ເຮົາເວົ້າເຖິງພຣະຄຣິດ

ໂດຍ ແອວເດີ ນຽວ ແອວ ແອນເດີເຊັນ

ແຫ່ງກຸ່ມອັກຄະສາວົກສິບສອງ

ຂະນະທີ່ຊາວໂລກກ່າວເຖິງພຣະເຢຊູຄຣິດໜ້ອຍລົງ, ຂໍໃຫ້ເຮົາຈົ່ງກ່າວເຖິງພຣະອົງຫລາຍຂຶ້ນ.

ຂ້າພະເຈົ້າຂໍສະແດງຄວາມຮັກທີ່ມີຕໍ່ທ່ານ, ມິດສະຫາຍ ແລະ ເພື່ອນຝູງຜູ້ທີ່ເຊື່ອທັງຫລາຍ. ຂ້າພະເຈົ້າຂໍຊົມເຊີຍສັດທາ ແລະ ຄວາມກ້າຫານຂອງທ່ານລະຫວ່າງຫລາຍເດືອນທີ່ຜ່ານມານີ້, ຂະນະທີ່ການແຜ່ລະບາດຕະຫລອດທົ່ວໂລກໄດ້ລົບກວນຊີວິດຂອງເຮົາ ແລະ ໄດ້ເອົາຊີວິດຂອງສະມາຊິກທີ່ລ້ຳຄ່າໃນຄອບຄົວ ແລະ ໝູ່ເພື່ອນທີ່ຮັກແພງຂອງເຮົາໄປ.

ໃນຊ່ວງເວລາບໍ່ແນ່ນອນນີ້, ຂ້າພະເຈົ້າໄດ້ຮູ້ສຶກເຖິງຄວາມກະຕັນຍູຫລາຍ ສຳລັບຄວາມຮູ້ທີ່ແນ່ວແນ່ ແລະ ແນ່ນອນວ່າ ພຣະເຢຊູຄືພຣະຄຣິດ. ທ່ານກໍເຄີຍຮູ້ສຶກແບບນີ້ບໍ? ມີຄວາມຍາກລຳບາກທີ່ເຮັດໃຫ້ເຮົາຮູ້ສຶກໜັກໜ່ວງໃຈ, ແຕ່ຢູ່ຕໍ່ໜ້າເຮົາສະເໝີກໍມີພຣະອົງທີ່ໄດ້ກ່າວຢ່າງຖ່ອມຕົນວ່າ, “ເຮົານີ້ແຫລະ ເປັນທາງນັ້ນ, ເປັນຄວາມຈິງ, ແລະ ເປັນຊີວິດ.”¹ ເຖິງແມ່ນວ່າບາງເທື່ອເຮົາຕ້ອງອົດທົນຢູ່ຫ່າງຈາກຄົນອື່ນທາງຮ່າງກາຍ, ແຕ່ເຮົາບໍ່ຕ້ອງອົດທົນຢູ່ຫ່າງໄກທາງວິນຍານ ຈາກພຣະອົງຜູ້ທີ່ເອີ້ນບອກເຮົາດ້ວຍຄວາມຮັກວ່າ, “ຈົ່ງມາຫາເຮົາ.”²

ເໝືອນດັ່ງດວງດາວທີ່ນຳທາງໃນທ້ອງຟ້າທີ່ແຈ້ງສະຫວ່າງ, ພຣະເຢຊູຄຣິດກໍສ່ອງແສງເຍືອງທາງໃຫ້ເຮົາ. ພຣະອົງໄດ້ສະເດັດມາສູ່ໂລກໃນຄອກສັດທີ່ຕ່ຳຕ້ອຍ. ພຣະອົງໄດ້ດຳລົງຊີວິດທີ່ດີພ້ອມທຸກຢ່າງ. ພຣະອົງໄດ້ປິ່ນປົວຄົນເຈັບໄຂ້ໃຫ້ຫາຍດີ ແລະ ເຮັດໃຫ້ຄົນຕາຍຄືນມີຊີວິດ. ພຣະອົງໄດ້ເປັນເພື່ອນຂອງຜູ້ທີ່ຖືກລືມໄລ. ພຣະອົງໄດ້ສິດສອນເຮົາໃຫ້ເຮັດສິ່ງດີ, ໃຫ້ເຊື່ອຟັງ, ແລະ ໃຫ້ຮັກກັນແລະກັນ. ພຣະອົງໄດ້ຖືກຄຶງຢູ່ເທິງໄມ້ກາງແຂນ, ຟື້ນຄືນພຣະຊົນຢ່າງສະຫງ່າລາສີສາມມື້ຕໍ່ມາ, ເພື່ອໃຫ້ເຮົາ ແລະ ຜູ້ຄົນທີ່ເຮົາຮັກມີຊີວິດຕໍ່ໄປຜ່ານຫລຸມຝັງສົບ. ດ້ວຍຄວາມເມດຕາ ແລະ ພຣະຄຸນທີ່ຫາອັນປຽບບໍ່ໄດ້, ພຣະອົງໄດ້ຮັບເອົາບາບ ແລະ ຄວາມທຸກທໍລະມານຂອງເຮົາ, ນຳການໃຫ້ອະໄພມາໃຫ້ເມື່ອເຮົາກັບໃຈ ແລະ ໃຫ້ຄວາມສະຫງົບໃນມໍລະສຸມຊີວິດ. ເຮົາຮັກພຣະອົງ. ເຮົານະມັດສະການພຣະອົງ. ເຮົາຕິດຕາມພຣະອົງ. ພຣະອົງເປັນແຫລ່ງຂອງຄວາມໝັ້ນຄົງໃນຊີວິດຂອງເຮົາ.

