ການກາຍເປັນເໝືອນດັ່ງພຣະອົງ

ໂດຍ ແອວເດີ ສະກາດ ດີ ໄວທິງ

ແຫ່ງສາວົກເຈັດສິບ

ພຽງແຕ່ດ້ວຍຄວາມຊ່ວຍເຫລືອແຫ່ງສະຫວັນຂອງພຣະຜູ້ຊ່ວຍໃຫ້ລອດເທົ່ານັ້ນ ເຮົາທຸກຄົນຈະສາມາດກ້າວໜ້າໄປສູ່ການກາຍເປັນເໝືອນດັ່ງພຣະອົງ.

ແມ່ນແຕ່ຕໍ່ຜູ້ຄົນທີ່ສຶກສາພຣະຊົນຊີບ ແລະ ການປະຕິບັດສາດສະໜາກິດຂອງພຣະເຢຊູຄຣິດຢ່າງລະອຽດ, ຄຳແນະນຳຂອງພຣະຜູ້ຊ່ວຍໃຫ້ລອດວ່າໃຫ້ເປັນ “ດັ່ງທີ່ເຮົາເປັນ”¹ ເປັນສິ່ງທີ່ເປັນຕາຢ້ານ ແລະ ເບິ່ງຄືວ່າຈະບໍ່ສາມາດບັນລຸໄດ້. ບາງທີທ່ານອາດເປັນຄືກັນກັບຂ້າພະເຈົ້າ—ຮັບຮູ້ຄວາມຜິດພາດ ແລະ ຄວາມບົກພ່ອງຂອງຕົນທັງໝົດ, ແລ້ວທ່ານອາດພົບເຫັນວ່າມັນຈະສະບາຍກວ່າ ທີ່ຈະດຳລົງຊີວິດແບບບໍ່ຮຽກຮ້ອງໃຫ້ຂຶ້ນສູງ ຫລື ມີການເຕີບໂຕຫລາຍ. “ແນ່ນອນວ່າ, ຄຳສອນນີ້ບໍ່ເປັນຄວາມຈິງ ແລະ ເປັນການເສີມແຕ່ງ,” ເຮົາຈະຫາຄຳແກ້ຕົວວ່າ ຂະນະທີ່ເຮົາເລືອກເສັ້ນທາງເດີນທີ່ມີການຕໍ່ຕ້ານໜ້ອຍທີ່ສຸດ, ດັ່ງນັ້ນຈຶ່ງສູນເສຍແຮງໜ້ອຍທີ່ສຸດຈາກການປ່ຽນແປງທີ່ຈຳເປັນ.

ແຕ່ຈະເປັນແນວໃດຖ້າຫາກວ່າ ການກາຍເປັນ “ດັ່ງທີ່ [ພຣະອົງ] ເປັນ” ນັ້ນບໍ່ໄດ້ເປັນຄຳສົມທຽບ, ແມ່ນແຕ່ໃນສະພາບການຂອງເຮົາໃນຊ່ວງມະຕະນີ້? ຈະເປັນແນວໃດຖ້າຫາກວ່າ, ໃນລະດັບໃດລະດັບໜຶ່ງ, ເຮົາບັນລຸເຖິງໄດ້ໃນຊີວິດນີ້ ແລະ, ແທ້ໆແລ້ວ, ວ່າເປັນເງື່ອນໄຂທີ່ຈະໄດ້ຢູ່ກັບພຣະອົງອີກ? ຈະເປັນແນວໃດຖ້າຫາກວ່າ “ດັ່ງທີ່ເຮົາເປັນ” ຄືຄວາມໝາຍທີ່ແທ້ຈິງ ແລະ ຢ່າງແນ່ນອນຂອງພຣະຜູ້ຊ່ວຍໃຫ້ລອດ? ແລ້ວຈະເປັນແນວໃດລະ? ເຮົາຈະເຕັມໃຈໃຊ້ຄວາມພະຍາຍາມເຖິງລະດັບໃດ ເພື່ອຈະເຊື້ອເຊີນອຳນາດມະຫັດສະຈັນຂອງພຣະອົງໃຫ້ເຂົ້າມາສູ່ຊີວິດຂອງເຮົາ ເພື່ອວ່າເຮົາຈະສາມາດປ່ຽນແປງທຳມະຊາດຂອງເຮົາໄດ້?

