Tuha’a nō Te mau melo tāne ti’amā ato’a, nā Emma Allebes

8–14 nō Tītema : « Tē ti’aturi nei mātou »

Te mau Hīro’a Fa’aro’o ’e te Mau Fa’a’itera’a Mana 1 ’e te 2

Mai te ’Ōrama Mātāmua a Iosepha Semita, ’ua tāmau noa te Atua i te arata’i i tāna ’Ēkālesia nā roto i te heheura’a. I te tahi taime, tē vai nei i roto i te heheura’a te mau tauira’a nō te mau fa’aturera’a ’e te mau ravera’a a te ’Ēkālesia. Tē fa’a’ite nei te mau Fa’a’itera’a Mana 1 ’e te 2 i terā huru heheura’a—te hō’ē tei fa’a’ore i te ravera’a i te fa’aipoipora’a i te vahine rau, ’e te tahi tei ha’amatara i te mau ha’amaita’ira’a o te autahu’ara’a i te mau nūna’a ta’ata ato’a. E tuha’a teie mau huru tauira’a nō ni’a i te aura’a o te parau nō te « ’ēkālesia parauti’a ’e te mea ora » (Te Ha’api’ira’a Tumu ’e te mau Fafaura’a 1:30), e te peropheta mau ’e te ora, arata’ihia e te hō’ē Atua mau ’e te ora.

E’ita rā te parau mau mure ’ore e taui, noa atu e taui tō tātou hāro’aro’ara’a i te reira. ’E i te tahi taime, e hōro’a mai te heheura’a i te tahi atu ā māramarama nō ni’a i te parau mau. Tē ha’apāpū nei Te mau Hīro’a Fa’aro’o i teie ha’amāramaramara’a. ’Ua niu-pāpū-hia te ’Ēkālesia i ni’a i te parau mau mure ’ore e nehenehe ā te reira e tupu ’e e taui « mai te au ho’i i tō Te Fatu ra hina’aro, mai te fa’aau i tōna ra mau aroha i te huru o te mau tamari’i a te ta’ata nei » (Te Ha’api’ira’a Tumu ’e te mau Fafaura’a 46:15). E nehenehe e parau ē : « Tē ti’aturi nei mātou i te mau mea ato’a i heheuhia mai ’e te Atua, te mau mea ato’a o tāna e heheu mai nei i teienei, ’e tē ti’aturi nei ho’i mātou ē, e heheu mai ā ’oia e rave rahi atu ā mau mea maita’i ’e te faufa’a rahi nō tōna ra bāsileia » (Te mau Hīro’a Fa’aro’o 1:9).

Mana’o nō te ’apo i te ha’api’ira’a i te ’utuāfare ’e i te fare purera’a

Te mau Hīro’a Fa’aro’o

Tei roto i te mau Hīro’a Fa’aro’o te mau parau mau niu o te ’evanelia tei fa’aho’ihia mai.

’A feruri i teie huru arata’ira’a nō te tuatāpapa i te mau Hīro’a Fa’aro’o : Nō te hīro’a fa’aro’o tāta’itahi, ’a hāmani i te hō’ē « ha’api’ira’a iti » nō te fa’ata’a mai e aha tā ’outou e ti’aturi nei. E nehenehe e tu’u i roto i tā ’outou ha’api’ira’a iti te hō’ē ’īrava, te hōho’a, te hīmene aore rā te hīmene a te mau tamari’i, ’aore rā te hō’ē ’itera’a nō ni’a i te orara’a i te hō’ē parau mau tā te hīro’a fa’aro’o e ha’api’i nei.

E aha te ta’a-’ē-ra’a tā teie mau parau mau e fa’atupu i roto i tō tātou autā’atira’a ’e tō tātou Metua i te ao ra ’e ia Iesu Mesia ? Nāhea te mau Hīro’a Fa’aro’o i te ha’amaita’i i tā ’outou tuatāpapara’a ’evanelia ’aore rā i te tauturura’a ia ’outou ’ia fa’a’ite i te ’evanelia ia vetahi ’ē ?

