1 ’E i teienei, i muri a’era, ’ua ha’aputuputu ’āmui mai ra te mau ta’ata e rave rahi, nō te mau ta’ata o Nephi, ē ’ati noa a’e te hiero i te fenua ra nō ’Auhune ; ’e tē māere ra ’e tē ’ūmere ra ho’i rātou iho, ’e tē fa’a’ite ra te tahi i te tahi i te fa’ahuru-’ē-ra’a rahi ’e te māere i tupu.

2 ’E tē paraparau ato’a ra rātou nō ni’a i teie Iesu Mesia, nōna te tāpa’o i fa’a’itehia mai nō ni’a i tōna pohera’a.

3 ’E i muri a’era, ’a paraparau noa ai rātou te tahi i te tahi, ’ua fa’aro’o a’era rātou i te hō’ē reo mai te mea ra ē, nō roto mai i te ra’i ; ’e ’ua nānā atu ra rātou i tō rātou mata ē ’ati noa a’era, ’e ’aita ho’i rātou i ’ite pāpū i te reo tā rātou i fa’aro’o ; e ’ere ho’i te reira i te reo māniania ; ’e e ’ere ho’i i te reo pūai ; ’āre’a rā, ’e noa atu ā e reo iti ha’iha’i te reira, ’ua ha’aputa roa te reira i te ’ā’au o te feiā i fa’aro’o, ’e nō reira ho’i, ’aita roa te hō’ē tufa’a nō tō rātou tino ’o tei ’ore i rurutaina ; ’oia ïa, ’ua ha’aputa roa te reira ia rātou i roto roa i te vārua, ’e ’ua fa’atupu te reira i te ’ahu i roto i tō rātou ’ā’au.

4 ’E i muri a’era, ’ua fa’aro’o fa’ahou a’era rātou i te reo, ’e ’aita rā rātou i ’ite i tōna aura’a.

5 ’E ’ua fa’aro’o fa’ahou a’era i te reo i te toru o te taime, ’e ’ua ha’amahora ihora rātou i tō rātou tari’a nō te fa’aro’o i te reira ; ’e ’ua hi’o atu ra tō rātou mata i te vāhi nō reira mai te haruru o te reo ; ’e ’ua hi’o māite atu rātou i ni’a i te ra’i, i te vāhi nō reira mai te haruru o te reo.

6 ’E inaha, i te toru o te taime ’ua ta’a atu ra rātou i te reo ’o tā rātou i fa’aro’o na ; ’e ’ua nā ’ō mai ra te reira ia rātou :

7 ’A hi’o na i tā’u Tamaiti here, ’ua māuruuru roa vau iāna, ’e ’ua fa’ahanahana ho’i au i tō’u i’oa iāna—’a fa’aro’o mai iāna.

8 ’E i muri a’era, ’a ti’a noa ai rātou ra ’ua nānā fa’ahou atu ra rātou i tō rātou mata i ni’a i te ra’i ; ’e inaha, ’ua ’ite atu ra rātou i te hō’ē ta’ata i te poura’a mai, mai te ra’i mai ra ; ’e ’ua fa’a’ahuhia ’oia i te hō’ē ’ahu teatea ; ’e ’ua pou mai ra ’oia ’e ’ua ti’a mai ra i rotopū ia rātou, ’e ’ua fāriu atu ra te mata o te mau ta’ata ato’a i ni’a iāna, ’e ’aita roa ho’i i ti’a ia rātou ’ia hāmama noa atu i tō rātou vaha nō te parau atu i te tahi ’e i te tahi, ’e ’aita ho’i rātou i ’ite i te aura’a, nō te mea ’ua mana’o ho’i rātou ē, ’ua fā mai te hō’ē melahi ia rātou.