ແອວເດີ ນຽວ ເອ ແມ໊ກສະແວວ ໄດ້ສິດສອນວ່າ: “ຂະນະທີ່ເຮົາຄິດໄຕ່ຕອງເຖິງການຖືກບັນຊາຈາກພຣະເຢຊູວ່າໃຫ້ກາຍເປັນເໝືອນດັ່ງພຣະອົງ, ເຮົາກໍເຫັນໄດ້ວ່າສະຖານະການຂອງເຮົາໃນປະຈຸບັນກໍເປັນຢູ່ແບບທີ່ເຮົາກໍບໍ່ໄດ້ຊົ່ວຮ້າຍ, ແຕ່, ເປັນແບບທີ່ເຮົາບໍ່ຈິງໃຈ ແລະ ຂາດຄວາມຕື່ນເຕັ້ນສຳລັບອຸດົມການຂອງພຣະອົງ—ຊຶ່ງເປັນອຸດົມການຂອງເຮົາດ້ວຍ! ເຮົາສັນລະເສີນ ແຕ່ບໍ່ຄ່ອຍເຮັດຕາມຕົວຢ່າງຂອງພຣະອົງ.”² ທ່ານຊາສ໌ ເອັມ ແຊວດອນ ຄຸນພໍ່ໜຸ່ມຄົນໜຶ່ງ, ໄດ້ສະແດງຄວາມຮູ້ສຶກຄ້າຍຄືກັນໃນທຳນອງນີ້ວ່າ: “ຄວາມເປັນຊາວຄຣິດຂອງເຮົາມັກຊີວິດທີ່ງ່າຍ ແລະ ສະດວກສະບາຍຈົນວ່າເຮົາບໍ່ຢາກເຮັດອັນໃດທີ່ໜັກໜ່ວງ.”³

ແທ້ຈິງແລ້ວ, ທຸກຄົນກໍຢູ່ພາຍໃຕ້ຄຳສັ່ງໃຫ້ກາຍເປັນເໝືອນດັ່ງພຣະອົງ, ດັ່ງທີ່ພຣະເຢຊູຄຣິດໄດ້ກາຍເປັນເໝືອນດັ່ງພຣະບິດາ.⁴ ເມື່ອເຮົາຈະເລີນກ້າວໜ້າ, ເຮົາກໍຈະສົມບູນ, ສຳເລັດຫລາຍຂຶ້ນ, ແລະ ພັດທະນາຕົນຢ່າງເຕັມທີ່.⁵ ຄຳສອນດັ່ງກ່າວບໍ່ໄດ້ຂຶ້ນຢູ່ກັບຄຳສອນຈາກນິກາຍໃດໜຶ່ງ ແຕ່ມາຈາກພຣະອາຈານເອງໂດຍກົງ. ມັນແມ່ນຜ່ານທັດສະນະນີ້ທີ່ເຮົາຄວນດຳລົງຊີວິດ, ພິຈາລະນາການສື່ສານ, ແລະ ຖະໜອມຄວາມສຳພັນ. ແທ້ຈິງແລ້ວ, ບໍ່ມີທາງອື່ນໃດເລີຍ ທີ່ຈະປິ່ນປົວບາດແຜຂອງຄວາມສຳພັນທີ່ແຕກສະຫລາຍ ຫລື ສັງຄົມທີ່ຖືກແຕກແຍກໄດ້ດີກວ່າທີ່ໃຫ້ເຮົາແຕ່ລະຄົນ ເຮັດຕາມຕົວຢ່າງຂອງອົງສັນຕິລາດຢ່າງເຕັມປ່ຽມ.⁶

ໃຫ້ເຮົາພິຈາລະນາວ່າຈະເລີ່ມຕົ້ນການຕາມຫາການກາຍເປັນດັ່ງທີ່ພຣະອົງເປັນ ດ້ວຍຄວາມຮອບຄອບ, ມີເຈດຕະນາ, ແລະ ດ້ວຍຄວາມຕັ້ງໃຈ ໂດຍມີຄຸນສົມບັດຂອງພຣະເຢຊູຄຣິດແທ້ໆແນວໃດ.

