ເກັບເງິນທອນໄວ້
ຜ່ານທາງພຣະເຢຊູຄຣິດ, ເຮົາໄດ້ຮັບກຳລັງໃນການປ່ຽນແປງທີ່ຍືນຍົງ. ເມື່ອເຮົາຫັນໄປຫາພຣະອົງຢ່າງຖ່ອມຕົວ, ແລ້ວພຣະອົງຈະເພີ່ມຄວາມສາມາດໃນການປ່ຽນແປງໃຫ້ເຮົາ.
ເອື້ອຍນ້ອງທັງຫລາຍ, ຊ່າງເປັນສິ່ງຊົມຊື່ນຍິນດີຫລາຍ ທີ່ໄດ້ມາຮ່ວມກັບທ່ານ.
ລອງຈິນຕະນາການວ່າ ມີຄົນໜຶ່ງໄປຕະຫລາດ ແລະ ຊື້ບາງຢ່າງລາຄາ $.75 ເຊັນ. ຖ້າຫາກລາວເອົາເງິນໃຫ້ຜູ້ຂາຍຫລາຍກວ່າລາຄາຂອງສິນຄ້າ, ແລ້ວຜູ້ຂາຍຈະທອນເງິນໃຫ້ລາວ.
ກະສັດເບັນຢາມິນໄດ້ສິດສອນຜູ້ຄົນຂອງເພິ່ນໃນອາເມຣິກາສະໄໝບູຮານ ກ່ຽວກັບພອນທີ່ລົ້ນເຫລືອ ທີ່ເຮົາໄດ້ຮັບຈາກພຣະຜູ້ຊ່ວຍໃຫ້ລອດ, ພຣະເຢຊູຄຣິດ. ພຣະອົງໄດ້ສ້າງຟ້າສະຫວັນ, ແຜ່ນດິນໂລກ, ແລະ ຄວາມງົດງາມທັງໝົດທີ່ເຮົາເຊີຍຊົມ.1 ຜ່ານທາງການຊົດໃຊ້ອັນເປັນທີ່ຮັກຂອງພຣະອົງ, ພຣະອົງໄດ້ຈັດກຽມວິທີເພື່ອໃຫ້ເຮົາໄດ້ຮັບການໄຖ່ຈາກບາບ ແລະ ຄວາມຕາຍ.2 ເມື່ອເຮົາສະແດງຄວາມຮູ້ບຸນຄຸນຂອງເຮົາຕໍ່ພຣະອົງ ໂດຍການດໍາລົງຊີວິດຕາມພຣະບັນຍັດຂອງພຣະອົງຢ່າງພາກພຽນ, ພຣະອົງຈະອວຍພອນເຮົາໂດຍທັນທີ, ໂດຍທີ່ເຮົາຈະເປັນໜີ້ພຣະອົງຢູ່ສະເໝີ.
ພຣະອົງປະທານໃຫ້ເຮົາຫລາຍ, ຫລາຍຍິ່ງກວ່າຄຸນຄ່າຂອງສິ່ງທີ່ເຮົາສາມາດແທນຄືນພຣະອົງໄດ້. ສະນັ້ນ, ເຮົາສາມາດໃຫ້ຫຍັງແກ່ພຣະອົງ, ຜູ້ທີ່ໄດ້ຈ່າຍລາຄາທີ່ເກີນກວ່າຈະຄິດໄລ່ໄດ້ ເພື່ອບາບຂອງເຮົາ? ເຮົາສາມາດໃຫ້ ເງິນທອນ ແກ່ພຣະອົງໄດ້. ເຮົາສາມາດໃຫ້ ການປ່ຽນແປງ ຂອງເຮົາແກ່ພຣະອົງໄດ້. ອາດເປັນການປ່ຽນແປງຄວາມຄິດ, ການປ່ຽນແປງນິໄສ, ຫລື ການປ່ຽນແປງທິດທາງທີ່ເຮົາມຸ້ງໜ້າໄປ. ໃນການຕອບແທນສຳລັບການໃຊ້ໜີ້ອັນລົ້ນຄ່າໃຫ້ເຮົາແຕ່ລະຄົນ, ພຣະຜູ້ເປັນເຈົ້າໄດ້ຂໍໃຫ້ເຮົາປ່ຽນໃຈ. ການປ່ຽນແປງທີ່ພຣະອົງຮຽກຮ້ອງຈາກເຮົາ ບໍ່ແມ່ນເພື່ອຜົນປະໂຫຍດຂອງພຣະອົງ, ແຕ່ສຳລັບເຮົາ. ສະນັ້ນ, ບໍ່ຄືກັນກັບຜູ້ຊື້ສິ່ງຂອງຢູ່ຕະຫລາດ ທີ່ຈະຮັບເອົາເງິນທອນຄືນ, ແຕ່ພຣະຜູ້ຊ່ວຍໃຫ້ລອດທີ່ເມດຕາກະລຸນາ ຈະບອກເຮົາ, ໃຫ້ເກັບເງິນທອນໄວ້.