9 ’E i muri a’era, ’ua fa’atoro atu ra ’oia i tōna rima, ’e ’ua parau atu ra i te mau ta’ata, i te nā-’ō-ra’a ē :

10 Inaha, ’o vau nei ’o Iesu Mesia, ’o tā te mau peropheta i fa’a’ite mai e tae mai i te ao nei.

11 ’E inaha, ’o vau nei te māramarama ’e te ora o teie nei ao ; ’e ’ua oti tā’u inura’a i tō roto i te ’āu’a ’ava’ava i hōro’ahia mai e te Metua iā’u ra, ’e ’ua fa’ahanahana ho’i au i te Metua nā roto i te ravera’a i te mau hara a tō te ao nei i ni’a iho iā’u, ’e nā roto i te reira ’ua rave māite au i tō te Metua hina’aro i roto i te mau mea ato’a mai te mātāmua mai ā.

12 ’E i muri a’era, ’ia oti a’era tā Iesu paraura’a atu i teie mau parau, ’ua ma’iri ihora te mau ta’ata ato’a i raro i te repo ; ’e ’ua ha’amana’o ihora rātou ē, ’ua tohu-’ē-hia na i rotopū ia rātou ē, e fa’a’ite mai te Mesia iāna iho ia rātou i muri iho i tōna haerera’a atu i ni’a i te ra’i.

13 ’E i muri a’era, ’ua parau atu ra te Fatu ia rātou, i te nā-’ō-ra’a atu ē :

14 ’A ti’a mai i ni’a, ’e ’a haere mai iā’u nei, ’ia tu’u mai i tō ’outou rima i tō’u nei ’ao’ao, ’e ’ia fāfā ato’a mai ’outou i te mau puta naero i tō’u nei nā rima ’e i tō’u nei nā ’āvae, ’ia ’ite ’outou ē, ’o vau nei te Atua nō ’Īserā’ela, ’e te Atua nō tō te ao ato’a nei, ’e i taparahihia na vau nō te mau hara a tō te ao nei.

15 ’E i muri a’era, ’ua haere atu ra te mau ta’ata, ’e ’ua tu’u atu ra i tō rātou rima i tōna ’ao’ao, ’e ’ua fāfā atu ra i te mau puta naero i tōna nā rima ’e i tōna nā ’āvae ; ’e ’ua nā reira rātou, ma te haere tāta’itahi atu ē hope roa a’e rātou pā’āto’a, ’e ’ua ’ite atu tō rātou mata ’e ’ua fāfā atu tō rātou rima, ’e ’ua ’ite pāpū roa rātou ’e ’ua fa’a’ite pāpū ho’i ē, ’o ’oia mau te reira, ’o tā te mau peropheta i pāpa’i ē, e haere mai.

16 ’E ’ia hope a’era rātou pā’āto’a i te haere atu ’e te ’ite mata atu i te reira, ’ua pi’i a’era rātou ma te ’ā’au hō’ē, i te nā-’ō-ra’a ē :

17 Hosana ! ’Ia ha’amaita’ihia te i’oa o te Atua Teitei Roa ! ’E ’ua ma’iri ihora rātou i te pae ’āvae o Iesu, ’e ’ua ha’amori atu ra iāna.

18 ’E i muri a’era, ’ua parau atu ra ’oia ia Nephi (tei rotopū ho’i Nephi i te mau ta’ata) ’e ’ua fa’aue atu ra ’ia ha’afātata mai.

19 ’E ’ua ti’a a’era Nephi i ni’a ’e ’ua haere mai ra, ’e ’ua pi’o ihora i mua i te Fatu ’e ’ua ’āpā ihora i tōna nā ’āvae.

20 ’E ’ua fa’aue atu ra te Fatu iāna ’ia ti’a mai i ni’a. ’E ’ua ti’a a’era ’oia i ni’a ’e ’ua ti’a noa ihora i mua iāna.

21 ’E ’ua parau atu ra te Fatu iāna : Tē hōro’a atu nei au i te mana ia ’oe, ’ia ti’a ia ’oe ’ia bāpetizo i teie nei feiā ’ia haere fa’ahou atu vau i ni’a i te ra’i.