ຕັດສິນໃຈ ແລະ ໃຫ້ຄຳໝັ້ນສັນຍາ

ເມື່ອສອງສາມປີກ່ອນ, ພັນລະຍາ ແລະ ຂ້າພະເຈົ້າໄດ້ຢືນຢູ່ທີ່ຕົ້ນທາງ ຢູ່ພູຟູຈິ, ພູທີ່ສູງທີ່ສຸດໃນປະເທດຍີ່ປຸ່ນ. ຂະນະທີ່ພວກເຮົາປີນຂຶ້ນໄປ ພວກເຮົາໄດ້ຫລຽວຂຶ້ນໄປຫາຈອມພູທີ່ຢູ່ໄກໆ ແລະ ໄດ້ສົງໄສຖ້າຫາກວ່າພວກເຮົາຈະຂຶ້ນໄປເຖິງຫລືບໍ່.

ຂະນະທີ່ພວກເຮົາກ້າວໜ້າໄປ, ຄວາມອິດເມື່ອຍ, ກ້າມເນື້ອທີ່ເຈັບປວດ, ແລະ ຜົນກະທົບຂອງຄວາມສູງກໍໄດ້ເລີ່ມຮູ້ສຶກ. ທາງດ້ານຈິດໃຈ, ມັນກໍສຳຄັນສຳລັບພວກເຮົາທີ່ຈະເອົາໃຈໃສ່ບາດກ້າວຕໍ່ໄປ. ພວກເຮົາຈະເວົ້າວ່າ, “ເຮົາອາດຈະບໍ່ໄປເຖິງຈອມພູໃນໄວໆນີ້, ແຕ່ເຮົາສາມາດຍ່າງໄປເຖິງບາດກ້າວໜ້າໄດ້ດຽວນີ້.” ເມື່ອເວລາຜ່ານໄປ ໃນທີ່ສຸດສິ່ງທີ່ໜ້າຢ້ານກົວກໍບັນລຸເຖິງໄດ້—ເທື່ອລະບາດກ້າວ.

ບາດກ້າວທຳອິດຢູ່ໃນເສັ້ນທາງທີ່ຈະກາຍເປັນເໝືອນດັ່ງພຣະເຢຊູຄຣິດແມ່ນຄວາມປາດຖະໜາທີ່ຈະກ້າວເດີນໄປ. ການເຂົ້າໃຈຄຳຕັກເຕືອນໃຫ້ເປັນເໝືອນພຣະອົງນັ້ນກໍເປັນສິ່ງທີ່ດີ, ແຕ່ຄວາມເຂົ້າໃຈນັ້ນຈຳເປັນຕ້ອງຄຽງຄູ່ໄປກັບຄວາມປາດຖະໜາທີ່ຈະປ່ຽນແປງຕົວເອງ ເທື່ອລະບາດກ້າວ, ທີ່ເກີນກວ່າມະນຸດທີ່ມີຈິດໃຈທຳມະດາ.⁷ ເພື່ອຈະພັດທະນາຄວາມປາດຖະໜາ, ເຮົາຕ້ອງຮູ້ວ່າພຣະເຢຊູຄຣິດເປັນໃຜ. ເຮົາຕ້ອງຮູ້ບາງຢ່າງກ່ຽວກັບຄຸນລັກສະນະຂອງພຣະອົງ,⁸ ແລະ ເຮົາຕ້ອງຊອກຫາຄຸນສົມບັດຂອງພຣະອົງຢູ່ໃນພຣະຄຳພີ, ການນະມັດສະການ, ແລະ ໃນສະຖານທີ່ສັກສິດແຫ່ງອື່ນໆ. ເມື່ອເຮົາເລີ່ມຮູ້ຈັກພຣະອົງຫລາຍຂຶ້ນ, ເຮົາຈະເຫັນຄຸນສົມບັດຂອງພຣະອົງສະທ້ອນໃຫ້ເຫັນຢູ່ໃນຄົນອື່ນ. ສິ່ງນີ້ຈະຊຸກຍູ້ເຮົາຕໍ່ໄປໃນການສະແຫວງຫາຂອງເຮົາເອງ, ເພາະຖ້າຫາກຄົນອື່ນສາມາດບັນລຸເຖິງຄຸນສົມບັດຂອງພຣະອົງໄດ້ ໃນທາງໃດທາງໜຶ່ງ ເຮົາກໍສາມາດເຮັດໄດ້ຄືກັນ.