ໜ້າສົນໃຈທີ່, ເຖິງແມ່ນວ່າຄວາມເຊື່ອໝັ້ນທາງວິນຍານນີ້ເພີ່ມທະວີຂຶ້ນພາຍໃນຕົວເຮົາ, ແຕ່ຍັງມີບາງຄົນຢູ່ໃນໂລກທີ່ມີຄວາມຮູ້ໜ້ອຍເລື່ອງພຣະເຢຊູຄຣິດ, ແລະ ໃນບາງພາກໃນບ່ອນທີ່ພຣະນາມຂອງພຣະອົງຖືກປະກາດເປັນເວລາຫລາຍໆສັດຕະວັດມາແລ້ວ, ສັດທາໃນພຣະເຢຊູຄຣິດກໍໜ້ອຍລົງ. ໄພ່ພົນທີ່ກ້າຫານໃນເຂດເອີຣົບໄດ້ເຫັນຄວາມເຊື່ອຖືມີໜ້ອຍລົງໃນປະເທດຂອງເຂົາເຈົ້າຕະຫລອດຫລາຍທົດສະວັດມານີ້.³ ໜ້າເສຍໃຈທີ່, ໃນສະຫະລັດອາເມຣິການີ້, ຄວາມເຊື່ອຖືກຳລັງລົດນ້ອຍຖອຍລົງ. ການຄົ້ນຄວ້າສຶກສາເມື່ອບໍ່ດົນມານີ້ໄດ້ເປີດເຜີຍວ່າ ພາຍໃນ 10 ຜ່ານມານີ້, 30 ລ້ານຄົນຢູ່ໃນສະຫະລັດເຊົາເຊື່ອຖືໃນຄວາມເປັນພຣະເຈົ້າຂອງພຣະເຢຊູຄຣິດ.⁴ ເມື່ອມອງໄປເບິ່ງທົ່ວໂລກ, ການສຶກສາອີກຢ່າງໜຶ່ງຄາດຄະເນວ່າ ໃນຫລາຍທົດສະວັດຂ້າງໜ້າ, ຈຳນວນຄົນເປັນສອງເທົ່າຈະໜີໄປຈາກຄວາມເຊື່ອຖືຂອງຊາວຄຣິດສະຕຽນ ຫລາຍກວ່າຜູ້ຄົນທີ່ຍອມຮັບ.⁵

ແນ່ນອນວ່າ, ເຮົາ, ນັບຖືສິດທິຂອງແຕ່ລະຄົນທີ່ຈະເລືອກ, ແຕ່ພຣະບິດາເທິງສະຫວັນຂອງເຮົາໄດ້ປະກາດວ່າ, “ນີ້ຄືບຸດທີ່ຮັກຂອງເຮົາ: ຈົ່ງຟັງທ່ານ”⁶ ຂ້າພະເຈົ້າເປັນພະຍານວ່າ ມື້ນັ້ນຈະມາເຖິງເມື່ອທຸກຄົນຈະຄຸເຂົ່າລົງ ແລະ ທຸກຄົນຈະສາລະພາບວ່າ ພຣະເຢຊູຄືພຣະຄຣິດ.⁷

ເຮົາຕ້ອງຕອບຮັບແນວໃດຕໍ່ໂລກທີ່ປ່ຽນແປງຂອງເຮົາ? ຂະນະທີ່ບາງຄົນກໍລະເລີຍກັບສັດທາຂອງຕົນ, ບາງຄົນກໍສະແຫວງຫາຄວາມຈິງ. ເຮົາຮັບເອົາພຣະນາມຂອງພຣະຜູ້ຊ່ວຍໃຫ້ລອດ. ເຮົາຕ້ອງເຮັດຫຍັງຕື່ມອີກແດ່?

