Parau hi’u A

Nō te mau metua—Fa’aineine i tā ’outou mau tamari’i nō te hō’ē orara’a maoro i ni’a i te ’ē’a nō te fafaura’a a te Atua

Nō Tōna here ia ’outou, Tōna ti’aturira’a ia ’outou ’e Tōna ’ite i tō ’outou fāito pūai, ’ua hōro’a mai Te Metua i te ao ra ia ’outou i te rāve’a nō te tauturu i tā ’outou mau tamari’i ’ia tomo ’e ’ia haere i mua i ni’a i Tōna ’ē’a nō te fafaura’a, te ’ē’a e tae atu ai i te ora mure ’ore ra (hi’o Te Ha’api’ira’a Tumu ’e te mau Fafaura’a 68:25–28). ’Oia ato’a i te tauturura’a ia rātou ’ia fa’aineine nō te rave ’e nō te ha’apa’o i te mau fafaura’a mo’a, mai te fafaura’a nō te bāpetizora’a ’e te mau fafaura’a e ravehia i roto i te hiero. Nā roto i teie mau fafaura’a, e nati tā ’outou mau tamari’i ia rātou iho i te Fa’aora, ia Iesu Mesia.

E rave rahi rāve’a nō te fa’aineine i tā ’outou mau tamari’i nō teie tere i ni’a i te ’ē’a nō te fafaura’a, ’e e tauturu te Metua i te ao ra ia ’outou ’ia ’ite i te rāve’a maita’i roa a’e nō te tauturu ia rātou. ’A ’imi ai ’outou i te fa’aurura’a, ’a ha’amana’o noa ē ’aita te tā’āto’ara’a o te ha’api’ira’a e tupu i roto i te hō’ē ha’api’ira’a i tārenahia. ’Oia mau, te hō’ē tuha’a nō te pūai rahi o te ha’api’ira’a i te fare ’o te fāna’ora’a ïa i te ’apora’a mai i te mau ha’api’ira’a nā roto i te hi’ora’a maita’i ’e te tahi mau taime ri’i ’ōhie—te mau taime e tupu ’ōhie noa mai i roto i te terera’a o te orara’a i te mau mahana ato’a. Mai te pe’era’a i te ’ē’a nō te fafaura’a e ’ohipa tāmau ïa no te ha’api’ira’a nō ni’a i te ’ē’a nō te fafaura’a, i te roara’a o te orara’a. (Hi’o « Te fare ’e te ’utuāfare », Ha’api’ira’a mai tā te Fa’aora [2022], 30–31.)

Teie i raro nei te tahi mau mana’o ’o tē nehenehe e fa’auru atu ā ia ’outou. E nehenehe ’outou e ’ite te tahi atu ā mau mana’o nō te ha’api’i i te mau tamari’i nō te Paraimere i roto i te « Parau hi’u B : Nō te Paraimere—Fa’aineine i te mau tamari’i nō te orara’a maoro i ni’a i te ’ē’a nō te fafaura’a a te Atua. »

Te bāpetizora’a ’e te ha’amaura’a

’Ua ha’api’i Nephi ē « te ’ūputa e tomohia e [tātou] ra » i ni’a i te ’ē’a nō te fafaura’a, « ’o te tātarahapa ïa ’e te bāpetizora’a i te pape » (2 Nephi 31:17). E nehenehe tā ’outou mau tauto’ora’a nō te tauturu i tā ’outou mau tamari’i ’ia fa’aineine nō te bāpetizora’a ’e te ha’amaura’a e tu’u pāpū i tō rātou ’āvae i ni’a i taua ’ē’a nō te fafaura’a ra. E ha’amata teie mau tauto’ora’a nā roto i te ha’api’ira’a nō ni’a i te fa’aro’o ia Iesu Mesia ’e te tātarahapara’a. Tei roto ato’a i te reira te ha’api’ira’a nō ni’a i te huru tātou e fa’a’āpī ai i tā tātou mau fafaura’a nō te bāpetizora’a nā roto i te ravera’a i te ’ōro’a mo’a i te mau hepetoma ato’a.

’Ua ha’api’i Nephi ē « te ’ūputa e tomohia e [tātou] ra » i ni’a i te ’ē’a nō te fafaura’a, « ’o te tātarahapa ïa ’e te bāpetizora’a i te pape » (2 Nephi 31:17).

Teie te tahi mau rāve’a e nehenehe e tauturu ia ’outou : 2 Nephi 31 ; ve’a ta’a ’ē o te Hoa nō ni’a i te bāpetizora’a ; Topics and Questions, « Bāpetizora’a », Vaira’a buka ’evanelia.

• I te mau taime ato’a e tupu te hō’ē ’ohipa ’o tē ha’apūai i tō ’outou fa’aro’o i te Metua i te Ao ra ’e ia Iesu Mesia, ’a fa’a’ite i te reira i tā ’outou tamari’i. ’A tauturu iāna ’ia hāro’aro’a ē te fa’aro’o ’o te hō’ē ïa mea ’o tē nehenehe e tupu ’e ’o tē pūai atu ā i te roaara’a o te orara’a. E aha te tahi mau mea tā tā ’outou tamari’i e nehenehe e rave nō te fa’atupu i te fa’aro’o pūai a’e i te Mesia hou ’a bāpetizohia ai ?

