Tuha’a nō Nativity in Copper and Umber [Te fānaura’a i roto i te ’ū veo ’e te maru], nā J. Kirk Richards

Noera : Te hōro’a fāito ’ore a te Tamaiti hanahana a te Atua

Noera

I te matahiti 1838, ’ua parau te peropheta Iosepha Semita ē : « Te mau parau tumu nō tō tātou ha’apa’ora’a, ’o te ’itera’a pāpū ïa o te mau ’āpōsetolo ’e te mau peropheta, nō ni’a ia Iesu Mesia ē, ’ua pohe ’Oia, ’ua tanuhia ’Oia ’e ’ua ti’afa’ahou mai i te toru o te mahana, ’e ’ua haere atu i ni’a i te ra’i ; ’e te tahi atu mau mea ato’a nō ni’a i tō tātou ha’apa’ora’a, e mau hu’ahu’a ana’e ïa nō te reira » (Te mau Ha’api’ira’a a te mau Peresideni o te ’Ēkālesia : Iosepha Semita [2011], 57). Hau atu i te 160 matahiti i muri mai, ’ua fa’auru teie fa’ahitira’a parau i te Peresidenira’a Mātāmua ’e te pupu nō te Tino ’Ahuru Ma Piti ’Āpōsetolo ’ia nene’i i « Te Mesia Ora : Te ’itera’a pāpū o te mau ’Āpōsetolo » ’ei fa’ahanahanara’a i te 2 000ra’a o te mahana fānaura’a o te Fa’aora (hi’o Russell M. Nelson, « Fa’ahaere mai i te mana o Iesu Mesia i roto i tō tātou orara’a », Liahona, Mē 2017, 40).

’Ei Feiā Mo’a i te Mau Mahana Hope’a Nei, tē ’oa’oa nei tātou i te ha’amaita’ira’a nō te heheura’a tāmau nā roto mai i te mau peropheta ’e te mau ’āpōsetolo nō teie ’anotau. ’Ua māuruuru tātou i tā rātou mau parau a’o fa’auru, mau fa’aara ’e mau fa’aitoitora’a. Hau atu rā i te mau mea ato’a, ’ua ha’amaita’ihia tātou i tō rātou ’itera’a pāpū pūai mau nō Iesu Mesia—i te tau Noera ’e i te roara’a o te matahiti. ’Ua hau atu te reira i te mau parau ha’aputapū nā te feiā pāpa’i ’aravihi ’aore rā nā te feiā a’o ’aore rā e mau hi’ora’a a te mau ’aivāna’a pāpa’ira’a mo’a. E mau parau teie a te feiā i mā’itihia e te Atua, pi’ihia, ’e ha’amanahia, e « mau ’ite pāpū nō te i’oa nō te Mesia i roto i te ao ato’a nei » (Te Ha’api’ira’a Tumu ’e te mau Fafaura’a 107:23).

Mana’o nō te ’apo i te ha’api’ira’a i te ’utuāfare ’e i te fare purera’a

« ’Aita atu e mana tei ha’aputapū hōhonu. »

E aha ïa tā ’outou e parau nō te pāturu i teie fa’ahitira’a parau ē « ’aita atu e mana tei ha’aputapū hōhonu [mai tā Iesu Mesia] i ni’a i te mau ta’ata ato’a ’o tei ora a’ena ’e ’o tē ora ā i ni’a i te fenua nei » ? ’A hi’o i te mau parau i roto i « Te Mesia Ora » ’o tē fa’a’ite pāpū nei i te mana ha’aputapū hōhonu o te Fa’aora. ’Ua nāhea ’oia i te ha’aputapūra’a ia ’outou ?

’A feruri ’ua ui mai te hō’ē ta’ata mātau ’ore i te ha’apa’ora’a keresetiano ia ’outou nō te aha ’outou e fa’ahanahana ai i te Noera. Nāhea ïa ’outou i te pāhono ? ’A hi’o fa’ahou i « Te Mesia Ora » ma teie uira’a i roto i te ferurira’a, ’e ’a feruri i te pāpa’i i te mau ferurira’a ato’a ’aore rā te mau mana’o e tae mai i ni’a ia ’outou.