ຫລັງຈາກທີ່ໄດ້ຍິນຖ້ອຍຄໍາທີ່ກ່າວໂດຍກະສັດເບັນຢາມິນ, ຜູ້ຄົນຂອງເພິ່ນໄດ້ຮ້ອງຂຶ້ນວ່າ, “ເພາະພຣະວິນຍານຂອງພຣະຜູ້ເປັນເຈົ້າອົງຊົງລິດອໍານາດຍິ່ງໃຫຍ່ ໄດ້ກະທໍາໃຫ້ມີການປ່ຽນແປງອັນໃຫຍ່ຫລວງໃນພວກເຮົາ, … ພວກເຮົາບໍ່ມີໃຈທີ່ຈະກະທໍາຄວາມຊົ່ວອີກຕໍ່ໄປ, ແຕ່ປາດຖະໜາຈະເຮັດແຕ່ຄວາມດີໂດຍຕະຫລອດ.”3 ພຣະຄໍາພີບໍ່ໄດ້ກ່າວວ່າ ພວກເຂົາກາຍເປັນຄົນດີພ້ອມໂດຍທັນທີ; ແຕ່, ຄວາມປາດຖະໜາທີ່ຈະປ່ຽນແປງບັງຄັບໃຫ້ພວກເຂົາລົງມືເຮັດ. ການປ່ຽນແປງຈິດໃຈຂອງພວກເຂົາ ໝາຍເຖິງການປະຖິ້ມຄວາມເປັນມະນຸດຊາຍ ຫລື ຍິງທີ່ມີຈິດໃຈທຳມະດາ ແລະ ຍອມຕໍ່ພຣະວິນຍານ ຂະນະທີ່ພະຍາຍາມກາຍເປັນເໝືອນດັ່ງພຣະເຢຊູຄຣິດຫລາຍຂຶ້ນ.
ປະທານເຮັນຣີ ບີ ໄອຣິງ ສິດສອນວ່າ: “ການປ່ຽນໃຈເຫລື້ອມໃສທີ່ແທ້ຈິງ ແມ່ນຂຶ້ນຢູ່ກັບການສະແຫວງຫາຢ່າງເປັນອິດສະລະໃນສັດທາ, ດ້ວຍຄວາມພະຍາຍາມອັນໃຫຍ່ຫລວງ ແລະ ຄວາມເຈັບປວດ. ຫລັງຈາກນັ້ນ ແມ່ນພຣະຜູ້ເປັນເຈົ້າເປັນຜູ້ປະທານ … ອັດສະຈັນຂອງການຊໍາລະລ້າງ ແລະ ການປ່ຽນແປງ.”4 ໂດຍການລວມຄວາມພະຍາຍາມຂອງເຮົາເຂົ້າກັບຄວາມສາມາດຂອງພຣະຜູ້ຊ່ວຍໃຫ້ລອດໃນການປ່ຽນແປງເຮົາ, ເຮົາສາມາດກາຍເປັນສິ່ງມີຊີວິດໃໝ່ໄດ້.