ການກະກຽມຂອງປະທານຣະໂຊ ເອັມ ແນວສັນ

ສ່ວນໜຶ່ງຂອງຄຳຕອບຂອງເຮົາອາດມີມາເມື່ອເຮົາຈື່ຈຳວິທີທີ່ພຣະຜູ້ເປັນເຈົ້າໄດ້ສິດສອນ ປະທານຣະໂຊ ເອັມ ແນວສັນ ເປັນເວລາຫລາຍເດືອນ ກ່ອນການເອີ້ນຂອງເພິ່ນ ໃນຖານະປະທານຂອງສາດສະໜາຈັກ. ຕອນກ່າວປາໄສໜຶ່ງປີກ່ອນການເອີ້ນຂອງເພິ່ນ, ປະທານແນວສັນໄດ້ເຊື້ອເຊີນເຮົາໃຫ້ສຶກສາຂໍ້ອ້າງອີງຈຳນວນ 2,200 ຂໍ້ ເຖິງພຣະນາມຂອງ ພຣະເຢຊູຄຣິດ ຢ່າງເລິກເຊິ່ງ ຢູ່ໃນ Topical Guide [ຄູ່ມືຫົວຂໍ້].⁸

ຮູບພາບ

ປະທານແນວສັນກຳລັງສຶກສາພຣະຄຳພີ

ສາມເດືອນຕໍ່ຈາກນັ້ນ, ໃນກອງປະຊຸມໃຫຍ່ສາມັນເດືອນເມສາ, ເພິ່ນໄດ້ກ່າວວ່າ, ແມ່ນແຕ່ການເປັນສານຸສິດທີ່ອຸທິດຕົນເປັນເວລາຫລາຍທົດສະວັດຂອງເພິ່ນ, ແຕ່ການສຶກສາທີ່ເລິກເຊິ່ງນີ້ເຖິງພຣະເຢຊູຄຣິດມີຜົນກະທົບຕໍ່ເພິ່ນຫລາຍແນວໃດ. ພັນລະຍາຂອງເພິ່ນ, ຊິດສະເຕີ ເວັນດີ ແນວສັນ, ໄດ້ຖາມເພິ່ນກ່ຽວກັບຜົນກະທົບ. ເພິ່ນໄດ້ຕອບວ່າ, “ອ້າຍເປັນຄົນໃໝ່!” ເພິ່ນເປັນຄົນໃໝ່ແນວໃດ? ໂດຍທີ່ມີອາຍຸ 92 ປີ, ເປັນຄົນໃໝ່ໄດ້ແນວໃດ? ປະທານແນວສັນໄດ້ອະທິບາຍວ່າ:

“ເມື່ອເຮົາໃຊ້ເວລາໃນການຮຽນຮູ້ກ່ຽວກັບພຣະຜູ້ຊ່ວຍໃຫ້ລອດ ແລະ ການເສຍສະລະຊົດໃຊ້ຂອງພຣະອົງ, ເຮົາກໍຢາກເຂົ້າຫາ [ພຣະອົງ]. …

“… ຄວາມຕັ້ງໃຈຂອງເຮົາ [ກໍມາເປັນ] ຄວາມຍຶດໝັ້ນຢູ່ທີ່ພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງ.”⁹

ພຣະຜູ້ຊ່ວຍໃຫ້ລອດໄດ້ກ່າວວ່າ “ຈົ່ງເບິ່ງທີ່ເຮົາໃນຄວາມນຶກຄິດທຸກຢ່າງ.”¹⁰

ໃນໂລກທີ່ມີວຽກງານ, ຄວາມກັງວົນ, ແລະ ກິດຈະກຳອື່ນໆທີ່ມີຄ່າ, ເຮົາຮັກສາຫົວໃຈ, ຈິດໃຈ, ແລະ ຄວາມຄິດຂອງເຮົາໄວ້ທີ່ພຣະອົງ ຜູ້ທີ່ເປັນຄວາມຫວັງ ແລະ ຄວາມລອດຂອງເຮົາ.

ຖ້າຫາກການກັບມາສຶກສາກ່ຽວກັບພຣະຜູ້ຊ່ວຍໃຫ້ລອດຄືນໃໝ່ໄດ້ຊ່ວຍຕຽມປະທານແນວສັນ, ມັນຈະບໍ່ສາມາດຊ່ວຍຕຽມເຮົາຄືກັນບໍ?