22 ’E ’ua parau fa’ahou atu ra te Fatu ia vetahi ’ē mau ta’ata, e hō’ē ā ïa tāna parau ia rātou ; ’e ’ua hōro’a atu ra i te mana ia rātou ’ia bāpetizo. ’E ’ua nā ’ō atu ra ’oia ia rātou : E mai teie ïa te huru ’ia bāpetizo ’outou ; ’e ’eiaha roa ho’i te mau mārōra’a ’ia vai i rotopū ia ’outou.

23 ’Oia mau roa tē parau atu nei au ia ’outou na, ’o ’oia ’o tē tātarahapa i tāna ra mau hara nā roto i tā ’outou mau parau, ’e ’o tē hina’aro ’ia bāpetizohia i tō’u ra i’oa, e mai teie ïa te huru ’ia bāpetizo ’outou ia rātou—Inaha, e haere atu ’outou i raro i te pape ’a ti’a noa ai, ’e nā roto i tō’u ra i’oa e bāpetizo ai ’outou ia rātou.

24 ’E i teienei, inaha, teie te mau parau tā ’outou e parau, i muri iho i te fa’ahitira’a i tō rātou i’oa, i te nā-’ō-ra’a ē :

25 Nō te mana i tu’uhia mai iā’u e Iesu Mesia, tē bāpetizo nei au ia ’oe nā te i’oa o te Metua, ’e nō te Tamaiti, ’e nō te Vārua Maita’i. ’Āmene.

26 ’E i reira ’outou e utuhi ai iāna i raro i te pape, ’e ’a haere fa’ahou mai ai i rāpae i te pape.

27 ’E nā reira ’outou i te bāpetizo i roto i tō’u ra i’oa ; ’e inaha, ’oia mau tē parau atu nei au ia ’outou na, ’o te Metua, ’e te Tamaiti, ’e te Vārua Maita’i, ’ua hō’ē ïa rātou ; ’e tei roto vau i te Metua, ’e tei roto te Metua iā’u, ’e te Metua ’e ’o vau nei ’ua hō’ē ïa.

28 ’E e bāpetizo ’outou mai te au i tā’u i fa’aue atu ia ’outou na. ’E ’eiaha roa te mau mārōra’a ’ia vai i rotopū ia ’outou na, mai tei tupu a’enei ; ’eiaha ato’a te mau mārōra’a ’ia vai i rotopū ia ’outou na nō ni’a i te mau tufa’a nō tā’u mau ha’api’ira’a tumu, mai tei tupu a’enei.

29 Nō te mea ’oia mau, ’oia mau tē parau atu nei au ia ’outou na, ’o ’oia tei roto iāna te vārua nō te mārō ra, e ’ere ïa ’oia i ta’u, nō te diabolo rā, ’oia te metua nō te mārō, ’e ’ua fa’ati’arepu ’oia i te ’ā’au o te mau ta’ata ’ia mārō ma te riri i te tahi ’e i te tahi.

30 Inaha, e ’ere teie i tā’u nei mau ha’api’ira’a tumu, te fa’ati’arepura’a i te ’ā’au o te mau ta’ata ’ia riri i te tahi ’e i te tahi ; teie rā tā’u mau ha’api’ira’a tumu, ’ia fa’aru’e-’ē-hia atu taua mau mea ra.

31 Inaha, ’oia mau, ’oia mau, tē parau atu nei au ia ’outou na, e fa’a’ite atu vau ia ’outou i tā’u mau ha’api’ira’a tumu.