ຕອນທີ່ຂ້າພະເຈົ້າຍັງນ້ອຍ, ຂ້າພະເຈົ້າໄດ້ນຶກພາບຕົວເອງກຳລັງຍ່າງຂຶ້ນໄປຕາມທາງຕັ້ງ ສູ່ເປົ້າໝາຍແຫ່ງຊີວິດນິລັນດອນ. ແຕ່ລະເທື່ອທີ່ຂ້າພະເຈົ້າເຮັດ ຫລື ເວົ້າບາງຢ່າງຜິດໄປ, ຂ້າພະເຈົ້າຮູ້ວ່າຕົວເອງກໍາລັງເລື່ອນລົງຈາກທາງ, ແລ້ວຕ້ອງໄດ້ເລີ່ມຕົ້ນການເດີນທາງຂອງຂ້າພະເຈົ້າໃໝ່ອີກຄັ້ງ. ມັນເປັນຄືກັນກັບເກມກະດານປີນຂຶ້ນຂັ້ນໄດຂອງເດັກນ້ອຍ ທີ່ເລື່ອນທ່ານຈາກຫົວຂັ້ນໄດລົງເຖິງຕີນຂັ້ນໄດ! ມັນໜ້າທໍ້ໃຈຫລາຍ! ແຕ່ເມື່ອຂ້າພະເຈົ້າເລີ່ມເຂົ້າໃຈຄໍາສອນຂອງພຣະຄຣິດ5 ແລະ ວິທີໃຊ້ຄໍາສອນໃນຊີວິດປະຈໍາວັນຂອງຂ້າພະເຈົ້າ, ຂ້າພະເຈົ້າໄດ້ພົບຄວາມຫວັງ.
ພຣະເຢຊູຄຣິດໄດ້ປະທານແບບແຜນອັນຕໍ່ເນື່ອງສໍາລັບການປ່ຽນແປງໃຫ້ເຮົາ. ພຣະອົງເຊື້ອເຊີນເຮົາໃຫ້ໃຊ້ສັດທາໃນພຣະອົງ, ຊຶ່ງດົນໃຈເຮົາໃຫ້ກັບໃຈ—“ຊຶ່ງສັດທາ ແລະ ການກັບໃຈນັ້ນໄດ້ນໍາການປ່ຽນແປງມາສູ່ໃຈ.”6 ເມື່ອເຮົາກັບໃຈ ແລະ ຫັນຫົວໃຈມາຫາພຣະອົງ, ເຮົາຈະມີຄວາມປາດຖະໜາທີ່ຈະເຮັດ ແລະ ດຳລົງຊີວິດຕາມພັນທະສັນຍາທີ່ສັກສິດຫລາຍຂຶ້ນ. ເຮົາອົດທົນຈົນເຖິງທີ່ສຸດ ໂດຍການສືບຕໍ່ນຳໃຊ້ຫລັກທຳເຫລົ່ານີ້ ຕະຫລອດຊີວິດຂອງເຮົາ ແລະ ໂດຍການເຊື້ອເຊີນພຣະຜູ້ເປັນເຈົ້າໃຫ້ປ່ຽນແປງເຮົາ. ການອົດທົນຈົນເຖິງທີ່ສຸດໝາຍເຖິງ ການປ່ຽນແປງ ຈົນເຖິງທີ່ສຸດ. ບັດນີ້, ຂ້າພະເຈົ້າເຂົ້າໃຈແລ້ວວ່າ ຂ້າພະເຈົ້າບໍ່ໄດ້ເລີ່ມຕົ້ນໃໝ່ກັບຄວາມພະຍາຍາມທີ່ລົ້ມເຫລວແຕ່ລະຄັ້ງ, ແຕ່ໃນຄວາມພະຍາຍາມແຕ່ລະຄັ້ງ, ຂ້າພະເຈົ້າກຳລັງສືບຕໍ່ໃນຂະບວນການປ່ຽນແປງຂອງຂ້າພະເຈົ້າ.
ມີວະລີຂໍ້ໜຶ່ງທີ່ໃຫ້ການດົນໃຈ ໃນຄຳຂວັນຂອງກຸ່ມຍິງໜຸ່ມ ທີ່ກ່າວວ່າ, “ເຮົາຈະທະນຸຖະໜອມຂອງປະທານແຫ່ງການກັບໃຈ ແລະ ສະແຫວງຫາທີ່ຈະພັດທະນາຕົວເອງໃນແຕ່ລະວັນ.”7 ຂ້າພະເຈົ້າອະທິຖານວ່າ ເຮົາຈະທະນຸຖະໜອມຂອງປະທານອັນງົດງາມນີ້ ແລະ ຕັ້ງໃຈທີ່ຈະສະແຫວງຫາການປ່ຽນແປງ. ບາງເທື່ອການປ່ຽນແປງທີ່ເຮົາຕ້ອງເຮັດ ກ່ຽວຂ້ອງກັບການບາບທີ່ຮ້າຍແຮງ. ແຕ່ສ່ວນຫລາຍ, ເຮົາພະຍາຍາມທີ່ຈະຂັດເກົາອຸປະນິໄສຂອງເຮົາ ໃຫ້ສອດຄ່ອງກັບຄຸນລັກສະນະຂອງພຣະເຢຊູຄຣິດ. ການຕັດສິນໃຈໃນແຕ່ລະວັນຂອງເຮົາອາດຈະຊ່ວຍ ຫລື ຂັດຂວາງຄວາມກ້າວໜ້າຂອງເຮົາ. ການປ່ຽນແປງເລັກນ້ອຍ ແຕ່ຕັ້ງໃຈແນ່ວແນ່ ຈະຊ່ວຍໃຫ້ເຮົາພັດທະນາຕົວເອງ. ຢ່າໄດ້ທໍ້ໃຈເລີຍ. ການປ່ຽນແປງເປັນຂະບວນການຕະຫລອດຊີວິດ. ຂ້າພະເຈົ້າຂອບຄຸນທີ່ໃນການດີ້ນລົນທີ່ຈະປ່ຽນຂອງເຮົາ, ພຣະຜູ້ເປັນເຈົ້າຈະອົດທົນກັບເຮົາ.