ຮູບພາບ

ປະທານຣະໂຊ ເອັມ ແນວສັນ

ໃນການເນັ້ນເຖິງຊື່ຂອງສາດສະໜາຈັກ, ປະທານແນວສັນໄດ້ສິດສອນວ່າ: “ຖ້າຫາກເຮົາ … ຈະໄດ້ຮັບພະລັງແຫ່ງການຊົດໃຊ້ຂອງພຣະເຢຊູຄຣິດ—ເພື່ອຊຳລະ ແລະ ປິ່ນປົວເຮົາ, ເພື່ອເພີ່ມຄວາມເຂັ້ມແຂງ ແລະ ຂະຫຍາຍເຮົາ, ແລະ ໃນທີ່ສຸດ ເພື່ອນຳຄວາມສູງສົ່ງມາໃຫ້ເຮົາ—ເຮົາຕ້ອງຮັບຮູ້ພຣະອົງຢ່າງແຈ່ມແຈ້ງ ວ່າເປັນແຫລ່ງຂອງພະລັງນັ້ນ.”¹¹ ປະທານແນວສັນໄດ້ສິດສອນເຮົາວ່າ ການໃຊ້ຊື່ແທ້ຂອງສາດສະໜາຈັກຢ່າງສະໝ່ຳສະເໝີ, ບາງສິ່ງທີ່ອາດເບິ່ງຄືວ່າເປັນເລື່ອງເລັກນ້ອຍ, ມັນບໍ່ໄດ້ເປັນເລື່ອງເລັກນ້ອຍເລີຍ ແລະ ມັນຈະຫລໍ່ຫລອມອະນາຄົດຂອງໂລກ.

ຄຳສັນຍາສຳລັບການກະກຽມຂອງທ່ານ

ຂ້າພະເຈົ້າສັນຍາກັບທ່ານວ່າ ເມື່ອທ່ານຕຽມຕົວເອງ, ດັ່ງທີ່ປະທານແນວສັນໄດ້ຕຽມ, ທ່ານກໍຈະເປັນຄົນໃໝ່ຄືກັນ, ຄິດເຖິງພຣະຜູ້ຊ່ວຍໃຫ້ລອດຫລາຍກວ່າເກົ່າ, ກ່າວເຖິງພຣະອົງເລື້ອຍໆ ແລະ ມີຄວາມລັງເລໃຈໜ້ອຍລົງ. ເມື່ອທ່ານມາຮູ້ຈັກ ແລະ ຮັກພຣະອົງຫລາຍຂຶ້ນ, ຖ້ອຍຄຳຂອງທ່ານຈະຫລັ່ງໄຫລມາຢ່າງສະບາຍກວ່າເກົ່າ, ດັ່ງທີ່ມັນເປັນເມື່ອທ່ານກ່າວເຖິງລູກຂອງທ່ານ ຫລື ເຖິງໝູ່ເພື່ອນທີ່ຮັກແພງຂອງທ່ານ. ຜູ້ຄົນທີ່ຟັງທ່ານຢູ່ຈະຮູ້ສຶກຢາກໂຕ້ຖຽງ ຫລື ເມີນເສີຍໜ້ອຍລົງ ແລະ ມີຄວາມເຕັມໃຈທີ່ຈະຮຽນຮູ້ຈາກທ່ານຫລາຍຂຶ້ນ.

ທ່ານ ແລະ ຂ້າພະເຈົ້າກ່າວເຖິງພຣະເຢຊູຄຣິດ, ແຕ່ບາງທີເຮົາຈະສາມາດເຮັດໃຫ້ໄດ້ດີກວ່າເກົ່າ. ຖ້າຫາກຊາວໂລກຈະກ່າວກ່ຽວກັບພຣະອົງໜ້ອຍລົງ, ໃຜລະຈະກ່າວກ່ຽວກັບພຣະອົງຫລາຍຂຶ້ນ? ເຮົານີ້ແຫລະ! ພ້ອມທັງຊາວຄຣິດຜູ້ອຸທິດຕົນຄົນອື່ນໆ!

ການກ່າວເຖິງພຣະຄຣິດຢູ່ໃນບ້ານເຮືອນຂອງເຮົາ

ຢູ່ໃນບ້ານເຮືອນຂອງເຮົາກໍມີຮູບພາບຂອງພຣະຜູ້ຊ່ວຍໃຫ້ລອດຢູ່ບໍ? ເຮົາກ່າວກັບລູກໆຂອງເຮົາເລື້ອຍໆຢູ່ບໍກ່ຽວກັບຄຳອຸປະມາຂອງພຣະເຢຊູ? “ເລື່ອງລາວຂອງພຣະເຢຊູ [ເປັນ] ເໝືອນສາຍລົມທີ່ພັດແສງໄຟແຫ່ງສັດທາເຂົ້າໄປໃນຫົວໃຈຂອງເດັກນ້ອຍ.”¹² ເມື່ອລູກໆຂອງທ່ານຖາມຄຳຖາມໃດໜຶ່ງກັບທ່ານ, ໃຫ້ຄິດຢ່າງມີສະຕິກ່ຽວກັບການສິດສອນສິ່ງທີ່ພຣະຜູ້ຊ່ວຍໃຫ້ລອດໄດ້ສິດສອນ. ຍົກຕົວຢ່າງ, ຖ້າຫາກລູກຂອງທ່ານຖາມວ່າ, “ພໍ່ເອີຍ, ເປັນຫຍັງເຮົາຈຶ່ງອະທິຖານ?” ທ່ານອາດຕອບໄປວ່າ, “ນັ້ນເປັນຄຳຖາມທີ່ດີເລີດ. ລູກຈຳໄດ້ບໍເມື່ອພຣະເຢຊູໄດ້ອະທິຖານ? ໃຫ້ເຮົາມາເວົ້າລົມກັນກ່ຽວກັບວ່າ ເປັນຫຍັງພຣະອົງຈຶ່ງໄດ້ອະທິຖານ ແລະ ວິທີທີ່ພຣະອົງໄດ້ອະທິຖານ.”

