ອໍານາດທີ່ຍືນຍົງ

ໂດຍ ແອວເດີ ແຄວລີ ອາ ຈອນສັນ

ແຫ່ງສາວົກເຈັດສິບ

ພຽງແຕ່ສັດທາ ແລະ ພຣະຄໍາຂອງພຣະເຈົ້າທີ່ເຕີມເຕັມຈິດວິນຍານພາຍໃນຂອງເຮົາ ທີ່ພຽງພໍທີ່ຈະຄໍ້າຈູນເຮົາ—ແລະ ເພື່ອໃຫ້ເຮົາເຂົ້າເຖິງອໍານາດຂອງພຣະອົງໄດ້.

ໃນລະຫວ່າງການທົບທວນຄໍາສອນຂອງສາດສະດາທີ່ຮັກແພງຂອງພວກເຮົາ, ປະທານຣະໂຊ ເອັມ ແນວສັນ, ຂ້າພະເຈົ້າໄດ້ພົບຄໍາທີ່ເພິ່ນໃຊ້ຢູ່ເລື້ອຍໆໃນຄໍາປາໄສຫລາຍເທື່ອຂອງເພິ່ນ. ຄໍານີ້ແມ່ນ ອໍານາດ.

ໃນກອງປະຊຸມໃຫຍ່ສາມັນຄັ້ງທໍາອິດ ຫລັງຈາກທີ່ເພິ່ນໄດ້ຖືກສະໜັບສະໜູນໃຫ້ເປັນອັກຄະສາວົກ, ປະທານແນວສັນໄດ້ກ່າວປາໄສກ່ຽວກັບອໍານາດ.¹ ເພິ່ນໄດ້ສືບຕໍ່ສິດສອນກ່ຽວກັບອໍານາດມາເປັນເວລາຫລາຍປີ. ນັບຕັ້ງແຕ່ພວກເຮົາໄດ້ສະໜັບສະໜູນປະທານແນວສັນໃຫ້ເປັນສາດສະດາຂອງພວກເຮົາ, ເພິ່ນໄດ້ສອນກ່ຽວກັບຫລັກທໍາຂອງອໍານາດ—ໂດຍສະເພາະ, ອໍານາດຂອງພຣະເຈົ້າ—ແລະ ວິທີທີ່ພວກເຮົາສາມາດເຂົ້າເຖິງໄດ້. ເພິ່ນໄດ້ສອນວ່າ ເຮົາຈະສາມາດໃຊ້ອໍານາດຂອງພຣະເຈົ້າ ໃນຂະນະທີ່ປະຕິບັດສາດສະໜາກິດຕໍ່ຄົນອື່ນໄດ້ແນວໃດ,² ວ່າການກັບໃຈຈະເຊື້ອເຊີນໃຫ້ອໍານາດຂອງພຣະເຢຊູຄຣິດ ແລະ ການຊົດໃຊ້ຂອງພຣະອົງເຂົ້າມາໃນຊີວິດຂອງເຮົາໄດ້ແນວໃດ,³ ແລະ ຖານະປະໂລຫິດ—ອໍານາດ ແລະ ສິດອໍານາດຂອງພຣະເຈົ້າ—ຈະເປັນພອນໃຫ້ແກ່ຜູ້ທີ່ເຮັດ ແລະ ຮັກສາພັນທະສັນຍາກັບພຣະອົງໄດ້ແນວໃດ.⁴ ປະທານແນວສັນໄດ້ເປັນປະຈັກພະຍານວ່າ ອໍານາດຂອງພຣະເຈົ້າຫລັ່ງໄຫລມາສູ່ທຸກຄົນທີ່ໄດ້ຮັບຂອງປະທານສັກສິດໃນພຣະວິຫານ ເມື່ອເຂົາເຈົ້າຮັກສາພັນທະສັນຍາຂອງເຂົາເຈົ້າ.⁵