• ’Ia rave tā ’outou tamari’i i te hō’ē mā’itira’a hape, ’a parau ma te ’oa’oa nō ni’a i te hōro’a nō te tātarahapara’a. ’E ’ia rave ’outou i te tahi mā’itira’a hape, ’a fa’a’ite i tō ’outou ’oa’oa ’ia tātarahapa ’outou. ’A fa’a’ite pāpū ē nō tō Iesu Mesia mamaera’a ’e te pohera’a nō tā tātou mau hara, e nehenehe tātou e tātarahapa i te mau mahana ato’a, ’ia fa’a’orehia te hara ’e e fa’ari’i i te mana nō te taui. ’Ia ani tā ’outou tamari’i ’ia fa’a’orera’ahia tāna hapa, ’a fa’a’ore hua atu ’e ma te ’oa’oa.

• ’A fa’ati’a i te parau nō tō ’outou bāpetizora’a i tā ’outou tamari’i. ’A fa’a’ite i te mau hōho’a ’e te mau fa’aha’amana’ora’a. ’A paraparau e aha tā ’outou i fa’ari’i, e mea nāhea tā ’outou mau fafaura’a nō te bāpetizora’a i te tauturu ia ’outou ’ia mātau maita’i atu ā ia Iesu Mesia, ’e nāhea tā ’outou mau fafaura’a i te tāmau noa i te ha’amaita’i i tō ’outou orara’a. ’A fa’aitoito i tā ’outou tamari’i ’ia ui i te mau uira’a.

• Mai te mea tē vai ra te hō’ē bāpetizora’a i roto i tō ’outou ’utuāfare ’aore rā tā ’outou pāroita, ’a ’āfa’i atu i tā ’outou tamari’i nō te fa’a’ite i te reira. ’A paraparau ’āmui nō ni’a i te mea tā ’outou ’e tā tā ’outou tamari’i i ’ite ’e i fa’ari’i. Mai te mea e nehenehe, ’a paraparau i te ta’ata e bāpetizohia ra ’e ’a ui i te mau uira’a mai teie i muri nei : « ’Ua nāhea ’oe i te ravera’a i teie fa’aotira’a ? ’Ua nāhea ’oe i te fa’aineinera’a ia ’oe ? »

• I te mau taime ato’a e ’ite ’outou i tā ’outou tamari’i ’ia rave i te hō’ē mea tāna i fafau e rave, ’a ha’apoupou iāna ma tō ’ā’au ato’a. ’A fa’ata’a ē e tauturu te ha’apa’ora’a i tā tātou parau ia tātou ’ia fa’aineine nō te ha’apa’o i te mau fafaura’a tā tātou i rave i te taime a bāpetizohia ai tātou. E aha tā tātou e fafau i te Atua ’ia bāpetizohia tātou ? E aha tāna i fafau mai ia tātou ? (Hi’o Mosia 18:8–10.)

• ’A paraparau e nāhea te rirora’a ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei i te ha’amaita’ira’a ia ’outou. ’Ei hi’ora’a, nāhea ’outou i te ha’afātata-atu-ā-ra’a i te Metua i te ao ra ’e ia Iesu Mesia ’a tāvini ai ’outou i te ta’ata ’ē ’e ’a tāvini ai te ta’ata ia ’outou ? ’A tauturu i tā ’outou tamari’i ’ia feruri i te mau rāve’a nō te hō’ē melo o te ’Ēkālesia ’ia tāvini ’e ’ia ha’apūai ia vetahi ’ē. ’A tauturu ato’a ia rātou ’ia ’ite ’e ’ia hāro’aro’a i te ’oa’oa e tae mai nā roto i te tāvinira’a.

• ’Ia tupu te hō’ē ’ohipa mo’a nō ’outou ’e tā ’outou tamari’i (mai i te fare purera’a, ’a tai’o ai i te mau pāpa’ira’a mo’a, ’aore rā ’a tāvini ai i te hō’ē ta’ata), ’a parau iāna i te mau mana’o pae vārua ’aore rā te mau mana’o i tae mai ia ’outou. ’A ani i tā ’outou tamari’i ’ia fa’a’ite mai i tō rātou mana’o. ’A hi’o i te mau rāve’a huru rau tā te Vārua e nehenehe e paraparau i te ta’ata, tae noa atu te mau rāve’a tāna e paraparau ia ’outou iho. ’A tauturu i tā ’outou tamari’i ’ia ’ite ’e ’ia fa’a’ite i te mau taime e nehenehe ai iāna ’ia ’itei te fa’aurura’a a te Vārua Maita’i.

• ’A māta’ita’i ’āmui i te tahi mau video i roto i te Vaira’a buka ’evanelia tei topahia « Fa’aro’o iāna ! » ’A paraparau ’āmui nō ni’a i te mau rāve’a ta’a ’ē e fa’aro’o ai te mau tāvini o te Fatu i tōna reo. ’A ani i tā ’outou tamari’i ’ia pāpa’i i te hō’ē hōho’a ’e ’aore rā ’ia hāmani i te hō’ē video nō ni’a i te huru ’oia e fa’aro’o ai i te reo o te Fa’aora.