ຖ້າຫາກເຮົາຊື່ສັດກັບຕົວເຮົາເອງ, ຄວາມສະຫວ່າງຂອງພຣະຄຣິດ⁹ ທີ່ຢູ່ພາຍໃນຕົວເຮົາຈະກະຕຸ້ນວ່າມີຄວາມຫ່າງໄກ ລະຫວ່າງບ່ອນທີ່ເຮົາເປັນຢູ່ເມື່ອປຽບທຽບໃສ່ກັບຄຸນລັກສະນະທີ່ເພິ່ງປາດຖະໜາຂອງພຣະຜູ້ຊ່ວຍໃຫ້ລອດ.¹⁰ ຄວາມຊື່ສັດແບບນີ້ແມ່ນຈຳເປັນ ຖ້າຫາກເຮົາຈະ ຈະເລີນກ້າວໜ້າ ໃນການກາຍເປັນເໝືອນດັ່ງພຣະອົງ. ແທ້ຈິງແລ້ວ, ຄວາມຊື່ສັດຄືໜຶ່ງໃນຄຸນສົມບັດທັງໝົດຂອງພຣະອົງ.

ບັດນີ້, ພວກເຮົາທີ່ກ້າຫານພໍ ອາດຄິດຈະຖາມສະມາຊິກຄົນໜຶ່ງໃນຄອບຄົວທີ່ເຮົາໄວ້ວາງໃຈ, ຄູ່ຄອງ, ໝູ່ເພື່ອນ, ຫລື ຜູ້ນຳທາງວິນຍານວ່າ ເຮົາຈຳເປັນຕ້ອງມີຄຸນສົມບັດໃດແດ່ຂອງພຣະເຢຊູຄຣິດ—ແລະ ເຮົາອາດຕ້ອງກຽມຮັບຄຳຕອບນັ້ນ! ບາງເທື່ອເຮົາຈະເຫັນຕົວເຮົາເອງດ້ວຍແວ່ນບິດບ້ຽວໃນສວນສະໜຸກ ທີ່ສະແດງໃຫ້ເຫັນວ່າເຮົາອ້ວນ ຫລື ຈ່ອຍຫລາຍເກີນກວ່າທີ່ເຮົາເປັນຢູ່ແທ້ໆ.

ໝູ່ເພື່ອນ ແລະ ຄອບຄົວທີ່ໄວ້ວາງໃຈສາມາດຊ່ວຍເຮົາໃຫ້ເຫັນຕົວເຮົາເອງຢ່າງຖືກຕ້ອງຫລາຍກວ່າໄດ້, ແຕ່ເຖິງແມ່ນເຂົາເຈົ້າຮັກ ແລະ ຢາກຊ່ວຍເຫລືອເຮົາເທົ່າທີ່ເຂົາເຈົ້າສາມາດ, ແຕ່ກໍຍັງຫລຽວເຫັນສິ່ງຕ່າງໆໄດ້ຢ່າງບໍ່ສົມບູນ. ເພາະເຫດນັ້ນ, ມັນສຳຄັນທີ່ສຸດທີ່ເຮົາຕ້ອງທູນຖາມພຣະບິດາເທິງສະຫວັນທີ່ຮັກຂອງເຮົານຳອີກ ເຖິງສິ່ງທີ່ເຮົາຕ້ອງການ ແລະ ວ່າເຮົາຄວນເຈາະຈົງຄວາມພະຍາຍາມຂອງເຮົາໃສ່ບ່ອນໃດ. ພຣະອົງເຫັນເຮົາດ້ວຍທັດສະນະທີ່ສົມບູນແບບ ແລະ ຈະສະແດງໃຫ້ເຮົາເຫັນຄວາມອ່ອນແອຂອງເຮົາດ້ວຍຄວາມຮັກ.¹¹ ບາງທີທ່ານຈະໄດ້ຮຽນຮູ້ວ່າທ່ານຕ້ອງການຄວາມອົດທົນ, ຄວາມຖ່ອມຕົວ, ຄວາມໃຈບຸນ, ຄວາມຮັກ, ຄວາມຫວັງ, ຄວາມພາກພຽນ, ຫລື ການເຊື່ອຟັງຫລາຍຂຶ້ນ.¹²