ຂ້າພະເຈົ້າໄດ້ຮັບການກະຕຸ້ນເປັນພິເສດຈາກການທ້າທາຍທີ່ປະທານແນວສັນໄດ້ມອບໃຫ້ ໃນກອງປະຊຸມໃຫຍ່ສາມັນ ເດືອນເມສາ ປີ 2020 ນີ້. ເພິ່ນໄດ້ແນະນໍາເຮົາໃຫ້ “ສຶກສາ ແລະ ອະທິຖານ ເພື່ອຮຽນຮູ້ກ່ຽວກັບອໍານາດ ແລະ ຄວາມຮູ້ທີ່ທ່ານໄດ້ຮັບແລ້ວ—ຫລື ທີ່ທ່ານຈະໄດ້ຮັບ.”⁶

ເພື່ອຕອບສະໜອງຕໍ່ການທ້າທາຍນີ້, ຂ້າພະເຈົ້າໄດ້ສຶກສາ ແລະ ອະທິຖານ ແລະ ໄດ້ຮຽນຮູ້ສິ່ງທີ່ມີປະໂຫຍດຫລາຍຢ່າງກ່ຽວກັບອໍານາດ ແລະ ຄວາມຮູ້ທີ່ຂ້າພະເຈົ້າໄດ້ຮັບແລ້ວ—ຫລື ທີ່ຂ້າພະເຈົ້າຈະໄດ້ຮັບ.

ການເຂົ້າໃຈວ່າເຮົາຕ້ອງເຮັດຫຍັງ ກ່ອນຈະເຂົ້າເຖິງອໍານາດຂອງພຣະເຈົ້າໃນຊີວິດຂອງເຮົານັ້ນ ບໍ່ແມ່ນເລື່ອງງ່າຍ, ແຕ່ຂ້າພະເຈົ້າໄດ້ພົບວ່າເຮົາສາມາດເຮັດໄດ້ ໂດຍການສຶກສາໃນຈິດໃຈຂອງເຮົາ ແລະ ອະທິຖານເພື່ອໃຫ້ພຣະວິນຍານບໍລິສຸດຊີ້ນໍາເຮົາ.⁷ ແອວເດີ ຣິເຈີດ ຈີ ສະກາດ ໄດ້ໃຫ້ນິຍາມທີ່ຊັດເຈນວ່າ ອໍານາດຂອງພຣະເຈົ້າແມ່ນຫຍັງ: ແມ່ນ “ອໍານາດໃນການເຮັດໃຫ້ໄດ້ຫລາຍກວ່າທີ່ເຮົາສາມາດເຮັດໄດ້ດ້ວຍຕົວເຮົາເອງ.”⁸

ການທີ່ເຕີມເຕັມຈິດໃຈ ແລະ ແມ່ນແຕ່ຈິດວິນຍານຂອງເຮົາດ້ວຍພຣະຄໍາຂອງພຣະເຈົ້າ ແລະ ພື້ນຖານຂອງສັດທາໃນພຣະເຢຊູຄຣິດ ແມ່ນສໍາຄັນຕໍ່ການໃຊ້ອໍານາດຂອງພຣະເຈົ້າ ເພື່ອຊ່ວຍເຮົາໃນຊ່ວງເວລາອັນທ້າທ້າຍນີ້. ໂດຍປາດສະຈາກການຮັບເອົາພຣະຄໍາຂອງພຣະເຈົ້າ ແລະ ສັດທາໃນພຣະເຢຊູຄຣິດເຂົ້າເລິກສູ່ຈິດໃຈຂອງເຮົາ, ປະຈັກພະຍານ ແລະ ສັດທາຂອງເຮົາອາດລົ້ມເຫລວໄດ້, ແລະ ເຮົາອາດສູນເສຍການເຂົ້າເຖິງອໍານາດທີ່ພຣະເຈົ້າຢາກປະທານໃຫ້ເຮົາ. ສັດທາພຽງຜິວເຜີນນັ້ນ ແມ່ນບໍ່ພຽງພໍ. ພຽງແຕ່ສັດທາ ແລະ ພຣະຄໍາຂອງພຣະເຈົ້າທີ່ເຕີມເຕັມຈິດວິນຍານພາຍໃນຂອງເຮົາ ທີ່ພຽງພໍທີ່ຈະຄໍ້າຈູນເຮົາ—ແລະ ເພື່ອໃຫ້ເຮົາເຂົ້າເຖິງອໍານາດຂອງພຣະອົງໄດ້.