• ’A fa’ariro i te ’ōro’a mo’a ’ei taime mo’a ’e te ’oa’oa i roto i tō ’outou ’utuāfare. ’A fa’a’ite i tā ’outou tamari’i e nāhea tō ’outou fa’atumura’a i ni’a ia Iesu Mesia i te taime nō te ōro’a mo’a. ’A tauturu i tā ’outou tamari’i ’ia hāmani i te hō’ē fa’anahora’a nō te fa’a’ite e mea mo’a te ’ōro’a mo’a nōna. ’Ei hi’ora’a, e nehenehe te fa’aro’ora’a i te mau parau o te mau pure o te ’ōro’a mo’a e fa’aha’amana’o ia tātou i tā tātou mau fafaura’a nō te bāpetizora’a.

• I roto i te mau ve’a Hoa i te mau ’āva’e ato’a tē vai ra te mau parau pāpa’i, te mau ’ā’amu ’e te mau ’ohipa e rave nō te tauturu i te mau tamari’i ’ia fa’aineine ia rātou nō te bāpetizora’a ’e te ha’amaura’a. ’A vaiiho i tā ’outou tamari’i ’ia mā’iti i te tahi nō te tai’o ’e nō te ’oa’oa e o ’outou. (’A hi’o ato’a i te ha’aputura’a « Fa’aineine nō te bāpetizora’a » i roto i te tuha’a a te mau tamari’i nō te Vaira’a buka ’evanelia.)

Te mana, te ha’amanara’a ’e te mau tāviri o te autahu’ara’a

Te autahu’ara’a o te ha’amanara’a ïa a te Atua ’e te mana o te Atua nā roto i te reira ’oia e ha’amaita’i ai i tāna mau tamari’i. Tei ni’a te autahu’ara’a a te Atua i te fenua nei i teie mahana, i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei. E ha’amaita’ihia te mau melo ato’a o te ’Ēkālesia ’o tē ha’apa’o i tā rātou mau fafaura’a—te mau vahine, te mau tāne, ’e te mau tamari’i—e te mana nō te autahu’ara’a a te Atua i roto i tō rātou fare nō te ha’apa’ari ia rātou iho ’e tō rātou ’utuāfare » (Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 3.6, Vaira’a buka ’evanelia). E tauturu teie mana i te mau melo nō te rave i te ’ohipa a te Atua nō te fa’aorara’a ’e te fa’ateiteira’a i roto i tō rātou iho orara’a ’e tō rātou ’utuāfare (hi’o Buka arata’i rahi, 2.2).

’Ia tāvini ana’e te mau tāne ’e te mau vahine i roto i te mau pi’ira’a o te ’Ēkālesia, e nā reira rātou ma te ha’amanara’a nō te autahu’ara’a, i raro a’e i te fa’aterera’a a te feiā tei mau i te mau tāviri nō te autahu’ara’a. E ha’amaita’ihia te tā’āto’ara’a o te mau tamari’i a te Metua i te ao ra—tāna mau tamaiti ’e tāna mau tamāhine—’ia māramarama maita’i ana’e rātou i te autahu’ara’a.

E fa’ari’i tātou i te mau ’ōro’a nā roto i te ha’amanara’a nō te autahu’ara’a. E fa’ari’i te mau melo tāne ti’amā o te ’Ēkālesia i te ha’amanara’a o te autahu’ara’a nā roto i te hōro’ara’a i te autahu’ara’a ’e te fa’atōro’ara’a i te mau tōro’a o te autahu’ara’a » (Buka arata’i rahi, 3.4). E nehenehe te feiā tei mau i te mau tōro’a o te autahu’ara’a e fa’ati’ahia e te hō’ē ta’ata tei mau i te mau tāviri o te autahu’ara’a nō te rave i te mau ōro’a o te autahu’ara’a.

Nō te ha’api’i atu ā nō ni’a i te autahu’ara’a, hi’o Russell M. Nelson, « Te mau tao’a pae vārua », Liahona, Novema 2019, 76–79 ; Russell M. Nelson, « Te ho’o o te mana autahu’ara’a », Liahona, Mē 2016, 66–69 ; « Mau parau tumu o te Autahu’ara’a », pene 3 i roto i te Buka arata’i rahi.

• ’A fa’ariro i te mau ’ōro’a o te autahu’ara’a ’ei tuha’a tāmau nō tō ’outou orara’a ’utuāfare. ’Ei hi’ora’a, ’a tauturu i tā ’outou tamari’i ’ia fa’aineine i te pae vārua nō te ’ōro’a mo’a i te hepetoma tāta’itahi. ’A fa’aitoito i tā ’outou tamari’i ’ia tītau i te ha’amaita’ira’a autahu’ara’a ’ia ma’i-ana’e-hia ’oia ’aore rā ’ia hina’aro ’oia i te tāmāhanahanara’a ’aore rā i te arata’ira’a. ’A fa’ariro ’ei peu mātau ’ia fa’a’ite i te mau rāve’a a te Fatu nō te ha’amaita’i i tō ’outou ’utuāfare nā roto i te mana autahu’ara’a.

• ’A tai’o ’āmui ai ’outou i te mau pāpa’ira’a mo’a, ’a hi’o i te mau rāve’a nō te ’āparau e nāhea te Atua i te ha’amaita’i i te ta’ata nā roto i tōna mana. ’A fa’a’ite i te mau ’ohipa i tupu nō ’outou iho, i te ha’amaita’ira’ahia ’outou e te Atua nā roto i tōna autahu’ara’a. Nō te mau hi’ora’a ha’amaita’ira’a tā tātou e fa’ari’i nō ’ō mai i Te Atua ra nā roto i te autahu’ara’a, hi’o Buka arata’i rahi, 3.2, 3.5.