Hi’o ato’a te Arata’i nō te mau Pāpa’ira’a mo’a, « Te mau Hīro’a Fa’aro’o », Vaira’a buka ’evanelia ; L. Tom Perry, « Te mau ha’api’ira’a tumu ’e te mau parau tumu i roto i te mau hīro’a fa’aro’o », Liahona, Novema. 2013, 46–48 ; « Pene 38 : Te Rata a Wentworth », i roto i e mau Ha’api’ira’a a te mau Peresideni o te ’Ēkālesia : Iosepha Semita (2011), 495–508.

Hīro’a Fa’aro’o 1:9 ; mau Fa’a’itera’a Mana 1 ’e te 2

Nā te heheura’a e arata’i i te ’Ēkālesia a Iesu Mesia.

« Tē ti’aturi nei ho’i mātou e heheu mai ā [te Atua] e rave rahi atu ā mau mea maita’i ’e te faufa’a rahi nō te bāsileia o te Atua » (Te mau Hīro’a Fa’aro’o 1:9). Ma teie parau tumu i roto i te ferurira’a, ’a hi’o fa’ahou i te mau Fa’a’itera’a Mana 1 ’e te 2, ’e ’a hi’o i te mau ta’o ’e te mau pereota ’o tē ha’apūai nei i tō ’outou fa’aro’o i roto i te heheura’a tāmau. E aha tā teie mau heheura’a i fa’atupu i roto i tō ’outou orara’a ? Nāhea te reira i te fa’anu’ura’a i te ’ohipa o te bāsileia a te Metua i te Ao ra i mua ?

E aha te tāpa’o fa’a’ite tā ’outou e ’ite nei ē tē arata’ihia nei te ’Ēkālesia « nā roto i te fa’aurura’a a te Atua Mana Hope » i teie mahana ? (Fa’a’itera’a Mana 1). Pēnei a’e e nehenehe ’outou e hi’o fa’ahou i te hō’ē ’aore rā hau atu mau a’ora’a nō te ’āmuira’a rahi i ma’iri a’enei, ma te ’imi e nāhea te Fatu i te arata’i i tāna ’Ēkālesia—’e i tō ’outou orara’a. E riro paha te poro’i ’āpī roa a’e a te Peresideni o te ’Ēkālesia ’ei vahi maita’i nō te ha’amata.

E aha tā ’outou e nehenehe e rave mai te mea e tāfifi ’outou ’aore rā te ta’ata tā ’outou i here nō te māramarama ’aore rā nō te fa’ari’i i te mea tā te Fatu e ha’api’i nei nā roto i tāna mau peropheta ? Nō te aha ’outou e māuruuru ai nō te fa’ari’ira’a i te hō’ē peropheta ?

Hi’o ato’a Amosa 3:7 ; 2 Nephi 28:30 ; Allen D. Haynie, « E peropheta ora nō te mau mahana hope’a nei », Liahona, Me 2023, 25–28 ; Topics and Questions, « Prophets », Vaira’a buka ’evanelia ; « Māuruuru mātou e te Atua », Te mau hīmene, N°10.

Fa’a’itera’a Mana 1

’Ia haere ā te ’ohipa a te Atua i mua e ti’a ai.

I roto i « Te mau tuha’a nō roto mai i nā a’ora’a e toru a te peresideni Wilford Woodruff nō ni’a i te parau fa’a’ite mana » (i te hope’a o te Fa’a’itera’a mana 1), e aha te mau tumu tā te peropheta i hōro’a nō te fa’a’orera’a te Fatu i te ravera’a i te fa’aipoipora’a i te vahine rau ? E aha tā te reira e ha’api’i nei ia ’outou nō ni’a i te ’ohipa a Te Atua ?

Nō te tahi atu ā ha’amāramaramara’a nō ni’a i te ’ā’amu o te Fa’a’itera’a Mana 1, hi’o Feiā Mo’a, 2:602–15 ; « The Messenger and the Manifesto [Te Ve’a ’e te Fa’a’itera’a Mana] », i roto i Revelations in Context, 323–31 ; Topics and Questions, « Plural Marriage and Families in Early Utah [Fa’aipoipora’a i te vahine rau ’e te mau ’utuāfare mātāmua i Utaha] », Vaira’a buka ’evanelia.