ໃນຂະນະທີ່ ຊິດສະເຕີ ຈອນສັນ ແລະ ຂ້າພະເຈົ້າກຳລັງລ້ຽງລູກຂອງພວກເຮົາຢູ່ນັ້ນ, ພວກເຮົາໄດ້ຊຸກຍູ້ໃຫ້ພວກເຂົາແຕ່ລະຄົນຮຽນຫລິ້ນເຄື່ອງດົນຕີ. ແຕ່ພວກເຮົາຈະອະນຸຍາດໃຫ້ລູກຂອງພວກເຮົາຮຽນດົນຕີ ກໍຕໍ່ເມື່ອພວກເຂົາເຮັດໜ້າທີ່ຂອງຕົນ ແລະ ຝຶກຊ້ອມເຄື່ອງດົນຕີຂອງພວກເຂົາແຕ່ລະມື້. ວັນເສົາມື້ໜຶ່ງ, ນາງເຈລີນ ລູກສາວຂອງພວກເຮົາຕື່ນເຕັ້ນທີ່ຈະໄດ້ໄປຫລິ້ນກັບໝູ່ຂອງລາວ, ແຕ່ລາວຍັງບໍ່ໄດ້ຊ້ອມປີອາໂນເທື່ອ. ເມື່ອຮູ້ວ່າ ລາວຕ້ອງຕັ້ງໃຈຝຶກຊ້ອມເປັນເວລາ 30 ນາທີ, ລາວກໍຕັ້ງໃຈທີ່ຈະຈັບເວລາ ເພາະລາວບໍ່ຢາກຊ້ອມກາຍເວລາທີ່ຖືກກໍານົດໄວ້ແມ່ນແຕ່ນາທີດຽວ.

ໃນຂະນະທີ່ລາວໄດ້ຍ່າງກາຍເຕົາໄມໂຄເວບລະຫວ່າງທາງໄປຫາປີອາໂນນັ້ນ, ລາວໄດ້ຢຸດ ແລະ ກົດປຸ່ມ. ແຕ່ແທນທີ່ຈະຕັ້ງໂມງ, ລາວພັດກົດເວລາອຸ່ນອາຫານຢູ່ເຕົາໄມໂຄເວບ 30 ນາທີ ແລະ ກົດເລີ່ມຕົ້ນ. ຫລັງຈາກທີ່ຊ້ອມເປັນເວລາ 20 ນາທີ, ລາວໄດ້ຍ່າງກັບໄປທີ່ເຮືອນຄົວ ເພື່ອກວດເບິ່ງວ່າຍັງເຫລືອເວລາເທົ່າໃດ ແລະ ພົບວ່າເຕົາໄມໂຄເວັບຖືກໄຟໄໝ້.

ແລ້ວລາວກໍແລ່ນໄປເດີ່ນຫລັງບ້ານບ່ອນທີ່ຂ້າພະເຈົ້າກຳລັງເຮັດວຽກສວນຢູ່, ແລະ ຮ້ອງວ່າໄຟໄໝ້ເຮືອນ. ຂ້າພະເຈົ້າແລ່ນເຂົ້າໄປໃນເຮືອນ, ແລະ ແນ່ນອນ, ຂ້າພະເຈົ້າເຫັນເຕົາໄມໂຄເວບຢູ່ໃນແປວໄຟ.

ໃນຄວາມພະຍາຍາມທີ່ຈະຊ່ວຍບໍ່ໃຫ້ບ້ານຂອງພວກເຮົາຖືກໄຟໄໝ້ນັ້ນ, ຂ້າພະເຈົ້າໄດ້ເອື້ອມມືໄປທາງຫລັງເຕົາໄມໂຄເວບ, ດຶງປັກອອກ, ແລະ ໃຊ້ສາຍໄຟຍົກໄມໂຄເວບທີ່ກໍາລັງໄໝ້ຢູ່ ອອກຈາກເຄົາເຕີ້. ໂດຍຫວັງວ່າຈະເປັນວິລະບູລຸດ ແລະ ຊ່ວຍກອບກູ້ມື້ນັ້ນ ພ້ອມທັງບ້ານຂອງພວກເຮົາ, ຂ້າພະເຈົ້າແກວ່ງໄມໂຄເວບທີ່ກຳລັງລຸກເປັນໄຟເປັນວົງມົນດ້ວຍສາຍໄຟ ເພື່ອບໍ່ໃຫ້ມັນມາໃກ້ຕົວຂອງຂ້າພະເຈົ້າ, ໄປທີ່ເດີ່ນຫລັງບ້ານ, ແລະ ດ້ວຍການແກວ່ງອີກເທື່ອໜຶ່ງ ກໍໂຍນໄມໂຄເວບອອກໄປເດີ່ນຫຍ້າ. ຢູ່ບ່ອນນັ້ນ ພວກເຮົາສາມາດດັບໄຟທີ່ລຸກໄໝ້ໄດ້ດ້ວຍສາຍຢາງ.