• ’A ha’api’i i tā ’outou tamari’i ē i muri a’e i te bāpetizora’a, e nehenehe tāna e fa’ari’i i te mana autahu’ara’a nā roto i te ha’apa’ora’a i te fafaura’a nō te bāpetizora’a. ’A hi’o ’āmui fa’ahou ā i te a’ora’a a te peresideni Russell M. Nelson « Te mau tao’a pae vārua » (Liahona, Novema 2019, 76–79). ’A parau i tā ’outou tamari’i nāhea te mau ’ōro’a nō te autahu’ara’a i te fa’ataera’a i te mana o te Atua i roto i tō ’outou orara’a. Nō te tāpura nō te tahi mau rāve’a e ha’amaita’ihia ai tātou e te mana o te autahu’ara’a, hi’o Buka arata’i rahi, 3.5.

• ’A ’āparau i te uira’a « Mai te aha te huru o te hō’ē tāvini a te Fatu ? » ’A tai’o ’āmui i Te Ha’api’ira’a Tumu ’e te mau Fafaura’a 121:36–42, ’e a ’imi i te mau pāhonora’a. ’Ia ’ite ’outou e fa’a’ohipa tā ’outou tamari’i (’e ’aore rā te tahi atu ta’ata) i te hō’ē o te mau parau tumu ’aore rā te mau ’ateriputi i roto i teie mau ’īrava, ’a fa’a’ite i te reira.

• ’Ia fa’a’ohipa ’outou ’aore rā tā ’outou tamari’i i te mau tāviri nō te ’īriti i te hō’ē ’ōpani ’aore rā nō te fa’aharuru i te pere’o’o, ’a rave i te tahi taime nō te fa’aau i te reira mau tāviri i te mau tāviri tā te feiā fa’atere o te autahu’ara’a e mau ra. (Nō te tahi tātarara’a nō te mau tāviri nō te autahu’ara’a, ’a hi’o i te Buka arata’i rahi, 3.4.1). E aha tā te mau tāviri o te autahu’ara’a e « ’īriti » ’e ’aore rā e « fa’atere » nō tātou ? Hi’o ato’a Gary E. Stevenson, « Tei hea te mau tāviri ’e te mana o te autahu’ara’a ? », Liahona, Mē 2016, 29–32 ; « Where Are the Keys [Tei hea te mau tāviri] ? » (video), Vaira’a buka ’evanelia.

  Where Are the Keys?

  Priesthood authority and keys start the engine, open the gates of heaven, facilitate heavenly power, and pave the covenant pathway back to our Heavenly Father.

• ’Ia fa’ata’a-ana’e-hia ’outou nō te hō’ē pi’ira’a, ’a ani i tā ’outou tamari’i ’ia haere ato’a mai, mai te mea e nehenehe. ’A vaiiho i tā ’outou tamari’i ’ia hi’o ia ’outou ’ia rave i tō ’outou pi’ira’a. E nehenehe ato’a ’outou e ’imi i te mau rāve’a tano e nehenehe ’oia e tauturu ia ’outou. ’A fa’a’ite i tō ’outou mana’o nō ni’a i te mana o te Fatu i roto i tō ’outou pi’ira’a.

’Ia bāpetizohia ’e ’ia haamauhia nō te mau tupuna

’Ua riro te mau hiero ’ei tuha’a nō te fa’anahora’a a te Metua i te ao ra nō tāna mau tamari’i. I roto i te fare o te Fatu, e rave tātou i te mau fafaura’a mo’a ’e te Metua i te ao ra ’ia ’āmui tātou i roto i te mau ’ōro’a mo’a, ’o tē fa’atoro pā’āto’a i ni’a ia Iesu Mesia. ’Ua hōro’a mai te Metua i te ao ra i te hō’ē rāve’a i tāna mau tamari’i ato’a ’ia rave i te mau fafaura’a ’e ’ia rave i te mau ’ōro’a, tae noa atu i te feiā tei ’ore i fa’ari’i i te reira i roto i teie orara’a. I te ’ōmuara’a o te 12ra’a o te matahiti o tā ’outou tamari’i, ’ua tano tōna pa’ari ’ia bāpetizohia ’e ’ia ha’amauhia i roto i te hiero nō te mau tupuna i pohe (hi’o ato’a 1 Korinetia 15:29).

• ’A haere pinepine i te fare o te Fatu mai te mea e ti’a ia ’outou. ’A paraparau i tā ’outou tamari’i te tumu ’outou e haere ai i te hiero ’e nāhea te reira i te tauturu ia ’outou ’ia ha’afātata atu ā i te Metua i te ao ra ’e ia Iesu Mesia.

• ’A hi’o fa’ahou ’e ’a ’āparau ’āmui i te mau uira’a nō te parau fa’ati’a nō te hiero. E nehenehe ’outou e ’ite i te reira i te mau ’api 36–37 o Nō Te Pūai o te Feiā ’Āpī : Hō’ē arata’i nō te ravera’a i te mau mā’itira’a (2022). ’A paraparau i tā ’outou tamari’i i te ’ohipa e tupu i roto i te hō’ē uiuira’a nō te parau fa’ati’a nō te hiero. ’A fa’a’ite i te faufa’ara’a nō ’outou ’ia fa’ari’i i te hō’ē parau fa’ati’a nō te hiero.