“ພວກເຮົາເວົ້າເຖິງພຣະຄຣິດ, ພວກເຮົາປິຕິຍິນດີໃນພຣະຄຣິດ, … ເພື່ອລູກຫລານຂອງພວກເຮົາ ຈະໄດ້ຮູ້ວ່າ ພວກເຂົາຈະຫລຽວຫາແຫລ່ງໃດເພື່ອການປົດບາບ.”¹³

ການກ່າວເຖິງພຣະຄຣິດຢູ່ໃນໂບດ

ພຣະຄຳພີຂໍ້ດຽວກັນນີ້ກ່າວຕື່ມອີກວ່າ “ເຮົາສັ່ງສອນເລື່ອງພຣະຄຣິດ.”¹⁴ ໃນພິທີນະມັດສະການຂອງເຮົາ, ຂໍໃຫ້ເຮົາຈົ່ງເອົາໃຈໃສ່ຕໍ່ພຣະຜູ້ຊ່ວຍໃຫ້ລອດ ພຣະເຢຊູຄຣິດ ແລະ ຂອງປະທານແຫ່ງການເສຍສະລະຊົດໃຊ້ຂອງພຣະອົງ. ນີ້ບໍ່ໄດ້ໝາຍຄວາມວ່າເຮົາບໍ່ສາມາດເລົ່າປະສົບການຈາກຊີວິດຂອງເຮົາເອງ ຫລື ແບ່ງປັນຄວາມນຶກຄິດທີ່ມາຈາກຄົນອື່ນ. ເຖິງແມ່ນວ່າຫົວຂໍ້ຂອງເຮົາອາດກ່ຽວກັບຄອບຄົວ ຫລື ການຮັບໃຊ້ ຫລື ພຣະວິຫານ ຫລື ການເຜີຍແຜ່ເມື່ອບໍ່ດົນມານີ້, ແຕ່ທຸກສິ່ງໃນການນະມັດສະການຂອງເຮົາ ຄວນຊີ້ໄປຫາອົງພຣະເຢຊູຄຣິດເຈົ້າ.

ເມື່ອສາມສິບປີກ່ອນ, ປະທານດາລິນ ເອັຈ ໂອກສ໌ ໄດ້ກ່າວເຖິງຈົດໝາຍທີ່ເພິ່ນໄດ້ຮັບ “ຈາກຊາຍຄົນໜຶ່ງ ທີ່ໄດ້ເວົ້າວ່າ ລາວໄດ້ໄປຮ່ວມກອງປະຊຸມ [ສິນລະລຶກ] ແລະ ໄດ້ຟັງການກ່າວປະຈັກພະຍານຈາກສິບເຈັດຄົນ ແຕ່ບໍ່ໄດ້ຍິນໃຜກ່າວເຖິງພຣະຜູ້ຊ່ວຍໃຫ້ລອດຈັກຄຳ.”¹⁵ ແລ້ວ ປະທານໂອກສ໌ໄດ້ກ່າວວ່າ, “ບາງທີນັ້ນເປັນເລື່ອງທີ່ເສີມແຕ່ງ [ແຕ່] ຂ້າພະເຈົ້າອ້າງອີງມັນ ເພາະມັນໃຫ້ເຫັນພາບທີ່ເຕືອນໃຈເຮົາທຸກຄົນ.”¹⁶ ແລ້ວເພິ່ນໄດ້ເຊື້ອເຊີນເຮົາໃຫ້ກ່າວເຖິງພຣະເຢຊູຄຣິດຫລາຍກວ່າເກົ່າໃນຄຳປາໄສ ແລະ ໃນການສົນທະນາຢູ່ໃນຫ້ອງຮຽນຂອງເຮົາ. ຂ້າພະເຈົ້າໄດ້ສັງເກດເຫັນວ່າ ເຮົາເອົາໃຈສຸມໃສ່ພຣະຄຣິດຫລາຍຂຶ້ນເລື້ອຍໆ ໃນການປະຊຸມໂບດຂອງເຮົາ. ຂໍໃຫ້ເຮົາສືບຕໍ່ຢ່າງມີສະຕິດ້ວຍຄວາມພະຍາຍາມທີ່ເປັນທາງບວກນີ້.