ເມື່ອບໍ່ດົນມານີ້, ຂ້າພະເຈົ້າໄດ້ມີປະສົບການທີ່ຊ່ວຍໃຫ້ເຕີບໂຕ ເມື່ອຜູ້ນຳຂອງສາດສະໜາຈັກທີ່ມີຄວາມຮັກຄົນໜຶ່ງໄດ້ແນະນຳຢ່າງກົງໄປກົງມາວ່າ ຂ້າພະເຈົ້າຄວນມີຄຸນສົມບັດຢ່າງໜຶ່ງຫລາຍຂຶ້ນ. ເພິ່ນໄດ້ກ່າວຄວາມຈິງທັງໝົດດ້ວຍຄວາມຮັກ. ໃນຄ່ຳຄືນນັ້ນ, ຂ້າພະເຈົ້າໄດ້ເລົ່າປະສົບການນີ້ໃຫ້ພັນລະຍາຂອງຂ້າພະເຈົ້າຟັງ. ນາງກໍມີຄວາມໃຈບຸນທີ່ເມດຕາ ແມ່ນແຕ່ເມື່ອນາງກໍໄດ້ເຫັນດ້ວຍກັບຄຳແນະນຳຂອງເພິ່ນ. ພຣະວິນຍານບໍລິສຸດໄດ້ຢືນຢັນຕໍ່ຂ້າພະເຈົ້າວ່າ ຄຳແນະນຳຂອງພວກເພິ່ນໄດ້ມາຈາກພຣະບິດາເທິງສະຫວັນທີ່ຊົງຮັກ.

ມັນອາດຈະຊ່ວຍໄດ້ຫລາຍທີ່ຈະສຳເລັດກິດຈະກຳດ້ວຍຄວາມຈິງໃຈ ເລື່ອງຄຸນສົມບັດເໝືອນດັ່ງພຣະຄຣິດຢູ່ໃນບົດທີ 6 ຂອງປຶ້ມ ຈົ່ງສອນພຣະກິດຕິຄຸນຂອງເຮົາ.¹³

ເມື່ອທ່ານໄດ້ປະເມີນຢ່າງຈິງໃຈ ແລະ ໄດ້ຕັ້ງໃຈທີ່ຈະເລີ່ມພະຍາຍາມເປັນເໝືອນດັ່ງພຣະຄຣິດ, ທ່ານຕ້ອງກັບໃຈ. ປະທານຣະໂຊ ເອັມ ແນວສັນ ໄດ້ສິດສອນດ້ວຍຄວາມຮັກວ່າ: “ເມື່ອເຮົາເລືອກທີ່ຈະກັບໃຈ, ເຮົາເລືອກທີ່ຈະປ່ຽນແປງ! ເຮົາໃຫ້ພຣະຜູ້ຊ່ວຍໃຫ້ລອດປ່ຽນເຮົາເປັນບຸກຄົນທີ່ດີທີ່ສຸດ. ເຮົາເລືອກທີ່ຈະເຕີບໂຕທາງວິນຍານ ແລະ ຮັບເອົາຄວາມຊື່ນຊົມ—ເປັນຄວາມຊື່ນຊົມຂອງການໄຖ່ໃນພຣະອົງ. ເມື່ອເຮົາເລືອກທີ່ຈະກັບໃຈ, ເຮົາເລືອກທີ່ຈະກາຍເປັນເໝືອນດັ່ງພຣະເຢຊູຄຣິດ.”¹⁴

ການກາຍເປັນດັ່ງທີ່ພຣະເຢຊູຄຣິດເປັນ ຈະຮຽກຮ້ອງການປ່ຽນແປງຫົວໃຈ ແລະ ຈິດໃຈ, ແທ້ຈິງແລ້ວ, ປ່ຽນຄຸນລັກສະນະຂອງເຮົາ, ແລະ ການເຮັດສິ່ງນີ້ແມ່ນເປັນໄປໄດ້ພຽງແຕ່ຜ່ານທາງພຣະຄຸນ ທີ່ຊ່ວຍໃຫ້ລອດຂອງພຣະເຢຊູຄຣິດເທົ່ານັ້ນ.¹⁵