• ’A tai’o ’āmui i te Malaki 4:6. ’A paraparau e nāhea tō ’outou ’ā’au e nehenehe ai e fāriu i ni’a i tō ’outou mau tupuna. ’A ha’api’i atu ā nō ni’a i tō ’outou hui tupuna nā roto i te hi’o-’āmui-ra’a i tō ’outou ’ā’amu ’utuāfare i ni’a ia FamilySearch.org. ’A ’imi i te mau tupuna tei tītauhia ’ia bāpetizohia ’e ’ia ha’amauhia. E nehenehe te tauturu ’ohipa hiero ’e ’ā’amu ’utuāfare o te pāroita e tauturu ia ’outou.

• ’A hi’o ’āmui fa’ahou i te tahi o te mau mātēria i roto i te ha’apu’era’a tei parauhia « Hiero » i roto i te tuha’a a te mau tamari’i nō te Vaira’a buka ’evanelia. (Hi’o ato’a « Fa’aineine i tā ’outou tamari’i nō te mau bāpetizora’a ’e te mau ha’amaura’a o te hiero » i ni’a ChurchofJesusChrist.org.)

Fa’ari’i i te hō’ē ha’amaita’ira’a patereareha

E nehenehe te hō’ē ha’amaita’ira’a patereareha e riro ’ei puna nō te arata’ira’a, nō te tāmāhanahanara’a ’e nō te fa’aurura’a. Tei roto i te reira te a’ora’a nō tātou iho nō ’ō mai i te Metua i te ao ra ’e e tauturu te reira ia tātou ’ia hāro’aro’a i tō tātou ti’ara’a ’e tā tātou ’ōpuara’a mure ’ore. ’A tauturu i tā ’outou tamari’i ’ia fa’aineine nō te fa’ari’i i te hō’ē ha’amaita’ira’a patereareha nā roto i te ha’api’ira’a iāna i te aura’a ’e te huru mo’a o te mau ha’amaita’ira’a patereareha.

Nō te ha’api’i atu ā, ’a hi’o Topics and Questions, « Patriarchal Blessings [Ha’amaita’ira’a patereareha] », Vaira’a buka ’evanelia ; Julie B. Beck, « E fānaura’a ari’i tō ’outou », Liahona, Mē 2006, 106–8.

• ’A fa’a’ite i tā ’outou tamari’i i te ’ohipa i tupu i te fa’ari’ira’a ’outou i tō ’outou ha’amaita’ira’a patereareha. E nehenehe ’outou e fa’a’ite i te mau mea mai te fa’aineinera’a nō te fa’ari’i i te reira, te tauturura’a ia ’outou ’ia ha’afātata atu ā i te Atua, ’e te tāmaura’a i te arata’i ia ’outou i roto i tō ’outou orara’a. E nehenehe ato’a ’outou e ani i tā ’outou tamari’i ’ia paraparau i te tahi atu mau melo o te ’utuāfare tei fa’ari’i i tō rātou ha’amaita’ira’a patereareha.

• ’A hi’o ’āmui i te a’ora’a a Elder Randall K. Bennett « Tō ’outou ha’amaita’ira’a patereareha—e arata’ira’a fa’auruhia nō ’ō mai i te Metua i te Ao ra » ’e te a’ora’a a Elder Kazuhiko Yamashita « Te taime e fāri’i ai i tō ’outou ha’amaita’ira’a patereareha » (Liahona, Mē 2023, 42–43, 88–90). ’A fa’a’ite i te tahi ’e te tahi i te mea tā ’outou i ha’api’i mai nā roto mai i teie mau parau poro’i nō ni’a i te tumu te Metua i te Ao ra e hina’aro ai ’ia fa’ari’i tātou i te hō’ē ha’amaita’ira’a patereareha. Nō te ha’api’i mai nō ni’a i te fa’ari’ira’a i te hō’ē ha’amaita’ira’a patereareha, hi’o Buka arata’i rahi, 18.17.

• Mai te mea tē vai ra tō ’outou mau tupuna tei fa’ari’i i te ha’amaita’ira’a patereareha, e noa’a paha te fa’aurura’a i te tai’ora’a i te reira ’e tā ’outou tamari’i. Nō te ani i te mau ha’amaita’ira’a o te mau tupuna tei pohe, ’a haere i ni’a ia ChurchofJesusChrist.org, ’a tāumi Te mau mauha’a i te poro ’atau ni’a o te paruai, ’e ’a mā’iti Ha’amaita’ira’a patereareha.

• I muri a’e i te fāri’ira’a tā ’outou tamari’i i tāna ha’amaita’ira’a patereareha, ’a ani i te mau melo o te ’utuāfare i reira ato’a ’ia pāpa’i i tō rātou mau mana’o ’e ’ia fa’a’ite i te reira i terā tamari’i.