ການກ່າວເຖິງພຣະຄຣິດກັບຄົນອື່ນ

ພ້ອມດ້ວຍຜູ້ຄົນທີ່ຢູ່ອ້ອມຮອບເຮົາ, ຂໍໃຫ້ເຮົາຈົ່ງເປີດໃຈ, ເຕັມໃຈທີ່ຈະເວົ້າເຖິງພຣະຄຣິດ. ປະທານແນວສັນໄດ້ກ່າວວ່າ, “ສານຸສິດທີ່ແທ້ຈິງຂອງພຣະເຢຊູຄຣິດ ເຕັມໃຈທີ່ຈະຢືນຂຶ້ນ, ກ້າເວົ້າ, ແລະ ແຕກຕ່າງຈາກຄົນອື່ນໃນໂລກ.”¹⁷

ບາງເທື່ອເຮົາຄິດວ່າການເວົ້າລົມກັບຄົນໃດຄົນໜຶ່ງຕ້ອງໄດ້ຜົນໃຫ້ເຂົາເຈົ້າມາໂບດ ຫລື ພົບກັບຜູ້ສອນສາດສະໜາ. ຈົ່ງປ່ອຍໃຫ້ພຣະຜູ້ເປັນເຈົ້ານຳພາເຂົາເຈົ້າຕາມທີ່ເຂົາເຈົ້າເຕັມໃຈ, ຂະນະທີ່ເຮົາຄິດເຖິງໜ້າທີ່ຮັບຜິດຊອບຂອງເຮົາຫລາຍກວ່າເກົ່າ ເພື່ອຈະເປັນສຽງແທນພຣະອົງ, ຮອບຄອບ ແລະ ຈິງໃຈກ່ຽວກັບຄວາມເຊື່ອຖືຂອງເຮົາ. ແອວເດີ ດີເດີ ແອັຟ ອຸກດອບ ໄດ້ສິດສອນເຮົາວ່າ ເມື່ອມີຄົນຖາມເຮົາກ່ຽວກັບທ້າຍສັບປະດາຂອງເຮົາ, ເຮົາຄວນເຕັມໃຈທີ່ຈະຍິ້ມ ແລະ ເວົ້າວ່າເຮົາມັກຟັງເດັກນ້ອຍຊັ້ນປະຖົມໄວຮ້ອງເພງ ຊື່ “ເຮົາພະຍາຍາມເປັນເໝືອນດັ່ງພຣະເຢຊູ.”¹⁸ ໃຫ້ເຮົາຈົ່ງກ່າວເປັນພະຍານເຖິງສັດທາຂອງເຮົາໃນພຣະຄຣິດ. ຖ້າມີຄົນເວົ້າກ່ຽວກັບບັນຫາທີ່ເຂົາເຈົ້າມີໃນຊີວິດສ່ວນຕົວຂອງເຂົາເຈົ້າ, ເຮົາອາດເວົ້າວ່າ, “ຈອນ, ມາຣີ, ພວກເຈົ້າຮູ້ວ່າຂ້ອຍເຊື່ອໃນພຣະເຢຊູຄຣິດ. ຂ້ອຍໄດ້ຄິດເຖິງບາງສິ່ງທີ່ພຣະອົງໄດ້ກ່າວທີ່ອາດຊ່ວຍພວກເຈົ້າໄດ້.”

ໃຫ້ຈິງໃຈໃນສື່ສານມວນຊົນໃນການສົນທະນາກ່ຽວກັບຄວາມໄວ້ວາງໃຈຂອງທ່ານໃນພຣະຄຣິດ. ຄົນສ່ວນຫລາຍຈະເຄົາລົບຄວາມເຊື່ອຖືຂອງທ່ານ, ແຕ່ຖ້າຫາກມີຄົນທີ່ບໍ່ສົນໃຈຟັງເມື່ອທ່ານກ່າວເຖິງພຣະຜູ້ຊ່ວຍໃຫ້ລອດ, ໃຫ້ມີຄວາມກ້າຫານໃນຄຳສັນຍາຂອງພຣະອົງທີ່ວ່າ: “ເມື່ອຄົນກ່າວນິນທາ ແລະ ຂົ່ມເຫັງພວກເຈົ້າ … ເພາະເຫັນແກ່ເຮົາ. … ພວກເຈົ້າກໍເປັນສຸກ. ເພາະພວກເຈົ້າມີບຳເໜັດອັນຍິ່ງໃຫຍ່ໃນສະຫວັນແລ້ວ ”¹⁹ ເຮົາເປັນຫ່ວງກ່ຽວກັບການເປັນຜູ້ຕິດຕາມຂອງພຣະອົງຫລາຍກວ່າການຢາກໃຫ້ຄົນອື່ນມາຕິດຕາມ “ມັກຊອບ” ເຮົາ. ເປໂຕໄດ້ແນະນຳວ່າ: “ຈົ່ງມີໃຈພ້ອມຢູ່ສະເໝີ ເພື່ອພວກເຈົ້າຈະສາມາດຕອບແກ້ຕົວໄດ້ ຕໍ່ທຸກຄົນທີ່ຖາມພວກເຈົ້າວ່າ, ເຈົ້າມີເຫດຜົນປະການໃດຈຶ່ງມີຄວາມຫວັງຢ່າງນີ້.”²⁰ ຂໍໃຫ້ເຮົາຈົ່ງເວົ້າເຖິງພຣະຄຣິດ.