ຜ່ານທາງພຣະເຢຊູຄຣິດ, ເຮົາໄດ້ຮັບກຳລັງໃນການປ່ຽນແປງທີ່ຍືນຍົງ. ເມື່ອເຮົາຫັນໄປຫາພຣະອົງຢ່າງຖ່ອມຕົວ, ແລ້ວພຣະອົງຈະເພີ່ມຄວາມສາມາດໃນການປ່ຽນແປງໃຫ້ເຮົາ.
ນອກເໜືອຈາກອໍານາດແຫ່ງການປ່ຽນແປງຂອງການຊົດໃຊ້ຂອງພຣະຜູ້ຊ່ວຍໃຫ້ລອດຂອງເຮົາແລ້ວ, ພຣະວິນຍານບໍລິສຸດຈະສະໜັບສະໜູນ ແລະ ນໍາພາເຮົາເມື່ອເຮົາພະຍາຍາມ. ພຣະອົງຍັງສາມາດຊ່ວຍໃຫ້ເຮົາຮູ້ວ່າ ເຮົາຄວນປ່ຽນຫຍັງແດ່. ເຮົາຍັງສາມາດຊອກຄວາມຊ່ວຍເຫລືອ ແລະ ກໍາລັງໃຈຜ່ານທາງພອນຂອງຖານະປະໂລຫິດ, ການອະທິຖານ, ການຖືສິນອົດເຂົ້າ, ແລະ ການໄປພຣະວິຫານນຳອີກ.
ເຊັ່ນດຽວກັນ, ສະມາຊິກໃນຄອບຄົວ, ຜູ້ນໍາ, ແລະ ໝູ່ເພື່ອນທີ່ເຮົາໄວ້ວາງໃຈ ກໍສາມາດຊ່ວຍເຮົາໃນຄວາມພະຍາຍາມຂອງເຮົາທີ່ຈະປ່ຽນ. ຕອນທີ່ຂ້າພະເຈົ້າອາຍຸແປດປີ, ອ້າຍຂອງຂ້າພະເຈົ້າຊື່, ລີ, ແລະ ຂ້າພະເຈົ້າ ໄດ້ໃຊ້ເວລາກັບໝູ່ຂອງພວກເຮົາ ຫລິ້ນຢູ່ກິ່ງງ່າຕົ້ນໄມ້ຂອງເພື່ອນບ້ານ. ພວກເຮົາມັກຫລິ້ນຢູ່ກັບໝູ່ຂອງພວກເຮົາ ໃນຮົ່ມຂອງຕົ້ນໄມ້ຕົ້ນນັ້ນ. ມີມື້ໜຶ່ງ, ອ້າຍລີໄດ້ຕົກລົງຈາກຕົ້ນໄມ້ນັ້ນ ແລະ ແຂນຫັກ. ການທີ່ແຂນຫັກ ເຮັດໃຫ້ເປັນການຍາກສໍາລັບລາວທີ່ຈະປີນຕົ້ນໄມ້ດ້ວຍຕົວລາວເອງ. ແຕ່ຊີວິດຢູ່ຕົ້ນໄມ້ບໍ່ຄືເກົ່າ ໂດຍທີ່ບໍ່ມີລາວຢູ່ຫັ້ນ. ດັ່ງນັ້ນ, ບາງຄົນໃນພວກເຮົາຈຶ່ງຊຸກລາວຂຶ້ນຈາກດ້ານຫລັງ ໃນຂະນະທີ່ຄົນອື່ນໆດຶງແຂນດີຂອງລາວຂຶ້ນ, ແລະ ໂດຍທີ່ບໍ່ຕ້ອງອອກແຮງຫລາຍ, ອ້າຍລີກໍກັບຂຶ້ນໄປເທິງຕົ້ນໄມ້ອີກຄັ້ງ. ແຂນຂອງລາວຍັງບໍ່ດີເທື່ອ, ແຕ່ລາວກໍຢູ່ກັບພວກເຮົາຢູ່ຄືເກົ່າ ໂດຍທີ່ມ່ວນຊື່ນໄປກັບມິດຕະພາບຂອງພວກເຮົາ ໃນຂະນະທີ່ລາວເລີ່ມຫາຍດີ.