Te fa’ari’ira’a i te ōro’a hiero

’Ua hina’aro te Atua e hōro’a i te ’ōro’a hiero, ’oia ho’i e ha’amaita’i, i tāna mau tamari’i ato’a ma te « mana nō ni’a mai ra » (Te Ha’api’ira’a Tumu ’e te mau Fafaura’a 95:8). Hō’ē noa taime tātou e haere ai i te hiero nō te fa’ari’i i tō tātou iho ’ōro’a hiero, terā rā te mau fafaura’a tā tātou e rave i mua i te Atua ’e te mana pae vārua ho’i tāna e hōro’a mai ia tātou ’ei tuha’a nō te ’ōro’a hiero, e nehenehe ïa te reira e ha’amaita’i ia tātou i te mau mahana ato’a o tō tātou orara’a.

• ’A pia i te hō’ē hōho’a nō te hiero i roto i tō ’outou fare. ’A parau i tā ’outou tamari’i i te mau mana’o tā ’outou i fa’ari’i i roto i te hiero. ’A paraparau pinepine nō ni’a i tō ’outou here i te Fatu ’e i tōna fare ’e i te mau fafaura’a tā ’outou i rave i reira. ’A imi i te mau rāve’a nō te haere i te hiero e tā ’outou tamari’i nō te rave i te mau bāpetizora’a ’e te mau ha’amaura’a nō tō rātou mau tupuna.

• Hi’o ’āmui temples.ChurchofJesusChrist.org. ’A tai’o ’āmui i te mau parau mai « Te ’ōro’a hiero » ’e « Fa’aineine nō te haere i te fare o te Fatu. » ’A vaiiho i tā ’outou tamari’i ’ia ui mai i tāna mau uira’a ato’a nō ni’a i te hiero. Nō te arata’ira’a nō ni’a i te mea tā ’outou e nehenehe e paraparau nō ni’a i te hiero, hi’o i te a’ora’a a Elder David A. Bednar « Fa’aineinehia nō te noa’a mai te mau mea ato’a i hina’arohia ra » (Liahona, Mē 2019, 101–4 ; hi’o ta’a ’ē i te tuha’a parauhia « Te ha’api’ira’a ’e te fa’aineinera’a hiero fa’atumuhia i ni’a i te ’utuāfare ’e turuhia e te ’Ēkālekia »).

• ’A ’āmui ai ’outou, ’aore rā ’a ’āmui ai ’outou ’e tā ’outou tamari’i i te tahi atu mau ’ōro’a (mai te ’ōro’a mo’a ’e ’aore rā te hō’ē ha’amaita’ira’a fa’aora māuiui), ’a rave i te hō’ē taime nō te tāu’aparau i te mau tāpa’o tei ravehia i roto i te ’ōro’a. E aha te aura’a o te mau tāpa’o ? Nāhea te reira i te parau pāpū nō Iesu Mesia ? E nehenehe te reira e tauturu i tā ’outou tamari’i ’ia fa’aineine i te feruri i te aura’a ’o te tāpa’o nō te mau ’ōro’a o te hiero, ’o tē parau pāpū ato’a nei nō Iesu Mesia.

• ’A tauturu i tā ’outou tamari’i ’ia ’ite ē tē nāhea ra ’oia i te ha’apa’o i te fafaura’a nō te bāpetizora’a i fa’ata’ahia i roto i te Mosia 18:8–10, 13. ’A tauturu ato’a i tā ’outou tamari’i ’ia ’ite ē tē nāhea ra te Fatu i te ha’amaita’i iāna. ’A patu i te ti’aturira’a o tā ’outou tamari’i i roto i tōna ’aravihi ’ia ha’apa’o i te mau fafaura’a.

• ’A paraparau matara noa ’e te pinepine e nāhea tā ’outou mau fafaura’a nō te hiero i te arata’i i tā ’outou mau mā’itira’a ’e i te tauturu ia ’outou ’ia ha’afātata atu ā ia Iesu Mesia. E nehenehe ’outou e fa’a’ohipa i te Buka arata’i rahi, 27.2, nō te hi’o fa’ahou i te mau fafaura’a tā tātou e rave i roto i te hiero. Mai te mea ’ua fa’ari’i ’outou i te ’ōro’a hiero, ’a parau i tā ’outou mau tamari’i nāhea te ’ahu hiero i te tauturu ia ’outou ia ha’amana’o i tā ’outou mau fafaura’a e o Iesu Mesia (hi’o « Te ’ahu mo’a o te hiero » [video], Vaira’a buka ’evanelia).

Sacred Temple Clothing

From ancient times, men and women have embraced sacred music, different forms of prayer, religious vestments full of symbolism, gestures and rituals to express their innermost feelings of devotion to God.

Tāvini i te hō’ē misiōni

’Ua ha’api’i Elder David A. Bednar : « Te mea hau atu i te faufa’a rahi ’o tā ’outou e nehenehe e rave nō te fa’aineine nō te hō’ē pi’ira’a ’ia tāvini, ’o te rirora’a ïa ’ei misiōnare hou roa ’outou a haere ai i te misiōni […] Te uira’a e ’ere i te haerera’a i te misiōni ; ’o te rirora’a mai rā ’ei misiōnare ’e te tāvinira’a i te tā’āto’ara’a o tō tātou orara’a ma tō tātou ’ā’au ato’a, tō tātou pūai ato’a, tō tātou mana’o ato’a ’e tō tātou itoito ato’a […] Tē fa’aineine nei ’outou nō te hō’ē orara’a roa nō te ’ohipa misiōnare » (« Te rirora’a ’ei misiōnare », Liahona, Novema 2005, 45–46). E ha’amaita’i te mau ’itera’a tā tā ’outou tamari’i e ora nā roto i te rirora’a ’ei misiōnare iāna ē a muri noa atu, ’eiaha noa i te taime ’oia e ti’a ai e tāvini ’ei misiōnare.