Wilford Woodruff, nā H. E. Peterson

Fa’a’itera’a mana 2

E nehenehe au e ti’aturi i te Fatu, noa atu ’aita vau i māramarama hope roa i te mau mea.

’Aita tātou i ’ite nō te aha ’aita te fa’atōro’ara’a i te autahu’ara’a ’e te mau ’ōro’a o te hiero i ’ore i fa’ari’ihia e te mau melo nō te ’Ēkālesia nō ’Afirita nō te hō’ē tau. Noa atu ē i mua i te mau uira’a fifi ’e te pāhono-’ore-hia nō ni’a i taua fa’aturera’a ra, e rave rahi mau ta’ata ’ere’ere Feiā Mo’a nō te Mau Mahana Hope’a Nei tei ti’aturi i ni’a i te Fatu (hi’o Maseli 3:5) ’e ’ua vai ha’apa’o maita’i noa i roto i tō rātou orara’a. E nehenehe te ha’api’ira’a mai nō ni’a i tō rātou fa’aro’o ’e tō rātou mau ’itera’a e riro ’ei fa’aurura’a nō ’outou. Teie te tahi o tō rātou mau ’ā’amu, tē ’itehia i roto i roto i te history.ChurchofJesusChrist.org :

• « Jane Elizabeth Manning James »

• « E Rave Rahi Pārahira’a i te Fare o Tō’u Metua » (’ā’amu nō Green Flake)

• « ’Ua haere mai ihoā ’outou » (’ā’amu o Anthony Obinna)

• « Break the Soil of Bitterness [Te ha’apaera’a i te ’ino’ino] » (’ā’amu o Julia Mavimbela)

• « E rave au i te reira ma te fa’aro’o » (’ā’amu o George Rickford)

• « Long-Promised Day [E mahana i fafau-maoro-hia] »(’ā’amu o Joseph W. B. Johnson)

’Ia tai’o ’outou i te Fa’a’itera’a Mana 2, e aha tā ’outou i ’apo mai nō ni’a i te fa’anahora’a a te Fatu nō te arata’i i te mau fa’aturera’a a tāna ’Ēkālesia ? ’A feruri nāhea ’outou i te ha’api’ira’a mai ’ia ti’aturi i te Fatu noa atu ’aita tō ’outou e hāro’aro’ara’a maita’i roa.

Hi’o ato’a 2 Nephi 26:33 ; « Witnessing the Faithfulness [Fa’a’ite-pāpū-ra’a i te ha’apa’o maita’i] », i roto Revelations in Context, 332–41 ; Topics and Questions, « Te nūna’a ta’ata ’e te Autahu’ara’a », Vaira’a buka ’evanelia ; Ahmad Corbitt, « A Personal Essay on Race and the Priesthood », mau tuha’a 1–4, history.ChurchofJesusChrist.org ; BeOne.ChurchofJesusChrist.org.

’Aita e fifi ’ia parau ē « ’Aita vau i ’ite. » Noa atu e ’imi ’outou i te mau rāve’a ato’a nō te tauturu i te feiā tā ’outou e ha’api’i ra ’ia pāhono i tā rātou mau uira’a nō ni’a i te ’evanelia, ’aita te Fatu e tītau ’ia ’ite ’outou i te mau mea ato’a. ’Ia ’ore ’outou ’ia ’ite nāhea ’ia pāhono i te hō’ē mea, ’a fa’ari’i i te reira. I muri iho ’a fa’a’ite i tā ’outou mau pīahi i te ha’api’ira’a tumu i heheuhia mai, ’e ’a fa’a’ite i te hō’ē ’itera’a pāpū mau nō te mea tā ’outou i ’ite.

Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te mau tamari’i

Te mau Hīro’a Fa’aro’o

Tē ti’aturi nei au i te ’evanelia a Iesu Mesia.

• ’A ’imi ’e ’a himene i te mau hīmene ’aore rā te mau hīmene a te mau tamari’i ’o tē nehenehe e tauturu i tā ’outou mau tamari’i ’ia māramarama i te hō’ē aore rā hau atu o te mau Hīro’a Fa’aro’o. Pēnei a’e e nehenehe rātou e tauturu ia ’outou ’ia mā’iti i te mau hīmene ’e te mau himene a te mau tamari’i. ’A tauturu i tā ’outou mau tamari’i ’ia ’ite nāhea te mau hīmene e tū’ati ai i te mau Hīro’a Fa’aro’o.