Hi’o ato’a « Why We Need a Savior » (video), Vaira’a buka ’evanelia.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

« ’Ua ti’a mai ’oia mai roto mai i te mēnema. »

I roto i « Te Mesia Ora », tē fa’a’ite pāpū nei te mau ’Āpōsetolo nō te ti’afa’ahoura’a mai o te Fa’aora, ma te fa’ahiti e toru taime ’oia i fā ai ’ei Fatu i ti’afa’ahou (hi’o i te paratarafa 5). E nehenehe e tai’o nō ni’a i terā mau tere i roto i te Ioane 20 ; 3 Nephi 11 ; ’e te Iosepha Semita—’Ā’amu 1:14–20. E aha tā ’outou e ha’api’i mai nei nō ni’a i te Fa’aora i roto i tāna mau parau ’e tāna mau ’ohipa i rave i roto i teie mau fāra’a ?

Tūtonu i ni’a i te Fa’aora. ’Ua riro te tai’ora’a i ‘Te Mesia Ora’ nā roto i te pure mai te tai’ora’a i te mau ’ītera’a pāpū ’o Mataio, Mareko, Luka, Ioane, ’e te mau peropheta o te Buka a Moromona. E fa’arahi te reira i tō ’outou fa’aro’o i te Fa’aora ’e e tauturu ho’i ia ’outou ’ia vai fa’atumu noa i ni’a iāna » (M. Russell Ballard, « ’Ia ho’i ’e ’ia fāri’i », Liahona, Mē 2017, 65).

« ’Ua fa’aho’ihia mai Tōna autahu’ara’a ’e Tāna ’Ēkālesia. »

I roto i tā ’outou tuatāpapara’a i Te Ha’api’ira’a Tumu ’e te mau Fafaura’a i teie matahiti, ’ua fāna’o ’outou i te taime nō te ha’api’i rahi atu ā nō ni’a e nāhea tō te Fa’aora « autahu’ara’a ’e tāna ’Ēkālesia i te fa’aho’ira’ahia mai. » E aha te mau parau mau ’aore rā te mau parau tumu tei fa’aho’ihia mai ’o tā ’outou e tāpe’a ta’a ’ē nei ? E nehenehe ’outou e hi’o i te tahi o te mau pāpa’ira’a mo’a i muri nei ’o tē ha’api’i nei nō ni’a i te Fa’aho’i-fa’ahou-ra’a mai : Te Ha’api’ira’a Tumu ’e te mau Fafaura’a 1:17–23 ; 13 ; 20:1–12 ; 65 ; 110 ; 112:30–32 ; 124:39–42 ; 128:19–21. ’A feruri nāhea te mau parau mau o te ’evanelia tei fa’aho’i-fa’ahou-hia mai i te tauturu ia ’outou ’ia ’ite ’e ’ia here ia Iesu Mesia.

« E ho’i mai ’Oia i te hō’ē mahana i ni’a i te fenua nei. »

’Ua riro te Noera ’ei taime nō te hi’o i muta’a ra i te mahana i fānauhia ai Iesu Mesia ’e nō te hi’o i muri mai i te mahana e ho’i fa’ahou mai ai ’oia. E aha tā ’outou e ha’api’i mai nei nō ni’a i tōna ho’ira’a mai i roto i te piti o te paratarafa hope’a o « Te Mesia Ora » ? E nehenehe ato’a ’outou e tai’o, e hīmene ’aore rā e fa’aro’o i te mau hīmene Noera e ha’api’i ra nō ni’a i te Tae-piti-ra’a mai, mai te mau hīmene « ’Ua tae mai te Mesia » ’aore rā « Tē fa’a’oto ra te mau melahi i te mau pehe » (Te mau hīmene, Nos°118, 124).