ລະບຸ ແລະ ກະທຳ

ບັດນີ້ເມື່ອທ່ານໄດ້ຕັ້ງໃຈທີ່ຈະປ່ຽນແປງ ແລະ ກັບໃຈ ແລະ ໄດ້ສະແຫວງຫາການຊີ້ນຳຜ່ານທາງການອະທິຖານ, ການໄຕ່ຕອງຢ່າງຈິງໃຈ, ແລະ ບາງທີການປຶກສາກັບຄົນອື່ນ, ທ່ານຈະຕ້ອງເລືອກຄຸນສົມບັດທີ່ຈະກາຍເປັນຈຸດສົນໃຈຂອງທ່ານ. ທ່ານຈະຕ້ອງໃຫ້ຄຳໝັ້ນສັນຍາທີ່ຈະນຳໃຊ້ຄວາມພະຍາຍາມທີ່ມີຄວາມໝາຍ. ຄຸນສົມບັດເຫລົ່ານີ້ຈະບໍ່ມີມາຢ່າງງ່າຍດາຍ ແລະ ໃນທັນທີທັນໃດ, ແຕ່ຜ່ານທາງພຣະຄຸນຂອງພຣະອົງ ມັນຈະມີມາເທື່ອລະເລັກເທື່ອລະນ້ອຍຂະນະທີ່ໃຊ້ຄວາມພະຍາຍາມ.

ຄຸນສົມບັດເໝືອນດັ່ງພຣະຄຣິດເປັນຂອງປະທານຈາກພຣະບິດາເທິງສະຫວັນທີ່ຮັກ ເພື່ອເປັນພອນໃຫ້ແກ່ເຮົາ ແລະ ຜູ້ຄົນທີ່ຢູ່ອ້ອມຮອບເຮົາ. ຕາມນັ້ນ, ຄວາມພະຍາຍາມຂອງເຮົາທີ່ຈະມີຄຸນສົມບັດເຫລົ່ານີ້ ຈະຮຽກຮ້ອງການອ້ອນວອນທີ່ຈິງໃຈເພື່ອທູນຂໍຄວາມຊ່ວຍເຫລືອຈາກສະຫວັນ. ຖ້າຫາກເຮົາສະແຫວງຫາຂອງປະທານເຫລົ່ານີ້ ເພື່ອຈະຮັບໃຊ້ຄົນອື່ນໃຫ້ດີຂຶ້ນ, ພຣະອົງຈະອວຍພອນເຮົາໃນຄວາມພະຍາຍາມຂອງເຮົາ. ການຕາມຫາຂອງປະທານຈາກພຣະເຈົ້າຢ່າງເຫັນແກ່ຕົວ ຈະຈົບລົງໃນຄວາມຜິດຫວັງ ແລະ ຄວາມອຸກອັ່ງໃຈ.

ໂດຍການເອົາໃຈໃສ່ຕໍ່ຄຸນສົມບັດຢ່າງໜຶ່ງທີ່ຈຳເປັນໃຫ້ຫລາຍທີ່ສຸດ, ຂະນະທີ່ທ່ານຈະເລີນກ້າວໜ້າໃນການບັນລຸເຖິງຄຸນສົມບັດນັ້ນ, ຄຸນສົມບັດອື່ນໆກໍຈະເລີ່ມເພີ່ມຂຶ້ນໃຫ້ແກ່ທ່ານ. ຄົນທີ່ເອົາໃຈໃສ່ຕໍ່ຄວາມໃຈບຸນຢ່າງເລິກເຊິ່ງຈະບໍ່ສາມາດເພີ່ມທະວີຂຶ້ນໃນຄວາມຮັກ ແລະ ຄວາມຖ່ອມຕົວບໍ? ຄົນທີ່ເອົາໃຈໃສ່ຕໍ່ການເຊື່ອຟັງຈະບໍ່ສາມາດມີຄວາມພາກພຽນ ແລະ ຄວາມຫວັງຫລາຍຂຶ້ນບໍ? ຄວາມພະຍາຍາມທີ່ສຳຄັນຂອງທ່ານ ເພື່ອຈະມີຄຸນສົມບັດຢ່າງໜຶ່ງ ຈະກາຍເປັນເໝືອນດັ່ງກະແສນ້ຳທີ່ຍູ້ເຮືອທຸກລຳເຂົ້າໄປຫາທ່າເຮືອ.