• E nehenehe ’outou ’e tā ’outou mau tamari’i e ’ohipa ’āmui nō te pāpa’i i te mau uira’a a te ta’ata nō ni’a i te ’evanelia a Iesu Mesia ’aore rā i tāna ’Ēkālesia. I muri iho e nehenehe ’outou e ’ohipa ’āmui nō te pāhono i teie mau uira’a nā roto i te fa’a’ohipara’a i te mau Hīro’a Fa’aro’o. I hea atu ā e ti’a ai ia tātou ’ia haere mai te mea e mau uiraa tā tātou nō ni’a i te ’evanelia ?

Hīro’a Fa’aro’o 1:9 ; mau Fa’a’itera’a Mana 1 ’e te 2

Te arata’i nei Te Fatu i tāna ’Ēkālesia nā roto i tāna peropheta.

• Nō te tauturu i tā ’outou mau tamari’i ’ia hāro’aro’a i te Hīro’a Fa’aro’o iva, pēnei a’e e nehenehe ’outou e hōro’a ia rātou i te hō’ē tuha’a pāpa’ira’a mo’a ’e te hō’ē hōho’a o te peropheta ora (’aore rā, hō’ē ve’a Liahona nō te ’āmuira’a ’aita i maoro a’enei). ’A ani ia rātou ’ia ’āfa’i te mau pāpa’ira’a mo’a i ni’a ’a tai’o ai ’outou i te mau ta’o « te mau mea ato’a tā te Atua i heheu mai » ’e te hōho’a ’aore rā te ve’a ’ia tai’o ’outou « te mau mea ato’a tāna e heheu mai i teienei » (Te mau Hīro’a Fa’aro’o 1:9). Nō te aha tātou e hina’aro ai i te mau peropheta i tahito ra ’e i teie ’anotau ?

• E nehenehe tā ’outou mau tamari’i e ha’api’i mai nāhea te mau parau a te mau peropheta i te arata’i ia tātou nā roto i te pe’era’a i te mau arata’ira’a nō te hāmani i te hō’ē mea, mai te mā’a aore rā te hō’ē ha’uti. E nehenehe ’outou e fa’aau i te reira i te mau arata’ira’a tā Iesu Mesia i hōro’a mai ia tātou nā roto i te peropheta. E aha te tahi mau mea tā te Fatu i ha’api’i mai ia tātou nā roto mai i tāna peropheta ora i teie mahana ?

’Ua pi’i te Atua i te mau peropheta nō te fa’atere i tāna ’Ēkālesia.

Te mau Fa’a’itera’a Mana 1 ’e te 2

E tauturu te mau peropheta ia tātou ’ia ’ite i te hina’aro o te Metua i te Ao ra.

• Pēnei a’e e nehenehe te ’itera’a e nāhea te mau pāpa’ira’a mo’a tahito e tū’ati ai i te heheura’a nō teie tau i te tauturu i tā ’outou mau tamari’i ’ia hāro’aro’a i te mau Fa’a’itera’a Mana. E nehenehe ’outou e ani ia rātou ’ia tai’o i Te ’Ohipa 10:34–35 ’e Iakoba 2:27–30 ’e ’ia ani ia rātou ’ia fa’ata’a e aha te pāpa’ira’a mo’a e tū’ati i te Fa’a’itera’a Mana 1 (’o tei arata’i i te hope’a o te fa’aipoipora’a vahine rau) ’e tē tū’ati nei i te Fa’a’itera’a Mana 2 (tei fa’aarahia e roa’a te fa’atōro’ara’a autahu’ara’a ’e te mau ’ōro’a o te hiero i te mau ta’ata nō te mau mamo ato’a). ’A fa’a’ite i tō ’outou ’itera’a pāpū e heheu mai Te Fatu i tōna hina’aro i te mau peropheta tahito ’e nō teie tau.

Nō te tahi atu ā mana’o, ’a hi’o i te ve’a Hoa nō teie ’āva’e.