« ’O ’Oia te māramarama, te ora, ’e te ti’aturira’a o te ao nei. »

I roto i te paratarafa hope’a o « Te Mesia Ora », ’a pāpa’i i te mau huru ’e te mau ti’ara’a tei parauhia nō te Fa’aora. ’A feruri i te rave i te taime nō te ha’api’i mai nō ni’a i te tahi o rātou. ’Ei hi’ora’a :

Māramarama : Nō te aha e nehenehe ai e fa’aau ia Iesu Mesia ’ei māramarama nō ’outou ? E nehenehe ’outou e pāpa’i i te hō’ē hōho’a ’aore rā e pata i te hō’ē hōho’a, nō ’outou, ’ei fa’ahōho’ara’a nō te māramarama tāna e hōro’a mai ia ’outou. E aha tā ’outou i fa’auruhia e rave nō tē fa’a’ite i tōna māramarama ? (Hi’o ato’a Ioane 8:12 ; 3 Nephi 18:24 ; Te Ha’api’ira’a Tumu ’e te mau Fafaura’a 50:24.)

Ora : Nō te aha i tō ’outou mana’o Ora e riro ai ’ei ta’o maita’i nō te fa’ata’a ia Iesu Mesia ? Nāhea ’Oia e hōro’a ai i te ora ia ’outou ? E aha ïa te mea ta’a ’ē i roto i tō ’outou orara’a ’āhani ’aita ’oia ’e tāna ’evanelia ? (Hi’o ato’a Ioane 10:10 ; 1 Korinetia 15:19–23 ; Te Ha’api’ira’a Tumu ’e te mau Fafaura’a 66:2.)

Ti’aturira’a : E aha tā ’outou e tīa’i nei nō Iesu Mesia ’e nō tāna ’evanelia ? ’Ua mātau ānei ’outou i te hō’ē ta’ata o te mana’o ra ’aita tōna e ti’aturira’a nō a muri a’e ? ’A feruri e nāhea ’outou ’ia fa’a’ite i taua ta’ata ra i te tīa’ira’a tā ’outou e fa’ari’i nei nō ni’a ia Iesu Mesia. (Hi’o ato’a Roma 8:24–25 ; Etera 12:4 ; Moroni 7:41.)

Hi’o ato’a Topics and Questions, « Iesu Mesia », Vaira’a buka ’evanelia.

« ’Ia ha’amāuruuruhia Te Atua nō [tāna] hōro’a fāito ’ore. »

I roto i « Te Mesia Ora » tē parau ra te mau ’Āpōsetolo i te Fa’aora mai te hō’ē « hōro’a » nō ’ō mai i tō tātou Metua i te ao ra. Fa’atumuhia i ni’a i te mea tā ’outou e ’ite ra i roto i « Te Mesia Ora », nāhea ’outou i te fa’aoti i teie parau : « Nā roto ia Iesu Mesia, tē hōro’a mai nei te Atua iā’u i te mau hōro’a nō te… » ’A feruri hōhonu e aha tā ’outou e nehenehe e rave nō te fa’ari’i hope atu ā i teie mau hōro’a.

’Ua nāhea te tuatāpapara’a i « Te Mesia Ora » i te ha’apūaira’a i tō ’outou fa’aro’o ’e tō ’outou here nō te Fa’aora ?

Hi’o ato’a Russell M. Nelson, « Maha ō tā Iesu Mesia i pūpū ia ’outou » (Purera’a Noera a te Peresidenira’a Mātāmua, 2 nō Tītema 2018), Vaira’a buka ’evanelia ; « Mau parau nō roto mai i ‘Te Mesia Ora : Te ’itera’a pāpū o te mau ’Āpōsetolo’ » (video), ChurchofJesusChrist.org.

Excerpts from "The Living Christ: The Testimony of the Apostles"

As special witnesses of Jesus Christ, the First Presidency and the Quorum of the Twelve shared their testimony of Christ by recording excerpts from the original document, "The Living Christ: The Testimony of the Apostles."

Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

E nehenehe au e « pūpū i [tō’u] ’itera’a pāpū » nō te fa’ahanahana i te fānaura’a o Iesu.