ຂ້າພະເຈົ້າມັກຈະຄິດວ່າ ປະສົບການຂອງຂ້າພະເຈົ້າໃນການຫລິ້ນຢູ່ຕົ້ນໄມ້ ເປັນກິດຈະກໍາປະເພດໜຶ່ງໃນພຣະກິດຕິຄຸນຂອງພຣະເຢຊູຄຣິດ. ໃນຮົ່ມຂອງກິ່ງງ່າແຫ່ງພຣະກິດຕິຄຸນ, ເຮົາຊື່ນຊົມກັບພອນທັງຫລາຍທີ່ກ່ຽວຂ້ອງກັບພັນທະສັນຍາຂອງເຮົາ. ບາງຄົນອາດຕົກລົງຈາກຄວາມປອດໄພແຫ່ງພັນທະສັນຍາຂອງເຂົາເຈົ້າ ແລະ ຕ້ອງການຄວາມຊ່ວຍເຫລືອຈາກເຮົາທີ່ຈະປີນກັບຄືນສູ່ຄວາມປອດໄພແຫ່ງກິ່ງງ່າພຣະກິດຕິຄຸນອີກ. ອາດເປັນການຍາກສໍາລັບເຂົາເຈົ້າທີ່ຈະກັບຄືນມາດ້ວຍຕົວເອງ. ເຮົາສາມາດຄ່ອຍໆດຶງບ່ອນນີ້ໜ້ອຍໜຶ່ງ ແລະ ຍົກບ່ອນນັ້ນຂຶ້ນເລັກນ້ອຍ ເພື່ອຊ່ວຍເຂົາເຈົ້າໃຫ້ຫາຍດີ ໃນຂະນະທີ່ເຂົາເຈົ້າກຳລັງຊື່ນຊົມໃນມິດຕະພາບຂອງເຮົາໄດ້ບໍ່?
ຖ້າທ່ານກໍາລັງທົນທຸກກັບບາດແຜຈາກການຕົກ, ກະລຸນາໃຫ້ຄົນອື່ນຊ່ວຍທ່ານກັບຄືນມາສູ່ພັນທະສັນຍາຂອງທ່ານ ແລະ ຮັບພອນທີ່ເຂົາເຈົ້າມອບໃຫ້. ພຣະຜູ້ຊ່ວຍໃຫ້ລອດສາມາດປິ່ນປົວ ແລະ ປ່ຽນແປງທ່ານໄດ້, ໃນຂະນະທີ່ຖືກອ້ອມຮອບໄປດ້ວຍຄົນທີ່ຮັກທ່ານ.
ບາງເທື່ອຂ້າພະເຈົ້າຈະເຈິກັບໝູ່ທີ່ບໍ່ໄດ້ພົບກັນເປັນເວລາຫລາຍປີ. ບາງເທື່ອເຂົາເຈົ້າກໍເວົ້າວ່າ, “ໂຕຍັງບໍ່ປ່ຽນເນາະ!” ແຕ່ລະເທື່ອທີ່ຂ້າພະເຈົ້າໄດ້ຍິນແນວນັ້ນ, ຂ້າພະເຈົ້າເຂີນໜ້ອຍໜຶ່ງ, ເພາະຂ້າພະເຈົ້າຫວັງວ່າ ຂ້າພະເຈົ້າໄດ້ປ່ຽນແປງ ໃນຊ່ວງເວລາຫລາຍປີທີ່ຜ່ານມາ. ຂ້າພະເຈົ້າຫວັງວ່າ ແຕ່ມື້ວານມານີ້ກໍໄດ້ປ່ຽນແປງໜ້ອຍໜຶ່ງ! ຂ້າພະເຈົ້າຫວັງວ່າ ຂ້າພະເຈົ້າຈະໃຈດີກວ່າເກົ່າໜ້ອຍໜຶ່ງ, ວິຈານໜ້ອຍລົງ, ແລະ ມີຄວາມເຫັນອົກເຫັນໃຈຫລາຍຂຶ້ນ. ຂ້າພະເຈົ້າຫວັງວ່າ ຂ້າພະເຈົ້າຈະຕອບສະໜອງຕໍ່ຄວາມຕ້ອງການຂອງຄົນອື່ນໄວຂຶ້ນ, ແລະ ຫວັງວ່າຂ້າພະເຈົ້າຈະມີຄວາມອົດທົນຫລາຍຂຶ້ນໜ້ອຍໜຶ່ງ.