ແມ່ນຫຍັງທີ່ຜິດພາດໄປ? ເຕົາໄມໂຄເວບຕ້ອງການບາງຢ່າງເພື່ອດູດຊຶມພະລັງງານຂອງມັນ, ແລະ ເມື່ອບໍ່ມີຫຍັງຢູ່ທາງໃນທີ່ດູດຊຶມພະລັງງານ, ມັນກໍຈະດູດຊຶມພະລັງງານຂອງມັນເອງ, ເກີດຄວາມຮ້ອນຂຶ້ນ, ແລະ ອາດລຸກເປັນໄຟ, ໂດຍທໍາລາຍໂຕເອງໃນແປວໄຟ ແລະ ຂີ້ເຖົ່າ.⁹ ເຕົາໄມໂຄເວບຂອງພວກເຮົາລຸກເປັນໄຟ ແລະ ໄໝ້ໝົດ ຍ້ອນວ່າບໍ່ມີຫຍັງຢູ່ທາງໃນ.

ເຊັ່ນດຽວກັນ, ຜູ້ທີ່ມີສັດທາ ແລະ ພຣະຄໍາຂອງພຣະເຈົ້າຢູ່ໃນສ່ວນເລິກຂອງຫົວໃຈຂອງເຂົາເຈົ້າ ສາມາດດູດຊຶມ ແລະ ເອົາຊະນະລູກສອນໄຟ ທີ່ສັດຕູຈະສົ່ງມາເພື່ອທໍາລາຍເຮົາຢ່າງແນ່ນອນ.¹⁰ ຖ້າບໍ່ດັ່ງນັ້ນ, ສັດທາ, ຄວາມຫວັງ, ແລະ ຄວາມເຊື່ອໝັ້ນຂອງເຮົາ ອາດບໍ່ຍືນຍົງ, ແລະ ເຊັ່ນດຽວກັບເຕົາໄມໂຄເວບທີ່ວ່າງເປົ່າ, ເຮົາອາດເປັນຜູ້ເສຍຊີວິດໄດ້.

ຂ້າພະເຈົ້າໄດ້ຮຽນຮູ້ວ່າ ການມີພຣະຄໍາຂອງພຣະເຈົ້າຢູ່ໃນສ່ວນເລິກຂອງຈິດວິນຍານຂອງຂ້າພະເຈົ້າ, ຮ່ວມດ້ວຍສັດທາໃນອົງພຣະເຢຊູຄຣິດເຈົ້າ ແລະ ການຊົດໃຊ້ຂອງພຣະອົງ, ເຮັດໃຫ້ຂ້າພະເຈົ້າໃຊ້ອໍານາດຂອງພຣະເຈົ້າເພື່ອເອົາຊະນະຜູ້ປໍລະປັກ ແລະ ທຸກສິ່ງທີ່ມັນອາດໂຍນມາໃສ່ຂ້າພະເຈົ້າ. ໃນຂະນະທີ່ເຮົາປະເຊີນໜ້າກັບການທ້າທາຍຕ່າງໆ, ເຮົາສາມາດເພິ່ງພາຄໍາສັນຍາຂອງພຣະຜູ້ເປັນເຈົ້າທີ່ໂປໂລໄດ້ສິດສອນ ທີ່ວ່າ: “ເພາະວ່າພຣະເຈົ້າບໍ່ໄດ້ປະທານໃຈອັນຢ້ານກົວໃຫ້ແກ່ເຮົາ; ແຕ່ໄດ້ປະທານໃຈອັນປະກອບດ້ວຍອໍານາດ, ຄວາມຮັກ, ແລະ ການບັງຄັບຕົນເອງໃຫ້ແກ່ເຮົາ.”¹¹