ພຣະຄຳພີມໍມອນເປັນພະຍານທີ່ມີພະລັງເຖິງພຣະເຢຊູຄຣິດ. ເກືອບທຸກໜ້າເປັນພະຍານເຖິງພຣະຜູ້ຊ່ວຍໃຫ້ລອດ ແລະ ພາລະກິດແຫ່ງສະຫວັນຂອງພຣະອົງ.²¹ ຄວາມເຂົ້າໃຈເຖິງການຊົດໃຊ້ ແລະ ພຣະຄຸນຂອງພຣະອົງກໍເຕັມຢູ່ໃນແຕ່ລະໜ້າເຫລົ່ານັ້ນ. ໂດຍທີ່ຄຽງຄູ່ໄປກັບພຣະຄຳພີໃໝ່, ພຣະຄຳພີມໍມອນຊ່ວຍໃຫ້ເຮົາເຂົ້າໃຈວ່າ ເປັນຫຍັງພຣະຜູ້ຊ່ວຍໃຫ້ລອດຈຶ່ງໄດ້ສະເດັດມາຊ່ວຍກູ້ເຮົາ ແລະ ວ່າເຮົາຈະສາມາດມາຫາພຣະອົງໄດ້ແນວໃດ.

ໝູ່ເພື່ອນຊາວຄຣິດຂອງເຮົາບາງຄົນ, ເປັນບາງຄັ້ງບາງຄາວ, ກໍບໍ່ແນ່ນອນໃຈກ່ຽວກັບຄວາມເຊື່ອ ແລະ ເຈດຕະນາຂອງເຮົາ. ຂໍໃຫ້ເຮົາຈົ່ງປິຕິຍິນດີກັບເຂົາເຈົ້າຢ່າງຈິງໃຈ ໃນຄວາມເຊື່ອທີ່ເຮົາມີຄືກັນໃນພຣະເຢຊູຄຣິດ ແລະ ຂໍ້ພຣະຄຳພີໃນພຣະຄຳພີໃໝ່ ທີ່ເຮົາທຸກຄົນມັກຫລາຍ. ໃນຫລາຍປີຂ້າງໜ້າ, ຜູ້ຄົນທີ່ເຊື່ອໃນພຣະເຢຊູຄຣິດຈະຕ້ອງການມິດຕະພາບ ແລະ ການສະໜັບສະໜູນຈາກກັນແລະກັນ.²²

ຮູບພາບ

ຄວາມສະຫວ່າງຂອງໂລກ

ຂະນະທີ່ຊາວໂລກກ່າວເຖິງພຣະເຢຊູຄຣິດໜ້ອຍລົງ, ຂໍໃຫ້ເຮົາຈົ່ງກ່າວເຖິງພຣະອົງຫລາຍຂຶ້ນ. ເມື່ອລັກສະນະທີ່ແທ້ຈິງຂອງເຮົາ ໃນຖານະສານຸສິດຂອງພຣະອົງຖືກເປີດເຜີຍ, ຫລາຍຄົນທີ່ຢູ່ອ້ອມຂ້າງເຮົາກໍພ້ອມທີ່ຈະຮັບຟັງ. ເມື່ອເຮົາແບ່ງປັນຄວາມສະຫວ່າງທີ່ເຮົາໄດ້ຮັບຈາກພຣະອົງ, ຄວາມສະຫວ່າງ ແລະ ອຳນາດທີ່ສູງສົ່ງຂອງພຣະອົງຈະສ່ອງແສງໃສ່ຜູ້ຄົນທີ່ເຕັມໃຈຈະເປີດໃຈຮັບ. ພຣະເຢຊູໄດ້ກ່າວວ່າ, “ເຮົາ … ມາເພື່ອ [ເປັນ] ຄວາມສະຫວ່າງທີ່ເຂົ້າມາໃນໂລກນີ້.”²³

