1 ’E i teienei, i muri a’era, ’ia fa’aoti a’era Iesu i teie nei mau parau, ’ua nānā a’era tōna mata i ni’a i te mau ta’ata ē ’ati noa a’e iāna, ’e ’ua nā ’ō atu ra ia rātou : Inaha, ’ua fa’aro’o iho nei ’outou i te mau parau i ha’api’ihia e au nā mua vau i tae ai i ni’a i tō’u ra Metua ; nō reira, ’o ’oia ’o tē ha’amana’o i tā’u nei mau parau ’e ’o tē ha’apa’o i te reira, ’o ’oia ïa tā’u e fa’ati’a i ni’a i te mahana hope’a ra.

2 ’E i muri a’era, ’ia oti a’era tā Iesu paraura’a atu i teie mau parau, ’ua ’ite ihora ’oia ē tē vai ra te tahi mau ta’ata i rotopū ia rātou ’o tē māere ra ’e ’o te ’ūmere ra e aha tāna i hina’aro ia rātou ’ia rave nō ni’a i te ture a Mose ; ’e ’aita ho’i rātou i māramarama i te parau ’o tē nā ’ō ra ē, ’ua ma’iri te mau mea tahito, ’e ’ua fa’a’āpīhia te mau mea ato’a ra.

3 ’E ’ua nā ’ō atu ra ’oia ia rātou : ’Eiaha ’outou e māere i tā’u i parau atu ia ’outou ē, ’ua ma’iri te mau mea tahito, ’e ’ua fa’a’āpīhia te mau mea ato’a ra.

4 Inaha, tē parau atu nei au ia ’outou na ē, ’ua fa’ati’ahia te ture i hōro’ahia atu ia Mose ra.

5 Inaha, ’o vau teie tei hōro’a atu i te ture, ’e ’o vau tei fafau atu i tō’u ra nūna’a ia ’Īserā’ela ; nō reira, ’ua fa’ati’ahia te ture i roto iā’u nei, ’e ’ua haere mai ho’i au nō te fa’ati’a i te ture ; nō reira ’ua fa’aotihia ïa.

6 Inaha, ’aita vau i fa’a’ore i tā te mau peropheta, ’o tei ’ore i fa’atupuhia nā roto iā’u nei, ’oia mau tē parau atu nei au ia ’outou na, e fa’atupuhia ïa te reira.

7 ’E nō te mea ho’i ’ua parau atu vau ia ’outou na ē, ’ua ma’iri te mau mea tahito, ’aita vau i fa’a’ore i tei parauhia nō ni’a i te mau mea e tupu a muri atu.

8 Inaha ho’i, ’aita te fafaura’a ’o tā’u i fafau atu i tō’u ra mau ta’ata i tupu, te ture rā i hōro’ahia atu ia Mose ra, ’ua fa’a’orehia ïa nā roto iā’u nei.

9 Inaha, ’o vau te ture, ’e te māramarama. Hi’o mai iā’u nei, ’e ’a tāmau ā ē tae noa atu i te hope’a, ’e e roa’a ia ’outou te ora ; ’e ’o ’oia ’o tē tāmau ā ē tae noa atu i te hope’a ra, ’o tā’u ïa e hōro’a atu i te ora mure ’ore.

10 Inaha, ’ua hōro’a atu vau i te mau fa’auera’a ia ’outou ; nō reira, ’a ha’apa’o i tā’u ra mau fa’auera’a. ’E ’o teie ïa te ture ’e te mau peropheta, ’e nā rātou ho’i i fa’a’ite pāpū mai nō ni’a iā’u.

11 ’E i teienei, i muri a’era, ’ia oti a’era tā Iesu paraura’a atu i teie mau parau, ’ua nā ’ō atu ra ’oia i te tino ’ahuru ’e ma piti ’o tāna i mā’iti :

12 ’O ’outou tā’u mau pipi ; ’e e māramarama ’outou nō teie nei feiā, ’oia ho’i te hō’ē toe’a nō te ’utuāfare o Iosepha.

