ດຳເນີນໄປໜ້າ

ໂດຍ ປະທານຣະໂຊ ເອັມ ແນວສັນ

ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ

ວຽກງານຂອງພຣະຜູ້ເປັນເຈົ້າຍັງດຳເນີນໄປໜ້າເລື້ອຍໆ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຊ່າງມີ ຄວາມສຸກ ຫລາຍແທ້ໆ ທີ່ໄດ້ມາຮ່ວມກັບທ່ານ ຂະນະທີ່ພວກເຮົາເປີດກອງປະຊຸມໃຫຍ່ສາມັນ ປະຈຳເຄິ່ງປີ ຄັ້ງທີ 190 ຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ຂ້າພະເຈົ້າເຂົ້າຮ່ວມກອງປະຊຸມກັບທ່ານຢູ່ໃນບ້ານເຮືອນ ຫລື ໃນບ່ອນໃດກໍຕາມທີ່ທ່ານຢູ່ ເພື່ອຮັບຟັງຂ່າວສານຂອງບັນດາສາດສະດາ, ຜູ້ພະຍາກອນ, ແລະ ຜູ້ເປີດເຜີຍ ພ້ອມທັງຜູ້ນຳຂອງສາດສະໜາຈັກຄົນອື່ນໆນຳກັນ.

ເຮົາໂຊກດີຫລາຍພຽງໃດ ທີ່ມີເທັກໂນໂລຈີຊ່ວຍເຮົາໃຫ້ເຊື່ອມຕໍ່ເຂົ້າກັນ ໃນການຊຸມນຸມຄັ້ງໃຫຍ່ຂອງສານຸສິດຂອງພຣະເຢຊູຄຣິດທົ່ວໂລກ. ກອງປະຊຸມໃຫຍ່ສາມັນເດືອນເມສາແລ້ວນີ້ ໄດ້ຖືກຮັບຊົມຫລາຍກວ່າທີ່ຜ່ານມາ, ແລະ ພວກເຮົາກໍຫວັງວ່າ ຈະເປັນແນວນັ້ນອີກ.

ໃນລະຫວ່າງສອງສາມເດືອນຜ່ານມານີ້, ການແຜ່ລະບາດທົ່ວໂລກ, ອັກຄີໄພທີ່ລຸກລາມ, ແລະ ໄພທຳມະຊາດອື່ນໆ ໄດ້ເຮັດໃຫ້ໂລກຂອງເຮົາຫຍຸ້ງຍາກສັບສົນຫລາຍຂຶ້ນ. ຂ້າພະເຈົ້າໂສກເສົ້າກັບທ່ານທຸກຄົນທີ່ໄດ້ສູນເສຍຄົນທີ່ຕົນຮັກໄປ ລະຫວ່າງເວລານີ້. ແລະ ຂ້າພະເຈົ້າກໍອະທິຖານເພື່ອທຸກຄົນທີ່ທຸກທໍລະມານໃນເວລານີ້.

ໃນຂະນະດຽວກັນ, ວຽກງານຂອງພຣະຜູ້ເປັນເຈົ້າຍັງດຳເນີນໄປໜ້າເລື້ອຍໆ. ໃນໄລຍະທີ່ຕ້ອງໄດ້ຢູ່ຫ່າງກັນ, ຕ້ອງໃສ່ໜ້າກາກປິດປາກ, ແລະ ຈັດການປະຊຸມທາງວິດີໂອຊູມ, ເຮົາຍັງໄດ້ຮຽນເຮັດບາງສິ່ງທີ່ຫຍຸ້ງຍາກ ແລະ ບາງສິ່ງເຮົາກໍເຮັດໄດ້ດີ. ເວລາທີ່ບໍ່ປົກກະຕິສາມາດນຳລາງວັນທີ່ບໍ່ປົກກະຕິມາໃຫ້.

ຜູ້ສອນສາດສະໜາ ແລະ ຜູ້ນຳເຜີຍແຜ່ຂອງພວກເຮົາ ກໍມີພິກໄຫວ, ທົນທານ, ແລະ ໜ້າອັດສະຈັນໃຈຫລາຍແທ້ໆ. ເຖິງແມ່ນວ່າຜູ້ສອນສາດສະໜາສ່ວນຫລາຍຈຳເປັນຕ້ອງໄດ້ຊອກຫາວິທີໃໝ່ ແລະ ແບບແຜນທີ່ສ້າງສັນເພື່ອເຮັດວຽກງານຂອງຕົນ, ແຕ່ຜູ້ສອນສາດສະໜາຫລາຍຄົນໄດ້ລາຍງານວ່າ ເຂົາເຈົ້າກຳລັງສິດສອນ ຫລາຍກວ່າ ທີ່ຜ່ານມາ.

ພວກເຮົາຕ້ອງໄດ້ປິດພຣະວິຫານຊົ່ວໄລຍະໜຶ່ງ, ແລະ ໂຄງການສ້ອມແປງບາງຢ່າງກໍຢຸດສະງັກຊົ່ວຄາວ, ແຕ່ເວລານີ້ທັງໝົດໄດ້ເລີ່ມຕົ້ນດຳເນີນໄປໜ້າ. ໃນປະຕິທິນຂອງປີ 2020, ພວກເຮົາຄາດວ່າຈະອຸທິດທີ່ດິນສຳລັບພຣະວິຫານໃໝ່ 20 ແຫ່ງ!