ບັນທຶກ ແລະ ກະທຳຕໍ່ໄປ

ມັນສຳຄັນສຳລັບຂ້າພະເຈົ້າ ຂະນະທີ່ຂ້າພະເຈົ້າພະຍາຍາມກາຍເປັນເໝືອນດັ່ງພຣະອົງ ທີ່ຈະບັນທຶກປະສົບການຂອງຂ້າພະເຈົ້າ ແລະ ສິ່ງທີ່ຂ້າພະເຈົ້າກຳລັງຮຽນຮູ້ເອົາໄວ້. ເມື່ອຂ້າພະເຈົ້າຕັ້ງໃຈສຶກສາຄຸນສົມບັດຢ່າງໜຶ່ງຂອງພຣະອົງ, ຂ້າພະເຈົ້າກໍຈະຮຽນຮູ້ສິ່ງໃໝ່ໆຈາກພຣະຄຳພີ ເມື່ອຂ້າພະເຈົ້າເຫັນຕົວຢ່າງຂອງຄຸນສົມບັດນີ້ຢູ່ໃນຄຳສອນຂອງພຣະອົງ, ຢູ່ໃນການປະຕິບັດສາດສະໜາກິດຂອງພຣະອົງ, ແລະ ຢູ່ໃນສານຸສິດຂອງພຣະອົງ. ຂ້າພະເຈົ້າກໍມີຄວາມຕັ້ງໃຈຫລາຍຂຶ້ນໃນການຮັບຮູ້ຄຸນສົມບັດນັ້ນໃນຕົວຄົນອື່ນນຳອີກ. ຂ້າພະເຈົ້າໄດ້ສັງເກດເຫັນຜູ້ຄົນທີ່ດີເລີດທັງພາຍໃນ ແລະ ນອກສາດສະໜາຈັກ ຜູ້ທີ່ມີຄຸນສົມບັດທີ່ຈະເຮັດຕາມຕົວຢ່າງຂອງພຣະອົງ. ເຂົາເຈົ້າເປັນຕົວຢ່າງທີ່ມີພະລັງວ່າ ຄຸນສົມບັດເຫລົ່ານັ້ນສາມາດສະແດງໃຫ້ປະຈັກໃນຕົວຜູ້ຄົນທຳມະດາໄດ້ແນວໃດ ຜ່ານທາງພຣະຄຸນແຫ່ງຄວາມຮັກຂອງພຣະອົງ.

ເພື່ອຈະເຫັນຄວາມກ້າວໜ້າທີ່ແທ້ຈິງ, ທ່ານຈະຕ້ອງໃຊ້ຄວາມພະຍາຍາມທີ່ທົນທານ. ຄ້າຍຄືກັນກັບການປີນພູທີ່ຮຽກຮ້ອງການກະກຽມລ່ວງໜ້າ, ແລະ ຄວາມທົນທານ ແລະ ມານະອົດທົນລະຫວ່າງການປີນຂຶ້ນ, ການກາຍເປັນເໝືອນດັ່ງພຣະຄຣິດກໍຮຽກຮ້ອງຄວາມພະຍາຍາມ ແລະ ການເສຍສະລະທີ່ແທ້ຈິງຄືກັນ. ຄວາມເປັນຊາວຄຣິດທີ່ແທ້ຈິງ, ຊຶ່ງເຮົາພະຍາຍາມທີ່ຈະກາຍເປັນເໝືອນດັ່ງພຣະອາຈານຂອງເຮົາ, ຮຽກຮ້ອງຄວາມພະຍາຍາມທີ່ດີທີ່ສຸດຂອງເຮົາສະເໝີ.¹⁶