ເຮົາຮູ້ວ່າ ໃນໄວເຍົາ ພຣະຜູ້ຊ່ວຍໃຫ້ລອດ “ກໍໃຫຍ່ຂຶ້ນ ແລະ ແຂງແຮງດີ ເຕັມໄປດ້ວຍສະຕິປັນຍາ ແລະ ພຣະຄຸນຂອງພຣະເຈົ້າກໍສະຖິດຢູ່ນໍາພຣະອົງ.”¹² ເຮົາຮູ້ວ່າ ເມື່ອພຣະອົງເຕີບໃຫຍ່ຂຶ້ນ, “ພຣະເຢຊູໄດ້ຈະເລີນເຕີບໃຫຍ່ຂຶ້ນ ໃນດ້ານສະຕິປັນຍາ ແລະ ໃນດ້ານຮ່າງກາຍ ເປັນທີ່ພໍພຣະໄທຕໍ່ພຣະເຈົ້າ ແລະ ຕໍ່ມະນຸດດ້ວຍ.”¹³ ແລະ ເຮົາຮູ້ວ່າ ເມື່ອເຖິງເວລາເລີ່ມຕົ້ນປະຕິບັດສາດສະໜາກິດຂອງພຣະອົງ, ຜູ້ທີ່ໄດ້ຍິນພຣະອົງ “ຕ່າງກໍປະຫລາດໃຈ ໃນຄໍາສອນຂອງພຣະອົງ ເພາະພຣະອົງສອນດ້ວຍອໍານາດ.”¹⁴

ຜ່ານທາງການກະກຽມ, ພຣະຜູ້ຊ່ວຍໃຫ້ລອດໄດ້ເຕີບໃຫຍ່ໃນອໍານາດ ແລະ ສາມາດຕ້ານທານກັບການຫລອກລວງທັງໝົດຂອງຊາຕານໄດ້.¹⁵ ເມື່ອເຮົາຕິດຕາມແບບຢ່າງຂອງພຣະຜູ້ຊ່ວຍໃຫ້ລອດ ແລະ ກະກຽມຜ່ານທາງການສຶກສາພຣະຄໍາຂອງພຣະເຈົ້າ ແລະ ເຮັດໃຫ້ສັດທາຂອງເຮົາເລິກເຊິ່ງຍິ່ງຂຶ້ນ, ເຮົາຈະສາມາດໃຊ້ອໍານາດຂອງພຣະເຈົ້າເພື່ອຕ້ານທານກັບການຫລອກລວງຕ່າງໆໄດ້ນໍາອີກ.

ໃນຊ່ວງເວລາແຫ່ງການເຕົ້າໂຮມທີ່ຈໍາກັດນີ້ ທີ່ເຮັດໃຫ້ການເຂົ້າພຣະວິຫານເປັນປະຈໍາເປັນໄປບໍ່ໄດ້, ຂ້າພະເຈົ້າຕັ້ງໃຈທີ່ຈະສືບຕໍ່ສຶກສາ ແລະ ຮຽນຮູ້ເພີ່ມເຕີມກ່ຽວກັບອໍານາດຂອງພຣະເຈົ້າທີ່ມາສູ່ເຮົາ ເມື່ອເຮົາເຮັດ ແລະ ຮັກສາພັນທະສັນຍາຂອງພຣະວິຫານ. ດັ່ງທີ່ໄດ້ສັນຍາໄວ້ໃນຄໍາອະທິຖານອຸທິດພຣະວິຫານເຄີດແລນ, ເຮົາອອກຈາກພຣະວິຫານ ໂດຍມີອໍານາດຂອງພຣະເຈົ້າເປັນອາວຸດ.¹⁶ ບໍ່ມີວັນໝົດອາຍຸສໍາລັບອໍານາດທີ່ພຣະເຈົ້າປະທານໃຫ້ແກ່ຜູ້ທີ່ເຮັດ ແລະ ຮັກສາພັນທະສັນຍາຂອງພຣະວິຫານ ຫລື ຂໍ້ຈໍາກັດບໍ່ໃຫ້ເຂົ້າເຖິງອໍານາດນັ້ນໃນລະຫວ່າງການແຜ່ລະບາດ. ອໍານາດຂອງພຣະອົງຈະຫລຸດນ້ອຍໃນຊີວິດຂອງເຮົາ ກໍຕໍ່ເມື່ອເຮົາບໍ່ຮັກສາພັນທະສັນຍາ ແລະ ບໍ່ໃຊ້ຊີວິດໃນທາງທີ່ເຮັດໃຫ້ເຮົາເໝາະສົມທີ່ຈະໄດ້ຮັບອໍານາດຂອງພຣະອົງຢ່າງຕໍ່ເນື່ອງ.