ຂ້າພະເຈົ້າມັກປີນເຂົາຢູ່ພູໃກ້ບ້ານຂອງຂ້າພະເຈົ້າ. ຫລາຍເທື່ອ, ຈະມີຫີນນ້ອຍໆຢູ່ໃນເກີບຂອງຂ້າພະເຈົ້າ ໃນຂະນະທີ່ຂ້າພະເຈົ້າຍ່າງໄປຕາມທາງ. ໃນທີ່ສຸດ, ຂ້າພະເຈົ້າກໍຢຸດ ແລະ ຖົກມັນອອກຈາກເກີບຂອງຂ້າພະເຈົ້າ. ແຕ່ຊ່າງໜ້າປະຫລາດໃຈຫລາຍ ທີ່ຂ້າພະເຈົ້າປ່ອຍໃຫ້ຕົວເອງຍ່າງຂຶ້ນພູດ້ວຍຄວາມເຈັບປວດ ກ່ອນທີ່ຂ້າພະເຈົ້າຈະຢຸດ ແລະ ກໍາຈັດສິ່ງທີ່ລະຄາຍເຄືອງອອກໄປ.
ໃນຂະນະທີ່ເຮົາເດີນທາງໄປຕາມເສັ້ນທາງແຫ່ງພັນທະສັນຍາ, ບາງເທື່ອເຮົາກໍມີຫີນຢູ່ໃນເກີບຂອງເຮົາ ຢູ່ໃນຮູບແບບຂອງນິໄສທີ່ບໍ່ດີ, ບາບ, ຫລື ທ່າທີທີ່ບໍ່ດີ. ຍິ່ງເຮົາຖົກມັນອອກຈາກຊີວິດຂອງເຮົາໄວເທົ່າໃດ, ການເດີນທາງໃນຊ່ວງມະຕະຂອງເຮົາກໍຍິ່ງມີຄວາມສຸກຫລາຍຂຶ້ນເທົ່ານັ້ນ.
ການຮັກສາການປ່ຽນແປງຕ້ອງໃຊ້ຄວາມພະຍາຍາມ. ຂ້າພະເຈົ້າບໍ່ສາມາດຈິນຕະນາການເຖິງການຢຸດລະຫວ່າງທາງ ພຽງເພື່ອເກັບເອົາຫີນທີ່ໜ້າລໍາຄານ ແລະ ເຈັບປວດທີ່ຂ້າພະເຈົ້າຫາກໍເອົາອອກ ມາໃສ່ໃນເກີບອີກ. ຂ້າພະເຈົ້າບໍ່ຢາກເຮັດແບບນັ້ນອີກ ເຊັ່ນກັນກັບແມງກະເບື້ອທີ່ງົດງາມທີ່ເລືອກບໍ່ກັບຄືນສູ່ຮັງໄໝຂອງມັນ.
ຂ້າພະເຈົ້າເປັນພະຍານວ່າ ຍ້ອນພຣະເຢຊູຄຣິດ, ເຮົາຈຶ່ງ ສາມາດ ປ່ຽນແປງໄດ້. ເຮົາສາມາດປັບນິໄສຂອງເຮົາ, ປັບປ່ຽນຄວາມຄິດຂອງເຮົາ, ແລະ ຂັດເກົາອຸປະນິໄສຂອງເຮົາ ເພື່ອໃຫ້ກາຍເປັນເໝືອນດັ່ງພຣະອົງຫລາຍຂຶ້ນ. ແລະ ດ້ວຍຄວາມຊ່ວຍເຫລືອຈາກພຣະອົງ, ເຮົາຈຶ່ງສາມາດ ເກັບເງິນທອນໄວ້. ໃນພຣະນາມຂອງພຣະເຢຊູຄຣິດ, ອາແມນ.