• ’A feruri nāhea ’outou i te fa’a’ite i tā ’outou mau tamari’i i « Te Mesia Ora. » Pēnei a’e e nehenehe ’outou e tauturu ia rātou ’ia fa’atoro i ni’a i te i’oa Mesia i roto i te upo’o parau ’e te mau tu’urimara’a a te Peresidenira’a Mātāmua ’e a te Tino ’Ahuru Ma Piti. E nehenehe ’outou e fa’ata’a ē teie tō rātou ’itera’a pāpū nō Iesu Mesia tā rātou i hina’aro e fa’a’ite i tō te ao nei.

• E nehenehe ’outou e hōro’a i te tamari’i tāta’itahi i te hō’ē pereota nō roto mai i « Te Mesia Ora » ’e e ani ia rātou ’ia ’imi ’aore rā ’ia pāpa’i i te hō’ē hōho’a nō taua pereota ra. I muri iho e nehenehe ’outou e tauturu ia rātou ’ia ’imi i te pereota i roto i « Te Mesia Ora. » E nehenehe ato’a ’outou e ha’aputu i teie mau hōho’a ’e te mau parau i roto i te hō’ē buka.

• ’A fa’a’ite i te tahi ’e te tahi e mea nāhea tō ’outou fa’ari’ira’a i tō ’outou ’itera’a pāpū nō Iesu Mesia. Pēnei a’e e nehenehe ’outou e hōro’a fa’a’ati i te hō’ē hōho’a o te Fa’aora ’e e fa’a’ite mai i te hō’ē mea tā ’outou i ’ite nō ni’a iāna (mai te mau parau mau i ha’api’ihia i roto i « Te Mesia Ora »).

« ’O tei hāmani maita’i haere ra. »

• ’A tai’o ai ’outou ’e tā ’outou mau tamari’i i te paratarāfa piti o « Te Mesia Ora », ’a paraparau ia rātou nō ni’a i te tahi o te mau mea tā Iesu i rave. E nehenehe ato’a ’outou e hi’o i te mau hōho’a nō roto mai i tōna orara’a (hi’o i tō teie hepetoma ’api fa’a’ana’anataera’a ’e te Buka hoho’a ’evanelia). ’A ani i tā ’outou mau tamari’i ’ia paraparau mai nō ni’a e aha tā te Fa’aora e rave ra i roto i te mau hōho’a. Nāhea tātou e tāvini ai ia vetahi ’ē mai tāna i nā reira ? E nehenehe te mau video « Light the World » i roto i te Vaira’a buka ’evanelia e hōro’a mai ia ’outou i te mau mana’o.

« ’O ’Oia te māramarama, te ora, ’e te ti’aturira’a o te ao nei. »

• ’A tauturu i te mau tamari’i ’ia ’imi mai i te mau hīmene Noera e parau nei nō te māramarama, te ora, ’e te tīa’ira’a ’o tā te fānaura’a o te Fa’aora i hōpoi mai i te ao nei, mai « E Betelehema ē » (Te mau hīmene, N°125). ’A hīmene ’āmui i te mau hīmene, ’e ’a vaiho i te mau tamari’i ’ia fa’a’ite mai nāhea Iesu i te hōpo’i mai i te māramarama, te ora, ’e te tīa’ira’a i roto i tō rātou orara’a.

« ’Ia ha’amāuruuruhia te Atua nō te hōro’a fāito ’ore o Tāna Tamaiti hanahana. »

• E aha te mau tao’a hōro’a tā tātou i fa’ari’i maoti ’o Iesu Mesia ? Pēnei a’e e nehenehe ’outou ’e tā ’outou mau tamari’i e ’imi i teie mau hōro’a i roto i « Te Mesia Ora » ’aore rā i roto i te hō’ē hīmene mai « Il envoya son Fils bien-aimé » (Chants pour les enfants, 20–21). I muri iho e nehenehe rātou e pū’ohu i te hō’ē mea nō te fa’ahōho’a i te reira mau hōro’a. E nehenehe ’outou e parau i tā ’outou mau tamari’i ’ia ’īriti i te mau tao’a hōro’a i te mahana Noera nō te tauturu ia rātou ’ia ha’amana’o i te Fa’aora ’e Tāna mau hōro’a nō tātou.

Nō te tahi atu ā mana’o, ’a hi’o i te ve’a Hoa nō teie ’āva’e.