13 ’E inaha, teie te fenua nō tō ’outou ’āi’a ; ’e nā te Metua te reira i hōro’a atu ia ’outou.

14 ’E ’aita roa te Metua i hōro’a noa mai a’e i te hō’ē fa’auera’a iā’u ’ia fa’a’ite i te reira i tō ’outou mau taea’e i Ierusalema ra.

15 ’Aita roa ato’a te Metua i hōro’a noa mai a’e i te hō’ē fa’auera’a iā’u ’ia fa’a’ite ia rātou nō ni’a i te tahi ato’a mau ’ōpū nō te ’utuāfare o ’Īserā’ela, ’o tā te Metua i arata’i ’ē atu i rāpae i te fenua.

16 ’O teie ana’e rā tā te Metua i fa’aue mai iā’u ’ia fa’a’ite atu ia rātou :

17 E māmoe ’ē atu ā ta’u, e ’ere i tō teie nei ’āua ; e arata’i ato’a mai au ia rātou e ti’a ai, e fa’aro’o mai ho’i rātou i tō’u reo ; ’e ’ia hō’ē a’e nana, ’e ’ia hō’ē a’e tīa’i māmoe.

18 ’E i teienei, nō tō rātou ’ā’au ’eta’eta ’e te ti’aturi ’ore i ’ore ai rātou i māramarama ai i tā’u ra parau ; nō reira vau i fa’auehia ai ’eiaha roa e parau fa’ahou atu ia rātou i te parau nō te Metua nō ni’a i taua mea ra.

19 ’Āre’a rā, ’oia mau, tē parau atu nei au ia ’outou na, ’ua fa’aue mai te Metua iā’u ’ia fa’a’ite atu ia ’outou ē, i fa’ata’a-’ē-hia na ’outou mai rotopū atu ia rātou nō tā rātou mau ’ohipa ’ī’ino ; nō reira nō tā rātou mau ’ohipa ’ī’ino, ’aita rātou i ’ite ia ’outou.

20 ’E ’oia mau, tē parau fa’ahou atu nei au ia ’outou na, i fa’ata’a ’ē na te Metua i te tahi atu mau ’ōpū mai roto mai ia rātou ; ’e nō tā rātou mau ’ohipa ’ī’ino, ’aore rātou i ’ite ia rātou.

21 ’E ’oia mau tē parau atu nei au ia ’outou na, ’o ’outou ho’i teie ’o tā’u i parau na ē : E māmoe ’ē atu ā ta’u, e ’ere i tō teie nei ’āua, e arata’i ato’a mai au ia rātou e ti’a ai, e fa’aro’o mai ho’i rātou i tō’u reo ; ’e ’ia hō’ē a’e nana, ’e ’ia hō’ē a’e ho’i tīa’i māmoe.

22 ’E ’aita rātou i māramarama i tā’u ra parau, ’e i mana’o ho’i rātou ē, nō te mau ’Ētene taua parau ra ; ’aita ho’i rātou i ’ite ē, e fa’afāriuhia mai te mau ’Ētene nā roto i tā rātou ha’api’ira’a.

23 ’E ’aita ho’i rātou i māramarama i te aura’a nō tā’u ra parau ē, e fa’aro’o mai ho’i rātou i tō’u reo ; ’e ’aita ho’i rātou i māramarama i te aura’a nō tā’u ra parau ē, e ’ore roa atu te mau ’Ētene e fa’aro’o i tō’u reo—’e e ’ore roa ho’i au e fa’a’ite iā’u iho ia rātou, maori rā nā roto i te Vārua Maita’i.

24 Inaha rā, ’ua fa’aro’o mai ’outou ’e rātou ato’a i tō’u reo, ’e ’ua ’ite ato’a mai ho’i iā’u ; ’e e māmoe ’outou nā’u, ’e ’ua tai’ohia ’outou i rotopū ia rātou ’o tā te Metua i hōro’a mai iā’u nei.