32 ’E ’o teie tā’u mau ha’api’ira’a tumu, ’e ’o te mau ha’api’ira’a tumu ïa tā te Metua i hōro’a mai iā’u ; ’e tē fa’a’ite pāpū nei au nō ni’a i te Metua, ’e tē fa’a’ite pāpū nei te Metua nō ni’a iā’u, ’e tē fa’a’ite pāpū nei te Vārua Maita’i nō ni’a i te Metua ’e iā’u nei ; ’e tē fa’a’ite pāpū nei au ē, tē fa’aue ra te Metua i te mau ta’ata ato’a, i te mau vāhi ato’a, ’ia tātarahapa ’e ’ia ti’aturi mai iā’u.

33 ’E ’o ’oia ’o tē ti’aturi mai iā’u ra ’e ’o te bāpetizohia ra, e fa’aorahia ïa ’oia ; ’e ’o rātou ho’i teie ’o tē fāri’i i te bāsileia o te Atua ra.

34 ’E ’o ’oia ’o tē ’ore e ti’aturi mai iā’u ra, ’e ’o tē ’ore e bāpetizohia ra, e fa’ahapahia ïa.

35 ’Oia mau, ’oia mau, tē parau atu nei au ia ’outou na, ’o teie tā’u mau ha’api’ira’a tumu, ’e tē fa’a’ite pāpū nei au ē nō ’ō mai te reira i te Metua ra ; ’e ’o ’oia ’o tē ti’aturi mai iā’u ra, e ti’aturi ato’a ïa ’oia i te Metua, ’e nā te Metua e fa’a’ite pāpū atu iāna nō ni’a iā’u ; ’e e hō mai ho’i ’oia i te auahi ’e te Vārua Maita’i iāna.

36 ’E nā reira te Metua i te fa’a’ite pāpū atu nō ni’a iā’u, ’e e fa’a’ite pāpū atu ho’i te Vārua Maita’i iāna nō ni’a i te Metua ’e iā’u ato’a nei ; ’e te Metua, ’e ’o Vau, ’e te Vārua Maita’i ra, ’ua hō’ē ïa.

37 ’E tē parau fa’ahou atu nei au ia ’outou na, ’ia tātarahapa ’outou, ’e ’ia riro ’outou mai te hō’ē tamari’i ri’i, ’e ’ia bāpetizohia i tō’u ra i’oa e ti’a ai, ’e ’ia ’ore ra, e’ita roa ïa ’outou e fāri’i i teie mau mea.

38 ’E tē parau fa’ahou atu nei au ia ’outou na, ’ia tātarahapa ’outou, ’e ’ia bāpetizohia i tō’u ra i’oa e ti’a ai, ’e ’ia riro mai te hō’ē tamari’i ri’i e ti’a ai ; ’e ’ia ’ore ra, e ’ore roa ïa ’outou e fāri’i i te bāsileia o te Atua ra.

39 ’Oia mau, ’oia mau, tē parau atu nei au ia ’outou na, ’o teie tā’u mau ha’api’ira’a tumu, ’e ’o rātou ’o tē patu ia rātou i ni’a iho i te reira ra, tē patu ra ïa i ni’a iho i tā’u nei papa, ’e e ’ore roa rātou e noa’a i te mau ’ūputa o hade ra.

40 ’E ’o ’oia ’o tē fa’arahi ’e ’aore rā ’o tē fa’aiti i te reira, ’e ’o tē fa’ariro ho’i i te reira ’ei mau ha’api’ira’a tumu nā’u ra, nō roto mai ïa te reira i te ’ino, ’e ’aore ho’i i patuhia i ni’a iho i tā’u ra papa, ’ua patu rā ’oia i te reira i ni’a iho i te niu one, ’e te vai-’īriti-noa-hia ra te mau ’ūputa o hade nō te fāri’i mai iāna, ’ia tae mai te mau pape pu’e ’e ’ia farara mai te mau mata’i i ni’a iho ia rātou.

41 Nō reira, ’a haere atu ’outou i teie feiā nei, ’e ’a fa’a’ite atu i te mau parau tā’u i parau a’enei, ē tae noa atu i te mau hope’a o te fenua.