Nō te ha’api’i rahi atu ā, ’a hi’o Russell M. Nelson, « Porora’a i te ’evanelia o te hau », Liahona, Mē 2022, 6–7 ; M. Russell Ballard, « ’Ua ha’amaita’i te tāvinira’a misiōnare i tō’u orara’a ē a muri noa atu », Liahona, Mē 2022, 8–10 ; « Préparation missionnaire : L’adaptation à la vie missionnaire [Fa’aineinera’a misiōnare : te fa’aaura’a i te orara’a misiōnare] », Vaira’a buka ’evanelia.

• ’A fa’a’ite e nāhea ’ia fa’a’ite i te ’evanelia nā roto i te hō’ē rāve’a ’ōhie. ’A tāmau noa i te ’imi i te mau rāve’a nō te fa’a’ite i tō ’outou mana’o ia vetahi ’ē nō ni’a i te Metua i te ao ra ’e te Fa’aora ’e te mau ha’amaita’ira’a tā ’outou e fa’ari’i nā roto mai i te ’evanelia i fa’aho’i-fa’ahou-hia mai a te Fa’aora ’e ’ei melo nō Tāna ’Ēkālesia. ’A ani manihini i te tahi atu mau ta’ata ’ia ’āmui mai i tō ’outou ’utuāfare i roto i te mau ’ātivite a te ’Ēkālesia ’e a te ’utuāfare.

• ’A ’imi i te mau rāve’a ’ia fārerei tō ’outou ’utuāfare i te mau misiōnare. ’A ani ia rātou ’ia ha’api’i i tō ’outou mau hoa, ’aore rā ’a tu’u ia rātou ’ia ha’api’i i te ta’ata i tō ’outou fare. ’A ani i te mau misiōnare nō ni’a i te mau ’ohipa i tupu nō rātou e nāhea te tāvinira’a misiōnare i te tauturu ia rātou ’ia ha’afātata atu ā ia Iesu Mesia. ’A ani ato’a e aha tā rātou i rave (’aore rā te mea ’āhani rātou i rave) nō te fa’aineine ia rātou ’ei misiōnare.

• Mai te mea ’ua tāvini ’outou i te hō’ē misiōni, ’a paraparau rahi ’e te pinepine i te mau ’ohipa i tupu nō ’outou. ’Aore rā ’a ani i te mau hoa ’aore rā i te mau melo o te ’utuāfare tei tāvini i te misiōni ’ia paraparau nō ni’a i tā rātou misiōni. E nehenehe ato’a ’outou e paraparau nō ni’a i te mau rāve’a tā ’outou i fa’a’ite i te ’evanelia ia vetahi ’ē i roto i tō ’outou orara’a. ’A tauturu i tā ’outou tamari’i ’ia feruri i te mau rāve’a e nehenehe ’oia e fa’a’ite i te ’evanelia.

• ’A hōro’a i tā ’outou tamari’i i te taime au nō te ha’api’i i te mau parau tumu o te ’evanelia i tō ’outou ’utuāfare. E nehenehe ato’a tā ’outou tamari’i e ha’api’ipi’i i te fa’a’ite i tōna ti’aturira’a ia vetahi ’ē. ’Ei hi’ora’a, e nehenehe ’outou e tāu’aparau i te mau uira’a mai teie « Nāhea ïa tātou i te fa’a’ite i te Buka a Moromona i te hō’ē ta’ata tei ’ore ā i fa’aro’o a’enei nō ni’a i te reira ? » ’aore rā « Nāhea ïa tātou i te fa’a’ite i te hina’aro o te Fa’aora i te hō’ē ta’ata e ’ere ’oia i te keresetiano ? »

• ’A ha’amātau i tā ’outou tamari’i ’ia paraparau i te ta’ata. E aha te tahi mau rāve’a maita’i nō te ha’amata i te hō’ē ’āparaura’a ? ’A fa’aitoito i tā ’outou tamari’i ’ia ha’api’i mai ’ia fa’aro’o i te mea tā vetahi ’ē e parau ra, ’ia māramarama e aha tō roto i tō rātou ’ā’au, ’e ’ia fa’a’ite i te mau parau mau o te ’evanelia ’o tē nehenehe e ha’amaita’i i tō rātou orara’a.

• ’A ’imi i te mau rāve’a nō tā ’outou tamari’i ’ia ha’api’i mai nō ni’a i te tahi atu mau ta’ere ’e te mau fa’aro’o. ’A tauturu iāna ’ia ’ite ’e ’ia fa’atura i te mau parau tumu maita’i ’e te mea mau i roto i mau te ti’aturira’a a vetahi ’ē.

Te fāri’ira’a i te ’ōro’a tā’atira’a

I roto i te hiero, e nehenehe te hō’ē tāne ’e te hō’ē vahine e fa’aipoipohia nō te orara’a ē a muri noa atu. E tupu te reira i roto i te hō’ē ’ōro’a pi’ihia te « tā’atira’a. » Noa atu e tītauhia e rave rahi matahiti i tā ’outou tamāhine ’aore rā tamaiti nō te rave i teie ’ōro’a, e nehenehe te mau mea iti ’e te ’ōhie ’e te tāmau tā ’outou e rave ’āmui i roto i taua mau matahiti ra e tauturu iāna ’ia fa’aineine nō teie ha’amaita’ira’a fa’ahiahia.