ຂະນະທີ່ພັນລະຍາສຸດທີ່ຮັກຂອງຂ້າພະເຈົ້າກັບຂ້າພະເຈົ້າຮັບໃຊ້ເປັນຜູ້ນຳເຜີຍແຜ່ຢູ່ປະເທດໄທ, ລາວ, ແລະ ມຽນມາ, ພວກເຮົາໄດ້ເປັນພະຍານດ້ວຍຕົວເອງເຖິງອໍານາດຂອງພຣະເຈົ້າ ທີ່ມາສູ່ຜູ້ທີ່ເຮັດ ແລະ ຮັກສາພັນທະສັນຍາອັນສັກສິດໃນພຣະວິຫານ. ກອງທຶນເພື່ອຊ່ວຍເຫລືອຜູ້ເດີນທາງໄປພຣະວິຫານ ສາມາດເຮັດໃຫ້ເປັນໄປໄດ້ສໍາລັບໄພ່ພົນຫລາຍຄົນທີ່ຢູ່ໃນສາມປະເທດນີ້ ເພື່ອໄປພຣະວິຫານ ຫລັງຈາກທີ່ໄດ້ເຮັດທຸກສິ່ງທຸກຢ່າງທີ່ເຂົາເຈົ້າສາມາດເຮັດໄດ້ ຜ່ານທາງການເສຍສະລະ ແລະ ການກະກຽມສ່ວນຕົວ. ຂ້າພະເຈົ້າຈື່ໄດ້ວ່າ ໄດ້ພົບກັບກຸ່ມໄພ່ພົນທີ່ຊື່ສັດ 20 ຄົນຈາກປະເທດລາວທີ່ສະໜາມບິນໃນກຸງເທບ, ປະເທດໄທ, ເພື່ອຊ່ວຍເຂົາເຈົ້າໄປຍັງສະໜາມບິນອີກບ່ອນໜຶ່ງໃນກຸງເທບ ເພື່ອຂຶ້ນຍົນໄປຮົງກົງ. ສະມາຊິກເຫລົ່ານີ້ເຕັມໄປດ້ວຍຄວາມຕື່ນເຕັ້ນ ທີ່ໃນທີ່ສຸດ ເຂົາເຈົ້າຈະໄດ້ເດີນທາງໄປບ້ານຂອງພຣະຜູ້ເປັນເຈົ້າ.