ວຽກງານປະຫວັດຄອບຄົວກໍເພີ່ມທະວີຂຶ້ນຢ່າງໄວ. ຫລາຍຫວອດ ແລະ ຫລາຍສະເຕກກໍໄດ້ຖືກຈັດຕັ້ງຂຶ້ນ. ແລະ ພວກເຮົາຍິນດີທີ່ຈະລາຍງານວ່າ ສາດສະໜາຈັກໄດ້ຊ່ວຍເຫລືອເພື່ອນມະນຸດສະທຳໃນຊ່ວງໄລຍະການແຜ່ລະບາດນີ້ 895 ໂຄງການ ໃນ 150 ປະເທດ.

ການສຶກສາພຣະກິດຕິຄຸນທີ່ເພີ່ມຂຶ້ນຢູ່ໃນບ້ານເຮືອນຫລາຍໆແຫ່ງ ຊ່ວຍໃຫ້ມີປະຈັກພະຍານ ແລະ ມີຄວາມສຳພັນໃນຄອບຄົວທີ່ເຂັ້ມແຂງກວ່າເກົ່າ. ແມ່ຄົນໜຶ່ງໄດ້ຂຽນບອກວ່າ: “ພວກເຮົາຮູ້ສຶກໃກ້ຊິດກັບລູກຫລານຫລາຍກວ່າເກົ່າ ເພາະການເຕົ້າໂຮມທາງວິດີໂອຊູມ ທຸກວັນອາທິດ. ແຕ່ລະຄົນໄດ້ປ່ຽນຜຽນກັນໃຫ້ຄວາມຄິດຄວາມເຫັນກ່ຽວກັບປຶ້ມ ຈົ່ງຕາມເຮົາມາ. ການອະທິຖານສຳລັບຄອບຄົວຂອງພວກເຮົາກໍໄດ້ປ່ຽນໄປ ເພາະວ່າພວກເຮົາເຂົ້າໃຈຫລາຍຂຶ້ນເຖິງສິ່ງທີ່ພວກເຮົາຕ້ອງການ.”

ຂ້າພະເຈົ້າອະທິຖານວ່າ ເຮົາທຸກຄົນຈະໃຊ້ເວລາພິເສດນີ້ເພື່ອເຕີບໂຕທາງວິນຍານ. ເຮົາມາຢູ່ໃນໂລກນີ້ເພື່ອຮັບການທົດລອງ, ເພື່ອເບິ່ງຖ້າຫາກວ່າເຮົາຈະເລືອກຕິດຕາມພຣະເຢຊູຄຣິດ, ກັບໃຈເປັນປະຈຳ, ຮຽນຮູ້, ແລະ ກ້າວໜ້າຫລືບໍ່. ວິນຍານຂອງເຮົາຢາກກ້າວໜ້າ. ແລະ ເຮົາເຮັດສິ່ງນັ້ນໄດ້ດີ ໂດຍການຍຶດໝັ້ນຢູ່ໃນເສັ້ນທາງແຫ່ງພັນທະສັນຍາ.

ໃນທຸກສິ່ງຢ່າງນີ້, ພຣະບິດາເທິງສະຫວັນ ແລະ ພຣະບຸດຂອງພຣະອົງ, ພຣະເຢຊູຄຣິດ, ກໍຮັກເຮົາ! ພວກພຣະອົງຫ່ວງໃຍເຮົາ! ພວກພຣະອົງ ແລະ ເຫລົ່າທູດທີ່ບໍລິສຸດຂອງພວກພຣະອົງ ເຝົ້າດູແລເຮົາຢູ່.¹ ຂ້າພະເຈົ້າຮູ້ວ່ານັ້ນເປັນຄວາມຈິງ.

ຂະນະທີ່ເຮົາເຕົ້າໂຮມກັນເພື່ອຮັບຟັງພຣະຄຳຂອງພຣະຜູ້ເປັນເຈົ້າ ທີ່ໄດ້ດົນໃຈຜູ້ຮັບໃຊ້ຂອງພຣະອົງໃຫ້ກ່າວ, ຂ້າພະເຈົ້າເຊື້ອເຊີນທ່ານໃຫ້ໄຕ່ຕອງກ່ຽວກັບຄຳສັນຍາຂອງພຣະຜູ້ເປັນເຈົ້າ. ພຣະອົງໄດ້ປະກາດວ່າ “ຜູ້ໃດກໍຕາມທີ່ ຕັ້ງໃຈຍຶດຖື ພຣະຄຳຂອງພຣະເຈົ້າ, ຊຶ່ງມີຊີວິດ ແລະ ມີພະລັງ, ຈະແຍກເລ່ຫລ່ຽມ … ກົນອຸບາຍຂອງມານອອກໄປ, ແລະ ນຳເອົາ [ສານຸສິດ] ຂອງພຣະຄຣິດໄປໃນທາງຄັບ ແລະ ແຄບ.”²

ຂ້າພະເຈົ້າອະທິຖານວ່າ ທ່ານຈະ ເລືອກ ທີ່ຈະຍຶດຖືພຣະຄຳຂອງພຣະເຈົ້າ ດັ່ງທີ່ຖືກປະກາດໃນລະຫວ່າງກອງປະຊຸມໃຫຍ່ສາມັນນີ້. ແລະ ຂ້າພະເຈົ້າອະທິຖານວ່າ ທ່ານຈະຮູ້ສຶກເຖິງຄວາມຮັກອັນບໍລິບູນຂອງພຣະຜູ້ເປັນເຈົ້າທີ່ມີໃຫ້ທ່ານ,³ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.