ເຊີດຊູຄວາມປາດຖະໜາຂອງເຮົາທີ່ຈະກ່າວເຖິງພຣະຄຣິດ

ບໍ່ມີຫຍັງຈະເຊີດຊູຄວາມປາດຖະໜາຂອງຂ້າພະເຈົ້າຫລາຍກວ່າການ ທີີ່ຈະກ່າວເຖິງພຣະຄຣິດ ທີ່ຈະວາດພາບເຫັນການສະເດັດກັບຄືນມາຂອງພຣະອົງ. ເຖິງແມ່ນວ່າເຮົາບໍ່ຮູ້ວ່າເມື່ອໃດພຣະອົງຈະສະເດັດມາ, ແຕ່ເຫດການຂອງການສະເດັດກັບຄືນມາຂອງພຣະອົງຈະເປັນເລື່ອງທີ່ຕື່ນເຕັ້ນ! ພຣະອົງຈະສະເດັດລົງມາໃນເມກແຫ່ງສະຫວັນ ໃນສະຫງ່າລາສີ ແລະ ລັດສະໝີພາບ ພ້ອມດ້ວຍເຫລົ່າທູດທີ່ບໍລິສຸດຂອງພຣະອົງ. ບໍ່ແມ່ນພຽງແຕ່ເຫລົ່າທູດສອງສາມອົງ, ແຕ່ເຫລົ່າທູດທີ່ບໍລິສຸດ ທັງໝົດ ຂອງພຣະອົງ ນີ້ບໍ່ແມ່ນເທວະດານ້ອຍແກ້ມແດງທີ່ ແຕ້ມໂດຍທ່ານຣາຟາແອວ ຢູ່ໃນບັດວາເລັນທາຍຂອງເຮົາ. ນີ້ຄືເຫລົ່າທູດຈາກຫລາຍໆສັດຕະວັດ, ເຫລົ່າທູດທີ່ຖືກສົ່ງມາອັດປາກສິງໄວ້,²⁴ ທີ່ໄດ້ເປີດປະຕູຄຸກ,²⁵ ປະກາດການກຳເນີດທີ່ລໍຄອຍດົນນານຂອງພຣະອົງ,²⁶ ປອບໂຍນພຣະອົງຢູ່ທີ່ເຄັດເຊມາເນ,²⁷ ຮັບປະກັນສານຸສິດຂອງພຣະອົງ ຕອນພຣະອົງສະເດັດຂຶ້ນສະຫວັນ,²⁸ ແລະ ຟື້ນຟູພຣະກິດຕິຄຸນທີ່ຮຸ່ງໂລດ.²⁹

ຮູບພາບ

ການສະເດັດມາຄັ້ງທີສອງ

ທ່ານສາມາດວາດພາບເຫັນຕົວເອງຖືກຮັບຂຶ້ນໄປພົບກັບພຣະອົງໄດ້ບໍ, ບໍ່ວ່າຈະຢູ່ຟາກມ່ານເບື້ອງນີ້ ຫລື ຟາກມ່ານເບື້ອງນັ້ນ?³⁰ ນັ້ນຄືຄຳສັນຍາຂອງພຣະອົງຕໍ່ຜູ້ຄົນທີ່ຊອບທຳ. ປະສົບການທີ່ໜ້າອັດສະຈັນນີ້ຈະມີອິດທິພົນຕໍ່ຈິດວິນຍານຂອງເຮົາຕະຫລອດໄປ.

ເຮົາກະຕັນຍູຫລາຍສຳລັບສາດສະດາທີ່ຮັກແພງຂອງເຮົາ, ປະທານຣະໂຊ ເອັມ ແນວສັນ, ຜູ້ທີ່ໄດ້ຊ່ວຍໃຫ້ເຮົາມີຄວາມປາດຖະໜາທີ່ຈະຮັກພຣະຜູ້ຊ່ວຍໃຫ້ລອດ ແລະ ປະກາດຄວາມເປັນພຣະເຈົ້າຂອງພຣະອົງ. ຂ້າພະເຈົ້າເປັນພະຍານເຖິງພຣະຫັດຂອງພຣະຜູ້ເປັນເຈົ້າທີ່ຢູ່ເທິງເພິ່ນ ແລະ ຂອງປະທານແຫ່ງການເປີດເຜີຍທີ່ຊີ້ນຳເພິ່ນ. ປະທານແນວສັນ, ພວກເຮົາພາກັນລໍຖ້າຄຳແນະນຳຂອງທ່ານຢ່າງກະຕືລືລົ້ນ.

ເພື່ອນທີ່ຮັກແພງຂອງຂ້າພະເຈົ້າຕະຫລອດທົ່ວໂລກ, ຂໍໃຫ້ເຮົາຈົ່ງເວົ້າເຖິງພຣະຄຣິດ, ລໍຖ້າຄຳສັນຍາທີ່ຮຸ່ງໂລດຂອງພຣະອົງທີ່ວ່າ, “ທຸກຄົນ … ທີ່ຮັບເຮົາຕໍ່ໜ້າມະນຸດ, ເຮົາກໍຈະຮັບຜູ້ນັ້ນ … ຕໍ່ພຣະພັກພຣະບິດາຂອງເຮົາໃນສະຫວັນເໝືອນກັນ.”³¹ ຂ້າພະເຈົ້າເປັນພະຍານວ່າ ພຣະອົງເປັນພຣະບຸດຂອງພຣະເຈົ້າ. ໃນພຣະນາມຂອງພຣະເຢຊູຄຣິດ, ອາແມນ.