ຮູບພາບ

ສະມາຊິກໃນປະເທດລາວ

ເມື່ອພວກເຮົາໄດ້ພົບກັບໄພ່ພົນທີ່ດີເຫລົ່ານີ້ ຕອນທີ່ເຂົາເຈົ້າກຳລັງເດີນທາງກັບ, ຄວາມເຕີບໃຫຍ່ດ້ານພຣະກິດຕິຄຸນ ແລະ ອໍານາດທີ່ກ່ຽວຂ້ອງເພີ່ມເຕີມ ອັນເປັນຜົນມາຈາກການໄດ້ຮັບຂອງປະທານສັກສິດຂອງເຂົາເຈົ້າໃນພຣະວິຫານ ແລະ ການເຂົ້າສູ່ພັນທະສັນຍາກັບພຣະເຈົ້າ ໄດ້ປະກົດໃຫ້ເຫັນໄດ້ຢ່າງຊັດເຈນໃນຕົວເຂົາເຈົ້າ. ໄພ່ພົນເຫລົ່ານີ້ໄດ້ອອກຈາກພຣະວິຫານ “ໂດຍມີອໍານາດຂອງ [ພຣະອົງ] ເປັນອາວຸດ.”¹⁷ ອໍານາດໃນການເຮັດໃຫ້ໄດ້ຫລາຍກວ່າທີ່ເຂົາເຈົ້າສາມາດເຮັດໄດ້ດ້ວຍຕົວເຂົາເຈົ້າເອງນີ້ ໄດ້ເຮັດໃຫ້ເຂົາເຈົ້າມີຄວາມເຂັ້ມແຂງທີ່ຈະອົດທົນຕໍ່ຄວາມທ້າທາຍຕ່າງໆຂອງການເປັນສະມາຊິກຂອງສາດສະໜາຈັກໃນບ້ານເກີດຂອງເຂົາເຈົ້າ ແລະ ອອກໄປ “ສົ່ງຂ່າວສານສໍາຄັນ ແລະ ປະເສີດ, ຕາມຄວາມຈິງ,”¹⁸ ໃນຂະນະທີ່ເຂົາເຈົ້າສືບຕໍ່ສ້າງສາອານາຈັກຂອງພຣະຜູ້ເປັນເຈົ້າໃນປະເທດລາວ.

ໃນຊ່ວງເວລາທີ່ເຮົາຍັງບໍ່ສາມາດເຂົ້າໄປພຣະວິຫານໄດ້, ເຮົາແຕ່ລະຄົນເພິ່ງພາພັນທະສັນຍາທີ່ເຮົາໄດ້ເຮັດໃນພຣະວິຫານ ເພື່ອກໍານົດແນວທາງໃນຊີວິດເຮົາທີ່ຊັດເຈນ ແລະ ບໍ່ປ່ຽນແປງແລ້ວບໍ? ພັນທະສັນຍາເຫລົ່ານີ້, ຖ້າເຮົາຮັກສາ, ຈະໃຫ້ວິໄສທັດ ແລະ ຄວາມຄາດຫວັງກ່ຽວກັບອະນາຄົດ ແລະ ຄວາມມຸ່ງໝັ້ນທີ່ຊັດເຈນ ເພື່ອເຮັດໃຫ້ເຮົາເໝາະສົມທີ່ຈະຮັບທຸກສິ່ງທີ່ພຣະຜູ້ເປັນເຈົ້າໄດ້ສັນຍາໄວ້ ຜ່ານທາງຄວາມຊື່ສັດຂອງເຮົາ.

ຂ້າພະເຈົ້າຂໍເຊື້ອເຊີນທ່ານໃຫ້ສະແຫວງຫາອໍານາດທີ່ພຣະເຈົ້າຕ້ອງການປະທານໃຫ້ແກ່ທ່ານ. ຂ້າພະເຈົ້າເປັນພະຍານວ່າ ເມື່ອເຮົາສະແຫວງຫາອໍານາດນີ້, ເຮົາຈະໄດ້ຮັບພອນດ້ວຍຄວາມເຂົ້າໃຈທີ່ດີຂຶ້ນ ເຖິງຄວາມຮັກທີ່ພຣະບິດາເທິງສະຫວັນມີໃຫ້ເຮົາ.

ຂ້າພະເຈົ້າເປັນພະຍານວ່າ ຍ້ອນວ່າພຣະບິດາເທິງສະຫວັນຮັກທ່ານ ແລະ ຂ້າພະເຈົ້າ, ພຣະອົງຈຶ່ງໄດ້ສົ່ງບຸດທີ່ຮັກຂອງພຣະອົງ, ພຣະເຢຊູຄຣິດ, ມາເພື່ອເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ຂ້າພະເຈົ້າເປັນພະຍານເຖິງພຣະເຢຊູຄຣິດ, ພຣະອົງຜູ້ມີອໍານາດທັງໝົດ,¹⁹ ແລະ ເຮັດເຊັ່ນນັ້ນໃນພຣະນາມຂອງພຣະເຢຊູຄຣິດ, ອາເມນ.