ບັດນີ້ຄຳເຕືອນສັ້ນໆ. ພຣະບັນຍັດທີ່ໃຫ້ເປັນດັ່ງພຣະອົງເປັນ ບໍ່ໄດ້ມີເຈດຕະນາຈະເຮັດໃຫ້ທ່ານຮູ້ສຶກຜິດ, ບໍ່ມີຄ່າຄວນ, ຫລື ບໍ່ເປັນທີ່ຮັກ. ປະສົບການມະຕະທັງໝົດຂອງເຮົາແມ່ນກ່ຽວກັບຄວາມກ້າວໜ້າ, ຄວາມພະຍາຍາມ, ຄວາມລົ້ມເຫລວ, ແລະ ການບັນລຸຜົນສຳເລັດ. ເຖິງແມ່ນວ່າພັນລະຍາ ແລະ ຂ້າພະເຈົ້າຢາກຈະຫລັບຕາ ແລະ ຍ້າຍຕົວເອງຢ່າງມະຫັດສະຈັນຂຶ້ນໄປເຖິງຈອມພູ, ແຕ່ຊີວິດກໍບໍ່ໄດ້ເປັນແບບນັ້ນ.

ທ່ານດີພໍ, ທ່ານເປັນທີ່ຮັກ, ແຕ່ນັ້ນບໍ່ໄດ້ໝາຍຄວາມວ່າ ທ່ານສົມບູນຄົບຖ້ວນແລ້ວ. ຍັງມີວຽກງານທີ່ຕ້ອງເຮັດໃຫ້ສຳເລັດໃນຊີວິດນີ້ ແລະ ຊີວິດໜ້າ. ພຽງແຕ່ດ້ວຍຄວາມຊ່ວຍເຫລືອແຫ່ງສະຫວັນຂອງພຣະອົງເທົ່ານັ້ນ ເຮົາທຸກຄົນຈະສາມາດກ້າວໜ້າໄປສູ່ການກາຍເປັນເໝືອນດັ່ງພຣະອົງ.

ໃນຊ່ວງເວລາເຫລົ່ານີ້, ເມື່ອ “ທຸກສິ່ງທັງປວງ [ປະກົດວ່າ] ຢູ່ໃນຄວາມສັບສົນວຸ້ນວາຍ; ແລະ … ຄວາມຢ້ານກົວ [ຄືວ່າ] ຈະມາສູ່ທຸກຜູ້ຄົນ,”¹⁷ ຢາແກ້ພິດພຽງຊະນິດດຽວ, ຢາບັນເທົາພຽງຊະນິດດຽວ, ແມ່ນທີ່ຈະພະຍາຍາມເປັນເໝືອນດັ່ງພຣະຜູ້ຊ່ວຍໃຫ້ລອດ,¹⁸ ພຣະຜູ້ໄຖ່¹⁹ ຂອງມະນຸດທັງປວງ, ຄວາມສະຫວ່າງຂອງໂລກ,²⁰ ແລະ ສະແຫວງຫາພຣະອົງ ທີ່ໄດ້ປະກາດວ່າ, “ເຮົາເປັນທາງນັ້ນ.”²¹

ຂ້າພະເຈົ້າຮູ້ວ່າການກາຍເປັນເໝືອນດັ່ງພຣະອົງ ຜ່ານທາງຄວາມຊ່ວຍເຫລືອ ແລະ ພະລັງແຫ່ງສະຫວັນຂອງພຣະອົງ ແມ່ນ ບັນລຸເຖິງໄດ້ເທື່ອລະບາດກ້າວ. ຖ້າບໍ່ເປັນດັ່ງນັ້ນ, ພຣະອົງຈະບໍ່ປະທານພຣະບັນຍັດຂໍ້ນີ້ໃຫ້ແກ່ເຮົາ.²² ຂ້າພະເຈົ້າຮູ້ສິ່ງນີ້—ສ່ວນໜຶ່ງກໍເປັນເພາະຂ້າພະເຈົ້າເຫັນຄຸນສົມບັດຂອງພຣະອົງຢູ່ໃນຕົວຂອງທ່ານຫລາຍຄົນ. ຂ້າພະເຈົ້າເປັນພະຍານເຖິງສິ່ງເຫລົ່ານີ້ ໃນພຣະນາມຂອງພຣະເຢຊູຄຣິດ, ອາແມນ.