• ’A tai’o ’āmui i te « Te ’Utuāfare : E Poro’i i tō te Ao nei » (Vaira’a buka ’evanelia). E aha tā teie poro’i e ha’api’i nei nō ni’a i te ’oa’oa i roto i te orara’a ’utuāfare ’e te mau fa’aipoipora’a manuia ? ’A mā’iti i te hō’ē o te mau parau tumu i tāpurahia i roto i te poro’i nō te tuatāpapa e tā ’outou tamari’i. E nehenehe ’outou e hi’o i te mau pāpa’ira’a mo’a e tū’ati i te reira parau tumu i roto i te Arata’i nō te mau pāpa’ira’a mo’a. E nehenehe ato’a ’outou e ha’amau i te mau fā nō te fa’a’ohipa hope atu ā i te reira parau tumu i roto i tō ’outou ’utuāfare. ’A ’ohipa ai ’outou i ni’a i tā ’outou mau fā, ’a ’āparau ’āmui i te maita’i nō te orara’a i taua parau tumu ra i roto i te orara’a ’utuāfare.

• ’A tai’o ’e tā ’outou tamari’i i te parau poro’i a te peresideni Dieter F. Uchtdorf « ’Ei fa’ahanahanara’a i te feiā ’o tē pāruru nei » (Liahona, Mē 2016, 77–80). ’Ia tae ana’e ’outou i te tuha’a ra « Te hō’ē sōtaiete nō te mau mea tei fa’a’ohipa ’e tei tā’uehia », e nehenehe ’outou e mā’imi i te mau mea i roto i tō ’outou fare e nehenehe e tā’ue ’e te mau mea ’aita. ’A paraparau nō ni’a i tō ’outou huru i ni’a i te mau mea ta’a ’ē ’ia hina’aro ’outou ’ia vai maoro roa atu ā te reira. E aha tā te reira e parau nei nō ni’a i tō tātou huru i ni’a i te fa’aipoipora’a ’e te mau tā’amura’a ’utuāfare ? E aha atu ā te ha’api’ira’a tā tātou e ’apo nei i roto i te a’ora’a a te peresideni Uchtdorf nō ni’a i te huru te Fa’aora e nehenehe e tauturu ia tātou ’ia patu i te mau fa’aipoipora’a ’e te mau ’utuāfare pa’ari ?

• ’A tāu’aparau maita’i e tā ’outou tamari’i nō ni’a i te mau mea tā ’outou ’e tō ’outou hoa fa’aipoipo e ha’api’i mai nei nō ni’a i te fa’ari’ira’a i te hō’ē fa’aipoipora’a mure ’ore tei fa’atumuhia i ni’a i te Mesia ’e te mau rāve’a tā ’outou e tāmata nei i te ha’amaita’i. Mai te mea ’ua tā’atihia ’outou ’e tō ’outou hoa fa’aipoipo i roto i te hiero, ’a fa’a’ite i tā ’ōrua tamari’i nā roto i te hi’ora’a e tē nāhea ra ’ōrua i te tūtava i te ha’apa’o i tā ’ōrua mau fafaura’a e i te Fatu. ’A parau i tā ’outou tamari’i nāhea ’outou i te tūtava ’ia fa’ariro i te Metua i te Ao ra ’e te Fa’aora ’ei pū nō tō ’outou aura’a ’e nāhea rāua i te tauturu ia ’outou (hi’o ato’a Ulisses Soares, « I roto i te ’āpitira’a ’e te Fatu », Liahona, Novema 2022, 42–45).

• Mai te mea e tītauhia ’ia rave i te mau fa’aotira’a ’utuāfare, ’a fa’atupu i te mau ’āpo’ora’a ’utuāfare ’e te mau ’āparaura’a. ’A ha’apāpū ē ’ua fa’aro’ohia ’e ’ua ha’afaufa’ahia te mau mana’o ato’a o te ’utuāfare. ’A fa’a’ohipa i teie mau ’āparaura’a ’ei rāve’a nō te fa’ahi’o i te ’āparaura’a au ’e te maita’i i roto i tō tātou mau tā’amura’a ’utuāfare, noa atu e ’ere hō’ē ā huru hi’ora’a tā te tā’āto’ara’a. (Hi’o M. Russell Ballard, « Te mau ’āpo’ora’a ’utuāfare », Liahona, Mē 2016, 65.)

• ’Ia tupu ana’e te mārōra’a ’aore rā te pe’ape’a i roto i te ’utuāfare, ’a fa’a’ite i te fa’a’oroma’i ’e te aumihi. ’A tauturu i tā ’outou tamari’i ’ia ’ite e nāhea te fa’arurura’a i te pe’ape’a mai te Mesia ra te huru e tauturu ai iāna ’ia fa’aineine nō te hō’ē fa’aipoipora’a ’oa’oa. ’A tai’o ’āmui i Te Ha’api’ira’a Tumu ’e te mau Fafaura’a 121:41–42, ’e ’a ’āparau e nāhea te mau parau tumu i roto i teie mau ’īrava e nehenehe ai e fa’a’ohipahia i roto i te fa’aipoipora’a.