພຣະຜູ້ເປັນເຈົ້າຈະສົ່ງພຣະວິນຍານສັກສິດຂອງພຣະອົງຢ່າງຫລວງຫລາຍມາ ເພື່ອເພີ່ມຄວາມເຂັ້ມແຂງໃຫ້ເຮົາ ແລະ ປອບໂຍນເຮົາ, ແລະ ເຮົາຈະກາຍເປັນບຸກຄົນຕາມທີ່ພຣະຜູ້ເປັນເຈົ້າປະສົງ.21
ຂ້າພະເຈົ້າສະແດງປະຈັກພະຍານວ່າ ພຣະເຢຊູຄຣິດຊົງພຣະຊົນຢູ່ ແລະ ວ່າຜ່ານທາງພຣະອົງ, ເຮົາອາດໄດ້ຮັບໄຊຊະນະເໜືອອິດທິພົນທີ່ຊົ່ວຮ້າຍຂອງສັດຕູ ແລະ ເໝາະສົມທີ່ຈະອາໄສຢູ່ກັບພຣະຜູ້ຊ່ວຍໃຫ້ລອດຊົ່ວນິລັນດອນ ແລະ ຢູ່ໃນທີ່ປະທັບຂອງພຣະບິດາຜູ້ສະຖິດໃນສະຫວັນທີ່ຊົງຮັກຂອງເຮົາ. ຂ້າພະເຈົ້າເປັນພະຍານເຖິງຄວາມຈິງເຫລົ່ານີ້ ດ້ວຍຄວາມຮັກທັງໝົດຂອງຂ້າພະເຈົ້າຕໍ່ທ່ານ ແລະ ຕໍ່ພຣະຜູ້ຊ່ວຍໃຫ້ລອດທີ່ສະຫງ່າງາມຂອງເຮົາ, ຊຶ່ງຂ້າພະເຈົ້າຍ້ອງຍໍ, ໃຫ້ກຽດ, ແລະ ສັນລະເສີນພຣະນາມຂອງພຣະອົງຕະຫລອດໄປ. ຂ້າພະເຈົ້າກ່າວສິ່ງເຫລົ່ານີ້ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.